Month: June 2022

June 10, 2022

Om Namaha Shivaya
Aaj Ka Suvichaar 🙏🏻🙏🏻 # 1573

        Dikhaaya Hai Unhonei Raasta

Guruji ka Shukrana
Ki dikhaaya hai Unhonei raasta
Raasta sewa aur simran ka
Raasta satsang ke dhan ka
Raasta, jismein vehem ka sthaan nahin
Raasta, jahaan vikaaron ka maan nahin.

Raasta, saadagi hai jiske har kadam par
Raasta, jahaan Guruji ke naam ka marham lagta hai har gumm par
Raasta, jahaan bhaav kee hai ahamiyat
Raasta, jahaan barasti hai Guruji kee rehmat.

Yeh raasta hai chhal-kapat se bahut duur
Yeh raasta ahankar ko karta hai chuur chuur
Yeh raasta hai saralta aur taralta kee oar jaane ka
Yeh raasta hai komalta aur nirmalta apnaane ka.

Yeh raasta hai dhyan ka
Yeh raasta hai kalyaan ka
Yeh raasta hai bhog bhogne ka bin aasakti ke
Yeh raasta hai aatmabal badhaane ka, Guruji dwaara dee gayi shakti se.

Yeh raasta hai niswaarth preet ka
Yeh raasta hai preet kee jeet ka
Yeh raasta hai preet mein haar ka
Yeh raasta hai swayam mein sudhaar ka.

Yeh raasta hai jaagriti ka
Yeh raasta hai adbhut aakriti ka
Yahaan kaante chubhne se bhi hota hai bhalaa
Yahaan phool khilne kee ruhaani hai kala.

Yahaan Khuda ko paane ke liye khud ko padta hai khona
Yahaan ruhaani prem mein bhool jaata hai jaagna aur sona
Yahaan ullas aur malang ka shor bhi hai
Yahaan vichaarmagn rehne ka moad bhi hai.

Yahaan niraasha kee raat mein bhi yoon jalte hai bhakti ke diye
Maano Guruji ne raasta roshan kiya hai hamaare liye
Yahaan ashirwaad milta hai chehre par kaanti aane ka
Yahaan nirantar mauka milta hai mann mein shanti aane ka.

Yahaan andhvishwaas ko aane kee hai manaahi
Yahaan Guruji ke suraksha kavach se surakshit hai har raahi
Yahaan Guruji swayan lekha dobara likhte Hain Apne kalam kee siyahi se
Yahaan koi vadiyaayee vaddi nahin hai Guruji kee vadiyaayee se.

Yeh raasta manzil takk lekar jaata hai
Yahaan har bhakt Guruji ko humsafar ke roop mein paata hai
Yahaan Guru aur bhakt ka rishta nikharta jaata hai
Yahaan raahi ruhaaniyat kee oonchaayee ko chhoo paata hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 9, 2022

Om Namaha Shivaya
Aaj Ka Suvichaar 🙏🏻🙏🏻 # 1572

        Musaafir, Tu Chalta Chal

Musaafir, tu chalta chal
Darr ko peechhe chod kar
Musaafir, tu chalta chal
Har baadha ko toad kar.

Jhaank tu apne bheetar
Guruji Hain vahaan
Ve angg sangg hongei
Tu jaayega jahaan.

Guruji karte rahenge tera maargdarshan
Tu buss juda reh Unse seedhi taar se
Vaise bhi ye sab maya hai
Tujhe kya lena hai sansaar se.

Baahar ho ya na ho roshan
Tu bheetar ka karta chal poshan
Vaheen hai tera antakaran
Jiska Guruji kar rahe Hain pavitrikaran.

Guruji ne tujhe Apni goad mein hua hai uthaaya
Jabb bhi zaroorat hogi, Unka aanchal deta rahega tujhe chhaaya
Itminaan se sambhaal jo sewa simran ka dhan toone hai paaya
Bahut pachhtaayega agar isey toone ganvaaya.

Kyunki is dhan mein samaayi hai tere liye adhyaatmik oorja
Is dhan se susajjit hoti hai, jo bhi karta hai tu pooja
Yeh dhan de nahin sakta Guru ke siwaay koi dooja
Jaan le tu agar abb takk tujhe ye nahin soojha.

Tere bheetar Guruji ka raaj hai
Aur baahar maya laailaaj hai
Kal beet gaya, lekin tere paas aaj hai
Tera har shwaas Guruji kee mehar ka mohtaaj hai.

Isliye, musaafir, tu chalta chal
Hokar saavdhaan, lekin befikr
Musaafir, tu chalta chal
Har pal karte huey Guruji ka shukr.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 8, 2022

Om Namaha Shivaya
Aaj Ka Suvichaar 🙏🏻🙏🏻 # 1571

        Har Pal Tera Imtehaan Hai

Har pal tera imtehaan hai
Guruji ke darbar mein
Laparwahi matt kar lena ismein
Phans kar moh maya ke pyaar mein.

Ye imtehaan chal raha hai har pal
Bin computer ya kaagaz kalam ke
Kyunki Guruji tera niroopan kar rahe Hain
Tere safar mein tere har kadam pe.

Teri kriya, teri pratikriya, teri bhawna
Teri neeyat, teri kaamna
Tera vichaar
Tera vyavhaar
Sab kuch azmaa rahe Hain Guru Parwardigaar.

Chhipa le yahaan tu sabse beshak
Ya kar le agar anuchit iraade se kisee kee nakal
Banaa lega tu bewakoof saare jahaan ko
Lekin na dhokha de paayega tu Guru meharbaan ko.

Ho sakta hai ki baadhaayein tujhe gher lein har oar se
Aur har seedhi jo tu chadhe, toh imtehaan hota jaaye mushkil
Phir bhi tu Guruji ko sab arpan kar ke apna karma karna
Apne zameer kee awaaz sunte rehna, taaki jurmaana na pade bharna.

Karega imtehaan kee har seedhi ka tu jo saamna
Bina buri neeyat aur bin swaarth aur bin bhautik kaamna
Toh agar poora sansaar bhi na jaan paayega
Tu Guruji kee nazron mein safal kehlaayega.

Faisla tujhpar hee hai nirbhar
Ki Guruji ke hukm par katvaa sakta hai kya tu apna sir
Ya phir imtehaan ke mahatva se vikarshit hokar
Tu duniya ko khush karne mein vyateet karna chaahta hai yeh safar.

Buss, yeh rakhna tu yaad
Ki imtehaan ka jo bhi ho parinaam
Teri neeyat aur tere tareeke se Guruji nahin Hain anjaan
Aur Unhe hai har pal tere pal pal kee soch ka gyan.

Guruji mein shraddha kendrit karte huey
Tu shuddh bhaav se de le imtehaan
Guruji teri neeyat aur mehnat dekhkar nyaaya karenge
Aur tere hee hitt mein hoga parinaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 7, 2022

Om Namaha Shivaya
Aaj Ka Suvichaar 🙏🏻🙏🏻 # 1570

            Guruji Ke Sangg Doar

Bandh gayi jiskee Guruji ke sangg doar
Usey kyun phir chahiye kuch bhi aur
Uskee har zaroorat aur chaahat ka Guruji rakhein khayaal
Chaahe usey Unse judey huey hua ho ek din ya phir kayi saal.

Guruji kee leela hee aisee hai
Ki Ve Apne har bhakt se karte Hain behad pyaar
Ve Apne maanav roop mein nahin Hain yahaan
Lekin Unkee maujoodagi se kaun kar sakta hai inkaar.

Ruhaani khushboo Unkee
Swapn mein Unke darshan
Satsang ke divya anubhav
Gurbani ke simran se tarta jeevan.

Unkee bakhshi hui sewa kee daat
Unkee mehar se hota hai jo paath
Unke charan jo dete Hain hamein sharan
Unka dhyan jo karta hai hamaare mann ka pavitrikaran.

Jeevan daan dene kee karte Hain kripa Ve aksar
Swaasthya ko banaate Hain behtar
Bhautik padaarth dena toh Unke liye itna aasaan hai
Unka toh har ashirwaad hee mahaan hai.

Bin maange hee Guruji karte Hain har bhakt ka kalyaan
Phir kyun Unse maang kar karein Unhe pareshaan
Hum toh hain picchle karmon se aur bhavishya ke maamle mein anjaan
Kitne bhagyashali hain hum ki Jinhonei hamein sharan dee hai, Ve Guruji Hain karuna kee khan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 6, 2022

Om Namaha Shivaya
Aaj Ka Suvichaar 🙏🏻🙏🏻 # 1569

       Apne Muqaddar Se Keh Do

Apne muqaddar se keh do
Guruji Hain tumhaare maargdarshak aur humsafar
Aur muqaddar ne jo kuch socha hai tumhaare liye
Guruji kee hai uspar har pal nazar.

Beshak tumhaare hee karmon ke hisaab se
Tumhaare liye naksha tayaar kar raha hai muqaddar
Lekin tum bhoolo na ki Guruji ka haath hai tumhaare sir par
Ve lekha dobaara likh dein, ho sakta hai ki tumhe mil jaaye aisa avsar.

Muqaddar par nazar rakh rahe Hain Guruji
Tum apna farz adaa karo beparwahi se
Tumhaare vichaar aur vyavhaar ko bhi dekh rahe Hain Guruji
Isliye duur rehna tum vikaar, paap, aur laparwahi se.

Muqaddar karega apna kaam
Tum karte raho kaam apna
Guruji ka naam lete raho
Chod do idhar udhar bhatakna.

Muqaddar kee andheri raat ko
Guruji sajaa denge ummeed ke sitaaron se
Guruji kee agya se muqaddar kee subah ka sooraj
Tumhara jeevan ujjwal karega apni kirnon se.

Niraasha ka sanket laayega jabb jabb muqaddar
Tum na badal lena apni dagar
Tum chalte jaana Guruji ke sahaare
Bin ghabraaye, bin himmat haare.

Asha aur ummeed ya jeet laayega jabb muqaddar
Toh bhi rehna sanyam mein
Asha aur niraasha ek hee sikke ke do pehlu hain
Is baat ko yaad rakhna mann mein.

Muqaddar ko bura na kehna
Usne hai sangg rehna
Pehene rahego jo Guruji ke naam ka gehna
Toh aasaan ho jaayega samjhauta sehna.

Jaise jaise chalega tumhaare jeevan ka safar
Guruji kee rehanumaayi mein rahega muqaddar
Karunamayi hai Guruji kee mehar-e-nazar
Unka Shukrana karte huey karo tum har kadam par Unkee is nazar kee kadar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 5, 2022

Om Namaha Shivaya
Aaj Ka Suvichaar 🙏🏻🙏🏻 # 1568

        Vishwa Paryaavaran Divas

Vishwa Paryaavaran Divas hai aaya
‘Kewal Ek Prithvi’ is naare se prakriti ka sammaan karte rehne kee chetaavani laaya
Paryaavaran ke poshan mein har taruvar ka hai bahut mahatva
Isliye aayiye pedon ke prati hum nibhaayein apna kartavya.

Har taruvar mein hai taazagi
Anokhi si hai sheetalta
Ye mandd mandd hilna patton ka
Ye hariyali, ye nirmalta…..

Ye teheniyan aur ye sundar suman
Jinhe dekh ullaasit ho raha hai ye mann
Phaylaa rahe hain ped apni sundartaa har kshan
Mil raha hai hum sabhi ko shuddh saanson ka dhan.

Aaj har ped paudhe ko khaas naman
Inkee badaulat shuddh rehta hai vaataavaran
Karte hain udaas mann kee udaasi ka haran
Har tareh se hain ye mangal karan.

Jabb se banee yeh srishti
Devi devataon kee bhi rahi pedon par drishti
Kalpavriksh aur Parijaat
Puraanon mein hain vikhyaat.

Peepal ka ped tabb se prateek hai yog bal kee prerna ka
Vat vriksh se milti subuddhi aur chhaaon
Aam ke ped ka mahatva hua dridh vishwaas ke liye
Aur anginat varshon se pedon se harey bharey rahe hain sheher aur gaaon.

Prakriti ka diya uphaar hain ye ped
Srishti ke sukh ka ek anmol aadhaar hain ye ped
Ped kee shakhaon ke beech ghonsala banaakar
Pakshi parivaar basaate hain
Kaheen par bhi udd kar jaayein lekin
Laut ke isee ghar mein aate hain.

Gileheriyan apni natkhat chaal
Pedon kee teheniyon par khelte huey karti hain
Neeche baithe kookar laachaar ho jaate
Lekin gileheriyan nahin darti hain.

Oxygen dekar aur carbon dioxide lekar
Ped nirantar dete hain hamein jeevan daan
Aahaar, aushadhi, lakdi dekar
Ye saabit karte hain apna anmol yogdaan.

Sach mein ped hain itne mahaan
Phir bhi inhe ujaadte gaye hum insaan
Abb jo jaan par hai bann aayi
Toh chetna kee awaaz kee hui hai sunvaayee.

Ashuddh ho gaya vatavaran
Beemariyan ho gayin zyada
Pashu pakshi bhi lupt hotey gaye
Sukh shanti mein padne lagi baadha.

Pedon ke upkaar ka hum par karz hai
Isliye bhi aur ped lagaana hamaara farz hai
Ped lagaane ka abhiyaan
Ye hai maanav jaati ka ek imtehaan
Aayiye sab mil kar ped lagaayein
Aur dharti maa ko ujadne se bachaayein.

Hum sabb hain pyaare Guruji ke bachche
Ve khush hotey Hain jabb hum karte hain kaam achche
Banaayein aaj ke din ko prakriti ke aadar ka paawan parv
Sada prakriti kee izzat karein taaki Guruji ko ho hum par garv.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 4, 2022

Om Namaha Shivaya
Aaj Ka Suvichaar 🙏🏻🙏🏻 # 1567

    Aadarneeya Guruji

Na mai lekhak hoon na shaayar
Na hoon koi gaayak ya kalaakaar
Ek naadaan si bhakt hoon Guruji kee
Karti hoon Unse behad pyaar.

Meet kee preet hai Guruji ke pyaar mein
Pita ka laad hai Guruji ke dulaar mein
Mata kee mamta saji hai Unke aanchal mein
Bhraata ka aashray basaa hai Unke divya bal mein.

Guruji kee guruyaayee mein hai susajjit kayi janmon ka vaada
Hamein kabhi bhi na chodne ka atoot iraada
Sampoorna srishti ka sukh hai Unkee sharan mein
Kalyaan kee manzil hai Unke kamal charan mein.

Guruji kee aankhon mein hai mahasaagar se bhi gehri gehraayee
Unkee har leela mein hai Unkee vaddi vadiyaayee
Ek saumya anokhapan hai Unkee banaayi mudraaon mein
Suraksha kee sheetalta hai Unkee goad kee chhaaon mein.

Dil chaahe Unkee prashansa mai karti jaaoon
Magar Unkee taareef ke liye alfaaz dhoondhte huey khud hee kho jaaoon
Unhee kee chhavi ke spandan mein
Unke noor ke ruhaani aakarshan mein.

Jinhonei lee hai saari sangat ke kalyaan kee zimmedaari
Jinke saamne har dusht-ta mehsoos karti hai laachaari
Jinke ashirwaad se duur ho sakti hai har beemari
Unn aadaraneeya Guruji par mai toh jaaoon vaari.

Har bhakt ka anokha rishta hai Guruji ke sangg
Har bhakt kee bhakti ko mera aadar bhara naman
Shukrana karte huey har pal yeh arzi hai Guruji se
Ki Unkee kripa se khila rahe saari sangat ka jeevan roopi chaman.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 3, 2022

Om Namaha Shivaya
Aaj Ka Suvichaar 🙏🏻🙏🏻 # 1566

             Gurbani

Sunn sunn kar Guruon kee bani
Sanvarti jaa rahi hai sangat kee zindagaani
Yeh sachchaayee jisne aaj aur abhi takk nahin bhi hai jaani
Kal har uss shakhs kee rasna bhi sunaayegi Gurbani kee mahima kee kahaani.

Guruji Gurbani sunn-ne ke liye kahein
Jitna ho sakey, hum Gurbani ko sunte rahein
Gurbani karti hai kaam aushadhi ka
Dikhaati hai raasta sumati ka.

Har shabad ka hota hai mahatvapoorna sandesh
Har shabad mein samaata hai gyan
Shabad ke sur aur taal, shabd, vyaakhya aur drishtant
Sabhi hain poojaneeya aur mahaan.

Hai yeh Guruon kee inaayat
Karti hai chetna ko jaagrit
Jagaati hai soyi hui insaaniyat ko
Sundar saaz deti hai ibadat ko.

Gurbani ka ruhaani spandan
Sajaa deta hai bhaav aur vandan
Ho khushi ka lamha ya phir ho gumm ka kshan
Gurbani se raahat paata hai mann.

Gurbani ka shravan de chitt ko shanti
Gurbani ke ashirwaad se nikhar jaaye ruh kee kanti
Gurbani ka divya amrit de sakta hai jeevan daan
Gurbani ke kirtan kee shakti hai mahaan.

Gurbani ke prabhaav se hota hai antakaran ka pavitrikaran
Gurbani mein aisa prataap hai ki hota hai kashton ka haran
Jeene ka saleeqa sikhaati hai Gurbani
Tarne ka tareeka bataati hai Gurbani.

Har dukh ka marham hai Gurbani
Guruon ka hukm hai Gurbani
Karti sarbat ka kalyaan hai Gurbani
Nirankaar ka paigam hai Gurbani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 2, 2022

Om Namaha Shivaya
Aaj Ka Suvichaar 🙏🏻🙏🏻 # 1565

      Guruji Ne Bulaaya Apne Paas

Guruji ne bulaaya Apne paas
Bithaaya Apne charnon mein
Baatein kee thodi bahut
Itna anand aaya unn lamhon mein.

Phir Ve khade huey aur mai bhi jhat se hui khadi
Achaanak drishya hee badal gaya aur saamne pahaad par meri nazar padi
Hari ghaas thi pahaad par, neela aur ujjwal thaa aasmaan
Guruji ne pahaad kee doosri oar ishaara kiya aur mainey dekha vahaan.

Uss paar ek adbhut prakash thaa jab ki aasmaan thaa gerua
Mujhe sehasaa vahaan jaane ka aakarshan hua
Guruji antaryaami Hain, pehchaan gaye meri neeyat
Kaha Unhonei mujhse ki aane hee wala hai veh haseen waqt.

Pehli baar dekha mainey Guruji ko
Sadhu ke se vesh mein
Yakeen hai Unkee har baat par
Ki pahunchoongi pardes se swadesh mein.

Na jaane Guruji ke sangg bitaaye tabb maine kitne pal
Guruji kee leela se drishya phir se gaya badal
Paaya khud ko nidra se jaagte huey
Guruji ka pyaara naam pukaarte huey.

Telepathy aur seedhi taar se Guruji ne diye swapn mein darshan
Kaise bataaoon ki mujhe kitne anmol lagey ve kshan
Jis mukaam kee Unhonei baat kee
Ve hee jaanein ki kab pahunchoongi vahaan
Mai toh buss itna hee jaanoon
Ki Unke charnon mein hee hai mera jahaan.

Phir chaahe veh jahaan ho is paar ya uss paar
Guruji kee kripa se karoongi Unke hukm ka intazaar
Guruji mehar karein ki intazaar kee ghadiyan na jaayein bekaar
Unse judi rehkar mai Unka Shukrana karti rahoon baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

June 1, 2022

Om Namaha Shivaya
Aaj Ka Suvichaar 🙏🏻🙏🏻 # 1564

Nitya Aur Nirmal Hai Guruji Ka Pyaar

Chalte chalte is zindagi ke daur par
Kuch loag milte hain, kuch bichhad jaate hain kisee kisee moad par
Kuch virle hee sangg chalte hain poora raasta
Magar is naadaan dil ko ho jaati hai sabhi par aastha.

Tabhi toh Guruji sikha rahe Hain
Is kalyuga ka drishya dikha rahe Hain
Na jaane yeh dil kabb isey sweekaarega
Tabb takk ye shaayad logon par jaan vaarega.

Koi kitna bhi achcha ho
Zaroori toh nahin ki veh de sthaayi pyaar
Shukr hai kuch kuch seekh raha hai abb dil
Aur chod raha hai is pyaar ka intazaar.

Na jaane kiska sachcha aur kiska jhootha saabit ho vaada
Kabhi kabhi palak jhapakne se pehle badal jaata hai logon ka iraada
Har koi nahin hota aisa, is baat ka hai shukr
Lekin agar ghanisht hee gairon ka sa bartaav karey, toh kis se karein zikr?

Shukr hai Guruji ka vaada toh pakka hai
Aur Ve har pal saath nibhaate Hain
Aur khaaskar jis moad par dil toot-ta hai
Uss moad par toh Ve awashya yeh dikhaate Hain.

Unkee mamta hai beantt
Unkee anukampa hai anant
Unka aanchal hai sukhdaayee
Unka sahaara hai sthaayi.

Ve kabhi na karein vishwaas ghat
Ve samjhein bin kahi hui baat
Jabb ye zindagi hee hai Unkee dee daat
Toh Unse hichkichaane kee hai nahin koi baat.

Toote huey dil ke liye marham hai Unka dulaar
Unka simran le jaata hai chitt ko duniyavi uljhanon ke paar
Ve sikhaate Hain karna pyaar bin aasakti ke
Bahut ruhaani shakti miltee hai Unkee bhakti se.

Isliye har ummeed, har apeksha ko chod kar
Yaad rakhna hai ki Guruji sangg Hain har moad par
Nitya aur nirmal hai Guruji ka pyaar
Zindagi ke daur mein har moad par ye milega baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja