December 23, 2022
Om Namaha Shivaya
Aaj Ka Suvichaar 🙏🏻🙏🏻 # 1769
Aayi Dolti Pawan
Aayi dolti pawan
Usey dekh kar khush hua gagan
Mudte huey ek se doosre chaman
Guruji mein khoya thaa uska mann.
Milee thi khushboo usey
Guruji kee inaayat se
Milee thi disha usey
Guruji kee hidaayat se.
Rishta toada usne shikaayat se
Joda naata Guruji kee ibadat se
Shukrana karti aur jeeti thi sharaafat se
Aur Guruji kee bakhshi hui saadat se.
Akash ko chhoo leti thi kayi baar
Phir bhi vinamrata thaa uske charitra ka saar
Jhuk kar phoolon ko thi choomti
Gulistaan mein masti se thi dolti.
Sabhi ke shwaas ka rahegi hissa
Ek tareh se uspar nirbhar hai har praani ka kissa
Ye jaante huey bhi usne dambh ke bojh ko nahin apnaaya
Uske liye na koi apna thaa na hee paraaya.
Ahankar aur moh ke bin
Halkepann ka rehta thaa usey ehsaas
Kaam, krodh, lobh se bhi thi anjaan
Toh vyakulta aur ashanti aate nahin thei uske paas.
Guruji ka hota thaa hukm jahaan
Veh pahunch jaati thi vahaan
Ye zameen, ye aasmaan
Inke beech thi uskee bhautik dastaan.
Lekin chitt rehta thaa Guruji mein leen
Sukh santosh bheetar thaa, koi na sakta thaa veh chheen
Swatantra thi, khush thi rehkar Guruji ke adheen
Aur apna farz nibhaane mein thi paawan aur praveen.
Buss, phir kya thaa, hokar Guruji kee deewani
Guruji ke pyaar mein mastaani
Gungunaati hui shabad kee dhun ruhaani
Beeti uskee zindagaani.
Kismat se milta hai
Pooran Guru kee sharan mein rehne ka avsar
Shukraguzaar rahein hum
Ki hamein mila hai Guruji ka divya dar.
Pawan se hum praani lein paawan prerna
Taaki shuddh aur kushal rahe hamaari chetna
Guruji mein shraddha rakhte huey
Chalein Unke dikhaaye raaste par
Pawan kee si saadagi swayam mein samaaye huey
Hon hum ruhaaniyat mein agrasar.
🌹🌹🌹🌹🌹🌹🌹
Jai Guruji 🙏🏻🙏🏻
Dhirja
Aayi Dolti Pawan (12/23/2022)
Aaj Ka Suvichaar 