Apnaa le hamaara aacharan Guruji ka har vachan Hamein har janam Miley Guruji kee sharan.
Karein hum Guruji ka satkaar bhara naman Kar dein swayam ko Guru charnon mein arpan Har sukh dukh sabb ho Unko samarpan Unhee mein sada leen rahe ye mann.
Guruji ke naam ka dhan Aabhooshit karde hamaara antakaran Yahee anmol dhan har kshan Karey ashanti aur asthirta ka haran.
Phir Guruji kee kripa se shant aur sthir rahe antarmann Taaki Guruji se taar joad paayein bin vikarshan Dhyan ho paaye humse, ho paaye humse simran Guruji ke charan mein beet jaaye ye jeevan.
Jis jiske sangg rehte hain bhugatne karam Zindagi ke path par milte rahein ve jann Karmon ka karz hota rahe khatam Taaki uss bhaar se riha hokar ho maran.
Guruji ka shukraguzaar rahe is tann ka har kann Unkee agya ka paalan karte huey bande jaayein bann Jeete jee bhi aabaad rahe Guruji ke naam se hriday ka upvan Aur praan bhi tann se niklein karte huey Guruji ka smaran.
Asha aur niraasha In dono pehluon se ankit rehta hai jeevan Kabhi asha bhari udaan bharta hai mann Toh kabhi mann ke saamne aate hain niraasha ke kshan.
Dono ka jeevan mein aana shaayad swaabhavik hai Kyunki jeevan hai karmon ka khel Lekin saamna karte huey mann sthir rahe, ye bhi bilkul zaroori hai Varna vaisa haal ho jaise patri par se utar jaati hai rail.
Duur karni hai agar niraasha kee nisha Toh apnaani hogi dhyan kee disha Jo kaheen baahar nahin hai, hai apne bheetar Yahee pahunchaayegi asha ke dar par.
Asha, adhyaatamikta kee Asha, sakaaraatmakta kee Har bhautik asha ho jaayegi phir khatam Jabb dhyan mein hum jaayenge ramm.
Bhautikvaad mein reh kar bhi Usmein na hogi aasakti Simran se aur bhakti se Zaroor milegi mann ko shakti.
Manobal badhega Mann rehne lagega sthir Bhautikvaad mein na jaayega gir Koi niraasha na hogi phir.
Guruji ke jaayein hum bann Toh sweekriti aur samarpan Simran dwaara milega ye dhan Inse vash mein rahega mann.
Guruji ke charnon mein reh kar Unke prem mein beh kar Unkee praapti kee rahegi mann mein asha Jisey poori karegi Unkee kripa kee bhaasha.
Guruji kee mehar antarmann mein amrit barsaayegi Baaki har asha amrit kee dhaara se dhul jaayegi Har niraasha kee nisha swayam bhi so jaayegi Bhakt kee atma Guruji mein kho jaayegi Paramatama se ho jaayega atma ka milan Guruji kee mehar se safal ho jaayega jeevan.
Guru ke roop mein aaye Nirankaar Guru Tegh Bahadur, sikhon ke nauvein Guru Guru Hargobind aur Mata Nanaki ke putr thei Ve Tyaagmal naam se Unka jeevan hua shuru.
Bachpan se hee Unka vyavhaar aur charitra Anokha aur ruhaani thaa, nirbhay aur pavitra Bhakti mein magn rehte thei Ve bachpan se Vidya bhi grahan karte thei shuddh mann se.
Takreeban terahn saal kee aayu mein Kartarpur pahunche Ve pitaji ke sangg Teg chalaane mein kushal thei itne Ki Unke pita ko bahut pasand aaya Unka dhangg.
Tabb se Teg Bahadur hua Tyaagmal ji ka naam Talwaar chalaane mein liya Unhonei aseem saahas se kaam Pita ke guzar jaane ke baad Baba Bakaala banaa Unka dhaam Vahaan pahunch kar bhi simran aur dhyan mein leen rehte thei Ve subah shaam.
Guru Harkrishan ji ne shareer chodne se pehle Guru Teg Bahadur ji kee oar kiya sanket ‘Baba Bakaala’ keh kar Paakhandiyon ne gaddi leni chaahi jhooth fareb kar ke Lekin Guru Teg Bahadur ekaagrachitt rahe ye sab kuch bhi seh kar.
Harmandir Sahib pahunche Guru Teg Bahadur ji Pujaari agyaantaa vash chale gaye bandd kar ke vahaan ke dwaar Vahaan ke chabootare par Guru ne kiya pujaariyon ka intazaar Isee chabootare ka ‘Thadaa Sahib’ hua naam, dene Guru Teg Bahadur ko satkaar.
Guru Teg Bahadur ne paas ke Gaaon ‘Valla’ mein kee sewa Phir Bakaala aur Kartarpur se hotey huey pahunche Kiratpur Thodi si zameen khareedkar ‘Gaaon Chak Nanaki’ ka Guru Sahib ne kiya nirmaan Isee paawan sthaan ka baad mein ‘Anandpur Sahib’ hua naam.
Sikh dharam ka karte huey paawan prachaar Guru Teg Bahadur kayi sheheron aur gaaon mein gaye Karne sewa aur sudhaar Antt mein pahunche Punjab, aur vahaan bhi karte rahe sangat ka uddhaar.
Balidaan ke liye tayyaar huey jabb Aurangzeb panditon ko dharma parivartan ke liye kar raha thaa laachaar. Guru Sahib sangg teen bhakton ne dharma badalne se kiya inkaar Bhai Dayaala Bhai Matidas Bhai Satidas Aurangzeb ke hukm par kiya gaya unpar vadh ka vaar.
Guru Teg Bahadur ke dhadh se sees ko alag kar diya gaya Tez aandhi tufaan se mausam bhi pratikriya mein bigad gaya Diya gaya Unhe prem aur bhakti se bhara aadar Shraddha se kaha jaata hai Unhe ‘Hind Kee Chaadar‘
Sir kataa liya dharma kee khaatir Lekin sir ko nahin jhukaaya Apni jaan kee qurbaani dekar Kitnon ko Unhonei bachaaya.
Dheeraj, dharma, shanti kee moorat Prerna aur prem ke strot Bhakti, nirmalta, sadgunon kee khaan Guru Teg Bahadur ji ko koti koti pranaam.
Guruji kee sharan mein bhakt jann Gurbani ka karte hain shravan aur manan Guruji ka hukm maankar banda banein Sudhaar kar apne vichaar aur karam.
Guruji chaahein hum tyaagein paakhand aur andhvishwaas Guruji kee maanein aur hum karein simran ka abhyaas Guru Nirankaar ke swaroop Hain jo aate Hain dharti par taarne ye sansaar Guru Teg Bahadur ke Shahaadat Divas par Unke charnon mein namaskaar.
Hum mein se anginat shishya aur bhakt hain Jinhonei Guruji ko bashar roop mein dekha nahin Tabb yakeenan waqt nahin aaya thaa hamaara Guruji ne tabb bhi diya hoga hamein sahaara.
Waqt aane par Unhonei bulaaya Apne dar par Aur Unkee sharan mein shuru hua maano ek naya safar Jismein hua har pal Unke saath ka ehsaas Aur is ehsaas se jeevan bann gaya itna khaas.
Kisee ko lagaa uska hua hai naya janam Kisee ko lagaa ki duur ho gaye gumm Imtehaan aaye lekin katne lagey karam Aur safal honei laga janam aur maran.
Guruji ko maanav roop mein bhakt beshak na miley hon is janam mein Lekin Guruji jaante Hain ki Unhonei kaunse janam mein liya kisey sharan mein Aaj ka juda bhakt Unse juda ho kayi janmon se, aisa bhi mumkin hai Aur ye ki barson se juda bhakt pehli baar juda ho isee janam mein.
Sabse badi baat hai ki hum mein se jo bhakt jann Guruji ko insaani roop mein na bhi dekh paaye agar Guruji hum sabko dekhte Hain har kshan Apni saari sangat par hoti hai Unkee nazar.
Guruji divya jyot Hain, Hain Ve bhakton ke swami Guruji Hain ruhaani maarg darshak, Hain Ve antaryami Guruji Hain Dev, murshid, aur bakhshanhaar Guruji Hain meet, naath, aur taaranhaar.
Guruji Hain chetna Guruji Hain prerna Guruji Hain strot uddhaar ke Guruji Hain adhyaksh parivaar ke.
Guruji nirmal noorani neev Hain Apne bhakton ke jeevan ke aadhaar Bhakt Guruji se jab bhi juda ho Guruji sab bhakton se karte Hain ek jaisa pyaar.
Idhar gaya, tu gaya udhar Khush karta raha logon ko, dhoondhta raha vafaa Vafaa milee bhi toh judi thi koi na koi shart ke saath Tu udaas hua, magar nibhaata raha vafaa kee adaa.
Beet-te rahe saal Tere mann mein uthne lagey sawaal Ummeed thi tujhe logon se, veh bhi toot gayi Tujhe lagne lagaa teri taqdeer tujhse rooth gayi.
Tujhe baandhne lagey moh ke dhaagey Tere diye pyaar ko jinhonei na sweekaara, ve thei abhaagey Lekin unke bajaaye chot tujhe lagi Dheere dheere teri chetna jagi.
Tujhe Khuda kee yaad aayi Toone dekha ki ek vahee rishta hai sthaayi Shukr hai tujhe hua ye ehsaas Varna vyarth jaata tera baaki har shwaas.
Abb bhool na jaana yeh patey kee baat Khush kar usey jo bin shart ke nibhaayega tera saath Kisee ke saath bura na kar Lekin tu kisee se na darr.
Sabke saath nibhaa apna farz Taaki na chadhe tujh par aur karmon ka karz Bin apeksha deta chal pyaar Lekin atma-sammaan rakh barkaraar.
Khuda ko khush rakh le Phir teri khushi nishchit hai Teri atma Unn Paramatama ka ansh hai na Isliye Unkee khushi mein teri atma ka hit hai.
Khuda ke farishte ya yoon kahein ki Khuda swayam Bashar ke roop mein aaye jabb Guruji ne liya janam Dete Hain aseem, paawan, aur niswaarth pyaar Bhakt kee khushi par Apna sab kuch dete Hain Ve vaar.
Isliye Guruji ko khush rakhne ka nibha kartavya Guruji ke jaisa nahin kisee shakti ka aishwarya Niswaarth bhakti kar taaki tu kabhi na ho niraash Aur yaad rakh, tere har marz kee dawaa hai Guruji ke paas.
Duniya ke chalchitra mein Rangg aur dhangg hain kayee hazaar Har pal chalchitra ke drishya mein hota rehta hai parivartan Guruji kee nazar rehti hai har drishya par har kshan.
Is chalchitra mein Guruji ke anginat bhakt hain Sabhi kee bhakti ka dhangg hai anokha Aur bhakt jann beshak jaise bhi hon Guruji sabhi ko Apne rangg mein rangg jaane ka dete Hain mauka.
Bhaav kee bhookh Pyaar kee pyaas Shraddha ka shwaas Guru milan kee aas Bhakt ke hon jo aise jazbaat Toh Guruji kyun na denge usey divya daat?
Kartavya nibhaane mein nishtha Chaal chalan mein shuddhi Neeyat mein neki Soch vichaar mein sadbuddhi Bhakt mein hon aise sadgunn Toh Guruji lete Hain usey chunn.
Sadaachaari aur sachcha Aasthaavaan aur achchaa Guru praapti ho jiskee ekmaatra ichcha Phir chaahe veh ho bada ya ho bachcha Jabb aisa ho Guruji ka bhakt Toh Guruji kaise ho sakte Hain sakht?
Duraachaari aur dusht Raah bhatka ho ya ho rusht Paapi ho ya ho pavitra Dayalu ho ya ho dushcharitra Guruji Apne har bhakt ko karte Hain sweekaar Ve Apne sabhi bhakton ko dete Hain ashirwaad aur pyaar.
Guruji kee vaddi hai vadiyaayee Anant hai Unke pyaar kee gehraayee Ve chaahte Hain Apne har bhakt kee achchaayee Bhakt jaisa bhi ho, Guruji sada karte Hain har bhakt kee bhalaayee.
Kumm hai jitna bhi karoon Aapka dhanyawaad Jeevan ka har lamha hai Aapka diya hua prasad Maalik mere, na ho kabhi bhi anaadar mujhse is prasad ka Har lamha aur bhi anmol hota chale hokar kritaarth Aapke ashirwaad ka.
Galatiyan chundd nahin, karti hoon kayee hazaar Aapka shukrana jo Aap nazar andaaz kar dete Hain har baar Sikhaate Hain saath saath, iske liye bhi hoon shukraguzaar Sambhaalte Hain itne pyaar se mera ghar parivaar.
Jitna shukrana karoon Aapka Veh nahin hai kaafi Aap deenanath Hain Dete Hain kitnee maafi.
Simran kee daat ka shukrana Satsang kee saugat ka shukrana Sewa, daan, paath kee mahima samjhaane ka aur avsar dene ka shukrana Ghar parivaar ka shukrana Sangat parivaar ka shukrana Har veh daat jo Aapne dee, uska shukrana Har veh daat jo Aapne deni munaasif na samjhi, uska shukrana.
Diya hai Aapne Apne pyaar aur dulaar ka khazaana Anant kripa hai Aapki, kumm hai mera shukrana Aapki mehar se hee chal raha hai jeevan ka afsaana Apni hee sharan mein rakhna, mere maalik, jabb yahaan se karenge mujhe ravaana.
Aapke charnon mein rahe mera sees Aap hee Guru Hain, Aap hee Hain mere Ish Aapse hai yeh vinamr guzaarish Ki sadaa dete rahiyega bhakti kee bakhshish.
Hum sabb hain ruhaani praani Jo aksar karte hain koi na koi naadaani Poojya Guruji kee hoti rahe hum par inaayat Taaki hamaare vyavhaar mein aabaad rahe insaaniyat.
Beshak apne pichhle karmon ka bhugat rahe hain phal Apni oar se sanvaarte chalein aaj aur aane wala kal Jo gaya hai beet, usey nahin sakte hum badal Lekin koshish kar sakte hain ki sachchaayee se jeeyein aane wala pal.
Raat ho ya ho savera Mann na sochta rahe ‘tera mera’ Jo hai vo bhi hai Maalik ka diya hua Aur koi nahin hai itna gareeb ki na de sakey doojon ko dua.
Is ‘tera mera’ ke silsile se oopar uth jaayein Pehle hee der ho chuki hai kaafi Bhautikvaad kee daud mein jo sadbhaav toota hai Uske liye sab hee maang lein Guruji se maafi.
Ek dooje se bhi maangein aur ek dooje ko dein kshama Shuddh bhaav se aabhooshit karein samaa Ginee chunee saansein hain sabhi ke paas Na khud rahein aur na doojon ko rehne dein udaas.
Prem kee sugandh bikherein har oar Dilon ko jodein apne ahem ko toad Hriday kee vaadiyon mein hota rahe Guruji ka vandan Chitt kee gehraaiyon ka shubh hota jaaye spandan.
Saamanjasya kee ho bahaar Har disha mein ho khushi aur pyaar Ruhaaniyat ka ho prachaar Sabka ho sukhi sansaar.
Hawa ke jhonke thei halke halke Jhoom rahin thi pedon kee teheniyan Phudak rahi thi gileheriyan.
Dikha drishya manoram Ullaasit hui dil kee dhadkan Mehak gaya vaatavaran.
Dikhi sundar si paalaki jismein Phoolon se sajaa hua pyaara sa aasan Uspar poojya Guruji viraajmaan.
Maathe par Unke tej aisa Ki sooraj karey Unko naman Chehre par muskuraahat itnee pyaari Ki gulistaan karey Unka vandan.
Khushboo Unkee itnee ruhaani Aaspaas kee hawa ho deewani Maasumiyat yoon chhalke Unke mukh se Ki udaas ka jeevan bhi bharpoor ho jaaye sukh se.
Mukhaarvind se Unke suna apna naam Unkee awaaz mein barsa kalyaan Ruh gadd gadd hui meri is prasad se Sees jhuk gaya Unke charan mein Unhonei mere sir par haath rakha laad se Manan karne lagaa mann naman mein.
Jabb Guruji ne pyaar se hanste huey Dikhaaya Apne charnon se nikalta hua amrit Toh Unke kamal charan ko dekh Vinamrata se anugrahit ho gaya mera chitt.
Pehle toh kuch na aaya samajh Kya karoon, kya na karoon Guruji kee agya se prashn gaya sulajh Unhonei Apne paaon kee oar sanket kiya yoon.
Mera bhaagya aur bhi khila Amrit ke sparsh ka mauka mujhe mila Guruji kee kripa se hua ye sab Kitne daya waan Hain Ve Rabb.
Amrit kee boond ko chhoo kar jabb palkein hui numm Tabb neend meri khuli ekdam Jaana ki Guruji ne diye swapn mein darshan Kaise bayaan karoon ki kitnee prasann hui mai uss kshan.
Guruji ne is naacheez ko Sapne mein Apne darshan dekar kritaarth kiya Jaanti hoon Unkee marzi ke bin ye mumkin nahin hai Mainey Unka bahut shukrana kiya.
Swapn mein ya shabad mein Swaroop darshan ya sakshat Apne bhakton par kripa barsaayein Guruji Dekar Apne darshan kee daat.
Guruji ka jitna shukrana kiya jaaye veh nahin hai kaafi Shukrana sangg maangte rahein Unse apni galatiyon ke liye maafi Ish bhi Ve Hain, Guru bhi Antt bhi jaante Hain Ve, aur shuru bhi Murshid bhi Ve Hain, naath bhi Agochar bhi Hain, aur sada saath bhi.
Na bhi hon kabhi Unke darshan Ve mann mein baste Hain har kshan Aur hum Unhe na bhi dekh paayein Hum har pal Unhe nazar aayein.
Yeh tasalli hai bahut badi Vishwaas ke bharose bhakti hai khadi Guruji kee sharan mein hai kalyaan hee kalyaan Shiv roopi Guruji Hain komal kripalu karunanidhaan.
Aaj Ka Suvichaar 