Month: July 2021

July 21, 2021

Om Namaha Shivaya
Aaj Ka Suvichaar 🙏🏻🙏🏻 # 1249

Mai Bhi Chal Padi Hawaa Aur Ghataa Ke Saath

Aye suhaani hawaa,
Kya tu jaa rahi hai Guruji ke paas?
O mastaani ghataa, zaraa ye toh bataa,
Kya tujhe bhi hai divyata ko paane kee pyaas?

Hawaa ne kaha, “Haan, mai toh chali Guruji ke dwaar,”
Ghataa ne jawaab diya, “Mujhe hai Guruji se paawan pyaar.”
Mai bhi chal padi hawaa aur ghataa ke saath,
Raaste mein karti hui unn dono se baat.

Hawaa ne Guruji kee garima ka geet gungunaaya,
Ghataa ne hawaa ke sangg sundar sa sur bajaaya,
Mera mann bhi Guru prem se bhar aaya,
Aur phir mainey bhi Guruji ke liye ek nagma gaaya.

Sur aur saaz kee jugalabandi mein vyast hokar,
Guru milan kee chaahat mein mastt hokar,
Na bhookh lagee hamein, na lagee hamein pyaas,
Buss, Guru milan kee thi hamein aas.

Aseem akash ne madad kee apne aanchal mein hamein baithaakar,
Chaand aur sooraj ne sahaayata kee hamein raasta dikhaakar,
Akash ka aanchal hawaa se dolta gaya,
Aur ghataa ka sur Guruji kee Jaijaikaar bolta gaya.

Phir khushhal gagan kee chhaaon mein,
Ruhaaniyat ke nooraani gaaon mein,
Hawaa aur ghataa ke saath mai pahunch gayi,
Dekha ki uss gaaon kee sundarta thi itnee mangalmayee.

Ek sundar sa jhoola thaa gaaon ke khet mein,
Aur deep jaley huey thei paas kee ret mein,
Hans badhaa rahe thei shobha vahaan ke phuvvaare kee,
Asha hai aap kalpana kar rahe hain uss sowmya nazaare kee.

Uss sundar se jhoole par pyaare Guruji thei viraajmaan,
Saamne sangat naach rahi thi, sabke chehre par thi muskaan,
Kuch sangat baith kar chhak rahi thi langar prasad,
Mai hawaa aur ghataa ke baad jhuki lene Guruji ka ashirwaad.

Guruji ne pyaar se mere sir par rakha apna haath,
Thoda sa Ve muskuraaye bin kiye koi baat,
Unkee muskaan aur Unke ashish se yoon gadd gadd ho gayi meri rooh,
Maano Ishwar kee kripa ne meri antaratma ko liya ho chhoo.

Guruji ne hamein langar prasad ke liye baithne ko kaha,
Mai baithi hawaa aur ghataa ke sangg,
Gaaon kee ek sangat baithi hamaare sangg,
Chaaron ke chehre par chhalak rahi thi umangg.

Langar ke pashchaat kuch der hum rahe vaheen par,
Itne khush thei ki lagg raha thaa hamaare paaon nahin hain zameen par,
Guruji se seedhi taar judi aur samay jaise ek pal mein gaya guzar,
Guruji se jo kee thi milne kee dua, uss dua ne dikhaaya asar.

Phir Guruji ne agya dee aur charan sparsh ka diya avsar,
Hawaa aur ghataa ke baad maine maatha rakha Unke charnon par,
Mann se jabb mainey Unke prem ko pukaara,
Guruji ne kismat ka lekh likh diya dobaara.

Unke charanon ka vandan karke jo shanti milee,
Mushkil hai usey karna bayaan,
Bahut khoobsoorat rahi hawaa kee, ghataa kee, aur meri daastaan,
Jhoomte huey hum laut kar aaye apne ghar,
Atyant sukhad aur anandmayee thaa hamaara safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 20, 2021

Om Namaha Shivaya
Aaj Ka Suvichaar 🙏🏻🙏🏻 # 1248

 Ruhaaniyat Kee Shwet Pavitrataa

Na jaane kaun sahi hai kaun galat,
Lekin yakeenan sab hain alagg alagg,
Sabke alagg alagg honei se hee toh,
Itna mukhtalif hai yeh jagg.

Prakash ke anek ranggon ke aapas mein ghul jaane se,
Safed rangg hai bantaa,
Kisee ek rangg mein kahaan hoti hai,
Safed bann-ne kee kshamtaa.

Shwet rangg kee khoobsoorati hai,
Ki veh sabse pavitra hai kehlaata,
Aise hee har praani kee atma ka safar,
Antt mein mukti kee oar hai le jaata.

Sabki vibhinnataa kee vajeh se,
Apna dheeraj tum na khona,
Buss tum Guruji ke dikhaaye path se,
Kabhi bhi daanvadoal na hona.

Sabka apna naata hai Guruji ke saath,
Sabke sir par hai pyaare Guruji ka haath,
Ve taaranhaar bhi Hain, aur nyaayaadheesh bhi,
Ve murshid aur meet Hain, aur Ish bhi.

Kuch jann is janam mein,
Aur kuch jann kisee agley janam mein,
Mukt hokar karmon ke bhaar se,
Vida hongei is sansaar se.

Aakhir mein toh sab hee,
Pahunchenge Parwardigaar Guruji ke paas,
Jaane anjaane mein hoti hai,
Yahee har atma kee aas.

Rangon ke mishran ke jaise,
Sabb aatmaayein samaa jaayengi Guruji mein,
Ve yakeenan pavitra hongi aur jaayengi uss paar,
Ruhaaniyat kee shwet pavitrataa se susajjit hoga veh deedar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 19, 2021

Om Namaha Shivaya
Aaj Ka Suvichaar 🙏🏻🙏🏻 # 1247

Tu Buss Kaabil Bann Jaa

Guruji Hain tere naath,
Na chodenge kabhi bhi tera haath,
Har pal Ve nibhaayenge saath,
Kabhi na karenge tere sangg vishwaas ghat.

Guruji Hain tere naath,
Ve banaayenge teri bigdee baat,
Tere karmon ko Ve denge kaat,
Is rishte mein kabhi na hogi teri maat.

Guruji Hain tere naath,
Na kar tu Unse koi sawaalaat,
Unse seedhi taar jod kar karta chal Unse mulaakaat,
Ve karenge teri har duvidha aur har mushkil kee tehkikaat.

Guruji Hain tere naath,
Tu hai Unka bachcha, yeh hai teri jaat,
Chaahe Unke aagey teri nahin hai koi aukat,
Phir bhi Ve samajhte Hain tera har jazbaat.

Guruji Hain tere naath,
Sulajhaate Hain Ve tere uljhe huey haalaat,
Dene baithey Hain tujhe Ve mukti kee saugat,
Tu buss kaabil bann jaa lene ke liye veh daat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 18, 2021

Om Namaha Shivaya
Aaj Ka Suvichaar 🙏🏻🙏🏻# 1246

              Saarthak Saundarya

Tann kee aankhon se dekho toh,
Chaahe kuch lagey ya na lagey sundar,
Par mann kee aankhon se dekho toh,
Saundarya sadaa hai mann ke andar.

Saundarya ruhaaniyat aur samarpan ka,
Saundarya mann mein hotey huey darshan ka,
Saundarya divya deedar ka,
Saundarya Guruji ke pyaar ka.

Bhautikvaad aur laukikta ka saundarya,
Kshanbhangur hai veh sab,
Anant saundarya toh veh ratna hai,
Jo antar-mann ko bakhshta hai Rab.

Guruji mein devi devta sab Hain,
Guruji Guruji ke roop mein Rab Hain,
Unke simran aur dhyan se,
Mann ka saakshaatkaar hota hai gyan se,
Gyan, adhyaatmikta ka,
Gyan, prathamikta ka.

Yahee gyan hai asal,
Jo sanvaarta hai karmon kee fasal,
Jiska milta rehta hai phal,
Jis se jeena marna hota hai safal.

Jitna simran karoge Guruji kee mehar se,
Utna deedar hoga shuddh vichaaron kee sehar se,
Aur isee se hoga pavitrikaran,
Jis se sundar hoga anta-karan.

Aur is saundarya se susajjit hokar,
Mann aur anta-karan khil jaayega,
Jo saundarya tum baahar dhoondh rahe thei,
Veh apne bheetar hee mil paayega.

Saari dhool dhul jaayegi,
Mann ke malin darpan se,
Mann kee aankhein bhi tarr jaayengi,
Is saarthak saundarya ke darshan se.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 17, 2021

Om Namaha Shivaya
Aaj Ka Suvichaar 🙏🏻🙏🏻 # 1245

  Gumm Se Na Murjhaayein Hum

Aankh mein chhotey se tinke ke ghus jaane se,
Kitnee mushkil ho jaati hai,
Kabhi aankhon mein khujali si hai hoti,
Kabhi ashru varsha ho jaati hai.

Haalat zyada gambhir hon,
Toh bura asar pad sakta hai nazar par,
Shukr hai ki aankh mein ghusa veh tinka,
Swayam hee nikal jaata hai aksar.

Zindagi mein kabhi kabhi chhote chhote haadse,
Badi si museebat saath laate hain,
Kabhi toh sirf thodi hairaani ya pareshaani hoti hai,
Toh kabhi insaan aansoon bahaate hain.

Kabhi kabhi toh mushkil hoti hai aisee,
Ki veh jaan par bann aati hai,
Aur kabhi kabhi toh waqt ke sangg,
Mushkil maano thum jaati hai.

Guruji kee sangat ko toh,
Sahuliyat hai kayee prakaar kee,
Guruji ne zimmedari lee hai,
Sangat ke kashton ke bhaar kee.

Itne sankat toh hamein chhoone se bhi pehle,
Guruji kee karuna se tal jaate hain,
Aur kayee sankat Guruji kee mehar se,
Kumm hokar hee aate hain.

Guruji kee kripa se iske saath saath,
Bhakton kee sehensheelta bhi badh jaati hai,
Vahee mushkil jo pehle jaanleva kehlaati,
Abb veh chhoti si bann jaati hai.

Aisa Guruji ke alaawa aur koi nahin kar sakta,
Guru hamaara jeevan sanvaarte huey kabhi nahin thakta,
Hum mein se har koi hee karmon ke bojh ka hai maara,
Aur Guruji ko buss chaahiye shuddh bhaav hamaara.

Apne karmon ke bojh aur bhaav ke alawa,
Aur toh hamaare paas dene ke liye hai bhi kya,
Phir bhi Guruji hamaara itna khayaal rakhte Hain,
Kitnee aseem hai Unkee daya.

Isliye poorna vishwaas se yeh maante huey,
Ki jo bhi kasht hai veh pehle se hee Guruji ne kumm kar diya hai,
Aur aseem shraddha se yeh jaante huey,
Ki adhiktar kasht toh Guruji ne apne par liya hai,
Hum jeevan kee raahon par chalte chalein,
Chaahe kayee sooraj jeevan mein dhalte chalein,
Kyunki sooryaast ke pashchaat,
Sooryoday ka hona niyam hai prakriti ka,
Aur Guruji kee mehar se,
Kuch aisa hee naseeb hai jeevan kee aakriti ka.

Jinhe sooraj bhi sajde mein karta hai namaskaar,
Unn pyaare Guruvar ka paakar hum pyaar,
Jhel paayenge har museebat ko,
Aur sweekar paayenge har hakeekat ko.

Kitnee anmol vajeh hai yeh,
Guruji ko shukrana karne kee,
Kitnee paawan prerna hai,
Chunautiyon se datt kar ladne kee.

Isliye gumm se na murajhaayein hum,
Sadaa Guruji ka gungaan gaayein hum,
Waqt chaahe dhaaye hum par jitne bhi sitam,
Guruji kee sharan mein bilkul surakshit hain hum.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 16, 2021

Om Namaha Shivaya
Aaj Ka Suvichaar 🙏🏻🙏🏻 # 1244

       Shukrana Karne Kee Kalaa

Pyaare Guruji ke pyaar ko,
Pyaar se hum apnaayein,
Is paawan pyaar ke rishte ko,
Salaam kar sajde mein jhuk jaayein hawaayein,
Aur jabb jabb hum Guruji ka karte hain shukrana,
Toh kaayinaat ko hum par apna ashirwaad padta hai barsaana.

Kyunki kaayinaat ke spandan par asar karta hai,
Bhaav hum sab praaniyon ka,
Saath hee ehsaas zaroori hai,
Guruji kee meharabaaniyon ka.

Veh ashirwaad bhi Guruji kee dein hai,
Kaayinaat jiskee divya dharohar hai,
Sabki oorja sambhaalti hai kaayinaat,
Usey bakhshi gayi sewa kathin apitu manohar hai.

Jitna ehsaas hoga hamein,
Guruji ke har ehsaan ka,
Utna hee shukrguzaar hoga,
Mann har insaan ka.

Guruji se seedhi taar jodna anivaarya hai,
Guruji ke kiye ehsaanon ke ehsaas ke liye,
Aur yeh abhyaas bahut hee zaroori hai,
Guruji ke har bhakt, har das ke liye.

Pehle pehle shukrana karne ke liye,
Shaayad khud ko padey yaad karaana,
Lekin seedhi taar jodkar abhyaas karne se,
Aasan ho jaata hai shukrana ka dil se labhon par aana.

Buss, phir jabb shukrana kee sumati aati hai,
Toh zindagi ek anokhi gati se chalti jaati hai,
Protsaahan milta hai samarpan ke prayaas ko,
Yahee protsaahan badhaata hai simran kee pyaas ko.

Jo ek baar jaan le isey khaas,
Toh phir kabhi nahin mit-tee is pyaas kee aas,
Na koi nadiya, na koi mahasaagar,
Bhar sakta hai mann kee gaagar,
Gaagar toh aakhir simran kee pyaasi hai,
Aur atma toh Paramatama kee dasi hai.

Simran aur samarpan kee badhti bhavna se,
Atma kee Paramatama se milan kee kaamna se,
Nipun ho jaaye hamaari shukrana karne kee kalaa,
Aur Guruji kee mehar se kaayinaat mein ho sabka bhalaa.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 15, 2021

Om Namaha Shivaya
Aaj Ka Suvichaar 🙏🏻🙏🏻 # 1243

Mann Ko Simran Se Sajaa Lo

Muskuraa lo, gungunaa lo,
Zindagi hai pal do pal kee,
Mann ko simran se sajaa lo,
Aur tayyaari kar lo aane wale kal kee.

Aaj ka kiya simran,
Kal zaroor kaam aayega,
Kyunki aaj bhi aur kal bhi,
Dil mein jabb Guruji ka naam aayega,
Toh vahee banega prerna,
Aur vahee banega chetna,
Jaagriti ka sahaara,
Jo dikhaayega divya dwaara.

Mann ko aur atma ko halka rehne do,
Jagg jo kehta hai usey kehne do,
Pecheedagi se pareshaan hona chod do,
Zameer ko chot pahunchaane waali har aadat se muh moad lo,
Na banaao apne mann ko anuchit vichaaron ka das,
Yaad rakho ki karmon ka poora hisaab hai Guruji ke paas.

Guruji ka naam hee dega himmat,
Guruji ka naam hee dega taakat,
Guruji ke naam ke simran kee sugandh mein ramm jaao,
Ruhaani khayaalon mein mann ko lagaao.

Na khushi se bhatkoge na kisee mushkil se,
Na pareshaan hoge akelepan se, na dagamagaaoge kisee mehfil se,
Kyunki antar-mann mein jo simran chalta rahega har pal,
Toh badhta rahega har tarehn se tumhaara atma-bal.

Subah ka bhoola bhi shaam ko ghar laut jaaye toh usey bhoola nahin kehte,
Bahut waqt zaaya ho gaya duniya kee sunte aur duniya se kehte,
Guruji ne bakhshi hai simran kee daat,
Duur hui is se antar-mann kee andheri raat,
Abb aur waqt zaaya na karo,
Simran kee daat se jholi bharo.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 14, 2021

Om Namaha Shivaya
Aaj Ka Suvichaar 🙏🏻🙏🏻 # 1242

Uss Paar Jaate Jaate

Guruji ke sangg,
Jo yeh prem ka bandhan hai,
Uss bandhan se basaa mann mein,
Guruji ke liye vandan hai.

Yeh bandhan hai bandagi ka,
Yeh bandhan hai zindagi ka,
Kayee janmon ka,
Sulajhte karmon ka.

Is bandhan mein azaadi hai,
Yeh bandhan jazbaati hai,
Jazbaat meet se meet ka,
Jazbaat niswaarth preet ka.

Preet naath aur santaan ke beech,
Preet bhakt aur Bhagwaan ke beech,
Preet aisee jismein koi reet nahin,
Preet aisee jismein haar jeet nahin.

Is paawan preet ke bandhan mein,
Pyaare Guruji ke vandan mein,
Yoon hee umr jaaye guzar,
Karte huey Guruji ka shukar.

Shukr manaate manaate,
Guruji ka gungaan gaate gaate,
Na jaane kitne janam lagey Unkee sharan mein aate aate,
Abb na chhoote yeh dwaar uss paar jaate jaate.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 13, 2021

Om Namaha Shivaya
Aaj Ka Suvichaar 🙏🏻🙏🏻 # 1241

        Deewaanon Kee Kahaani

Suna thaa ye mehfil na chalegi zyada der takk,
Lekin dekh kar hee hua yakeen,
Na jaane kabb mehfil ka rangg pheeka padd gaya,
Aur mamla honei lagg gaya sangeen.

Char din kee chehel pehel thee,
Phir aayi khaamoshi kee raat,
Mehfil ke deewane huey niraash,
Aur malte reh gaye ve haath.

Guzar raha thaa vahaan se ek musaafir,
Bilkul mastaane andaaz mein,
Dekhkar in deewanon ko usne,
Shaamil kiya unhe ek raaz mein.

Raaze hakeekat jo kee musaafir ne bayaan,
Toh mehfil ke deewanon mein aayi thodi jaan,
Maano unka raasta badal gaya jaise,
Na jaane ye sab uss raaz se hua kaise.

Musaafir ne raaz bataane ke baad,
Naye raahiyon ko kiya ravaana,
Khud bhi veh vahaan par pahunchaa,
Bin banaaye koi bahaana.

Dekh kar vahaan ke mahaul ko,
Kumm honei lagi deewaanon kee pareshaani,
Satsang ho raha thaa Guruji ka,
Aur koi sangat suna rahi thi apni zubaani.

Sunkar uss zubaani ko,
Deewaanon ne joda uss se apni zindagaani ko,
Aur vaheen par baith kar sun-ne lagey,
Bin palkein jhapke aur bin thakey.

Sangat ne sunaaya kaise uskee zindagi badal gayi,
Kaise Guruji kee sharan mein aane se uskee har buri aadat sanvar gayi,
In mehfil ke deewaanon ko aaya samajh,
Ki vahaan pahunchne se unkee uljhanein gayin sulajh.

Jo khushi ve baahar dhoondh rahe thei,
Veh milee unhe vahaan par,
Dekha unhonei Guruji ke swaroop ko,
Darbar sajaa thaa jahaan par.

Aakarshan kuch aisa thaa,
Ki unka dil nahin kiya vahaan se jaane ka,
Unhonei musaafir ka shukrana kiya,
Jisne koi ehsaan na jataaya unhe vahaan pahunchaane ka.

Darbar mein sees jhukaa kar,
Parivartan hua musaafir ke roop mein,
Aur dekhte dekhte musaafir maano,
Samaa gaya usee Swaroop mein.

Deewanon ko hui bahut hairaani,
Samajh aaya ki Guruji thei aaye,
Aur unhe sudharne ka raasta dikhakar,
Ve Apne swaroop mein ja samaaye.

Kuch deewane toh ronei lagey,
Kuch deewaane lagey muskuraane,
Guruji ko Bhagwaan maankar,
Bhaav vibhor huey ve saare deewaane.

Mehfil ke deewaane mehfil ke bajaaye,
Abb ho gaye Guruji ke deewaane,
Guruji kee leela aur mehar se,
Guruji ke bhajan lagey ve gaane.

Mehfil mein phir bhi jaate thei,
Aish karne aur rangg jamaane,
Lekin taur tareeke sudhar gaye thei unke,
Kyunki abb ve thei Guruji ke deewaane.

Buree aadatein gayin chhoot,
Ahankar unka gaya toot,
Jagriti aane lagi antar-mann mein,
Leen hotey gaye ve simran mein.

Waqt ke saath saath Unka safar,
Hota gaya aur bhi ruhaani,
Unhe apni yeh nayee dagar,
Lagti rahi bahut suhaani.

Mushkilein bhi huin kayee,
Kuch puraani kuch nayee,
Lekin abb ve thei Guruji kee sharan mein,
Toh Guruji ka haath thaa unke har sankat ke haran mein.

Yoon hee beet gaya samay,
Sewa, Satsang, simran ke sangg,
In deewaanon ke jeevan par chadh gaya,
Guruji ke prati bhakti ka gehra rangg.

Buss, phir toh ve saare gaye tarr,
Kyunki mila thaa Unhe Guruji ka dar,
Guruji ke ashish ka amrit ve lagey peene,
Shukrana karte karte ve lagey jeene.

Pyaare Guruji ne nikhaar dee,
Deewaanon kee zindagi,
Safal ho gaya deewaanon ka jeevan,
Kar ke Guruji kee bandagi.

Guruji kee bandagi mein hai veh pyaar,
Jo bhakton ke jeevan par laata hai nikhaar,
Guruji Hain sabke Parwardigaar,
Unkee mahima hai aparampaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 12, 2021

Om Namaha Shivaya
Aaj Ka Suvichaar 🙏🏻🙏🏻# 1240

           Aapka Aur Mera Saath

Pyaare Guruji,

Jis bhi disha mein waqt bahe,
Jaisa bhi zindagi mein haalaat rahe,
Aapka aur mera saath rahe,
Sadaa Aapki yeh saugat rahe.

Jabb takk mujh mein shwaas ho,
Aap par mera atoot vishwaas ho,
Mera dil Aapka naam leta rahe,
Chaahe jeevan jo bhi dukh sukh deta rahe.

Jabb takk is dil mein ho dhadkan,
Aapka naam japey mera mann,
Aapka aur mera rishta ho sabse bada dhan,
Jo gehra hota rahe har janam.

Jabb takk yeh mann kar sakey vichaar,
Tabb takk na maanoon mein kabhi bhi haar,
Chaahe chunauti de yeh saara sansaar,
Meri himmat ko badhaaye Aapka pyaar.

Jabb takk rahein yeh sooraj, yeh chaand, ye taare,
Aap hee hon mujhe sabse pyaare,
Mai har kasht jhel sakoon Aapke sahaare,
Sadaa sees jhukaaoon Aapke dwaare.

Jabb takk jeevan kee in raahon mein shool hon,
Unn raahon ke aagey takk Aapki mamta ke phool hon,
Chaahe kabhi kabhi jeevan kee paristhitiyaan pratikool hoon,
Mujhe Aapke saare faisle vinamrataa se qubool hon.

Jabb takk rahe yeh sansaar aur yeh srishti,
Aapki rahe har bhakt par drishti,
Hoti rahe har jageh Aapke ashirwaad kee vrishti,
Aur jeevan mein sadaa rahe samashti aur santushti.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja