Month: August 2021

August 11, 2021

Om Namaha Shivaya
Aaj Ka Suvichaar 🙏🏻🙏🏻 # 1270

   Musaafir Ka Ho Gaya Kalyaan

Duniyadaari se jee oob gaya thaa,
Musaafir duvidha mein doob gaya thaa,
Ek din swapn mein Guruji ne diye usey darshan,
Jin se prerit hokar usne dekha apne mann ka darpan.

Mann lagg raha thaa hairaan pareshaan,
Usne mann mein basaaye Bhagwaan,
Guruji ke saumya roop mein Bhagwaan aaye,
MahaShiv bann kar meharbaan aaye.

Musaafir ne bhakti kee chaadar ko odha,
Simran se tann mann ka sringaar kiya,
Phir shraddha ka deep jalaakar,
Prem se usey Guruji ko arpan kiya.

Jin haathon se sewa kee,
Unhee haathon se chhuey Guruji ke charan,
Unhee haathon se daan diya,
Aur kiya Guruji ko sarv-samarpan.

Bhaav mein piroh liya vishwaas,
Shukrana se sajaa liya har shwaas,
Jaise jaise mit gayi har traas,
Badhti gayi sadhna kee aas.

Hota chalaa pavitrikaran antar-mann ka,
Yeh sabb thaa parinaam Guruji kee sharan ka,
Har duvidha hoti gayi duur,
Vikaar bhi honei lagey chuur.

Aise ramm gaya veh Guruji kee sadhna mein,
Ki har pal beetne lagaa Unkee aradhana mein,
Abb to uskee dinacharya poori,
Guruji ke naam ke bin thi adhoori.

Guruji ne liye kayee baar uske imtehaan,
Uskee nishtha dekh kar Ve huey aur bhi meharbaan,
Usey Guruji kee goad thi pasand,
Guruji Apni goad mein lekar gaye usey sachkhand.

Sachkhand ka mila saubhagya,
Itihaas bann ke reh gaya uska durbhagya,
Musaafir ka ho gaya kalyaan,
Paa lee usne amrit kee khan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 10, 2021

Om Namaha Shivaya
Aaj Ka Suvichaar 🙏🏻🙏🏻 # 1269

             Guruji Kee Mehar Se

Jabb hamla karey andhkaar,
Toh dhaal baney Guruji ka pyaar.
Jabb haar maan jaaye kshamta,
Toh prerna baney Guruji kee mamta.

Jabb dil ko lagey koi chot,
Toh saantvanaa de Guruji kee jyot.
Jabb poora zamaana ho bewafaa,
Toh har kamee poori karey Guruji kee wafaa.

Jabb raasta na aaye nazar,
Guruji ka maargdarshan dikhaaye asar.
Jabb raaste mein aaye kathinaayee,
Usey sambhaale Guruji kee vadiyaayee.

Jabb mann maan-ne lagey haar,
Toh dheeraj de Guruji ka dulaar.
Jabb samajh na aaye shanti kee yukti,
Toh Guruji kee bhakti se miley shakti.

Jabb zakhm ka gumm todey sanyam,
Toh Guruji ka prem bann jaaye marham.
Jabb gher le beemaari ya laachaari,
Toh bebasi ko todey Guru naam kee khumari.

Jabb akelapan ho aur na ho paaye kisee se baat,
Toh akelapann ekaant bann kar nikhar jaaye paakar Guruji ka saath.
Jabb kabhi neeras lagne lagey zindagaani,
Amrit kee varsha karey Guruji kee meharbaani.

Jabb bhi dil karey ki yahaan se kaheen duur hai jaana,
Toh sneh bhari suraksha de Guruji ka aashiyaana.
Jabb antar-mann kee gehraaiyon se mehsoos ho Guruji ka shukrana,
Toh Guruji kee mehar se tarr jaaye jeevan ka afsaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 9, 2021

Om Namaha Shivaya
Aaj Ka Suvichaar 🙏🏻🙏🏻 # 1268

                 Koi Aur Nahin

Koi aur nahin sunega yoon tumhaari pukaar,
Koi aur nahin karega tumhe itna pyaar,
Koi aur nahin sambhaalega tumhaara bhaar,
Jaise Guruji sambhaalenge.

Koi aur nahin yoon karta rahega tumhe maaf,
Koi aur nahin yoon karega tumhaara antar-mann saaf,
Koi aur nahin yoon dilaayega tumhe insaaf,
Jaise Guruji dilaayenge.

Koi aur nahin chalega sadaa tumhaare saath,
Koi aur nahin karega mann hee mann mein tumse baat,
Koi aur nahin tumhaare karam dega yoon kaat,
Jaise Guruji kaatenge.

Koi aur nahin haalaat samjhega tumhaara,
Koi aur nahin dilaa paayega duniyavi paashon se chhutkaara,
Koi aur nahin banega tumhaara atoot aur anant sahara,
Jaise Guruji banenge.

Koi aur nahin yoon wafa ka rishta nibhaayega,
Koi aur nahin yoon antt vele kaam aayega,
Koi aur nahin yoon goad mein lekar jaayega,
Jaise Guruji le jaayenge.

Isliye aye bande, tu shukrana kiya kar har pal,
Na vyarth ke kisson kee vajeh se tu haath mal,
Guruji sangg Hain toh tere din jaayenge badal,
Guruji sangg Hain toh jeena marna hai safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 8, 2021

Om Namaha Shivaya
Aaj Ka Suvichaar 🙏🏻🙏🏻 # 1267

             Dayalu Guruji Ka Dar

Jahaan kee soch se hee ho jaaye kalyaan,
Jahaan pahunch kar milte Hain swayam Bhagwaan,
Veh dayalu Guruji ka dar hai,
Veh dayalu Guruji ka dar hai.

Guruji ka bada naam hai,
Kalyanakari Unka dhaam hai,
Jo aata hai Unke dar pe,
Veh jaata hai vahaan se tar ke,
Aisee hai mahima Guruji ke dwaar kee,
Yahaan sunvaayee hoti hai har bhakt kee pukaar kee.

Yahaan kisee vehem ka nahin hai kaam,
Yahaan har mushkil ke nivaaran ka hai intazaam,
Yahaan har chinta ko miley aaraam,
Yahaan milte hain saare teerath dhaam.

Na karna yahaan koi dikhaawa hai,
Na chadhaana yahaan koi chadhaava hai,
Yahaan chahiye sachche bhaav ka pehnaava hai,
Yahaan milta shraddha ko badhaava hai.

Yahaan aksar hota hai bhakt ka imtehaan,
Tarr jaate hain samarpan karne waale insaan,
Tarr kar chhoo lete hain ve ruhaani aasmaan,
Yahaan ke maalik Hain itne meharbaan.

Isliye dua karo yahaan rehne kee,
Chaahe zaroorat pade kuch kuch sehne kee,
Yahee raah hai mukti ke gehne kee,
Yahaan aawashyakta nahin kuch bhi kehne kee.

Guruji ka yeh dar bada hitkaari hai,
Yahaan nirogi hoti atma hamaari hai,
Yeh har bhakt ka divya ghar hai,
Yeh dayalu Guruji ka dar hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 7, 2021

Om Namaha Shivaya
Aaj Ka Suvichaar 🙏🏻🙏🏻 # 1266

Bhakt Ke Mann Mein Guruji

Bhakt ke mann mein Guruji,
Kann kann mein Guruji,
Om mein Guruji,
Roam Roam mein Guruji.

Guruji hee baahar,
Guruji hee bheetar,
Guruji ka gungaan,
Karta hai kalyaan.

Guruji Hain Swami,
Guruji antaryaami,
Guruji kee Bhakti,
Deti hai adhyatmik shakti.

Guruji se hee dhyan,
Guruji se hee gyan,
Guruji ka simran,
Nikhaar deta hai jeevan.

Guruji se sansaar,
Guruji se pariwaar,
Guruji ka vandan,
Karey niraasha ka khandan.

Guruji se har shwaas,
Guruji se atma-vishwaas,
Guruji ka pyaar,
Mukti ka dwaar.

Guruji se prasannataa,
Guruji se sampannataa,
Guruji ke charan,
Dukh-haran mangal-karan.

Guruji se bandagi,
Guruji se zindagi,
Guruji Hain sabse divya,
Guruji Hain MahaShiv.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 6, 2021

Om Namaha Shivaya
Aaj Ka Suvichaar 🙏🏻🙏🏻# 1265

Na Yeh Zameen Hamaari Hai

Na yeh zameen hamaari hai,
Na hamaari hai yahaan koi jaageer,
Sabhi aate jaate musaafir hain,
Khuda ke hain hum fakeer.

Yeh toh khushnaseebi hai hamaari,
Ki dekh kar hamaari laachaari,
Guruji ne hamein sweekaar liya,
Aur hamein itna pyaar diya.

Varna hum toh na jaane kya karte,
Marte marte jeete ya jeete jeete marte,
Sochte hain ki hai par nahin hai hamein samajh,
Vyarth ke maajron mein jaate hain hum ulajh,
Isliye asal dhan hamein aata nahin nazar,
Aur hum saans lete hain hokar bekhabar.

Guruji ne dikhaaya hai raasta simran ka,
Taaki pavitrikaran ho hamaare mann ka,
Guruji ne sikhaaya hai karna gupt paath, sewa, aur daan,
Taaki is baanvre mann mein na buss jaaye abhimaan.

Guruji ne kaha hai Unkee mahima sunn-ne aur sunaane ko,
Aur bin vehem ke Unkee chhavi is mann mein basaane ko,
Hamaare karmon ka bhi sambhaala hai Unhonei bhaar,
Aur har pal har bhakt par barsaaya hai pyaar.

Is prem kee vrishti ka karein hum sammaan,
Yaad rakhein ki Guruji sadaa Hain hum par meharbaan,
Is ranggmanch par hum sabb hain pal do pal ke mehmaan,
Yeh yaad rahei toh hum shaayad bann paayenge insaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 5, 2021

Om Namaha Shivaya
Aaj Ka Suvichaar 🙏🏻🙏🏻 # 1264

Jabb Se Mai Aayi Guruji Ke Dwaar

Jeevan kee yatra banti gayi ruhaani,
Guruji ke naam se tarne lagi karmon kee kahaani,
Anugrihit hua mera ghar pariwaar,
Jabb se mai aayi Guruji ke dwaar.

Jaise jaise Guruji kee mehar badhne lagi,
Mai is ruhaani yatra mein aagey chalne lagi,
Mann mein susajjit hua Guruji ka darbar,
Jabb se mai aayi Guruji ke dwaar.

Mann lagta gaya simran aur dhyan mein,
Satsang sunaane aur sunn-ne lagi Guruji ke sammaan mein,
Japne lagi mai Har ke naam ka haar,
Jabb se mai aayi Guruji ke dwaar.

Guruji mein paaye mainey maa aur naath,
Har kamee poori hui paakar Guruji ka saath,
Mila mujhe Guruji ke sneh ka uphaar,
Jabb se mai aayi Guruji ke dwaar.

Anand mila hai mujhe anupam,
Kumm lagne lagaa hai har gumm,
Saj sanvar gaya hai mera sansaar,
Jabb se mai aayi Guruji ke dwaar.

Guruji ke ashirwaad se hee poorna ho mere har janam ka afsaana,
Guruji ka har pal har saans se baarambaar shukrana,
Main toh dhanya hui paakar Guruji ka pyaar,
Jabb se mai aayi Guruji ke dwaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 4, 2021

Om Namaha Shivaya
Aaj Ka Suvichaar 🙏🏻🙏🏻 # 1263

Aisee Kripa Karo Mere Daata

Koi chidiya ke chehekne se jaage,
Koi chadhti hui dhoop se,
Aisee kripa karo mere daata,
Ki mai jaagoon mann mein basey Aapke roop se.

Aapka hee vichaar bann kar aaye mera prabhat,
Aapke hee swapn mai dekhoon jabb ho raat,
Aapse din bhar karti rahoon mai baat,
Har pal Aap rahein mere bheetar aur mere saath.

Aisee lagan lagg jaaye Aapse, swami,
Ki na sataa paaye mujhe koi bhi pareshaani,
Ek Aap hee toh Apne Hain, saari duniya hai begaani,
Aapki sharan mein yeh sachchaayee hai mainey jaani.

Koi raat kee neend ke liye kare andhera,
Kisee kisee ko dheemi roshni bhaaye,
Aisee kripa karo mere daata,
Ki mujhe Aapke hee simran se neend aaye.

Aur jabb Aapne swapn mein na aana ho,
Toh phir so-un hee na, mai rahoon jaagti,
Aur apne antar-mann ke jharokhe mein,
Pal pal mai rahoon jhaankti.

Chhavi Aapki mann mein basee rahe,
Mere mukh par deewanepann kee hansee rahe,
Deewanapan Aapke pyaar ka,
Deewanapan Aapke deedar ka.

Yeh deewanapan hee bann jaaye jeevan,
Isee mein beet jaaye har kshan,
Aap mein hee magn rahe sadaa mera mann,
Sunn leejiye yeh ardaas, mere Bhagwan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 3, 2021

Om Namaha Shivaya
Aaj Ka Suvichaar 🙏🏻🙏🏻 # 1262

           Bhakti Ka Shringaar

Guruji kee pooja karein prem se,
Ya Unse prem karein pooja ke saath,
Pyaar bin ho sakey pooja nahin,
Pooja bin na ho paaye pyaar,
Dono se bhaav ko sajaa lein,
Toh ho jaaye Bhakti ka shringaar.

Ya kisee ko ho Guruji ka khaas hukm,
Ya phir hamein hee ho chaav,
Varna toh karma-kaand bhi zaroori nahin,
Guruji toh buss chaahein bhakti mein shuddh bhaav.

Na koi dikhaawa, na koi sakht niyam,
Pyaar bhari pooja ya pooja poorvak pyaar,
Buss Unse seedhi taar hai jodni,
Aur Unke prati apne bhaav ka karna hai izhaar.

Hamaare baare mein sab kuch Ve jaanein,
Isliye aawashyakta nahin kuch bhi chipaane kee,
Ve hee margdarshak aur Dev Hain hamaare,
Isliye koshish karte rahein hum Unhe rijhaane kee.

Mata pita bhi Ve Hain, aur Hain bhai aur meet,
Nibhaani hai Unse aadar aur preet kee reet,
Isliye pooja aur pyaar se sajey huey bhaav se Unke deedar ka ashirwaad paayein,
Bhakti ka pyaar aur pooja se shringaar kar ke Guruji kee mehar se hum nikhar jaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 2, 2021

Om Namaha Shivaya
Aaj Ka Suvichaar 🙏🏻🙏🏻 # 1261

      Guru Har Krishan Dhyaayiye

1656 mein jabb aayi July saat,
Toh Guru Har Rai ko Nirankaar ne dee saugat,
Mata Krishen Kaur ne divyatma ko diya janam,
Jinhonei aagey chal kar badhaaya insaaniyat ka dharam.

1661 mein in baalak ke pitashree ne,
Paanch varsh kee aayu mein Unhe banaaya Guru,
Guru Har Krishan ne chechak kee beemari se,
Kitne logon ko theek dena kiya shuru.

Unhonei Apni guruyaayee ke dauraan,
Sangat ko sikhaaya karna pyaar aur dena daan,
Dusvein Guru Shri Guru Gobind Singh Sahib ne,
Guru Har Krishan ko Shradhanjali dete huey kaha,
Ki jo Guru Har Krishan ka dhyan karega,
Guru ka ashish uske dukh harega.

‘Guru Har Krishan dhyaayiye, jis dithe sab dukh jaayiye,’
Yeh hissa hai aaj bhi ardaas ka,
Itna sammaan mila Guru Har Krishan ko,
Yeh vaakya pramaan hai uss vishwaas ka,
Jo sangat ko aaj bhi hai Guru Har Krishan par,
Isliye sangat jaati hai tarr.

Hamaare pyaare Guruji mein basey Hain Nirankaar,
Unkee sharan sangat ke liye hai sabse anmol uphaar,
Aaj Guru Har Krishan ke Prakash Purab par,
Guruji se hum bhi maangein yeh var,
Ki hum bann jaayein Unke achche bachche,
Sadaa rahein insaaniyat ke dharam mein sachche.

‘Baal Guru’ Guru Har Krishan ke prakash purab par,
Aayiye swayam ko insaaniyat ka dharam karaayein yaad,
Pyaare Guruji kee sangat hain hum,
Karein Guruji se yeh fariyaad,
Ki is mahamaari ka abb antt ho,
Dein Ve jagg ko yeh ashirwaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja