Month: June 2021

June 30, 2021

Om Namaha Shivaya
Aaj Ka Suvichaar 🙏🏻🙏🏻 # 1228

Guruji Maharaj Hamaare

Jo Hain hum sabke meet,
Jo nibhaate Hain sachche saath kee reet,
Jo karte Hain sabse niswaarth preet,
Ve Hain Guruji Maharaj hamaare.

Jinke darbar mein koi karmakaand kee zaroorat nahin,
Jinke charnon mein aane ke liye chahiye koi mahoorat nahin,
Jinke samaksh kaal bhi kar sakta jurrat nahin,
Ve Hain Guruji Maharaj hamaare.

Jo khud toh sehte Hain dard,
Jo sadaa hotey Hain hamaare hamdard,
Jo protsaahit karte Hain samvardh,
Ve Hain Guruji Maharaj hamaare.

Jo Hain bhakton ke adheen,
Jinke bina hum ho jaayein bilkul ksheen,
Jo dete Hain jeevan naveen,
Ve Hain Guruji Maharaj hamaare.

Jinke charnon mein hai yeh sansaar,
Jo Hain taaranhaar parwardigaar,
Jinka sabke liye khula hai dwaar,
Ve Hain Guruji Maharaj hamaare.

Jinse ho jaata hai paawan pyaar,
Jinke darshan ka rehta hai intazaar,
Jinkee mahima hai aparampaar,
Ve Hain Guruji Maharaj hamaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 29, 2021

Om Namaha Shivaya
Aaj Ka Suvichaar 🙏🏻🙏🏻 # 1227

      Guruji Ka Naam

Lekar Guruji ka naam,
Nishchay hee hota hai kalyaan,
Kalyaan aaj ho ya ho kal,
Na jaane ho jaaye kis pal,
Isliye naam lete rahein hum har kshan,
Taaki Unka naam hee japta rahe yeh mann.

Guruji ke naam mein hai itnee shakti,
Ki yeh dila sakta hai hamein mukti,
Hai yeh itnee saral yukti,
Jis se susajjit hoti hai bhakti.

Guruji ka nirmal naam lene se,
Unmein basey MahaShiv ka karte hain hum vandan,
Unhee mein samaaye Hain sab devi devta,
Aur Unke naam mein hai sampoorna brahmaand ka spandan.

Jis bhi tarehn se dekhein ya jaanein,
Guruji ke naam kee mahima pehchaanein,
Is naam ke amrit ko behne dein har kaam mein,
Kyunki Satchittanand hai basaa Guruji ke naam mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 28, 2021

Om Namaha Shivaya
Aaj Ka Suvichaar 🙏🏻🙏🏻 # 1226

 Sanaatan Santaan

Pal do pal ka har din aur raat hai,
Pal do pal ka sabke sangg ka saath hai,
Pal do pal kee khushi, pal do pal ka hai gumm,
Phir bhi in sabko sanaatan maan lete hain hum.

Sanaatan hai Guruji ka pyaar,
Aur Unka diya hua ashirwaad,
Sanaatan aur nitya hai Guruji ka saath,
Aur Guruji se juda shraddha ka jazbaat.

Sanaatan hai Guruji kee dee hui suraksha,
Sanaatan hai Unka har vachan,
Dua karein ki sanaatan ho hamaari wafa,
Aur sanaatan rahe hamaara vandan.

Dhoop chhaaon kee is duniya mein,
Guruji ne jo thaama hai haath,
Yahee sabse anmol tohfa hai,
Na ki koi heere jawaharaat.

Kar lein is sanaatan tohfe ka sammaan,
Jisey dene waale daata Hain swayam MahaShiv Bhagwaan,
Jabb takk hamaari atma na paa le nirvaan,
Tabb takk bane rahein hum Guruji kee sanaatan santaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 27, 2021

Om Namaha Shivaya
Aaj Ka Suvichaar 🙏🏻🙏🏻 # 1225

                    Bhakti Ka Rangg

Prem ke aadhaar par judo Guruji se,
Na ki sharton ke bal par,
Bhool na jaaya karo Unhe,
Jabb kasht duur hotey hain tal kar.

Ve hee toh Hain,
Kasht taalne waale,
Ve hee toh Hain,
Hum sabko paalne waale.

Guruji se judne se pehle aur baad,
Socho kitna fark aaya hai jeene ke dhangg mein,
Aur Guruji ka shukrana karte karte,
Rangte jaao Unkee bhakti ke rangg mein.

Zindagi ka rangg pheeka padega agar,
Toh bhakti ka rangg uss pheekepan ko duur karega,
Jabb Guruji ka dhyan samaayega tumhaare kann kann mein,
Toh bhakti ka rangg tumhaare astitva mein noor bharega.

Yeh Guruji ka noor bahut khaas hai,
Kyunki yeh seenchta hai antar-mann ko,
Aur yeh noor chamkaa deta hai,
Mann ke malin darpan ko.

Guruji se zyada kaabil nahin hai koi chitrakaar,
Guruji kee bhakti ke rangg mein basaa hai pyaar,
Veh pyaar, jiske liye tarasta hai yeh sansaar,
Veh pyaar, jis se hota hai beda paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 26, 2021

Om Namaha Shivaya
Aaj Ka Suvichaar 🙏🏻🙏🏻 # 1224

         Yoon Hee Chalte Chalein

Yoon hee chalte chalein,
Guruji kee dikhaayee raah par,
Simran se kaabu paa lein,
Vyarth kee har chaah par,
‘Aish karein’ Guruji ke bataaye anusaar,
Na bhoolein ki saraay hai yeh sansaar.

Yoon hee chalte chalein,
Sadbhavna badhaate huey,
Apni oar se samaj mein,
Saamanjasya jagaate huey,
‘Banda banein’ Guruji ke bataaye anusaar,
Na bhoolein ki saraay hai yeh sansaar.

Yoon hee chalte chalein,
Guruji kee mahima gaate huey,
Guruji ko dil mein basaakar,
Unke satsang sunte sunaate huey,
‘Kalyaan kitta’ ke ashirwaad ka karein aadar satkaar,
Na bhoolein ki saraay hai yeh sansaar.

Yoon hee chalte chalein,
Karte rahein Guruji ka dhanyawaad,
Gupt sewa, gupt daan, aur gupt paath,
Inhe shraddha se karna rakhein yaad,
Guruji ka ehsaan maanein hum baarambaar,
Na bhoolein ki saraay hai yeh sansaar.

Yoon hee chalte chalein,
Sarvsamarpan ke bhaav se,
Guruji ke sangg baithkar,
Unse baatein karein hum chaav se,
Guruji sangg jaa paayein hum uss paar,
Na bhoolein ki saraay hai yeh sansaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 25, 2021

Om Namaha Shivaya
Aaj Ka Suvichaar 🙏🏻🙏🏻 # 1223

Yeh Daat Divya Saugat Hai

Praanon ko shakti dene waale,
Prem bhari bhakti dene waale,
Har shishya ke pyaare rakhwaale,
Guruji hamaare Hain bade dilwaale.

Simran mein hotey Hain Ve saath,
Sewa ka jagaate Hain Ve jazbaat,
Satsang karaate Hain din raat,
Guruji Hain hum sabke naath.

Na kisee se vair na kisee se nafrat,
Jaanein Ve har bhakt kee hasrat,
Unke hee vash mein hai yeh kudrat,
Guruji sangg Hain toh sangg Hai kismat.

Guruji ka gungaan hai mangalkaari,
Guruji ka ashish hai kalyankaari,
Guruji swayam Hain leela dhari,
Guruji duur karte Hain har laachaari.

Chaahe koi ameer ho ya ho gareeb,
Guruji sanvaarte Hain sabka naseeb,
Unke paas hai har upaay, har tarkeeb,
Aur Ve Hain sab bhakton ke kareeb.

Buss, Unse jodni hai seedhi taar,
Unse karna hai sachchaa pyaar,
Sadaa khula hai Unka dwaar,
Bahut sundar hai Unka har darbar.

Yeh bahut khushnaseebi kee baat hai,
Ki jo bhi hamaari bhaasha ya jaat hai,
Hamein milee Guruji ke pyaar kee daat hai,
Yeh daat divya saugat hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 24, 2021

Om Namaha Shivaya
Aaj Ka Suvichaar 🙏🏻🙏🏻# 1222

                    Yeh Faisla

Har vehem har sanshay ko chod do,
Jagaa lo tum apne dil mein vishwaas,
Apni mai ko neevenpann ke tej se toad do,
Le lo vinamrata bharaa shwaas.

Nakaaraatmakta se muh moad lo,
Sakaratmak rehne ka karo prayaas,
Guruji se antar-mann ko aise jod lo,
Ki rahe na Unke alaawa koi bhi aas.

Yeh jagg maya ka jaal hai,
Bade badon ka hua bura haal hai,
Bhaagte na rehna peechhe duniya waalon ke,
Paap dhote chalna pichhle kayee janmon aur saalon ke.

Tumhaari atma ne dhaaran kiya yeh shareer,
Yeh hai kewal ek poshaak,
Mitti mein mil jaayegi ye,
Ek din jabb ho jaayegi raakh.

Phir kyun itnee bhaaga dauri,
Jagg ke logon aur padaarthon ke peechhe,
Bhog lo sabb kuch jaan kar usey kshanabhangur,
Taaki tumhaare liye pradhaanta mein ve ho sabse neeche.

Guruji kee sharan mein hai veh sukh,
Jo har pareshaani ka hai upaay,
Guruji har lenge tumaare saare dukh,
Bin koi ehsaan jataaye.

Saath hee tumhaara nazariya badlenge,
Jis se tumhaare anubhav nikharenge,
Sehensheelta badhegi tumhaari,
Chaahe ho koi baadha ya beemaari.

Saahas badhega satya ke liye khade honei ka,
Raasta banega tumaare paapon ko dhone ka,
Guru kripa se urdhvagati kee oar tum bhadd jaaoge,
Baahari duniya mein rehte huey bheetar
jaa paaoge.

Tumhe Guruji ke dikhaaye raaste par chalna hai ya nahin,
Yeh faisla toh abb tumhe hee hai karna,
Ve tumhaare liye jo bhi karenge, veh hoga sadaa sahi,
Ve sangg Hain tumhaare, toh phir kaahe ka darna.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 23, 2021

Om Namaha Shivaya
Aaj Ka Suvichaar 🙏🏻🙏🏻# 1221

Kripa Kar Le Chalna Vaheen

Bahut royi jabb jagg mein aayi,
Jaate samay na roun mai,
Aisee kripa karna Guruji,
Ki Aapki goad mein soun mai.

Karmon kee hoon mai maari,
Lekin bhaati nahi yeh char deewaari,
Char deewari is duniyawee bandhan kee,
Dhun rehti hai buss Aapke vandan kee.

Abhi yeh atma hai bahut kamzor,
Pareshaan karta hai isey jagg ka shor,
Atma-bal aisa deejiye mujhe,
Ki ruhaaniyat kee bel par chadhti jaaoon,
Aapke hee simran mein leen rehkar jaagoon,
Aur Aapke khayaalon mein hee sooraj ke jaise dhal jaaoon.
Aapki karuna se itnee bheetar chali jaaon,
Ki anaasakti se yeh jeevan jee paaoon,
Baahar ka shor na sataaye mujhe,
Apne hee bheetar itnee shanti paaoon.

Aapki dee hui shiksha ko,
Aapki dee hui deeksha ko,
Is kadar aatmasaat karoon,
Ki kisee se bhi na daroon.

Kitne janmon ke karmon ka bojh hai mere khaate mein,
Isliye jaanti hoon ki ye sab nahin hai aasaan,
Lekin Aap hee mere naath aur mere murshid Hain,
Aur Aap hee Hain mere Bhagwaan.

Suna hai kuch virle aadaraniya insaan,
Jeete jee mukt hokar jeevan mukt kehlaate hain,
Lekin mujh mein veh kaabiliyat nahin,
Mujhe toh na jaane kitne aur janam bulaate hain.

Lekin Aapki mamta aur mehar se,
Kabhi toh mulaakaat hogi uss sehar se,
Jahaan sooryaast shaayad hota na ho,
Aur koi agley janam mein khota na ho.

Aapse pyaara koi nahin,
Kripa kar le chalna vaheen,
Jahaan Aapke siwa kuch nazar na aaye,
Jahaan Aapse milan kee manzil mil jaaye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 22, 2021

Om Namaha Shivaya
Aaj Ka Suvichaar 🙏🏻🙏🏻 # 1220

           Mujh Deen Kee Vintee

Justuju hai ki Aapse,
Aapko hee paa loon, Guruji,
Fariyaad hai ki kabhi kisee bhi vajeh se,
Simran ke pal na ganvaa loon, Guruji.

Jo bhi sajeev ya nirjeev kaaran,
Mujhe Aapse karne lagey duur,
Aapki kripa se mai uss kaaran kee taaseer se,
Na ksheen honei doon apne chitt kee oorja ka noor.

Kisee vajeh se uss kaaran se duur hona,
Na ho agar mere liye mumkin,
Toh mai Aapke dikhaaye raaste par chalti chaloon,
Uss kaaran se prabhaavit huey bin.

Simran kee aisee deejiye daat,
Ki mujhe pareshaan na karey koi bhi baat,
Aur deejiye mujhe aisa atma-bal,
Ki Aapse duur karne wali har baadha jaaye tal.

Sadaa apni aukat mein rahoon,
Kewal Aapke bhaav mein bahoon,
Aapse jude rehne ke liye jo bhi paristhiti sehni padey,
Aapki dee hui himmat se mai har uss paristhiti ko sahoon.

Deenanath Hain Aap, Guruji,
Mujh deen kee vintee bhi sweekar leejiye,
Mere hriday mein sadaa Aapka vaas rahe,
Aap kripa kar mujhe yeh vardaan deejiye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 21, 2021

Om Namaha Shivaya
Aaj Ka Suvichaar 🙏🏻🙏🏻# 1219

   Sabse Surakshit Thikaana

Haath dhoondhta hai ek aisa saath,
Jo le usey is tarehn se thaam,
Ki veh saath kabhi na chhoote,
Chaahe aa jaayekaisa bhi tufaan.

Dil dhoondhta hai aisa dil,
Jis ke sangg veh aise jud jaaye,
Ki beshaq har koi dil toad de,
Yeh dil kabhi dooji taraf na mud paaye.

Naata dhoondhta hai aisa naata,
Jiske sangg veh saamanjasya rahe nibhaata,
Ki chaahe har rishta ho jaaye khatm,
Yeh rishta barkaraar rahe har janm.

Meet dhonndhta hai ek aisa meet,
Jiske saath gehri hoti chale preet,
Aur insaan dhoondhta hai aisa Bhagwaan,
Jo har pal ho uspar meharbaan.

Guruji hee veh meet Hain,
Guruji hee Hain Guru ke roop mein Ve Bhagwaan,
Guruji ka dil sada wafaa nibhaaye,
Guruji ka haath kabhi na chod kar rulaaye.

Phir aur kaheen kyun jaana,
Jabb Guruji kee sharan mein hain saare sukh,
Guruji ne tumhe sweekaara hai,
Toh Ve har lenge tumhaara har dukh.

Isliye Guruji kee bandagi kee doar ke liye karo shukrana,
Kisee bhi haal mein buss Guruji ko na bisraana,
Apne kalyaan ke liye tum kaheen aur na jaana,
Kyunki sampoorna srishti mein yahee hai sabse surakshit thikaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja