Month: December 2021

December 21, 2021

Om Namaha Shivaya
Aaj Ka Suvichaar 🙏🏻🙏🏻# 1402

Adhyaatmik Pahaad Par Aagey Badhein

Pahaad par se utarnaa hota hai chaahe aasaan
Pahaad par chadhna hota hai kathin aksar
Isliye agar manzil pahaad kee oonchaayee par hai
Toh na jaane dena pahaad par chadhte jaane ka avsar.

Adhyaatmik oonchaayee ka raasta beshak hai pahaad kee bhanti
Lekin adhyaatmikta kee oonchaayee par miltee hai anant shanti
Isliye is pahaad par chadhne mein hai insaan ka kalyaan
Is oonchaayee ko sambhaale huey khade Hain swayam Bhagwaan.

Is pahaad ko chadhte samay
Aaye koi tufaan ya pralay
Toh bhi hum himmat na haarein
Guruji baithey Hain hamein taarne.

Adhyaatmik pahaad ke raaste par insaaniyat ke bhi paath hain
Aur Guruji har kshan hamaare bheetar aur hamaare saath Hain
Adhyatmik pahaad ke raaste par Bhagwaan se duuri kumm hokar khatm ho jaati hai
Aur Guruji kee leela kee anubhooti si ho jaati hai.

Ve khayaal rakhenge hamaara
Denge har vipatti mein sahaara
Dekhenge Ve hamaari neeyat aur mehnat
Aur har pal barsaayenge Apni rehmat.

Guruji hamein girne se bachaayenge
Agar gir gaye toh phir se uthaayenge
Unke naam ka simran jo hum karte jaayenge
Toh avashya lakshya takk pahunch paayenge.

Pahaad par se utarnaa shaayad lagey aasaan
Lekin yeh soch bhi apne mein hai ek imtehaan
Utar bhi gaye toh vaapis chadhna pehle se zyada mushkil lagega
Aur kabhi na kabhi hamaara zameer jagega.

Kisee ke behkaave mein aakar
Raaste se nahin hona hai vimukh
Chaahe aayein kitne bhi dukh
Isee raaste par hai param sukh.

Guruji toh kahein banda bann-ne ko
Aur ye ki hum Unse rakhein seedha naata
Koi aur beech mein na aaye is naate ke
Varna is rishte ka saundarya na hai reh paata.

Isliye chaliye chadhte chalein
Adhyaatmik pahaad par aagey badhein
Chaahe is safar ke dauran anginat sooraj dhalein
Chaahe rituon ke aane jaane mein phool khilein ya patte jhadein
Hum Guruji ka naam lekar prayatna karein pahunchne ka uss oonchaayee par
Jis par hamaare pahunchne se hum se prassann hon hamaare Guruvar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 20, 2021

Om Namaha Shivaya
Aaj Ka Suvichaar 🙏🏻🙏🏻# 1401

       Qayamat Bhi Aa Jaaye Toh

Pyaare Guruji,

Suna thaa ki Aap sangat ka haath nahin chodte
Kabhi bhi apne bhakton se muh nahin modte
Aur dekha bhi hai is sundar satya ko
Jaana bhi hai is taarne wale tathya ko.

Phir bhi aaj ye ashru chaahein behna
Dil chaahe Aapse ye kehna
Ki kabhi na chodna mera haath, mere taaranhaar
Kabhi na thukraana mera saath, mere paalanhaar.

Jeevan ka bhavsaagar tarangi sa hai
Kalyuga ka charitra satrangi sa hai
Yahaan khoobsoorat mausam ke saath saath
Aksar karni padti hai aandhi aur tufaan se bhi baat.

Beech majdhaar mein bhanvar hai
Is baat kee bakhoobi khabar hai
Lekin zaroori hai jaana uss paar
Isliye minnatein karti hoon Aapse baar baar
Ki kripa kar subuddhi deejiye
Subuddhi ke sangg shuddhi deejiye.

Imtehaan beshak leejiye
Lekin safalta deejiye
Aisee safalta, jo Aapki raza mein ho
Aur mera har karam Aapse wafa mein ho.

Aayenge jaayenge ye duniyaadaari ke jhamele
Chalte rahenge is jeevan mein maya ke mele
Karmon ka hisaab jo chukaana hai
Yahee toh zindagi ka fasaana hai.

Mere jeevan kee raat ke chaand aur taare Hain Aap
Mere jeevan ke din ke sooraj roopi sahaare Hain Aap
Raat andheri honei par Aapki divya jyot hee chiraag hai
Aapne sweekaara hai mujhe, jabb ki na jaane meri atma par kaun kaunsa daag hai.

Aap sada angg sangg rehna, kyunki ye jhamele mai akele na jhel paaoon
Vo hunar nahin hai mujh mein jis se mai bheetar se kuch aur oopar se kuch aur dikhaaoon
Mujhe aisa hunar seekhna bhi nahin
Kyunki Aapki nazaron mein veh sahi nahin.

Aisee hee hoon mai, kya karoon
Aapka sahaara hai, isliye kabhi na daroon
Aapki dikhaayee raah par chalti jaaoon
Aapki mamta bhari goad mein palti jaaoon.

Aapke sambhaalne se sab kuch sanvar hai jaata
Aapke ashirwaad se jeevan sudhar hai jaata
Mera chitt sada Aapka Shukrana rahe gaata
Ye Shukrana apne sangg himmat kee daat hai laata.

Yoon hee sambhaale rakhna mujhe mere daata
Mera dil Aapse judey rehkar sukh hai paata
Is rishte ke sukh mein yoon masroof rahoon
Ki qayamat bhi aa jaaye toh mai uff takk na kahoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 19, 2021

Om Namaha Shivaya
Aaj Ka Suvichaar 🙏🏻🙏🏻 # 1400

         Unkee Mehar Se Hee Safal

Sooraj se kaha mainey
Ki tu raasta dikhaata chal
Sooraj ne kaha mujh par yoon vishwaas na kar
Mai toh shaam hotey hee jaaoonga dhal.

Chaand se poochhne lagi hee thi
Chaand sharmaaya aur usne keh diya
Sooraj kee chamak ne mujhe har baar hai ojhal kiya
Meri toh kalaayein bhi kumm zyada hoti rehti hain
Ve waqt kee hukoomat ko sehti hain
Lekin, haan, Shivji ne kiya mera uddhaar
Mujhe diya Apne maathe pe rehne ka adhikaar.

Duur takk aasmaan mein mujhe dikhe jo taare
Mainey poochha unse ki kya mai chal sakti hoon unke sahaare
Taaron ne sambhaala apna aanchal
Aur kaha ki unhe kayee baar chhipa dete hain baadal.

Poochha mainey baadal se
Ki uskee disha kya hogi kal se
Toh keh diya usne ki veh hawaa se wafaa nibhaata hai
Aur tehelta hai jahaan usey hawaa ka jhonka le jaata hai.

Thakne lagi thi mai phir ehsaas hua ki hawaa hai mere aaspaas
Mainey hawaa se vahee prashn karne ka kiya prayaas
Hawaa ne toh mera prashn apne vaig se udaa diya
Aur usee vaig se mujhse apna daaman chudaa liya.

Lagaa mujhe ki sthir hai shaayad ye dharti
Aur ye sabka paalan hai karti
Lekin uske jawaab se bhi hui mujhe niraasha
Toh socha mainey ki shaayad aasmaan se milega dilaasa.

Lekin aasmaan ne kaha uska phailaav aur uska astitva hai uss se bhi oopar wale kee daat
Ki uska anusaran karke na milegi mujhe manzil kee saugat.

Kiske sahaare chaloon mai yahaan
Paraaya sa hai ye saara jahaan
Na ye dharti aur na ye aasmaan
Bataayein mujhe ki mai jaaoon kahaan.

Aankhein bandd kar ke pahunchi mann mandir mein
Guruji ka naam lekar Unhe yaad kiya mann hee mann mein
Jodi mainey Guruji se seedhi taar
Parwardigaar kee mehar hui aparampaar.

Tabhi aayi ek khushboo ruhaani
Jiske sangg hawaa chalne lagi suhaani
Dikha sooraj se bhi zyada roshan prakash
Poorna suraksha ka honei lagaa mujhe ehsaas.

Mann ke mandir mein hua Guruji ka shubh aagaman
Mainey bhaav vibhor hokar kiya Unka naman
Karuna aisee barasne lagi
Har uljhan sulajhne lagi
Guruji ne raasta dikhaaya
Aane waali baadhaaon ke baare mein bataaya
Unhe paar karne ka upaay bhi samjhaaya
Aur manzil milegi, ye yakeen dilaaya.

Har samasya ka samaadhaan hai Guruji ke paas
Har duvidha ko duur karta hai Guruji ka deedar-e-ehsaas
Unse bada koi maargdarshak nahin
Unke jaisa nipun koi rakshak nahin
Raasta bhi Guruji se hai, Unhee se hai safar
Manzil takk pahunchna bhi hoga Unkee mehar se hee safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 18, 2021

Om Namaha Shivaya
Aaj Ka Suvichaar 🙏🏻🙏🏻 # 1399

Guruji Ke Sangg Gehra Naata

Karta chal Guruji se tu apna naata gehra
De rahe Hain Ve tere safar ke har moad par pehra
Pehen le Guruji ke naam ka ruhaani sehra
Dekhna, tera jeevan ho jaayega sunehra.

Gehra hoga jo Guruji se tera naata
Toh tera mann na rahega ghabraata
Yahee hai ek bandhan jismein tu
Khud ko kho kar hai sab kuch paata.

Jitna khoyega tu khud ko
Jitna khoyega sudh budh ko
Utna hota chalega Guruji ke kareeb
Utnee kaam aayegi naam japne kee tarkeeb.

Guruji ka naam japne se swasth honei lagega rogi tann
Guruji ka naam japne se shant hoga pareshaan mann
Guruji ka naam japne se sanvarta jaayega jeevan
Guruji ka naam japne se badhta jaayega ruhaani dhan.

Aisee badh jaayegi teri sehen shakti
Aisee anugrihit hogi teri bhakti
Ki tu hoga hairaan
Aise Hain Guruji roopi Bhagwaan.

Saump de Guruji ko apni har khushi aur apna har gumm
Samarpan kar de tu Unhe apna har karam
Unhonei hee sambhaala hai har bhakt ka janam maran
Unkee mehar se hoga tere antakaran ka bhi pavitrikaran.

Phir tere mann ka darpan ho jaayega ujjwal
Tere vyavhaar mein chhalkega unnat atma-bal
Tere Guruji ke sangg gehre naate se tere raaste par jo ruhaani rangg aayega
Uss rangg kee raunak se tere jeevan kee neerasta par Guruji ka noor chhaayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 17, 2021

Om Namaha Shivaya
Aaj Ka Suvichaar 🙏🏻🙏🏻 # 1398

                 Bhool Hui Tujhse

Bhool hui tujhse ek baar nahin
Balki hui anekon baar
Phir bhi har baar maaf karte gaye
Tujhe tere Guruji, tere Parwardigaar.

Abb toh kumm se kumm maan le tu apni haar
Kyunki chaahe abhi tere gunn gaa raha hai sansaar
Ye na chalega tere sangg uss paar
Chaahe tu minnatein kar le hazaar.

Ye safar tera apna hai, tu maan le
Sabka saath mehez ek sapna hai, tu ye jaan le
Phir iske baad bhi jo tu chaahe dhokhe mein rehna
Toh baad mein Guruji se shikaayat mein kuch na kehna.

Tanha rehna koi buri baat nahin
Buss, isey duur karne ke liye saath chaahiye sahi
Veh saath, jis se tanhaayee mein miley sakaaraatmakta aur amar ruhaani bahaar
Na ki antt vele chod dene wala kshanabhangur sansaar.

Insaaniyat ka farz nibhaa le
Bhog se bhi jeevan sajaa le
Aasakti aur iska chintan na kar
Nahin toh yahee karta reh jaayega umr bhar.

Ye sab karte karte Guruji se jude rehne ka prayatna rakh tu barkaraar
Ve hee Hain bhog, dharma, arth ke bakhshanhaar
Unse jodey rakh tu seedhi taar
Unhe apne jeevan kee doar saump de aur kar tu Unse niswaarth pyaar
Ve tere apne Hain, aur paraaya hai ye sansaar
Ek Ve hee kholenge tere liye sahi samay aane par moksh ka divya dwaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 16, 2021

Om Namaha Shivaya
Aaj Ka Suvichaar 🙏🏻🙏🏻 # 1397

Tujhe Taarna Chaahte Hain Guruvar

Kabhi pareshaaniyaan badi, kabhi chhoti
Kabhi utsaah hota, kabhi maayoosi si hoti
Kabhi insaan hans paata, kabhi aankh numm hoti
Kabhi dil khush hota, kabhi udaasi hoti

Kabhi lafz nikalte, kabhi arzi zubaan par hoti
Kabhi kuch na kaha jaata, kabhi shikaayat hoti
Kabhi ye chehra muskuraata, kabhi ye aankh roti
Kabhi himmat badh jaati, kabhi niraasha si hoti.

Kayi bhaav aur kayi vichaar
Din raat hain aate mann mein
Jo bhaav aa kar hain theher jaate
Ve der takk asar laate hain jeevan mein.

Tabhi toh zaroori hai sthir hona mann ka
Taaki veh sahi tareeke se saath de jeevan ka
Isliye mann ko karein apne vash mein
Taaki na beete ye jeevan kashmakash mein.

Kendrit rahe poora antakaran
Uss param shakti mein sada
Iske liye seekh kar nikhaarni hogi
Ekaagrachitt rehne kee adaa.

Is adaa ke shraddha poorvak prayaas se
Nirantar iske abhyaas se
Kendrit rakhein antakaran ko MahaShiv Guruji par
Kyunki Ve hee Hain moksh daayi Har.

Kayi paristhitiyaan aayengi jaayengi
Jeevan ik aisa khaas khel hai
Bhaavnaayein aur dhaaranaayein apni hukoomat dikhaayengi
Karne lagengi mann aur sanskaaron se mel.

Nahin rehti dhoop, na hee rehti hai chhaaya
Yahaan ho raha sab kuch ek tareh se hai maya
Bhaavnaaon aur vichaaron se
Paristhitiyon, karmon aur sanskaaron se
Is jeevan ke baad ka bhavishya ho raha hai tayy
Ismein nahin hai koi bhi sanshay.

Isliye mann ko rakhein Guruji par kendrit
Asthirta se na na ashaant karein chitt
Guruji ke simran aur dhyan se asthirta jaayegi mitt
Guruji hamaare shubhchintak Hain aur sada karenge hamaara hitt.

Karein Unka Shukrana har pal
Sudhaarte chalein apna aane wala kal
Guruji ke paas hai hamaari asthirta ka hal
Isliye, o praani, vivashta mein tu haath na mal.

Mann kee sthirta, mann kee samta
Har paristhiti mein shant rehne kee kshamtaa
Guruji simran aur sadhna se denge ye daat
Taaki maansik santulan na bigaad paaye koi bhi baat.

Ruk jaayegi mann mein chal rahi har tareh kee hera-pheri
Guruji nek neeyat dekhkar na karenge ek pal kee bhi deri
O praani, tu bilkul bhi vilamb na kar
Tujhe taarna chaahte Hain Guruvar.

Shukrana kar le, kar le Unko naman
Unkee kripa se niyantran mein kar le apna mann
Ekatrit karta chal Guruji ke naam ka dhan
Sanvaarta chal Guruji kee kripa se apna jeevan.

Guruji kee kripa se yahee dhan har jeevan mein kaam aayega
Aur har janam mein kamaaya ye dhan sanchit hota jaayega
Isee se pichhle karmon ke sanchit bhaar ke kumm honei ka paigaam aayega
Aur ek yahee anmol dhan aagey jaakar mukti ka paawan parinaam laayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 15, 2021

Om Namaha Shivaya
Aaj Ka Suvichaar 🙏🏻🙏🏻 # 1396

  Rakhna Sada Apne Charanon Mein

Jageer na samajh lena isey
Ye duniya na hai teri na meri
Sukhi rehta har vo jann
Jo ye maan lene mein karta nahin hai deri.

Aaye hain yahaan is safar ke liye
Jisey naam mila hai zindagi ka
Har cheez yaheen reh jaayegi
Saath rahega kewal naam kee bandagi ka.

Guruji mein basey Hain saare devi devta
Guruji ke naam ka kar le dhyan
MahaShiv Hain pyaare Guruji
Hain Ve Bhagwaanon ke Bhagwaan.

Dharma, moksh, arth, aur kaam
Uddeshya hain ye maanav jaati ke
Hain ye chaaron purushaarthon ke naam
Sabhi ichchhuk hain inkee praapti ke.

Guruji ke naam mein hai aisa bal
Ki ye praapt ho jaayenge aaj nahin toh kal
Moksh ka purushaarth hai param
Isee se tal jaata hai baar baar ka janam maran.

Lekin moksh se pehle hee agar hum Guruji se keh dein
Ki daata, rakhna sada Apne charanon mein
Toh bhinn bhinn chaahaton ya zarooraton ke liye
Na karni padegi guzaarish
Guruji hamaare kalyaan ko praathamikta dete huey
Karenge poori hamaari har khwaahish.

Is ‘na teri na meri’ duniya se jabb hon hum rukhsat
Mann mein na ho Yamraaj se dehshat
Guruji se maangein toh maangein aisa kalyaan
Ki uss paar bhi Apne charanon mein hamein rakhein Guruji roopi MahaShiv Bhagwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 14, 2021

Om Namaha Shivaya
Aaj Ka Suvichaar 🙏🏻🙏🏻 # 1395

     Abb Bhi Waqt Hai

Abb bhi waqt hai
Apne vartmaan ko sudhaar le
Abb bhi waqt hai
Apne bhavishya ko nikhaar le.

Abb bhi waqt hai
Guruji kee bhakti karne ka
Abb bhi waqt hai
Mann kee gaagar ko naam ke amrit se bharne ka.

Abb bhi waqt hai
Paapon ka praayashchitt kar ke maang le kshamaa
Har pal ko banaa le Guruji se judne ka samaa
Aur Unke prati Shukrana ko le tu mann mein samaa.

Abb bhi waqt hai baithne ka satsang mein
Rangg jaane ka Guruji ke rangg mein
Badalaav laane ka apne jeene ke dhangg mein
Guruji ko doar dekar oorja bharne ka apne jeevan kee patang mein.

Abb bhi waqt hai
Honei ka irshya aur jhooth se duur
Karne ka apne ahankar ko chuur
Apnaane ka sadbhaav ka dastoor.

Abb bhi waqt hai
Bigde rishte sanvaarne ka
Tooti kadiyaan joad paane ka
Apni oar se koshish kar paane ka
Guruji mein dhyan lagaane ka
Aur Guruji ke gunn gaane ka.
Is waqt ko beete waqt kee bhanti na ganvaa
Is waqt sunn le jo keh rahi hai ruhaani hawaa
Tu bhi kalyuga ka zimmedaar hai
Isliye madad kar satyuga ke aagaman mein
Sab kuch samarpan kar ke
Sees jhuka le Guruji ke naman mein.

Abb bhi waqt hai ye sab kar paane ka
Na banaa abb bahaana samajh na aane ka
Har waqt Guruji kee hai tujh par nazar
Abb bhi waqt hai, ruhaani banaa le yeh safar.

Abb bhi waqt hai, chod de gila-shikwa aur bhed-bhaav
Buss, har praani ke prati rakh sadbhaav
Abb bhi waqt hai, Guruji ka kaha maan le
Aur insaan ke janam ka sahi maqsad tu jaan le.

Abb bhi waqt hai yeh yaad swayam ko dilaane ka
Ki ye waqt bhi beet jaayega
Abb bhi na sambhaala toone apne aap ko
Toh phir na jaane kitne aur janam tu paayega.

Abb bhi waqt hai anaasakt bhog ka
Abb bhi waqt hai simran se theek honei tere mann ke roag ka
Abb bhi waqt hai is waqt ke uchit upayog ka
Abb bhi waqt hai jeevan ke sadupyog ka.

Abb bhi waqt hai ki tu is waqt kee aagosh mein
Nakaratmakta ka nashaa utaar kar aa jaa hosh mein
Abb bhi waqt hai, kar le Guruji ko tu prasann
Abb bhi waqt hai, lagaa le Guruji se lagan
Abb bhi waqt hai, is waqt se tu ho jaa Guruji mein magan
Abb bhi waqt hai, tu Unse paa le asal dhan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 13, 2021

Om Namaha Shivaya
Aaj Ka Suvichaar 🙏🏻🙏🏻 # 1394

Madhur Saath Kee Daat

Dhoondh raha thaa kab se tu jo saathi
Paa liya toone uss saathi ko Guruji mein
Phir bhi kyun tera mann kar raha hai inkaar?
Ki tere meet Hain swayam Parwardigaar.

Tere mann ko samajh nahin aa raha hai
Ki Guruji Hain Shivji ke avatar
Tabhi toh tera mann uljhan mein hai
Aur usey ho nahin raha hai aitbaar.

Apne mann ko samjhaa le
Uskee uljhan suljhaa de
Veh phansa hai maya ke jaal mein
Simran hee chayn de sakta hai aise haal mein.

Simran karne ke liye shaayad mann pehle pehle na maane
Lekin pavitrikaran karna zaroori hai, tu toh ye hai jaane
Isliye kisee bhi tareh se manaa tu apne mann ko
Taaki veh anubhav kar paaye simran ke dhan ko.

Apne is divya saathi se kar anurodh
Ki tera mann na karey virodh
Tere divya saathi, tere Guruji kee jo hogi mehar
Toh mann mein simran chalega aathon pehar.

Guruji ke naam ka simran tu karta jaayega
Toh tera mann amrit se bharta jaayega
Pavitrikaran ho jaayega shuru
Kripa karte rahenge tere Guru.

Mann simran ke saagar mein behne lagega
Veh apni kamzori kee kahaani Guruji se kehne lagega
Guruji sarvashreshth saathi ke roop mein
Tera khayaal rakhenge chhaaon aur dhoop mein
Unse tera mann karega apni nijee baat
Aur Guruji mann ko denge samta kee daat.

Guruji simran karaate huey bakhshenge dhyan
Guruji saathi bannkar denge vidya aur gyan
Mann ko bhi hoga is buddhi ka sammaan
Aur mann tera das banega jis se nishchit ho jaayega tera kalyaan.

Guruji lenge mann kee uljhan ko samajh
Unkee daya se mann kee uljhan jaayegi sulajh
Tere shwaas mein hoga raahat ka ehsaas
Tere pyaare saathi sadaa hongei tere bheetar aur aaspaas.

Girne na denge tujhe kabhi
Nirantar tujhe denge sahaara
Kabhi chhal-kapat na hogi is mitrataa mein
Buss, tu kabhi matt laana khot apni pavitrataa mein.

Chaahe naaraaz ho jaayein tujhse sabhi
Guruji tujhse naaraaz na hongei kabhi
Sahaayata karne se na peechhe hatenge
Na tujhse teri wafaa kee maang karenge.

Kabhi na denge tujhe Ve dhokha
Denge tujhe apni baat kehne ka mauka
Kabhi teri sachchaayee ka faayda nahin uthaayenge
Jabb bhi tujhe zaroorat hogi, Ve nishchay hee Apna sehyog dikhaayenge.

Buss tu apni taraf se wafaa nibhaana
Kyunki yahee hai dosti ka usool
Oopar se dikhaawe aur peeth peechhe fareb ke shool
Ye hotey hain na kewal peedajanak balki bilkul fizool.

Is duniya kee bheed mein virle hee hongei vafaadaar
Kya karein, kalyuga mein kuch zyada hee ho gayein hain paap aur vikaar
Tu satya, sabr, shukr, aur swamibhakti se mitrataa ko sajaa
Sanshay, shikaayat jaise nakaraatmak vichaaron ko raaste se hataa.

Guruji parakh rahein Hain sabki neeyat
Ve kabhi na denge tujhe galat naseehat
Ve na kabhi tujhe raaste se behkaayenge
Ve teri saadagi aur tere bholepan ka kabhi faayda nahin uthaayenge.

Guruji roopi Bhagwaan ko saathi ke roop mein paakar
Tu andaaza bhi nahin lagaa sakta apni khushakismati ka
Guruji ne farz sambhaala hai
Tere mann kee sadgati ka.

Apne saathi ke har vachan ko jaankar apne liye mangal karan
Toone sirf karna hai unn vachanon ka anusaran
Guruji ne tera haath thaama hai, Ve isey kabhi na chodenge
Chaahe poora jagg tujhe tyaag de, Guruji kabhi muh na modenge
Aisa saathi milna hai bahut naseeb kee baat
Shukrana kar Guruji ka, Jinhonei dee hai tujhe is madhur saath kee daat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

December 12, 2021

Om Namaha Shivaya
Aaj Ka Suvichaar 1393

                 Mukti Kee Talaash

Bahut zaroori safar hai ye
Isey aisa vaisa na samajh lena
Jitne bhi mauke milein tumhe
Har tareh se tum sulajh lena.

Ye jo insaan ka darja mila hai tumhe
Yeh Bhagwaan ne tumhe diya hai
Itnee yoniyon ko jhel lene ke pashchaat
Tumne insaan ka roop liya hai.

Bhatak bhatak kar pahunche ho yahaan
Na jaane abhi hotey tum kahaan
Guruji kee kripa se baney ho insaan
Sudhaar lo isee janam mein jeevan kee dastaan.

Kar lo Guruji ka simran aur dhyan
Kar lo shuddh sanskaaron ka nirmaan
Kar lo Guruji kee mahima ka gungaan
Taaki ho jaaye tumhaara kalyaan.

Itnee yoniyon se atma hai mukti kee talaash mein
Andhere se nikal kar pahunchna chaahti hai veh prakash mein
Veh prakash milega Guruji kee mehar aur tumhaare prayaas se
Chaahe waqt lagey, tum ghabrana nahin is abhyaas se.

Apni bhakti mein shraddha aur saboori rakhna
Jo bhi prabhaav Guruji se duur le jaaye, tum uss se duri rakhna
Simran aur dhyan se milega tumhe atma-bal
Jis se adhyaatmik kamzori jaayegi tal.

Guruji ke charnon par dhyan dete huey
Unke naam ke ashish ko lete huey
Sudhaar kar apna ruhaani safar
Apni atma ko honei do agrasar.

Aur kuch kaam nahin aayega
Sab maya ke bhanvar mein ghul jaayega
Lekin atma ka uddhar anivaarya hai
Jis se tumhaara har paap dhul jaayega.

Chalta rahega sansaar ka khel
Hota rahega shareer aur maya ka mel
Lekin antakaran aur atma kee shakti se
Guruji mein niswaarth bhakti se
Toot jaayega har tareh ka paash
Aur safal hogi mukti kee talaash.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja