Month: September 2021

September 10, 2021

Om Namaha Shivaya
Aaj Ka Suvichaar 🙏🏻🙏🏻 # 1300

     Ganesha Chaturthi Ka Utsav

Vighn haran Ganapati Bhagwaan,
Mangal karan Shivji kee santaan,
Baal avastha se hee Hain itne mahaan,
Tabhi toh huey Parvati maa kee suraksha mein pradhaan.

Shiv ganon ke Ve baney adhyaksh,
Aur Ganapati ka naam Unhe mila,
Shiv Puran mein Brahmaji ne Naarad ko,
Samjhaaya Unke gaj ke sir ko paane ka divya silsila.

Sakhiyon ke kehne par Maa Parvati ne,
Rachna kee Shri Ganesh kee,
Jiske baad maa kee raksha ke liye,
Ganeshji ne Shivji ko hee bheetar jaane kee agya na dee.

Anjaane mein Apna farz nibhaate huey kiya Ganesha ji ne aisa,
Lekin krodhit Mahadev ne Unka sees alagg kar diya dhad se,
Parvati maa ke krodhit hokar sab bataane par,
Ganeshaji ne Gaj ka sees paaya Apne pita Har se.

Shivganon ke adhyaksh kee upaadhi milne ke saath saath,
Mila Unhe agrapoojit honei ka sundar vardaan,
Tabb se har pooja aur shubh kaam mein sabse pehle,
Pooje jaate Hain Ganapati Bhagwaan.

Sindoori rangg thaa Ganeshaji ke mastak ka,
Isliye Unkee pooja hoti hai sindoor se,
Ganesh Chaturthi ke paawan parv par,
Bhakt aur bhi anandit hotey hain Ganeshaji ke noor se.

Modak aur anya mithaiyon se bhakt jann,
Pooja karein Umaputra Sumukha kee,
Shraddha bhaav se Unhe sthaapit kar ke,
Sewa karein Vakratunda Gajamukha kee.

Jabb Guruji ne Bade Mandir ka kiya nirmaan,
Unhonei bhi diya Ganapati kee moorti ko vishesh sthaan,
Jahaan par sthit Hain moorti roop mein Shri Ganesh,
Vaheen se bhakt jann karte hain mandir mein pravesh.

Guruji toh MahaShiv Hain, Hain Ve Parwardigaar,
Ve chaahein Unke bhakt tyaag dein har vikaar,
Ve chaahein hum bande banein,
Aur Unkee kripa se adhyaatmik unnati karein.

Vikaar hee toh vighna hain hamaari aisee unnati mein,
Ganesh Chaturthi par inhe tyaag kar sudhaar laayein hum apni niyati mein,
Guruji ko rijhaane mein yeh jeevan beetaayein,
Taaki Unkee mehar se hamaare liye sachkhand ke dwaar khul jaayein.

Guruji se dua karein ki hum sabka ho uddhaar,
Guruji sunte Hain bhakton kee pukaar,
Saari sangat ko Ganesh Chaturthi ke utsav par,
Mubarak aur bahut bahut pyaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 9, 2021

Om Namaha Shivaya
Aaj Ka Suvichaar 🙏🏻🙏🏻# 1299

         Jitna Bharosa Karoge Tum

Guruji kee oar jo badhaate chaloge kadam,
Toh kuch aasaani se seh sakoge zamaane ke sitam,
Guruji kee kripa se saath saath sudharte jaayenge soch aur karam,
Guruji kee dee prerna aur chetna se nibhaa sakoge insaaniyat ka dharam.

Kuch bhi nahin aisa jo Guruji ke liye hai namumkin,
Aur tumhaara kalyaan mumkin nahin hai Guruji ke bin,
Isliye duvidha mein na bitaao apne raat aur din,
Itnee daatein hain milee tumhe ki na paaoge tum gin.

Ye saansein jo tum bin soche lete ho har kshan,
Yeh Guruji ka diya hua hai dhan,
Unhee kee oorja se bhaav mehsoos karta hai tumhaara mann,
Unhee kee mehar se astitva paata hai kann kann.

Yeh raasta shaayad na ho aasaan,
Lekin jabb saath mein Hain MahaShiv Bhagwaan,
Toh phir har moad aur har kadam hai Unkee nigraani mein,
Is se zyada suraksha mil hee nahin sakti zindagaani mein.

Is suraksha ke sahaare yahee janam toh kya,
Har janam hoga kalyaankaari,
Kyunki Guruji ne jo thaama hai haath,
Toh nishchitt hai bhalaayee tumhaari.

Andhere mein bhi Ve raah dikhaayenge,
Tumhe himmat dekar Ve raah par chalaayenge,
Kumm karenge jo bhi sankat aayenge,
Aur Ve raasta tayy karaayenge.

Buss, tum kaayam rakhna apna vishwaas,
Na chodna tum apni oar se nek prayaas,
Guruji angg-sangg Hain, isliye na hona tum udaas,
Jitna bharosa karoge tum, Unhe paaoge utna hee apne paas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 8, 2021

Om Namaha Shivaya
Aaj Ka Suvichaar 🙏🏻🙏🏻 # 1298

                      Hamaara Dil

Hamaara dil kaise hamein azmaata hai,
Apne aap ko pehle ulajhaata hai,
Mushkil mein phir ghabraata hai,
Aur phir khud ko hee samjhaata hai.

Din raat tadapta aur tadpaata hai,
Kabhi kabhi hal bhi nahin bataata hai,
Swayam ko sapne dikhaata hai,
Apne astitva ko baadalon ke beech tehlaata hai.

Swayam ko moh mein fansaata hai,
Kyun khud ko nahin sikhaata hai?
Apne aap ko hee sataata hai,
Aur baaz hee nahin aata hai.

Lekin Guruji ko har pal yeh saraahtaa hai,
Kabhi kabhi toh Unhe keh paata hai,
Lekin kabhi kabhi apni baat chupaata hai,
Kyunki bholepan mein sharmaata hai.

Kabhi kabhi niraash ho jaata hai,
Toh Guruji se baat kar ke chayyn paata hai,
Phir apna utsaah aur saahas badhaata hai,
Unkee mehar se asha kee jyot jalaata hai.

Har kshan Unkee yaad ko apne mein samaata hai,
Unke liye prem ke aansoon bahaata hai,
Kabhi rota toh kabhi muskuraata hai,
Unke pyaar mein geet gungunaata hai.

Guruji ke Satsang yeh suntaa aur sunaata hai,
Unhe Shukrana kar Unkee mahima yeh gaata hai,
Unke simran mein kho jaata hai,
Unkee bhakti mein doob jaata hai.

Waqt ke badalte mausam mein jabb jabb yeh dil murajhaata hai,
Toh Guruji kee mamta se yeh phool jaisa khil jaata hai,
Har pal Guruji ke charnon mein yeh sees jhukaata hai,
Unke ashish se yeh har pal tarr jaata hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 7, 2021

Om Namaha Shivaya
Aaj Ka Suvichaar 🙏🏻🙏🏻 # 1297

Shri Guru Granth Sahib Ji Ka Prakash Purab

August 26, 1604 ke sadguruwaar ke din,
Aaya veh ati-shubh kshan,
Jabb Shri Guru Granth Sahib Ji ka hua prakash,
Aur naman mein jhuk gaya yeh akash.

Paanchvein Guru, Guru Arjun Dev ji ne,
Shri Harmandir Sahib mein Unhe viraajmaan kiya,
Aur Bhai Buddha ji ko,
Granthiyon ka adhyaksh niyukt kiya gaya.

Aseem prem aur bhakti bhaav se Guru Arjun Dev ji ne,
Shri Guru Granth Sahib ji ka sankalan kiya,
Guruon kee bani ke saath aur bhi santon kee bani ka sanchay kar,
In Mahagranth ko param divya roop diya.

Khud soye Ve zameen par,
Shri Guru Granth Sahib ji ko ‘Manji Sahib’ ka diya satkaar,
In mahagranth ke roop mein Satguru dekar,
Kiya Unhonei poore jagg ka paropkaar.

Guru Nanak ji ke dwaara jo aarambh hui,
Shri Guru Granth Sahib kee yeh pavitra rachna,
Guruon kee bani ke kirtan se,
Nirmal ho jaati hai rasna.

Shravan aur simran bani ka,
Pavitrikaran karta hai antar-mann ka,
Yeh vo amrit kee khaan hai,
Jis se khazaana badhta hai adhyaatmik dhan ka.

Guruji bhi Apne bhakton ko,
Gurbani sunn-ne ke liye kehte Hain,
Gurbani chalti hai jabb Unke satsang mein,
Toh sabhi bhakt jann shaant rehte hain.

Gurbani ka amrit sabko deta hai ashirwaad,
Nidhidhyaasan karne se shiksha bhi rehti hai yaad,
Koi bani nahin hai Guruon kee baani jaisi is poori srishti mein,
Adi granth ka ishwareeya darja hai MahaShiv Guruji kee bhi drishti mein.

In granth ke dwaara hota hai sangat ka maargdarshan,
Itna kalyaankaari hai Inkee bani ka shravan aur manan,
Shri Guru Granth Sahib ko shat shat naman,
Anginat bhakton ka Inhonei sanvaara hai jeevan.

Satguru roopi yeh granth Hain itne mangalkaari,
Ki har lete Hain sangat kee duvidha saari.
Guruji chaahein ki hum Gurbani se judey rahein,
Kumm hoga chaahe hum Unka jitna bhi Shukrana kahein.

Jaise hamaari Guruji chaahein,
Kyun na hum vaise bann jaayein,
Saari sangat ko Shri Guru Granth Sahib ji ke prakash purab kee,
Haardik shubhkaamnaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 6, 2021

Om Namaha Shivaya
Aaj Ka Suvichaar 🙏🏻🙏🏻 # 1296

              Atma Ka Aadhaar 

Dil se jodo rishta, usee mein hai sachcha pyaar,
Dimaag se jodey rishte kaheen bann na jaayein vyaapaar.
Bheetar se aur baahar se neeven honei mein hai antar,
Kyunki jhukni chaahiye atma, na ki kewal hamaara sir.

Guruji ko rijhaane ka nibhaao dharam,
Banda bannkar sudhaaro apne karam,
Vyaapaar ke lein dein mein hoti karyavahi hai,
Dil ke rishte mein hoti karmon kee safaai hai.

Pichhle janmon ke karam jo abb takk nahin thei suljhe,
Na bita dena is jeevan ko unhee mein aur bhi uljhe,
Kyunki yeh jeevan mila hai karmon ke hisaab ko chukaane ke liye,
Na ki karmon ke bojh ko aur bhi badhaane ke liye.

Guruji paalanhaar Hain, Guruji Taaranhaar Hain,
Guruji bakhshanhaar Hain, Guruji Parwardigaar Hain,
Ve har pal hamaari madad kar rahe Hain,
Unhonei hamaare karmon ke adhiktar bojh sahe Hain.

Aagey bhi sahenge Ve sab kuch hamaare liye,
Ve hee jaanein humne pichhle janmon mein kya karam hain kiye,
Jitna shukrana kiya jaaye Guruji ka, veh nahin hai kaafi,
Kyunki aur koi divya shakti nahin de sakti hai itnee maafi.

Aisa na ho ki jabb takk hum samajh paayein is tathya ko,
Tabb takk bhautikvaad mein bhool chukey hon hum is satya ko,
Kyunki koi bhi beeta pal laut kar nahin aayega,
Aur har aane wale kal mein aaj ka har pal samaayega.

Antt mein hum haath malte hee na reh jaayein kaheen,
Hamaare swaarth ke bhaar se na lajjit ho jaaye yeh zameen,
Hamaare abhimaan se sharminda na ho jaaye aasmaan,
Isliye Bhagwaan se kshamaa maang lein hum insaan.

Guruji kshamaasheel Hain, hamein yeh gyat hai,
Isliye Unke aagey hichkichaane kee nahin koi bhi baat hai,
Arey, har lamha jin maalik kee dee hui daat hai,
Toh phir yeh poora jeevan Unhee kee toh dee hui saugat hai.

Isliye na likhwaao karmon kee kitaab mein,
Agley janam ke liye aur hisaab,
Paane do apni atma ko,
Mukt honei ka khitaab.

Rishton mein vyaapaar nahin, balki niswaarth pyaar kee neeyat rakho,
Apne liye achche karmon kee vaseeyat likho,
Taaki jabb tum jaao uss paar,
Toh tumhaare saath na ho koi bhi vyaapaar.

Vyaapaar ke bajaaye vahaan bhi buss niswaarth pyaar ho,
Karmon ka khaata shoonya ho taaki atma par na koi bhaar ho,
Swacchandataa ho atma ka aadhaar,
Aur Guruji ke divya prakash se ho jaaye tumhaara deedar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 5, 2021

Om Namaha Shivaya
Aaj Ka Suvichaar 🙏🏻🙏🏻 # 1295

                  Shikshak Divas

Shikshak Divas ke avsar par,
Har adhyaapak, adhyaapika, Guru, aur murshid ko pranaam,
Shikshak ke dwara shishya ka ho jaata hai kalyaan,
Achche shikshak ko paakar shishya ho jaata hai dhanwaan.

Hum sab bahut dhanwaan hain,
Hamein pooran Guru ke roop mein miley Bhagwaan Hain,
Jitne bhi hamaare imtehaan hain,
Ve hamaare liye amrit kee khan hain.

Shikshak Divas hai aaya ek varsh ke baad,
Guruji sabhi shishyon ko de rahein Hain ashirwaad,
Saari sangat hai Guruji kee shishya aur aulaad,
Guruji ka kaha hua har vachan hai sangat ke liye prasad.

Guruji ne hee sikhaaya hamein,
Karna paath aur simran,
Na bhi samajh aaye gurbani,
Toh bhi shant ho jaata hai mann.

Guruji ne samjhaaya ki gupt rakhein hum paath, sewa, aur daan,
Taaki inke anushthaan se ho hamaara uchchatam kalyaan,
Guruji bataayein ki hamein karna chaahiye sarvsamarpan,
Aur Unmein magn rehna chaahiye har kshan.

Satsang mein har tarehn ke anubhav sunvaate Hain Guruji,
Shishyon ko darshan dene aate Hain Guruji,
Paath mushkil ho toh baar baar samjhaate Hain Guruji,
Phir bhi uljhan ho ya sawaal ho toh unhe sulajhaate Hain Guruji.

Anivaarya hai Guruji se seedhi taar jodna,
Aur Unse duur rakhne wale har bandhan ko todna,
Guruji kahein ki hum na karein andhvishwaas,
Aur karein atma-bal badhaane ka prayaas.

Guruji ne kahi ek aur bahut zaroori baat,
Ki hum Unka shukrana karein din aur raat,
Aur har pal hum dein sheeltaa ka saath,
Aur doojon kee sahaayata ke liye badhaayein haath.

Na kar sakein jo kisee kee sahaayata,
Toh bhi savinay bhaav se baat karein,
Neeven rahein, kadve bol na kahein,
Sach kehne se kabhi na darein.

Guruji ka dikhaaya yeh raasta shaayad na lagey aasaan,
Lekin jabb murshid hee swayam Hain hamaare Bhagwaan,
Toh har kadam par Ve Hain angg-sangg,
Aur parakh rahein Hain har shishya ke jeene ka dhangg.

Kathin bhi ho agar yeh imtehaan,
Toh bhi faayde mein hai insaan,
Neeyat nek ho, toh milta hai abhay-daan,
Pareeksha mein safal honei ka poora hota hai armaan.

Isliye, aaj ke is Shikshak Divas par,
Guruji ke charnon mein shat shat naman,
Guruji ke dwara rachi gayi is jeevan roopi paathshaala mein,
Antt mein pareeksha mein safal hota hai har jann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 4, 2021

Om Namaha Shivaya
Aaj Ka Suvichaar 🙏🏻🙏🏻# 1294

     Shubh Kaam Mein Der Kaisi

Kaheen Mahamaari ya phir aur koi beemari,
Kaheen kaheen aur koi laachaari,
Lekin Guruji Hain Shiv avatari,
Unhe toh hai khabar saari.

Kaheen par baad, kaheen tufaan,
Itna pareshaan hai insaan,
Lekin yeh satya le tu jaan,
Ki bekhabar nahin Hain Bhagwaan.

Kaheen par tapti garmi mein bijlee nahin,
Kaheen par poori bagiya mein ek bhi phool ya kalee nahin,
Kaheen par banjar hai saari zameen,
Lekin Guruji ko sab maalum hai, tu kar yakeen.

Jin Guruji ko ye sab gyat hai,
Ve MahaShiv ka roop Hain,
Unke kalyaan karne ke tareeke,
Adbhut aur anoop hain.

Insaan Bhagwaan nahin hai,
Guruji samjhaa rahe Hain,
Kalyuga beeta jaa rahe hai,
Guruji satyuga laa rahe Hain.

Yahee vidhi rahi hai srishti kee,
Aur hum par kripa hai Guruji kee drishti kee,
Isliye nishchitt hai hamaara uddhaar,
Lekin, hamein khud mein laana hoga sudhaar.

Sewa, simran, aur dhyan se,
Satsang, paath, aur daan se,
Karna hoga apna karam hamein sthit hokar yog mein,
Anaasakt rehna hoga har vishay ke bhog mein.

Is kshanabhangur jeevan mein rakhna hoga yaad,
Ki MahaShiv Guruji sanaatan Hain,
Isliye nirantar Unhe hee arpan karne hongei,
Hamaare jeevan mein jitne bhi kshan hain.

Yeh toh tabhi sambhav hoga,
Jabb hum apni har zimmedaari nibhaayenge,
Aur sadbhaav aur sadaachaari jo hum apnaayenge,
Toh Guruji ko hum awashya rijhaayenge.

Phir chaahe baahar hoga jitna bhi tufaan,
Bheetar hoga shant avastha ka nirmaan,
Beemaar hongei hum shareer se, na ki atma se,
Kyunki atma ko aarogyataa kee daat milegi Paramatama se.

Buss, phir shubh kaam mein der kaisi,
Satyuga ke aane kee karein hum tayyaari,
Dekh lena, haar maan legi har tarehn kee laachaari,
Agar is prayaas mein jut jaaye duniya saari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 3, 2021

Om Namaha Shivaya
Aaj Ka Suvichaar 🙏🏻🙏🏻 # 1293

   Ruhaani Lakshya

Dil jaanta hai ki aisa mumkin nahin hai,
Phir bhi chaahe ki mukti kee manzil mil jaaye ek pal mein,
Kyun tu ye safar karna na chaahe, aye dil?
Kyun tu is anubhav ko ganvaaye, aye dil?

Ruhaani lakshya hai mukti,
Safal safar hai iskee yukti,
Raasta dikhaati hai bhakti,
Jis se shakti paate hain hum vyakti.

Safar ka apna anand hai, aur saath mein hai ye ek zimmedaari,
Kyunki safar ke har mukaam par Guruji lete Hain pareeksha hamaari,
Chunte hain kis raaste, kis moad ko hum,
Badhaate hain doojon kee khushi ya gumm.

Kis bhaav se karte hain safar mein hum Guruji ko yaad,
Shukrana se karte hain ya nahin hum apne dil ko aabaad,
Doojon ke raaste mein kaheen vighn toh nahin daalte,
Mann mein dvesh, vair, irshya toh nahin kaheen paalte.

Safar mein galatiyon se seekhte hain kya hum,
Ye bhi toh dekhte Hain Guruji,
Lobh aur moh ke kaaran neeyat toh nahin badal jaati,
Ye bhi parakhte Hain Guruji.

Kitnee mehnat karte hain lakshya takk pahunchne ke liye,
Kitna simran aur kitnee sewa hain hum karte,
Guruji ke sikhaaye anusaar gupt rakhte hain ya nahin paath, sewa, aur daan ko,
Ahemiyat dete hain ya nahin Guruji ke sammaan ko.

Guruji kehte Hain ki prem bhaav hai bahut zaroori,
Ve dekhein ki kaise tayy karte hain hum safar mein har duuri,
Ve toh chaahte Hain hamein mukti kee manzil par pahunchaana,
Lekin hamein Guruji ko apna niswaarth nishchay hoga dikhaana.

Buss, hamaari neeyat aur bhaav ko dekhkar,
Guruji hamaare karmon ka hisaab karenge,
Jo jabb hamaare liye uchit hoga,
Ve uss daat se hamaari jholi bharenge.

Aise hee safar mein chalte chalte,
Hum ek din dekhenge apne waqt ko dhalte,
Mukti milegi uss janam mein jismein safal hoga sab janmon ka safar,
Is ruhaani lakshya kee praapti par awashya hoga Guruji kee kripa ka asar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 2, 2021

Om Namaha Shivaya
Aaj Ka Suvichaar 🙏🏻🙏🏻 # 1292

Koi Pal, Koi Lamha, Koi Din Aisa Nahin

Koi pal, koi lamha, koi din aisa nahin,
Jabb Guruji ke mann mein hamaare bhale ka armaan na ho,
Koi ghadi, koi subah, koi shaam aisee nahin,
Jabb hamaare dil mein pyaare Guruji ka naam na ho.

Koi kaam, koi kaaryasiddhi aisee nahin,
Jismein Guruji ka ashirwaad na ho,
Koi subuddhi, koi riddhi aisee nahin,
Jo Guruji ka diya prasad na ho.

Koi sukh, koi dukh aisa nahin,
Jiskee Guruji ko khabar na ho,
Koi muskaan, koi mukh aisa nahin,
Jispar Guruji kee mamta ka asar na ho.

Koi kshan, koi kathan aisa nahin,
Jiska tatva Guruji na jaanein,
Koi jann, koi mann aisa nahin,
Jisey Guruji na pehchaanein.

Koi baat, koi mulaakaat aisee nahin,
Jo Guruji se chhupi ho,
Koi leher, koi seher aisee nahin,
Jo Guruji ke aagey na jhuki ho.

Koi daan nahin, koi kalyaan nahin,
Jiska Guruji ke paas hisaab na ho,
Koi karam nahin, koi kadam nahin,
Jiskee Guruji ke paas kitaab na ho.

Koi ghar-baar nahin, koi dwaar nahin,
Jispar Guruji kee nadar na ho,
Koi daanav nahin, koi maanav nahin,
Jispar Guruji kee mehare-nazar na ho.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

September 1, 2021

Om Namaha Shivaya
Aaj Ka Suvichaar 🙏🏻🙏🏻 # 1291

    Tumhaare Kalyaan Ka Paigaam

Waqt kee bhi ajab see hai baat,
Iske saamne hamaari nahin hai koi aukat,
Kabhi toh ye deta hai badkismati kee badi maat,
Kabhi deta hai khushkismati kee saugat.

Kehte hain jabb kisee ka bura waqt aata hai,
Toh har koi madad karne se bhi peeche hatt jaata hai,
Lekin achche waqt ke jaise bura waqt bhi thamtaa nahin,
Shaayad siwaaye uske liye jo apne Parameshwar mein ramtaa nahin.

Isliye apne Parameshwar, apne MahaShiv Guruji mein jaayein hum ramm,
Ek Ve hee Hain jo hamaare burey waqt ko kar sakte Hain kumm,
Nahin chalta Unke aagey kisee bhi kathin lamhe ka dumm,
Unkee sharan mein honei se toad nahin sakta hamein koi bhi gumm.

Unhee ke haathon mein hai hamaare jeevan kee doar,
Isliye zaroorat hee nahin jaane kee kaheen aur,
Guruji har bhakt ke har sankat par pharmaate Hain gaur,
Aur Ve sabke jeevan mein laate Hain bhor.

Isliye abb bhi waqt hai, nahin hui hai der,
Guruji kee sharan mein aao, is se pehle ki bura waqt le tumhe gher,
Phir jaisa bhi waqt ho, tumhe na kar sakega niraash,
Kyunki tumhe asha aur himmat dega Guruji ka paawan sakaash.

Guruji kee mehar se hogi aisee har raat aur har sehar,
Ki tumhaare mann mein simran chalega har pehar,
Waqt har waqt jhuk kar karega Guruji ko salaam,
Aur Guruji waqt ko hukm ke sangg denge tumhaare kalyaan ka paigaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja