Month: September 2021

September 20, 2021

Om Namaha Shivaya
Aaj Ka Suvichaar 🙏🏻🙏🏻 # 1310

  Rabb Mein Sabb, Sabb Mein Rabb

Tujh mein mai hoon, mujh mein hai tu,
Phir yeh duuri ka bhaav hai kyun?
Tujh mein bhi Bhagwaan, mujh mein bhi Bhagwaan,
Phir kaahe ka bhed-bhaav, kaahe ka abhimaan?

Tujh mein bhi atma, mujh mein bhi atma,
Phir kyun baahar dhoondhein Paramatama?
Dono kee aatmaayein ek usee Paramatama ka hain hissa,
Phir kyun yeh tu tu mai mai ka kissa?

Guruji tere nath Hain aur mere bhi,
Dono kee mata bhi Hain Ve hee,
Tujhe aur mujhe Ve ek hee thali mein langar prasad khilaate Hain,
Har tarehn se teri aur meri ekroopta dikhaate Hain.

Tujh par aur mujh par barasti hai Unkee mehar kee vrishti,
Har pal rehti hai Unkee hum dono par drishti,
Phir kyun yeh bhinnataa, kyun yeh fark?
Kyun yeh matbhed, kyun yeh tark?

Tujh mein bhi aur mujh mein bhi,
Guruji kee divyataa ka hai vaas,
Isliye tu adhyatmik duuri badhaakar,
Na kar yoon Guruji ko udaas.

Sadh sangat ji, ye tu aur mai baste hain hum sab mein,
Jabb ki hum sab baste hain usee ek Rabb mein,
Isliye do ka toh hai bilkul vyarth sa khayaal,
Is mein nahin hai koi dooja sawaal.

Rabb mein sab, sab mein Rabb,
Guruji dikha rahe Hain,
Yeh sach hai abb, yahee sach thaa tabb,
Guruji sikha rahe Hain.

Isliye Guruji ko apni ‘mai’ de dein tu aur mai,
Guruji se seedhi taar jod kar paa lein khaamiyon par vijay,
Advait avastha ka ehsaas samaa jaayega jabb spandan mein,
Toh nirmal anand aayega Guruji ke vandan mein.

Poori kaayinaat ka jhukaav hai aur rahega Guruji kee oar,
Ekta kee oorja se aur bhi prerit hogi bhakti kee doar,
Tera aur mera ‘mai’ ojhal ho jaayega naadaani kee nisha mein,
Aur Guruji kee kripa se saamanjasya ka shubh spandan raaj karega har disha mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 19, 2021

Om Namaha Shivaya
Aaj Ka Suvichaar 🙏🏻🙏🏻 # 1309

   Pyaar Bhari Shubhkaamnaayein

Ganesha Chaturthi ke dus din ke pashchaat,
Aayi Ananta Chaturdashi,
Ganesha Visarjan ka tyohaar bhi hai,
Aur bhakton ke mann mein hai khushi.

Pauranik katha ke anusaar,
Baalika Sushila ne khoya maa aur maa ka pyaar,
Sumant brahmin ne phir kiya dooja vivaah,
Aur Karkash banee Sushila kee sauteli maa.

Bachpan beeta sauteli maa ka atyaachaar sehte huey,
Bahut dukh dete thei Sushila ko uske ashru behte huey,
Phir uskee shadi ho gayi Kaundinya ke saath,
Aur ek din usne Ananta Shapath Lee, karte huey kuch striyon se vrat kee baat.

Pehle toh dampati bahut sukhi rahi,
Phir pati ke poochne par Sushila ne shapath kee baat kahi,
Krodh mein pati ne ananta ke pavitra dhaage ko phaink diya agni mein,
Phir bahut besurapann hua pati aur patni mein.

Dampati par aane lagi vipda bhaari,
Durbhaagya se grast hui Sushila bechaari,
Phir Kaundinya ne kiya Prabhu Ananta ke liye tapp,
Jinhonei aakar mitaaye saare sankat.

Vishnu ji ke avatar Hain Prabhu Ananta,
Aur Guruji mein samaaye Hain sabb Bhagwant,
Guruji ke sab bhakton ko bhi aaj ke din kee ho badhaayee,
Paandavon ko raajya vaapis milne se itni prassannataa thi chhayi.

Jooey mein chhal kapat karke,
Kauravon ne pandavon ko kiya paraajit,
Rajya chhin gaya pandavon ka,
Bahut niraash hua Unka chitt.

Vanvaas mein rehte huey,
Pandavon ko koi upaay na soojha,
Tabb Yudhishthir ne Krishna ji kee baat maani,
Aur Bhagwaan Ananta kee kee pooja.

Bhagwaan Ananta kee kripa se,
Pandavon ko vaapis mila unka raajya,
Jaise Sushila aur Pandavon par Ananta Ish kee mehar hui,
Vaise hee jaagein sabke sotey huey bhaagya.

Guruji kee sharan mein hai har teerath dham,
Kyunki Guruji mein basey Hain Brahma Vishnu aur Mahesh,
Jis bhi devi devta ka japein hum naam,
Hamaari praarthna sweekaarte Hain Sarvesh.

Ganesha Visarjan ke paavan tyohaar kee,
Aur Ananta Chaturdashi ke is shubh vaar kee,
Sabhi ko pyaar bhari shubhkaamnaayein,
Guruji kee kripa se tal jaayein sabki balaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 18, 2021

Om Namaha Shivaya
Aaj Ka Suvichaar 🙏🏻🙏🏻 # 1308

                Mangal Mukaam

Niraasha kee vaadiyon kee gehraayee mein
Na doobne do tum swayam ko,
Vaheen par maayoos hokar baithne se
Na do badhaava apne gumm ko.

Niraasha kee vaadiyon se oopar uthkar dekhoge,
Toh hee asal nazaara dekh paaoge,
Varna unhee gehraaiyon mein apne gumm ko badhaava dete dete,
Tum aati hui khushi ka swaagat hee na kar paaoge.

Baras rahi hai Guruji kee mehar,
Aane wali hai shubh sehar.
Jhuka kar Guruji ke charnon mein mastak,
Khushi darwaaze par de rahi hai dastak.

Isliye asha kee oonchaayee ko dekhne ka prayaas karo,
Guruji angg sangg Hain, isliye tum chadhne se nahin daro.
Buss, oopar chadhte chadhte lekin yeh rakhna yaad,
Ki sir neevan rahe aur neevan rahe jazbaat.

Guruji kee mehar se hoga kalyaan,
Shubh aur shuddh hoga asha ka parinaam,
Guruji ke haath mein saump do zindagi ke ghode kee lagaam,
Toh nishchitt hai milna uddhaar ka mangal mukaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 17, 2021

Om Namaha Shivaya
Aaj Ka Suvichaar 🙏🏻🙏🏻 # 1307

Jis Bhi Rishte Se Hum Aapko Jaanein

Pyaare Guruji,

Koi kahe Aapko apna bhraata,
Koi kahe ki Aap Hain Guru ke roop mein mata,
Kisee ko laagein Aap pyaare se meet,
Koi nath maankar nibhaaaye Aapse preet.

Hum sewak, Aap Hain Samraat hamaare,
Aapki udaarta se pahunche hain hum Aapke dwaare.
Bhatke huey har raahi ke Aap Hain maargdarshak mahaan,
Har kisee ne Aap mein Guru ke roop mein paaya hai Bhagwaan.

Aap Hain maalik, hum hain Aapke kinkar,
Agyani hain, anjaan hain, keejiye taras humpar.
Aap bashar ka roop lekar aaye bannkar Pashupati,
Dene hamein azaadi kee oar le jaane waali sumati.

Baaki jhanjhaton mein na padte jaayein hum,
Aur uljhanon mein na ulajhein, aur vartmaan kee uljhanein sulajhaayein hum,
Yeh nahin ho sakta Aapki mehar ke bin,
Isliye buss Aapse rishta jodey rakhein hum raat aur din.

Kyunki jis bhi tarehn se is rishte ko hum vichaarein,
Hum toh har samay Aapko hee pukaarein,
Aap hee Hain hum deen praaniyon ke dayalu Daata,
Har bhakt ke sangg Aapka hai nirmal naata.

Yahee sarvshreshtha naata hai poore sansaar mein,
Har kshan bheegta hai yeh naata Aapke divya pyaar mein,
Jabb takk rahey yeh sansaar aur yeh srishti,
Kripa kar banaaye rakhna hum par Apni drishti.

Pyaare Guruji Maharaj, hamein deejiye apni kripa ka aisa daan,
Ki Aapki rehmaton ke sarovar mein hum karein nis din snaan,
Jis bhi rishte se hum Aapko jaanein,
Jis bhi rishte se Aapko hum apna maanein,
Aapki kripa se yeh samajh mein aaya hai,
Ki ek Aap hee apne Hain, baaki saara jagg paraaya hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 16, 2021

Om Namaha Shivaya
Aaj Ka Suvichaar 🙏🏻🙏🏻 # 1306

                    Nirmal Noor

Chaahe tujhe yeh galat lagey ya sahi,
Guzraa hua waqt dobaara aata nahin,
Yahee waqt ka dastoor hai,
Har koi waqt ke aagey majboor hai.

Maana ki teri manzil bahut duur hai,
Lekin vahaan pahunchna bhi zaroor hai,
Shukr hai ki tujhe chalte rehne ka fitoor hai,
Kyunki tere antar-mann par chhaaya Guruji ka nirmal noor hai.

Isee noor mein basaa hai Guruji ka ashirwaad,
Isee noor se hai tera raasta aabaad,
Isee noor se hai tere jeevan mein savera,
Isee noor se ho jaayega kalyaan tera.

Yahee noor meetha banaayega waqt ke beetne kee intazaar ko,
Yahee noor roshan karega teri manzil ke dwaar ko,
Jabb raasta aur manzil dono Guruji ke nirmal noor se ujjwal hain,
Toh jaan le aur maan le ki Guruji tere sangg har pal Hain.

Shukrana rakh tu apni har arzi mein,
Na dakhl de tu Guruji kee marzi mein,
Guruji ko Unkee divya mehar barsaane de,
Apne poorna astitva ko tu Unke noor mein samaane de.

Waqt ko bhi is noor se prerna mil jaayegi,
Waqt ke chaman mein har kali khil jaayegi,
Patjhad ka antt hoga, aa jaayega basant,
Guruji kee kripa se tere intazaar ke lamhon ka zaroor hoga antt.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 15, 2021

Om Namaha Shivaya
Aaj Ka Suvichaar 🙏🏻🙏🏻 # 1305

              Tu Himmat Na Haar

Na niraash ho ki teri baat koi sun nahin raha,
Abb takk toone Guruji se kyun nahin kuch kaha?
Kya tu jaantaa hai ki har ek aansoo jo tera chhup chhup kar hai baha,
Uske liye pyaare Guruji ne tujhse bhi zyada dard hai saha?

Ve toh tere bin boley hee sab jaante Hain,
Ve toh sabki asaliyat bhali bhanti pehchaante Hain,
Lekin tu apni tasalli ke liye Unse zaroor kiya kar baat,
Taaki tu chayyn se so sakey har raat.

Jodey reh tu Guruji se antar-mann kee seedhi taar,
Is se tera Unke sangg rishta rahega sadaa barkaraar,
Toad sakta hai raaste kee har baadha aur har deewar,
Aisee shakti se paripoorna hai Guruji ka divya dulaar.

Chola choda hai Guruji ne,
Lekin muh nahin moda Guruji ne,
Balki abb Unkee mahima pehle se bhi kaheen zyaada hai,
Aur Ve jaante Hain ki tera nek iraada hai.
Yakeenan har pal Hain Ve tere saath,
Tu chod bhi de agar, Ve na chodenge kabhi bhi tera haath.

Kyunki jo haath thaam lete Hain Guruji ek baar,
Toh phir chaahe idhar se udhar ho jaaye saara sansaar,
Tujhe milta rahega Unka ashirwaad aur Unka pyaar,
Isliye tu bilkul bhi himmat na haar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 14, 2021

Om Namaha Shivaya
Aaj Ka Suvichaar 🙏🏻🙏🏻 # 1304

Hum Ho Jaayein Maalaamaal

Jaisa bhi hai hamaara haal,
Sab hai hamaare karmon aur is waqt ke khel ka kamaal,
Guruji ke naam ka kavach hai hamaari dhaal,
Guruji hee hum sabko sakte Hain sambhaal.

Mann mein ho jo bhi sawaal,
Ve jawaab dekar kar dete Hain nihaal,
Adhiktar karam swayam par lete Hain Deen Dayaal,
Apni kripa se hamaare kasht dete Hain Ve taal.

Har bhakt hai Guruji ka laadla laal,
Karte Hain Guruji har bhakt kee dekhbhaal,
Karuna nidhaan Hain Ve, Unka hriday hai bahut vishaal,
Itne paraakrami Hain ki Unse bhaybheet ho jaata hai kaal.

Yeh sansaar toh hai maya ka jaal,
Guruji hee ismein se sakte Hain hamein nikaal,
Chaahe ismein lagg jaayein kayee janam ya kayee saal,
Kyun na hum milaayein simran ke sur ke sangg vishwaas kee taal.

Kyun na atma kee pyaasi gaagar mein,
Guruji ke naam ka amrit lein hum daal,
Aur swayam ko,
Guruji ke banaaye saanche mein lein hum dhaal.

Isliye apne mann ke mandir mein,
Prem bhaav se sajaakar Unkee aarti ka thaal,
Guruji ke naam ka prasad paakar,
Hum ho jaayein maalamaal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 13, 2021

Om Namaha Shivaya
Aaj Ka Suvichaar 🙏🏻🙏🏻 # 1303

            Uss Pyaar Ka Deedar

Na samay ka bandhan,
Na chayyn ka khandan,
Sirf Guruji ka vandan,
Aur uss vandan ka spandan.

Na koi roak-toak kee pareshaani,
Na bewafaai na beimaani,
Sirf Guruji kee kahaani ruhaani,
Aur uss kahaani kee zubaani.

Na koi bhayy,
Na koi sanshay,
Sirf bhakti ka nishchayy,
Aur uss nishchayy kee layy.

Na koi niyam ya reet riwaaj,
Na koi andhvishwaas,
Sirf Guruji par vishwaas,
Aur uss vishwaas ke ehsaas.

Na koi abhimaan,
Na koi maan apmaan,
Sirf Guruji ka naam,
Aur uss naam ka gungaan.

Na koi ghaav,
Na koi abhaav,
Sirf Guruji mein bhaav,
Aur uss bhaav se lagaav.

Na koi sakhti,
Na koi aasakti,
Sirf Guruji kee dee hui mukti,
Aur uss mukti kee yukti.

Na koi deewaar,
Na koi prachaar,
Sirf Guruji ka pyaar,
Aur uss pyaar ka deedar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 12, 2021

Om Namaha Shivaya
Aaj Ka Suvichaar 🙏🏻🙏🏻 # 1302

            Udhaar Kee Zindagi

Kuch bhi toh nahin hai hamaara yahaan,
Na ye shareer, na ye atma,
Na ye waqt, na ye jahaan,
Na zameen, na aasmaan.

Jo saans bhi hum lete hain,
Usey bhi lekar chod dete hain agley hee pal,
Saansein takk bhi hain udhaar kee,
Yahee kahaani hai har janam aur har baar kee.

Lekin dena hee padega imtehaan,
Kyunki aisa hukm de rahey Hain Bhagwaan,
Isliye jo zindagi milee hai udhaar mein,
Uska uddhaar basaa hai uske sudhaar mein.

Guruji kee sharan mein nishchitt hai yeh sudhaar,
Lekin, swayam ko yaad dilaana hoga baar baar,
Ki maangne wale nahin bann-na,
Chaahe mann mein jaisi bhi ho tamanna.

Guruji jaante Hain hamein humse bhi zyaada,
Ve pehchaante Hain hamaara har iraada,
Isliye soch aur karam ko nek rakhna hai zaroori,
Taaki zindagi jeete huey hee mukti se mitt jaaye har duuri.

Aasaan beshaq na ho aisa hona, lekin namumkin bhi nahin hai,
Guruji jo raah dikhaate Hain, vahee hamaare liye sahi hai.
Unhee kee mehar se sewa, simran, aur satsang kee miltee hai daat,
Unhee ke ashirwaad se hee banti hai har bigdee baat.

Hamein toh itna bhi gyat nahin hai ki aglee saans bhi le paayenge ya nahin,
Isliye kyun na maan lein jo baat Guruji ne hai kahee?
Unhee se jode rakhein seedhi taar,
Kyunki ek Ve hee hamein sakte Hain taar.

MahaShiv Hain Ve, har yug ke swami,
Bhaktvatsal Hain Ve, aur Hain Ve antaryaami,
Insaaniyat ka paath Ve padhaate Hain,
Apne hee tareeke se samjhaate Hain.

Guruji se dua karein ki Ve dein hamein subuddhi,
Aur uss subuddhi ka upayog karne kee hamaare chitt ko dein shuddhi,
Taaki jaisa Ve chaahein, hum vaise bann jaayein,
Aur Unke deeye huey insaaniyat ke imtehaan mein safal ho paayein.

Guruji ne hamein is imtehaan ke kaabil samjhaa, isliye Unka dhanyawaad,
Imtehaan mein kaamyaab honei ke liye maangein Unse ashirwaad,
Taaki sudhaar laayein is zindagi mein jo hai Unka deeya hua prasad,
Aur udhaar kee is zindagi kee har saans ho Guruji ke naam se aabaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 11, 2021

Om Namaha Shivaya
Aaj Ka Suvichaar 🙏🏻🙏🏻 # 1301

   Aapki Sharan Mein Rehne Kee Aas

Guruji, kripa kar ke hamaara jeevan sanvaar dein,
Hum par karuna kar ke hamein taar dein,
Kiye hain jo hum sabne beete huey kal mein paap,
Usee ka parinaam hai aaj ka yeh dukh-santaap,
Aapke siwa kaun hamein maaf karega,
Kaun hamaara dil saaf karega?

Aap hee Hain hamaara ek maatra sahaara,
Aapko hee devi devtaaon ne bhi hai pukaara,
Hamaari vintee bhi leejiye sunn,
Kshamaa kar deejiye hum sabke avgun.

Aap hee Hain bhaktvatsal aur bhakton ke adheen,
Aap par nirbhar hai yeh aasmaan aur yeh zameen,
Aap Hain leela dhari aur kalyaankaari,
Hum hain sirf yaachak ke roop mein bhikhaari.

Jeevan kee raah par hum bhatke huey hain,
Janam-maran ke chakravyuh mein atkey huey hain,
Aapke charnon kee dhool bann-ne kee bhi nahin hai aukat hamaari,
Dete rahiye hamein sewa, simran, aur satsang kee daat pyaari.

Aapko samarpan kar paayein aaj bhi aur kal bhi,
Aapko bhoolne na paayein hum ek pal bhi,
Har din aur har raat ke liye, har kshan ke liye karein Aapka shukrana,
Aapko Shukrana kiye bina na khaa paayein ann ka ek bhi daana.

Keejiye hamaare antar-mann ka pavitrikaran,
Aap Hain sankat haran mangal karan,
Aapke ashirwaad bin le sakein hum koi shwaas nahin,
Abb Aapki sharan mein rehne kee aas ke siwa reh jaaye koi aas nahin.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja