Om Namaha Shivaya Aaj Ka Suvichaar ๐๐ป๐๐ป # 1777
Jaate Jaate Har Saal
Jaate jaate har saal Bulaava dega naye saal ko Is ummeed se ki veh naya saal Sudhaar de waqt ke haal ko.
Guruji ne diya hai Apni sangat ko ashish har pal Guruji ka ashirwaad kal bhi barasta rahega Samay apni raftaar se guzarta rahega Bheetar aur baahar ka sansaar badalta rahega.
Guruji, bakhshiye sumat Guruji, deejiye himmat Ki bann sakein hum behtar insaan Aur doojon kee madad kee oar kar sakein kuch kaam Yoon ho hamaara parivartan bheetar Ki hamaare badalne se sanvar jaaye baahar ka jahaan.
Bakhsh deejiye hamaare gunahon ko Apne noor se ujjwal rakhiye hamaari raahon ko Waqt jaise bhi haalaat dikhaaye, hum dhairya aur sehejta se saamna kar paayein Aapki mehar se khush rahein aur Aapki mahima sunein aur sunaayein.
Hum sabb hain Aapki sangat Chadhti rahe hum par Aapki rangat Hum sabhi ko miley santosh, shanti aur shakti Nikharti jaaye hamaari sewa bhavna aur bhakti Mann mein aaye aur bhi sanyam aur sabr Har paristhiti mein karte rahein Aapka shukr Gyan aur dhyan mein badhauti ho Vikaaron aur vikarshanon mein katauti ho Jaagrit rahe bhaav hum mein saamanjasya ka Sammaan rahe apne har kartavya ka Agyan aur ahankar ke andhere ko chod Badhte rahein hum gyan aur neevenpann ke savere kee oar.
Prakriti ka hum sada karein aadar Sadbhaav kee phaylaa dein chaadar Hinsa na ho vichaar aur karma mein Insaaniyat ka saar ho hamaare dharma mein.
Seekhein bin aasakti, bin moh ke kar paana pyaar Jeetein dil sabka, istemaal kar ke aitbaar aur pyaar ka hathiyaar Aapki dee prerna se tootein samast paash hamaare Chhoo paayein hum sadgati ke akash aur taare Ye sab hum kar paayenge kewal Aapki mamta aur Aapke maargdarshan ke sahaare Aap hee Hain nath, Ish, murshid, meet, aur prerak hamaare.
Om Namaha Shivaya Aaj Ka Suvichaar ๐๐ป๐๐ป # 1776
Tumhaari Madad Zaroor Karenge Guru Sarkar
Milee hai bade naseeb se Guruji kee sharan Sudhaar lo abhi isee pal se apna janam maran Baitho Guruji ke paas Mann mein rakhe yeh aas Ki Unkee hoti rahe tum par inaayat Taaki tum kar paao Unkee ibadat.
Bakhshish maango simran kee Ve karunanidhaan Hain Subuddhi maango samarpan kee Ve dayaavaan Hain.
Unhe na dhoondho baahar kaheen Na dhoondho aasmaan ya zameen Pehle bhi tum dhoondhte huey thei haare Ve miley thei bheetar tumhaare.
Ve abhi bhi vaheen Hain viraajmaan Tumhaari har shwaas ko dete Huey anjaam Tumhaari chetna ko de rahe Hain Ve prerna Tumhaari bhakti ko de rahe Hain Ve shakti.
Ekaagra kar lo swayam ko apne hee swaroop mein Bheetar hee maujood Hain Guru aur Govind ruhaani roop mein Shant hokar surt jodo Guruji ke sangg Guruji kee mehar se chadhega tum par Unkee bhakti ka rangg.
Ho paayega Guru kripa se simran Gurbani ka Ruhaaniyat se nikhaar hoga tumhaari zindagaani ka Guruji kee yaad mein tum ho jaaoge leen Baaki har ehsaas honei lagg jaayega ksheen.
Simran ka har kshan hai bahumoolya dhan Is dhan kee daat paakar tarr jaayega tumhaara mann Mann ko das banaane ka jaari rakhna tum prayaas Taaki indriyon par niyantran karne ka safal ho abhyaas.
Ekant ke kuch lamhe hon ya ho Satsang kee kaksha Maango Guruji se tum simran kee bhiksha Gurbani ke har shabad mein hai ruhaani shiksha Guruji kee kripa se yeh shiksha karegi tumhaari atma kee raksha.
Simran se atma par se daag jaayenge mitt Simran se Paramatama dwaara atma ka hoga hitt Simran se hota chalega antakaran ka pavitrikaran Simran se sulajh jaayega tumhaara jeevan.
Guruji kee leela sach mein hai bahut mahaan Simran chale nirantar mann mein, ismein hai tumhaara kalyaan Tum sachche dil se ye chaaho toh Ve denge tumhe vardaan Simran mein tum paaoge Guru vachan ke amrit kee khan.
Koi bhi pal simran ke bina vyarth hai Simran se hee maanav jeevan ka arth hai Ek bhi pal ko na jaane do tum bekaar Tum neeyat rakho nek, tumhaari madad zaroor karenge Guru Sarkar.
๐น๐น๐น๐น๐น๐น๐น
Jai Guruji ๐๐ป๐๐ป Dhirja
Tumhaari Madad Zaroor Karenge Guru Sarkar (12/30/2022)
Om Namaha Shivaya Aaj Ka Suvichaar ๐๐ป๐๐ป # 1775
Guru Gobind Singh Ji
Khalsa panth ke maargdarshak mahaan Jinkee mehar se Guru Granth Sahib ji ko poojta hai jahaan Ve thei Guru Gobind Singh Ji, sikhon ke dasvein Guru Jinke jeevan kee yatra Patna sheher mein hui thi shuru.
Saal thaa 1666, Paush ka thaa maheena, Shukla paksh kee thi saatvin tithi Manaayi jaati hai is din Guru Gobind Singh Ji kee Jayanti โTakht Shri Patna Sahibโ naam se jaana jaata hai veh sthaan Sammaan karne in Guru ka jinhonei kiya kitnon ka kalyaan.
Bihar chodkar Punjab mein โChakk Nanakiโ aaya Unka parivaar Aur yeh pavitra sthaan โAnandpur Sahibโ bankar aaj takk hai pavitra yaadgaar Pita Guru Tegh Bahadur Ji ne jab choda apna shareer Toh Guru Gobind Singh Guru baney nikhaarne shoshit maanav kee taqdeer.
Apnaaye Unhonei Mata Gujri aur pitaji dwaara diye sanskaar Chhoti si umr se hee karne lagey jann jann ka uddhaar Bachpan ke Gobind Rai nau varsh mein baney Guru Is tareh se Unkee guruyaayee hui shuru.
Anek bhaashaaon ko jaan-ne wale Kalgidhar Guru Gobind Singh Ji nirbhay thei Vidvaanon ke sanrakshak thei Isliye โSant Sipahiโ naam se bhi pukaare jaate thei.
โGuru Ka Lahoreโ ka hua Anandpur Sahib ke kareeb nirmaan Mata Jeeto se Guru Gobind Singh ka vivaah hua thaa vahaan Kavi thei, ghud savaari mein thei nipun, aur thei Ve tattvagyani Unka maarg thaa sheel aur ruhaani.
Apne pita kee shaheedi se bilkul na ghabraaye Maano divya paraakram Unmein gaya thaa samaaye Baad mein janme Guru Gobind Singh ji ke bachche Tabb bhi Unke khayaalaat thei nek, tyaag se bhare, aur sachche.
Jujhar Singh, Joravar Singh, Fateh Singh, Ajit Singh huey Unke supoot Jinkee jaan ke balidaan par bhi Guru Sahib ka manobal na gaya toot Isee ke aadhaar par Unka ek aur khitaab hua, โSarvansh Daaniโ Daav par lagaa dee Unhonei Apne parivaar kee zindagaani.
Dhanush, talwar, bhaala aadi chalaane mein Guru Sahib thei atyant kushal Nyaaya paraayan niyam dwaara badhaaya Unhonei Khalsa yoddhaaon ka bal Daya Singh, Dharam Singh, Himmat Singh, Mohkam Singh, aur Sahib Singh thei unn โPanj Pyaaronโ ke naam Jo Dashmesh Pita kee dee pareeksha mein safal huey aur phayyl gaya Unkee bahaduri ka paigaam โKhande Di Pahulโ hai is ghatna ka naam Aur โKhalsaโ yaani kee โshubhโ thaa in sabka naam 1699 mein is Khalsa Panth ka praarambh kar ke Pita Dashmesh Sammaanit huey tabhi se kanga, kada, kachchera, kripaan, aur kesh.
Khalsa panth ke sikhon ke liye Guru Sahib ne banaaye niyam Ki ve vyabhichaar, bali diye pashu ka maas, tambaaku jaisi aadatein chodne ka le lenge prann Dee Unhonei Apne anuyaayiyon ko adhyaatamik shiksha Sudhaari anekon kee zindagi aur kee dharma kee raksha.
โChandi Di Vaar,โ โAkal Ustat,โ aur โKrishna Avatarโ jaisi rachnaaon ke dwaara Unhonei Apni peedit sangat ko diya sukoon aur sahara Himachal Pradesh ke Sadhora mein hui Unkee baat Buddhu Shah peer se Peer kee aankhein bhar aayin shraddha ke neer se Peer ke madhyam se berozgaar pathan aaye Guru Sahib ke paas Guruji ne Unhonei sena mein dakhil kar ke mitaaya unka traas.
Yamuna nadi ke kinaare par Guruji ne banvaaya ek kila shaandaar Yahaan par Guru Sahib ne kaafi waqt liya khushi se guzaar โPaunta Sahibโ hua naam is sthaan ka Jo banaa zariya bheetar Gurudware ke nirmaan ka.
Aurangzeb ne kiye kitne atyaachaar Lekin Guru Sahib ka dheeraj aur manobal thaa aparampaar โMuktasar Kee Jangโ ladee Unhonei Aurangzeb ke viruddh Aurangzeb ke putr Bahadur Shah kee madad kee jabb khatm hua yuddh.
Nanded mein Ve Madho Das Vairaagi se miley Guru dwaara amrit peekar Madho Das ke naseeb khiley Banda Singh Bahadur hua Madho Das ka naam naya Guru Sahib se uphaar mein teer paakar veh aur bhi khushkismat hua.
Maharashtra ke โNandedโ gaaon mein Guru Gobind Singh Ji ne maanav deh ko tyaag diya Aur jis pathan ne Unhe maara Guru Sahib ne uska sir bhi kaat diya.
Saahas, tyaag, balidaan kee pratima Dhairya, sheelta, gyan kee mahima Jitne bhi shabdon se karein Guru Gobind Singh Ji ka gungaan Ve sada kumm hain, kyunki Guru Gobind Singh Ji Hain itne mahaan.
Pyaare Guruji Dugri wale Apni sangat ko Gurbani sunvaayein Aur sadasheelta ke vachan keh kar Kahein ki Unke bhakt bande bann jaayein.
Guru Gobind Singh Ji kee Jayanti par sabhi ko dher saara pyaar Guruon kee prerna se behtar banaayein hum sansaar Sada hum sabke sangg hai Guruon ka ashirwaad Aayiye, Unke vachan ka karein anusaran karte Huey Unhe him yaad.
Om Namaha Shivaya Aaj Ka Suvichaar ๐๐ป๐๐ป # 1774
Ajar Amar Hai Atma
Ajar amar hai atma Iska nahin hota hai khatma Iskee manzil hai Paramatama Moksh par atma ke safar ka hai khatma.
Poshan karo sanskaar ka Na ki apne ahankar ka Sahi poshan sahaayak hai atma ke safar mein Aur yahaan ke jeevan ke basar mein.
Bhakti moksh ka mahatvapurna aadhaar hai Aur bhakti ke putr hain vairagya aur gyan Vairagya se judi hai anaasakti Jis se susadhya hoti hai bhakti.
Gyan sukar hota hai jigyaasa se Gyan jab juda ho moksh kee asha se Toh uska koi mel nahin hota ahankar se Kyunki veh toh khilta hai neevenpann ke shringar se.
Moksh takk pahunchne ke liye Anivaarya hai mann ka sampoorna samarpan Indriyon par niyantran Ekaagrachitt dhyan, aur simran.
In sabki maujoodagi ho safar mein Toh prasann hongei Guruji pyaare Kisee na kisee janam mein yakeenan Moksh milega Guruji ke sahaare.
Moksh ke manzar par pahunch kar Kar rahi hai jo janmon se alag alag deh mein basar Khatm hoga safar uss ajar amar atma ka Punar milan hoga atma aur Paramatama ka.
Om Namaha Shivaya Aaj Ka Suvichaar ๐๐ป๐๐ป # 1773
Noorani Disha
Chal raha thaa niraash hokar raahi Aankhon se beh rahi thi ashruon kee siyahi Dil toot chuka thaa Ghar parivaar chhoot chuka thaa Jo lagte thei apne, ve hee bann gaye thei paraaye Uljhan mein thaa ki abb veh kahaan jaaye.
Aaspaas ekant thaa Mann bahut ashant thaa Mann par vichaar kar rahe thei aakraman Aur mann ke saath saath rogi ho raha thaa tann.
Mann ho na paa raha thaa sthir Veh ateet mein raha thaa gir Puraani yaadein taaza hoti jaa rahin thi Usne kitnee peeda aur kitnee kathorta sahi thi.
Mushkil ho raha thaa ubharna oopar uss dard se Chaahat thi ki milan ho kisee humdard se Duur kaheen se aasmaan ne diya ek upaay Goonj uthaa mantra, โOm Namaha Shivaya.โ
Veh aakarshit hua awaaz kee oar Uss disha mein badhne lagaa bin dekhe kaheen aur Dekha usne vahaan mantra japte huey ek jann ko Lagaa jaise sandesh mila ho uske mann ko.
Veh chup chaap baith gaya uss jann ke paas Saath saath mantra japne lagaa veh lekar gehra shwaas Kya hua veh nahin paaya samajh Lagaa usey jaise mann raha thaa sulajh.
Mann ko milne lagi raahat Badhne lagi japne kee chaahat Dekh kar uss jann ke haath mein Guruji ka swaroop Raahi ko ehsaas hua anoop.
Usey swapn mein usee swaroop wale Guruji thei aaye Unhonei uske sir par rakha thaa haath aur phir Ve thei muskuraaye Ye sanket thaa rahasya poorna Zaahir kar raha thaa parivartan mahatvapoorna.
Swapn se juda thaa raahi ka pahunchna uss jann ke paas Ye jaan kar raahi ko hua Guruji aur Shiv kee ekta par vishwaas Ye divya sanket thaa shaktishali Thi ye Guruji kee leela matvaali.
Ateet ke ghaav bharne lagey Guruji uskee peeda harne lagey Milne lagaa ajab sa aaraam Guruji ne liya thaa usey thaam.
โOm Namaha Shivayaโ japte huey abb mann mein Vahaan se uth kar chalne lagaa veh agley kshan mein Usey mehsoos hua koi chal raha thaa uske saath Aur usey gulab kee khushboo ka hua ehsaas.
Bheetar se aayi awaaz usey ki uss pal ka le veh anand Bheetar kee awaaz ka kaha maana usne aur sukoon mila usey anant Guruji kee maujoodagi mein na raha uske mann mein koi sanshay Guruji kee mehar se uska mann hua sthir, shant, aur nirbhay.
Mann mein hua Guruji ka vaas Mitne lagi janmon kee traas Mann kee dasha ko milee noorani disha Duur honei lagi ashanti kee nisha.
Om Namaha Shivaya Aaj Ka Suvichaar ๐๐ป๐๐ป # 1772
Mumkin Hoga Hamaara Uddhaar
Guzarta hai kayi avasthaaon se maanav ka jeevan Har avastha mein hotey hain anek parivartan Navjaat shishu ke roop mein hota hai janam Baal avastha ke baad aati hai jawaani Roop ka ho jaata hai kabhi kabhi ahankar Kayion ke jeevan mein dhan daulat kee hoti hai jhankaar.
Honei lagta hai is se bhi maanav ko abhimaan Maano veh ho gaya hai abb aur bhi mahaan Phir sampann hokar aur bhi bhatak jaata hai antakaran Gyan aur Prabhutva aane se aksar dambh aabaad karta hai mann.
Har avastha mein Ishwar ke prati aastha Aur bhakti kee shubh shakti Inkee hai khaas ahamiyat Aur zabardast zaroorat bhi.
Lekin saansaarik maajaron mein Maanav jaata hai yoon ulajh Ki aksar na ye yaad rehta hai Aur na hee aata hai samajh.
Guruji ne kayi tareh se Apne bhakton ke liye Kar diya is yug mein jeena is maamale mein saral Ve kehte Hain โaish karโ lekin aasakti mein na kho Bhog bhogta chal magar chetna ko na dene de so.
Chetna ko sonei se bachaane ke liye Diya hai Guruji ne simran ka upaay Aur Unhonei banda bann-ne ke liye Achche vichaar aur karma ka raasta diya hai dikhaaye.
Na hai shubh mahoorat kee koi anamyataa Na bhojan ke upvaas kee aawashyakta Na chahiye dikhaawa, na koi chadhaava Na teerath, na koi daava.
Buss, jeena hai mastt aur sakaraatmak andaaz se Anukampa aur anaasakt pyaar ke ehsaas se Saadagi aur saralta, komalta aur taralta In sabke sangg jodkar vinamrata aur nirmalta.
Vaise bhi zindagi jeeni hai na ki koi pratiyogita Sab ka alag hai safar aur sab kee alag hai yogyataa Jaanein ya na jaanein, sabhi ka safar anokha hai Maanein ya na maanein, sabhi ko maya ne diya dhokha hai.
Guruji kee toh har bhakt par hai nazar Jis bhi avastha mein ho hum par achcha asar Vaheen se shuru ho jaayega sudhaar Nek koshish se khatm hotei chalenge manovikaar Neevenpann ke noor se nasht ho jaayega ahankar Jis bhi avastha mein hongei hum, mumkin hoga hamaara uddhaar.
Om Namaha Shivaya Aaj Ka Suvichaar ๐๐ป๐๐ป # 1771
Pashu Se Devta
Mila hai Guruji ka dar Ve lenge sab dukh har Guruji aayein Hain ghar Unkee mehar se rahein hain hum tarr.
Phir bhi hum na sudharein agar Toh pachtaayenge hum umr bhar Khali na reh jaaye mann kee gaagar Mil jaaye Guru amrit ka saagar.
Is saagar mein doobne ka mil jaaye var Ya mil jaaye kewal sparsh ke liye seekar Ye maangein nek bhaav se hum haath jod kar Aur shraddha se jhuka kar apna sir.
Guruji saath Hain jeevan bhar Koi kaaraj phir nahin sakta bigad Unkee kripa se sudhar jaaye karmon kee fasal Unkee mehar se lekha sakta hai badal.
Humpar ho jaaye bhakti ka aisa asar Ki sab mein Rab aane lagey nazar Toh praapt ho jaayega sukh asal Janam maran bhi jaayega tal.
Aayega zaroor veh pal Atma kee yatra hogi safal Atma yahaan se vahaan takk pahunchegi aaj ya kal Tayy hoga pashu se Devta bann-ne ka ye safar.
Om Namaha Shivaya Aaj Ka Suvichaar ๐๐ป๐๐ป # 1770
Guruji Ka Dikhaaya Raasta
Guruji ka dikhaaya raasta Ye raasta hai pyaar ka Yahaan prakash hai aitbaar ka Yahaan ashish hai Srijanhaar ka.
Yahaan bhakti, vairagya, gyan hai Yahaan har bhakt ek samaan hai Yahaan ghar parivaar ka mahatva mahaan hai Yahaan Guru karunanidhaan Hai.
Ye raasta andhvishwaas se duur le jaata hai Yahaan rahnuma ko dikhaawa nahin bhaata hai Yahaan daan, paath, sewa gupt rakhne ko kaha jaata hai Yahaan jo Guruji ko maang le, veh sab kuch paata hai.
Is raaste par fareb na karna Yahaan par likha hai tumhaara tarna Bura sochne aur bura karne se darna Phal bhugatna padega varna.
Kshamasheel Hain Guruji awashya Lekin chaahein hum nibhaayein apne kartavya Ve jaanein hamaara ateet, vartmaan, aur bhavishya Bhavya Hain Ve, mahaan hai Unka aishwarya.
Is raaste par sirf phool nahin, kaante bhi milenge Samarpan ke marham se ve kumm chubhenge Ho sakta hai din mein kabhi taare bhi dikhenge Lekin Guruji dayawaan Hain, Ve dobaara lekha likhenge.
Buss, tum shraddha aur bharose se rehna Mann kee vyatha kewal Gurujฤซ se kehna Ve sehne ko kahein, toh bin shikaayat ke sehna Buss, maree hui machhlee ke jaise paani mein na behna.
Is raaste par apni chetna kee doar ko rakho niyantran mein Mann ko leen rakho Guruji ke simran mein Shukrana ka avsar lete raho har satsang aur har kshan mein Kalyaan hee kalyaan hai is bandagi ke bandhan mein.
Yahaan bhakt ke bhaav kee shuddhi Guruji kee dee hui subuddhi Guruji kee noorani nidhi Pradaan karte hain ruhaani riddhi.
Is raaste par jo tum badhaaoge Guruji kee oar ek kadam Toh Guruji sainkdon kadam badhaayenge tumhaari oar Is raaste ko jhuk kar salaam karta hai gagan Guruji chaand, tum chakor, ye raasta hai chaarul chaman.
Rishta toada usne shikaayat se Joda naata Guruji kee ibadat se Shukrana karti aur jeeti thi sharaafat se Aur Guruji kee bakhshi hui saadat se.
Akash ko chhoo leti thi kayi baar Phir bhi vinamrata thaa uske charitra ka saar Jhuk kar phoolon ko thi choomti Gulistaan mein masti se thi dolti.
Sabhi ke shwaas ka rahegi hissa Ek tareh se uspar nirbhar hai har praani ka kissa Ye jaante huey bhi usne dambh ke bojh ko nahin apnaaya Uske liye na koi apna thaa na hee paraaya.
Ahankar aur moh ke bin Halkepann ka rehta thaa usey ehsaas Kaam, krodh, lobh se bhi thi anjaan Toh vyakulta aur ashanti aate nahin thei uske paas.
Guruji ka hota thaa hukm jahaan Veh pahunch jaati thi vahaan Ye zameen, ye aasmaan Inke beech thi uskee bhautik dastaan.
Lekin chitt rehta thaa Guruji mein leen Sukh santosh bheetar thaa, koi na sakta thaa veh chheen Swatantra thi, khush thi rehkar Guruji ke adheen Aur apna farz nibhaane mein thi paawan aur praveen.
Om Namaha Shivaya Aaj Ka Suvichaar ๐๐ป๐๐ป # 1768
Tu Panchee Hai Azad, Sunn
Tu panchee hai azad, sunn Tu gaata chal Guru kee dhun Tu Guru bhakti kee chaadar bunn Guruji bharenge tujhmein sadgun.
Tere pankh paayein Guruji se zor Udaayein tujhe ve phir har oar Teri chonch mein jo daana hai Vo bhi Guruji ka bhaana hai.
Har taruvar jahaan ho tera basar Guruji kee uspar hai nadar Aasmaan mein tera safar Unhe aa raha hai har pal nazar.
Tu raazi hai Unkee raza mein Guruji khush Hain teri is ada mein Unka shukr kar tu apni har sada mein Koi shart na rakh tu wafa mein.
Tere ghonsale ke Hain Ve paalanhaar Teri galatiyon ke Hain Ve bakhshanhaar Teri udaan ke Hain Ve divya aadhaar Aur tere har shwaas ke Hain Ve srijanhaar.
Aaj Ka Suvichaar 