Mann ke bheetar hee hai moksh ka dwaar Phir bhi na jaane kahaan chala jaa raha hai sansaar Mann mein hai veh shakti jo lagaayegi beda paar Phir bhi mann ko vash mein karne ka na jaane kyun aata nahin vichaar.
Guruji kahein ki karein hum pyaar bina aasakti ke Taaki badhaayein na aayein raaste mein bhakti kee shakti ke Aasakti rakhein Guruji mein basey Bhagwaan se Aur anugrihit ho jaayein Unke kiye kalyaan se.
Shareer ne saadhan bann kar kiya hai ant-karan aur atma ko basaane ka intazaam Isliye japte huey Guruji ka naam subah aur shaam Hum apne mann-mandir mein dhoondhein veh paawan dham Jahaan se dwaar khulega sunaakar moksh ka paigaam.
Ho sakta hai ki ye na ho mumkin is janam mein Lekin oordhvagati kee oar hum karte rahein prayaas Jis adhyatmik mukaam par hamaare praan niklenge tann se Usee mukaam par agley janam ka shareer ruhaani yatra praarambh karaayega mann se.
Isliye yaad rahe ki hota rahe nirantar prayaas Moksh ke dwaar takk jaane kee oar Uss bhakt ke liye yeh kathin nahin Jiske jeevan kee Guruji ne thaami hai doar.
Isliye Guruji ke naam ka karte huey simran Guruji ke ashish se pavitra karte rahein hum apna mann Simran dwaara bheetar jaane ka raasta bantaa jaayega Aur raaste ke dwaara dwaar nazar aa paayega.
Mann mein simran chalta rahega jo baarambaar Toh mann ko simran karne se ho jaayega pyaar Guruji kee kripa se kabhi toh mukhtasar hoga intazaar Khul jaayega mann ke bheetar ke moksh ka dwaar Aur Apni goad mein sada ke liye le lenge Parwardigaar.
Aye gagan, Kaunsa hai tera vatan? Is paar ya uss paar Kya toone kabhi kiya hai vichaar?
Aye hawaa, Tu rehti hai kis se khafa? Is kalyuga ke vesh mein Kaun hai tujhse dvesh mein?
Aye neer, Tujh mein dikhtee hai kiskee tasveer? Tera bahaav kis oar hai Is ultee ganga ke daur mein?
Aye dharti, Tu kiske paap hai harti? Itne varshon se toone kis kis se kaha Jo bojh toone kabb se hai sahaa?
Aye agni, Sabke vikaaron ko kabb jalaayegi? Kyun tujhse aaj ka insaan nahin darta Jabb kee tera tej sabko bhasm hai karta?
Aye prakriti, tumhe naman hai Insaanon ne tumhaare saath bura vyavhaar kiya hai Phir bhi tumne anyaay sehte sehte apna farz kiya adaa Aur hum insaanon ne na suni tumhaari dard bhari sada.
Maanav ne le liya daanav ka roop Apne kabze mein karni chaahi chhaaon aur dhoop Maanav ne pradooshit kiya vayu, jal, mitti, aur akash Aur swarth, avidya, bhautikvaad ke andhere se mitne lagaa saralta ka niswaarth prakash.
Phir bhi maanav ruka nahin Divyata ke aagey jhuka nahin Machhliyon kee atyadhik pakad, pashu pakshiyon ko maara jaana Apne bhojan aur apni khudagarzi ke liye inke prayog ko maanav ne uchit maana!!
Prakriti ke baaki sab praani Hamaari maanav jaati se aatankit ho gaye Lekin ve kuch keh na sakey Aur zulm sehte sehte sankatgrast aur vilupt ho gaye.
Pyaari prakriti, humne aapko vivash kar ke badal hee diya aapka chehra Phir bhi aap aaj takk deti hain hamaari suraksha ke liye pehra Itne neech, itne kudgaraz hain hamaare khayaal Lekin aapka badappan dekhiye, aapne kabhi na kiya humse koi sawaal.
Honi hee thee hamein yeh laachaari Honi hee thee yeh mahaamaari Vikaaron, paapon, khudagarazi aur kudgarazi- ye sab toh hain beemari Hum maanav beemar huey, ye saari galati hai hamaari.
Kaam, krodh, lobh, moh, matsar, aur ahankar Irshya, jhooth, nasha, kusangat, shadyantra, aur vyabhichaar Hum in sab mein ulajhte gaye aise Maano inse hum sulajhte gaye hon jaise.
Kshamaa kar deejiye hum sab sansaar waalon ko, poojya prakriti Humne apne swaarth ke liye bigaad dee aapki aakriti Kaash hum sab de dein apne gunaahon kee sweekriti Taaki hamaari is sweekriti se prasann hokar laut aaye aapki sukriti.
Phir yeh dharti, agni, aur hawa Yeh neer aur gagan Yeh poori kaayinaat Aur har insaan ka vatan Sabka saamanjasya phir se khilne lagg jaayega Aur aapke har hissey ko apna haq milne lagg jaayega.
Guruji ko pyaar karte hain agar hum sab Toh hamein aap prakriti ko hoga sanvaarna Kyunki hamaara hee kukarma thaa aapko bigaadna Aapko haani pahunchaakar kaise phalegi sadhna?
Guruji kee rachna hain aap Hum insaanon kee vajeh se jhel rahi hain aap santaap Maanav se hota raha itna paap Yeh kalyuga mein jaise hai ek shraap.
Niswaarth karo sewa, Guruji ne kaha Lekin kisee virle ko hee ye yaad raha Maango nahin, maano, Guruji ne samjhaaya Lekin hum bhakton ne farmaishon ko sunaaya.
Shukrana kitta karo, Guruji ne bataaya Aur humne naakhush hokar gila shikwa jataaya Jis samay aur bhi zyada lena chahiye thaa Guruji ka naam Hum karte rahe laalach ke hetu apni chaahaton ka intazaam.
Bande bano, Guruji ka hai aadesh Lekin humne ghaayal kiya har tattva aur har desh Apne swaarth mein yoon huey hum magan Ki zakhmi hui dharti, neer, hawa, agni, aur gagan.
Guruji, hamein maaf karein, yahee hai abb toh arzi Humne apne swaarth ke liye khoob chalayee apni marzi Guruji, Aapki kripa se hum sab jaagrit ho jaayein Aur Aapki mehar-e-nazar se ek baar phir chayyn kee neend so paayein.
Humne jabb se apni karni ka parinaam hai dekha aur jaana Tabb se maana ki hum mujrim hain jo Aapka kaha nahin maana Vaise toh aise ghor apraadhon kee kshama maangne ka nahin hona chahiye hamein adhikaar Lekin kyunki Aap Hain hamaare meet, nath, murshid, aur taaranhaar Isliye anurodh hai Aapse ki kripa kar sunn leejiye hamaari maayoos pukaar Aur Apni leela se prakriti ke roop ko phir se deejiye nikhaar.
Hum hain karzdaar Hum hain talabgaar Hum hain gunehgaar Aur Aap Hain Parwardigaar.
Aur kuch abb kaha na jaaye Abb yeh drishya aur saha na jaaye Ummeed aur bharosa hai Aapki mehar par Jis se sooraj uday hoga suhaani sehar par.
Har roz savera aata hai Din shuru honei ka bigul bajaata hai Shaam mein badalkar aane wali raat ka paigam sunaata hai Aur jaate jaate intazaar chod jaata hai.
Aane wale uss savere ka intazaar Jo barsaayega pehle se bhi zyada pyaar Jo laayega ek nayee ummeed kee bahaar Jo sunega agyanta aur andhere kee pukaar.
Anubhav hai jo har savere, har din, aur har shaam ka Uss anubhav se juda hai ashirwaad Guruji ke naam ka Usmein chhipa hai armaan Guruji ke dham ka Usee anubhav mein sandesh milta hai hamein Bhagwaan ka.
Har anubhav padhaata hai ek paath Jiska abhipraay rakhte huey apne saath Hamein badhte chale jaana hai Insaaniyat ka kartavya nibhaana hai.
Chaahe har anubhav ka anusmaran na rahe apne paas Har anubhav se apni galatiyon ka hota hai ehsaas Kuch anubhav khatte ya kadve hotey hain, lekin kuch chod jaate hain ek mithaas Guruji ke ashish se har anubhav ka mahatva samajhkar hum chod dein hona udaas.
Kyunki khush rehne ka chunaav karna hamein hona chahiye pasand Isee ka rishta hai santosh se aur isee mein hai anand Sakaratmakta kee seedhiyon ke liye khushi ka stambh hai sampoorna sahaara Khushi se atma-vishwaas badhta hai aur andhere mein bhi dikhta hai asha ka noor bhara nazaara.
Isliye har savere ka khushi se karein hum swaagat Abhyaas karte karte isey banaa lein apni aadat Har savere ka aur har shaam ka khushi se kar ke Guruji ko dhanyawaad Karte rahein apne antar-mann ko is dhanyawaad se aabaad.
Dhanyawaad ke ehsaas ke sangg jud jaayega aane wala har savera Har savere mein hoga aisee roshni ka basera Ki mit jaayega agyan aur niraasha ka andhera Aur Guruji kee kripa se kalyaan hoga tera aur mera.
Shukrana ka jo hai ye ehsaas Ye ehsaas hai kuch aisa khaas Ki ye santosh se bhar deta hai shwaas Aur mitaa deta hai gileh shikwe ka traas.
Guruji chaahein ki hum shukrana karte rahein Isliye chaahe haalaat jis bhi disha mein bahein Chaahe hum jaisi bhi paristhiti ko sahein Hum Guruji se shukrana hee kahein.
Anuchit paristhiti aur bhi zyada kharaab ho sakti thi Agar hukoomat na kee hoti Guruji ne Aur sehensheelta bhi kamzor padd jaati Agar himmat na dee hoti Guruji ne.
Shukrana se shraddha ko miltee hai oorja Shukrana se sugandhit hoti hai pooja Shukrana jaisa lafz na hai koi dooja Dhanya hai veh bhakt jisey har pal shukrana hai soojha.
Chaahe waqt dhaaye tareh tareh ke sitam Chaahe saansein jaayein tham Chaahe aaye khushi ya gumm Buss, hum shukrana mein jaayein rumm.
Guruji swami Hain aur hum hain kinkar Anginat ashirwaad hain Unke hum sab par Isliye dil mein vishwaas aur dheeraj ko dhar Har daat ke liye Unka shukrana karein umr bhar.
Guruji kee noor-e-nazar ka karein shukrana Guruji kee nadar ka karein shukrana Guruji kee mehar ka karein shukrana Jeevan kee har sehar ka karein shukrana.
Is tann ka shukrana is mann ka shukrana Zindagi mein aane wale her jann ka shukrana Har anubhav ke dhan ka shukrana Har padaarth har ann ka shukrana.
Parivaar aur ghar ke liye shukrana Sewa, simran, satsang ke var ke liye shukrana Guruji ko Unke diye huey dar ke liye shukrana Guruji kee dikhaayee jeene kee dagar ke liye shukrana.
Antar-mann ko dee hui chetna ke liye shukrana Siddhanton par chalne kee prerna ke liye shukrana Jabb bhi zaroorat ho, uss samvedana ke liye shukrana Niraasha mein hamein dee hui saantvanaa ke liye shukrana.
Hamein subuddhi aur gyan dene ka shukrana Apna bhakt bann-ne ka neeva maan dene ke liye shukrana Hamein abhay daan dene ke liye shukrana Abhimaan chuur kar hamein svamaan dene ke liye shukrana.
Indriyon aur shareer ke liye shukrana Bakshi hui taqdeer ke liye shukrana Mann mein basee Guruji kee tasveer ke liye shukrana Prithvi, agni, akash, vayu, aur neer ke liye shukrana.
Hamein inse utpann karne ke liye shukrana Hamein miley har janam ke liye shukrana Hamaari jholi bharne ke liye shukrana Hamaare liye maut se bhi ladne ke liye shukrana.
Shukrana mein baste Hain Parwardigaar Shukrana se kabhi toh zaroor khulega mukti ka dwaar Isliye shukrana mein piroh kar Guruji ke liye aseem pyaar Karte rahein hum Unka shukrana baarambaar.
Aksar kuch paane ke liye Kuch toh khona zaroori hai Isliye Guru aur Govind ko paane ke liye Khud ko Unmein khona zaroori hai.
Ruhaani oonchaayee par pahunchne ke liye Bheetar kee gehraayee mein jaana zaroori hai Guruji kee vadiyaayee ko maan paane ke liye Khud kee naitik adhamtaa ko jaan lena zaroori hai.
Har atma kee khoobsoorati ko nihaarne ke liye Apni atma kee khoobsoorati ko nikhaarna zaroori hai Mukti ke raaste par aagey badhne ke liye Vikaaron ke raaste se peechhe hatna zaroori hai.
Guruji ko apni bhakti kee shraddhanjali dene ke liye Apne neech karam kee maafi maangna zaroori hai Har saansaarik aur bhautik paash se mukt honei ke liye Khud ko bandagi ke bandhan mein baandhna zaroori hai.
Komalta ka kavach pehen paane ke liye Nirmalta ka nyaas zaroori hai Saralta ke sarovar mein snaan kar paane ke liye Taralta ke taruvar mein tehelti hui titlee bann-na zaroori hai.
Mann mein Guru ke kareeb honei ke ehsaas ke liye Har pal simran mein rehna zaroori hai Simran ko saanson ka hissa banaane ke liye Nirantar iska prayaas karna zaroori hai.
Chaahe ye sab lagey majboori Is majboori ke aagey sir jhukaana zaroori hai Kinkar hain hum, karte hain Prabhu kee mazdoori Is mazdoori mein apni shraddha dikhaana zaroori hai.
Punya kee poonji ko bhaari karne ke liye Paap ka bojh halka karna zaroori hai Har haalaat mein muskuraa paane ke liye Guruji ko samarpan aur Unka shukrana karna zaroori hai.
Aye dil, abb aur na sataa Aye dil, tu hee bataa Kyun zindagi jeete jeete Aksar ho jaati hai tujhse khata?
Jagg se jud jaane kee khata Jagg ke logon se jud jaane kee khata Behte paani mein maree hui machhlee bhanti behne kee khata Jhooth aur anyaay ko sehne kee khata.
Mann ka das bann jaane kee khata Insaaniyat nibhaane kee zimmedaari ko na nibhaane kee khata Aye dil, tujhe toh hai pataa Ki Guruji se chhipi nahin hai teri koi bhi khata.
Khata yeh soch lene ki, ki sadaa rehna hai yahaan Khata yeh soch lene kee, ki ek din samajh lega tujhe yeh jahaan Ye khata hee toh hai, kyunki ye jahaan toh maya hai Yeh bhi khata hai ki samajh leta hai tu usey apna, jo darasal paraaya hai.
Phir bhi tu kar leta hai khata Aur oopar se Guruji ke saamne leta hai jataa Ki tu Unhe deta hai bataa Toone kee hoti hai jo bhi khata.
Unka Shukrana karna bhool jaane kee khata Unhe samarpan na kar paane kee khata Unka simran karna bhool jaane kee khata Unke vachan par na chal paane kee khata.
Aye mere dil, zaraa ye toh bataa Kab takk karta rahega tu khata par khata Buss, aur na apne aap ko sataa Apne kalyaan par abb apna hak jataa.
Kar le simran, kar le sewa Aur kar le Guruji ka satsang Duniya waalon ka chod ke peechhaa Apna le Guruji ke bataaye dhangg.
Saralta aur taralta laa jeevan mein Simran aur dhyan se sthirta laa apne mann mein Gupt sewa aur daan se badhauti kar apne asal dhan mein Apna farz nibhaata chal rehte huey Guruji ke chintan mein. Guruji teri neeyat aur lagan dekhkar tere raaste kee har baadha ko denge hataa Taaki tere karmon ke vriksh mein komal shuddhi se saj jaaye har lata Taaki bhavishya mein tere mann ko khata karne se pehle hee lagg jaaye pataa Aur phir tera mann na karey khata karne kee khata.
Kisee baat kee chinta na kar Aaya hua waqt beet jaayega Guruji ka simran aur chintan kar Guruji mein tu meet paayega.
Atma-taras mein na doob Varna tera mann niraasha se bhar jaayega Atma-vishwaas mein doob Dekhna, phir tu tarr jaayega.
Guruji kee leela par sanshay na kar Varna samarpan na kar paayega Poorna vishwaas se sarv-samarpan kar le Toh Guru tere har dharma-sankat ko har paayega.
Guruji ke kaam mein apni akal ko na dene de dakhal Nahin toh bigad sakta hai tera kaam Guruji kee sharan mein na kar apne ahankar kee jhankaar Kyunki uss jhankaar mein hoga teri naadaani ka pramaan.
Dheeraj na khona aur gumm ke aansoon na rona Varna is yatra ko kaatna kathin ho jaayega Teri khushi ka sitaara jagmagaayega Jabb tu Guruji mein kho jaayega.
Shikayat na kar Varna mushkil na seh paayega Guruji ka Shukrana kar Toh tu santusht reh paayega.
Bahut laabhkaari sabit hoga tera karna har pal Shukrana Dhoondhta chal tu udaasi mein bhi mastt rehne ka bahaana Jo bhi lamha aayega, usne nishchay hee hai beet jaana Tu surakshit hai, kyunki Guruji ke kamal charnon mein hai tera thikaana.
Saans lene se jeevit rehne ka na do tum pramaan In saanson ko aise karmon mein lagaao ki ho jaaye jagat ka kalyaan Yoon hee toh nahin oopar wale ne tumhe bheja yahaan banaakar ik insaan Aisa kuch kar jaao ki tum par garv karein Bhagwaan.
Dee hai Guruji ne sewa, simran, aur satsang kee daat Phir bhi kyun bhool rahe ho apni aukat Unhonei tumhe apanaya hai bin dekhe tumhaari laukik jaat Aur diya hai har pal tumhe Apna saath.
Unke sanaatan saath ka kar lo aadar satkaar Ve Guru ke roop mein Hain MahaShiv Parwardigaar Tumhe jeena sikha rahe Hain paalanhaar Kumm se kumm Unke samaksh toh maan lo haar.
Isee haar mein vijay hai tumhaari Sahi patri par aa jaayegi jeevan kee gaadi Honei lagegi uss sehar kee tayyaari Jiske liye tumhaari atma bhatak rahi hai maari maari.
Vo sehar, jabb milegi moksh kee manzil atma ko Vo sehar, jo saumpegi tumhaari atma ko Paramatama ko Yeh sehar itnee sunehri hogi, ki tumhaari atma mantramugdh ho jaayegi Is sehar kee mehar se atma manzil ko paayegi.
Isliye saans saans mein kar lo simran Saanson ke sahaare karte raho changey karam Guruji chaahein ki Unke bhakt nibhaayein insaaniyat ka dharam Taaki oordhvagati kee oar le jaaye janam maran.
Sadgati se hota rahega tumhaari saanson ka shringaar Toh kitne prasann hongei Parwardigaar Khulne lagenge Sachkhand ke dwaar Is paar aur uss paar sada milta rahega Guruji ka pyaar.
Aaj Ka Suvichaar 