Month: June 2021

June 10, 2021

Om Namaha Shivaya
Aaj Ka Suvichaar 🙏🏻🙏🏻 # 1208

            Sachkhand Kee Sehar

Zindagi kee vadiyan hain ye,
Utaar chadhaav toh aate hee rahenge,
Lekin Guruji kee dee hui himmat se,
Hum har chunauti ko sahenge.

Vishwaas saboori ke saath bol raha hai,
Bhakti mein yeh mann dol raha hai,
Guruji Hain zindagaani mein,
Sabb kuch hai Unkee nigraani mein.

Vaadiyon mein Guru hamaare sangg chalta Hai,
Unka naman karte huey sooraj dhalta hai,
Har subah ka sooraj Unkee kripa se hee hota hai uday,
Isliye har mushkil se hokar abhay,
Guruji ke saath se,
Apne sir par Unke haath se,
Hum lete chalein Unka ashirwaad,
Aur har utaar ya chadhaav ke baad,
Karein hum Unka dhanyawaad,
Kyunki Unse hee hain hum aabaad.

Utaar ka shukrana,
Kyunki Guruji kee karuna se hum usey jhel paaye,
Chadhaav ka shukrana,
Kyunki Unkee nadar se achche din bhi aaye.

Humne hee jamaa kiye apne khaate mein har tarehn ke karam,
Abb Unka bhugtaan bhi toh hai hamaara dharam,
Tabhi toh mila hai roop insaan ka,
Taaki imtehaan ho jaaye imaan ka.

Isliye vaadiyon se kaisa ghabraana,
Unhonei toh hai aana jaana,
Karte chalein har vaadi aur har utaar chadhaav ka shukrana,
Aur koshish karein ki jahaan takk ho sakey na bharna pade hamein jurmaana,
Buss, yoon hee safar chalta rahe Guruji kee mehar se,
Kaash manzil par mulaakaat ho jaaye sachkhand kee sehar se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 9, 2021

Om Namaha Shivaya
Aaj Ka Suvichaar 🙏🏻🙏🏻 # 1207

Dhanya Hua Sansaar

Swami Hain jo kann kann ke,
Antaryaami Hain sabke mann ke,
Daata Hain asal dhan ke,
Dikhaate Hain Ve sabke bann ke,
Unn dayalu Guruji ko pranaam baarambaar,
Aise pooran Guru ko paakar dhanya hua sansaar.

Sewa aur simran kee dete Hain jo daat,
Bhakton ka khayaal rakhte Hain jo din raat,
Lekha badal kar banaa sakte Hain jo bigdee hui baat,
Unke liye hum ek samaan Hain chaahe jo bhi ho hamaari jaat,
Unn dayalu Guruji ko pranaam baarambaar,
Aise pooran Guru ko paakar dhanya hua sansaar.

Jo aaye duur karne bhakton ka vehem aur andhvishwaas,
Jinhonei sadaa kiya hai ahem aur paakhand mitaane ka prayaas,
Jinkee bhakti mein paata hai saralta, taralta, nirmaltaa ka ehsaas har das,
Jinkee divya chhavi karti hai har bhakt ke antar-mann mein vaas,
Unn dayalu Guruji ko pranaam baarambaar,
Aise pooran Guru ko paakar dhanya hua sansaar.

Langar prasad aur chai prasad kee jo dete Hain dawaai,
Jinke satsang sunn-ne aur sunaane se hoti hai sangat kee bhalaayee,
Jinke darbar mein hoti hai har sharnaagat kee sunvaayee,
Jinkee guruyaayee se vaddi nahin hai Srishti kee koi bhi vadiyaayee,
Unn dayalu Guruji ko pranaam baarambaar,
Aise pooran Guru ko paakar dhanya hua sansaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 8, 2021

Om Namaha Shivaya
Aaj Ka Suvichaar 🙏🏻🙏🏻 # 1206

              Jaago Sonei Waalon

Jaago sonei waalon,
Jagg mein khonei waalon,
Jagg ne kaam na hai aana,
Is baat ko bhool na jaana.

Maati ka putla hai yeh shareer,
Karmon se banti hai iskee taqdeer,
Phir jagg mein jeene se aur karam bann jaate hain,
Aur ve jagg mein moh badhaakar tadpaate hain.

Jaage jaage tum sotey ho,
Phir baad mein khud hee rotey ho,
Aise kaise chalega kaam,
Agar na hua shanti ka intazaam?

Shanti chahiye toh jaago,
Sachchi manzil se duur matt bhaago,
Jagg mein raho, lekin,
Jagg ko na banaane do apne mann mein dera,
Kyunki jagg toh moh maya ka manch hai,
Ye na mera hai na tera.

Abb bhi kuch nahin bigda,
Guruji se maang lo cheez asal,
Beej bo lo achche karmon ka,
Taaki achchi aaye fasal.
Neend abb nahin khulee toh kabb khulegi?
Mann kee mayyli chaadar simran bin kaise dhulegi?

Simran se neend bhi khul jaayegi,
Simran se yeh chaadar bhi dhul jaayegi,
Simran se pavitrikaran hoga antar-mann ka,
Tayyar hoga Guruji kee kripa se bartan mann ka,
Guruji mann ka bartan saaf karenge,
Phir usmein Apne ashish ka amrit bharenge.

Sotey rahey toh ye sab kaise hoga,
Isliye neend mein rehkar na do khud ko dhokha,
Le lo simran ka atoot sahaara,
Karte chalo simran dobaara dobaara,
Simran se hee hai uddhaar tumhaara,
Simran se hee milega Guruji ka dwaara.

Isliye jaago sonei waalon,
Jagg mein khonei waalon,
Simran ne hee kaam hai aana,
Is baat ko bhool na jaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 7, 2021

Om Namaha Shivaya
Aaj Ka Suvichaar 🙏🏻🙏🏻 # 1205

 Atma Ko Kab Milenge Paramatama

Guruji se jo juda hai yeh naata,
Yeh mumkin na thaa Guruji kee mehar ke bin,
Abb sochein toh lagta hai ki Unse judne se pehle,
Kaise kaatey thei humne apne raat aur din?

Lekin Guruji kee nazar hum par pehle bhi thi,
Chaahe hum is baat se thei anjaan,
Guruji hee jaante Hain sahi waqt,
Ki kabb kisko dena hai kis baat ka gyan.

Veh waqt toh nahin lautega jo humne bin simran ke kar diya zaaya,
Lekin mann ko itnee tassalli hai ki Guruji ne hai hamein apnaaya.
Isliye simran kee ghadiyon ko abb aur na jaane dein vyarth,
Kyunki simran mein hee basaa hai adhyaatmikta ka arth.

Kitne janmon ka hai Guruji ke sangg hamaara naata,
Yeh toh hum na jaanein shaayad kabhi,
Lekin yeh soch kar ek anokha ehsaas hota hai,
Ki Guruji hamein jaante thei tabb bhi.

Tabb se lekar aaj takk, aur iske aagey bhi,
Anant ahamiyat hai bandagi kee doar ke har dhaage kee,
Kyunki har dhaage mein basaa hai veh bhaav jo is naate ko banaata hai nirmal,
Har dhaage mein basee hai veh narmee jo is naate ko banaati hai komal.

Is bandagi kee doar ke dhaagon par,
Apni shraddha ka rangg hum chadhne dein,
Guruji kee kripa se hum apni atma ko,
Adhyaatmik raaste par badhne dein.

Raasta saral na ho beshaq,
Lekin hai sabse kalyaankaari,
Guruji har bhakt ke liye Apni oar se,
Karte Hain is raaste kee poori tayyaari.

Yahee raasta lekar jaayega suhaani manzil takk,
Yahee raasta pahunchaayega sachkhand ke mandir takk,
Kis janam mein hoga, hum hain is sawaal ke jawaab se anjaan,
Lekin hamaare Sarveshwar Guruji ko hai har baat ka gyan.

Isliye saump kar Unke haathon mein,
Dhaagon se banee bandagi kee yeh doar,
Buss Unka anusaran karein,
Bin bhatke kaheen aur.

Kabb se chal raha hai yeh safar,
Manzil kee talaash mein hai yeh atma,
Na jaane kis kis shareer mein kar ke basar,
Atma ko kabb milenge Paramatama.

Hamein toh gyat nahin ki veh manzil hai kahaan,
Shukr hai ki Guruji le jaana chaahte Hain hamein vahaan,
Unhee ke haath ko thaamkar hum chal dein Ve le chalein jahaan,
Is se zyada suhaani ho hee nahin sakti koi bhi dastaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 6, 2021

Om Namaha Shivaya
Aaj Ka Suvichaar 🙏🏻🙏🏻 # 1204

         Guruji Ka Diya Bhaana

Jo Guruji kee khushboo apne aanchal mein sajaati hain,
Unn mehekti hawaaon ko salaam,
Jo Guruji ke charnon ko chhoote hain,
Unn phoolon ko mera prem bhara pranaam.

Jo Guruji ko viraajmaan karne ka avsar paata hai,
Uss aasan ko mera naman,
Jo Guruji ko pyaare hain,
Unn vachanon ka mai karoon manan.

Jo Guruji ka paigaam laata hai,
Har uss satsang ko mera namaskaar,
Jo Guruji se judvaata hai,
Har uss maadhyam ka shukrana baarambaar.

Jo jal Guruji ke ashish se amrit bann jaata hai,
Uss jal kee khushkismati ko saraahoon,
Jo bhojan Guruji ke ashirwaad se langar prasad bann jaata hai,
Usey mai shraddha se chhak jaaoon.

Jo pashu pakshi Guruji kee chhatra chhaaya mein jeete marte hain,
Unn sabko mera abhivaadan,
Jo ped paudhe Guruji kee leela se maanav ko jeevit rakhte hain,
Unn sabko mera vandan.

Jis pal ne mujhe bataaya ki mai Guruji kee holi,
Uss pal ka karoon mai dhanyawaad,
Bhaaye sadaa mujhe Guruji ka diya bhaana,
Maan kar chaloon usey Unka ashirwaad.

🌹🌹🌹🌹🌹🌹🌹

Jai Guruji 🙏🏻🙏🏻

Dhirja

June 5, 2021

Om Namaha Shivaya
Aaj Ka Suvichaar 🙏🏻🙏🏻 # 1203

 Mool Aur Saar Hamaari Tapasya Ka

Paawan dham hai Guruji ka naam,
Is naam mein samaaye Hain saare Bhagwaan,
Nanak hon, Yasu hon, ya hon Ram,
Allah hon, Hanuman hon, ya phir hon chaahe Shyam.

Guruji ke naam se miltee hai himmat,
Kashton mein swayam ko sambhaalne kee,
Guruji ke naam se miltee hai taakat,
Khud ko har haalaat mein sanvaarne kee.

Guruji ke naam ka amrit peekar,
Nirogi hoti hai kitnon kee kaaya,
Guruji ke naam se sanshay mitt jaata,
Jo hota hai antar-mann mein samaaya.

Guruji ke naam kee oorja se,
Atma-vishwaas ko miltee hai prerna,
Guruji ke naam kee jagriti se,
Miltee hai chitt ko paawan chetna.

Jisne Guruji ke naam par apni ruhaani buniyaad kee khadi,
Uskee vandan bhari vaadi sadaa hoti hai hari bhari,
Isliye Guruji ka naam liye jaayein hum har ghadi,
Kyunki Srishti kee koi bhi shakti nahin hai Guruji se badi.

Guruji ke naam mein ramm kar bitaayein subah aur shaam,
Is naam ko japte huey karein hum apne saare kaam,
Guruji ke naam mein hai hamaare karmon ke bhugtaan ka bandomast,
Isliye kyun na Unke naam ko japne mein ho jaayein hum mastt hokar vyast.

Yahee hai sabse saral samaadhaan hamaari har samasya ka,
Yaheen hai mool aur saar hamaari tapasya ka,
Moksh daayi hai Guruji ka nirmal naam,
Guruji ke naam mein hai har teerath dhaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 4, 2021

Om Namaha Shivaya
Aaj Ka Suvichaar 🙏🏻🙏🏻 # 1202

               Zindagi Ka Sujhaav

Maayoos hokar chal raha thaa raahi,
Raaste mein zindagi se mulaakaat hui,
Jaan liya zindagi ne,
Ki uske anubhav mein hai raat hui.

Zindagi ne usey kaha, tum yahaan rehkar bhi,
Vartmaan mein nahin jee rahe ho,
Kabhi beete kal mein kho jaate ho,
Aur abhi bhavishya kee chinta mein bahe ho.

Phir zindagi ne usey samjhaaya,
Ki veh itnee sanjeedagi se usey na jeeye,
Kyunki uska har pal hai budbuda paani ka,
Aur koi budbuda nahin rukta hai dooje budbudey ke liye.

Kisee bhi pal ke bina zindagi ka maamla jamta nahin,
Phir bhi koi bhi pal kabhi thamta nahin,
Isliye zindagi raahi se lagi kehne,
Ki veh bhi har pal ke sangg lagey behne.

Zindagi ne kaha raahi se ki veh Guruji par vishwaas karey,
Unka naam lete hua aagey badhe,
Unkee prerna se kisee se na darey,
Kyunki Guruji ne sabke kasht Hain sadaa harey.

Raahi chalta raha, zindagi samjhaati rahi,
Baat raahi ko aayi samajh,
Andhera khatm hua, subah aati rahi,
Raahi kee uljhan gayi sulajh.

Chinta kiye bina veh karne laga chintan,
Guruji par vishwaas kar ke karne lagaa Unka vandan,
Usne badal liya jeene ka tareeka,
Vartmaan mein jeene ka usey aa gaya saleeqa.

Sukh dukh aur mushkilein, ye sab toh aati jaati hain,
Lekin abb ve raahi ka maansik santulan na bigaad sakin,
Andheri raaton mein bhi Guru naam ka diya jalaaya usne,
Guruji kee kripa se zindagi ka sujhaav sweekaara usne.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 3, 2021

Om Namaha Shivaya
Aaj Ka Suvichaar 🙏🏻🙏🏻 # 1201

Bulandiyon Mein Basee Geharayee

Itne aagey nikal gaye hum sabb,
Ganit aur Vigyan mein,
Itne mast aur vyast huey,
Ki kumm kar diya humne baithna dhyan mein.

Abb aur lamhe kumm na honei dein,
Pyaare Guruji ke maan mein,
Varna kaise badhauti hogi,
Anivaarya adhyatmik gyan mein?

Aur waqt na ganvaayein,
Simran mein humbramm jaayein,
Dincharya ke saath saath,
Karte raho Guruji se baat.

Aagey badhte rahein Vigyan mein,
Lekin bhatak na jaayein uskee shaan mein,
Kyunki Vigyan bhi Guruji ne baksha hai,
Jinhonei har pal kee hamaari raksha hai.

Parivartan toh hota rahega nirantar,
Aur vigyan kee kuch baatein bhi shaayad badal jaayein,
Lekin Guruji se jo rishta juda hai,
Usey Unkee mehar se gehra karte jaayein.

Kyunki jabb praan jaayenge chhoot,
Tabb Vigyan se rishta jaayega toot,
Lekin janma-janmantar ka jo rishta hai adhyaatmik gyan ke sangg,
Usee se har janam mein atma ka nikhrega noore-rangg.

Is rangg mein rangte rangte ek pal aisa aayega,
Jabb atma ka har daag ghul kar is rangg mein samaa jaayega,
Sammaan karte huey simran kee mala ke har moti kee,
Chhoo legi atma bulandiyaan divya jyoti kee.

In bulandiyon mein basee hai geharayee,
Guruji ke paawan pyaar kee,
Jiske dulaar se atma tarr jaayegi,
Aur khatm hongi ghadiyaan intazaar kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 2, 2021

Om Namaha Shivaya
Aaj Ka Suvichaar 🙏🏻🙏🏻 # 1200

Dhoondh Lo Bahaana, Ya Karte Raho Shukrana

Zindagi mein khush rehna bahut zaroori hai,
Chaahe marzi se khush raho, ya isliye ki ek majboori hai,
Kyunki khushi ke bina mushkil hai jeena,
Har baar mumkin nahin hota gumm ke ghoont peena.

Dhoondh lo bahaana muskuraane ka,
Dhoondh lo bahaana chalte jaane ka,
Jeevan ke lamhe nikalte jaa rahe hain haath se,
Phir na kehna ki pachhtaa rahe ho kisee baat pe.

Dhoondh lo bahaana gungunaane ka,
Dhoondh lo bahaana khushi manaane ka,
Guruji ne sajaaya hai tumhaare aaj aur kal
ko,
Poori tarehn se jee lo tum har pal ko.

Dhoondh lo bahaana asha ko jagaane ka,
Dhoondh lo bahaana niraasha ko sulaane ka,
Dekhna, jabb niraasha kee neend khulegi,
Toh veh bhi asha kee bhanti utsaah ke jhoole mein jhoolegi.

Dhoondh lo bahaana apne gumm ko rijhaane ka,
Dhoondh lo bahaana apni khushi ko badhaane ka,
Itna diya hai Guruji ne har jann ko,
Ki shukrana kee vajeh zaroor mil jaayegi mann ko.

Guruji Daata aur naath Hain,
Phir kya gumm hai?
Guruji har pal saath Hain,
Ye kya kumm hai?

Buss, isliye shukrana ko banaa lo apni dhaal,
Sanvar jaayega agar bigda bhi hoga haal,
Sukh dukh dono hee jeevan mein aate rahenge,
Kabhi hansee aayegi, toh kabhi aansoon bahenge.
Guruji ka shukrana karne se nikharti rahegi bhakti,
Shukrana mein rehkar tumhe jeene kee milegi shakti.

Dhoondh lo bahaana, ya karte raho shukrana,
Yeh faisla tumne hee apne mann ko hai sunaana,
Bahaana dhoondhte dhoondhte zindagi hee na beet jaaye,
Jo shaks shukrana karey, veh har paristhiti mein jeet paaye.

Isliye, is shukrana ke spandan se,
Sajaa lo apna ghar sansaar,
Phir koi bahaana dhonndhne kee,
Zaroorat hee nahin padegi baar baar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 1, 2021

Om Namaha Shivaya
Aaj Ka Suvichaar 🙏🏻🙏🏻 # 1199

                 Uljhan Kee Suljhan

Computer, phone, microphone, aur headphone kee,
Taarein aapas mein ulajh gayin,
Aisee gaanthein padd gayin,
Ki har plug nikaalna pada vaheen.

Phir baitha banda taaron ko suljhaane,
Aur saath saath apne mann ko samjhaane,
Ki jabb takk taarein uljhee rahengi,
Vidyut toh oorja ke sangg tanaav ko bhi sahegi.

Mushkil hoga yeh jaan-na,
Ki kis yantra ke liye hai kis taar ko thaamna,
Dekhne mein bhi uljhee hui ve lagengi ast-vyast,
Jitna uljhengi, utna hee suljhaane mein hoga kasht.

Hamaare mann ka har vichaar,
Maano jaise hai ek taar,
Jo jabb baaki vichaaron se ulajhta jaata hai,
Toh phir suljhaana mushkil ho jaata hai.

Saagar mein tufaan ho jaise,
Mann ka haal ho jaata hai vaise,
Vichaaron ka aata hai jwaar,
Mann par padta hai iska bhaar.

Ashanti honei lagti hai,
Bechayyni mann ko thagti hai,
Neend bhi jahaan udd jaati hai,
Khushi bhi vaheen mudd jaati hai.

Maano ya na maano,
Iska ek hee hai upaay,
Simran, simran, aur aur bhi simran,
Vichaaron ko jo de suljhaaye.

Guruji isliye simran karne ke liye kehte Hain,
Kyunki hum insaanon ke mann mein anginat vichaar behte hain,
Hum unn vichaaron kee ulajhi hui gaanthon ko sehte hain,
Aur isliye hum itne pareshaan aur khinn-chitt rehte hain.

Simran se kendrit hotey hain vichaar,
Simran hai vichaaron ke sulajhne ka aadhaar,
Simran se badhta hai atma-vishwaas,
Jis se utsaahit hota hai vichaar suljhaane ka prayaas.

Mann ke vichaaron ko simran dwaara,
Dikhaayein hum suljhan ka kinaara,
Taaki ve na banein kaaran ashanti ka,
Balki ulajh kar dein sanket kanti ka.

Simran se vichaar roopi taaron ko,
Hum uljhan se azad karein,
Guruji mein shraddha se dhyan lagaakar,
Mann ko niswaarth prem se aabaad karein.

Sakaaratmakta se shubh hoga,
Bheetar aur baahar ka spandan,
Guruji kee kripa se yakeenan,
Sulajh jaayegi vichaaron kee har uljhan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja