Zubaan par na aa paaye arzi Toh bhi na karna tum fikr Guruji toh jaanein tumhaare dil kee baat Chaahe Ve na karein is satya ka zikr.
Guruji toh Hain antaryaami Hum hain sangat nimaani Lekin tumhaari arzi se kaheen zyada mahatva rakhta hai tumhaara kalyaan Aur Guruji kabhi na chaahenge ki Unke bhakt ka bigad jaaye kaam.
Tabhi toh Ve kehte Hain ki bhakt zidd na karey Varna Unhe uske abheesht kee karni padegi poorti Is se Guruji ko na hogi prassannataa Kyunki uss abheesht mein zaroori nahin hai ki hogi bhakt kee sampannataa.
Guruji kee vaddi hai vadiyaayee Aur samarpan mein hai hamaari bhalaayee Yeh tathya hai seedha aur bilkul suljhaa hua Buss, mann hee hai jo hai uljhaa hua.
Uljhe huey mann ko suljhaayega Guruji ka simran Simran se duur ho jaayegi mann kee har uljhan Maangne ke bajaaye maan-ne lagg jaayega mann Aur fikr ke bajaaye shukr se saj jaayega jeevan.
Mann ke andar hai veh dar Jiskee tumhe hai talaash Mann ke andar hai veh mandir Jisey tum dhoondhte ho baahar apne aaspaas.
Mandir hai tumhaare mann ka dar Vaheen par hai tumhaare Bhagwaan ka ghar Kyunki jabb takk na ho tumhaare mann mein Unka vaas Tabb takk nahin mitt sakti tumhaari traas.
Lekin vaas ho sakta hai ek ka hee vahaan Isliye ya toh tum reh sakte ho ya reh sakte Hain Bhagwaan Isliye apni ‘mai’ ko tumhe hoga mitaana Agar mann ko banaana hai Prabhu ka ashiyaana.
Guru Govind se milaaye Isliye jabb bhakt Guru kee mahima gaaye Toh Prabhu bhi prassann ho jaaye Guru mein hee Prabhu kee chhavi samaaye.
Guruji kehte Hain Unke dar par ‘mai’ ka koi kaam nahin Kyunki ‘mai’ mitegi, toh hee mann mein Guruji bass paayenge Varna jitna bhi lagg raha ho tumhe ki tum kar rahe ho sab sahi Is ‘mai’ se upjey huey vichaar tumhaare mann par anuchit asar kar jaayenge.
Is ‘mai’ ko tyaagna hee hai achchaa Agar bann-na hai Guruji ka achcha bachcha ‘Mai’ se jabb khaali ho jaayega mann Guruji karenge vahaan sanatan vaas Mann ka dar sahi mainey mein banega mandir Sabse khaas hoga tumhaare liye veh ehsaas.
Kyunki Guruji hongei kewal saath nahin Balki basenge tumhaare bheetar Unkee maujoodagi se sada ujjwal hoga tumhaara mann mandir Tum prem bhaav se Guruji ka vandan karna Aur karte rehna Unka dhanyawaad Ve har pal tumhaari raksha karte huey Dete rahenge tumhe ashirwaad.
Khushkismati ka veh pal aaya bhakt ke jeevan mein Jabb Guruji ne liya usey Apni sharan mein Bhakt ko ho gaya Guruji se behad pyaar Aur Guruji usey dene lagey beintehaa dulaar.
Bhakt ne jaana ki antaryaami Hain Ve Bin bhakton ke boley hee jaan jaayein Aur Unke bhakt jann Unkee dee hui daat paayein.
Hasraton se keh diya uss bhakt ne Ki ve usey na sataayein Usne kaha, “Mere pyaare Guruji Jaante Hain tumhe.”
Keh diya usne ki agar ve laa rahi hongi uske liye kalyaan ka sandesh Toh Guruji swayam hee unkee poorti ka karaayenge uske jeevan mein pravesh Aur agar Guruji ko ve bhakt ke liye na lagin sahi Phir toh unhe vaise hee uske jeevan mein aane ka koi matlab hee nahin.
Hasraton ne keh diya bhakt ke mann se Ki ve chod rahi hain uska dar Lekin mann ko samjhaana kahaan hota hai aasaan Veh baat maan lene se jaata thaa mukar.
Guruji ka simran banaa mann kee aushadhi Sanyam mein aana seekhne lagaa mann Idhar udhar ke khayaalon se khud hee sambhalne lagaa Guruji ka shukriya ki Unhonei kiya rehem.
Abb hasratein hawaa kee bhanti paas se guzar jaati hain Lekin bhakt ke mann mein ghar nahin banaati hain Unhonei mann se darna chod diya hai Aur mann ne simran se swayam ko jod liya hai.
Abb toh bhakt chal chuka hai samarpan kee oar Apna kartavya nibhaate huey baaki sab usne Guruji par diya hai chod Guruji ne simran dwara suljhaa diya uska mann Bhakt ne Unhe shukrana karte rehne ka kiya hai prann.
Guruji se pyaar aur Unka simran Guruji ko shukrana aur Unhe samarpan Ye sab Unke bhakton ke liye hai divya dhan Is se safal hota hai bhakt ka jeevan aur vandan.
Vriksh na karey bhed bhaav Sabhi ke liye deta hai phal aur chhaaon Baadal barasne se pehle na poochhe Hai ye kaunsa desh ya gaaon Veh barsey bin pakshpaat Aur ho jaaye barsaat.
Koi phal apne liye na raakhe Taruvar hai itna dayalu Koi boond se apni pyaas na bujhaaye Baadal hai itna kripalu.
Aur jo maalik Hain Srishti ke Vriksh aur baadal hain mohtaaj Jinkee drishti ke Ve har uss jann ko dein ashirwaad Jo Unkee sharan mein hai aata Tabhi toh dekhte dekhte Bhakton ka lekha badal hai jaata.
Guruji Apne har bhakt par Vrishti karte Hain Apne ashirwaad kee Har bhakt kisee na kisee tareh se anubhav karta hai Leela Unke paawan prasad kee.
Taruvar ka har phal ek sa nahin hota Kuch kadve, kuch khatte, kuch hotey hain meethe Guru aur Govind ka har bhakt bhi ek sa nahin hota Kuch seedhi raah par bhi tedhe chalte hain aur kuch chalte hain seedhe.
Sabhi kee hai anokhi praathamikta aur pasand Sabhi ka safar alag hai Har tareh ke phal hain hotey Har tareh ke insaanon se bharaa ye jagg hai.
Guruji sabse kripalu baadal Hain Aur sabse neeven aur paawan taruvar Insaaniyat aur sadhusheelta sikhaane Bulaate Hain bhakton ko Apne dar par.
Ashirwaad ke amrit ko goad mein liye Barsaate Hain Ve Apni sangat par Ashish ke phalon ka poshan kar ke Unkee bauchaar karte Hain har bhakt par.
Kyun na mann ka paatr khaali kar ke In saugaton ko lein hum shishtachaar se Jo hamaara har tareh se rakhte Hain dhyan Ve Guruji khush hongei hamaare vichaar aur vyavhaar se.
Jitna khaali hoga paatr mann ka Utna zyada uddhaar hoga hamaare jeevan ka Guruji toh Hain raasta dikha rahe Buss, hamaari soch chetna rahit na rahe.
Soch mein jo hogi chetna Toh veh degi sadasheelta kee prerna Hum banenge swasth vicharon wale chhaatr Aur Guruji ka anugraha paane ke liye tayyaar hoga hamaare mann ka paatr.
Raat se dar kar kya hoga Raat ne toh aana hee hai Maut se dar ke kya hoga Usne bhi ek din aana hee hai.
Saath mein kalyuga ka chal raha hai daur Zamaana bhautikvaad par farmaa raha hai gaur Lekin baazaaron mein saansein biktee nahin Tabhi toh ye hain aur bhi anmol Varna neelaami ho jaati inkee bhi shaayad Dekhkar inka naap aur tol.
Kabb takk ke liye milee hain ye saansein Maalum nahin hum mein se kisee ko Is jeevan ke baad kya maalum kya hoga Isliye kyun na sahi tareeke se jee lein isee ko.
Phir aglaa sawaal hai ki kaun jaane sahi tareeka Sabhi ne seekha aur dekha hai bhinn bhinn saleeqa Mil jaati hai jinhe Guru kee sharan Guru sanvaarte Hain Unka janam aur maran Ve jaise jaise karte hain Guru kee agya ka anusaran Bhakt sahi tareeke se jeene lagte hain jeevan.
Hum khushnaseeb hain ki Guruji Hain pooran Guru Unhonei kabb se kar diya hai hamaara kalyaan shuru Bin pravachan ke Unhonei jeene ka saleeqa sikhaaya hai Apni sangat ko jeevan ka maarg dikhaaya hai.
Unhonei hamaare liye saral kee hai bhakti Hamaare uddhaar mein lagaa dete Hain Ve Apni saari shakti Kehte Hain Ve ki hum saanson ko simran se sajaayein har pal Usee mein hai hamaari har duvidha ka hal.
Saanson ke liye simran se sundar nahin hai koi bhi shringaar Tabhi toh Guruji simran karna smaran karaate Hain baar baar Vichaaron mein sudhaar Atma ka uddhaar Karmon ka bhugtaan, antarmann ka pavitrikaran Jeevan jeene kee sumat, kashton ka haran Simran se ye sab hota hai Jabb bhakt jaagta ya sota hai.
Kisee ko bataane kee zaroorat nahin Dhoondhna koi mahoorat nahin Jitna ho sakey, mann hee mann karte rahein simran Toh Guruji kee maujoodagi ke sangg beetega har kshan.
Simran saanson mein laata hai aisa spandan Ki nikharta jaata hai vandan Jaagrit hoti hai chetna Miltee hai sadasheelta kee prerna.
Mann mein nirantar simran chalta rahe Toh swaasthya par bhi hota hai achcha asar Pichhle karmon ka karz chukaane mein mil jaati hai raahat Bhakt ke kashton ka nivaaran ho, ye hai Guruji kee chaahat.
Jabb simran swabhaav ka hissa bann jaata hai Toh raha nahin jaata simran ke bin Simran se hee saansein susajjit hain hoti Simran se hee nikhartaa hai bhakton ka raat din.
Isliye Guruji se jodey huey hum seedhi taar Badhaate rahein poojya Guruji se pyaar Saanson ko simran se sajaayein baar baar Ruhaani saundarya se karein apni saanson ka shringaar.
Vaishakh maas kee poornima hai ek mahaan utsav Is din Gautam Buddha ke janam se anugrihit hua yeh jagg Nepal ke Lumbini mein dharti par aaye Bhagwaan Vishnu ke ye avatar Unkee vadiyaayee se tarne laga yeh saara sansaar.
Unke pita thei Ikshvaaku vansh ke raja Shuddhodan Aur mata ka naam thaa Mahamaya Kewal ek saptaah ke liye in navjaat shishu Siddharth Gautam ne Janam dene wali maa ka pyaar paaya.
Ve chal baseein Aur Unkee behen Gautami ne kiya Siddharth ka paalan poshan Siddharth ka putr hua Yashodhara se vivah honei ke pashchaat Aur Rahul naamak is baalak se Unka ghar ho gaya roshan Lekin kuch varsh baad Unhonei grihasth ko tyaaga Sansaar ka dukh, mrityu, roag dekhkar Unke mann mein uthne lagey thei kayee prashn.
Satya kee khoj mein nikal gaye chod kar saara rajya Bachpan se hee jo itne dayalu thei, Unhe ho gaya thaa vairaagya Yog sadhana mein rahe Ve anek saal Phir divya mahima se safal huey Unke sawaal Ashwatth ke taruvar ke neeche baithkar dhyan mein Vaishakh Poornima par hee Unhe praapti hui gyan kee Peepal ka naam hua Bodhivriksh aur Bodhgaya hua Gaya ka naam Saral tareeke se insaaniyat ka dharam nibhaane ka dene lagey Siddharth Gautam paigaam.
Apne anuyaayiyon kee madad se Unhonei madhyam bhaag ka upadesh dete huey kiya dharma ka prachaar Vaishakh Poornima par hee hua Unka Mahaparinirvaan Jiska zariya banaa Kundaa naamak lohaar.
Kundaa se jo bhojan Gautam Buddha ne kiya thaa sweekar Usey khaa kar Ve huey adhik beemar Kundaa bekusoor thaa, Unhonei Apne mitr Anand ko bataaya Yahee satya Anand ne Kundaa ko samjhaaya.
Aaj bhi duniya ke konei konei mein Gautam Buddha ke upadesh ka hota hai prachaar Aisee mahaan atmaaon ke ashirwaad se Anugrihit hai sampoorna sansaar.
Daya ahinsa saamanjasya aur dharam Satya neevanpann nishtha aur karam Sadhna aur dhyan Adhyaatmik gyan Duuri har vikaar se Duuri paap ke karma aur vichaar se In sabb sadachari ke gunon par Gautam Buddha ne diya zor Kitnon ne Unkee prerna kee thaam lee hai dor.
Guruji bhi kahein Apne har bhakt se Ki veh ‘banda bann’ jaaye Sadhusheelta aur sadachari ka karey anusaran Bhog karte huey nibhaaye insaaniyat ka dharam.
Kitne bhaagyashaali hain hum sabb Ki Mahapurushon ke roop mein hamein mil gaye Rabb Sabhi ko Buddh Poornima kee haardik shubhkaamnaayein Aayiye, jagg ko apna sarvashreshth yogdaan dein aur insaaniyat ka dharam nibhaayein.
Beete jaa rahe thei saal Sudhar nahin raha thaa musaafir ka haal Mann mein liye anginat sawaal Sulajh nahin rahi thi samay kee uljhee hui taal.
Jeevan kee dagariya mein odhi chitt ne jo chadariya Veh mayli ho gayi zindagi ke aandhi aur tufaan mein Vikaaron kee kheencha taani se phatt bhi gayi Kahaan se laaoon mai chadariya nayi?
Yeh soch raha thaa musaafir chalte huey Dekh raha thaa sooraj ko dhalte huey Aaj ka din bhi guzar gaya, socha usne Na badal paaya thaa abb takk chadariya Asmanjas mein thaa vo Ki kaise tayy karega jeevan kee dagariya.
Suna thaa kayi varsh pehle usne Guruji ka naam Jabb usne chalna kiya thaa shuru Na jaane kaise dil mein vahee naam aaya Jaise jaise usne har kadam badhaaya.
Thodi si baarish hui, phir usey dikha indradhanush ka nazaara Na jaane kyun, magar usey lagaa ki mil gaya sahara Aise lagaa usey ki veh naav par hai savaar Aur dhoondhte dhoondhte usey mil gaya ho kinaara.
Usne akash ka kiya dhanyawaad Ki shubh sanket usey mila Haath phaylaa kar vahaan khada raha Usey lagaa ki paas hee koi phool khila.
Gulab kee khushboo aane lagi usey Koi phool na dikha toh usne aankhein leen moond Tabhi uskee hatheli par pyaar se aa giri Palkon par saji thi baarish kee jo boond.
Mann kee aankhon ne dekha Guruji ka sundar roop Uske dil mein jaaga bhakti ka ehsaas Guruji uss se baat karne lagey Veh sunta raha lete huey magn shwaas.
Guruji ne usey indradhanush dekhne ke liye kaha Aur usne hukm maana Phir Guruji ne usey aisa aadesh diya Jo uske liye thaa asal khazaana.
Guruji ne usey pyaar se samjhaaya Chadariya ko saaf karne ka upaay bataaya Kaha Unhonei ki veh bhakti ko saat rangon se sajaaye Taaki indradhanush ka saar uskee bhakti mein samaaye.
Kaha Guruji ne musaafir se: “Sewa, simran, satsang, aur dhyan Samarpan, shukrana, aur ruhaani gyan Anaasakt rehne kee shakti Inse nikhaar tu apni bhakti. Jaise jaise in saat rangon se rangne lagegi teri bhakti Mil jaayegi chadariya ko swayam saaf honei kee yukti Aur tu is abhyaas ko kabhi na rokna Chaahe yeh jagg na chode tujhe tokna.”
Musaafir ne poochha nahin aur kuch Baaki sab kuch usey lagne lagaa tuchh Usey Guruji ke noor se ho gaya pyaar Aur chadariya saaf karne ke liye veh hua tayyaar.
Indradhanush thaa jin saat rangon ka prateek Guruji swayam de chukey thei usey Unkee seekh Mann mein Guruji ko naman karte hee Mayyl udne lagi chadariya par se Aur Guruji ke diye saat rangon ke asar se Veh judta gaya Guruji ke dar se.
Bhaav kee sui mein daala naam simran ka dhaaga Bhoolne lagaa ki kabhi thaa veh abhaaga Is paawan dhaage se hui chadariya kee silaayi Aur phati hui chadariya mein nayepann kee chhavi aayi.
Musaafir ko hua ehsaas ki kayi janmon ka bojh utaraa atma se Uske roam roam mein Shukrana samaaya Chitt kee chadariya par Guruji kee chhavi chaayi Is ehsaas se musaafir ko nirmal anand aaya.
Guruji kee mehar se indradhanush ke rangon se Musaafir ko suhaani lagne lagi jeevan kee ruhaani dagariya Aaj bhi veh Guruji kee mahima ka gungaan karta hai Chitt par odhe huey veh chaarul chadariya.
Amoolya hai tera ye janam Na bhoolna nibhaana insaaniyat ka dharam Varna yahaan aane jaane ka silsila na hoga khatam Kyunki badhte rahenge tere sanchit karam.
Har janam mein praarabdh toh bhugatna hoga Uss se bachna nahin hai mumkin Uske dauran bhi tujhse aur karam awashya hongei Ye silsila chalega har din, ho sakta hai tere jaane bin.
Jo ho raha hai tere sangg jis bhi pal jis bhi jageh Itefaaq nahin, zaroor hogi uskee koi vajeh Tujhe kaaran nahin maalum toh koi baat nahin Tu galat hai agar tujhe lagey ki Guruji tere saath nahin.
Unkee nadar bhi hai Mehar-e-nazar bhi hai Tu Unke aadesh ko maan Apni khaamiyon ko pehchaan.
Ve maargdarshan kar rahe Hain tera ruhaani roop mein Ehsaas ho tujhe iska, iska prayaas kar Unke naam ke simran mein bahut shakti hai Naam simran ka tu riyaaz kar.
Ye zaroori hai tere karmon ke bhugtaan ke liye Ye zaroori hai tere chitt ke aaraam ke liye Is se hogi tere antarmann kee shuddhi Is se badhegi teri chetna aur teri subuddhi.
Insaan ka darja mila hai tujhe Parwardigaar se Milee hai tujhe naam japne kee kshamtaa Jitna ho sakey, karta chal tu karmon ka bhugtaan Guruji kee sharan main hai tu, swayam ko bhaagyashaali jaan.
Farz nibhaane ke raaste par chunauti na aaye Mumkin toh hai magar aksar hota nahin Kalyuga hai ye janab, ungali uthti hai kayi baar usee shakhs par Jo hota hai sahi.
Isliye jod kar rakhna hai zaroori Guruji ke saath seedhi sachchi taar Taaki Guru kee matt se na ho tumhaare vichaaron kee duuri Chaahe zamaana sochey kuch aur baar baar.
Apna farz tum nibhaate chalo Gumm bhi aa jaaye toh uske saaye se na daro Kaayam rakhte chalo tum Guruji par vishwaas Aur Ve har pal denge tumhe Apni maujoodagi ka ehsaas.
Tum Unke charnon mein karo sab kuch samarpan Dekhna, Ve Apni hatheli par le lenge tumhaara bhaar Tum apni neeyat aur Unkee kripa se saaf kar lo mann ka darpan Ve Apne noor se kar denge tumhaare antarmann ka shringar.
Jabb Unka noorani roop hoga tumhaare antarmann mein Toh kabhi vilamb na hoga tumhaare maargdarshan mein Kyunki tumhaari chetna Unkee divyata se rahegi prakaashit Aur Guru kripa ke uss prakash se tumhaara hoga hitt.
Is hitt se kumm hoga tumhaare kayi janmon ka bhaar Isliye karte raho Guruji ka simran baar baar Guruji har kadam par Hain tumhaare madadgaar Ve tumse sada karenge niswaarth pyaar.
Khushi aur gumm ke darmiyan Toot gayi jabb deewar Har tareh ke anubhav honei lagey Toh hakeekat se hua deedar Thoda waqt toh lagaa zaroor Phir hua niyati ka faisla manzoor Maan liya bande ne zindagi ka yeh dastur Kuch sapne poore huey, kuch ho gaye chuur chuur.
Ajeeb lagaa usey ki usne kee nahin Guruji se shikayat Balki veh karne lagaa dhanyawaad Kyunki shaayad deewar reh jaati Toh atma ko pahunchti ghaat.
Kyunki kewal gumm ka hee hota rehta ehsaas Toh uska jeevan ho jaata bilkul udaas Har khushi haseen ajnabi reh jaati Aur uske dil mein ghar na banaa paati.
Aur kewal khushi hee mehsoos hoti Toh vikaar karne lagg sakte thei uspar hukm Ye bhi ho sakta thaa ki unkee vajeh se Uss se ho jaata koi jurm.
Vaise hee anjaane mein bhi zaroor hoti hongi kitnee galatiyan Yeh soch kar usne Guruji ke charnon mein sees jhukaaya Guruji kee mehar se usey deewar tootne ka raaz samajh mein aaya Aur jaankar ki Guruji jaante Hain sab, uske thakey se dil ko aaraam aaya.
Usne Guruji kee prerna ko apni chetna mein samaaya Apni soch aur apne karma par har pal gaur farmaaya Neeyat ko nirmal rakhte huey, ravaiye mein basaaye huey shukrana Banda aagey ke safar ke liye hua ravaana.
Utaar chadhaav aaye kayi Paristhitiyan bhi aayin kuch nayi Kuch jann bichhad gaye, kuch naye aaye zindagi mein Lagan badhti chali uskee Guruji kee bandagi mein.
Jaise jaise hawaa mein ghulte rahe Tooti hui deewar ka choona aur mann par chadhi hui dhool Vaise vaise mann kee bagiya mein ek anokhi azaadi se Khilte rahe bandagi ke ruhaani phool.
Guruji usey taarte rahe Uske janmon kee dasha sanvaarte rahe Bande ne laabh dekha samarpan ka Chinta chod mahatva pehchaana chintan ka.
Zindagi roz naye paath padhaati hai Har anubhav se usey kuch sikhaati hai Guruji kee kripa se badhta hai uska dheeraj Uskee koshish hai ki nirlep ho jaaye jaise neeraj.
Kyun na sabhi karein aisee koshish Guruji kee mehar se Neeyat aur koshish dekhkar Guruji mulaakaat karaayenge sachkhand kee sehar se Hogi veh mulakat hamaare kis janam mein Veh toh Guruji jaanein Hamaara toh kaam ye hai Ki hum Guruji ka kehna maanein.
Aaj Ka Suvichaar 