Om Namaha Shivaya Aaj Ka Suvichaar ππ»ππ» # 1715
Raaste Ke Beech Na Dhoondh Tu Manzil
Raaste ke beech na dhoondh tu manzil Manzil hai raaste ke paar Kaise pahunchega tu vahaan takk Vahee hai tere jeevan ka saar.
Jo beetegi tujh par is raaste par Usey seh kar, uska saamna kar ke hoga tera uddhaar Jo sakaaraatmak parivartan tujh mein aayega Vahee hoga tera sudhaar.
Tu apni chetna kee awaaz nazar andaaz kar ke Na dena apne kisee karam ko bigaad Kyunki teri anginat galatiyon ke baavajood bhi Tujhe Guruji ne kiya hai sweekaar.
Ve teri madad karte rahenge Tu Unhe shuddh bhaav se deta chal pukaar Ve bakhshte rahenge tujhe Tu maafi maangte rehna baarambaar.
Kyunki chaahe anjaane mein hee hon Tujh se galatiyan hoti hain kayi baar Aur teri kshamaa yachna sweekarenge Guruji Kyunki Ve Hain bakhshanhaar.
Teri neeyat aur mehnat dekh kar Tujh par rehmat barsaate chalenge Guru sarkar Tera vairaagya dekh kar Tujhe Apne kareeb laate chalenge Ve Nirankaar.
Tu sabr rakh aur har farz nibha Guruji khatm karenge tera har vikaar Tujhe santosh kee daat dekar Guruji prem se tujhe denge taar.
Raasta katt jaayega Beshak imtehaan honge kayi hazaar Guruji har pal tere angg sangg hongei Isliye zaroor pahunchega tu manzil par, raaste ke paar.
Om Namaha Shivaya Aaj Ka Suvichaar ππ»ππ» # 1714
Tu Apna Bhalaa Jaan
Guruji na bhi aayein tujhe nazar Toh bhi Ve rakh rahe Hain tujh par nazar Chetna ke roop mein Galat kaam karne se Ve rokein Prerna ke roop mein Himmat haarne se Ve tokein.
Ve Guruji hee Hain Jo kar rahe Hain tera uddhaar tujhe Apne se jod kar Ve Guruji hee Hain Jo tujhe azaad kar rahe Hain tere bhautik bandhan toad kar.
Jo sukoon milta hai tujhe simran se Guruji Hain uss ehsaas ke aadhaar Jo seekh mil rahi hai tujhe jeevan se Guruji hee Hain usmein madadgaar.
Jo lagta hai tujhe ki kaise itne kumm samay mein Tere karmon ke sainkdon khaate chal rahe hain ek saath Ve aur koi nahin balki Guruji Hain Jinka hai is silsile mein poora haath.
Ho rahi hai tujhe bhog se jo anaasakti Usmein lagg rahi hai Guruji kee anant shakti Jis safar par chal padi hai teri Unke prati bhakti Veh bhi hai Unkee hee anokhi hitkaari yukti.
Waqt kee jis dhaara mein tu haath dho raha hai Uska bahaav Unkee marzi se hee ho raha hai Sewa ke jo beej Guru kripa se tu karma bhoomi mein bo raha hai Guruji ka mahaatmya unke dwaara tere pichhle paap dho raha hai.
Jo vairaagya ho raha hai tujhe sansaar se Jo aakarshan ho raha hai tujhe divya pukaar se Guruji hee Hain iska raaz ruhaani Kyunki Unkee leela hai bilkul deewani.
Toone maanga Unse ki Ve karein tera kalyaan Isliye Unhonei shuru kar dee teri ruhaani udaan Guruji ke hee vash mein hai yeh vichitra vimaan Aur jo ho raha hai, usmein tu apna bhalaa jaan.
Om Namaha Shivaya Aaj Ka Suvichaar ππ»ππ» # 1713
Aane Wala Kal Hoga Aaj Se Behtar
Samaa raha hai guzar Tu bilkul chinta na kar Guruji rakh rahein Hain tujh par nazar Aane wala kal hoga aaj se behtar.
Guruji ke simran se uday hogi sehar Unkee kripa se simran hoga aathon pehar Aise barasti rahegi Unkee mehar Ki daraa na paayega koi keher.
Unhe hai tera poora poora khayaal Isliye mann se hataa de tu shankaa wale sawaal Arey, Unkee leela hai aparampaar bemisaal Unkee leela se kushal ho jaayega tera haal.
Vaise toh abhi bhi is se zyada bura hota tera haal Ye toh Guruji Hain jo rahe Hain tujhe sambhaal Unke kisee hukm ko na taal Kyunki Unka naam aur vachan hai teri dhaal.
Matt ghabraa Buss, muskuraa Guruji ke naam mein mastt ho jaa Unke hukm ke paalan mein vyast ho jaa.
Ve karte rahenge tujh par nadar Unke ashirwaad ka hoga poora asar Tu hoga Unke chaahe panth par agrasar Aur aane wala kal hoga aaj se behtar.
Om Namaha Shivaya Aaj Ka Suvichaar ππ»ππ» # 1711
Surakshit Hai Tu
Surakshit hai tu Susajjit hai tu Guruji ke naam dwaara Isliye tu nahin hai bechaara.
Dukh agar padega tujhe sehna Niraasha mein tu matt rehna Guruji ke naam ka jo kavach hai toone pehna Vo hai tera sabse anmol gehna.
Matt kar atma taras Tujh par mehar rahi hai baras Isee dukh se nikalega raasta sukh ka Tu shukrana manaayega is dukh ka.
Guruji saagar Hain rehmat ke Ve strot Hain himmat ke Tu prerna strot bann ibadat ka Shukrana kar Unkee har inaayat ka.
Dukh ka astitva hee jaayega mit Kyunki har paristhiti mein hoga tera hitt Kaheen kaheen chhipa hua sa, kaheen kaheen spasht Isliye tujhe koi kasht na lagega kasht.
Guruji ke naam ka kavach tujhe zaroor aise mukaam par pahunchaayega Jabb har sukh dukh kewal ek behta anubhav bann kar reh jaayega Is kavach ke bandhan dwaara hee milegi tujhe veh mukti Kayi janmon se teri atma dhoondh rahi hai jiskee yukti.
Is azaadi kee oar badhta chal Samay ka sooraj raha hai dhal Is nek iraade ko na badal Isee ke anusaran se tu hoga safal.
Om Namaha Shivaya Aaj Ka Suvichaar ππ»ππ» # 1710
Brajvaasiyon Ka Khaas Tyohaar
Aa raha hai Brajvaasiyon ka khaas tyohaar Govardhan Puja ka yeh din aata hai varsh mein ek baar Vaise jo Diwali ke agley din jaata hai manaaya Veh Annakoot soorya grehen ke pashchaat jaayega manaaya.
Kul devi devtaaon ka kiya jaata hai vandan Gaay bayyl ko snaan karaakar lagaaya jaata hai unhe chandan Aakriti banaayi jaati hai Govardhan parvat kee aur sajta hai ghar ka aangan Gaay kee aarti hai kee jaati aur hota hai Unka poojan.
Shri Krishna Bhagwaan kee pooja aur aarti ke baad Chhappan vyanjan ka bhog lagaaya hai jaata Bhagwaan ko Devraj Indra ke kop se Krishna ji ne bachaaya thaa praaniyon ko Aur toda thaa Indra Dev ke ahankar ko.
Apni chhoti anguli par utha liya thaa Unhonei Govardhan parvat Nakaam hua Indra dwaara rachaaya baarish roopi sankat Sabhi Brajvaasiyon ne milkar banaayi subzi annakoot kee is dauran Govardhan Parvat ke taley surakshit hokar bach gayi unn sabki jaan.
Prati din aath baar khaane wale Shri Krishna Bhagwaan Saat din niraahaar rahe uthaakar parvat mahaan Isliye bhakton ne Unhe chhappan bhog ka diya sammaan Aur tabhi se chalaa aa raha hai is prathaa ka gungaan.
Kaha jaata hai ki Indra Dev ne Krishna ji se maanga kshama daan Dharma kee shiksha dekar Unhe kshama ka mila vardaan Unkee irshya mit gayi aur Unhonei dobara na kiya pehle jaisa shoshan Krishna ji kee kripa se hota raha prajaa ka sundar poshan.
Guruji Apne bhakton ke liye Kitne sankat roopi pahaad uthaate Hain Dharma kee shiksha dete Hain Gurbani ke simran dwaara Ahankar mitaate Hain aur dete Hain hamein sahaara.
Kshama daan dete Hain GurujΔ« bakhshanhaar Hain Taarte Hain bhakton ko Ve taaranhaar Hain.
Agam agochar Hain Guruji Kintu Unkee daya barasti hai aparampaar Guruji ne hee toh sambhaala hua hai Apne sabb bhakton ka ghar sansaar.
Om Namaha Shivaya Aaj Ka Suvichaar ππ»ππ» # 1709
Kaartik Amaavasya
Kaartik Amaavasya kee mahatvapoorna raat Keh rahi hai hum sabse bahut zaroori baat Ki raat nahin hai kewal aasmaan mein Balki hai hamaare girebaan mein Basee hai raat hamaare agyan mein Jiska upaay hai simran aur dhyan mein.
Ram basey Hain sabhi mein Divya chetna ke roop mein Lekin antakaran mein duvidhaaon ke sangraam mein Yuddh chal raha hai Raavan aur Ram mein.
Raavan ne kee bahut bhakti Thi uske paas bahut shakti Thaa veh bahut gyani Lekin thaa bahut abhimaani.
Sita maiya vanvaas ke dauran bhi Rehti thi Ram ke dhyan mein magn Lekin aakarshit huin sunehre hiran kee oar Unhonei agyanta vash Laxman Rekha bhi dee toad Ho gaya Unpar aakraman Lanka mein saha Sita Ma ne akelapan.
Lakh koshish kee Raavan ne lekin Na jeet sakaa veh Sita ka dil Ram ji aur Raavan ke beech hua yuddh Jeete Shri Ram jinke gunn thei shuddh.
Chaudah varsh beetne par Pahunche Ayodhya ke dar par Prajaa ko milee khushi aur shanti Noorani hoti gayi Shri Ram kee kanti.
Yuddh bhoomi hai yeh antakaran Isey vyaakul karte hain aakarshan Mann duvidha mein rehta hai Agyan vash hokar dukh sehta hai Ho jaata hai asthaayee aur ksheen Phir vikaar lete hain mann kee shanti ko chheen.
Bandi Chhor Divas bhi hai aaj ke din Sikh itihaas poora nahin hai is mahatvapoorna din ke bin Silwaaya gaya khaas chola Shri HarGobind Ji ke liye Baavan rajaa mukt huey chole kee kaliyon ko pakde huey Is tareh se Guru HarGobind Ji ne unn rajaon ko Mughal kayyd se karvaaya aazad Ve Amritsar laute dhoom dhaam se uske baad.
Aatishbaaji hoti hai, jalaayein jaate hain deep Sandesh hai is utsav ka ki maan-ni hai Guru kee dee hui seekh Isey mein hai kalyaan Kyunki Guru ke vachan Hain sabse mahaan.
Guruji ka kaha maankar Unhe shubhchintak jaankar Jo hum karte rahein simran aur dhyan Toh duur nahin rahega ruhaani gyan.
Shart hai magar Ki karna nahin hai agar-magar Rakhni hai shraddha poori Bhog mein aanasakti hai zaroori Tyaagna hai ahankar Simran karna hai baarambaar.
Badhta jaayega manobal Duvidhaaein jaayengi tal Bheetar ke Raavan ka ho jaayega vinaash Antakaran ko roshan karega prakash.
Prakash, pavitrata ka Roshni, ruhaaniyat kee Spandan, shuddhi ka Ujaala, subuddhi ka.
Bandi Chhor Divas kee sabhi ko shubhkaamnaayein Sabhi ke bheetar gyan ke deep jal jaayein Aayiye, prem se Deepawali ka karein swaagat Sachche mann se karein ibadat Ki chetna aur gyan se atma rahe ujjwal Taaki hum utsav manaayein har pal.
Om Namaha Shivaya Aaj Ka Suvichaar ππ»ππ» # 1708
Roop Chaudas
Kaartik maas ke Krishna Paksh kee Chaturdashi hai aayi Roop Chaudas ka tyohaar hai laayi Chhoti Deepawali bhi hai iska naam Is parv kee har katha ko pranaam.
Vishnu Bhagwaan ne is khaas din par devtaaon ko Gyani Raja Bali ke aatank se mukti dilaayee Maanga Unhonei kewal teen paaon jitnee zameen ka daan Aur diya Bali ko varsh mein ek din yaad kiye jaane ka vardaan.
Narakasur ka vadh hua is din Bhagwaan Shri Krishna, Kali Maa, aur Satyabhama dwaara Isliye Narak Chaturdashi aur Kali Chaudas bhi kaha jaata hai isey, Aur Yamraj ka hota hai vandan Taaki akaal mrityu se bhayy ka ho khandan.
Abhyang snaan, ubtan, mehndi aur shringaar Mann mein shukrana ka vichaar Aise mein pooja karta hai saara parivaar Ki gyan ke deepon se mitey andhkaar.
Ghar kee achche se kee jaati hai safaai Har dooshit vastu kee hoti hai vidaayee Shaam kee pooja ke pashchaat ghar ke dwaar par Jalaakar rakhey hain jaate hain deeye Ye sabb kiya jaata hai Maa Laxmi ke swaagat ke liye.
Jaise kee jaati hai safaayee ghar kee Divyata ke niwaas ke liye Vaise hee apne bheetar kee safaai anivaarya hai Antakaran kee shuddhi ke liye.
Guruji ka kaha maankar Apni khaamiyon ko pehchaan kar Hum Unke ashish se swayam par mehnat kar Unkee sharan mein jaayein tarr.
Guruji, khandan ho jaaye hamaare har vikaar ka Hriday mein vaas ho ruhaani pyaar ka Aapki dee hui sumat se hum nibhaate chalein apna farz Aapki kripa se har pal kumm hota rahe hum par chadha hua karmon ka karz.
Guruji, Aapki mehar se hota rahe simran Aapki karuna se simran se saaf hota rahe mann Tann mein ho shakti aur roop Aapka diya hua Khud ko aur baaki sab ko dete rahein hum dua.
Roop Chaudas ke is parv par Shuddhi aaye sabke ghar Sankaton ka ho jaaye haran Mann ka ho pavitrikaran.
Om Namaha Shivaya Aaj Ka Suvichaar ππ»ππ» # 1707
Dhanwaan Banein
Dhanvantari Hain Dev Ayurveda ke Pauraanik kathaaon mein hai Unka gungaan Amrit se bharaa sonei ka kalash liye aaye Ve samundra manthan ke dauran.
Is amrit ke paan se devta Huey amar Aur honei lagaa Dhanvantari Dev ka sammaan Diwali panchotsav ka yeh pehle din Hota hai Dhanvantari Bhagwaan ke naam.
Unke prakat honei ke do din pashchaat Prakat huin Laxmi Mata Isliye Unkee pooja ke sangg Maa Laxmi ka poojan bhi hai kiya jaata.
Ganesh ji, Kuber Devta aur Yaamraaj ka hota hai vandan Maanyata hai ki dhaatu ke bartan, sona, chandi khareedane se badhta hai bhautik dhan.
Ruhaaniyat ka raasta Rakhta hai sanatan dhan se vaasta Aur awashya prasann hon Paramatama Jabb dhani ho hamaare tann, mann, aur atma.
Jabb takk hamaare tann mein hain praan Hamaara farz hai rakhna is tann ka dhyan Nirogi kaaya ke liye karein apni oar se prayatna Shaareerik swaasthya hai anmol ratna.
Guruji Apni sangat ko dein is oar jaane kee prerna Aur simran karne ko kahein taaki jaagrit hoti chale chetna Guruji se seedhi taar jodkar karein har soch aur karma Unhe arpan Taaki nek neeyat aur sadaasheelta se ho antakaran ka poshan.
Khud khaane se pehle Guruji ko pehla nivaala shraddha se khilaayein Guruji ke ashirwaad se Mann ke vikaar mit jaayein Humne suna hai, ki jaisa ann, vaisa mann Aur jaisa paani, vaisee vaani Isliye khaayein, peeyein, vichaarein shuddhi aur subuddhi se Taaki swasth tann aur mann se khushhaal ho zindagaani.
Simran, sewa, sadhna se hota chale Atma kee sadgati kee oar vikas Guruji ke ashirwaad se ye sabb hai mumkin Basharte nek ho hamaara iraada aur prayaas.
Guruji kee daya se kat-te rahein karma Unke ashish se nibhaate chalein hum insaaniyat ka dharma Badhti chale bhautik bhog mein anaasakti Badhti chale atma kee shakti.
Swasth tann, swasth atma, aur swasth mann Ye hain sabse anmol dhan Asthaayee hai baaki dhan sabb Khatm ho jaaye na jaane kabb.
Sona chaandi aadi khareedne mein nahin hai buraayee Magar yaad rahe ki aise dhan ka sukh hai asthaayee Isliye tann, mann, aur atma ke swaasthya ke liye karein parishram Aur Guruji kee kripa se dhanwaan banein paakar asal dhan.
Aaj Ka Suvichaar 