Month: March 2021

March 11, 2021

Om Namaha Shivaya
Aaj Ka Suvichaar 🙏🏻🙏🏻 # 1117

  MahaShivratri Ka Paawan Tyohaar

MahaShivratri ka paawan tyohaar hai aaya,
Har disha mein shubh Spandan hai chhaaya,
Padma raja rathri bhi kehte hain is tyohaar ko,
Sajaate hain Shivbhakt apne ghar aur dwaar ko.

Falgun ke maheene kee Krishna Chaturdashi par,
MahaShivratri manaayi jaati hai,
Har maheene kee Shivratri mein sabse mahaan,
MahaShivratri kehlaati hai.

Kuch bhakton ka kehna hai ki is din
Shivji,
Brahma aur Vishnu kee kee hui pooja se huey prasann,
Unhonei Brahma aur Vishnu par kripa kee,
Aur kar diya Unhe prapann aur sampann.

MahaShivratri ka paawan parv,
Maa Parvati aur Shivji ke vivaah ka bhi prateek hai,
Jo bhakt is din Shiv ka stavan kar ke Unhe prasann hai karta,
Kehte hain ki uske liye moksh nazdeek hai.

Adhyaatmik unnati ke liye MahaShivratri ka hai anokha mahatva,
Is tyohaar par sadhna karne se praapt ho sakta hai atmic tattva.
Shiv tattva ka gyan hee param gyan hai,
Isliye bhi yeh tyohaar itna mahaan hai.

Ghee shakkar shehed dahi aur doodh se hota hai,
Shivlinga ka abhishek bhakton ke dwaara,
Sab Shivji ka gungaan karte hain,
Bahut hee sundar hota hai nazaara.

Kuch jann aisa bhi maante hain,
Ki is raat ko Shivji taandav nritya Hain karte,
Samudra Manthan mein jabb Shivji vish kanth mein rakh kar Neel kanth huey,
Kuch jann MahaShivratri par isliye Shiv ka Shukrana hain karte.

Tarehn tarehn kee vidhiyon se,
Pooja hoti hai Shivji ke sammaan mein,
Antt karan ko jagaane hetu,
Bhakt saari raat baithte hain dhyan mein.

Guruji ke bhakton ke liye MahaShivratri bahut hee vishesh tyohaar hai,
Guruji ke satsang hain hotey aur sajtaa Unka darbar hai,
Langar prasad aur bhakton ka naach gaana,
In sabse vaatavaran hota hai divya aur suhaana.

Shivji ke geeton ka hota hai shravan aur manan,
Kaheen hota hai kirtan toh kaheen koi gaata hai bhajan,
Shivoham ka ruhaani satya aur divya ehsaas,
Ye bhi banaata hai is parv ko bahut khaas.

Guruji MahaShiv ka Hain avataar,
Karne aaye Ve sangat ka uddhaar,
Unkee sharan mein mil kar manaayein,
MahaShivratri ka paawan tyohaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 10, 2021

Om Namaha Shivaya
Aaj Ka Suvichaar 🙏🏻🙏🏻 # 1116

         Shivji Ke Anekon Naam

Guruji Hain MahaShiv ke avataar,
Bhakt Unhei poojein baarambaar,
Unhonei hee sambhaala hai poora sansaar,
Anek naamon se bhakt sakte hain Unhe pukaar.

Girish bhi Ve Hain,
Ve hee Hain Gangadhar,
Ganakarta bhi Hain Shivji,
Ve hee Hain Gaurishankar.

Ve hee Ravilochan,
Ve hee Hain leela dhaari,
Sab kahein Unhe Trilochan,
Kyunki Ve Hain trinetradhaari.

Sambhaalein Ve saara trilok,
Ve hee Hain Alok,
Ve hee Hain Anantadrishti,
Aur sambhaalte Hain sampoorna srishti.

Ek se anek ho jaane waale,
Ve hee Hain Bahubhutah,
Itne roop aur aakaar waale,
Ve hee Hain Bhava aur Bahurupah.

Jinkee leela hai aparampaar,
Ve Hain karunamayi Kedar,
Jinkee mahima ka hum karte hain gungaan,
Hain Ve mahaan Ishaan.

Ve Hain sankat haran aur mangal karan,
Unke pavitra hain sthaan isliye bulaaye jaate Hain Chidambaram,
Unhei manohar aur ramneeya jaan,
Unka naam hua Abhirama.

Nityasundar Neelkantha Har,
Kripanidhi Devarshih Harihar,
Chandramauli Jatin aur Jayant,
In sab naamon se bhi pukaare jaate Hain Shiv Bhagwant.

Ucchatam aur Sarvshreshth, isliye Adyah,
Sarvottam Sarveshwar Adhirorah,
Srishti ke sarvapratham racheta Hain Ve,
Isliye kehlaate Hain Adikarah.

Ve hee Charulingah, Ve hee Chekitanah,
Ve hee Dakshah, Achintyah, aur Giriruhah,
Shambhu, Akshat, Aniket bhi Ve,
Aur Ve hee Hain Abhay aur Mrityunjay.

Varada se bhi sambodhit hotey Hain Sadashiv,
Shaasak aur swami bannkar huey Ve Lokapal,
Srishti ke sanhaarak honei se,
Unka aur ek Jyotirlinga ka naam hua Mahakal.

Aniruddha, Sukhad, Sarvayoni,
Ashutosh, Bhalanetra, Tejaswini,
Har tarehn se saraahneeya Hain Ve Idhyah,
Jo swayam hee Hain Bhasmabhutah.

Balavan Hain Bhootnath Bhagava,
Nataraj Hain Bholenath Bhairava,
Pashupati Bhudeva Bhavesh,
Paramjyoti Umapati Devesh.

Dhyandeep Niranjan Hain aur Hain Gandalih,
Shoolin Hain, Hain Gopalih aur Gatih,
Guruji Hain, Jagdish Hain hamaare Mahesh,
Shrutiprakash Hain Ye Vyomakesh.

Kaushik Akshayguna Ve Hain Amitrajit,
Nibhaate Hain Ve sabse preet kee reet,
Dakshinmurti bhi Hain aur Kailashnaath bhi,
Veerbhadra Shankar aur Vishwanath bhi.

Rudra Hain, aur Hain Rudransh aur Pushkar,
Hum sab hain Unke sewak, bachche, aur kinkar,
Pranav ke sangg Ve Hain Aja aur Omkar,
Priyadarshan ke saath saath Hain Ve Paalanhaar.

Ishvar Hain hamaare Vishveshwara Nagabhushan,
Aur Ve hee Hain Lingeshwar Bhujanagabhushan,
Devon Ke Dev Hain Amaresah,
Havya aur samarpan se prasann hotey Hain Hutah,
Chalah Harikesah aur Someshwar,
In sabse pukaare jaate hain Maheshwar.

Anekon roop aur anek hain Shivji ke naam,
Guruji ke charnon mein hai Shivji ka dhaam,
Har jann ka karte Hain Ve kalyaan,
Har bhakt par rehte Hain meharbaan.

Shukrana hai Guruji Aapka,
Jo Aapne hamein sweekaara,
Aapke dayadaan se jagg gaya,
Soya hua bhaagya hamaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 9, 2021

Om Namaha Shivaya
Aaj Ka Suvichaar 🙏🏻🙏🏻# 1115

MahaShivratri Aane Waali Hai

Damru baja raha hai,
Darbar saj raha hai,
Aa raha hai mazaa,
Guruji kee hai razaa.

MahaShivratri aane waali hai,
Dil mein khushi matvaali hai,
Guruji kee paalaki saj rahi hai,
Madhur dhwani baj rahi hai.

Har bhakt khush hokar hai bola,
Ki Guruji pehenenge aalishaan chola,
Apne darshan denge saari sangat ko,
Mitaayenge kitnon ke sankat ko.

Sabko milega Langar prasad aur mithai,
Sabko Shiv Parvati ke aane waale vivah kee badhaayee,
Kaheen bhakton ne shuru kiya baaja bajaana,
Toh kaheen shuru ho gaya hai naach aur gaana.

Khoob saare gulaab hain,
Aur bhi phool lajawaab hain,
Khushboo se mehek raha hai kona kona,
Shivji ke noor ke aagey pheeka laagey sona.

Khushi aur mauj masti ke beech,
Is tyohaar ke sadhna se jude mahatva ko na bhoolein,
Aayiye, MahaShiv Guruji ke paawan ashirwaad se,
Hum Unkee mamta kee goad mein jhoolein.

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

March 8, 2021

Om Namaha Shivaya
Aaj Ka Suvichaar 🙏🏻🙏🏻 # 1114

              Mahaan Taruvar

Chulbuli si ek chidiya thi,
Udaan bhar rahi thi neele akash mein,
Jaise jaise dhoop chadhne lagi,
Dikhna mushkil hua sooraj ke prakash mein.

Chidiya ne soch vichaar kiya,
Phir vishraam karne ke nirnay liya,
Prakriti ne aaraam ke liye dhaam dikhaaya,
Aur chidiya ko ek sundar taruvar nazar aaya.

Chidiya baithi uss ped kee daali par,
Aur daali neevi hokar jhuk gayi,
Dolti hui hawaa ne dekha,
Aur veh ek pal ke liye naman mein ruk gayi.

Jis taruvar ka hissa thi veh daali,
Uss taruvar kee thi shaan niraali,
Jo paani kee boondein ped ke patton par thein saji,
Unse nanhee chidiya kee pyaas bujhi.

Taruvar par thodi der baith kar achcha lagaa,
Chidiya ko mila sukoon,
Tez dhoop thodi kumm hui,
Usey hua phir se udne ka junoon.

Chidiya ko taruvar ne sahaara diya,
Aur badle mein kuch bhi nahin liya,
Chidiya udd gayi thodi der ke baad,
Daali ne diya usey pyaar bhara ashirwaad.

Nanhee chidiya kee bhanti,
Jeevan mein bharte hain hum udaan.
Guruji Hain ek mahaan taruvar,
Jo hotey Hain hum par meharbaan.

Aayiye, Guruji kee kripa kee chhaaon mein,
Udte huey is duniya ke gaaon mein,
Hum lein Guruji kee baahon ka sahaara,
Kyunki kewal Guruji dwara hoga uddhaar hamaara.

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

March 7, 2021

Om Namaha Shivaya
Aaj Ka Suvichaar 🙏🏻🙏🏻 # 1113

                   Saadhak Ka Dil

Har sangi saathi chhoot gaya thaa,
Saadhak ka dil toot gaya thaa,
Aaspaas bilkul andhera thaa,
Aur dil mein bhi nahin savera thaa.

Pichhlee yaadein goonj rahin thi kaan mein,
Itna moh jo ho gaya thaa usey ghar aur santaan mein,
Behen bhai meet bhi de gaye thei pyaar mein dagaa,
Kalyuga kee hawaa ne maansik taur par usey diya thaa jagaa.

Usne toh diya thaa sabko pyaar,
Aur ye nahin ki usey mila nahin thaa pyaar,
Lekin vajeh thee peechhe uss pyaar ke,
Aur veh maayus ho gaya thaa haar ke.

Guruji se veh kehne lagaa,
Ki veh udaas hai rehne lagaa,
Nikaala usne batuye se Guruji ka Swaroop,
Aur nihaarne lagaa Guruji ka Sowmya roop.

Uske dil ne suna jo Guruji ne usey kaha,
Sunn kar uske chakshu se bhaav bharaa aansoo baha,
Karne lagaa phir veh Guruji se baat,
Baatein karte karte beet hee gayi raat.

Baatein kee usne Guruji se bahut saari,
Bhoolne lagaa apne dukh aur apni beemaari,
Usne Guruji kee prashansa kee, phir kiya Unka shukrana,
Itnee baaton ka shukrana thaa ki bhool hee gaya apne gumm bataana.

Phir jabb unkee yaad aayi usey toh itne maamuli lagne lagey usey ve sabb gumm,
Guruji se vaartaalaap karte karte ve bhi khud-bakhud hotey gaye kumm,
Guruji ne saadhak ko Apni divya mehek ka bhi diya ashirwaad,
Bahut prasann hua saadhak paa kar veh paawan prashad.

Usne Guruji ko prem bharaa geet sunaaya,
Phir shraddha se Guruji ka aur bhi gungaan gaaya,
Guruji kee aankhon ne diya usey meetha sa sandesh,
Jo uske hriday mein kar gaya pravesh.

Samajh gaya veh ki koi aur ho ya na ho,
Uske paas Guruji Hain har pal,
Guruji hee saath nibhaayenge sadaa,
Ve sadaa sunenge uskee har sadaa.

Telepathy se usey samajh mein aaya,
Ki Guruji ne uske gumm ka bojh hai uthaaya,
Guruji kee ruhaani maujoodagi se saadhak ko mila sukh aur chayyn,
Dukh ka asar honei lagaa pheeka aur Guruji ke darshan se ujjwal huey uske nayyn.

Aane lagi saadhak ke chitt mein jaagriti,
Ki is duniya aur duniya waalon kee toh maya bhari hai aakriti,
Kiya faisla usne ki veh Guruji kee mehar se nibaata chalega apna farz,
Taaki yahaan se jaane ke samay uspar ho kumm se kumm karmon ka karz.

Jaise jaise mann mein ujaala hua gyan ka,
Kumm honei lagaa mann mein tufaan laukik armaan ka,
Usne batuye mein vaapis rakha choom kar Guruji ke Swaroop ko,
Aur naman kiya sooryodaya ke sangg aayi hui sunehri dhoop ko.

Mann mein hua aisee subuddhi ka ujaala,
Ki saadhak hokar Guru prem mein matvaala,
Chal diya lekar ek nutan nazariya,
Aur raas aane lagi usey jeevan kee dagariya.

Jabb se saadhak is bhaav mein baha,
Saadhak ka toota dil toota na raha,
Guruji kee kripa se dil ko laagi Guruji kee lagan,
Jeene lagaa veh buss Guruji mein hokar magan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 6, 2021

Om Namaha Shivaya
Aaj Ka Suvichaar 🙏🏻🙏🏻 # 1112

Sthir Aur Shaant Rehne Ka Hal

Chala gaya beeta hua kal,
Aaj bhi har pal beeta jaa raha hai,
Har jann kee apni kahaani hai,
Har pal ne har jann se kuch suna aur kuch kaha hai.

Lekin kya maalum kisne suna aur kisne nahin suna,
Kisne yaadgaar banaane ke liye kin palon ko hai chuna,
Kisey waqt kee raftaar mein yaadein batorne kee sudh budh hee na rahi,
Aur kisne har pal ko hee maan liya yaadgaar ke liye sahi.

Ye lagti hain chhoti chhoti baatein,
Lekin ye bayaan karti hain mann ka haal,
Jitna mann sthir aur shaant hota hai,
Utna hee kumm uthta hai aisa sawaal.

Kyunki paristhiti na bhi ho apne vash mein,
Toh bhi hamaari pratikriya hamaare vash mein hoti hai,
Kyunki moh mein bin phanse har pal ko bitaakar,
Hamaare chitt kee shanti nahin khoti hai.

Aasaan nahin lagta ye karna toh yaad rahe,
Ki ye namumkin bhi nahin hai,
Koi bhi nirnay lene ke liye sthir mann zaroori hai,
Aur yahee atma ke liye bhi sahi hai.

Guruji ke simran mein hai veh shakti,
Jis se is mann aur atma kee unnati nahin rukti,
Mann har pal ka bhaagi honei se zyada, Har pal ka darshak bann jaata hai
Aisa karne se atyadhik sukh ya dukh mein bhi,
Mann aapa nahin kho paata hai

Phir kaisa bhi pal aaye aur jaaye
Simran kee shakti se prabal rehta hai mann
Aur har pal ka saamna kar ke bhi,
Kumm nahin hota adhyaatmik dhan.

Yeh baat sunn-ne ya kehne se nahin,
Balki karne se hee sachchi pramaanit hoti hai,
Isliye kar lein Guruji ka simran aur dhyan,
Chaahe umr badi ya phir chhoti hai.

Guruji madad karenge yakeenan har moad par,
Kabhi besahaara na honei denge hamein chod kar,
Har pal kee karte huey poori anubhooti,
Anaasakt rehne kee koshish kee hoti rahe poorti,
Toh adhyatmik manzil par pahunchenge Guruji kee mehar se,
Jahaan mulaakaat hogi sthirtaa aur shanti kee sehar se.

Phir chaahe veh ho aane wala pal,
Ya phir veh pal jo abb hai beeta hua kal,
Koi bhi yaad mann ko vichalit karne mein na hogi safal,
Kyunki mann ko mil jaayega sthir aur shaant rehne ka hal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 5, 2021

Om Namaha Shivaya
Aaj Ka Suvichaar 🙏🏻🙏🏻 # 1111

Paanch Tattvon Ka

Paanch tattvon ke mishran se,
MahaDev ne banaaya hai har praani,
Inhee tattvon se shuru hoti hai zindagaani,
Aur inhee mein milkar khatm hoti hai iskee kahaani.

Bhumi, Jal, Agni, Vaayu, Akash ke sammilan se banta hai,
Pashu, pakshi, ped, paudhon, aur insaan ka nirjeev shareer,
Aur shareer mein jabb atma ka pravesh hota hai,
Toh usey praapt hoti hai jeevit honei kee taqdeer.

Kisee mein ek tattva zyada hota hai,
Aur baaki tattva hotei hain kumm,
Jis tattva kee adhik matra hoti hai,
Uss mein adhik lagta hai mann.
Haathi mein mitti aur jal hota hai adhik matra mein,
Isliye vo mitti aur paani se khelta hai apne jeevan kee yatra mein.

Suna hai saamp mein agni kee sarvaadhikta se,
Saamp mein tej hota hai prabal,
Aur keedi halki aur phurteeli hai hoti kyunki,
Kumm mitti honei se zyada vazan ka hota hai hal.

Akash ke tattva ka mahatva hai hamaari vaani mein,
Yeh gati aur protsaahan deta hai zindagaani mein,
Prithvi nishchay karti hai hamaare shareer kee gandh ka,
Aur saath hee andaaza deti hai jeev ke ghamand ka.

Dekhne ka saamarthya aur urja,
Ismein agni ke alaawa na hai koi tattva dooja,
Gati aur sparsh kee shakti kee vaayu se rachna hai hoti,
Vayu ke diye vaig ke kaaran is shakti kee hoti hai badhauti.

Sheetalta aur sikuran se hai jal ke tattva ka naata,
Buddhi ka parichay aur swad ka anand bhi jal se hee hai aata.
Lal rangg hai Agni ka, vayu ka varna hai bhoora ya neela,
Jal ka safed, akash ka kaala, aur bhoomi ka varna hai peela.

Jaise har tattva ka pradarshan hota hai,
Alagg alagg rangon se,
Vaise hee tattva kee sthiti kee jaati hai,
Shareer ke bhinn bhinn angon se.

Shareer kee sthiti mein akash ko naam mila hai mastak ka,
Aur jaanghon se hoti hai Prithvi kee sthiti,
Naabhi se Vayu kee aur pait se hoti hai jal kee sthiti,
Agni ka angg hai kandha, jis se hoti is tattva kee sthiti.

Inhee tattvon se baney hain hum,
Aur inhee mein parivartit hai ho jaana,
Inhee se chalega jeevan Guruji kee mehar se,
Aur phir inhee mein hai hamein samaana.

Phir kyun hai lobh, jhooth, ahankaar?
Phir kyun mann mein hain tuchh vichaar?
Kyun hum itna itraate hain,
Kyun apni asaliyat bhool jaate hain?

Kehte rehte Hain Guruji,
Ki mann kee saadagi aur saralta hai bahut zaroori,
Har pal yaad rakhein ki kisee bhi pal mein samaa sakte hain in tattvon mein,
Taaki sachchaayee se na rahe koi bhi duuri.

Is yaad kee mohar lagaakar antar-mann mein,
Dhyan dein adhyatmik dhan mein,
Taaki antt vele jabb shareer tattvon mein ho jaaye vileen,
Tabb atma apna safar tayy kar ke Paramatama mein ho jaaye leen.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 4, 2021

Om Namaha Shivaya
Aaj Ka Suvichaar 🙏🏻🙏🏻 # 1110

       Bhaagya Ke Dwaar Khul Gaye

Pyaare Guruji,

Bhaagya ke dwaar khul gaye,
Jis pal Aap hamein mil gaye,
Aapne hamein apnaaya,
Hamaara jeena safal banaaya.

Madhur mamta ka dulaar dekar,
Pita ka paawan pyaar dekar,
Haath pakda hamaara aur hamein chalna sikhaaya,
Aur chalte chalte raaste ke kaanton se hamein bachaaya.

Kuch kuch kaante chubhne diye paaon mein
Taaki fark jaan paayein hum jeevan kee dhoop aur chhaaon mein
Hamaare har ghaav par Apni karuna ka marham Aapne lagaaya
Aur jabb bhi hamein Aapne himmat dee aur hamein uthaaya

Duniya kee kalyugi baaton se jabb hamaara mann bhar aaya
Tabb bhi Aapne har ghaav par Apne sneh ka marham lagaaya
Simran, sewa, aur satsang kee dee Aapne daat
Samarpan karna sikhaaya Aapne hamein din aur raat

Aapka Shukrana karne ke liye kaafi nahin hain koi bhi alfaaz
Aapki mahima gaane ke liye nipun nahin hai koi bhi awaaz
Kyunki Aapki mahima hai anant aur aparampaar
Aur anek seemaaon main bandhaa hai yeh sansaar

Phir bhi sachchi koshish dekhkar Aap itnee kripa karte Hain
Ki Aapke bhakt umr bhar Aapki dee daaton se jholi bharte hain
Buss, yoon hee Apni kripa sab par rakhna Aap banaaye
Taaki har jann aakhiri saans lete huey bhi Aapka gungaan karta jaaye

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 3, 2021

Om Namaha Shivaya
Aaj Ka Suvichaar 🙏🏻🙏🏻 # 1109

   Guruji Hain Sabse Pyaare Meet

Guruji Hain sabse pyaare meet,
Ve sab bhakton ka dil lete Hain jeet,
Aayiye, Unke sangg nibhaayein sachchi preet kee reet,
Aur gaayein hum Unkee mahima ke geet.

Guruji Hain bhakton ke bhraata,
Unka sabke sangg hai nirmal naata,
Unhe bhakton ka bholapan hai bhaata,
Unka naam itna sukh hai pahunchaata.

Guruji Hain Apne bhakton ke naath,
Har pal rehte Hain Ve sabke saath,
Unke liye har bande kee ek hee hai jaat,
Unhe hum sabki asaliyat hai gyat.

Guruji Hain murshid hamaare,
Hum hain shaagird, Ve Hain peer pyaare,
Jeevan mein ujaala hai Unhee ke sahaare,
Yeh agyani mann maargdarshan ke liye Unhe pukaare.

Guruji Hain hamaare baagbaan,
Bahut hee nyaari hai Unkee muskaan,
Poora karte Hain har kalyaankaari armaan,
Sach mein Hain Ve amrit kee khan.

Guruji Hain hum sabke nigahbaan,
Hamaari raksha ka karte Hain intazaam,
Hamaari dhadkan aur hamaare praan,
Unka hee diya hua hai yeh daan.

Guruji Hain MahaShiv Bhagwaan,
Hum sab hain Unkee santaan,
Apne sab bhakton par Ve Hain sadaa meharbaan,
Sampoorna srishti mein koi bhi nahin hai Unke jaisa mahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 2, 2021

Om Namaha Shivaya
Aaj Ka Suvichaar 🙏🏻🙏🏻 # 1108

          Museebaton Ka Bhaar

Dena hee hoga Guruji ko tujhe apni museebaton ka bhaar,
Tujhse ye aur uthaaya na jaayega,
Ve toh Guruji hee kar sakte Hain,
Unhee ke ashish dwara tu raahat paayega.

Yeh bojh bahut hee bhari hai,
Aur agar karni mukti kee tayyaari hai,
Toh phir vikaaron ka karna hoga tyaag,
Taaki atma par na lagg jaayein aur daag.

Pichhle daag bhi mitaane hongei,
Isliye simran karna hai bahut zaroori,
Simran karte karte lagne lagega dhyan,
Aur tabhi praapt hoga adhyaatmik gyan.

In sabse sahaayata milegi tujhe,
Tere bhaar ko halka karne kee,
Guruji sab sambhaalenge,
Isliye zaroorat nahin hai tujhe darne kee,

Na mehsoos kar swayam ko tu majboor,
Hokar niswaarth prem se bharpoor,
Kar le tu har sanshay ko chuur,
Aur honei de andhere ko duur.

Tere karmon se bhare is safar ko,
Guruji Apni kripa se sulajhaayenge,
Tu Shukrana karta chal har pal,
Dekhna, tere kaaraj raas aayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja