Ghaat ghaat ka piya paani, Phir bhi pyaas na bujhne paayi, Amrit kee ek boond se hee mitt gayi pyaas, Jabb sangat Guruji ke dar par aayi.
Ruhaaniyat ka rutba aisa hai Guruji ke darbar mein, Ki ek hee pal mein swayam ko paaya Guruji se pyaar mein, Baat hee kuch aisee hai MahaShiv Parwardigaar mein, Ki ek anokha chayyn milta hai Unpar aitbaar mein.
Mamta kee varsha itnee matvaali, Uske sangg paawan ashirwaad kee hariyaali, Suraksha aisee ki har chinta ho jaati hai duur, Shakti itnee ki har bhayy ho jaata hai chuur.
Leela aisee ki namumkin hai isey samajh paana, Kripa Guruji kee aisee ki har uljhan ne hai sulajh jaana, Saundarya aisa ki nihaarte huey dil na bhar paaye, Prataap aisa ki har vikaar haar maan jaaye.
Karuna itnee ki har zakhm ko miley marham, Anukampa aisee ki mitt jaaye har gumm, Protsaahan aisa ki badh jaaye atma-vishwaas, Divyata aisee ki tarr jaaye har shwaas.
Jitnee taareef kee jaaye Parampoojya Guruji kee, Kiya nahin jaa sakta Unkee mahima ka bakhaan, Saari sangat itnee khushkismat hai, Ki Guruji ke roop mein miley Hain MahaShiv Bhagwaan.
Aaj hai Janamashtami ka paawan tyohaar, Har taraf Shri Krishna ke gungaan kee chhaayi hai bahaar, Yahee hamaare anta:karan kee hai pukaar, Ki anivaarya hai hamaara chetna se deedar.
Abb takk nahin hua yeh toh abb bhi hai avsar, Ki hum chetna ke raaste par hon agrasar, Phir aaj nahin toh kal hum bande bann jaayenge, Aur Guruji ke hukm ka paalan kar paayenge.
Guruji mein saare devi devta Hain samaaye, Paalan karta ke roop mein Ve Vishnu bannkar aaye, Vishnuji ne Krishna Bhagwaan ka roop liya, Aur saarathi bannkar Arjun ko yog ka upadesh diya.
Yog mein sthit hokar karam karein hum, Na bhatkaa paaye hamein koi khushi ya gumm, Aasakti hogi usee mein jiska hum karenge chintan, Isliye sabse uchit hai karna MahaShiv Guruji ka vandan.
Guruji ke gungaan ka hee karein shravan, Guruji mein dhyan lagaakar karein Unka manan, Smaran bhi Unka, aur Unhee ka hee archan, Sab kuch karke Unhee ko hee arpan.
Charitra ka hoga phir punar-janam, Changey honei lagenge hamaare karam, Nibhaayein hum sab insaaniyat ka dharam, Yahee kartavya hai sabse param.
Guruji kee sharan mein hee hai Baikunth dhaam, Tarr jaayenge hum lekar Guruji mein basey Shri Krishna ka naam, Janamashtami ka paawan parv de raha itna shubh paigaam, Sarvsamarpan, sadaachaari, aur shukrana mein basaa hai hamaara kalyaan.
Maasoomiyat ne Guruji se kaha, Mainey bahut anyaaya hai saha, Guruji ne kaha, Mai sab thaa dekh raha.
Maasoomiyat ne uljhan ka izhaar kiya, Guruji ne suljhan ka vichaar diya, Maasoomiyat ne kiya Guruji ka shukrana, Guruji ne usey kaha, “Tum chali matt jaana.”
Maasoomiyat ne poochha Guruji se, “Mai rahoon kiske sahaare?” Guruji ne kaha usey, “Tum aayi ho mere dwaare,” “Isliye mai tumhe Apne aanchal mein sambhaal loonga, Aur tumhe Apni mamta aur Apna pyaar doonga.”
Guruji ne kaha maasoomiyat se, “Tumhaari neeyat hai bilkul nek, Ye mainey liya dekh, Tumhe milengi chaalaakiyaan anek, Lekin tum lena mujhe maatha tek.”
“Kar do tum mujhe sarvsamarpan, Mai tumhaare liye har shathtaa ko sambhaal loonga, Tumhaari sachchaayee aur neki se khush hoon mai, Mai tumhe har pal suraksha doonga.”
“Tumhe zaroorat nahin hai kalyugi hawaa ke sangg behne kee, Tumhe zaroorat hai satyuga ke sanskaaron ke sangg rehne kee, Tum apne bhole bhaav ko rakho barkaraar, Kyunki mujhe bhakton ke bhole bhaav se hai bahut pyaar.”
Neevenpann se maasoomiyat ne Guruji ke charnon mein sir ko jhukaaya, Guruji ka ashirwaad paakar maasoomiyat ka dil phoola nahin samaaya, Usne Guruji ko apna taaranhaar jaan liya, Usne nirbhay hokar Guruji ka hukm maan liya.
Neki se maasoomiyat ne bitaaya jeevan, Koi chhal-kapat nahin kee usne kisee bhi kshan, Maasoomiyat par hoti chali gayi Guruji kee inaayat, Aur veh safar mein aagey badhti gayi paakar Guruji kee izaazat.
Maasoomiyat kee har mushkil ka hua hal, Nirbhay rehkar veh phalti rahi har pal, Uskee har duvidha Guruji kee mehar se gayi tal, Aur uska safar Guruji kee kripa se hua safal.
Baahar dikh rahi hai itnee roshni, Lekin tujhe lagg raha hai ki bheetar hai andhera, Maanav, tu chinta na kar, Bheetar bhi jald hee dikhega savera.
Mithya hai baahari roshni aur bheetar ka andhera, Yeh jaan le, Satya toh hai bheetar kee divya roshni, Tu maan le.
Teri atma mein jo divya jyot hai, Adrishya ho gayi hai veh tere liye, Is jyot ke prakash se adhik ujjwal kuch bhi nahin, Chaahe tu baahar jalaa le sainkdon deeye.
Kyunki jo jyot teri atma mein hai, Veh pyaare Guruji kee divyata ka hissa hai, Yahee aadhaar hai tere kalyaan ka, Isee se chal raha teri saanson ka kissa hai.
Yeh jyot tere bheetar prajwalit hai, Tu simran karta chal bin himmat haare, Guruji ka tere sir par haath hai, Isliye na bhatak tu dwaare dwaare.
Antar-mann kee ujjwalta ka hoga tujhe ehsaas, Tu buss jaari rakh Guruji ke naam ke simran ka prayaas, Thoda vilamb bhi ho toh tu na hona udaas, Kyunki Guruji ke ashish ke amrit kee meethi hai pyaas.
Isee pyaas se jaagrit rakh Guruji ko paane kee aas, Ve Brahmaand ke shehenshaah Hain aur tu reh bannkar Unka das, Tere bheetar kee divya jyot ka prakash Hain Guruji, Teri nirasha ke har pal mein asha poorna sakaash Hain Guruji.
Jodey rakh tu Unse seedhi taar, Sab kuch bhool kar tu kar Unse pyaar, Yahee divya rishta tujhe bheetar kee roshni dikhaayega, Guruji ka pyaar hee tujhe jeena sikhaayega.
Baahar ke andhere se na darta chal, Tu buss Guruji mein shraddha rakh aur tarta chal, Tere bheetar kee divya roshni se tera deedar hoga, Chaahe tu is paar hoga ya uss paar hoga.
Isee roshni ke sahaare hee hai jeena marna, Isee roshni ke sahaare hum sabko hai tarna, Divya mahasaagar mein samaayega in behti saanson ka jharna, Phir kyun mithya ke andhere se darna?
Ajeeb sa hai Kalyuga ka dhangg, Dhundhla sa hai duniya ka rangg, Kitnon ka imaan hua hai bhangg, Aur kuch jann yeh dekh kar hain dangg.
Lekin tu bilkul chinta na kar, Tu Guruji ka naam lekar dheeraj dhar, Tu buss Guruji mein mastt hokar chal, Kyunki Unhonei hee sambhaalna hai tera aaj aur kal.
Tere beete huey kal kee bhi Unhe poori khabar hai, Teri kismat par Unkee mehre nazar hai, Ve jaante Hain ki tujhmein shraddha aur sabr hai, Aur Unhe teri nishtha par bahut fakr hai.
Barkaraar rakh tu apne dil mein ummeed kee umang, Apne bheetar basaa le simran kee taal kee tarang, Guruji toh har pal Hain tere sangg, Taaki tu kisee bhi haalaat mein na ho tangg.
Tu saralta aur satya se jee le zindagi, Gehri karta chal apni bandagi, Subuddhi maang Guruji se taaki tere karam achche rahein, Duniya waalon ko kehne de ve jo bhi kahein.
Tujhe Guruji ko khush rakhna hai, yeh bhool na jaana, Unkee prerna se ekatrit kar ruhaaniyat ka khazaana, Bin aasakti ke bhog le yeh jeevan, Taaki azad rahe tera antar-mann.
Duniya ka rangg dhundhla hai toh kya hua, Tu dekh is duniya ke paar, Vahaan par sachkhand hai, Jahaan mukti kar rahi hai tera intazaar.
Duniya toh yaheen reh jaayegi, Jabb panchbhoota shareer banega raakh kee dheri, Isliye kalyuga ke ajab dhangg ko peechhe chod kar, Aagey badhne mein na kar tu abb deri.
Tum niraash na hona, Tum udaas na hona, Guruji ne kitnon ko taara hai, Tumhe bhi Ve taarenge, Unhonei kitnon ka jeevan sanvaara hai, Tumhaara bhi har kaaj sanvaarenge.
Apni bhakti ko shraddha se sajaate raho, Guruji ko prem bhaav se bulaate raho, Ve bahut hee dayalu Hain, Ve bahut hee kripaalu Hain, Ve pareshaan hongei dekhkar tumhe pareshaan, Kyunki Ve tumhaare Guru aur naath ke saath saath Hain Bhagwaan.
In ansuon ka mol itna kumm na karo, Kisee bhi baat ka tum gumm na karo, Is paar bhi Hain Guruji, aur Ve Hain uss paar bhi, Denge tumhe hameshaan ashirwaad aur Apna pyaar bhi.
Apne bheetar Guruji ke naam kee jyot jalaakar jee lo, Unke naam ka amrit tum har pal pee lo, Unka nirnay galat ho sakta nahin, Jo Ve karenge vahee tumhaare liye hoga sahi.
Isliye khushi se karo tum Unkee JaiJaikaar, Ve nishchay hee karenge tumhaara uddhaar, Kis tarehn se karenge, yeh faisla Unhee par chod do, Buss, har tarehn kee nirasha se muh moad lo.
Panchhee kee bhanti apne ruhaani pankh phailaao, Gehri saans lekar ruhaaniyat ke shikhir kee oar udd jaao, Tumhaare utsaah ko dekhkar phoola nahin samaayega aasmaan, Guruji kee mehar se laut aayegi tumhaari muskaan.
Har moad par naya imtehaan hai, Har imtehaan mein sangg Bhagwaan hai, Bhagwaan ne hee diya jeevan daan hai, Jeevan daan paakar bhi tu kyun pareshaan hai?
Jinhonei diya hai yeh jeevan, Unhee ko kar de tu isey arpan, Jin Guruji ke naam kee jyot hai mann mein, Unhe hee kar de tu sarv-samarpan, Kewal lafzon mein hee nahin, balki soch aur karam se, Aur wafaa nibhaa le tu, insaaniyat ke dharam se.
Shukrana kar Guruji mein basey Bhagwaan ka, Shukrana kar tu jeevan daan ka, Shukrana kar har imtehaan ka, Shukrana kar Guruji ke har ehsaan ka.
Itne kasht tujhe chhoone se pehle, Guruji kee mehar se tal gaye, Toone beshaq apni oar se mehnat kee hogi, Lekin kewal Guru kripa se tere karam phal gaye.
Imtehaan is se bhi zyada mushkil ho sakta thaa, Guruji kee kripa bin tera safal hona na thaa mumkin, Arey, kitne imtehaan toh dene hee nahin padey tujhe, Ye bhi na mumkin thaa Guruji kee kripa ke bin.
Shukrana karne se teri kismat nikhar jaayegi, Shukrana karne se tere jeevan mein roshni bikhar jaayegi, Shukrana mein bahut shakti hai, Shukrana santusht rehne kee yukti hai.
Shukrana se har savera sajega, Shukrana se tu Guru naam bhajega, Shukrana se dukh mein bhi sukh ho jaayega, Shukrana se tu Guruji se aur bhi ashirwaad paayega.
Zindagi ke badalte rangg hain, Sabhi ke jeene ke alagg dhangg hain, Hum nahin kisee ke jaise, koi hum sa nahin, Jiskee buddhi aur sanskaar jahaan le jaate hain, veh chal deta hai vaheen.
Niyati ek taraf, neeyat doosri oar, Dono ka magar chalta hai zor, Guruji ne thaami hai sabke jeevan kee doar, Ve laatein Hain sabke jeevan mein bhor.
Lekin karmon ka kuch bhaar toh sehna padega, Aur Guruji ke hukm mein rehna padega, Kewal Guru hee hamaare liye haalaat se ladega, Guru hameshaan har sangat ka uddhaar karega.
Isliye na ghabraao maayoosi aur bebasi se, Na himmat haaro dukh kee raat aur andhere mein, Ye toh aate jaate rahenge jeevan mein, Inse ksheenta na aane do apne antar-mann mein.
Antar-mann mein jalaao Guru naam ka deep, Shraddha bhare simran se raho Guruji ke kareeb, Guruji ke siwa na saath rahega koi bhi aur, Jabb aayenge tumhaare jeevan mein chunautipoorna daur.
Unkee nigraani hai tumhaare muqaddar aur karam par, Ve bin sanshay tumhaare sangg Hain har kadam par, Isliye tum kisee bhi chunauti se na daro, Aur har pal Guruji ka shukrana karo.
Shehar ka raja thaa abhimaani, Lekin rakhta thaa apni prajaa ka bahut khayaal, Ek din raajya ka bhraman karne nikla hee thaa, Ki dekha usne ek fakir aur poochha uss se sawaal.
Raja ne poochha, kaisi chal rahi hai zindagi, Fakir bola, mazey mein, karte huey Guruji kee bandagi, Sapne mein mil leta hoon Unse jabb sota hoon, Aur jaagte huey Unke khayaalon mein khota hoon.
Raja ne poochha, kabhi kya hota hai tumhe bhayy, Fakir ne kaha, nahin, kyunki mere mann mein nahin hai koi sanshay, Mujhe toh mere pyaare Guruji hameshaan sambhaalte Hain, Mai dhalta hoon uss saanche mein jismein Ve dhaalte Hain.
Raja ne phir poochha, kaam kya ho tum karte? Fakir ne hans kar kaha, jo kaam mil jaata hai usey karte huey nahin darte, Mata pita gareeb thei so hui nahin padhaayi likhaayee, Abb Guruji ke dar par ho gayi sunvaayee.
Din mein kaam kaaj hoon karta hoon jo bhi hai mil jaata, Shaam hoti hai toh nishulk vidya kee pathshaala mein hoon mai jaata, Guruji kee kripa se miltee hai himmat, Guruji kee kripa se miltee hai taakat, So karta hoon chhote chhote kaam rozi roti ke liye, Toh pet bhar jaata hai aur baaki kuch bach jaata hai daan karne ke liye.
Raja ne kaha, kab karte ho simran? Fakir ne kaha, simran karta hoon har kshan, Shabad sunn leta hoon kabhi kabhi Gurudwaare mein, Vaheen par sewa bhi karvaate Hain Guruji, Jo bhi bojh hai karmon ka, Veh katvaate Hain Guruji.
Raja ko fakir se baat karte hui hairaani, Ki fakir mazey mein lagg raha hai bin kisee pareshaani, Fakir ne raja ke vichaar ko jaan liya, Aur uske bin pooche hee usey jawaab diya.
Kaha fakir ne pyaar se, Raja Sahib, mai shukrana mein rehta hoon, Guruji se dil kee har baat kehta hoon, Sukh se hota hoon prasann, dukh ko bhi sehta hoon, Kyunki Guruji toh mere karmon ka khaata Hain sudhaar rahe, Aur Ve mere agley janam Hain sanvaar rahe.
Ho sakta hai ki badal dein Ve, Mere haath mein banee kismat kee lakeer, Unkee mehar se aane wale mere baaki janmon mein, Pehle se kaheen zyada behtar hogi meri taqdeer.
Fakir kee baaton se Raja ko aayi khud par sharam, Usne bhi mann hee mann Guruji ko kiya smaran, Usne jyun hee Guruji ko pukaar liya, Guruji ne uske karmon ka bhi bhaar liya.
Veh nibhaata raha apne raajasi aur grahasth dharam, Aur Guruji kee mehar se katne lagey uske bhi karam. Guruji kee kripa se miley usey sewa karne ke avsar, Neevanpann aaya vyavhaar mein, charitra par bhi hua achchaa asar.
Raja ke mann aur karam mein, Aane lagaa shukrana ka ehsaas, Duniya ke liye jo thaa ek raja, Veh banaa abb Guruji ka das.
Jaise Guruji basey thei fakir ke mann mein, Vaise hee raja ne Unhe basaaya apne jeevan mein, Raja ko bhi har pal mehsoos honei lagi Guruji kee maujoodagi, Guruji kee bandagi karne se nikhar gayi uskee bhi zindagi.
Raajasi sukhon ko bhoga usne, Lekin simran kee badaulat bhautikvaad mein aasakti chhoot gayi, Rassi kee bhanti vyavhaar mein jo ainthan thi, Guruji kee kripa se veh ainthan toot gayi.
Kayee dinon ke baad raja nikla phir se raajya ke daur par, Gurbani sunaayee dee usey sadak ke ik moad par, Dekha toh ek ghar mein ho raha thaa Guruji ka satsang, Veh bhi bheetar chala gaya dekhkar vahaan ka ruhaani rangg.
Gurbani ke shabad ke baad, Guruji ke naam ka jap usey lagaa sukhdaayee, Phir Aarti ke samay raja ne bhi Guruji mein basey Shivji kee mahima gaayee, Langar prasad chhakaa usne antarmann mein basaakar Guruji kee tasveer, Guruji se agya lekar baahar aaya toh dikha usey vahee fakir.
Fakir ne raja ko ‘Jai Guruji’ kaha pyaar se, Raja ne bhi vinimay kiya aadar satkaar se, Guruji kee kripa se fakir ke roop mein raja ko sadh sangat milee, Aur sadh sangat ke prabhaav se raja kee soch bhi sudharti chali.
Guruji kee kripa se raja kee itnee adhyaatmik unnati hui, Ki jabb raja ka antt vela aaya toh raja kee mukti hui. Fakir ne bhi Guruji ke charnon mein liya antim shwaas, Kalyaan nishchitt hai har uss jann ka jiske mann mein hai Guruji ka vaas.
Raksha bandhan ka parv hai aaya, Bhai behen ke pyaar mein gehraayee hai laaya, Prem ke bandhan kee doar se saji bhai kee kalaayi, Bhai behen ke aapaasi prem se dono ko khushi mil paayi.
Guruji hum sangat ke liye Hain Guru, murshid, meet, Dev, pita aur mata, Maalik Hain hamaare aur Hain Ve hamaare bhraata, Har varsh yeh tyohaar Unkee kripa se hai aata, Unke sangg jo bandhan hai usmein bhakt Unka ashirwaad hai paata.
Bandhan hai yeh raksha ka, Sangat kee suraksha ka, Is bandhan mein bandh kar humne jaana, Ki Guruji ke sangg bandh kar nishchitt hai tarr jaana.
Yeh bandhan hai vishwaas ka, Niswaarth pyaar hai is bandhan kee shakti, Jo bhakt is bandhan mein piroh le shukrana, Uskee toh yakeenan nikhar jaati hai bhakti.
Yahee ek aisa bandhan hai, Jismein bandh kar miltee hai har laukik bandhan se ruhaani mukti, Yahee bandhan hai jismein pyaar niswaarth hai, Aur ye hai adhyaatmik azadi kee yukti.
Isliye apni har saans mein basaakar shukrana, Karte chalein hum har kadam par Guruji par poorna vishwaas, Aur Unke sangg is pyaare bandhan ke liye, Aaj ke din karein Unka dhanyawaad khaas.
Kyunki Guruji bin koi parv nahin ho sakta poora, Unke bin toh zindagi ka har pal hai adhoora, Guruji ke sangg hum sab raksha bandhan manaayein, Dete huey sabhi bhai-behnon ko haardik shubhkaamnaayein.
Aaj Ka Suvichaar 