June 13, 2021
Om Namaha Shivaya
Aaj Ka Suvichaar 🙏🏻🙏🏻# 1211
Divyata Ka Gulab
Gulab paane ke liye,
Kaanton se dosti karni padti hai aksar,
Nahin toh insaan kho sakta hai,
Gulab takk pahunchne ka avsar.
Guruji kee divyata ke pyaare gulab,
Khilein hai sab bhakton ke liye,
Unn gulab ke phoolon kee khushboo ne,
Kitnon ke ghar hain mehka diye.
Buss kaanton kee chubhan ko shaayad padega sehna,
Taaki mil jaaye gulab ka veh divya gehna,
Jisey paakar mehek jaayega antar-mann,
Aur susajjit ho jaayega yeh jeevan.
Isliye jabb bhi kaanta chubhey,
Toh Guruji ke naam ke marham se zakhm ko bharne dena,
Aur adhyaatmik raaste par chalte chalte,
Guruji ko apna dard harne dena.
Guruji kee divyata ke gulab kee manzil,
Bahut hee sukhdaayi aur suhaani hai,
Vahaan kee vaayu romaanchak honei ke saath saath,
Bahut ramneeya aur ruhaani hai.
Tumhe toh buss sachche bhaav se,
Aur Gulab paane ke divya chaav se,
Safar mein badhte jaana hai,
Aur ruhaani seedhi par chadhte jaana hai.
Isliye manzil par ekaagrachitt karke saari oorja,
Har pal Guruji kee karte huey pooja,
Tum kaanton se ghabraana chod do,
Har baadha ko apne utsaah se toad do.
Tum par bhi zaroor hogi Guruji kee mehar,
Gulab ko tum paaoge, zaroor aayegi veh sehar.
Buss, phir apne astitva ko khokar,
Uss divyataa ke ho jaana tum,
Uss gulab kee pankhudiyon mein samaakar,
Sadaa ke liye kho jaana tum.
🌹🌹🌹🌹🌹🌹🌹
Jai Guruji 🙏🏻🙏🏻
Dhirja
Aaj Ka Suvichaar 