Month: March 2022

March 11, 2022

Om Namaha Shivaya
Aaj Ka Suvichaar 🙏🏻🙏🏻 # 1482

                      Nayi Zindagi

Jab jeevan mein milte Hain Guru
Ek nayi zindagi hoti hai shuru
Ek anokhi si zindagi
Jisey sajaa deti hai bandagi.

Jab Guruji ka bulaava aaya
Mera bhi naseeb jagmagaaya
Vaapis lautne ka toh thaa hee nahin koi sawaal
Kyunki Guruji ne apne ashirwaad se kar diya maalaamaal.

Diya Unhonei jeevan daan
Aur liye anek imtehaan
Har imtehaan mein Unka ashish thaa saath
Isliye har imtehaan mein mehsoos hui ye baat
Ki imtehaan jitne kathin hotey jaa rahe hain
Guruji utna hee saahasi banaa rahe Hain.

Guruji ne asal dhan ka arth samjhaaya
Kitne logon se Unhonei milvaaya
Kuch bichhad gaye, kuch reh gaye saath
Is dauran bhi sir par sada raha Guruji ka haath.

Meri aankhon par se parda hataaya
Hakeekat se mujhe waaqif karaaya
Beshak chot milee aur dil bhar aaya
Lekin in anubhavon ne atma-bal badhaaya.

Badalte gaye Ve mera nazariya
Sanvaari Unhonei jeevan kee dagariya
Ye sochne ke bajaaye ki mere saath aisa kyun ho raha hai
Mai jaan-ne lagi ki vaisa mere liye ho raha hai.

Swatantra ichcha, neeyat, ravaiye mein hastakshep kabhi nahin kiya
Jabb jabb maargdarshan maanga, kabhi bhi inkaar nahin kiya
Unkee khaamoshi aur vilamb mein chhipa hota hai koi shubh aarambh
Koi kaarya sthagit ho toh Unkee ichchavash hota hai uska prarambh.

Guruji ne Gurbani kee mahima par zor diya hai
Shabad simran ke sangg jod diya hai
Har vehem se duur karte gaye
Ahankar ko chuur karte gaye
Sewa aur satsang ka arth samjhaaya
Sewa, daan, paath ko gupt rakhna hai, Unhonei bataaya.

Apni mahima ka gungaan karaate Hain
Jis se itne karam katt jaate hain
Duur kiya hai Guruji ne har sanshay
Apni karuna se banaaya hai nirbhay.

Swaasthya aur hunar hai bakhsha
Har pal karte Hain Ve raksha
Safar mein samarpan ka mahatva dikhaaya
Shukrana ke ehsaas ko atmasaat karvaaya.

Protsaahan diya ki satya bann kar chalti jaaoon
Mehar kee ki Unke banaaye saanche mein dhalti jaaoon
Ehsaas dilaaya hai ki apna paraaya sab mithya hai
Chetna kee jaagriti hee asal vidya hai.

Samjhaaya Guruji ne ki har kisee ka safar alag hai
Kalyaan karte huey Unhonei dikhaaya ki aisa hee yeh jag hai
Har kisee ko jeevan mein hai koi kashish
Har koi kar raha kisee khwaahish ko poori karne kee koshish.

Guruji ne ehsaas dilaaya ki Unse judna hai is nayi zindagi ka saar
Is sansaar ke padaarthon aur logon mein aasakti rakhna hai bekaar
Apni taraf se nibhaani hai wafaa
Aur apni oar se nibhaana hai pyaar
Badle mein wafaa aur pyaar na miley
Toh nahin uthaane maansik, vaachik ya bhautik hathiyaar
Kyunki pyaare Guruji dekh rahe Hain sab
Vahee sabse badi baat hai kyunki Ve Hain Rabb.

Kripa karte rehna Guruji, ki mann ka bartan karti rahoon saaf
Aapki bakhshi hui is zindagi mein meri galatiyon ke liye kar deejiyega mujhe maaf
Saari sarbat par Apna anugreh banaaye rakhna, mere Daata
Dua hai ki har janam mein Aapse juda rahe mera naata.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 10, 2022

Om Namaha Shivaya
Aaj Ka Suvichaar 🙏🏻🙏🏻# 1481

          Neki Kar Kuen Mein Daal

Neki kar kuen mein daal
Is ukti mein nahin hai koi banaavat
Aisee har lokokti aur kahavat
Aashrit karti hai satya ke anubhav kee aahat.

Iska anusaran karne mein
Hamaari hee hai bhalaayee
Yahee sikhaati hai hamein
Guruji kee vadiyaayee.

Achcha kaam karein lekin na karein uske badle mein phal kee asha
‘Neki kar kuen mein daal,’ is sookti ki kuch kuch aisee hee hai paribhasha
Guruji kahein ki hamaari sewa ho nishkaam
Na intazaar karein hum ki uska kya hoga parinaam.

Kyunki Guruji sewa dwara bhi karaa rahein hain hamaare praarabdh ka bhugtaan
Is se achchaa vaise bhi kya ho sakta hai anjaam
Praarabdh chukaaye bina toh chhutkaara nahin
Aur bhakt par saara bhaar aaye, yeh pyaare Guruji ko gavara nahin.

Tabhi toh karuna ke mahasaagar Guruji
Bhakton ke karmon ka adhiktar bhaar lete Hain swayam par
Aur bilkul thoda sa bhaar bhakt ko dekar
Dete Hain bhakt ko karmon ke bhugtaan ka avsar.

Guruji sab dekh rahe Hain, ye hai sabse badi baat
Humne toh Guruji ko khush karna hai jo Hain hamaare Naath
Isliye neki kee numaish karne kee koi zaroorat hee nahin
Balki nirlipt sewa hee hai adhyaatmik unnati ke liye sahi.

Isliye na mehsoos karein bedili ya niraasha
Balki dein apne mann ko sakaraatmak dilaasa
Koi baat nahin agar koi bhi badla na chukaaye hamaare kiye ehsaan ka
Aisee ummeed karne se bhi kumm hoga avsar hamaare kalyaan ka.

Aaj ya kal yeh yathaarth hamein aayega samajh
Iske anusaran se kaafi uljhanein bhi jaayengi sulajh
Atmasaat hoga iska hamaare vichaar mein
Toh chhalkega ye hamaare vyavhaar mein.

Na rahega ye naam, na rahega ye chehra
Phir bhi sada rahega hamaari atma par Guruji ka pehra
Guruji kee mehar se karte chalein is atma ka uddhaar
Taaki kareeb aaye veh vela jabb atma ka ho Paramatama se deedar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 9, 2022

Om Namaha Shivaya
Aaj Ka Suvichaar 🙏🏻🙏🏻# 1480

               Apne Girebaan Mein

Simran karte karte
Dheeraj dharte dharte
Chalta chal, tu chalta chal.

Karte huey har subah ka Shukrana
Shraddha se sweekaarte huey har shaam ka nazraana
Chalta chal, tu chalta chal.

Rehte huey tu dhyan mein
Jhaank apne girebaan mein
Usspar chadhi hui mayyl utaar
Swasthiti mein laata chal sudhaar.

Guruji Hain tere angg sangg
Tujhpar chadha hai Unke pyaar ka rangg
Unka pyaar kar raha hai kavach ka kaam
Isee se ho raha hai teri suraksha ka intazaam.

Abb mohnidra ko tu tyaag de
Apni jagriti mein khud bhaag le
Tujhe hee karna hoga ye prayaas
Taaki tu abb aur na ho udaas.

Apne girebaan kee gehraayee mein jaakar
Guruji ke ashish se aatmabodh paakar
Tu chayyn paayega jidhar jaayega
Tu tarr kar nikhar jaayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 8, 2022

Om Namaha Shivaya
Aaj Ka Suvichaar 🙏🏻🙏🏻 # 1479

Har Veh Phool Hai Bahut Khushnaseeb

Har veh phool hai bahut khushnaseeb
Jiskee pankhudiyaan hoti hain Guruji ke charnon ke kareeb
Jal kee har uss boond ko pranaam
Jo Guruji ka ashish paakar karti hai amrit ka kaam.

Hawa ke har uss jhonke ko salaam
Jisko anugrihit karti hai Guruji kee khushboo
Kyunki Guruji beshak agochar hon
Lekin hawaa mein Unkee khushboo se sukh paati hai rooh.

Veh dhool bhi badi kismat wali hai
Jo paati hai Guruji ke charnon ka sparsh
Jabb bhi Guruji ke charan chhootey hongei dhool ko
Usey apne uddhaar par hota hoga kitna harsh.

Meri toh utnee bhi nahin hai aukat
Phir bhi pyaare Guruji ne dee hai Apne ashirwaad kee saugat
Is se kalyaankaari ho hee nahin sakti hai koi baat
Kyunki nimaani hotey huey bhi milee hai mujhe yeh dayalu daat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 7, 2022

Om Namaha Shivaya
Aaj Ka Suvichaar 🙏🏻🙏🏻# 1478

                    Aabhooshit

Hriday mein jalaaye huey Guruji ke naam ka deep
Unkee mehar se dekha mainey bahut hee sundar sundar dveep
Dekhi saagar kee lehron mein tarang
Dekha akash ka gerua sa rangg
Baith gayi mai saagar ke kinaare
Dekhne prakriti ke khoobsoorat nazaare.

Lehron ne sundar geet sunaaya
Sooraj dhalne ko aaya
Ret kee thandak ne pairon ko chhua
Mann ko shaanti ka anubhav hua.

Khaamoshi si thi lekin na thi tanhaayi
Guruji kee maujoodagi kann kann mein thi samaayi
Hawaa thi itnee suhaani
Dil mein soch thi ruhaani
Bheeni bheeni si khushboo
Jis se gadd gadd ho gayi thi meri rooh.

Sab panchhi apne ghonsalon kee oar udne lagey
Baadal bhi disha badal kar doosri oar mudne lagey
Chaand aur taaron ka swaagat kiya akash ne
Chandd pehron ke liye avakaash liya sooraj ke prakash ne.

Mai bhi Guruji ka naam lete lete pahunchi ghar par
Shukrana kiya Guruji ka, ki mila mujhe saagar ke kinaare par samay bitaane ka avsar
Paakar itne ruhaani anubhav ka khazaana
Aabhooshit hua jeevan ke ek aur pehlu ka afsaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 6, 2022

Om Namaha Shivaya
Aaj Ka Suvichaar 🙏🏻🙏🏻 # 1477

Nadar Mere Guruji Kee Vadiyaayee Kee

Paheliyon se bharaa yeh jeevan ajab matvaala hai
Na jaanoon mai, ki agley pal kya honei wala hai
Magar itna zaroor jaanoon ki shukr hai, mera Guru mera rakhwala hai
Aaj takk bhi toh sab kuch Guruji ne hee sambhaala hai.

Anek varshon ke liye toh thaa hee nahin mujhe Unkee mahima ka gyan
Ve hee Hain Guru aur Ve hee Bhagwaan, na thaa mujhe is satya ka anumaan
Lekin Unhonei mehar kee aur yeh raaz samjhaaya
Tabb se jeevan mein ek anokha santulan aaya.

Ve har pal Hain mere antar mann mein
Unkee kripa se jaan gayi aur maan gayi
Jaisa bhi din beete, ye yakeen hai
Ki agley din kee subah hogi nayi.

Har nayi subah laayegi naya utsah
Jis se oorjit hogi jeene kee raah
Jis par chalte huey badhti rahegi simran aur manan kee chaah
Jinke dwara Guruji kee mehar se bachoongi honei se gumraah.

Guruji kee ichcha se kuch paheliyaan boojh paaoongi
Guruji kee daya se apne bheetar se aur bhi waaqif ho paaoongi
Unkee dee hui har daat ka shukr manaaoongi
Unkee kripa se Unke padd chinh par chalti jaaoongi

Na akash kee aseemta kee bandish hogi
Na hee saagar kee gehraayee kee
Kyunki meri zindagi kee har paheli aur har pehlu par
Nadar hogi mere Guruji kee vadiyaayee kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 5, 2022

Om Namaha Shivaya
Aaj Ka Suvichaar 🙏🏻🙏🏻 # 1476

Mere Kadmon Kee Kahaani

Na bandh kar kisee kasam se
Na bandh kar kisee rasm se
Chali aaoon apne har kadam se
Adhyatmik manzil ke aur bhi kareeb.

Is kahaani mein Guruji yakeenan Hain angg sangg
Varna is kahaani ka itna chaarul na hota rangg
Bheetar bhi Guruji, saath mein bhi Ve
Toh phir kaahe ka bhayy?

Ye kadam hon neevenpann ke
Ye kadam hon hriday ke bachpan ke
In kadmon mein shraddha kee bediyaan hon jo sajee hon prem bhaav se
Jinhe pehen kar mai chali aaoon bade chaav se.

In kadmon mein samaayi ho insaaniyat
Ruhaaniyat ho inkee oorja
Ye kadam ruk kar girey huon kee madad karein
Aur raaste kee kisee chunauti se na darein.

Ye kadam layy mein hon meri saanson ke saath
Taaki ye saanson mein basey simran ke sangg chalein
In kadmon ko Guruji Apne hukm se chalaayein
Taaki raasta tayy karte karte mere kasht talein.

Zindagi kee pahadiyon aur vaadiyon ke beech se mujhe aagey badhaayein ye kadam
Guruji kee mehar se inka utsaah badhta rahe jabb takk safar na ho khatam
Karte rahein ye Guruji ke dikhaaye raaste ka anusaran
Kalyuga kee daldal mein phansne aur dhasne se bache rahein har kshan.

Na baandh sakey in kadmon ko vehem ya andhvishwaas kee zanjeer
Guruji kee kripa se ye na toh dagmagaayein aur na hee hon ye kabhi adheer
Kisee aur ka raasta na kaatein, buss Guruji mein magn hokar apne raaste par chalte jaayein
Aur Maalik kee razamandi se Unke sangg milan kee manzil takk pahunch paayein.

Aisee ho mere kadmon kee kahaani
Jiske sangg chale meri zindagi kee zubaani
Banee rahe is kahaani par Guruji kee meharbaani
Chaa jaaye is kahaani par Unkee noor-e-nishaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 4, 2022

Om Namaha Shivaya
Aaj Ka Suvichaar 🙏🏻🙏🏻 # 1475

                Mere Kirdaar Mein

Mere pyaare Guruji,

Shukrana Aapka ki Aap basey Hain mere dil mein
Basey Hain Aap Apne har swaroop aur darbaar mein
Aisee mehar banaaye rakhna mere daata
Ki basey rehna har pal mere kirdaar mein.

Meri chetna par sadaa rahe Aapka pehra
Aapki bhakti mein mera bhaav hota jaaye gehra
Aapki prerna se sahi raah par chalein mere kadam
Aapko paane kee abhilaasha mein ramm jaaye mera har karam.

Koi galat faisla lene lagoon toh kripa kar rok lena mujhe
Kuch bhi Aapke hukm ke khilaaf karoon toh kripa kar ke tok dena mujhe
Rakhna mujhe leen Aap Apne simran aur dhyan mein
Aisee sumat bakhshna ki mera har kaarya ho Aapke sammaan mein.

Honhaari se le paaoon Aapka diya har imtehaan
Apni kisee khaami se na rahoon anjaan
Aapki bakhshi hui himmat se mai kaam karoon apni har kamzori par
Apne antar-mann kee mayyl dho paaoon aur Aapki mehar se jaaoon tarr.

Jo jo farz adaa karne hain Aapki dee hui is zindagi mein
Unn sabko nibhaaoon mai, rehte huey Aapki bandagi mein
Aapki karuna se nirmal aur komal ho mera kirdaar
Aur uske har pehlu mein Aapka vaas ho, mere pyaare Parwardigaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 3, 2022

Om Namaha Shivaya
Aaj Ka Suvichaar 🙏🏻🙏🏻 # 1474

                     Safar Kee Bel

Tu himmat na haar
Beshak manzil hai uss paar
Tu zaroor pahunchega manzil takk
Ismein nahin hai koi bhi shak.

Mann mein Guru naam kee jyot jalaakar
Guruji ka tu shukr manaakar
Chalta chal, chaahe anginat sooraj jaayein dhal
Tu Guruji ka bachcha hai, Ve de rahein Hain tujhe atma-bal.

Na tu hichkichaa, na tu ghabraa
Tere Guruji Hain Brahmaand ke Shehenshah
Niraasha se tu matt murjhaa
Guruji ka naam lete huey chalta jaa.

Yeh safar toh oordhvagati ke patton kee bel hai
Jiska anjaam atma se Paramatama ka mel hai.
Tu samajh le is raaz ko aur chalta chal
Bel ka poshan kar tu, daal kar usmein shuddh bhaav ka jal
Guruji ke naam se prem kee maati ko tarne de
Apne safar kee bel ko oordhvagati ke patton se sajne de.

Yeh bel patjhad mein bhi rahegi Guruji ke bhakti ke rangg se hari
Yeh bel Guru kripa aur teri mehnat se rahegi patton se bhari
Bandagi ke sundar suman sajenge is par
Satchittanand ke phal lagenge is par.

Mehek jaayega tera safar
Guruji kee khushboo se is kadar
Ki uss mehek se tu tarr jaayega
Aur tera safar sajj sanvar jaayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

March 2, 2022

Om Namaha Shivaya
Aaj Ka Suvichaar 🙏🏻🙏🏻 # 1473

Agley Varsh Kee MahaShivratri Par

Kal thaa MahaShivratri ka tyohaar
Adhyatmikta aur chetna hai jiska saar
Beshak is varsh kee MahaShivratri gayi hai beet
Kyun na hum nibhaate rahein iske saar kee praapti kee reet.

Guruji se karein anurodh
Ki kabhi na aaye kisee ke mann mein pratishodh
Badhta rahe saamanjasya
Kumm hota jaaye aalasya.

Aalasya, Guruji ka simran karne ka
Aalasya, Unke dikhaaye maarg par chalne ka
Aalasya, atma-sudhaar kee oar badhne ka
Aalasya, Unke kahe anusaar banda bann-ne ka.

Guruji kee dee hui shuddhi aur subuddhi se
Hum apne aur doojon ke jeevan ko behtar banaayein
Guruji kee maujoodagi ke protsaahan se
Koshish karein ki aadhyaatmikta mein aagey badh paayein.

Simran aur dhyan se mann kee mayyl ko karein saaf
Khud ko aur doojon ko hum kar dein maaf
Kumm hota jaaye vikaaron ka bhaar
Insaaniyat ka farz nibhaate huey karte jaayein paropkaar.

Ek varsh se bhi kumm bachaa hai samay
Aglee MahaShivratri ke aane mein
Isliye apne vishwaas mein na laayein koi sanshay
Na vyast rahein bahaane banaane mein.

Aaj se hee, balki abhi, isee kshan se
Ruhaani raaste par mehnat karein lagan se
Shukrana karein Guruji ko mann se
Aur sampann hon Guruji ke ashirwaad ke dhan se.

Agley varsh kee MahaShivratri par
Aaj se ooncha ho hamaara adhyatmik starr
Mann mein na rahe koi duvidha ya darr
Ruhaaniyat ke path par ho rahe hon hum agrasar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja