February 8, 2022
Om Namaha Shivaya
Aaj Ka Suvichaar 🙏🏻🙏🏻 # 1451
Unkee Vaddi Vadiyaayee
Raat beeti aur aayi bhor
Chhat par aaye matvaale moar
Unhe dekh kar mai hui bhaav vibhor
Dheere se jaane lagi mai Unkee oar.
Baadalon kee aadh mein sooraj chhup raha thaa
Yoon lagg raha thaa ki baadalon ne usey kuch kaha thaa
Phir akash mein chhaane lagi ghataa
Aur ghataa ne veh raaz diya bataa.
Rimjhim rimjhim barasne lagaa paani
Pankh phailaakar naachne lagey moar
Subah ka roop hua ruhaani
Thandak si hui chaaron oar.
Mann hee mann mein mai karne lagi baat
Pyaare pyaare Guruji ke saath
Unkee maujoodagi ka paakar ehsaas
Nirmal sa mehsoos karne laga mera shwaas.
Kyunki vahaan par aayi Guruji kee khushboo
Aur khushi se gadd gadd ho gayi meri rooh
Jabb uss disha se aane wali hawaa ne diya mujhe divya sparsh
Toh uss sparsh mein Guruji kee vidyamaanta ke sanket se mujhe hua harsh
Mai Guruji ko mehsoos kar paayi, chaahe dekh na paayi
Unkee khushboo aur maujoodagi se mai phooli nahin samaayi.
Yoon khoyi rahi mai ki maalum na chala kab chale gaye vahaan se moar
Baarish bhi thamne lagi jab dekha mainey chaaron oar
Sooraj kee kirnon se sajj kar ujjwal hui bhor
Lekin mujhe Guruji ke alaawa na soojha kuch aur.
Guruji ne Apni leela rachaayee
Itnee sundar bhor dikhaayee
Mann mein khushi kee tarang lehraayee
Ye hai Unkee vaddi vadiyaayee.
🌹🌹🌹🌹🌹🌹🌹
Jai Guruji 🙏🏻🙏🏻
Dhirja
Aaj Ka Suvichaar 