June 11, 2021
Om Namaha Shivaya
Aaj Ka Suvichaar 🙏🏻🙏🏻 # 1209
Bhaav Roopi Moti
Sundar see vatika mein bahut loag kar rahe thei bhraman,
Unpar apni laalima phaylaa raha thaa sandhya ka gagan,
Ek shaqs baithaa thaa vahaan par phuwaare ke paas,
Kuch kar raha thaa motiyon se, jo usey aa raha thaa raas.
Uske saamne ek chhote se pathar par,
Guruji ka swaroop thaa viraajmaan,
Beech beech mein veh Unhe dekhta thaa,
Phir motiyon ko chhoota thaa, chod kar shaayad baaki har dhyan.
Ek fakir vahaan se guzar raha thaa,
Aur motiyon par padi uskee nazar,
Usne ruk kar shaqs se poochha,
Ki ve kaise moti hain aur unka kya hota hai asar.
Shaqs pehle thoda hichkichaaya,
Aur phir thoda muskuraaya,
Dekha usne fakir ko,
Aur phir usne yoon samjhaaya.
Aye baba, ye moti mere bhaav ka hain prateek,
Ye laate hain mujhe Guruji ke aur bhi nazdeek,
Yeh pehla moti hai pyaar ka,
Aur doosra moti hai vishwaas ka,
Teesra moti hai mera sarvsamarpan,
In teenon ko karta hoon Guruji ko arpan.
Yeh jo chaarul sa chautha moti hai,
Is se meri shraddha bayaan hoti hai,
Paanchve moti mein poore jagg ke kalyaan kee dua,
Chhathe moti mein maafi jo koi bhi paap mujhse kabhi hua,
Saatvein moti mein Guruji se dua ki mujhe kabhi na bisraana,
Aur aathvein moti mein hai mera Shukrana.
Shukrana sewa, satsang, aur simran ka,
Shukrana ki uddhaar hua mere tann mann ka,
Shukrana har praapt aur na praapt huey dhan ka,
Shukrana har tarehn se is jeevan ka.
Kabhi kabhi mai apne Guruji se baat karta hoon,
Kabhi kabhi simran se mann ke bartan ko bharta hoon,
Lekin kabhi kabhi in ped paudhon aur phoolon ke beech,
Motiyon ko sajaakar Guruji se bin kuch kahe hee baat karta hoon.
Ve mere har bhaav ko jaante Hain,
Lekin apni hee tasalli ke liye mai motiyon ke dwaara keh deta hoon,
Phir thodi der mein ek tripti see ho jaati hai,
Aur mai motiyon ko bator leta hoon.
Phir Guruji ke Swaroop ko uthaakar,
Prem se, in motiyon ke saath,
Rakh leta hoon apne thailey mein,
Aur pathar par pherta hoon haath.
Phir jhuk kar,
Pathar ko deta hoon dhanyawaad,
Kyunki usne karaaya mera,
Mere Guruji ke sangg sanvaad.
Ye moti bade matvaale hain,
Mere bhaav ke bhi rakhwaale hain,
Mujh naadaan ke hain ye madadgaar,
Inse Guruji karte Hain mere dwaara kiye stavan ko sweekaar.
Tabhi shaqs ko ek ruhaani khushboo aayi,
Aur fakir usey dekhkar muskuraaya,
Dekhte hee dekhte adrishya ho gaya fakir,
Aur shaqs ke mann mein aashcharya bhar aaya.
Mila nahin phir kabhi bhi veh fakir,
Lekin shaqs kee uske baad chamak gayi taqdeer,
Usey Guruji ne diye thei darshan,
Kehne lagaa usey uska antar-mann.
Hum bhi apne bhaav roopi motiyon ko,
Guruji ko karein arpan,
Taqdeer ke saath saath chamkaayein,
Hum apne antar-mann ka darpan.
Na jaane kis roop mein aur kahaan,
Guruji kabhi hum se bhi milne aa sakte Hain,
Lekin apne antar-mann mein Unhe susajjit kar ke,
Hum har pal hee Unke darshan paa sakte hain.
🌹🌹🌹🌹🌹🌹🌹
Jai Guruji 🙏🏻🙏🏻
Dhirja
Aaj Ka Suvichaar 