November 2, 2022
Om Namaha Shivaya
Aaj Ka Suvichaar 🙏🏻🙏🏻 # 1718
Sampoorna Hitt
Thakk gaya thaa musaafir
Kintu veh chalta raha
Mushkil thaa safar
Lekin usne kisee se kuch na kaha.
Guruji ne raasta thaa dikhaaya
Isliye uska vishvaas bilkul na dagamagaaya
Usne apne mann ko samjhaaya
Mann ne bhi saath nibhaaya.
Mann ka ho raha thaa
Simran dwaara itna paawan poshan
Ki raaste ka koi nakaraatmak prabhaav
Na kar sakk raha thaa mann ka shoshan
Mann mein rakhey huey Guruji ke prati poorna aasthaa
Musaafir tayy karta raha jeevan ka raasta.
Ekaant mein bhi thaa jabb, toh nahin thaa akela
Guruji angg sangg thei, Unka saath thaa sabse suhela
Jeevan mein jabb raat hoti thi ya phir jabb hota thaa amrit vela
Musaafir ke liye har lamha thaa Guruji se judey rehne kee bela.
Nibhaata chal raha thaa veh apne farz
Taaki utartaa jaaye pichhle karmon ka karz
Jaise jaise chadhta chala uspar Guruji ke naam ka khumaar
Saadagi se hota chala musaafir ko din ba-din aur bhi pyaar.
Musaafir kee thakaavat utarti gayi
Antakaran kee aakriti sudharti gayi
Zindagi sanvarti gayi
Rooh uskee nikharti gayi.
Moh chhoot-ta gaya
Ahem toot-ta gaya
Guruji se yoon jud gaya
Ki har vikarshan se mud gaya.
Mann kee mayll utari, chaarul hua chitt
Uska kalyaan hota jaa raha thaa nishchit
Uskee har duvidha, uska har dard gaya mitt
Guruji dwaara hua uska sampoorna hitt.
🌹🌹🌹🌹🌹🌹🌹
Jai Guruji 🙏🏻🙏🏻
Dhirja
Aaj Ka Suvichaar 