Month: November 2022

November 20, 2022

Om Namaha Shivaya
Aaj Ka Suvichaar 🙏🏻🙏🏻 # 1736

               Srishti Ka Shringar

Kalyuga ka bada hai zor
Chaahe machey ya na machey shor
Chuppi ka bhi nahin raha hai imaan
Sharaafat bann rahi hai ateet kee daastaan.

Aisa nahin ki bilkul khatm hai
Imaandaari aur sachchaayee
Lekin virle hain jinhonei ye hai nibhaayee
Aur apne priya janon se bhi ye hai paayee.

Jinhonei paaya hai apne Guru ka pyaar
Unke aaspaas suraksha hai aparampaar
Guru ke ashirwaad ka kavach karta hai Unkee raksha har pal
Kasht aate bhi hain aur jaate hain sambhal ya tal.

Paakar Guruji ka divya pyaar
Unkee sangat ka hua hai uddhaar
Guruji ne dee hai itnee shakti
Jo banee hai sehensheelta kee yukti.

Sehensheelta anivaarya hai
Khaaskar aaj ke daur mein
Ye banti hai dheeraj kee saheli
Jabb jabb zindagi lagti hai paheli.

Mann Gurujī se ye kahe
Ki Unse seedhi taar judi rahe
Kyunki Unhee ke paas hal hai hamaari har mushkil ka
Unhee se baanta jaa sakta hai haal apne dil ka.

Guruji kee anukampa hai aparampaar
Koi nahin kar sakta Guru jitna paropkaar
Guruji ne bashar ke roop mein kitnon ko diya taar
Maha samadhi ke pashchaat toh aur bhi paraakrami huey Ve Shivji ke avatar.

Divya jyot Hain Ve swayam
Maarg darshak Hain hamaaare
Unke divya prakash ke saamne
Ksheen hain chand, sooraj, aur taare.

Unkee mahima ke gungaan se zyada ooncha
Unke bhakton ke liye koi paath nahin
Agam agochar Hain lekin ek pal na hai aisa
Jabb Ve hum sabke saath nahin.

Unhee se jaagrit hai hamaari chetna
Unka simran aur dhyan hai hamaari prerna
Unkee saadagi aur saralta sikhaaye hamein sehejta ka mahatva
Unkee udaarta samjhaaye hamein ki sajjantaa se nibhaayein hum apna kartavya.

Unkee komaltaa se seekhein hum rakhna mridu vyavhaar
Unke ashirwaad se hum sudhaarein apne vichaar
Sudhre huey vichaar aur vyavhaar se behtar banaayein hum sansaar
Taaki kalyuga mein satyugi shobha se honei lagey srishti ka shringar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Srishti Ka Shringar (11/20/2022)

November 19, 2022

Om Namaha Shivaya
Aaj Ka Suvichaar 🙏🏻🙏🏻 # 1735

             Parabhakti Ke Prasad Se

Kabhi kabhi aashcharya ho jaata hai
Kis tareh se har pal na jaane kahaan kho jaata hai
Dekh kar samay kee raftaar
Jaagte huey bhi sotei reh jaate hain aur waqt jaata hai bekaar.

Na simran hua uss pal mein, sochiye
Na hum kisee ke kaam aaye
Na yaad kiya Guruji ko humne, sochiye
Phir kaise mann ko aaraam aaye?

Subah socha shaam ko naam bhajenge
Shaam ko kiya vaada subah bhajne ka
Buss ek yahee ho nahin paata hai
Jab ki waqt milta hai baaki sab karne ka!

Sehensheelta hoti jaa rahi hai kumm
Mann ko ashant kar rahein hain dharma-sankat aur gumm
Khud kee sudh budh hai nahin, doosaron ko lekar hain pareshaan
Vishayon mein aasakti badhti rahegi, toh kaise milega gyan?

Guruji ko pasand hai nek neeyat aur bhaav nirmal
Guruji ne toh kar diya hai bhakti ko hamaare liye itna saral
Gurbani sunein, uspar manan karein, aur phir karein nidhidhyasan
Aatmabodh ke liye ye hain bahut yathochit saadhan.

Dincharya mein thoda toh samay nikaalein
Ho sakey toh ghar mein koi nishchit sthaan banaa lein
Na bhi ho paaye toh jahaan bhi ho paaye, Guruji se mann hee mann jodein taar
Bakhshish maangein, shukrana karein Unka baarambaar.

Guruji toh antaryaami Hain, phir bhi apna mann halka kar lein kar ke Unse baat
Unse dua karein ki mann hee mann humse simran ho paaye din raat
Baithne ka prayatna karein shant hokar dhyan mein
Unkee mehar hogi, badhauti hogi sehenshakti aur gyan mein.

Doojon ko toh kya, khud ko bhi jaayein bhool Guruji mein hokar magan
Guruji kee daya se aisee ho jaaye
Unmein antakaran kee lagan
Pareshaani, dharma-sankat, dukh
In sabka astitva jaaye mitt
Shanti, sthirta, samta
Inmein ramm jaaye chitt.

Tez aur adbhut hai kalyuga ka bahaav
Badhta jaaye Guruji ke prati hamaara prem bhaav
Bhakti itnee nikhar jaaye ki veh bann jaaye parabhakti
Parabhakti se milegi hamein jagriti, shanti aur shakti.

Samay kee raftaar
Na jaayegi bekaar
Guruji prasann hongei humse
Aur denge hamein taar.

Aaj se hee nahin, balki abhi se karein prayaas
Simran, dhyan, sadasheelta ka karte rahein abhyaas
Guruji kee kripa se badhti jaayegi yoon bhakti kee pyaas
Ki Guruji parabhakti ke prasad se aabaad karenge hamaara har shwaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Parabhakti Ke Prasad Se (11/19/2022)

November 18, 2022

Om Namaha Shivaya
Aaj Ka Suvichaar 🙏🏻🙏🏻 # 1734

                 Muskuraata Chal

Vajeh miley toh achcha hai
Na miley, toh bhi muskuraa le
Waqt agar tujhe rulaane lagey
Toh waqt se veh mauka churaa le.

Koi pal laut kar na aayega dobaara
Tujhe har pal milta hai Guruji ka sahaara
Isliye jaisa bhi ho tere is safar ka nazaara
Yaad rakh, tu bilkul bhi nahin hai laachaar ya bechaara.

Guruji ka ashirwaad hai tujh pe
Tu bach raha hai anginat kasht se
Tu bahuton se zyada bhaagyashaali hai
Tere Guru kee leela badi nirali hai.

Guruji bhali bhanti jaante Hain tere bhavishya ke vishay mein
Ve teri kismat ka lekh dekh rahe Hain
Unkee marzi hui toh Ve tere poorvanirdisht
bhaagya mein hastakshep karenge zaroor
Unhe kisee kee izaazat nahin leni, kyunki Ve toh swayam hee Hain Huzoor.

Isliye ponchh tu ashru apne aur Guruji ka dhanyawaad kar
Himmat se kaam le aur mann ko atma-vishwaas se aabaad kar
Waqt kee chunautiyon se abb aur tu na darr
Guruji par bharosa rakh, aur jeete jee na tu mar.

Aane wala waqt jo bhi imtehaan laayega
Tu Guruji kee mehar se hoga safal
Apne karmon ke khet mein tu buss beej bo le nirmal
Aur muskuraata chal kyunki sunehri hogi fasal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Muskuraata Chal (11/18/2022)

November 17, 2022

Om Namaha Shivaya
Aaj Ka Suvichaar 🙏🏻🙏🏻 # 1733

               Sweekriti Se Preeti

Sweekriti se ho jaaye preeti
Toh samajh lena ki tumhaari santushti hai jeeti
Varna chaahaton ke samaksh sada haarta rahega santosh
Aur ho sakta hai ki mann sthirta aur shanti ke abhaav mein kar baithey koi dosh.

Beete huey kal mein
Tumhaari sainkdon chaahatein thein
Jo aane waale kal mein
Poori huin Guruji kee mehar se
Tabb lagaa buss sab mil gaya
Lekin jald hee asha ka ek aur phool khil gaya.

Yoon jeete jeete bhautik padaarth kitne huey jamaa
Aur bhautik padaarthon kee tumhaari ichcha phir bhi hoti chali jawaan
Rishte naaton se bhi rakhne lagey apeksha saath saath
Dheere dheere duur hoti gayi santosh kee saugat.

Phir lagaa duniya badal jaaye toh hoga achchaa
Lekin soojhi hee nahin swayam ko badalne kee ichchaa
Vyaakul hota gaya tumhaara mann
Bechayyn sa ho gaya tumhaara jeevan.

Guruji ko aaya tum par taras
Sumati gayi baras
Simran ke dauran
Aur bach gayi tumhaari jaan.

Guruji ne subuddhi dee ki tumhe khud ko hoga samjhaana
Ki jaisa tum chaaho, aksar vaisa nahin chalta zamaana
Guruji ne bakhshi daat sweekriti aur samarpan kee
Haalat sudharne lagi tumhaare mann kee
Doosaron se ummeed karna tumne chod diya dheere dheere
Guru kripa se badh gaya tumhaara simran ka prayaas shaam savere.

Bhautik padaarthon kee daud lagne lagi bekaar
Simran aur dhyan bann gaye tumhaare jeene ka aadhaar
Guruji kee karuna se hua aisa sudhaar
Ki antakaran aur atma ka honei lagaa uddhaar.

Sweekriti hui tumhe haalaat kee
Sweekriti hui doojon ke vyavhaar kee
Sehensheelta bann gayi saheli sweekriti kee
Aur veh apne sangg laayi bahaar tripti kee.

Klesh huey khatm
Tum huey magn
Beparvaahi kee dhun mein
Mann rehne lagaa niyantran mein.

Abb jo Guruji ke ashirwaad se
Sabb sanvarne lagaa hai
Abb jo Unke diye prasad se
Mann sudharne lagaa hai
Toh apni neeyat aur prayaas ko rakho nek
Aur Guruji ke charnon mein maatha tek
Sweekriti aur samarpan se aabaad rakho apna jeevan
Taaki shant aur santusht rahe tumhaara mann.

Safalta kee oar zaroor badho
Adhyaatamik unnati kee seedhi bhi chadho
Sweekaaro hakeekat ko aur har kaarya karo Guruji ko arpan
Doosre jo bhi karein, tum Guruji kee maano aur banda jaao bann.

Sweekriti aur samarpan
Hain maano ek dooje ke liye darpan
Dono badhaate hain neevanpann
Dono ke honei se roshan hota hai mann
Dono hotey hain ek dooje se pratibimbit
Dono kee maujoodagi se nishchit hai tumhaara hit.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sweekriti Se Preeti (11/17/2022)

November 16, 2022

Om Namaha Shivaya
Aaj Ka Suvichaar 🙏🏻🙏🏻 # 1732

                     Umda Udaan

Tu fikr na kar agar sankat bade hain
Tere angg sangg Guruji sada khade Hain
Tu toh jaanta hee nahin ki kitnee baar
Tere aansoo dekh kar Guruji ro pade Hain.

Tu buss kar Unka chintan
Tu karta chal Unka vandan
Ve kar rahe Hain tere kashton ka khandan
Ve swasth kar rahe Hain tera mastishk, tera tann aur mann.

Unse maangta chal sumati
Taaki teri hoti chale adhyaatamik unnati
Ye toh hai teri khushkismati
Ki Guruji swayam sanchaalit kar rahe Hain teri pragati.

Duniya ka jo bhi rahe dastoor
Guruji kabhi na hongei tujhse duur
Tu kabhi na sochna swayam ko majboor
Kyunki Guruji tujhe sahaara dete rahenge zaroor.

Unka divya sahaara
Tujhe dikhaayega kinaara
Har veh lamha jo toone Unke simran mein hoga guzaara
Uss lamhe ko Guruji ne khud hee hoga nikhaara.

Tere jeevan kee naav ko Guruji pahunchaayenge uss kinaare par
Jahaan par pahunch kar
Tujh par hoga aisa asar
Ki tu baaki sab jaayega bhool
Aur khilenge yoon teri shraddha ke phool
Ki kinaara bann jaayega divya gulistaan
Tere chitt par hogi nirmal anand kee muskaan
Tujhe har bandhan se riha karenge Guruji karunanidhaan
Aur tu azaad panchhee bann kar bharega mukti kee umda udaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Umda Udaan (11/16/2022)

November 15, 2022

Om Namaha Shivaya
Aaj Ka Suvichaar 🙏🏻🙏🏻 # 1731

Aap Mein Yoon Jaaoon Ramm

Pyaare Guruji,

Aapki sharan mein hai mera kalyaan
Kabhi duur na karna Apne se mujhe, mere karunanidhaan
Aapke bharose hee jee rahi hoon sach much
Aapke sahaare hee kar rahi hoon sab kuch.

Kabhi himmat tootne lagey toh sambhaalne wale Aap hee Hain
Kabhi dheeraj chhootne lagey toh dharaane wale Aap hee Hain
Kabhi apnon se baat karne ka dil karta hai toh Aap hee hotey Hain zehen mein
Aap Hain toh haalaat se niraash hokar nahin phansti hoon kisee vehem mein.

Mere liye toh Aap Hain Rab
Aapne kaha hai changa hoga sab
Aapke vachan mein hai anant shakti
Aap nikhaarte rahiye meri Aapke prati bhakti
Taaki kisee aur kee kisee baat se mujhe na ho dukh
Aisa atmabal ho jaaye ki mann ko rahe santosh se sukh
Aap mein yoon khoyi rahoon ki kaheen aur na jaaye dhyan
Mujhe jaan-na hee nahin hai ki kaisa hai ye jahaan
Mere dil mein sabke liye sadbhaav rahe har pal
Yaad rahe mujhe ki sabhi ne yahaan se jaana hai aaj ya kal
Seekh rahi hoon abhi bhi, shishya hoon Aapki
Mann mein aa bhi jaaye, toh turant khatm ho agar heen bhaav aaye kisee ke prati
Shukrana mein rahoon, na ki shikaayat mein
Sharnaagati mein rahoon, sada ibadat mein.

Mann hee mann hota rahe aathon pehar simran
Aisee kripa banaaye rakhna Bhagwan
Dete rahiyega simran aur sewa kee bakhshish
Aisa jeevan jee sakoon ki khush rakhoon Aapko, mere Ish.

Bhool kar har khushi aur gumm
Aap mein rahoon mai magn
Baaki har khwaahish ho jaaye khatm
Guruji, Aap mein yoon jaaoon ramm.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aap Mein Yoon Jaaoon Ramm (11/15/2022)

November 14, 2022

Om Namaha Shivaya
Aaj Ka Suvichaar 🙏🏻🙏🏻 # 1730

Sabse Ooncha Sthaan

Mujh nacheez ke liye sabse ooncha sthaan
Sada rahe Guruji ke charnon ke neeche
Mai aagey badhti chaloon
Chalti hui Guruji ke peechche peechche.

Unke kadmon ke nishaan
Likhein meri dastaan
Mere liye jannat hai vahaan
Ve le jaaye jahaan.

Unkee chhatra chhaaya mein karma katein mere
Unkee sharan mein hon mere jeevan ke sabhi savere
Taaki jeevan kee koi bhi raat mujhe akela soch kar na ghere
Kyunki Guruji sada hongei mere nede.

Kisee phool mein utnee khoobsoorat khushboo nahin
Jo khushboo Guruji kee ruhaaniyat mein hai
Kisee vandan mein veh dohraa laabh nahin
Jo Guru kee ibadat mein hai.

Guru ka vandan karne se
Guru ke saath saath Govind bhi hotey Hain prasann
Aur Guruji toh Apne bhakton ko
Dete Hain anekon divya roop mein darshan.

Unhee se zameen aasmaan hain
Unhee se hee meri dastaan hai
Unhee se mera jahaan hai
Unhee se mere tann mein praan hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 13, 2022

Om Namaha Shivaya
Aaj Ka Suvichaar 🙏🏻🙏🏻 # 1729

                 Aayegi Veh Bela

Sansaarik chakra mein bhraman se
Baar baar ke janam maran se
Milegi hamein azaadi ek din
Na milegi par ye Guru ke bin.

Anivaarya hai, kewal zaroori nahin
Hamaare liye achcha hai, chaahe majboori hee sahi
Guruji kee maan-na
Na ki kewal Guruji ko maan-na.

Hamaari soch khatm hoti hai jahaan
Guruji kee soch shuru hoti hai vahaan
Guruji Hain param gyani karunanidhaan
Guruji Hain mahaparaakrami meharbaan.

Unke gungaan se uttam koi paath nahin
Unse zyada vishvasaneeya kisee ka saath nahin
Unke haath ke jaisa sahaayak aur rakshak kisee ka haath nahin
Guruji Shivavatari Hain, Unke samaksh hamaari koi aukat nahin.

Ve hee taaranhaar Hain
Ve hee bakhshanhaar Hain
Ve param poojya param gyaata Hain
Ve mukti ke daata Hain.

Pooran Guru Hain Guruji
Ye khushkismati hai hamaari
Unka har nirnay
Hota hai bhakton ke liye hitkaari.

Unke kadmon ke nishaan karte rahein hamaara maargdarshan
Unka simran aur dhyan chamkaa de hamaare mann ka darpan
Guruji mein shraddha rakh kar kaarya hum karein Unhe arpan
Toh Ve hamaare karmon ke bache hisaab karvaayenge khatam
Karenge Ve hamaare vikaaron ka khandan
Aur yakeenan sanvaarenge hamaara janam maran.

Aayegi veh bela
Aayega veh samay suhela
Jabb na karna padega atma ko aur saansaarik chakra mein bhraman
Aur ho jaayega atma ka Paramatama se milan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 12, 2022

Om Namaha Shivaya
Aaj Ka Suvichaar 🙏🏻🙏🏻 # 1728

                Samta Ke Deepak Se

Koi udaas hokar bhatak gaya hai
Koi khushi se apne buss mein nahin
Koi niraasha se bebas hai
Koi asha lekar baitha hai kaheen.

Kisee ka dil toot gaya
Kisee ka saathi rooth gaya
Koi doojon sangg jud gaya
Koi doojon se mud gaya.

Koi desh chod kar chala gaya
Koi laut kar aaya vaapis
Kisee ko thikaana mil gaya
Koi reh gaya laavaaris.

Koi bhautikvaad mein gum hai
Koi khayaalon mein gumsum hai
Koi bheed dhoondh raha hai
Koi ekaant kee talaash mein hai.

Sabhi ke liye thoda theherna aur rukna
Sabhi ke liye Srishti ke maalik ke naman mein jhukna
Ho kitna achchaa
Chaahe veh ho bada ya phir bachcha.

Jisne Srishti kee rachna kar ke usey sambhaala hai
Jisne hum sabko banaaya aur paala hai
Jo na bhi dikhe toh bhi sabse shaktimaan hai
Jisey ateet, vartmaan, aur bhavishya ka poorna gyan hai.

Beshak bhinn bhinn hain roop Unke
Aur alag alag hain Unn Vidhaata ke naam
Divya jyot vahee hai sab mein
Jo karti hai har jann ka kalyaan.

Guru hee kara sakte Hain
Is divya jyot ke darshan
Tabhi toh Guruji sikhaate Hain
Dhyan se bhi pehle simran.

Simran ke bahaav mein beh kar
Mann pavitra honei lagta hai
Simran ke har kshan se
Mann mal rahit honei lagta hai.

Simran se dhyan
Dhyan se samta
In sabse badhti hai
Atma kee kshamta.

Aayengi chunautiyan
Aayenge imtehaan
Tabb kaam aayega shraddha poorna prayaas
Aur Guruji kee raza par beshart vishwaas.

Maana ki yeh nahin aasaan
Lekin isee se hoga vikaas
Varna toh bujh hee na paayegi
Vishay kee pyaas aur aas.

Samta mein hee kshamta hai
Bhedbhaav se rahit honei kee sundarta hai
Isee mein santulan bastaa hai
Yahee mukti ka raasta hai.

Banee rahe Guruji kee mehar
Mann anubhav kar paaye samta kee sehar
Andhera mitt jaaye, ho ujaala sanatan
Samta ke deepak se prakaashit ho jaaye mann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

November 11, 2022

Om Namaha Shivaya
Aaj Ka Suvichaar 🙏🏻🙏🏻 # 1727

Mann Ke Darwaaze Par

Mann ke darwaaze par hui ek dastak
Na jaane kya hua, usne jhuka diya mastak
Mann jaagne lagaa
Sanshay bhaagne lagaa
Chitt chetne lagaa
Veh sametne lagaa
Dil ke bikhrey huey tukdon ko
Bhool kar behroopi mukhdon ko.

Dekhte dekhte duniya mein moh laalach jhooth fareb aur irshya
Utpann honei lagaa vairaagya
Duniya se maansik starr par hota gaya duur
Anokhi si shanti milee bharpoor
Shunya kee sampoornataa mein khoya rehta thaa raat aur din
Ye sab mumkin na hota Guru kripa ke bin.

Guruji ko aaya thaa uspar pyaar aur taras
Guruji kee mehar rahi thi baras
Guruji ne diya usey bhakti ka vardaan
Badhta gaya uska prayaas, simran, aur dhyan.

Guruji ne toh bahut pehle hee
Le liya thaa usey Apni sharan mein
Lekin Ve chaahte thei ki veh anubhav se duniya ko jaan le
Sachcha meet Guru hee hai, veh khud is baat ko maan le.

Jabb dil ke tukde bikhar gaye
Kuch idhar, aur kuch udhar gaye
Tabb mann ko dastak kee sunaayi dee awaaz
Kyunki uss se pehle usey samajh na aata asal dhan ka raaz.

Vairagya hua utpann
Tayyaar hua mann
Mann vash mein hua, badhti chali sehenshakti
Jyot jalee akhand, nikhar gayi bhakti
Guruji ne bakhsha veh kshan
Aur diya usey asal dhan.

Phir toh shwaas shwaas mein simran
Dhyan aur adhyaatamik gyan
Anaasakt hua baaki har bandhan se
Santosh ne rishta joda jabb se mann se.

Nishkaam bhaav se nibhaata chalaa apne farz
Bhakti kee aushadhi ne duur kiya har marz
Jeevan ka safar hua safal, sampann
Guru Govind dono huey uss se prasann.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja