Tumhaari Madad Zaroor Karenge Guru Sarkar (12/30/2022)

December 30, 2022

Om Namaha Shivaya
Aaj Ka Suvichaar 🙏🏻🙏🏻 # 1776

Tumhaari Madad Zaroor Karenge Guru Sarkar

Milee hai bade naseeb se Guruji kee sharan
Sudhaar lo abhi isee pal se apna janam maran
Baitho Guruji ke paas
Mann mein rakhe yeh aas
Ki Unkee hoti rahe tum par inaayat
Taaki tum kar paao Unkee ibadat.

Bakhshish maango simran kee
Ve karunanidhaan Hain
Subuddhi maango samarpan kee
Ve dayaavaan Hain.

Unhe na dhoondho baahar kaheen
Na dhoondho aasmaan ya zameen
Pehle bhi tum dhoondhte huey thei haare
Ve miley thei bheetar tumhaare.

Ve abhi bhi vaheen Hain viraajmaan
Tumhaari har shwaas ko dete Huey anjaam
Tumhaari chetna ko de rahe Hain Ve prerna
Tumhaari bhakti ko de rahe Hain Ve shakti.

Ekaagra kar lo swayam ko apne hee swaroop mein
Bheetar hee maujood Hain Guru aur Govind ruhaani roop mein
Shant hokar surt jodo Guruji ke sangg
Guruji kee mehar se chadhega tum par Unkee bhakti ka rangg.

Ho paayega Guru kripa se simran Gurbani ka
Ruhaaniyat se nikhaar hoga tumhaari zindagaani ka
Guruji kee yaad mein tum ho jaaoge leen
Baaki har ehsaas honei lagg jaayega ksheen.

Unka saumya roop dekh paayenge naynn tumhaare antarmann ke
Shaayad Unkee awaaz bhi goonjegi tumhaare karn mein
Mann ke upvan mein tumhaari jabb hogi Unse mulaakaat
Toh anmol aur anupam hoga veh saath.

Simran ka har kshan hai bahumoolya dhan
Is dhan kee daat paakar tarr jaayega tumhaara mann
Mann ko das banaane ka jaari rakhna tum prayaas
Taaki indriyon par niyantran karne ka safal ho abhyaas.

Ekant ke kuch lamhe hon ya ho Satsang kee kaksha
Maango Guruji se tum simran kee bhiksha
Gurbani ke har shabad mein hai ruhaani shiksha
Guruji kee kripa se yeh shiksha karegi tumhaari atma kee raksha.

Simran se atma par se daag jaayenge mitt
Simran se Paramatama dwaara atma ka hoga hitt
Simran se hota chalega antakaran ka pavitrikaran
Simran se sulajh jaayega tumhaara jeevan.

Guruji kee leela sach mein hai bahut mahaan
Simran chale nirantar mann mein, ismein hai tumhaara kalyaan
Tum sachche dil se ye chaaho toh Ve denge tumhe vardaan
Simran mein tum paaoge Guru vachan ke amrit kee khan.

Koi bhi pal simran ke bina vyarth hai
Simran se hee maanav jeevan ka arth hai
Ek bhi pal ko na jaane do tum bekaar
Tum neeyat rakho nek, tumhaari madad zaroor karenge Guru Sarkar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tumhaari Madad Zaroor Karenge Guru Sarkar (12/30/2022)