Month: August 2022

August 31, 2022

Om Namaha Shivaya
Aaj Ka Suvichaar 🙏🏻🙏🏻 # 1655

                Ganesh Chaturthi 

Budhvaar ke Devta Hain
Pyaare Shri Ganesh
Vighna harta Hain Ve
Hai Unkee mahima aparampaar
Aur is varsh Budhvaar ke hee din
Hai Ganesh Chaturthi ka tyohaar.

Madhyaahan kaal mein
Hua Ganeshji ka janam
Maa Parvati ke shareer kee mayyl se
Huey Ve utpann.

Mata kee raksha ke liye baney Ve dwaarpal
Gana adhyaksh ka padd phir liya sambhaal
Unka kartavya paalan mata pita ko bhaaya
Aur Unhonei agrapooja ka vardaan paaya.

Maana jaata hai ki jo bhakt jann Ganesh Chaturthi par
Ganesh ji kee pratima kee karte hain sthaapana
Aur phir dus din ke liye karte hain Ganesh ji ka puja vandan
Unke saare sankat har lete Hain Parvati nandan.

Dhol nagaade bajte hain
Bhakt jann sajte Hain
Jhaankiyon ke karte hain darshan
Gaate aur sunte hain Ganeshji ke bhajan.

Modak hon ya makhaane kee ho kheer
Inke bhog se Ganapati ji hotey Hain prassann
Dukh harta sukh karta Ganapati Bappa
Karte Hain Apne bhakton ko sampann.

Duss din ka yeh mahotsav
Dhoom dhaam ke sangg aaj hai aaya
Bhakton ne badi shraddha se
Ganapati kee pratima ko hai sajaaya.

Phal, patte, aur phool
Deepak, durva, aur kaphoor
Sindoor, haldi, dhoop, aur chandan
In sabse ho raha hai Unka shringaar aur stavan.

Ganeshji ke maathe ka hai sindoori rangg
Hai Unka divya aur anokha dhangg
Vandaneeya hai Unkee subuddhi aur soch kee shuddhi
Unke sangg Hain Shubh, Laabh, Riddhi aur Siddhi.

Guruji ke banvaaye Bade Mandir mein
Pravesh karte hee Ganeshji kee moorti ke hotey hain darshan
Vighna harta Ganapati ke ashirwaad se
Vikaaron ko tyaag kar hum karein apni atma ka poshan.

Hamaare adhyaatmik safar mein vighna bannkar
Hamein neeche giraate hain hamaare vikaar
Bahut hee badi baadha hai ye agyan ka andhkaar
Adhyaatmik raaste par ye baadha roak leti hai baar baar.

Ganesh ji ke ashish se har kaarya ka hota hai shubh aarambh
Aaj is shubh din par vikaar tyaagne mein na karein hum vilamb
Simran aur dhyan karein baarambaar
Taaki hatt jaaye raaste ka agyan roopi andhkaar.

In vighnon ke hatne se hee hoga oordhvagati ka intazaam
Shraddha bhari bhakti se mil jaayega kshama daan
Ganeshji ke charnon mein koti koti pranaam
Param poojya hai Shivji ka parivaar aur Unka dhaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 30, 2022

Om Namaha Shivaya
Aaj Ka Suvichaar 🙏🏻🙏🏻 # 1654

      Sabse Mahatvapoorna Sandesh

Lahore kee Choona mandi mein janme Jetha Ji
Apne pita HarDasji aur Mata Dayaji kee dhanya santaan
Anaath honei ke pashchaat rahe Ve nani nana ke saath
Unhonei nani ke kehne par kiya chane bechne ka kaam.

Jetha ji kee sewa se hokar prassann
Guru Amar Das Ji ne unse byahi Apni behen
Unkee yogyataa dekhkar Unhe Guru gaddi ka mila sammaan
In Guru Ram Das Ji ke ashirwaad se Amritsar ko mila apna naam.

Dharma ka kiya Unhonei prachaar
Unhonei kiya paropkaar
Apne putr Guru Arjun Dev Ji ko niyukt kiya Gurugaddi par
Goindwal Sahib mein Unhonei Apna shareer choda aur ho gaye amar.

Inhee Guru RamDas ji ke Jyoti Jyoti divas par sabhi ko naman
Sikhon ke chauthe Guru is din Nirankaar kee jyot mein samaaye
Aaj bhi sangat atyant prem aur aadar se
Unke sammaan mein sees jhukaaye.

Hartalika Teej ka bhi din hai aaya
Yeh tyohaar akhand saubhagya ka vardaan hai laaya
Niraahaar nirjal rehne kee hai reet
Naariyan maangti hain apne suhaag kee lambi aayu
Aur dikhaati hain is tareh se apne preetam kee oar preet.

Kunvaari kanya bhi manovaanchhit var paane kee ichcha se
Rakhti hain nirjalaa vrat is tyohaar ke din
Maanyataa hai ki Maa Parvati ne Shivji ko paane ke liye
Kathor tapp kiya aur yeh vrat rakha ann aur jal liye bin.

Hartalika Teej ke din
Bholenath huey AdiShakti se prassann
Unhonei Maa Parvati ko sweekaara
Aur Srishti honei lagi sampann.

Parv ke prabhat mein ghar kee hoti hai safaai
Naari karti hai solah shringaar
Khoob ullaas aur pyaar se
Veh hoti hai is vrat ke liye tayyaar.

Baalu ret ka Shivlinga banaakar
Naari paanch baar karti hai poojan
Shivji aur Maa Parvati ko sajaakar
Karti hai veh Unka stavan bhara vandan.

Guruji ne Apne bhakton ke liye
Banaaya har tyohaar ko itnee saralta se khaas
Jabb takk kisee ko Unka hukm na ho
Tabb takk awashyak nahin hai ann jal ka upvaas.

Ve buss kahein hum bande banein
Vikaaron aur paapon ka upvaas karein
Bhog bhogein aur lein jeevan ka anand
Lekin aasakti kee vajeh se na bhoolein Paramanand.

Ghar se bhi pehle antarmann kee safaai ka karein abhyaas
Nirantar karein hum simran ka prayaas
Vrat rakhein beshak chaav se
Karma karein shuddh bhaav se
Ghar parivaar kee oar kartavya nibhaayein
Insaaniyat dwara sansaar ko yogdaan de paayein.

Jabb jabb boyenge hum bhakti ka beej
Hum mann hee mann manaa paayenge teej
Reet nibhaane kee nahin hai koi manaahi Guruji ke darbar mein
Lekin atmabal kamzor nahin karna
Karma kaand ya andhvishwaas ke dabaav mein.

Paramatama mein hoga atma ka samaavesh
Yahee hai sabse mahatvapoorna sandesh
Sabhi mein Shiv basey Hain, aur Guru Hain Nirankaar ka roop
Sabhi mein divya jyot hai, akhand aur anoop.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 29, 2022

Om Namaha Shivaya
Aaj Ka Suvichaar 🙏🏻🙏🏻 # 1653

Khushkismati Ka Paigaam

Pyaare Guruji, madad keejiye
Ki Aapki kripa se mujh mein jaagte rahein nek jazbaat
Pyaare Guruji, aisee subuddhi bakhshiye
Ki mai vikaaron ke har paash se ho paaoon azad.

Na jaane kitne kukarma aur paap kiye hain mainey
Apne is janam aur har pichhle janam mein
Apni mehar se ve sab katvaa deejiye
Aur Apna ashish piro deejiye mere har aane wale karam mein.

Kartavya nibhaa sakoon aise
Ki Aapko mujh par ho garv
Har din ko Shukrana mein aise jeeyoon
Jaise har din ho khaas parv.

Bin kisee shart ke
Aapse karti rahoon mai pyaar
Aapka naam japne ke liye
Na karoon kisee mahurat ka intazaar.

Apni khaamiyan sudhaarne mein
Itnee vyast rahoon mai
Ki doojon kee galatiyon se bilkul
Bekhabar aur mastt rahoon mai.

Jahaan se bhi praapt ho pyaar aur gyan
Unhe sweekaaroon main dekar sammaan
Kalyuga ka saamna kar raha hai ye saara jahaan
Mai insaaniyat ka farz nibhaakar doon apna yogdaan.

Aapse pehle koi na thaa mila
Jo meri bhavna ko Aapke jaise paaye jaan
Aapne sweekaara toh chitt ka kamal khila
Aur mil gaya mujhe khushkismati ka paigaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 28, 2022

Om Namaha Shivaya
Aaj Ka Suvichaar 🙏🏻🙏🏻 # 1652

         Taraash Deejiye Mujhe Aise

Pyaare Guruji, taraash deejiye mujhe aise
Ki pathhar se heera jaaoon mai bann
Sumat bakhshiye aisee
Ki Aapki raza mein raazi rehkar beet jaaye mera jeevan.

Aise sanvaar deejiye mere antakaran ko
Ki Aapki chhavi kee jhalak mujh mein aaye nazar
Aisee deeksha deejiye
Ki Aapke hukm ka gulam rahe mera ye safar.

Daat aisee bakhshiye ruhaaniyat kee
Ki nirantar kaamna rahe ibadat kee
Aisa leen kar deejiye simran mein
Ki koi bura khayaal aa hee na sakey mann mein.

Satsang kee saugat deejiye aisee
Ki Aapki mahima ka bakhaan sunti aur karti rahoon
Chetna jaagrit karte rahiye aisee
Ki mai maree hui machlee kee bhanti bahaav mein na bahoon.

Sewa bhaav ka Apna ashirwaad yoon deejiye
Ki gupt rakhkar, neevenpann se kar sakoon sewa adaa
Gupt daan kee prerna dete rahiye
Taaki udaar rahe mera dil sadaa.

Jaisa Aap chaahte Hain ki mai banoon
Mujhe vaisa banaa deejiye
Guzaarish hai Aapse ki mere har janam mein
Aap mujhe Apne charnon mein panaah deejiye.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 27, 2022

Om Namaha Shivaya
Aaj Ka Suvichaar 🙏🏻🙏🏻 # 1651

Guruji Se Tum Pyaar Karo

Guruji se tum pyaar karo
Is pyaar ka ikraar karo
Yeh ikraar baar baar karo
Kisee mahoorat ka matt intazaar karo.

Guruji se dil ka haal kaho
Jawaab paane ke liye sawaal kaho
Mann mein aane wala har khayaal kaho
Unhe prem se deen dayal kaho.

Guruji par vishwaas karo
Vikaaron ka upvaas karo
Na vyarth apne shwaas karo
Simran ka prayaas karo.

Guruji ka sammaan karo
Gupt paath aur gupt daan karo
Guruji ke har hukm ka maan karo
Shraddha se Unka dhyan karo.

Guruji kee mahima ka bakhaan karo
Guruji ke geeton ka gungaan karo
Unke charnon mein apni matt qurbaan karo
Unkee agya se Unke charanodak ka paan karo.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 26, 2022

Om Namaha Shivaya
Aaj Ka Suvichaar 🙏🏻🙏🏻 # 1650

Jabb Se Mera Sees Unke Charnon Mein Hai Aaya

Guruji kee mehar se
Mainey Unke naam ka deep jalaaya
Unke naam kee lau mein
Tarne laga hai mera wajood aur mera saaya.

Guruji ke naam ka khumaar
Mere chitt ko yoon hai bhaaya
Ki uss khumaar ke matvalepann se
Mere roam roam mein anand hai samaaya.

Guruji ne protsaahan dekar
Kathin raahon par bhi hai chalaaya
Jabb museebaton ka pahaad bhi aaya
Unhonei himmat dekar uspar chadhaaya aur usey paar karaaya.

Guruji kee mamta paakar
Mera dil har dard bhool paaya
Murshid Hain Ve, meet bhi
Unhonei har kadam par samjhaaya.

Aisee leela hai Guruji kee
Aisa prataap Unhonei hai dikhaaya
Ki atoot vishwaas ho gaya hai Unpar
Aur dil mein Shukrana ka bhaav hai aaya.

Guruji ke noor se ujjwal hua hai mera safar
Aur mera har raasta hai jagmagaaya
Mere antakaran kee vaadiyaan goonjti hain Guruji ka naam lekar
Jabb se mera sees Unke charnon mein hai aaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 25, 2022

Om Namaha Shivaya
Aaj Ka Suvichaar 🙏🏻🙏🏻 # 1649

Isee Se Kalyaanmayi Hoga Jeevan

Na vyarth ganvaayein ye samaa
De dein aur maang lein kshama
Vishwaas karein, andhvishwaas nahin
Ehsaas karein, uphaas nahin.

Sadh kee sangat karein, kusangat nahin
Guruji ka simran karein, museebaton ka smaran nahin
Ibadat karein, shikayat nahin,
Maanein Guruji kee, maangein nahin.

Beparwaah rahein, laparwah nahin
Shukraguzaar rahein, nashukr nahin
Ullaasit rahein, udaas nahin
Mann ke swami banein, mann ke das nahin.

Guruji ke saamne sabki zindagi hai khuli kitaab
Koi laabh nahin chadhaane ka ispar nakaab
Jo Nirankar deta hai khushiyaan behisaab
Na rakhein Unhe yaad karne ke palon ka hum hisaab.

Buss, har vele simran
Har vele dhanyawaad
Isee se kalyaanmayi hoga jeevan
Jo hai Unka diya hua prasaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 24, 2022

Om Namaha Shivaya
Aaj Ka Suvichaar 🙏🏻🙏🏻 # 1648

       Param Poojya Pooran Guruvar

Jee chaahe ki bina vilamb
Guruji kee mahima ka gungaan karoon aarambh
Kahaan se karoon shuru aur khatm karoon kahaan
Yeh sochte sochte beet jaayega saara samaa.

Isliye abhi sehaj tareeke se kehti hoon
Guruji ke prem mein nadi kee tareh mai behti hoon
Unkee mahima hai aparampaar
Ve sab bhakton ko dete Hain taar.

Roop se skandit hoti hai shanti
Mukh par Unke mahaan Kanti
Mandd mandd muskaan
Leela anokhi aur mahaan.

Anant gyan kee Hain Ve khan
Guruji karunanidhaan
Karuna ke kunj
Prem ke punj.

Virat hai Unka roop
Komal hai Unka swaroop
Padma dono charan mein
Har sukh Unkee sharan mein.

Maa kee mamta
Leela mein sarv kshamtaa
Pita ka dulaar
Sangat ke liye pyaar.

Bhakton ke adheen
Noor Unka nirmal naveen
Peeron ke peer
Agam agochar abir.

Kshamasheel dayaavaan
Sampoorna adhyatmik gyan
Divya aur dayalu hai jinka dar
Ve Hain param poojya Pooran Guruvar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 23, 2022

Om Namaha Shivaya
Aaj Ka Suvichaar 🙏🏻🙏🏻 # 1647

     Zindagi Ko Jee

Tu hai Guruji kee sharan mein
Samarpan kar Unke kamal charan mein
Guru hee kaam aate Hain sankat haran mein
Ve tere saathi Hain janam aur maran mein.

Sabr rakh
Langar prasad chhak
Amrit pee
Zindagi ko jee.

Sirf saansein lena hee nahin hai zindagi
Ismein shaamil kar har pal tu bandagi
Apne gunaahon par mehsoos kar sharmindagi
Tujhe milegi Guruji kee bakhshindagi.

Har uljhan jo tere zehen mein chal rahi hai
Usey Guruji suljhaayenge
Har veh samaadhaan jo tujhe dikh nahin raha
Guruji tujhe dikhaayenge.

Guruji kahein ‘aish kar’ aur ‘banda bann’
Chhalka tu apne vyavhaar aur vichaar mein insaaniyat ke gunn
Bhog bhogta chal, achche se jee jeevan
Lekin bhog mein aasakt na kar apna mann.

Aasakti aur moh ka vikaar phir tujhe nahin sataayega
Koshish karega tu toh anya vikaaron par bhi vijay paayega
Guruji dekh rahe Hain tera sabr
Tu Unka Shukrana kar
Na baith haath par haath dhar
Unke naam se sajaa apna swar.

Guruji ka diya amrit aur langar prasad
Shuddh karega tere dil ka har jazbaat
Yeh maanav jeevan mila hai itnee yooniyon ke pashchaat
Shukraguzaar ho ki tujhe mil paayi hai ye daat.

Chauraasi lakh yooniyan kar rahi hain intazaar
Ki kisee tareh se tu gir jaaye abb kee baar
Taaki ve phir se phansaa lein tujhe apne jaal mein
Aur tu pachhtaaye apne bigde huey haal mein.

Lekin Guruji kar rahe Hain intazaar
Ki tu badhaaye bandagi mein shraddha aur pyaar
Aur Ve bakhshein tujhe baarambaar
Taaki tera hota chale uddhaar.

Teri atma kee janmajaat hai pavitra
Uskee sampannata ke liye aawashyak hai tera sucharitra
Tera saubhagya hai ki Guruji Hain tere mitr
Tu sab Unpar chod de, bilkul bhi na kar tu fikr.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

August 22, 2022

Om Namaha Shivaya
Aaj Ka Suvichaar 🙏🏻🙏🏻 # 1646

             Guruji Ne Kaha Thaa

Guruji ne kaha thaa
Aane wala hai bahut maada samay
Naam ka japp aur paath zaroori hai
Ismein nahin hai koi sanshay.

Aa gaya hai veh samay maada
Naam ka simran hee hai ekmaatra sahara
Guruji ne hamein Apne dwaar par hai pukaara
Chamka hai hamaari kismat ka sitaara.

Kalyuga ke ghor tufaan mein
Panaah milee hai hamein naam mein
Yahee raksha karega har kaam mein
Subah mein aur shaam mein.

Phir bhi na jaane kyun hum japp nahin paate
Khaaskar jabb jeevan mein sankat hain aate
Isliye swayam ko yaad dilaayein
Aur apne japp, simran, aur paath ko badhaayein.

Sukh mein naam, dukh mein naam
Yahee dega antakaran ko aaraam
Jeevan beshak bann jaaye sangraam
Guruji ke naam mein hai shakti mahaan.

Kalyuga mein naam hai maansik shanti ka hal
Isee se badhega gyan aur atmabal
Awashya katenge museebaton ke pal
Har shwaas se, har kadam pe, aye bande, tu naam japta chal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja