Month: March 2022

March 21, 2022

Om Namaha Shivaya
Aaj Ka Suvichaar 🙏🏻🙏🏻 # 1492

Mann Mein Yugon Ka Vaas

Mann mein hee satyuga hai rehta
Mann mein hee tretayuga
Mann mein hee dwapar ka spandan hai behta
Mann mein hee kalyuga.

Ek din ek yug basey mann mein
Dooje din yug ho dooja
Kabhi kabhi ek hee din mein badlein yug mann mein
Aise asthir mann se kaise kar paayenge pooja?

Sattva gunn ke honei se
Satyuga basta hai mann mein
Lekin mann mein rajogun ke aane se
Yug badal jaata hai ek hee kshan mein.

Tretayug karne lagta hai mann mein vaas
Hadd paar karey toh honei lagg sakta hai lobh aur ashanti ka ehsaas
Agar tabb bhi swami bann kar raha mann
Toh mann mein ho jaayega dwaparayug ka bhi darshan.

Mann ka spandan aaj ya kal, ya phir agley hee pal
Kalyugi spandan mein sakta hai badal
Isliye mann ke vash mein rehna chod kar
Uska swami bann-ne mein ho jaayein hum safal.

Mann ke yug ke badalne se
Badalta hai mann ka bhaav
Uske kaaran badal jaata hai
Uss jann ka bhi swabhaav.

Guruji ne sakaaraatmak soch par diya hai zor
Hamein aadar se karna chahiye is aadesh par gaur
Guruji ne hamaare karmon ka adhiktar bhaar saha hai
Unhonei simran aur dhyan karne ke liye kaha hai
Inhee se badhaate chalein hum sadhana
Aur mann mein karein sattvikta kee sthaapana.

Na vikaar ko ghar banaane dein mann mein, na paap ko
Taaki ve na protsaahit kar paayein klesh aur santaap ko
Sadbhaav ho mann mein sabke prati
Shant aur sthir ho jaaye mann ka bhaav aur mann kee gati.

Mann mein honei lagega satyuga ka vaas
Na krodhit, na adheer hoga mann, na hee hoga veh udaas
Satyugi hoga spandan, madhur hoga mann ka vaataavaran
Aur Guruji kee mehar se nakaratmakta ka hoga haran.

Chakra kee bhanti chalta hai yeh silsila
Is chakra kee oorja hai sakaraatmak vichaardhaara
Jaisi soch, vaisa spandan, aur mann mein yug bhi uske anusaar
Aur jaisa yug mann mein, usee prakaar ke mann mein vichaar.

Guruji toh de rahein Hain ashirwaad
Kyun na karein mann ko satyuga se aabaad
Abb na karein thoda sa bhi aur vilamb
Abhi se hee karein is shubh kaarya ka aarambh.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 20, 2022

Om Namaha Shivaya
Aaj Ka Suvichaar 🙏🏻🙏🏻 # 1491

                      Khush Rahein

Guruji kee vaddi hai vadiyaayee
Unhonei Apne darbar mein kitnee sangat bulaayee
Jiskee jo khwaahish ho, veh Unkee leela se poori ho paayi
Jisey asal dhan kee kaamna ho, Guruji ne uss skaks ko uskee vidhi bataayi.

Is zindagi ne laut kar nahin hai aana
Ek ek pal hai ek khazaana
Karte chalein hum Guruji ka Shukrana
Khush rehne ke liye na dhoondhna padega phir koi bahaana.

Abb takk nahin kiya toh shuru karein sahi tareeke apnaana
Taaki baad mein na pade hamein pachhtaana
Vahaan jaakar zaroori hai Oopar wale ko muh dikhaana
Koshish karein ki vahaan na padey jurm ke maare sharmaana.

Khush rahein, doojon se khush rehne ke liye kahein
Sabke liye sochein achcha
Iraade aur karma ko rakhein sachcha
Jeevan kee doar ka dhaaga hai bahut kachcha
Uskee marzi se tootega, na chalegi ismein hamaari ichcha.

Guruji ke kahe anusaar
Sambhaalein apna ghar parivaar
Gupt sewa, paath, daan karte rahein
Simran ka dhan apne khaate mein bharte chalein.

Kisee kee zindagi nahin hai sthaayi
Koi praani aisa nahin jisey maut nahin aayi
Har kisee kee kismat leti hai angdaayee
Aisee sthiti kayiyon ke jeevan mein hai aayi.

Dukh dard mein bhi khush rehne kee tarkeeb jisne hai apnaayee
Uske bheetar aur aaspaas sakaaratmak spandan kee leher umad kar yoon aayi
Ki akelepann kee tanhaayee mein bhi bajne lagey shaant shehnaayee
Shukrana karein, khush rahein, yaad rakhein….Guruji kee vaddi hai vadiyaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 19, 2022

Om Namaha Shivaya
Aaj Ka Suvichaar 🙏🏻🙏🏻# 1490

             ‘Mai’ Kee Beemaari

Kalyuga ka raajya hai aajkal
Vigyaan aur daan se kayi mushkilein hui hain hal
Lekin kaheen kaheen bhalaayee aur sadaachaari kee kamee si hai
Tabhi toh anginat logon kee aankhon mein namee si hai.

Kaheen par mahaamaari hai
Kaheen par ladaayi jaari hai
Aur jo ye ‘mai’ kee beemaari hai
Yeh bhi toh laa rahi laachaari hai.

Na yeh dharti teri, na tera hai gagan
Na koi jalaashay tera, na hee tera koi chaman
Phir kyun yeh ‘mai’ aur ‘mera’ karte rehne ka yatna
Jabb antt mein, aye bande, toone hee ho jaana hai khatm?

Paanch bhoot se banaa hai tera shareer
Pal pal badalti hai teri taqdeer
Vikaaron kee baandhi hai toone zanjeer
Phir bhi sochta hai tu khud ko ameer?

Apne karma toh tu sambhaal nahin sakta
Phir bhi ‘mai’ aur ‘mera’ karte nahin tu thakta
Pata bhi nahin chalega kaise saanson ka ye khel hoga chukta
Phir bhi tu ‘mai’ aur ‘mera’ karne se nahin rukta.

Guruji ne kaha ki Unke darbar mein ‘ego’ aur ‘logic’ ka koi kaam nahin
Toone Guruji ko khush karna hai toh vahee kar jo Unhe lagta hai sahi
Is ‘mai’ ko chod de, ‘meri’ kee bedi ko toad de
Neevenpann kee nazakat ko odh le.

Is ‘mai’ ka ilaaj tere bheetar hai, kaheen baahar nahin
Maan le har baat, jo Guruji ne hai kahi
Ve tere shubhchintak Hain, tujhe sahi raah dikhaate Hain
Tere kalyaan ke liye tujhe tere bhale kee baat sikhaate Hain.

Is ‘mai’ kee beemaari ko duur kar
Apne ahankar ko chuur kar
Na abb tu aur guroor kar
Beemaari ko sangg rehne ke liye na majboor kar.

Tera atma-bal badh jaayega
Tu chayyn se so paayega
Tere karmon ka bhaar halka ho jaayega
Kyunki ‘mai’ chodega, toh vikaaron ka bojh kumm ho paayega.

Guruji tujhse hongei prassann
Dekhkar tera neevanpann
Jabb ‘mai’ kee beemaari ka antt ho jaayega
Tu poori tareh se Guruji ke pyaar mein kho paayega.

Tyaag de abb ‘mai’ ka vikaar
Na hota chal ‘mai’ se beemaar
Is jeevan ke din hain do chaar
Abb toh apne jeevan ko le tu sanvaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 18, 2022

Om Namaha Shivaya
Aaj Ka Suvichaar 🙏🏻🙏🏻 # 1489

         Guruji Ke Naam Ka Rangg

Beet gayi holi is varsh kee
De gayi yaadein kayiyon ko harsh kee
Rangon kee hui bauchhar
Aur phir beet gaya ye tyohaar.

Kuch rangg thei pakke aur kuch thei kachche
Khoob khele kayi bade aur kayi bachche
Kuch rangg khud hee padne lagenge pheeke
Kuch ke liye prayog karne hongei dhone ke tareeke.

Utar jaayega gulaal aur rangg neela
Dhul jaayega rangg hara aur peela
Na utarne dena tum Guruji ke naam ka rangg
Uss rangg se sanvaarna jeene ka dhangg.

Guruji ke naam ka rangg
Laata rahega ruhaaniyat kee tarang
Jabb takk is rangg mein rangey rahoge
Tum Guruji ke prem bhaav mein bahoge.

Is bhaav ko tum sewa se sajaana
Is bhaav ke rangg mein samarpan ka rangg milaana
Is rangg ke mandal mein simran kee jyot jalaana
Aur Guruji ka Shukrana kar ke Unhe rijhaana.

Ye koi saadhaaran rangg nahin hai pyaare
Is rangg se hongei tumhaare vaare nyaare
Is rangg mein rangna bahut khushakismati kee baat hai
Kyunki ye sanket hai ki Guruji ka ashirwaad tumhaare saath hai.

Yeh rangg bhakti bhaav ka hai
Ye kabhi pheeka na honei paaye
Is rangg mein rangenge tumhaare dwaara arpit kiye suman
Isliye dhyan rahe, koi phool na murjhaaye.

Guruji kee kripa se har aane wali holi par
Aur bhi gehra ho jaaye yeh rangg
Is rangg mein rangkar tum Guruji mein yoon leen raho
Ki tumhaare chitt mein har pal samaaye Guru naam kee umang.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 17, 2022

Om Namaha Shivaya
Aaj Ka Suvichaar 🙏🏻🙏🏻 # 1488

                   Holi Ka Paigam

Phagun kee poorna-maashi hai aayi
Holi ka paigam hai laayi
Rangon ka yeh tyohaar hai aaya
Buraayee par achchaayee kee jeet ka sandesh hai laaya.

Hiranyakashipu ne chali thi chaal
Ki uska putr Prahlad ho jaaye agni mein nidhaal
Apni behen Holika kee goad mein usey bithaaya
Aur Holika kee raksha ke liye uspar kavach chadhaaya.

Lekin Prahlad ka kalyaan kiya uskee bhakti ne
Kyunki Vishnu ji kee shakti ne
Kavach udaaya Holika ka aur Prahlad par usey chadhaaya
Holika agni mein jal gayi aur Vishnuji ne Prahlad ko bachaaya.

Holi ka yeh arth bhi hai
Ki veh ho li, yaani gayi beet
Isliye jo bhi anban hai kisee ke beech
Veh khatm hui aur ve bann gaye meet.

Guruji kee kripa se aisa sadbhaav
Saare sansaar mein samaaye
Har oar bhaaichaara ho
Aur pyaar badhta jaaye.

Guruji kee saari sangat
Guruji kee ho lee
Isliye bhi Guruji ke bhakt jann
Guruji ke sangg manaayein holi.

Angrezi bhaasha mein holi shabd hai shubh
Kyunki uska arth hota hai pavitra aur shuddh
Chalti rahegi khushi aur gumm kee aankh micholi
Bhakti ke rangg se khelein, aao, hum sab mil kar holi.

Is rangon ke parv par Guruji karein aisee mehar
Ki bhakti ka rangg gehra ho har pehar
Guruji kee bhakti ke rangg mein yoon rangg jaayein hum
Ki Unn mein hee ramm jaayein hum.

Rangg ho sewa, simran, aur satsang ka
Jismein mishran ho samarpan ke rangg ka
Saath mein ho neevenpann aur Shukrana ka rangg
Jismein umang bhare prem bhaav kee rangeen ho tarang.

Rangon ka yeh mishran
Ullaasit karey mann
Guruji kee bhakti ke rangg se
Har bhakt jann ka rangg jaaye jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 16, 2022

Om Namaha Shivaya
Aaj Ka Suvichaar 🙏🏻🙏🏻 # 1487

  Uddhaar Kee Dagar

Kayi janmon ka bhaar lekar mai aayi
Aapne uddhaar kee dagar dikhaayi
Is kalyuga kee kadak dhoop mein, Guruji,
Aapke dar par mainey chhaaon paayi.

Kashton ke tufaan mein
Aapne dee panaah
Niraasha ke andhere mein
Aapne dikhaayee raah.

Rogon se mai beshak grast rahi
Lekin Aap sangg thei, isliye mastt rahi
Aapke diye huey dhairya se peeda sahi
Jo bhi baat mann mein thi, veh Aapse kahi.

Aapse jod kar seedhi taar
Mehsoos hua mujhe ek anokha pyaar
Aur uss pyaar par ho gaya aisa aitbaar
Ki abb na soojhe koi aur dwaar.

Shukr hai Aapka ki aaya Aapka bulaava
Yakeen hai mujhe ki mere Sarvesh aur koi nahin Hain Aapke alaawa
Guruji ke roop mein Bhagwaan Hain Aap
Deenanath karunanidhaan Hain Aap.

Aapne Apni sharan dekar mera jeevan hai sanvaara
Abb Aapke dar ko chod kar kaheen aur jaana nahin gavaara
Aap hee Hain is bhav saagar mein ek maatra sahaara
Aap hee kee kripa se mil paayega mujhe kinaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 15, 2022

Om Namaha Shivaya
Aaj Ka Suvichaar 🙏🏻🙏🏻 # 1486

Apni Sharan Mein Rakhna, Daata

Pichhla jo thaa so beet gaya
Aagey ka samaa abhi aaya nahin
Yeh pal jo abhi maujood hai
Is mein toh kar lein hum kaam sahi.

Guruji, bakhshiye aisee sumat
Ki sada shaant rahe chitt
Sada sochein sab ka hitt
Kukarma na karein sanchit.

Doobein rahein Aapke Shukrana mein
Khush rahein har pal
Maanein ki Aapki mehar ho rahi hai
Aur Aap mein vishwaas rahe atal.

Aapke kahe anusaar gupt rakhein
Paath, sewa, aur daan ko
Aapke kahe anusaar bande banein
Jaagrit rakhein apne imaan ko.

Aap hee ko samarpit ho
Hamaara har karam
Is bhavna ke sangg
Nibha paayein hum neki ka dharam.

Kuch bhi aisa na karein
Jo Aapko na lagey achcha
Aisa bhaav hoga hamaara
Toh sachcha hoga Aapka har bachcha.

Ye yug hai bhautikvaad aur badhte huey vikaar ka
Hamein sahaara mila hai Aap jaise taaranhaar ka
Vidya baney aadhaar hamaare har vichaar ka
Taaki atma kee chetna mool ho hamaare vyavhaar ka.

Aapke paas hai hum sabke karmon ka khaata
Rok lena, tok dena, agar kisee bhi paap se judne lagey hamaara naata
Abb aur koi bhi dar Aapke dar jitna nahin bhaata
Isliye kripa kar hamein sada Apni sharan mein rakhna, daata.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 14, 2022

Om Namaha Shivaya
Aaj Ka Suvichaar 🙏🏻🙏🏻 # 1485

               Shanti Kee Talaash

Har koi kisee aas mein hai
Har koi shanti kee talaash mein hai
Koi kaam chod kar shanti dhoondh raha hai
Koi kaam mein hee shanti dhoondh raha hai
Shanti ko dhoondhte huey phir raha hai har koi
Kitnon ne shanti kee khoj mein apni neend hai khoi.

Shaayad mil bhi jaati ye baahar agar ye kaheen baahar hoti
Lekin shanti baahar hai hee nahin
Jisne Guruji ke hukm ko maankar simran kiya
Usey kabhi na kabhi shanti milegi apne bheetar mein hee.

Ye Guruon ka diya upaay hai
Galat ye ho sakta nahin
Jis jis ne kiya hai simran aur dhyan
Usey hai is baat ka anumaan.

Gurbani ka amrit
Jabb jabb mann ko seenchta hai
Tabb tabb veh mann ko
Apni oar is kadar kheenchta hai
Jaise koi bichda hua meet
Jis se kayee janmon se ho ruhaani preet.

Ashanti ke marz ke liye
Amritmayi aushadhi hai Gurbani
Jis jisne iska shravan aur manan kiya
Usne Gurbani kee mahima hai jaani.

Gurbani kee mahima ka bakhaan
Itihaas mein bhi varnit hai
Kaash is amrit ka ashish har uss jann ko bhi miley
Jo aaj takk is dhan se vanchit hai.

Ve meethe bol, Guruon aur santon kee veh bani
Sach mein sanvaar deti hai zindagaani
Shanti deti hai aur duur karti hai mann kee pareshaani
Anivaarya hai ye uske liye jisne simran kee ghadiyan hain kamaani.

Simran kee ghadiyan anmol hain
Ye bhi santon ke bol hain
Inmein bahut gehraayee hai
Inkee vaddi vadiyaayee hai.

Simran se mann kee mayyl hatt jaati hai
Simran se trishna mitt jaati hai
Simran se sadgati aati hai
Simran se jaagriti aati hai.

Mann kee mayyl hatt jaane se
Trishna ke mitt jaane se
Bechayyni kumm ho jaati hai
Mann mein santushti ghar banaati hai.

Phir shanti dhoondhne kee zaroorat hee nahin
Kyunki jahaan hum hain, shanti bhi sangg hai vaheen
Shanti karegi mann mein vaas
Shanti kee sthiti mann ko na honei degi udaas.

Chalta rahega mann mein simran
Ashaant na hoga mann
Saath saath hota rahega pavitrikaran
Mann kee shanti banaayegi jeevan ko sampann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 13, 2022

Om Namaha Shivaya
Aaj Ka Suvichaar 🙏🏻🙏🏻 # 1484

Jeevan Kee Koi Bhi Andheri Raat

Guruji sada Hain tumhaare saath
Isliye jeevan kee koi bhi andheri raat
De na sakegi tumhe maat
Ye hai pakki baat.

Basharte tumhaari bhakti ho bin pratibandh
Tumhaara vishwaas ho buland
Tumhaari oar se samarpan bhi ho poora
Tumhaara Guru ke prati prem na ho adhoora.

Guruji na chodenge tumhaara haath
Chaahe jitnee bhi lambi ho jaaye raat
Ve tumhaare antar-mann ka ashvaasan banenge
Ve saath rehkar tumhaara bhayy duur karenge.

Jeevan kee andheri raat mein jo aayega tufaan
Toh Guruji khade hongei tumhaare aur tufaan ke darmiyan
Tum buss japte rehna Unka naam
Aur karte rehna apna kaam
Baaki sab Ve sambhaalenge
Ve tufaan ka rukh bhi badal daalenge.

Andhere mein agar lagi tumhe thokar ya tum gir gaye
Toh Guruji himmat denge uth kar chal paane kee
Jo tumhe theek se raasta na samajh aaya
Toh Ve sumat bakhshenge sahi disha mein jaane kee.

Agar chalte chalte tumhe gehra saagar dikha baadha ke roop mein
Toh Guruji tumhe goad mein uthaakar saagar paar karaayenge
Yeh toh chhoti chhoti baatein hain
Ve toh tumhaare liye kaal se bhi ladd jaayenge.

Is andhere mein tum dekhoge ki kaun apna hai aur kaun paraaya
Guruji tumhaara saath denge jabb chod dega tumhe tumhaara hee saaya
Guruji ko nishchit karne dena subah ke aane ka samay
Na minnat karna Unse ki subah jald aaye, na hee karna sanshay.

Andheri raat zaroor hogi khatm
Bhar jaayenge tumhaare zakhm
Kyunki Guruji lagaayenge zakhm par Apni mamta ka marham
Aur Apne ashirwaad kee aushadhi se har lenge Ve tumhaara har gumm.

Tum buss karo Unse niswaarth pyaar
Saump do Unhe poori tareh se apna bhaar
Unka naam lo aur Unhe Shukrana karo baarambaar
Ve bakhshenge tumhe shraddha aur sabr aparampaar
Apna farz nibhaate huey karo tum subah ka intazaar
Guruji zaroor karaayenge tumhaara uss subah se deedar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 12, 2022

Om Namaha Shivaya
Aaj Ka Suvichaar 🙏🏻🙏🏻 # 1483

  Samet Paayega Tu Apne Jeevan Ko

Chaahe lamha ho asha ka
Ya phir daur chal raha ho niraasha ka
Pyaare Guruji ko toh usee samay chal jaata hai pata
Beshak tu Unhe bataa ya na bataa.

Ve hee denge tujhe sanyamsheel samvedana
Ve hee denge tujhe niraasha mein bhi aagey badhne kee prerna
Ve jagaayenge tere chitt mein ummeed na rakhne kee chetna
Ve sikhaayenge tujhe tere jeevan ko sametna.

Samet paayega tu apne jeevan ko ek aise saar mein
Jiska mool taatparya hoga leen rehna Guruji ke pyaar mein
Unhee ko hoga samarpit tera har karam
Bakhoobi se nibhaa paayega phir tu insaaniyat ka dharam.

Isliye kendrit kar le jeevan ko Guruji kee bhakti mein
Ek nayee oorja aayegi teri shakti mein
Is oorja ke sanchaalak rahenge Guruji
Sada tere pratipalak rahenge Guruji.

Is nayee oorja ke prabhaav se teri soch badalti jaayegi
Asha aur niraasha kee kashmakash na tujhe sataayegi
Tu prayaas karega toh aisa lamha aayega zaroor
Jabb tu pahunchega asha aur niraasha ke chakravyuh se bahut duur.

Phir mann mein na hoga kisee ummeed ka vaas
Aur taralta ke sangg tripti ka hoga tujhe ehsaas
Pehle se bhi zyada teevra hogi Guru milan kee teri paawan pyaas
Aur Guruji ke simran ke sur se sajega tera har shwaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja