Month: July 2022

July 21, 2022

Om Namaha Shivaya
Aaj Ka Suvichaar 🙏🏻🙏🏻 # 1614

Prafullit Hua Jann Ka Mann

Na jaane kiskee talaash mein thaa veh jann
Chalte chalte duur takk pahuncha vahaan jahaan thaa ek vann
Pedon par phal dekhkar prassann hua uska mann
Kuch na khane ko mila thaa teen dinon se, thaa veh bahut nirdhan.

Lekin veh prassannata thi kuch hee lamhon kee
Kyunki sehsa uskee nazar apne paaon ke paas padi
Nikat hee thaa ek saamp
Veh jann yeh dekhkar gaya kaamp.

Shukr hai ki usey yaad aaya tabb
‘Om Namaha Shivaya’ ka japp
Japne lagaa veh aankhein moond ke
Girne lagin chheentein uske paseene kee har boond kee.

Saamp ne dooja raasta apnaaya
Jann ne Prabhu Shiv ka shukr manaaya
Phir dekha ki vann mein lagg gayi hai aag
Usey lagaa ki jaana chahiye vahaan se bhaag.

‘Om Namaha Shivaya’ kehte kehte
Vaataavaran ke santaap ko sehte sehte
Dikha usey ek alagg sa panth
Uss panth par dikhey usey ek santt.

Mantra ke jaap se aaya usmein aisa utsaah
Ki apnaane ke liye chalaa veh uss nayee raah
Maano uske pankh aaye thei nikal
Itnee sheeghrataa se beete ve pal.

Agni chhoot gayi peechhe
Santt kee oar bhaagte huey veh gira neeche
Gira toh paas mein ek kaanton bhara jaal aaya nazar
Usmein phansne se veh bach gaya, usne maana is saubhagya ko bhi Ishwar kee mehar.

Santt ke paas pahunchne hee wala thaa ki veh gaya fisal
Ghutnon par chhote ghaav huey, utne mein veh kasht bhi gaya tal
‘Baba, baba!’ pukaarte huey pahuncha veh santt ke paas
Santt ke ruhaani spandan se usey mehsoos hua adbhut ullaas.

Santt ka roop thaa viraat aur bahut sundar thaa Unka chehra
Unka noor hee bataa raha thaa ki Unka sabb par hai pehra
Santt ke maathe par thaa sainkdon sooryon ka prakash
Aise lagg raha thaa ki Unhe naman kar raha ho akash
Jann mugdh hokar ruk gaya
Aur santt ke charnon mein jhuk gaya.

‘Kalyaan kitta,’ santt ne kaha jann se
Jann ne Shukrana kiya mann se
Santt jann ke mann kee baat gaye jaan
Aur jann ne jaana ki ye santt Hain mahaan.

Santt ne jann ke dekhte dekhte
Utpann kiya sachkhand se prasad
Jann ko mila jabb Unse veh prasad
Toh jann ne jaana ki kitna divya thaa uska swad.

Ek anokhi sheetalta, ek adbhut sa spandan
Thei uss paawan prasad mein
Usey chakhte hee veh jann
Kho gaya unke swad mein.

Jo bhi hua thaa jann ke saath vann mein
Santt ne jann ko bataaya
Aur Ve hee usey bachaa rahe thei vahaan
Unhonei jann ko ye bhi samjhaaya.

Jann ne poochhaa santt se Unka naam
Tabb jaana ki Ve Dugri wale Guruji Hain
Bhaav vibhor ho gaya veh is satya ko jaan
Jinke baare mein sirf suna thaa usne, Unhonei bachaayee uskee jaan.

Guruji ne uspar daali Apni nazar
Yeh jaan kar duur hua jann ka har darr
Dekhte dekhte Guruji huey antardhaan
Jann mann hee mann mein karne lagaa Unka gungaan.

Guruji ne diya jann ko sakshat darshan
Aasaan kiye uske mushkil bhare kshan
Prafullit hua jann ka mann
Mil gayi usey Guruji kee sharan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 20, 2022

Om Namaha Shivaya
Aaj Ka Suvichaar 🙏🏻🙏🏻 # 1613

Sundar Shringar Ka Daan

Guruji ne Apne har bhakt par
Kiya hai itna ehsaan
Pyaar se sajaaya hai har bhakt ko
Maankar Apni santaan.

Simran kee dee hai mala
Bada pyaara hai Guru rakhwaala
Har manke par hai Guruji ka naam
Simran mein chitt ko le jaate Hain Ve Apne dham.

Rangaa hai Unhonei Satsang ke rangg se
Apne anokhe adbhut dhangg se
Sewa ka diya hai daan
Guru Sahib Hain itne meharbaan.

Kangan miley hain Unse shraddha aur dheeraj ke
Jhumke miley hain nirlepta ke neeraj ke
Karn ko shravan ke liye praapt hua hai Gurbani ka dhan
Mann ko miley hain manan aur chintan ke kshan.

Aankhein khuli hon ya hon bandd
Unn mein Guruji ke saumya roop ka khazaana hai
Naasika mein bhi kabhi tez kabhi mandd
Unkee ruhaani khushboo ka aana jaana hai.

Guruji ne mukh par sajaayi hai Apni dee hui muskaan
Labhon aur rasna ko alankrit karta hai Unka gungaan
Mann mein saji hai Unkee pooja
Tann mein Unkee dee hui ruhaani oorja.

Samarpan piroya hai dil mein aur darpan mein
Shukrana mukh par vibhooshit karte Hain har kshan mein
Guruji Hain kitne dayaavaan
Diya hai bhakton ko sundar shringar ka daan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 19, 2022

Om Namaha Shivaya
Aaj Ka Suvichaar 🙏🏻🙏🏻 # 1612

Aksar Aate Hain Aise Pal Jeevan Mein

Aksar aate hain aise pal jeevan mein
Jabb ghutan hoti hai mann hee mann mein
Lagta hai ki itne kasht kyun aa rahe hain
Jab ki pehle bhi itne sahe hain.

Guruji ka Apna tareeka hai karmon ko kaatne ka
Guruji ka anokha dhangg hai sukh baantne ka
Komalta se faisla karte hain bhakton ke karmon ke anjaam ka
Har pal sahaara dete Hain bhakton ko Apne naam ka.

Jitne kasht aa rahe hon jeevan mein
Nirdhaarit tha uss se kayi zyada kashton ka aana
Ye toh Guruji kee karuna ka nateeja hai
Ki thode mein hee Unhonei hai karmon ko bhugatvaana.

Bhakton ke adhiktar karma swayam par lekar
Guruji karmon ke khaate ko banaate Hain behtar
Dete Hain bhakton ko har janam mein sudharne ka bhi avsar
Uss dauran banaaye rakhte Hain Apni nazar aur nadar.

Guruji jaise jaise sanvaarte jaate Hain bhakton ka aaj aur kal
Itne kasht toh chhoone se pehle hee jaate hain tal
Hamein hota hee nahin hai maalum yeh sabb
Itna dhyan rakhte Hain hamaare Guruji mein basey Rabb.

Guruji ke kahe anusaar karte rahein hum simran
Toh dheere dheere kumm hokar khatm ho jaayegi ghutan
Jaan jaayega aur maan jaayega yeh mann
Ki pehle se toh kitna adhik sudhar gaya hai jeevan.

Aksar beshak aate rahenge kasht bhare pal jeevan mein
Lekin beet jaayenge bin shikaayat kiye
Jin palon mein mann ghutan se hota thaa pareshaan
Ve pal bhi sajj jaayenge ibadat ke liye.

Jabb mann mein Guruji ke prati Shukrana ho jaayega aabaad
Toh aur bhi barasne lagega Guruji ka ashirwaad
Jo kasht aayenge bhi, toh mann mein na chalega duvidha bharaa vaad-vivaad
Kyunki mann ko prerit karega Guruji ke prati samarpan aur dhanyawaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 18, 2022

Om Namaha Shivaya
Aaj Ka Suvichaar 🙏🏻🙏🏻 # 1611

         Safal Ho Hamaara Janam

Pyaare Guruvar,

Guruji hai Aapka naam
Aap Hain anant rehematon kee khan
Bakhshte Hain aarogyataa, dete Hain jeevan daan
Mada samay aayega, nahin rakha Aapne is satya se bhakton ko anjaan.

Beshak aaj ke daur mein vigyaan ka hua hai vikas
Lekin bhautik padaarthon kee itnee badh gayi hai pyaas
Ki santusht hona kitnon ko toh aata hee nahin raas
Vikaaron se atmabal kamzor hua hai aur kitne toh bann gaye hain mann ke das.

Kalyuga ka hua hai aisa parinaam
Ki kaheen kaheen toh bandagi bhi ho rahi hai badnaam
Kripa kar keejiye koi aisa intazaam
Ki har dil hee bann jaaye dham.

Dham, itna shant aur sundar
Jis mein ho Gurbani ka samundar
Simran chalta rahe yoon is dham ke andar
Ki bhakt dekh paaye Aapko swayam aur doojon ke bheetar.

Dham, itna prem bhara aur pavitra
Ki swarnamayi ho jaaye sabka charitra
Ki vahaan buss jaaye Aapka roop aur chitr
Bannkar murshid, nath, aur mitr.

Dham, itna dayalu aur divya
Ki sabhi nibhaayein apna kartavya
Apna har kaarya Aapko arpit kar ke
Apne har kaam mein bhaav bhar ke.

Bhaav vaisa, jaisa Aapko hai pasand
Bhaav vaisa, jis se atma ko aaye nirmal anand
Kyunki vahee jaayegi uss paar
Jabb shareer reh jaayega is paar.

Sumat bakhshiye aisee ki uchit rahe hamaara aacharan
Hamaari laparwahi se na haani sahe paryavaran
Sakaratmakta phailaakar hum khushnuma banaayein vatavaran
Doosaron ke kaam aayein taaki safal ho hamaara janam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 17, 2022

Om Namaha Shivaya
Aaj Ka Suvichaar 🙏🏻🙏🏻 # 1610

     Dhoop Chhaaon

Dhoop chhaaon kee is zindagi mein
Jitna rahenge hum bandagi mein
Utna aasaan hoga lena dhoop aur chhaaon dono ka anand
Kyunki kabhi dhoop aur chhaaon hotey hain tez toh kabhi mandd.

Jaisi dhoop lagti hai meethi
Sharad ritu ke din
Vaisee dhoop kashtadayi hai lagti
Greeshma ritu mein chhaaon ke bin.

Veh chhaaon jo garm mausam mein deti hai sukh
Sardiyon mein usee chhaaon se hum moad lete hain mukh
Aur veh dhoop jo garmiyon mein hai sataati
Vahee sardiyon mein kitnee hai bhaati.

Kitnee fasal hoti hai har khet mein har gaaon mein
Kuch falti hai dhoop mein toh kuch chhaaon mein
Aisa hee hai hum praaniyon ke jeevan ka roop
Kabhi sukh, kabhi dukh, kabhi chhaaon, kabhi dhoop.

Shukrana Guruji ka Jinhonei hamein hai sweekaara
Jinhonei kitnon ka lekha likha hai dobaara
Ve dete Hain kasht sehene kee shakti
Ve bataate Hain khush rehne kee yukti.

Na dhoop sadaa rehni hai na hee chhaaon hai sthaayi
Ye qubool karte hain sooraj kee sunvaayee
Dhoop chhaaon ke khel khel ke beech rukti nahin hai srishti
Sukh dukh ke khel khel ke beech sada rehti hai bhakton par Guruji kee drishti.

Dhoop ka bhi apna maqsad hai
Chhaaon ka bhi hai anokha yogdaan
Sukh dukh bhi hain hamaare karmon ke prabhaav ke parinaam
Inkee oar hamaari pratikriya aur kriya se nirdhaarit hota hai aagey ka anjaam.

Isliye rakh kar Guruji par poorna vishwaas
Jeevan kee dhoop chhaaon mein banaaye rakhein apna santulan
Guruji ke maargdarshan ka shukrana kar
Jeete chalein nishtha se apna jeevan.

Bann jaayein Guruji kee kripa se
Guruji ka hum roop
Phir Shivmayi hongei hum sabb
Chaahe jeevan mein chhaaon ho ya ho dhoop.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 16, 2022

Om Namaha Shivaya
Aaj Ka Suvichaar 🙏🏻🙏🏻 # 1609

      Lekar Mann Mein Mai Yeh Aas

Guruji ke pyaar mein
Guruji ke dulaar mein
Nadiya kee bhanti mai behti rahoon
Apne bhaagya ko shubh kehti rahoon.

Aisa kuch mujh mein hai nahin
Ki Guruji ke charnon kee dhool kee aukat bhi rakh sakoon
Phir bhi Maalik ne apnaaya hai
Mai toh Shukrana kehte na thakoon.

Itne ayb jo mujh mein hain
Guruji ne unn sabke bavjood
Mujhe liya hai apni divya sharan mein
Taaki ho jaaye shunya mera vajood.

Chaahe mai baithi hoon
Ya rahi hoon chal
Chaahe subah ho
Ya sooraj raha ho dhal
Chaahe mai mushkil mein hoon
Ya har kasht raha ho tal
Chaahe veh aaj ho
Ya phir ho aane wala kal
Guruji ke hee simran mein
Beet jaaye mere jeevan ka har pal.

Jo bhi apne jeevan mein mai karti jaaoon
Uss se Guruji ko khush kar paaoon
Parampoojya pyaare Guruji ko rijhaaoon
Har saans se Unkee mahima gungunaaoon.

Har saans Unhee ko samarpan
Unkee chhavi se noorani ho mera mann
Guruji se guzaarish hai ki jeevan mein
Mil jaaye apne vajood se shunya honei ka dhan.

Kyunki tabhi toh antakaran mein hoga
Guruji aur buss Guruji ka vaas
Guruji ke charnon mein baithi hoon
Lekar mann mein mai yeh aas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 15, 2022

Om Namaha Shivaya
Aaj Ka Suvichaar 🙏🏻🙏🏻 # 1608

          Rabb Mein Hee Sabb Hai

Rabb mein hee sabb hai
Aisa kal thaa aur aisa aaj aur abb hai
Jiske liye Guruji mein Rabb hai
Uske liye Guruji mein sab hai.

Rabb hee Hain Paramatama
Aur har atma hai Paramatama ka ansh
Isliye har atma divya hai
Chaahe usey dhaaran kiye shareer ka ho jo bhi vansh.

Kitna spasht hai is satya se ye samajhna
Ki vyarth hai ameeri gareebi kee maya mein ulajhna
Bhautikvaad aur duniyavi starr juda hai is nashvar shareer se
Lekin charitra ka starr juda hai adhyaatmik taqdeer se.

Atma hai har jann kee mitra
Zaroori hai nikhaarna chitt ka chitr
Jaise jaise chitt hota jaayega pavitra
Jaise jaise swarnamayi hota jaayega charitra
Vaise vaise toadte huey agyanta kee zanjeer
Sanvarti jaayegi adhyaatmik taqdeer.

Ye mumkin nahin hai kewal ek hee pal mein
Ye nahin honei wala kewal aaj aur kal mein
Iske liye mann ko shant aur sthir rehna hona hoga halchal mein
Taaki veh kaam aa sakey har uljhan ke hal mein.

Tabhi toh Guruji ne diya hai is jeevan ko darja safar ka
Taaki hamaare is safar mein pramaan ho Unke vachanon ke asar ka
Anivaarya hai sabhi ka yogdaan
Varna kalyugi spandan karta rahega sabko pareshaan.

Gungaan karein Guruji kee vadiyaayee ka
Anusaran karein Guruji kee guruyaayee ka
Prayaas karein adhyatmik oonchaayee ka
Mita dein is ukti ko, ki ‘zamaana nahin hai bhalaayee ka.’

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 14, 2022

Om Namaha Shivaya
Aaj Ka Suvichaar 🙏🏻🙏🏻 # 1607

           Shraavan Maas Hai Aaya

Shraavan maas hai aaya
Akash hai muskuraaya
Baadal hain jal se garbhit
Prassann hai prakriti ka chitt.

Shivmayi hai ye saara sansaar
Aur Shivji Hain sabke paalanhaar
Guruji Hain Shivji ke avatar
Karte Hain bhakton ka kalyaan baarambaar
Brahmand vyaapt hai Unka shareer
Aur Unke vash mein hai Brahmand kee taqdeer.

Tabhi toh Shraavan maas mein
Shraavan se hee hota hai Unka jal abhishek
Devi devta toh Hain anek
Lekin Devon ke Dev toh Hain Shivji ek.

Shraavan ke maheene mein baraste hain jabb baadal
Hota hai abhishek Shiv Ashutosh ka
Jaise veh neer dhota hai prithvi ko
Aur deta hai dharti ka roop nikhaar
Vaise hee kyun na hum bhi Guru naam ke amrit se
Paapon ko dhoyein aur laayein swayam mein sudhaar?

Guruji mein hee Shivji, Guruji mein hee Srishti
Sabhi bhakton par rahe Guruji kee daya drishti
Guruji kahein padhne aur sunn-ne ko Shiv Puran
Shraavan mein pathan aur shravan kee mahima aur bhi mahaan.

Shraavan mein toh khaaskar
Paramatama mein ramm jaati hai prakriti
Hum bhi kyun na is pavitra maas mein
Sanvaarein apni atma kee aakriti?

Jaise jaise soch aur karma mein vikaar aur paap jaate hain samaa
Vaise vaise duuri badhti hai atma aur Paramatama ke darmiyan
Koshish karein ki hamaare sanskaar ho jaayein paawan
Shuddhi ka vaada karein swayam se is Shraavan.

Guruji, Shraavan ka ashish dete huey deejiye aisee subuddhi
Ki Aapki mehar se ho hamaari atma kee shuddhi
Kuch bhi nahin hai Aap Paramatama ko rijhaane se zyada zaroori
Aapki kripa se mitaa paayein hum atma aur Paramatama ke darmiyan kee duuri.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 13, 2022

Om Namaha Shivaya
Aaj Ka Suvichaar 🙏🏻🙏🏻 # 1606

Guruji Ne Kayi Dekhe Hain Hamaare Jaise

Guruji ne kayi dekhe hain hamaare jaise
Lekin humne na dekha koi bhi Guruji sa
Aur dikhega bhi kaise jabb Unke jaisa koi hai hee nahin
Har sangat Unkee deewaani hokar kehti hai yahee.

Shakti mein sarvashreshth
Gyan mein sarvottam
Rabb ke roop mein Sarvesh
Bashar ke roop mein Purushottam.

Ve Brahmaand ke shehenshah
Hum keechad ke keet-patang
Hum kalyuga ke neech praani
Guruji sada hamaare angg sangg.

Ve sikhaate sikhaate thakte nahin
Hum bhoolte bhoolte rukte nahin
Bemisaal hai Guruji ka dheeraj
Nirlep Hain Ve jaise neeraj.

Andhkaar mitaane aaye Hain
Tabhi toh Guru kehlaaye Hain
Sadhusheelta mein hai prabalta
Guruji tabhi sikhaayein saralta
Kahein har bhakt se ‘banda bann’
Aur kaun itna khayaal rakhta hai har kshan?

Guruji beshak swayam Hain agochar
Lekin hota hai nirantar Unkee maujoodagi ka ehsaas
Aise Guru ko paakar
Shishya kyun kabhi bhi ho udaas.

Sajag kiya Unhonei
Is maade samay ke baare mein
Koi kasar nahin hai chodi
Aaj bhi Apne diye sahaare mein.

Isliye abb takk nahin bhi kiya shuru
Toh abhi se kar dein aarambh
Mann ke bartan ko simran se dhone mein
Na karein hum abb aur vilamb
Vikaaron aur paapon se rahein duur
Taaki chitt par chadhey ruhaani noor.

Jitna khali aur saaf hoga mann roopi bartan
Utna hee grehen sheel hoga mann
Guru kripa toh baras rahi hai har kshan
Mann ekatrit kar paayega Guru naam ka dhan.

Aaj hai Gurupurnima ka shubh avsar
Tyaag kar hum kaam, krodh, lobh, aur matsar
Moh aur ahankar ko na hamla karne dein apne bheetar
Neeven hokar jhukaayein Guru dar par apna sir.

Sabhi ko bahut mubarak ho aaj ka yeh paawan din
Sach mein atma kee oordhvagati nahin hai Guru ke bin
Guruji bakhshte rahiye aur karte rahiye kalyaan
Shukrana Guruji Aapka, ki Aapne banaaya hamein Apni santaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

July 12, 2022

Om Namaha Shivaya
Aaj Ka Suvichaar 🙏🏻🙏🏻 # 1605

 Ho Sabka Kalyaan

Aapki niswaarthta ko shat shat naman
Aapki guruyaayee ko koti koti pranaam
Aap Bhagwaan ke roop mein Hain Guru
Aur Guru ke roop mein Bhagwaan.

Kyunki Aap Hain Shivji ke avatar
Bann kar aaye taaranhaar
Shuddh bann-ne kee shiksha dee
Apne nirmal naam kee deeksha dee.

Niswaarth prem ka paath hai padhaaya
Insaaniyat ka raasta hai dikhaaya
Is kalyuga mein baney Hain Aap hamaare Guru
Taaki hum abhi se satygugi jeevan jeena karein shuru.

Aap Hain murshid
Hum Aapke shishya
Aap parivaar ke nath
Hum parivaar ke sadasya
Aapke hukm ko sadaa
Maanein hum apna kartavya
Aapki mehar se hee miley hain hamein
Drishti aur drishya
Aap hee kripa keejiye
Ki pavitrataa rahe unn mein
Aapke prem mein mann yoon leen ho jaaye
Ki magn rahein hum sada Aapki dhun mein.

Dabey rahenge sada Aapke ehsaanon ke taley
Guzaarish hai Aapse ki saare sansaar kee vipadaa taley
Har oar goonje Aapka paawan naam
Aapka naam lene se ho sabka kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja