Sharad Navratri Ke Utsav Ka Samaapan (10/04/2022)

October 4, 2022

Om Namaha Shivaya
Aaj Ka Suvichaar 🙏🏻🙏🏻 # 1689

Sharad Navratri Ke Utsav Ka Samaapan

Aaj hai Sharad Navratri ke utsav ka samaapan
Maa Siddhidatri kee vishesh pooja ka hai din
Kamalaasan par Hain Maa viraajmaan
Himalaya ke Nanda parvat par hai Unka teerath sthaan.

Maa kee chaar bhujaaon mein hain
Kamal ka phool, chakra, shankh, aur gadaa
Maa Siddhidatri aadhaar shakti Hain
Ve poorna karti Hain bhakton kee ichchaayein sada.

Asht siddhi nau nidhi
Vivek aur buddhi
Mata karti Hain pradaan
Aur chehre par hai pyaari si muskaan.

Koi karey mantron ka uchchaaran
Koi karey stotra dwara maa ka vandan
Shuddh bhaav se jo bhi pooje
Maa karey uss bhakt ke kashton ka khandan.

Guruji bhi chaahein bhakton ka shuddh bhaav
Unhe Apni sangat ko santusht dekhne ka hai chaav
Navratri ke parv ko jaise sab utsaah se manaayein
Vaise hee jeevan ka har din khushi se bitaayein.

Neenven hokar rahein
Dil se shukrana kahein
Maangein kshama daan aur daat simran kee
Saump kar Gurujī ko doar jeevan kee.

🌹🌹🌹🌹🌹🌹🌹

Jai Gurujī 🙏🏻🙏🏻
Dhirja