Month: December 2022

December 21, 2022

Om Namaha Shivaya
Aaj Ka Suvichaar 🙏🏻🙏🏻 # 1767

           Bheetar Satyuga Hoga

Kalyuga ka zor thaa
Chaaron oar karkash shor thaa
Tufaani mausam mein ek aisa jhonka aaya
Jiske spandan se shor maano jaise sharmaaya
Jaise jaise shor hua kumm, hui akashvaani
Hawaa bhi rukh badal kar hui shokh aur deewani.

Akashvaani ye kehte huey goonji
Ki jamaa kar lo bhakti kee poonji
Bhakti hee aayegi kaam, baaki sab hai bekaar
Bhakti mein lagg jaao, agar behtar banaana hai sansaar.

Guruji kee dee hui sojhi ne samjhaaya
Ki akashvaani ne kya hai bataaya
Akashvaani keh rahi thi kuch kuch yoon
Koshish hee kar sakti hoon ki kahoon…..

Sansaar, apne bheetar ka sarvapratham
Yaani ki sthir aur shant ho jaaye antarmann
Mann hoga swasth toh oorja hogi behtareen
Shivji ke dhyan mein mann rahega leen.

Shivji ke avatar Hain Guruji paalanhaar
Paraakram hai Unka aparampaar
Unkee ek nazar deti hai bhakt ko taar
Unkee mehar se tarr jaaye yeh saara sansaar.

Akashvaani jabb ruki
Toh hawaa naman mein jhuki
Omkar kee maun dhvani shuru hui baahar aur bheetar
Amritmayi hokar shuddh hua seekar.

Kalyuga ke karkash shor mein akashvaani ka hua aisa prabhaav
Ki sabhi praaniyon mein gehra hua bhakti ka bhaav
Naam simran aur dhyan mein magn hua har vyakti
Bhakti kee shakti banee satyuga laane kee yukti.

Guruji kee mehar se aaye jann jann mein aisee subuddhi
Ki yeh sundar swapn hakeekat bannkar laaye satyugi shuddhi
Bhakti se satyugi ho har praani kee atma
Bheetar satyuga hoga, toh baahar ke kalyuga ka awashya hoga khaatma.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bheetar Satyuga Hoga (12/21/2022)

December 20, 2022

Om Namaha Shivaya
Aaj Ka Suvichaar 🙏🏻🙏🏻 # 1766

            Santosh Aur Shukrana 

Santosh ka nahin hota koi aakaar
Santosh hai sukh ka aadhaar
Santosh agar rahe mann kee vritti ka saar
Toh koi bhi paristhiti nahin kar sakti jeena dushvaar.

Guruji ko shukrana karein jo hum har pal
Har uss daat ka jo hai hamaare paas
Aur har uss cheez ka bhi jo hamein nahin milee
Toh santosh kee oorja sada rahegi mann mein khilee.

Iska arth ye nahin ki apni oar se mehnat chod dein
Ya phir parishram se swayam ko aalasya kee oar moad lein
Apni oar se har shubh karma aur kartavya karte chalein
Guruji ke ashirwaad se santusht hokar jholi bharte chalein.

Santosh se mit jaayega shikaayat karne ka dosh
Santosh se kaayam rahega jeene ka josh
Santosh aur shukrana kee jugalbandi ke sangg hoga poorna samarpan
Aur Guruji kee kripa se sukh rahega har kshan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Santosh Aur Shukrana (12/20/2022)

December 19, 2022

Om Namaha Shivaya
Aaj Ka Suvichaar 🙏🏻🙏🏻 # 1765

         Aisa Lagta Hai Aksar……

Aisa lagta hai aksar
Karte huey yeh jeevan basar
Ki jitnee jald kumm hoti jaa rahi hai zindagi
Utnee hee sheeghrataa se ho rahe hain anubhav hamein
Kuch khatte kuch kadve kuch meethe
Har din ko jeete jeete.

Shaayad pehle bhi hota raha ho aisa
Lekin sojhi par parda pada thaa na jaane kaisa
Ki aaya hee nahin samajh
Aur din raat ke chakra mein gaye ulajh.

Guruji bhakt ko lete Hain Apni sharan mein
Aur bhakt ke safar kee lete Hain poorna zimmedaari
Aur Guru chaahein Apne bhakt ko dena mukti
Isliye jald karam katvaate Hain ek saath ya baari baari.

Ye bhi Guruji kee hee kripa hai aparampaar
Ki bheetar kee grahansheelta rahi hai dheere dheere sudhar
Aur yeh bhi itnee raahat dene wali baat hai
Ki mann ko ichcha hee nahin hoti jaane kee idhar udhar.

Vaise bhi jo vash mein hai hamaare
Usee par chal sakta hai hamaara zor
Ek hai yeh mann aur dooja hai karma hamaare
Phir kyun hum dekhein kaheen aur?

Jitna vicharenge idhar udhar
Utna hee hoga bheetar jaane ke safar par asar
Bandh kar reh jaayenge baahari prabhaav se
Mann ko na milega saakshaatkaar ke liye avsar apne hee ruhaani swabhaav se.

Is beech samay ka pahiya toh nahin rukega
Na hee samay kabhi hamaare saamne jhukega
Isliye Guruji kee mehar bhari mamta kee chhaiyan mein
Kat-te rahein karma
Ve himmat aur subuddhi dete rahein
Aur hum nibhaate rahein insaaniyat ka dharma.

Har anubhav se seekhein aur bante rahein behtar insaan
Jaagrit rahein taaki na haraa paaye hamein vikaaron ka tufaan
Guruji humse khush hon jabb jabb lein Ve hamaara imtehaan
Unkee kripa se hamaara imaan baney hamaari atma ke liye vardaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aisa Lagta Hai Aksar…… (12/19/2022)

December 18, 2022

Om Namaha Shivaya
Aaj Ka Suvichaar 🙏🏻🙏🏻 # 1764

      Der Se Aaye Jeevan Kee Saver

Der se aaye jeevan kee saver
Toh awashya hoga koi kaaran
Guruji tere angg sangg Hain
Kar rahe Hain tere kashton ka nivaaran.

Unkee oar se teri pukaar ka jawaab khaamoshi hai agar
Toh tu sabr kar
Tujhe nahin raha hai dikh
Ki Ve teri kismat ka lekha shaayad dobaara rahe Hain likh.

Tere ghaav mein hai dard
Guruji Hain tere hamdard
Banaa rahe Hain tere ghaav ke liye marham
Taaki tera dard ho jaaye bilkul khatam.

Tu hai logon ke vyavhaar se niraash
Arey naadaan, Guruji toad rahe Hain tere paash
Tu jee sukoon se Unke aanchal kee chhaaon mein
Ve nikaal denge har bedi jo hai tere paaon mein.

Der se hee beshak aaye tere jeevan kee saver
Guruji suljhaa rahe Hain tere karmon ke khaate ke herpher
Tujhe jeete jee Ve karenge azaad
Anupam hoga veh anmol ashirwaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Der Se Aaye Jeevan Kee Saver (12/18/2022)

December 17, 2022

Om Namaha Shivaya
Aaj Ka Suvichaar 🙏🏻🙏🏻 # 1763

                     Kada Prasad

Shraddha bhaav se Guruji ke liye
Sangat banaaye kada prasad
Guruji bhog lagaayein toh veh ho jaaye Unke paawan ashish se aabaad.

Gehun ke beej ko peeskar banaa jo atta
Prem bhaav se ghee mein usey bhun diya
Dooje bartan mein Guru ko yaad karte karte cheeni aur paani se chaashani ko banaaya
Phir ghee mein ramey huey atte mein shraddha se uss chaashani ko milaaya.

Bartan ke har oar se chhootne lagaa veh mishran
Toh jaana ki poori tareh se bann gaya veh uss kshan
Dekhte dekhte mishran ne kada prasad ka swaroop jo paaya
Toh teevrata se prasad kee ruhaani khushboo se sabka dil harshaaya.

Haath dhokar, ho sakey toh muh aur sir ko dhak kar
Aag kee aanch ko dheemi se madhyam rakh kar
Naam japte japte, bin baat kiye, jabb banta hai kada prasad
Toh basne lagta hai usmein anupam ashirwaad.

Beej se atta banaa
Phir veh ghee mein hua leen
Aise hee ahankar ka beej choor hokar Pavitrata mein ho jaaye vileen.

Jaise ghee mein bhuna hua atta bartan ko chipakna deta hai chod
Vaise hee Guruji kee mehar se hum vishay aasakti se sakein muh moad
Jaise prasad ho bartan ke beech kee oar kendrit
Hum bhi vaise hee dhyan mein ho jaayein ekaagrachitt.

Paani taral, ghee pavitra
Ahankar rahit nirmal charitra
Bhaav aur vyavhaar mein cheeni kee mithaas
Ruhaani khushboo se mitt jaaye traas.

Guruji ke kamal charnon mein maathe ko tek
Unhe arpan karein bhog ke liye kada prasad kee deg
Kada prasad aur Guruon ka ashirwaad
Kar de sangat ke bhakti bhaav ko aabaad
Guruji kee mehar se ho paaye dhyan aur simran
Aur kada prasad kee mahima ka anusaran kar le ye mann.

Kada prasad ka taral nirmal swaroop
Prerna itnee paawan aur anoop
In sab ashirwaad ke liye Guruji ka anantam shukrana
Kada prasad kee meethi mahima ko kabhi na tum bhulaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kada Prasad (12/17/2022)

December 16, 2022

Om Namaha Shivaya
Aaj Ka Suvichaar 🙏🏻🙏🏻 # 1762

                    Pehle Se Behtar

Sabhi karte hain prayaas
Aur sabhi kee hoti hai aas
Ki pehle se behtar ho jaaye jeevan
Aur iske liye sabse zaroori hai ye mann.

Ye jeevan, ye rishte, ye shareer
Naukari kaam vyaapaar taqdeer
Sab kuch pehle se behtar ho jaaye toh hai achcha
Besharte prayaas ho nishkapat aur sachcha.

Yeh ‘pehle se behtar’ ka jo hai safar
Yeh toh chal sakta hai umr bhar
Isliye, zaroori hai is safar ke dauran
Ki mann ka kiya jaaye sahi poshan aur dhyan.

Mann kee hogi pehle se behtar sthiti
Toh sthirta se uss pal kee paristhiti kee hogi sweekriti
Kyunki manzoori se vartmaan ke pal mein rehna
Aur santulan aur shubh manobal ke bhaav mein rehna
Isee se veh spashtataa aayegi
Jo aagey ka raasta dikhaayegi
Manobal se milenge atma-vishwaas, komalta, aur taralta
Milegi aagey jaakar shubh karma mein safalta.

Ye sab mumkin hoga samarpan dwaara
Guruji ne Apne har bhakt ka jeevan hai sanvaara
Sewa satsang simran shukrana samarpan
Guruji kee mehar se milta hai daan mein ye anmol anupam dhan.

Ek oar vartmaan jaisa bhi ho, usey sweekaara jaaye
Aur doosri oar, pehle se behtar jeevan kee hai aas
Beshak lagey yeh thoda aapas mein virodhi sa aabhaas
Lekin iska ruhaani raaste par mahatva hai bahut hee khaas.

Na karma rukenge na hee samay
Lekin pal pal kee sweekriti se mitega aagey badhne ka bhayy
Mann rahega swasth
Pehle se kumm sataayenge kasht.

Unnati kee bhi khilee rahegi chaah
Aur shukrana badhaayega utsaah
Guruji kee pal pal kripa ke sangg
Bhakt par chadhta rahega Guru bhakti ka rangg.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Pehle Se Behtar (12/16/2022)

December 15, 2022

Om Namaha Shivaya
Aaj Ka Suvichaar 🙏🏻🙏🏻 # 1761

     Guruji Ka Gungaan Gaate Gaate

Guruji ka gungaan gaate gaate
Honei lagey gumm mere gum
Guruji ke geet gaakar gyat hua
Ki gehna bann gayi geeton kee sargam.

Guruji ke chaarul charan mein
Mil gaya maano chandan ka chaman
Guruji kee saumya sharan mein
Santosh paakar sukhi hota jaa raha hai mann.

Guruji ka simran karte karte
Badhta jaata hai Unke prati pyaar
Unke satsang sunkar aur kehkar
Gehra hota jaata hai aitbaar.

Guruji sewa ka dete Hain jabb avsar
Toh aur bhi jhuk jaata hai sir
Na jaane kiye hongei kaun kaunse paap
Jo sewa bakhsh kar Guruji mita rahe Hain mera santaap.

Guruji ka Shukrana karte aur kehte
Hoti jaa rahoon aur bhi zyada shukraguzaar
Itnee khaamiyaan honei ke baavjood bhi
Guruji ne kar liya hai sweekar.

Abb toh Unka aanchal hai mera ashiyaana
Jabb takk janam maran ka chalega afsaana
Aur jabb is silsile ke antt ke shubh pal ne hai aana
Toh Guruji kee mehar se ho jaaye Unkee jyoti mein mera samaana.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ka Gungaan Gaate Gaate (12/15/2022)

December 14, 2022

Om Namaha Shivaya
Aaj Ka Suvichaar 🙏🏻🙏🏻 # 1760

                     Rangamanch

Duniya banaane wale ne rangamanch kiya tayyaar
Aur praaniyon kee rachna kee
Khula jaise hee phaatak
Usne shuru karvaaya naatak.

Ye hua kayi baar
Yug yug chala sansaar
Abhi bhi naatak chal raha hai ek
Jismein kirdaar nibha rahein hain hum praani anek.

Karna hai abhinay yahaan
Aisa ki laabh ho hamein vahaan
Apna apna kirdaar nibhaana hai
Phir rangamanch se chale jaana hai.

Guruji sunn aur dekh rahe Hain
Har soch aur har kriya hamaari
Yahaan nahin toh vahaan hisaab hoga
Aayegi zaroor sabki baari.

Satyugi hai ya nahin hamaara abhinay
Kis tareh se humne usey kiya adaa
Ek ek kadam par ho raha hai hamaara nireekshan
Isliye laparawahi nahin honi chahiye kisee bhi kshan.

Guruji kitne prasann hon agar ho hamaara shreshth abhinay
Guruji kee mehar se hamaare abhinay se ho shubhta ka uday
Aayiye duniya ke rangamanch ko sundar banaayein
Aur yahaan se vida honei ke baad bhi sukh paayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Rangamanch (12/14/2022)

December 13, 2022

Om Namaha Shivaya
Aaj Ka Suvichaar 🙏🏻🙏🏻 # 1759

      Teri Taqdeer Jaayegi Sanvar

84 lakh yooniyan bhugat kar
Mila ye maanav shareer
Aye bande, isey vyarth na jaane de
Sanvaar le apni taqdeer.

Ye hai Guru Govind kee mehar vishesh
Is shareer mein rehkar chod de raag dvesh
Bhautik dhan daulat mein kho kar swayam ko
Na bekaar jaane de apne is janam ko.

Guruji se kar tu ardaas
Ki tujh mein simran kee jagg jaaye aisee pyaas
Ki simran mein rahe tera har shwaas
Aur tu banaa rahe Guruji ka das.

Kshanabhangur hai yeh jeevan
Jald se jald ekaagra kar le tu mann
Beshak aaye tere raaste mein vighn
Tu apni oar se kar poora prayatna.

Guruji kee kripa se honei lagega tujhse simran
Unkee mehar se Unmein magn rehne lagega tera mann
Unke ashirwaad se pavitrata ka punj bann jaayega tera mann aur tann
Unka naam japte japte Unkee prerna se safal hoga tera jeevan.

Na rakhna hai tujhe bhojan ka upvaas
Buss vikaaron aur paapon ka nahin bann-na hai das
Guruji ke liye Unka har bhakt hai khaas
Tujhe ho jaayega is safar mein is satya ka ehsaas.

Chalta chal
Tu har pal
Aaj aur kal
Is raaste par.

Kisee vikarshan ke aagey jhukna matt
Ve tujhe neeche kee oar kheench lenge
Apne mann kee bhoomi ko rakhna saaf
Guruji usey Apne amrit se seench denge.

Paar ho jaayega har bhautik bhanvar
Guruji kee deeksha ka hoga tujh par asar
Unkee chhatr-chhaaya mein hoga tu path par agrasar
Sach mein, teri taqdeer jaayegi sanvar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Teri Taqdeer Jaayegi Sanvar (12/13/2022)

December 12, 2022

Om Namaha Shivaya
Aaj Ka Suvichaar 🙏🏻🙏🏻 # 1758

          Haste Haste Jee Lein

Haste haste jee lein toh hai achcha
Kyunki jeeni toh hai ye zindagi
Mukaam aayenge kuch khatte kuch meethe
Aisee hee toh hai ye zindagi.

Koi dega pyaar, koi wafa nibhaayega
Koi todega vishwaas, koi saath chod jaayega
Mausam bhi badalte rahenge
Hum sab mein bhi hoga parivartan
Is sab mein bahut zaroori hai
Ki shant aur sthir rahe hamaara mann.

Mann par hoga niyantran
Toh aasaan hoga sehna parivartan
Aur saaf hoga mann ka bartan
Toh hee bhar paayega usmein ashirwaad ka dhan.

Ashirwaad, Guruji ka, jis se saarthak hogi zindagi
Unkee mehar se hee safal hogi bandagi
Mann bann kar rahega das
Tabhi mitenge trishna aur traas.

Apna kartavya nibhaate rahein Gurujī kee mehar se
Seekh seekhte chalein har ghadi har pehar se
Vaisa sulook karein doojon se jaise hum apne prati chaahein
Dil khol kar apni srijanaatmakta se aabaad karein raahein.

Apni oar se dein poora yogdaan
Ki pyaari si duniya ho ye jahaan
Chalte huey zindagi ka kaarawaan
Koi pahunchta hai yahaan, koi vahaan.

Mann rahe sada santusht
Soch aur karma na hon dusht
Rehkar Guruji ke shukraguzaar
Is jeevan ko lein hum guzaar.

Saans saans mein ho Guruji ka naam
Mann mein sada chale Guruji ka simran aur dhyan
Haste huey beet jaaye samaa yahaan
Yaad rahe ki yahaan hum hain kewal mehmaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Haste Haste Jee Lein (12/12/2022)