Month: July 2022

July 31, 2022

Om Namaha Shivaya
Aaj Ka Suvichaar 🙏🏻🙏🏻 # 1624

Aakhir Safar Hee Toh Hai Yeh Zindagi

Pal se minute
Minton se ghadiyan
Ghante ghadiyon ke baad
Apne haath mein hai ki hum inhe
Sadupyog mein laayein ya karein barbaad.

Aise hee pehar aur din aate hain
Phir hafte, maheene, aur saal
Kyun na mann ko sthir kar ke jee lein
Banaa kar simran ko apni dhaal.

Iska arth ye nahin ki jeevan ho jaaye neeras
Lete chalein mauj masti ka anand bharaa rass
Uss daanav ka poshan na karein jo mann mein raha hai buss
Taaki kalyugi sarp na sakey hamein dass.

Guruji ke naam mein hai anant shakti
Tarr jaata hai vo jo rakhta hai Unke naam mein bhakti
Ye hai swayam kee bhalaayee kee yukti
Aushadhi hai har uss ragg ke liye jo hai dukhti.

Guruji ne Apni sangat ke liya kiya hai kitna saral intazaam
Nahin chodne hain dinacharya ke kaam
Nahin tyaagna hai bhog ya aaraam
Bin vehem, bin ahem ke japna hai Unka naam.

Din ho ya raat, akele ho ya phir beshak ho koi saath
Karna hai beej mantra ya mantra jaap
Dikhaawa nahin karna, buss japna hai chup chaap
Mann niyantran mein rehne lagega, kumm pareshaani denge santaap.

Mann hota jaayega maut se nirbhay
Mit-ta jaayega agar hoga koi sanshay
Yahaan rehte huey hoti rahegi vahaan jaane kee tayyaari
Kyunki kabhi na kabhi toh aani hee hai sabki baari.

Kyunki aakhir safar hee toh hai yeh zindagi
Aur yakeenan sabse uttam sahaara hai bandagi
Buss, milti rahe Guruji kee daat-e-bakhshindagi
Taaki uss paar pahunch kar na ho koi sharmindagi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 30, 2022

Om Namaha Shivaya
Aaj Ka Suvichaar 🙏🏻🙏🏻 # 1623

       Jabb Hum Banenge Gurumukh

Lupt ho gaya sooraj dhalte dhalte
Raahi bhi thakk sa gaya chalte chalte
Saraaye mein ruka veh jabb hui raat
Subah hui toh chal pada lekar naam ko bheetar aur saath.

Sehsa ghaney baadal chaane lagey aasmaan mein
Veh chalta raha magn hokar naam mein
Kuch baadal garje, kuch barse, bijlee ne bhi roab dikhaaya
Raahi Guruji ke naam kee dhun mein thaa, veh zara sa bhi nahin ghabraaya.

Baarish ruk gayi kuch ghanton mein
Sooraj kee chhavi aane lagi nazar
Bhookh mitaakar, taruvar ke taley kar ke vishraam
Raahi kee rooh par hota raha Guru ke naam ka ruhaani asar.

Yaad aa rahi thi beete huey dinon kee
Prateeksha thi aane waalon kshanon kee
Ek pal ke liye bhi usey mehsoos na hua akelapann
Kyunki naam japp raha thaa veh mann hee mann
Chinta chod kar veh kar raha thaa chintan
Uske chitt par chhaaya thaa samarpan ka spandan.

Kya anant hai kya hai asthaayi
Usey yeh samajh thi aayi
Guruji kee vadiyaayee
Yeh rangg thi laayi.

Guruji kee vadiyaayee ke rangg kee gehraayee
Banti chali raahi ke liye ati-sukhdaayee
Aise magn karne lagi usey Guruji ke naam kee sheetal shehnaayee
Ki uske har vichaar aur karma par Guruji kee marzi ne mohar lagaayee.

Har aisee manohar mohar ne kiya raahi ko
Guruji ke aur bhi kareeb
Guruji ka shukrana karta raha veh pal pal
Kyunki Unkee mehar se hua veh khushnaseeb.

Khatkhataa rahi hai yahee khushnaseebi
Hum sabki kismat ka dwaar
Guruji kee marzi kee mohar se hum bhi
Anumodit karaa lein apne karma aur vichaar.

Isee mein hai kalyaan
Isee mein hai sukh
Tabb hee milenge Bhagwaan
Jabb hum banenge Gurumukh.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 29, 2022

Om Namaha Shivaya
Aaj Ka Suvichaar 🙏🏻🙏🏻 # 1622

       Komal Karunanidhaan Guruji

Guruji kee sharan mein
Mil jaati hai jabb sweekriti
Toh aksar Guruji lekha dobaara likh kar
Nikhaar dete Hain niyati.

Unkee sharan mein jabb safar hota hai shuru
Toh maano jaise ek naya janam dete Hain Ve Guru
Kyunki safar ke pehle kadam par milta hai jo Unka naam
Toh tabhi se nishchit ho jaata hai kalyaan hee kalyaan.

Agar na bhi badle hamaari niyati
Toh bhi poora sahaara deti hai Guruji kee preeti
Pooran Guru Hain Guruji pyaare
Lagaate Hain sabke jeevan kee naiya kinaare
Mukti takk pahunchaate Hain Ve
Himmat dekar karmon ko katvaate Hain Ve.

Safar mein beshak aate hain aandhi tufaan
Raksha ka kavach banta hai Guruji ka naam
Lauta dete Hain Ve khoyi hui muskaan
Dete Hain Apni ruhaani maujoodagi ka pramaan.

Dete Hain Guruji bhakton ko itna pyaar
Ki veh pyaar bann jaata hai safar ka aadhaar
Uss pyaar kee prerna hai aisee anupam
Ki har niraasha ko kar deti hai khatm.

Safar mein ummeed ka sooraj jabb kabhi hota hai astt
Jabb kisee bhi kaaran se bhakt hota hai gumm se grast
Toh Guruji kee samvedansheel karuna
Laati hai safar ke akash mein Aruna.

Safar kee manzil agar hoti hai duur
Toh bhi har andheri moad par raaj karne lagta hai Unka noor
Har pal rakhte Hain Guruji bhakt ka khayaal
Komal karunanidhaan Guruji kee leela hai bemisaal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 28, 2022

Om Namaha Shivaya
Aaj Ka Suvichaar 🙏🏻🙏🏻 # 1621

             Saath Dein Jo Har Pal

Saath dein jo har pal
Bin shart, bin saude ya bandhan ke
Aise saathi Hain pyaare Guruji
Apne har bhakt jann ke.

Bhakt kee aankhon mein aansoon aane se pehle hee jaayein jaan
Aur kar rahe hon samasya ka samaadhaan
Aise abheekshak Hain pyaare Guruji
Itna khayaal rakhte Hain Ve meharbaan.

Jinhe kuch kehne kee zaroorat hee nahin
Lekin phir bhi bhakt keh dein toh Ve nahin hotey naaraaz
Aise dayalu antaryaami Hain pyaare Guruji
Itna udaar hai Unka andaaz.

Jinka aanchal na padey kabhi chhota
Chaahe sangat jitnee bhi badh jaaye
Aise kripalu Hain pyaare Guruji
Jinka noor Unkee sangat par chadh jaaye.

Jinke dil mein hai pyaar beshumaar
Jinka badhta jaata hai bhakton ke liye dulaar
Aise komal hriday wale Hain pyaare Guruji
Jinkee vadiyaayee hai aparampaar.

Jinkee kripa aur karuna kee nahin hai koi seema
Unke kamal charnon mein hee hai abb marna aur jeena
Aise bade dil wale Hain pyaare Guruji
Jinkee avinaashi aur anant hai mahima.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 27, 2022

Om Namaha Shivaya
Aaj Ka Suvichaar 🙏🏻🙏🏻 # 1620

              Har Bhakt Ka Aashiyan

Khushboo ruhaaniyat kee
Moorat insaaniyat kee
Leela divyata kee
Prerna pavitrata kee
Guruji Hain MahaShiv ke roop
Unka prataap hai anokha aur anoop.

Strot utsah ke
Maargdarshak raah ke
Gunahon ke bakhshanhaar
Sangat ke taaranhaar
Guruji Hain itne dayalu
Guruji Hain bahut kripalu.

Simran ke samarthak
Dhyan ke protsaahak
Bhakton ke pratipaalak
Har haalaat mein rakshak
Guruji Hain hamdard Apne har shishya ke
Guruji Hain gavaah har anubhav aur drishya ke.

Praanon ke poshankarta
Kashton ke harta
Agam agochar
Daya ke dar
Guruji bulaate Hain jisey bhi Apni sharan mein
Uske angg sangg rehte Hain uske janam maran mein.

Dukhiyon ke Deenanath
Sukhiyon ke bhi sada saath
Mumukshu ke liye nirvaan
Sabhi ke liye kalyaan
Guruji Hain kitne mahaan
Unkee mehar se mehekta hai har bhakt ka aashiyan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 26, 2022

Om Namaha Shivaya
Aaj Ka Suvichaar 🙏🏻🙏🏻 # 1619

Agam Agochar Taral Taaranhaar

Dil hee dil mein reh jaati hai jo baat
Guruji jaan jaate Hain usey bhi
Ve Hain antaryaami sundar swami
Hain Ve har bhakt ke har jazbaat ke gyani.

Jeevan mein jabb bhi aati hai niraasha
Guruji yaad dilaate Hain jeevan kee paribhaasha
Sarvagyani Sarveshwar Shiv ke swaroop
Saantwana ka saagar anoop.

Sapne patjhad ke patton jaise
Jabb lagte Hain bikharne
Apni anukampa ke aanchal mein
Guruji lagte Hain Unhe sametne.

Unkee kripa se jabb
Chhooti hai khushi kee leher
Yaad dilaane ki ahem na karna
Awaaz bann kar aati hai Guruji kee mehar.

Sukh dukh ke beech ka faasla
Dheere dheere karvaate Hain Ve tayy
Mann kee samta ke anukaraneeya Dev
Sukh dukh mein ek si bakhshne lagte Hain layy.

Paath sikhaate Hain mahatvapoorna
Zindagi banaate Hain Ve kartavya poorna
Saumya satark sanchaalak Hain Ve
Param poojya pratipaalak Hain Ve.

Kitne kaarya jo reh jaate hain adhoore
Guruji kee kripa se hotey hain poore
Bhav saagar paar karaane wale Parwardigaar
Guruji hee Hain Ve agam agochar taral taaranhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 25, 2022

Om Namaha Shivaya
Aaj Ka Suvichaar 🙏🏻🙏🏻 # 1618

                Deh Dil Se Shukrana 

Pyaare Guruji,

Khushkismat hai har veh jann
Jisey Aapne Apne charnon mein dee hai jageh
Aapki sharan mein aane se duur hui hai
Niraasha aur bebasi kee har vajeh.

Mai hoon Aapki shukraguzaar
Ki Aapne mujhe bhi bulaaya Apne dwaar
Bakhshte Hain Aap baar baar
Kalyaan karte Hain baarambaar.

Aapke naynon mein dikha jo mahasaagar
Toh usmein dubo dee mainey apne mann kee gaagar
Aapke chehre par dekha aisa anupam noor
Ki chitt ka andhkaar honei lagaa duur.

Nihaar kar Aapke mukhaarvind kee muskaan
Khush ho jaati hoon agar kabhi hoti hoon pareshaan
Mann hee mann mein chhooti hoon Aapke komal haath
Aapki mehar se seedhi taar jod kar paati hoon Aapko apne saath.

Aapki ruhaani khushboo se mera mann
Bann jaata hai khiley huey ruhaani phoolon se bhara upvan
Aapke langar prasad se nirogi hota hai mann aur tann
Aapke ashirwaad se atma paati hai divya dhan.

Aapke simran aur dhyan mein milte hain kayee sawaalon ke jawaab
Jis mein Aap darshan dete Hain, dhanya hota har veh khwaab
Dee hai Aapne itnee sehenshakti
Dee hai Aapne tript rehne kee yukti
Agochar hotey huey bhi dilaate rehte Hain Aap Apni maujoodagi ka ehsaas
Mann kee aankhein paati hain Aapko swayam ke bheetar aur aaspaas.

Aapki sharan mein milee hai sweekriti
Aapke aanchal mein milee hai preeti
Janam maran ho gaya hai safal
Aapka deh dil se shukrana karoon har pal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 24, 2022

Om Namaha Shivaya
Aaj Ka Suvichaar 🙏🏻🙏🏻 # 1617

                 Aise Jeeyein Hum

Kuch baatein sunin hui, kuch ansuni
Kuch baatein kahin hui, kuch ankahi
Yoon hee zindagi kee har ghadi
Beet-ti rahi.

Kuch karya huey poore, kuch kal ke liye choot gaye
Kuch bandhan bandhe, kuch toot gaye
Aaj bhi kuch aisa hee haal hai
Bin rukey chal rahi samay kee chaal hai.

Saal maheene kee si tezi se nikle jaa rahe hain
Aur maheene hafton ke se vaig se rahe hain guzar
Haftey toh dinon ko goad mein liye beet rahe hain sheeghrataa se
Aur din ke ghanton aur minton par toh jaise hua ho tufaan kee gati ka asar.

Jo kal kareeb thaa, ho sakta hai aaj bhi ho utna hee kareeb
Ya phir aaj duur ho, ye naseeb kee ho tarkeeb.
Samay aur karmon ka khel hai kuch kuch uljha
Kuch virle jann hee hongei jinhonei isey poori tareh se hai samjha.

Apni jholi mein mila hai hamein aaj
Maano ya na maano, yeh khushkismati hai hamaari
Har ghante, har minute kee rakhein laaj
Na jaane kab aa jaaye yahaan se jaane kee baari.

Hamein insaan ka mila hai janam
Karein hum insaanon wale karam
Pashu aur daanav vritti se rahein duur
Simran aur gupt sewa, daan, paath karein zaroor.

Badhaate rahein sadbhaav aur saamanjasya
Nibhaate rahein hum apna kartavya
Khud bhi jeeyein, jeene dein doojon ko bhi
Galatiyon ko sudhaarein, neki karne se na katraayein kabhi.

Guruji kee santaan aur Unke shishya hain hum
Guruji se judey rahein aur karein Unka anusaran
Hamaare vyavhaar mein pratibimbit ho Unka divya andaaz
Aise jeeyein hum ki Guruji ko hum par ho naaz.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 23, 2022

Om Namaha Shivaya
Aaj Ka Suvichaar 🙏🏻🙏🏻 # 1616

                 Divya Dharohar

Ve Parampita Paramatama
Dee hai Jinhonei hamein yeh atma
Kitna vishwaas kiya hoga Unhonei hum par
Ki hamaare tann mein sajaayi atma, jo hai divya dharohar.

Hum sabki atma Unhee ka toh hai ansh
Shareer mein aayi hai chalaane praaniyon ka vansh
Paramatama ne hee dee hai , Paramatama mein hee ye samaayegi
Jabb takk Unmein samaane ke yogya na hogi, tabb takk na jaane kis kis shareer mein aayegi.

Guruji chaahein ki hum dharohar ka sammaan karein
Tabhi toh Ve kahein ki hum banda banein
Kitne janmon ke pashchaat darja mila hai maanav ka
Aisa kuch na kar baithein ki dekhna pade janam daanav ka.

Guruji ko jo maana hai
Toh Guruji kee bhi toh maanein
Vehem, vikaar, paap karna chodein
Atma ko jakde huey hain jo bandhan, unhe todein.

Na jaane kitne janmon se atma bichdi hui hai Paramatama se
Kyun na isey taraashein paakar ashirwaad Dharamatama se
Mila hai Guru kripa se yeh divya mauka
Agar abb takk atma ka poshan hai roka
Toh abhi se shuru karein
Karna sammaan is avsar ka
Guruji kee baat maan kar
Aadar karein is divya dharohar ka.

Jitna nekneeyat hoga hamaara prayatn
Utnee ujjwal hogi kaamyaabi kee kiran
Aur atyant sunehra hoga veh kshan
Jabb is atma ka Paramatama se hoga punarmilan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 22, 2022

Om Namaha Shivaya
Aaj Ka Suvichaar 🙏🏻🙏🏻 # 1615

          Guru Har Krishan Sahib

Saat July 1656 kee tithi thi atyant shubh
Ek punyaatma ne janam liya mitaane sangat ke dukh
Mata Krishen Kaur aur Guru Har Rai ji ke ghar
Aaya veh khushi ka avsar
Ki sikhon ke jo honei wale thei aathvein Guru
Unhonei kiya jeevan ka safar shuru.

Panch varsh kee baal avastha mein
Unke pita ne saump di Unhe guruyaayee
Guru Har Krishan Sahib kehlaaye Ve
In Baal Guru kee hui vaddi vadiyaayee.

Chechak ke bhayankar roag se
In nanhe se baalak ne kitnon ko kiya theek
Guru Nanak Dev ji jaisa noor thaa Unka
Thei Ve janam se hee divyata ke prateek.

Raja Rai Singh ka bangla thaa jahaan
Guru Har Krishan ji sewa ke liye pahunche vahaan
Jahaan rahe thei Guru Har Krishan Dev uss samay
Uske sameep hee thaa veh jalaashay Jahaan abb hai Gurudwara Bangla Sahib ka sarovar
Vahaan par nibhaaya Unhonei chechak-grast mareezon kee sewa karne ka avsar.

Sewa mein jaat-paat aur oonch-neech ko kar diya Guru ne dar kinaar
Isee niswaarth sewa ke dauran Ve huey bahut beemar.

Itnee pyaar bhari thi Unkee sewa
Ki musalmaan bhi pyaar se bulaane lagey Unhe ‘Baala Peer’
Guru Sahib ne Apni maa ko Apne paas bulavaya
Jabb Unkee sthiti hui zyaada gambheer.

Bhagwad Gita ka thaa Unhe sampoorna gyan
Apne spandan aur ashish se Ve yeh gyan kar dete thei doojon ko bhi pradaan
Teen varsh kee thi avadhi Unke shaasan kee
Baba Bakaalaa ko saumpi Unhonei zimmedari Guru ke aasan kee.

Guru Har Krishan Dev ne anginat Sangat ka kiya kalyaan
Bhagwaan ke roop mein thei Guru, aur Guru ke roop mein Bhagwaan
Adhyaatmik paripakvataa kee moorat
Sumat aur karuna kee soorat
Lokpriya aur dayalu thei, saari sangat ke dil mein Unke liye aaj takk hai pyaar
Unkee baudhik kshamtaa ka aaj bhi hota hai aadar satkaar.

Guru Har Krishan ke jeevan kee hai kitnee mahaan kahaani
Waqt ke saath saath saari duniya ne Guruon kee mahima hai jaani
Guruji kee sharan mein rehte hum bhi sunein Gurbani
Gurbani se aur Guruon kee qurbaani se sudhar gayi sangat kee zindagani.

Shukrana Guru Sahib aur Unkee guruyaayee ka
Shukrana Unkee vaddi vadiyaayee ka
Sabhi ko Guru Har Krishan Ji ke Prakash Purab kee ho mubarak
Pranaam har Guru ko, kyunki Guru hee toh Hain sangat ke pushtikaarak.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja