Month: April 2022

April 20, 2022

Om Namaha Shivaya
Aaj Ka Suvichaar 🙏🏻🙏🏻 # 1522

Tumhaara Aane Wala Kal

Dard ka bhi hota hai apna andaaz
Lekin har koi na jaan sakey iska raaz
Dard ko meet banaana padta hai aksar
Jabb takk uske bin rehne ka milta nahin hai avsar.

Shaayad nahin hai aur koi chaara
Lekin koi tumhe kahe bechaara
Aisa kabhi na honei dena tum
Varna atmataras mein honei lagoge gumm.

Atmataras toh khud hee ek roag hai
Yeh roag na honei dena swayam ko
Bhayankar hai yeh roag
Udaas aur na-shukr banaa dega yeh tum ko.

Pichhle karmon ke liye dard sehna padta hai
Ye soch ke seh lo ki yeh samaa bhi guzar jaayega
Khushi khushi seh lo toh thoda aasaan lagega
Lekin har aah ko ginoge toh bechayyn hokar tumhaara chitt har raat jagega.

Atmataras se behtar hai dard mein rehna
Kyunki dard ko sada na hoga sehna
Guruji kee mehar se dard ka hoga antt zaroor
Lekin atmataras poori zindagi mehsoos karaayega tumhe
majboor.

Guruji ne baah thaami hai tumhaari
Duur hoga dard, duur hogi beemari
Dheeraj rakho, rakho vishwaas
Guruji mitaayenge har traas.

Yakeen rakho, Guruji badhaate rahenge tumhaara manobal
Har dukh, har dard samay ke saath jaayega tal
Guruji kee mehar se milega tumhe har mushkil ka hal
Aaj se behtar hee hoga tumhaara aane wala kal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 19, 2022

Om Namaha Shivaya
Aaj Ka Suvichaar 🙏🏻🙏🏻 # 1521

         Rehmatein Barasne Lagin

Kar rahi thi Ishwar kee rehmat ka intazaar
Phir jaana ki Ve Guruji ke roop mein aaye abb kee baar
Le liya jabb se Guruji ne sharan mein
Rehmatein barasne lagin jeevan mein.

Kaheen aur se mila nahin itna pyaar
Guruji ne kar dee itne pyaar kee bauchhaar
Guruji, Jinke kalyaan Hain aparampaar
Jinkee mahima gaata rahega ye sansaar.

Samajh na aaye ki Unke pyaar ko rehmat kahoon
Ya phir kahoon mai Unkee rehmat ko pyaar
Jis bhi tareh se dekhoon, hoon mai itnee shukraguzaar
Guruji ke Hain mujh par anginat upkaar.

Nirogi kaya aur jeevan daan
Ye Unke liye karna hai aasaan kaam
Kyun chhoti chhoti baaton ke liye
Hum karte hain Unhe pareshaan?

Vo sehenshakti, veh atma-bal
Jis se kitnee duvidhaaein jaati hain tal
Veh vishwaas, veh samarpan
Ye sab bhi Unhee se paata hai mann.

Poore parivaar ka rakhte Hain khayal
Bann kar suraksha kee divya dhaal
Bakhshte Hain daat Sewa Simran Satsang kee
Oorja dete Hain ek alag hee dhangg kee.

Guruji mein basaa swayam Ishwar hai
Aur insaan ka shareer toh nashwar hai
Is janam mein jo shareer mila hai
Usne ho jaana nasht hai
Lekin antaratma ka safar chalta rahega
Yeh satya toh spasht hai.

Isliye Guruji hamaari antaratma ko sanvaarein
Taaki hum apne har janam kee yatra sudhaarein
Kyunki tabb hee aayega veh haseen lamha
Jabb antaratma Paramatma mein jaayegi samaa.

Guruji toh pooran Guru Hain
Bhakt tarr jaate Hain Unke vandan se
Mukt karte Hain bhakton ko
Janam maran ke bandhan se.

Aisa Guru mila ho jisko
Uske jeevan mein rehmaton kee kamee nahin
Bin maange hee Guruji karte Hain
Jo bhi bhakt ke liye hota hai sahi.

Guruji kee rehmaton ka bakhaan
Shaayad na kar paaye koi bhi insaan
Kyunki Jo Guru sanvaar sakta hai yahaan aur vahaan
Uskee mahima kee toh anant hai dastaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 18, 2022

Om Namaha Shivaya
Aaj Ka Suvichaar 🙏🏻🙏🏻 # 1520

            Atmasaakshaatkaar

Veh shakhs, jisey tu milta hai har din
Veh jo har pal tere sangg vidyamaan hai
Veh jo dikhta hai tujhe darpan mein bhi
Abb toh boojhna aasaan hai.

Veh tu hee hai, nahin koi aur
Isliye swayam par kar le gaur
Dekh liya bahut toone doojon kee oar
Abb apni chetna se tu naata jod.

Teri chetna kar rahi hai intazaar
Ki tu uss se kar le baatein do chaar
Sun bhi le, jo veh tujhe hai kehti
Kyunki veh tere liye bahut kuch hai sehti.

Guruji moh maya kee nidra se
Teri chetna ko jagaa rahe Hain
Taaki tu kar paaye atmasaakshaatkaar
Is se pehle ki mrityu tujh par kar de vaar.

Chetna ko pehchaan
Guruji kee baat maan
Na reh swayam se anjaan
Vyarth mein na ganvaa apne praan.

Tu kar simran aur dhyan
Taaki duur ho jaaye agyan
Aur yeh satya le tu jaan
Ki tere bheetar Hain Bhagwaan.

Mann mein na koi vichaar na koi vikaar
Aise mein hoga atmasaakshaatkaar
Pehle pehle kuch lamhon ke hee liye hoga aisa
Phir nirantar prayaas se antakaran hoga vaisa
Jaisa hota hai uss advait chirkaal sthiti mein
Chaahe parivartan bhi ho jaaye jeevan kee paristhiti mein.

Guruji karna chaahte Hain tera uddhaar
Ve mitaana chaahte Hain tere bheetar ka andhkaar
Ve le jaana chaahte Hain tujhe tere mann ke paar
Isliye jaagrit chetna mein sthit hokar kar le tu atmasaakshaatkaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 17, 2022

Om Namaha Shivaya
Aaj Ka Suvichaar 🙏🏻🙏🏻 # 1519

     Ye Simran Ka Mahasaagar Hai

Ye simran ka mahasaagar hai
Tu bhi dubki le le ismein
Simran ka ye jo saleeqa hai
Yeh nishchay hee tarne ka tareeka hai.

Simran kee anek dubkiyan lete huey
Antakaran ko Gurbani ka poshan dete huey
Tere mann kee mayyl dhul jaayegi
Teri ‘mai’ narm hotey hotey ghul jaayegi.

Doob jaayega tu is mahasaagar mein
Toh veh hogi teri khushnaseebi
Kyunki doob kar jo dhan milega tujhe
Uss se mitt jaayegi teri adhyatmik gareebi.

Tujhe praapt hoga dhan dhyan ka
Dhan, adhyatmik gyan ka
Dhan Guruji ke naam ka
Dhan amrit kee khan ka.

Mahasaagar kee ek ek boond hai amrit ke samaan mahaan
Anginat logon ka hua hai is amrit ke paan se kalyaan
Mahasaagar kee vadiyaayee ko tu le pehchaan
Aur is asal dhan ko paakar tu bann ja sahi mainey mein dhanwaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 16, 2022

Om Namaha Shivaya
Aaj Ka Suvichaar 🙏🏻🙏🏻 # 1518

                Jap Le Guruji Ka Naam

Jap le jap le Guruji ka naam
Aur kuch nahin aayega kaam
Aur samay na abb tu ganvaa
Guru naam hai har marz kee davaa.

Yama ke koap se dar jaa bande
Naam ke jap se tar jaa bande
Naam hee tujhe sudhaarega
Naam tera ye jeevan sanvaarega
Naam hee bhavishya nikhaarega
Bhav saagar ke paar utaarega.

Naam Guruji ka roop hai
Unkee shakti ka swaroop hai
Akhand hai, anoop hai
Sharad ritu kee meethi dhoop hai.

Naam yoon jap ki teri avastha aisee bann jaaye
Ki tera roam roam naam mein ramm jaaye
Jo bhakt naam ka divya dhan paaye
Nakaratmakta uske paas rehne na paaye.

Naam se shuddh ho jaata hai spandan
Naam se poorna ho paata hai vandan
Naam kee khushboo mein hai divyata ka chandan
Naam japte japte tar jaayega tera mann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 15, 2022

Om Namaha Shivaya
Aaj Ka Suvichaar 🙏🏻🙏🏻 # 1517

     Zindagi Ke Is Safar Ko Salaam

Zindagi ke is safar ko salaam
Jismein hum japp paa rahein hain Guruji ka naam
Na jaane kal is safar ka kya hoga anjaam
Lekin apni oar se koshish karna hai hamaara kaam.

Koshish, ki kabhi na bhoolein Guruji ka naam
Kyunki Unke naam mein hai hamaare mangal ka paigaam
Isliye chitt mein samaaye Unka naam subah shaam
Is naam ko japne se awashya pahunchenge hum sachkhand ke dham.

Guru naam ko japne kee koshish ho nek
Taaki chaahe aayein is safar mein chunautiyan anek
Banee rahe hamaari shraddha aur saboori
Aur ek pal ke liye bhi na ho Guruji se doori.

Zindagi ka safar hee hai manzil takk pahunchne ka raasta
Is safar mein sajaaye rakhein mann mein aastha
Is safar mein Guruji ke naam ka pehne rahein hum sehra
Kyunki kuch bhi aur nahin hai is se sundar aur sunehra
Safar ke har kadam par saath hoga is sehre ka pehra
Is pehre ka mahatva hai bahut gehra.

Kyunki ye pehra bachaayega hamein anginat kashton se
Ye pehra bachaayega agyan se
Ye pehra atma aur Paramatama ke milan kee dega prerna
Ye pehra kavach banega har tufaan mein.

Hum karte hain jis safar ko salaam
Veh safar karega Guru naam ko pranaam
Safar ka har mukaam jo hoga naam ka gulam
Toh kalyanakari hee hoga safar ka parinaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 14, 2022

Om Namaha Shivaya
Aaj Ka Suvichaar 🙏🏻🙏🏻 # 1516

                 Is Rishte Kee Jyot

Poojya Guruji, mere janam janam ke saathi
Aapki mahima ke jo bhi geet mai gaati
Aapki mehar se mai har alfaaz ko yoon mehsoos kar paati
Jaise kayee janmon se is rishte kee jyot hai jagmagaati.

Aapse judne ke baad
Jeevan ka naya arth ho gaya
Ya phir mai yoon kahoon
Ki mera naya janam ho gaya.

Aapke sangg jud gaya jeevan ke geet ka saar
Aapki mehar se har sukh dukh hua sweekaar
Aapke ashirwaad se hee Aapka naam le sakti hoon baar baar
Aapke bharose beet jaayenge jeevan ke ye din do chaar.

Aapne hee diya yeh jeevan
Aapne dee bharose kee daat
Aapne yoon jeet liya mera mann
Ki na chupana chaahoon Aapse koi bhi baat.

Yoon hee chalti rahoon Aapke aanchal mein rehkar surakshit
Jo bhi ho jaaye, Aap sada chaahenge mera hitt
Isee satya se santusht hai mera chitt
Aur har duvidha gayi hai mitt.

Is rishte kee jyot sada jalti rahe
Yeh yatra Aapki anukampa se falti rahe
Shukrana kee avastha mein rahoon sada
Har pal Aapka chintan karne kee aa jaaye ada.

Kabhi Apne se duur na honei dena, pyaare Parwardigaar
Hameshaan mehsoos karti rahoon Aapka aabhaar
Aapki kripa se laati rahoon khud mein sudhaar
Har janam mein mai Aapke charnon mein rahoon, mere sarkar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 13, 2022

Om Namaha Shivaya
Aaj Ka Suvichaar 🙏🏻🙏🏻 # 1515

        Aaya Baisakhi Ka Tyohaar

Aaya Baisakhi ka tyohaar
Sabko shubhkaamnaayein beshumaar
Sarbansdaani Guru Gobind Singh ji kee qurbani banee hai yaadgaar
Unke jeevan se prerna lekar hum bhi lein apna jeevan sudhaar.

Dashmesh pita ‘Kalgidhar’ wale
Jinhonei sangat ke kaaj sanvaare
Veerta ke Ve Hain prateek
Jalaaye chetna ke deep.

Adviteeya maane jaate Hain Ve balidaani paramparaa mein
Koi virla hee hota hai Unke jaisa pratibhavaan is vasundhara mein
Lekhak bhi thei, thei anek bhaashaaon ke gyani
Neeven thei, saahasi thei, aur thei Ve swaabhimaani.

1699 mein Shri Guru Gobind Singh ne sangat ke liye imtehaan
Jo sheesh bhent karne ke liye tayyaar huey, unhe diya Panj Pyaaron ka naam
Sikhon ke in dusvein Guru ne tabb Khalsa panth ko kiya shuru
Aur mahasamadhi lene se pehle Unhonei Guru Granth Sahib ji ko ghoshit kiya Guru.

Mughal sena ke saath ladey Ve anek yuddh
Gareebon ke prati Unke bhaav thei bahut shuddh
Maanav jaati ke liye Unhonei apna poora parivaar vaara
Isliye hee toh sabne Unhe ‘sarbansdaani’ naam se pukaara.

Sada diya sandesh bhaaichaare aur pyaar ka
Nishchay hee roop thei Ve nirankaar ka
1708 mein Guru Gobind Singh ji huey divya jyot mein vileen
Lekin Unke prati sangat ka bhakti bhaav kabhi na hua ksheen.

Aayiye karein is nav varsh ka abhinandan
Karte rahein apne Guruon ka vandan
Dua karein ki changi ho kheton mein fasal
Aur changey hon hamaare karam, taaki achche hon phal.

Sansaar ke mangal kee karein kaamna
Har chunauti ka karein saahas aur sachchaayee se saamna
Guruji sada Hain hum sabke sangg
Chadhne dein hum swayam par Unka rangg.

Mann ke paatra ko shuddh karein amrit roopi Gurbani se
Seekhein neki se jeena Guruon kee zindagaani se
Guruji bakhshein hamein hamaari galatiyon ke liye
Guruji kalyaan karein aur jalaaye rakhein mehar ke diye.

Guruji se hum jude rahein
Saadh sangat ke sangg rahein
Gupt sewa, paath, aur daan karein
Sachchaayee se kabhi na darein.

Baisakhi ke tyohaar par kar lein swayam se vaada
Ki insaaniyat ka dharam nibhaayenge pehle se bhi zyada
Sadaa rahein Guruji ke shukraguzaar
Unkee kripa se hee manaa paate hain hum har tyohaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 12, 2022

Om Namaha Shivaya
Aaj Ka Suvichaar 🙏🏻🙏🏻 # 1514

    Fakeer Ka Safar

Wafa ne kee bewafaai
Bewafaai ne nibhaayee apni haisiyat kee wafa
Parchhaayee ke alaawa kuch bhi na raha
Andhere mein parchhaayee ne bhi saath chod diya.

Chhaa gaya sannaata, kuch nahin aa raha thaa nazar
Maalum na chal raha thaa kahaan le jaayegi dagar
Uss chuppi ka thaa ek adbhut andaaz
Lekin fakeer samajh na paa raha tha yeh raaz.

Phir usee andhere mein ek jyot dikhee
Mann mein ummeed kee tarang uthi
Fakeer ke kadam le chale usey jyot ke paas
Ya kahoon ki jyot ne kheench liya usey apne paas.

Jyot mein aisa anokha thaa spandan
Ki fakeer karne lagaa vahaan vandan
Usey mehsoos hui apne paas ek shakti
Lagaa usey ki anugrihit hui uskee bhakti.

Aankhein moond kar khada raha
Prem bhaav mein uska aansoon baha
Kisee ne haath rakha fakeer ke sir par
Usey lagaa ki usey mila santosh ka var.

Aankhein kholi fakeer ne hokar hairaan
Dikhey apne saamne usey Guruji meharbaan
Chehre par noor, Unke hothon par mandd muskaan
Roop itna khoobsoorat, aur niraali thi Unkee shan.

Fakeer ne Guruji ke charnon mein kiya naman
Guruji ne diya usey charan sewa ka mauka
Fakeer kee hairaani kee seema na rahi
Jabb kuch der ke baad Guruji ne usey roka.

Kyunki jaise hee Guruji ne usey rukne ka diya aadesh
Fakeer ko lagaa jaise geele thei uske haath
Ruhaani khushboo thi uss geelepann mein
Fakeer sochne lagaa mann hee mann mein.

Chua usne Guruji ke charnon ko
Toh usey mehsoos hua vahee geelapann
Vahee khushboo phir se aayi fakeer ko
Usey lagaa ye sab thaa uska deewanapan.

Usne chakhaa usey Guruji ke kehne par
Uskee toh nayn aaye bhar
Samajh aaya usey ki veh geelapann darasal thaa amrit
Aur bhaav-vibhor ho gaya uska chitt.

Amrit ke paawan sparsh se aisa kuch honei lagaa
Ki veh ek hee saath hansne aur ronei lagaa
Guruji toh jaante thei uskee shraddha ke bhaav ko
Unhonei Apne prem ke marham se bhar diya uske mann ke ghaav ko.

Guruji ne fakeer ke kandhe par rakha Apna haath
Kaha Unhonei fakeer se ki Ve har pal rahenge uske saath
Dekhte dekhte Guruji ho gaye antardhaan
Aur fakeer ka gaya divya jyot par dhyan.

Jyot hui sooraj se bhi adhik ujjwal
Aur saaf nazar aane lagi dagar
Jaan kar ki Guruji Hain uske humsafar
Fakeer ka safar toh ho gaya safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

April 11, 2022

Om Namaha Shivaya
Aaj Ka Suvichaar 🙏🏻🙏🏻 # 1513

                    Tu Kar Simran

Duur se aayi kisee kee awaaz
Ki zindagi aa nahin rahi raas
Guruji ne kaha, tu kar simran
Taaki tript ho jaaye tera mann.

Ek oar sunaayi diya kolahal
Kyunki mann mein thi halchal
Guruji ne kaha, tu kar simran
Shant ho jaayega tera mann.

Dooji oar se aayi yeh pukaar
Ki dukhi kar raha hai yeh sansaar
Guruji ne kaha, tu kar simran
Sukhi ho jaayega tera mann.

Phir kisee ne kee ardaas
Madad karo, mai hoon bahut udaas
Guruji ne kaha, tu kar simran
Prassann ho jaayega tera mann.

Ek bhakt ne zaahir kee abhilasha
Ki kripa kar mita do meri niraasha
Guruji ne kaha, tu kar simran
Ashavaan ho jaayega tera mann.

Ek shishya ne vyakt kiya santaap
Kaha ki mainey kiye hain bahut se paap
Guruji ne kaha, tu kar simran
Pashchaataap aur praayashchit karega tera mann.

Ek roagi ne kaha mujhe hona hai tann mann se niroag
Mujhe seekhna hai yog
Guruji ne kaha, tu kar simran
Yog kee oar jaayega tera mann.

Ek chele ne kaha mujhe ban-na hai maanav
Abb takk mai aise jeeya jaise hoon daanav
Guruji ne kaha, tu kar simran
Tujhe banda banaayega tera mann.

Ek anuyaayi aaya Guruji ke paas
Kaha usne ki usey karna hai nek bhog vilaas
Guruji ne kaha, tu kar simran
Aish karaayega tujhe tera mann.

Ek sewak ko hui chinta ki ho na jaaye usey ahankaar
Kaha usne ki mujhe neevan rakhna mere sarkar
Guruji ne kaha, tu kar simran
Neevanpann sikhaata rahega tujhe tera mann.

Ek shraddhaalu aaya Guruji ke dar par
Dhoondhte huey bakhshe jaane ka avsar
Guruji ne kaha, tu kar simran
Maafi milne ke yogya ho jaayega tera mann.

Ek tapasvi aaya lekar apne jazbaat
Kaha usne ki mai karna chaahta hoon dhanyawaad
Guruji ne kaha, tu kar simran
Shukrana se sajta jaayega tera mann.

Ek sangat aayi Guruji ke kareeb
Kaha usne ki rakhiye mujhe sada Apne kareeb
Guruji ne kaha, tu kar simran
Mujhse juda rahega tera mann.

Guruji ne diya hai simran ka anmol upaay
Yeh upaay hai har paristhiti mein sahaay
Simran karte karte dhyan lagne lagg jaaye
Ekaagrataa ho aur chetna jagg jaaye.

Rahein hum Guruji ke shukraguzaar
Ki hamein dee Unhonei daat simran kee
Unkee mehar se karte rahein simran
Hum hain kinkar, simran hai divya dhan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja