Itne aib mujh naacheez mein hain Lekin unse kaheen zyada hai Aapki mehar Chaahe mere aagey aur peechhe andhera ho Aap mere mann mandir mein Hain isliye mere jeevan mein hai sehar.
Aapse hee mera ghar parivaar hai Aapse hee mera sansaar hai Aapka itna anokha sa, itna pyaara sa pyaar hai Jis din Aapke baare mein suna, veh din ek khushnuma yaadgaar hai.
Aap agochar hote huey bhi har pal saath Hain Aap bin jataaye dete in lamhon kee daat Hain Ye lamhe, jo Aap chaahein ki hum aish karte huey beetaayein Ye lamhe, jinmein Aap chaahein ki hum bande bann jaayein.
Jabb se mai Aapki hoon ho lee Kewal Aapke saamne phaylaati hoon jholi Aapki kripa se mai hoon is baat se bilkul sehmat Ki meri har chaahat se badi hai Aapki rehmat Isliye na hai mere mann mein koi maang, na hee koi mannat Kyunki Aapke kamal charnon mein hai meri jannat.
Kavi aur shaayar kehte bhi hain aur sehte bhi hain Misaal bann kar ve rehte bhi hain Lekin misaal aajkal hawaa mein gaayab ho jaati hai Aur moti ka mol paane ke bajaaye veeraane mein kho jaati hai.
Yoon hee badal raha hai zamaana Chaahe jhootha ho ya sachcha ho afsaana Zamaana gaata hai Khuda ka fasana Dekar Khuda ko buss hakeekat ka nazraana.
Phir chaahe dil toot jaaye Chaahe Rabb rooth jaaye Insaan ke paas Khudaayee ke liye waqt nahin Phir bhi aise insaanon ke liye raasta mulaayam hai, sakht nahin.
Phir bhi Khuda par tikki hai ummeed Ummeed ko toh ummeed ka hee hai sahaara Ki Khuda hakeekat se waaqif hai Is bharose par chal raha hai guzaara.
Na jaane kal kaun yahaan hoga aur kaun nahin Na jaane banjar hogi ya urvar hogi zameen Pyaare Guruji, kar dena Aap buss ye ehsaan Ki Aapke kadmon mein mil jaayein mujhe dono jahaan.
Alaukik shakti wale ek baalak ne Punjab ke Sherpur gaanon mein liya janam Waqt gavaah banaa Unkee mahima ka Aise divya aur uttam thei Unke karam.
Sada Kaur ji mata thi Unkee aur pita thei Sardar Jai Singh Unhonei Baba Nand Singh ji ko paakar apni kismat saraahi har din Paanch varsh kee aayu mein ek kooein kee deewar ke kinaare par Sadhna mein Ve huey yoon leen Ki teen din takk rahe Ve uss avastha mein Bina huey Apne dhyan mein ksheen.
Dil ke thei sachche, kaam mein thei achche Pyaar thaa Unke sanskaar mein Daan kee vadiyaayee karte thei Aur Khudaayee thi Unke vyavhaar mein.
Guru Nanak Dev ke prati Unka niswaarth pyaar aur Unkee aseem bhakti Deti rahi Unhe naam simran kee adbhut shakti Thei Ve kaarigaron aur shilpkaaron ke parivaar se Lekin har pal Unkee liv judi rehti thi Nirankaar se.
Ferozpur ke Gurudwara Sahib mein hui Unkee Baba Harnaam Singh ji se mulaakaat Jinhe pehchaan-ne mein der na lagi Ki Baba Nand Singh ji ka noor hai ek divya saugat.
Unhonei Baba Nand Singh ji ko raasta dikhaaya Niswaarth sewa aur jagat kalyaan ka Aur Baba Nand Singh ji ne veh raasta apnaaya Maan kar isey hukm Bhagwaan ka.
Veerane mein aur vann mein Har tareh ke mausam mein Ve rehne lagey sadhna aur dhyan mein Aur vriddhi hoti rahi Unke adhyaatmik gyan mein.
Na bhookh kee fikr Na kisee mushkil ka zikr Ve har haalaat ko sehte thei Aur tapasya mein rehte thei.
Kalera gaaon ke vaasiyon ne Unse maanga Unke deedar ka sahara Baba Nand Singh ji vahaan rehne aaye Aur Kalera ke paas bann gaya Gurudwara.
Gurudware ka ‘Nanaksar’ hua naam Jo banaa itna paawan dham Baba Nand Singh ji ne Shri Guru Granth Sahib ji ka aadar karna sikhaaya Aur saari sangat ko Akal Purakh ka mahatva bataaya.
Baba Nand Singh ji thei moorat neevenpann kee Bhakton ke paaon aur joote takk Ve dhotey thei Na sonei kee chaah thi Unhe na bhojan kee Buss, Ve sabki sewa ke liye tayyaar hotey thei.
Guruji bhi kahein sewa, simran, aur satsang karne ke liye Hum khushakismat hain ki mahapurushon ne jalaaye Hain hamaari raahon mein diye Diye, ruhaaniyat ke prakash ke Diye, sadbhaav ke sakaash ke.
Guruji Gurbani ke amrit se bhakton ko dein ashirwaad Aur hamein taarein khila kar langar prasad Guruon kee bani jaisi koi bani nahin Guruon ke jaisa koi gyani nahin.
Apni niswaarthta se Unhonei sanvaara sangat ka haal Apni divyataa se Ve baney sangat ke liye suraksha kee dhaal Pyaar se sewa kar ke Unhonei sangat ko liya sambhaal Baba Nand Singh ji kee bhakti kee shakti aaj takk hai bemisaal.
Kaise bayaan karoon ki Guruji kaise Hain Poore Brahmaand mein koi Devta nahin Unke jaise Hain Sab kuch jaante Hain Guruji sabke baare mein Unkee kripa se roshni hai chaand mein aur har taare mein.
Sooraj bhi Unkee agya se uday hota hai Veh bhi apne par chadhi dhool Guruji ke amrit se dhota hai Astt hokar bhi sooraj Unke hee dhyan mein khota hai Aur subah honei takk Unkee goad mein sooraj sota hai.
Pashu pakshi aur ped paudhe Beshak karte honge mausam se saude Lekin Guruji ke samaksh ve na bhoolein apne ohade Kyunki Guruji hee sudhaarein Unke jeevan ke lekh ke masaude.
Udaarta mein Jinka hai na koi muqaabla Jinkee leela se tal jaati hai har balaa Jinke ashish se nikharti hai har kalaakaar kee kalaa Jo ek pal mein kar sakte Hain bhakt ka bhalaa.
Unkee sharan mein rehne se bada nahin hai koi saubhagya Unke ek ishaare par bhaybheet hokar nasht ho jaata hai durbhaagya Ve toh yoon badal dete Hain Apne bhakt ka lekha Jaisa kisee ne kabhi kaheen bhi na hai dekha.
Aise Guru par mai vaari jaaoon aur karoon ardaas Ki poore jahaan mein na rahe koi bhi udaas Asha se prakaashit ho har uss insaan ka mann jo ho niraash Aur Guruji kee kripa se khul jaayein sabke paash.
Paash, atma-bal ko ksheen karne waale Paash, andh-vishwaas ke Paash, jo le jaayein adhyaatmik unnati se duur Paash, jinse atma-vishwaas hota hai chuur.
Guruji kee mehar se hum sab in paashon se azad hokar Guruji ke bakshe huey sewa aur simran ke noor se aabaad hokar Koshish karein ki sajaayein saamanjasya se is sansaar ko Taaki hum sab par garv ho hamaare MahaShiv Parwardigaar ko.
Jis boond ko Guruji anugrihit karein Apni kripa dekar Amrit bann jaaye ek pal mein veh seekar Phir bhakt tarr jaaye usey peekar Aur bann jaaye veh Guruji ka kinkar.
Jis ann par ho Guruji ka ashirwaad Uska toh divya ho jaaye swaad Veh ann ka daana bann jaaye prasad Jis se bhakt ho jaaye roag se azad.
Jo hawaa Guruji ke daaman ko chhoo paati hai Uss hawaa kee toh kismat nikhar jaati hai Uskee shakhsiyat mein jo shokhi aati hai Veh gulistaan mein khushnuma bahaar laati hai.
Jo phool Guruji ke charnon ka karey naman Uss phool ko salaam karey saara chaman Uss phool ka toh qubool ho jaaye vandan Kyunki veh toh hua MahaShiv ko arpan.
Jo mann Guruji mein ho jaaye leen Uss mann ka chayn koi nahin sakta chheen Kyunki uss mann ka Guruji par hota hai atoot yakeen Aur uskee shakti kabhi na honei paaye ksheen.
Jo antaratma se de Guruji ko awaaz Guruji awashya sunte Hain uskee ardaas Guruji kee leela beshak hai ek anokha raaz Usmein sadaa hota hai bhakt ke kalyaan ka ehsaas.
Jo Guruji ko prasann karne ka nibhaata hai farz Guruji jald kumm kar dete Hain uske karmon ka karz Guruji davaa dete Hain chaahe ho jo bhi uska marz Aur Guruji bakhshte Hain usey ruhaani tarz.
Jo insaan Guruji ka ho jaata hai antar-mann se Guruji usey nikaal lete Hain vikaaron ke vann se Veh Guruji ko kareeb paata hai sadhna ke saadhan se Aur Guruji usey sampann banaate Hain sarv-kalyaan ke dhan se.
Jo apna sab kuch kar deta hai Guruji ko samarpan Uss bhakt ko Guruji dete Hain asal dhan Is dhan se tarr jaata hai tann aur mann Aur sajj-sanvar jaata hai jeevan ka har kshan.
Aisee hai pyaare Guruji kee mehar Bhakt ke jeevan mein laati hai sehar Ashirwaad barasta hai aathon pehar Zindagi mein umang laati hai har pehar kee leher.
Jis mukaam par bhi ho tu is ruhaani raah par Yaad rakh, ki tera Guruji ka Shukrana karna abhi baaki hai Chaahe toone shukr kiya ho bayaan teri her poori hui chaah par Bhool matt, ki tera Guruji ka Shukrana karna abhi baaki hai.
Tu hai praani ahankaari Rogi banaati hai tujhe vikaaron kee beemari Guruji kee sharan mein har gunah kee maafi hai Isliye yaad rakh, ki tera Guruji ka Shukrana karna abhi baaki hai.
Is kalyuga mein chaahe jitnee bhi nainsaafi hai Na jaane teri rasna akelepann ka geet kyun gaati hai Tera Guru sadaa banaa tera saathi hai Is saath ke liye tera Guruji ka Shukrana karna abhi baaki hai.
Bhari bheed mein khone kee chaah na kar Yoon hee kisee aate jaate huey kee baahn na pakad Reh tu unke sangg jinka aachaar vyavhaar ikhlaaki hai Aur is sadh sangat ke liye tera Guruji ka Shukrana karna abhi baaki hai.
Dhoondhta kyun hai shikaayat ke mauke Kyun mann ke beh jaane par khaata hai dhokhe Tere bheetar hai deep kee divya lau aur tu baati hai Is daat ke liye tera Guruji ka Shukrana karna abhi baaki hai.
Galat raaste par jaane waalon ke hokar tu sangg Na chadhne de khud par unke vichaaron ka rangg Guruji kee prerna se ekaant mein chalna hee kaafi hai Aur is saahas ke liye tera Guruji ka Shukrana karna abhi baaki hai.
Har daat ke liye bhi tu Unhe dhanyawaad kahe toh veh kumm hai Tere bin jaane kumm kar dete Hain Guruji jo bhi tere jeevan mein kasht aur gumm hai Unke hotey huey teri taqdeer bilkul nahin abhaagi hai Unke har ehsaan ke liye tera Guruji ka Shukrana karna abhi baaki hai.
Jabb takk tujhe dete rahenge aur janam Guruji katvaate rahenge tere karam Aur tu har janam mein Unkee mehar ka bhaagi hai Isliye har pal tera Guruji ka Shukrana karna abhi baaki hai.
🌹🌹🌹🌹🌹🌹🌹
Jai Guruji 🙏🏻🙏🏻 Dhirja
Tera Guruji Ka Shukrana Karna Abhi Baaki Hai (10/26/2021)
Jeevan hai sabko hee pyaara Dhan hai bhautik zarooraton ka sahara Tann ke bina saanson ka nahin hai guzaara Bhagwaan ne kiya yeh prabandh saara.
Lekin kalyuga ka chal raha hai samaa Aur insaan Bhagwaan ko hai bhool chala Dhan se sajaate sajaate apne tann ko Dene lagaa hai jhootha sukh apne mann ko.
Aur mann kee gati toh hai anupam Mann par chalta nahin hai kisee ka dum Veh jhoothe sukh ko paakar bin pankh ke uddkar itaraata hai Aur uskee hasti par ahankaar ka nasha chaa jaata hai.
Mann apne sabse bade dushman, ahankaar ko, Naadaani mein dost samajh leta hai Phir ahankaar bahut chaturaayee se Mann ko gumraah kar deta hai.
Jis tareh se pahaad par se neeche utarnaa hota hai aasaan Vaise hee apni hee nazron mein girne lagta hai insaan Lekin baat hai ye bahut afsos kee Ki jaankaari nahin hoti hai is dosh kee.
Aur jabb mann itna kho jaata hai Ki veh bekaabu ho jaata hai Toh sahi raaste par aana namumkin sa ho jaata hai Ahankaar ke andhkaar mein mann apni mayl nahin dho paata hai.
Is se pehle ki bahut der ho jaaye Is se pehle ki mann aur bhi bekaabu ho jaaye Kar ke Guruji ka charan vandan Maang lein Unse simran ke kshan.
Mann se karein simran, simran se dhyan Dhyan mein paayein hum asal gyan Saath saath simran mein hota chale mann ka pavitrikaran Guruji kee mehar se vikaar honei lagenge khatm.
Guruji ke paas har mushkil ka hai upaay Guruji kee mehar se mann kee mayl dhul jaaye Guru Apne bhakt ko adhyatamikta kee oonchaayee takk le jaaye Guruji kee kripa se mann mein Kashi liyo basaay.
Karva Chauth kee paawan tithi hai aayi Anek bhaav hain sabke mann mein Is avsar ne Kaartik maas kee chhavi badhaayee Aur poojit hua chaand gagan mein.
Chaand se bhi sheetal Chaand se bhi nirmal Chaand se bhi komal Pyaare Guruji hamaare.
Chaand ke swaami Antaryaami Deen Dayal daani Pyaare Guruji hamaare.
Chaand ke nirmaata Jagat ke vidhaata Har vidya ke gyaata Pyaare Guruji hamaare.
Chaand toh krishnapaksh aur Shukla paksh ka hai mohtaaj Lekin hamaare Guruji ke toh sir par hai chaand ka taaj Chaand kee bhi zimmedaari lee Unhonei aur chaand par bhi hai Unka raaj Unka hissa bannkar toh chaand bhi maanta hai Unhe sartaaj.
Koi nahin hai Guruji se adhik pyaara Jinhonei har pal saath diya hai hamaara Bashar bann kar aaye hamein karmakaand aur vehem se duur karne ke liye Lekin jo bhi reet rivaaj manaaya bhakton ne, Unhonei sadaa ashirwaad diye.
Ye kehte huey Guruji dete Hain bahut mahatva Grihasthashram aur parivaar ko Ki ghar wali aur ghar wala ek dooje kee sewa karein Aur sambhaalein bachchon aur ghar-baar ko.
Yeh kitna anokha aur paawan sambandh hai Is rishte mein niswaarthta aur tyaag kee sugandh hai Guruji kee kripa se hum sab is rishte ko nibhaayein sachchaayee se Aur anugrihit rahein is rishte kee vadiyaayee se.
Karva Chauth ke paawan parv par bhi Guruji muskuraakar dete Hain ashirwaad Hamaare jeevan mein har pal chaand bannkar Karte Hain Ve hamaara jeevan aabaad.
Guruji dwaara banaaye gaye chaand ka noor Kar de sabke ghar sansaar ke kasht klesh ko duur Sabke jeevan mein pyaar ho Aur Parwardigaar ke liye prem bhara satkaar ho.
Jabb se dekha Guruji ke roop aur swaroop ko Unmein basey Rabb se ho gaya beintehaa pyaar Jabb se Unkee chhavi ka ehsaas hua bheetar aur aaspaas Tabb se itna khoobsoorat lagne lagaa ghar sansaar.
Guruji ka pyaar paakar dhanya mehsoos kiya mainey Unke simran ke mankon ke gehne mainey pehne Ve manke baney anmol ruhaani ratna Jinkee chamak se roshan hua mera mann.
Guruji kee mehar aur marzi se Soorat badal lee meri har arzi ne Maang kar Unka nirantar saath Meri har arzi is maang mein hui aatmasaat.
Unke charnon kee dhool bann-ne kee bhi nahin hai meri aukat Phir bhi Guruji dete Hain daya kee daat Jaise bhi hotey hain jis bhi pal mein haalaat Guruji har pal thaamen rehte Hain mera haath.
Mere jeevan kee is naav mein Waqt ke saagar ke utaar-chadhaav mein Bhaav kee leheron kee tarang mein Har tareh kee paristhiti ke rangg mein Guruji angg sangg rehte Hain mere har pal Unkee kripa se mere kasht jaate hain tal.
Guruji kee pooja Deti hai anokhi oorja Jaise jaise paar hoti hai har chunauti Vishwaas mein hoti jaati hai badhauti.
Kya kehna Guruji ke pyaar bhare saath ka Yeh rishta hai sabse uttam uphaar Abb toh sadaa sir par haath hai deenanaath ka Is rishte ke ikraar se mila hai beintehaa karaar.
1534 mein Sitambar 24 kee thi jo taareekh Uss shubh din par aur bhi sanvar gaya maanav jaati ka naseeb Kyunki Bhai Jetha ji ka hua janam Jinke sabb karam sikhaate hain insaaniyat ka dharam.
Lahore mein rehne waale in baalak ne Chhoti si aayu mein apne mata pita ko kho diya Aur niyati ne Unhe saump diya Unkee naani ko Jinhonei Unka pyaar se paalan poshan kiya.
Laukik dhan na thaa parivaar ke paas Lekin bharpoor thaa hriday mein sanskaaron ka vaas Bhai Jetha ji ne chane bech kar madad kee naani kee Bin shikaayat Ve Shukrana karte rahe Oopar wale kee meharbaani kee.
Baarah varsh kee umr mein Ve apni naani ke saath Aaye Goindval, jahaan milee Unhe sabse uttam saugat Guru Amar Das ji ke praapt huey Unko darshan Aur tarr gaye Ve usee kshan.
Beas nadi ke kinaare par Goindval ka agrasar hua nirmaan Bhai Jetha ji ne jee jaan se mehnat kee bin kiye aaraam Baoli, rasoi, seedhiyaan- sab mein hai Unke parishram ka ashirwaad Dhanya hota hai veh bhakt jo paata hai Goindval Gurudwaare ka prasad.
Yaheen par Basurke aur Baba Budha ji se judi jeevani Guru Ram Das ji kee Yeh paawan naam Bhai Jetha ke liye daat thi Guru Amar Das ji kee Guru Ram Das ji kee kripa se Amritsar ka hua nirmaan Bibi Bhani se vivaah ke baad hui Unkee teen santaan.
Anukampa aur neevenpann kee moorat Guru Ram Das ji ne samjhaayee kirtan kee zaroorat Guru Granth Sahib ji mein bhi samaayee hai Unkee bani Aur Gurbani ne sanvaari hai anginat sangat kee zindagaani.
Guruji bhi Gurbani sunn-ne ke liye kehte Hain Gurbani mein jo amrit ke ratna behte hain Unse hota hai atma ka pavitrikaran Aur shuddh honei lagta hai anta-karan.
Guru Ram Das ke Prakash Purab par Kyun na karein Guruji se yeh vaada Ki Unke kahe anusaar jeevan ko hum rakhenge Saral taral nirmal aur saada.
Shukrana Guruji ka Jinhonei kalyaan ka diya hum sabko vardaan Guru kee sharan mein bhakton ko mil jaate hain Bhagwaan Uthaa kar bhakt janon ke karmon ka adhiktar bhaar Saari sarbat ka uddhaar karte Hain Ve Nirankaar.
Aaj Ka Suvichaar 