Month: May 2021

May 31, 2021

Om Namaha Shivaya
Aaj Ka Suvichaar 🙏🏻🙏🏻 # 1198

         Is Bandhan Kee Badaulat

Bandhee jo Guruji ke sangg,
Meri prem bhari bhakti kee doar,
Tabb se jaana diya chhod,
Mainey kaheen bhi aur.

Is doar ke bandhan mein,
Thaa ek aisa adbhut jazbaat,
Ki is doar mein bandh kar,
Honei lagi mai azaad.

Azaad, andhvishwaas se,
Azaad, gulaami ke har ehsaas se,
Azaad, ruhaaniyat mein aane wali har rukaavat se,
Azaad, zamaane kee bagaavat se.

Is doar mein bandh kar aisa pyaar mila,
Jis se dil ka har ghaav bhar gaya,
Is doar mein bandh kar aisa aitbaar mila,
Jis se mera antar-mann tarr gaya.

Guruji ke sangg bandhe is bandhan mein,
Bahut anand aata hai vandan mein,
Aisee divya mehek hai Unke Spandan mein,
Ki vaisi khushboo na miley kabhi bhi kisee chandan mein.

Har Chandan pheeka pad jaaye,
Gulaab bhi laagey neeras,
Jabb Guruji kee ruhaani mehek,
Dil mein jaati hai buss.

Is bandhan mein bandh kar mainey jaana,
Ki koi seema nahin hai divya pyaar mein,
Aur bandhan mein rehkar yeh sukoon bhi hai,
Ki azaadi hai pyaar ke is izhaar mein.

Koi dikhaawa nahin, koi chadhaava nahin,
Buss jodni hai seedhi taar,
Aur saralta, taralta, aur nirmaltaa se,
Dena aur paana hai dulaar.

Ek kadam jo leti hoon Guruji kee oar,
Toh Guruji anginat kadam meri oar badhaate Hain,
Is tarehn se aur bhi pakka ho raha hai bandhan,
Aur Ve mera haath thaamkar mujhe chalaate Hain.

Guruji, kabhi mukt na karna is bandhan se,
Kabhi vanchit na rakhna mujhe Apne vandan se,
Is bandhan se hee toh mainey mehsoos kiya Aap Paramatama ko,
Is bandhan kee badaulat hee mukti milegi meri atma ko.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 30, 2021

Om Namaha Shivaya
Aaj Ka Suvichaar 🙏🏻🙏🏻 1197

    Guru Ke Roop Mein Bhagwaan

Kal Guruji ka MahaSamadhi Diwas hai,
Hum sabko dilaata hai ye yaad,
Ki hamaare Guruji Bhagwaan Hain,
Unhee se hai yeh duniya aabaad.

Bashar ka roop lekar aaye,
MahaShiv is sansaar mein,
Guruji kehlaaye Ve aadar se,
Sab beh gaye Unke pyaar mein.

Pyaar, jismein Unkee divyata hai,
Pyaar, jismein hai ruhaaniyat,
Pyaar, jo har pal badhta gaya,
Jis se tarr gayi insaaniyat.

Maada waqt hai aana,
Guruji ne bataaya,
Sangat ka aur bhi uddhaar ho,
Isliye Unka roop divya prakash mein samaaya.

Abb pehle se bhi zyada maujood Hain Ve,
Dharti ke har konei mein,
Shraddha ho jis bhakt ke mann mein,
Der nahin lagti uska kalyaan honei mein.

Har satsang mein aate Hain,
Sangat ke mann mein rehte Hain,
Kabhi swapn mein darshan Hain dete,
Kabhi Apne Swaroop dwaara kuch kehte Hain.

Divya khushboo Guruji kee,
Kayee baar sugandhit kar deti hai vaataavaran,
Aaj bhi Unke langar prasad se,
Hota hai kashton ka haran.

Guruji Sarv-vyapi Jagdeeshwar Hain,
Sarvagya antar-yaami aur Sarv-shaktimaan,
Bhagwaan ke roop mein Guru Hain,
Aur Guru ke roop mein Bhagwaan.

Aaj ke is bahut khaas din par,
Duniya mein aur bhi sakaraatmakta hum phailaayein,
Guruji hamaare liye sab kuch karte Hain,
Hum bhi Unke achche bachche bann jaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 29, 2021

Om Namaha Shivaya
Aaj Ka Suvichaar 🙏🏻🙏🏻 # 1196

                     Jeevanmukt

Ved padhe aur padhe puraan,
Phir bhi na mila veh saarthak gyan,
Isliye uskee khoj mein raahi chalta gaya,
Aur intazaar mein har roz sooraj dhalta gaya.

Baitha thak kar neeche taruvar ke,
Sab kuch Guruji ko samarpan kar ke,
Bahut samay takk baitha raha,
Waqt ke bahaav ko sehta raha.

Kuch pal hee nahin,
Kayee din beet gaye,
Mausam badalte gaye,
Jeevan se kayee meet gaye,
Lekin usne Guruji se rishta gehra kiya,
Apni chetna par atal pehra diya,
Anaasakti honei lagi usey bhautikvaad se,
Lagaav kumm hota gaya duniyavi jazbaat se.

Simran mein Guruji ko maan deta raha,
Buss Guruji ka dhyan kar ruhaani khuraak leta raha,
Guruji ko bhi aaya taras,
Uspar Unkee mehar gayi baras.

Duniya ke sabse ujjwal prakash se bhi ujjwal,
Aisa ujaala hua uske antar mann ke lochan mein,
Guruji ke saakshaat darshan huey usey,
Jeevanmukt hua veh uss kshan mein.

Jeevit rehte huey na mil sakta thaa is se behtar uphaar,
Is divya deedaar ke liye usne kiya shukrana baarambaar,
Guruji se saarthak gyan paakar hua uska upkaar,
Jaana aur maana usne ki saaray hai yeh sansaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 28, 2021

Om Namaha Shivaya
Aaj Ka Suvichaar 🙏🏻🙏🏻 # 1195

      Ruhaaniyat Kee Oonchaayee

Zindagi ke safar mein chalte chalte,
Sooraj ke uday hotey hotey aur dhalte dhalte,
Galati se bhi bhool na jaana,
Guruji ke sangg rishta nibhaana.

Safar ke utaar chadhaav mein,
Kamee na aane dena apne bhaav mein,
Kyunki har utaar chadhaav imtehaan hoga bhakti ka,
Har utaar chadhaav imtehaan hoga tumhaari shraddha kee shakti ka.

Utaar par niraash aur udaas na hona,
Chadhaav par ahankaar mein charitra ko na bhigona,
Kyunki chaahe taqdeer mein hansna ho ya ho rona,
Dono ka nishchay hee antt hai hona.

Isliye utaar chadhaav kee paristhiti se,
Na ganvaa baithna rishta mann kee shant sthiti se,
Kyunki mann kee shant sthiti hai bahut zaroori,
Yahee kaam aati hai jabb bhi hoti hai koi majboori.

Is mann kee shant sthiti ke liye,
Kitnee tapasya karni padi har saadhak ko,
Tabb kaheen jaakar ve mitaa paaye,
Apne kiye huey paap aur paatak ko.

Tumhe to Guruji ne diya hai apna naam,
Jiske simran se utaar chadhaav sehna hoga aasaan,
Aur simran hee mann kee sthirtaa ke liye hai sarvottam upaay,
Isliye har shwaas ke sangg bolo ‘Om Namaha Shivaya.’

Jabb mann sthir hokar simran mein leen rahega,
Toh har utaar chadhaav Guruji kee kripa se yoon bahega,
Jaise aakar jaane waali paani kee lehar,
Aur har lehar laayegi Guruji kee mahaan mehar.

Utaar chadhaav aakar chale jaayenge,
Mehar ke anmol ratna chamakte jaayenge,
Simran se mann kee sthirtaa chhoo legi ruhaaniyat kee oonchaayee,
Itnee kalyaankaari hai pyaare Guruji kee vadiyaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 27, 2021

Om Namaha Shivaya
Aaj Ka Suvichaar 🙏🏻🙏🏻 # 1194

          Guruji Sunte Hain Ardaas

Guruji sunte Hain ardaas,
Pooran karte Hain aas,
Lekin hamein maangna hee kahaan aata hai,
Tabhi toh maangne se ghaata ho jaata hai.

Isliye Guruji se Guruji ko hee maang lein,
Har din pehle se bhi zyada Unhe pyaar dein,
Har bhakt hai Guruji ka pyaara sa bachcha,
Chaahiye Guruji ko kewal hamaara bhaav sachchaa.

Bachche hotei hain naadaan,
Bachche hotey hain anjaan,
Bachchon se kusoor bhi ho jaata hai,
Bachchon ko guroor bhi ho jaata hai.

Mata pita phir dobaara samjhaate hain,
Bachchon ko sahi raah dikhaate hain,
Aisa paawan rishta hai mata pita se santaan ka,
Aur har bhakt aur uske Bhagwaan ka.

Guruji mata pita Hain hamaare,
Meet, bhai, shikshak aur rakshak bhi Hain Ve,
Saari sangat hai Unkee santaan,
Aur Ve Hain hamaare MahaShiv Bhagwaan.

Yahaan ke rishte toh reh jaayenge yaheen,
Sach hai ye, chaahe hum karein ya na karein yakeen,
Lekin janma-janmaantar ka hai Guruji ke sangg juda naata,
Hamaare har janam mein yeh rishta hai saath nibhaata.

Isliye arzoo hai ki jabb takk rahe yeh shwaas,
Uske baad bhi rahe Guruji par vishwaas,
Rahe har janam mein Guruji sangg rishta khaas,
Aayiye, karein hum Guruji se yahi ardaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 26, 2021

Om Namaha Shivaya
Aaj Ka Suvichaar 🙏🏻🙏🏻 # 1193

                      Asal Ghar

Nepal ke Lumbini gaaon mein,
Apnepan kee chhaaon mein,
Liya janam ek rajkumar ne,
Aur Unmein basey Vishnuji ke avataar ne.

Raajasi gharaane mein janam liya,
Vahaan ke karmon ka bhugtaan kiya,
Tabb Siddharth Gautam hua Unka naam,
Lekin niyati ka thaa kuch aur hee parinaam.

Dharma arth kaam ke jeevan mein,
Ashaanti hui Unke mann mein,
Phir yuddh ke pashchaat toh hua aisa vishaad,
Ki pashchaataap ka jaagrit hua jazbaat.

Tapasya mein ho gaye Ve leen,
Kyunki Unhe ho gaya thaa yakeen,
Ki sachcha sukh hai anaasakti mein,
Aur anant shakti hai bhakti mein.

Bodh Gaya mein Bargad ke taruvar ke taley,
Unchaas din takk bina hiley,
Kiya Gautam Buddh ne mahaan tapp,
Samjhaaye maanav jaati ko char arya satya.

Ahimsa, dharam aur satya ka maarg dikhaaya,
Insaan ko ruhaaniyat se avagat karaaya,
Isliye aaj ka din parv ke jaise manaaya jaata hai,
Kyunki aise mahapurushon se hee Srishti ka uddhaar ho paata hai.

Aaj Gautam Buddha ke janam kee khushi manaate huey,
Apne antar-mann ko chetna ke mankon se sajaate huey,
Hum Guruji ka karein naman,
Aur karein Unke vachanon par manan.

Sabki manzil ek hai,
Chaahe raaste hon anek,
Bhakti, gyan, aur vairaagya se hee,
Hongei hum Paramatama ke sangg ek.

Is advait avastha se badhkar kuch nahin,
Baaki aur kuch bhi sach nahin,
Simran aur dhyan se hee hogi praapti,
Aur asal ghar kee oar hogi vaapasi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 25, 2021

Om Namaha Shivaya
Aaj Ka Suvichaar 🙏🏻🙏🏻 # 1192

      Mool Aur Saar Tapasya Ka

Ek din toh har kisee ne yahaan se jaana hai,
Na dhan daulat, na koi vikaar kaam aana hai,
Phir kyun atma par bojh lekar chalte hain hum insaan,
Jabb ki ek baar nahin, balki anek baar samjhaate Hain Bhagwaan.

Hum sab toh Guruji ke bhakt hain,
Hamaara kartavya hai Unka anusaran karna,
Guruji ke hee vash mein hai,
Hum sabka jeena marna.

Yeh rishta kewal Guru aur shagird ka nahin,
Yeh rishta hai mata pita ka santaan se,
Aur jabb meet aur bhai bhi mil gaya Guruji mein,
Toh buss seedhi taar jodein Unse aur Unke naam se.

Yug bhi mausam kee bhanti badalte rahenge,
Yeh prakriti kee parampara hai,
Prakriti hum se kaheen zyada shaktishali hai,
Lekin hamaara Guru prakriti se bhi bada hai.

Isliye har pal lete chalein Guruji ka paawan naam,
Is naam ko japte huey karein hum apne saare kaam,
Guruji ke naam mein hai hamaare karmon ke bhugtaan ka bandomast,
Isliye kyun na Unke naam ko japne mein ho jaayein mastt hokar vyast.

Yahee hai sabse saral samaadhaan hamaari har samasya ka,
Yaheen hai mool aur saar hamaari tapasya ka,
Mokshdaayi hai Guruji ka nirmal naam,
Guruji ke naam mein hai har teerath dhaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 24, 2021

Om Namaha Shivaya
Aaj Ka Suvichaar 🙏🏻🙏🏻 # 1191

          Saadagi, Tujhe Salaam

Aye saadagi, tujhe salaam,
Tere sangg hee safal hai jeevan ka imtehaan,
Aaj nahin toh kal, sab ye jaan jaayenge,
Aaj nahin toh kal, sab ye maan jaayenge,
Ki zindagi mein tere bina na chalega kaam.

Yeh sab jo ho raha hai,
Shaayad isliye ho raha hai,
Insaan jab se bhautikvaad mein baha hai,
Uss se bhi pehle se prakriti ne uska ahem saha hai.

Guruji ne kaha maada waqt aayega,
Har koi vikaaron mein doob jaayega,
Vichaaron mein aayega parivartan,
Zaroori ho jaayega saaf karna mann ka darpan.

Isliye saadagi ko karte huey salaam,
Usey pirohein hum soch mein aur karam mein,
Saadagi laayein jeene ke dhangg mein,
Saadagi bharein zindagi kee tasveer ke rangg mein.

Guruji swayam Hain kitne komal,
Ve MahaShiv Hain, nipun aur nirmal,
Kyun na hum bhi jeena banaa lein saral,
Taaki har taareekh ka taraana ho jaaye taral.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 23, 2021

Om Namaha Shivaya
Aaj Ka Suvichaar 🙏🏻🙏🏻 # 1190

              Is Ruhaani Sayyr Par

Muh modne wale milenge,
Dil todne wale milenge,
Lekin Guruji tere rakshak Hain,
Ve tera har ghaav silenge.

Raaste mein phool aayenge,
Kabhi kabhi shool bhi aayenge,
Lekin Guruji tere baagbaan Hain,
Ve teri bagiya sundar banaayenge.

Pyaar lutaane wale aayenge,
Pyaar mitaane wale aayenge,
Lekin Guruji ka pyaar sanaatan hai,
Ve pyaar kee reet sadaa nibhaayenge.

Sakaratmakta ka swarg milta rahega,
Nakaraatmakta ka nark bhi milta rahega,
Lekin Guruji amrit kee khan Hain,
Unke ashish se tu hameshaan khilta rahega.

Komal hawaayein tujhe chhoo kar guzar jaayengi,
Kathor aandhiyaan bhi tere safar mein aayengi,
Lekin Guruji ke spandan kee divya khushboo,
Teri raahon ko sadaa mehekaayegi.

Waqt kee bela har pal aaj aur kal mein dhalti rahegi,
Umr kee ghadi bhi waqt kee gulaam bannkar chalti rahegi,
Lekin Guruji ke sangg is ruhaani sayyr par,
Guruji kee mehar se teri zindagi phalti rahegi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

May 22, 2021

Om Namaha Shivaya
Aaj Ka Suvichaar 🙏🏻🙏🏻 # 1189

                 Guru Meharbaan

Agar hawaayein aandhi mein badal jaayein,
Toh unse keh dena ki tum Guruji kee sharan mein ho,
Dekhna, aandhi bhi adab se pesh aayegi,
Aur Guruji ke aagey apna sees jhukaayegi.

Jab kabhi zindagi mein tufaan aaye ghanghor,
Tu tufaan se keh dena ki tera raasta de veh chod,
Veh poochhe toh usey Guruji ke baare mein bataa dena,
Aur swayam ko uskee dehshat se bachaa lena.

Zindagi kee har aandhi kee bhi aisee hee hai kahaani,
Chaahe veh hila de Guruji ke bhakt kee zindagaani,
Lekin toad nahin sakti uske atma-bal aur vishwaas ko,
Kyunki Guruji salaamat rakhte Hain bhakt ke har shwaas ko.

Tufaan bhi chaahe kaayik nuksaan pahunchaaye ,
Lekin Guruji ke bachche kee akhandataa na toad paaye,
Kyunki jo karta hai hameshaan Guruji kee ibadat,
Guruji ke naam ka kavach karta hai sadaa uskee hifaazat.

Isliye na darr tu kisee aandhi ya tufaan se,
Tu buss bharosa rakh apne Guruji mein basey Bhagwaan pe,
Unkee mahima sabse mahaan hai saare jahaan mein,
Kyunki MahaShiv swayam baste Hain Guru meharbaan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja