Month: August 2021

August 21, 2021

Om Namaha Shivaya
Aaj Ka Suvichaar 🙏🏻🙏🏻 # 1280

 Ummeed Ke Deeye 

Veh kal jismein na jaane hum hon ya nahin,
Dua hai uss kal mein sansaar ke haalaat ho jaayein sahi,
Na jaane hum yahaan hongei ya nahin uss samay ko dekhne ke liye,
Lekin jagg kalyan ke liye toh hum jalaa sakte hain ummeed ke deeye.

Guruji ne kaha ki banda bann,
Isliye hamaari zimmedaari hai,
Ki jagg kalyaan mein apna yogdaan dein,
Kyunki yeh dharti paalanhaar hamaari hai.

Har koi jabb dega apna yogdaan,
Toh sukhad honei lagega yeh jahaan,
Kyunki yogdaan mein hogi jo sadbhaavna,
Uss se jaagegi mangal kee sambhaavna.

Yeh mangal ka anugaman (pursuit) bann jaayega ek safar,
Parmaanand hogi jiskee manzil,
Guruji awashya manzil takk pahunchaayenge,
Lekin hamein saaf karna hoga apna dil.

Pyaar ke sadbhaav ko phaylaayein,
Dil mein gyan kee jyot jalaayein,
Khud bhi jeeyein, aur doojon ko jeene dein,
Har jann ko Guru naam ka amrit peene dein.

Simran se dil ko saaf karein,
Khud ko aur doojon ko maaf karein,
‘Mai’ se bilkul khaali ho paaye mann,
Taaki bhar jaaye usmein Guru naam ka dhan.

Is naam ke noor se aise roshan ho jaaye mann,
Ki uss ujaale kee umang se ullaasit ho saanson ka spandan,
Jabb saanson mein Guru naam ka vaas hoga,
Tabb saans mein awashya is umang ka ullaas hoga.

Yeh sapna ho sakta hai poora,
Toh phir kyun isey rehne dein hum adhoora?
Hamaari nek neeyat aur uspar Guruji kee nadar,
Hamaari dua aur Guruji kee mehre-nazar,
Inse awashya sudhar jaayenge haalaat sansaar ke,
Aur aayenge din sabke uddhaar ke.

Duniya mein saamanjasya hoga,
Khatm hongei mano-vikaar,
Dharti par bojh kumm hoga paap ka,
Antt hoga dukh, yatna, aur santaap ka.

Phir kya fark padta hai agar hum hon ya na hon yahaan,
Kumm se kumm humne diya hoga apna yogdaan,
Kitne prasann hongei hamaare Bhagwaan,
Jo Guruji ke roop main aaye taarne yeh jahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 20, 2021

Om Namaha Shivaya
Aaj Ka Suvichaar 🙏🏻🙏🏻 # 1279

Ye Guruji Kee Hai Nagariya

Ye Guruji kee hai nagariya,
Yahaan sanvar jaata hai nazariya,
Yahaan ek ho jaate hain dharti aur akash,
Yahaan maujood hai sakaraatmak sakaash.

Yahaan amrit hai har boond jal kee,
Yahaan kismat likhi jaati hai har pal kee,
Yahaan khud nahin fikr karni padti hai aaj ya kal kee,
Yahaan chinta nahin karni padti hai karmon ke phal kee.

Kyunki Guruji swayam rakhte Hain hisaab,
Unke paas hai sabke karmon kee kitaab,
Koi bhi panna Unse chhupa nahin,
Aur kisee ka bhi kalyaan ruka nahin.

Yahaan bahut ahemiyat hai pashchaataap kee,
Kyunki is se kumm hoti hai sazaa pichhle har paap kee,
Aur iske saath jo aane wale kal ke liye ho sudhaar,
Toh phir toh ho jaaye janam janmaantar ka uddhaar.

Is nagariya mein chalti hai Guruji kee guruyaayee,
Isliye yeh nagariya hai sukhdaayee aur mokshdaayee,
Tarr gaya har jann jisne Guruji kee mahima hai gaayee,
Guruji kee itnee vaddi hai vadiyaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 19, 2021

Om Namaha Shivaya
Aaj Ka Suvichaar 🙏🏻🙏🏻 # 1278

          Jeevan Ke Lambe Raaste

Lambe hain jeevan ke raaste,
Chintaayein hain chhoti moti,
Kabhi himmat and protsaahan dete hain saath,
Kabhi niraasha aur bebasi hai hoti.

Zindagi hai isee ka naam,
Aate hain har moad par imtehaan,
Kabhi mushkil, toh kabhi aasaan,
Kabhi hans kar jhel lete hain, kabhi ho jaate hain hum pareshaan.

Kabhi pathhar hotey huey bhi raahon mein,
Bin girey chal leta hai insaan,
Aur kabhi bin kisee archan ke bhi,
Milta nahin hai mukaam.

Pichhle karmon ka khel hai ye,
Is baat ko na maanein, aisee hamaari aukat nahin,
Aur swatantra ichchaa ka bhi yogdaan hai,
Yeh baat bhi lagti hai bilkul sahi.

Varna toh bahut aasaan hai,
Ki gunah koi karey jaan boojh kar,
Lekin keh de ki veh ichchaa thi Bhagwaan kee,
Aur na zimmedaari le apne kiye huey burey kaam kee.

Tabhi toh jeevan ke in raaston par,
Har kadam par neeyat parakhte Hain Guruji,
Aur usee hisaab se karmon ka hisaab kar ke,
Apne nirnay se dobaara lekha likhte Hain Guruji.

Guruji kee leela Guruji hee jaanein,
Ve bhakt santusht rahein jo Unka hukm maanein,
Kaun sach mein kaisa hai, yeh Guruji ko gyat hai,
Ve pehchaante Hain, kiska kaisa jazbaat hai.

Isliye in moad vaale lambe raaston ka shukrana,
Jin par milta hai anubhav ka khazaana,
Chhoti moti chintaaon ka dhanyawaad,
Kyunki unhee ke kaaran milta hai Guruji ka ashirwaad.

Guruji sangg Hain isliye hum har kasht jhel paayenge,
Unkee mahima ke hee hum sada gunn gaayenge,
Jitna hum Guruji ko samarpan karte jaayenge,
Guruji ko hum apne utna hee kareeb paayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 18, 2021

Om Namaha Shivaya
Aaj Ka Suvichaar 🙏🏻🙏🏻 # 1277

                 Samajhdaar Bann

Guruji Hain tere taaranhaar,
Kar le Unn Parwardigaar ka deedar,
Ek taraf hai saara sansaar,
Dooji taraf hai Guruji ka pyaar.

Samajhdaar bann,
Guruji ko chunn,
Bhool sansaar ko,
Gungunaa Guru naam kee dhun.

Tu jahaan mein reh,
Kintu apne bheetar na basne de jahaan ko,
Bhautik padaarthon ka kar le sadupyog,
Lekin aasakti ka nyauta na de is saamaan ko.

Kyunki isee saamaan mein agar ho gayi
teri aasakti,
Toh phir anuchit tarehn se prabhaavit hogi teri bhakti,
Tu ho jaayega jeevan kee saarthakta se duur,
Aur baahari kaaranon ke vash mein hokar ho jaayega majboor.

Atma-bal kumm na kar, uskee vriddhi honei de,
Jis maqsad se tu yahaan aaya hai, uss maqsad kee siddhi honei de,
Atma-bal kee badhauti se adhik hogi ekaagrataa,
Aur tujhe swayam hee anubhav hogi swatantrata.

Samajhdaar bann,
Na ganvaa yeh dhan,
Ruhaani unnati kar,
Shant kar apna mann.

Tera shant mann aur teri swarantra atma,
Yahee chaahte Hain Guru Paramatama,
Tabhi toh har kaleh-klesh ka hoga khaatma,
Aur pooran hogi Guruji ko paane kee kaamna.

Samajhdaar bann,
Guruji ko kar de sarv-samarpan,
Sanvaar le yeh jeevan,
Taaki baar baar na ho janam maran.

Samajhdaar bann,
Milee hai tujhe Guruji kee sharan,
Yahaan hota hai sankaton ka haran,
Yahaan hota hai mangal karan.

Samajhdaar bann,
Na jaane de yeh avsar,
Tera kalyaan awashya hoga,
Guruji ka haath hai tere sir par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 17, 2021

Om Namaha Shivaya
Aaj Ka Suvichaar 🙏🏻🙏🏻 # 1276

                Tu Himmat Na Haar

Kathin samay hai ye,
Lekin ye rukega nahin,
Waqt bhi shaayad abhi naaraaz hai,
Lekin veh bhi hameshaan roothega nahin,
Tera iraada sachcha hai,
Tu Guruji ka bachcha hai,
Tu himmat na haar,
Tere sangg Hain tere Parwardigaar.

Kuch baadal rahe hain garaj,
Toh kuch baadal rahe hain baras,
Zoron se chal raha hai tufaan,
Lekin tu shant rehne par de dhyan.
Tu buss Guruji ko yaad kar,
Buss, Unhee se fariyaad kar.

Loag kuch na kuch kehte jaa rahe hain,
Tere aansoon behte jaa rahe hain,
Apne aansuon ko na baha vyarth mein,
Kalyaan basaa hai Guru shabd ke arth mein.
Isliye tu buss reh prasann,
Tu Guruji kee sharan mein hai sampann.

Tu khud hee nahin sunn paa raha awaaz apne mann kee,
Palak jhapakne se bhi pehle avadhi beeti jaa rahi hai har kshan kee,
Lekin tu chinta na kar,
Tu buss dheeraj dhar.
Guruji tere angg sangg Hain,
Tere astitva par chha rahe Unke ruhaani rangg hain.

In ruhaani rangon mein bhakti ka saar hai,
In mein Guruji ka pyaar aur dulaar hai,
Inhee rangon mein rangne de apne antar-mann ko,
Inhee ruhaani rangon se rangg le tu apne jeevan ko.
Tu khushkismat hai ki tujhe milee hai in ranggon kee khan,
Isee mein hai teri suraksha aur tera kalyaan.

In rangon ke chadhte chadhte yeh samay beet jaayega,
Tufaan bhi thamm jaayega aur waqt bhi na jeet paayega,
Baadal bhi Guruji ka karenge naman,
Aur Unke garajne aur barasne kee kahaani hogi khatm.
Guruji ke ruhaani rangg se sajee hui teri himmat
Bann jaayegi poore jagg ke liye ek misaal,
Aaj nahin toh kal sabb jaan jaayenge
Ki Guruji kee leela hai bemisaal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 16, 2021

Om Namaha Shivaya
Aaj Ka Suvichaar 🙏🏻🙏🏻 # 1275

Zindagi Khoobsoorat Hai

Guruji kee leela hai badi niraali,
Roshan karte Hain Ve har bhakt kee raah,
Koi bhi na laute Unke dar se khaali,
Kyunki sampoorna brahmaand ke Hain Ve shehenshaah.

Dete Hain Ve jo bhakt ke liye ho achchaa,
Kyunki har bhakt ke liye Unka prem hai sachchaa,
Koi dikhaawa ya rishwat nahin hai zaroori,
Faayda nahin uthaate Ve dekh kar bhakt kee majboori.

Is duniya se bilkul alag Hain Ve,
Hain Ve itne saral aur nirmal,
Har bhakt jann ko Hain Ve pyaare,
Ve Hain itne komal aur taral.

Guruji samajhte Hain har bhakt ka jazbaat,
Kasht aata bhi hai toh Unke kumm kar dene ke baad,
Unkee sharan mein miltee hai sabr aur saahas kee daat,
Unke ashish se bann jaati hai har bigdee baat.

Guruji divyata kee saakshat soorat Hain,
Guruji sneh aur mamta kee moorat Hain,
Unka ashirwaad hamein har pal zaroorat hai,
Unkee sharan mein zindagi jaisi bhi hai bahut khoobsoorat hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 15, 2021

Om Namaha Shivaya
Aaj Ka Suvichaar 🙏🏻🙏🏻 # 1274

                  Azadi Ka Tilak

Azadi ka tilak lagaa le praani,
Chod de ahem karne kee naadaani,
Vehem ke jaise ahem bhi paash hai,
Karta ye atma-bal ka vinaash hai.

Paakhand aur dikhaawe ka silsila bhi kuch aisa hai,
Inka vyavhaar bhi toh paash ke jaisa hai,
In se bandh kar uska gulam bann jaata hai insaan,
Aur phir inke bina nahin chalta hai uska kaam.

Aye praani, tu toh Guruji kee sharan mein hai,
Aur Guruji ka dhyan Unke har bhakt ke sankat haran mein hai,
Har paash jo teri atma ko kamzor banaata hai,
Tera Guru veh har paash todna chaahta hai.

Apne Guruji kee baat maan le,
Unhe parvah hai teri, tu yeh jaan le,
Tu buss Unka anusaran kar,
Unka niyantran hai tere janam maran par.

Ve chaahte Hain bhakton ko jald se jald mukti dilaana,
Unka daayitva hai tere karam kaat-te jaana,
Lekin tere vash mein hai teri swatantra ichchaa,
Isliye usey tu raasta dikha sachchaa aur achchaa.

Jo tujhe Guruji se duur le jaaye,
Jo tera atma-bal kumm kar paaye,
Tu har uss sanskaar ko toad de,
Har uss vyavhaar se muh moad ke.

Kyunki aise sanskaar aur aisa vyavhaar,
Ye tujhe apne paash mein bandi banaa lenge,
Aur agar baad mein toone azaadi chaahi,
Toh ye tujhe gulami kee bediyaan na todne denge.

Abb bhi mauka hai tere paas,
Kar le Guruji par poorna vishwaas,
Na banta chal tu paashon ka das,
Poori kar azad honei kee aas.

Tu Guruji kee oar ek kadam jo badhaayega,
Toh Ve teri oar badhaayenge anek kadam,
Tu Unkee dikhaayee hui raah par chalta chal,
Toh yakeenan safal hoga tera janam maran.

Isliye azaadi ka tilak lagaa le praani,
Nikhar jaayegi har janam kee kahaani,
Jabb azaadi ka saans legi teri zindagaani,
Toh teri ruhaani yatra hogi badi suhaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 14, 2021

Om Namaha Shivaya
Aaj Ka Suvichaar 🙏🏻🙏🏻 # 1273

Nishchitt Hai Tera Kalyaan

Tu anjaan hai,
Tu naadaan hai,
Tera Guru Bhagwaan hai,
Koi nahin Guru ke samaan hai.

Tu chaahe galatiyan kar le anek,
Tere Guruji na thakenge karte huey tera uddhaar,
Tu de dil se awaaz ek,
Tere Guruji usee pal sunn lenge teri pukaar.

Na bhi keh sakey tu, toh koi baat nahin,
Ve khud hee jaan jaayenge,
Jo tere liye hoga sahi,
Guruji tere jeevan mein laayenge.

Tu niraash hoga toh Ve denge asha,
Ve samjhenge teri chuppi kee bhi bhaasha,
Jinhonei tere liye itne kasht hain sahe,
Ve sabb kuch jaan lenge tere bin kahe.

Isliye tu dheeraj dhar,
Chunauti se na tu darr,
Tujhe mila hai Guruji ka dar,
Ye hai sarvottam var.

Guruji ka naam lekar chalta chal,
Manzil milegi aaj nahin toh kal,
Nishchitt hai tera kalyaan,
Kyunki tere Guruji Hain MahaShiv Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 13, 2021

Om Namaha Shivaya
Aaj Ka Suvichaar 🙏🏻🙏🏻 # 1272

      Bhayy Ka Pralay

Kalyuga ka aaya hai samay,
Apne sangg yeh laaya hai bhayy ka pralay,
Kaheen hai vikaaron kee beemaari toh kaheen mahamari,
Adhyaatmik ksheenta ke kaaran phayyl rahi hai laachaari.

Bhayy ko pareshaani ka kaaran na banaao,
Bhayy ko banaa lo prerna,
Uss prerna se aagey badho,
Seekho mushkil ko saahas se gherna.

Bhayy ko vishwaas se bagaavat na karne do,
Bhayy ko raaste kee rukaavat na bann-ne do,
Guruji denge tumhe abhayy daan,
Guruji karenge himmat pradaan.

Maango Guruji se har janam mein Unke naam ka daan,
Guruji kee mehar se karo simran aur dhyan,
Sewa aur satsang kee bhi milee hai daat,
In sabke liye Unka shukrana karo din raat.

Jinhonei anginat bhakton ko taara hai,
Ve tumhe bhi zaroor taarenge,
Jinhonei sainkron ka jeevan sanvaara hai,
Ve tumhaare bhi kaaj sanvaarenge.

Isliye na jeetne do tum bhayy ko,
Na vijay paane do tum sanshay ko,
Vishwaas aur shraddha ko banaa lo apni dhaal,
Sakaraatmakta se sajaate chalo apni chaal,
Aur Guruji ke sanatan saath se,
Apne sir par dhare Unke haath se,
Apni atma ke bal ko badhte huey dekho,
Apne jeevan ko sanvarte huey dekho,
Tum khud hee maan jaaoge,
Tum khud hee jaan jaaoge,
Ki Guruji Hain tum par bhi meharbaan,
Ki Guruji karte Hain har tarehn se kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 12. 2021

Om Namaha Shivaya
Aaj Ka Suvichaar 🙏🏻🙏🏻# 1271

   Jeevan Ka Tathya

Jaante ho ki sab paraaye hain,
Phir bhi samajh lete ho unhe apna,
Jaante ho kuch bhi sthaayi nahin yahaan,
Phir bhi nahin maante ki sab hai jaise ek sapna.

Saarthak toh hai kewal Guru ka naam,
Guru ke naam mein hee basey Hain Bhagwaan,
Vaise bhi yahaan ho tum kuch pal ke mehmaan,
Kyunki sab ne ek din chod kar jaana hai yeh jahaan.

Hum sabka hee shaayad yahee hai haal,
Zaroori hai milaani divya sur se mann kee taal,
Varna haal hota jaayega aur bhi behaal,
Phansaata chalega hamein yeh maya ka jaal.

Guruji ke naam mein bilkul vyast ho jaao,
Har kaam kaaj mein simran ko samaao,
Ruhaani khayaalon mein yoon madhosh ho jaao,
Ki udaasi ke kshan mein bhi anokhi khushi paao.

Guruji ko jaano aur maano apna sahaara,
Tabhi toh mumkin hoga jeena tumhaara,
Yeh kewal soch nahin, yahee satya hai,
Guruji bin nahin guzaara hai, yahee jeevan ka tathya hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja