Month: December 2022

December 11, 2022

Om Namaha Shivaya
Aaj Ka Suvichaar 🙏🏻🙏🏻 # 1757

              Punar Milan Ke Din

Koi bhi nahin rahega sada bachcha ya jawaan
Badalta rahega ye samaa
Aisee hee hai sabhi kee dastaan
Sabhi hain mehmaan yahaan.

Phir bhi bann jaate hain galat phehemi ke shikaar
Soch kar ki yaheen rehte rahenge sada
Bann jaati hai kuch aisee adaa
Ki hotey rehte hain bhautikvaad par fida.

Guruji dete rehte Hain chetaavani
Ki anaasakti hai sukh kee mani
Kintu hamaari seemit buddhi isee bhram par rehti hai banee
Ki bhautik padaarthon ka sangraha banaata hai hamein dhani.

Aur saath mein jabb kuch ya kisee ko khone ka hota hai bhayy
Toh shanti kaise aaye?
Aur phir saath mein tripti na ho
Toh santosh kahaan se aaye?

Jismein hogi aasakti
Usee ka rahega chintan har pal
Jabb aayega mrityu ka kshan
Usee chintan sangg jaayega mann.

Jis mitti par yahaan rehna hai
Usee mitti sangg phir behna hai
Mitti se hee thei hum aaye
Mitti mein hongei samaaye.

Mitti ka bann jaayenge hum hissa
Jabb khatm hoga saanson ka kissa
Itnee si hee hai aukat hamaari
Ki yahaan aate hain karne vahaan jaane kee tayyaari.

Guruji ne diya hai naam simran ka daan
Unhonei saadagi aur saralta par daala hai zor
Kehte Hain Ve aish karne ko bin aasakti ke
Taaki na baandhein hamein vyarth mein ye paash
Simran aur dhyan dwaara hota rahe pavitrikaran
Taaki saaf aur shuddh hota rahe antarmann.

Mann dwaara hee ho sakta hai samarpan
Har karma hoga phir Guruji ko arpan
Yog mein sthit hokar hogi jabb bhakti
Toh awashya praapt hogi unnati kee shakti.

Yahee adhyaatmik unnati le jaayegi mukti ke kareeb
Guruji kee mehar se zaroor aisa khilega naseeb
Guruji divya jyot Hain, Ve pehchaanein atma kee pyaas
Bhakti aur yog dwaara poori hogi atma kee aas
Atma divya jyot mein vileen ho jaayegi ik din
Is punar milan ke din dono ho jaayenge abhinn.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Punar Milan Ke Din (12/11/2022)

December 10, 2022

Om Namaha Shivaya
Aaj Ka Suvichaar 🙏🏻🙏🏻 # 1756

   Kabhi Saath Na Chodne Ka Vaada

Kabhi saath na chodne ka vaada
Sada kalyaan karna zyada se zyada
Pyaare Guruji aisa karte Hain
Angg sangg rehte Hain aur jholi bharte Hain.

Unka Apna kabhi koi swaarth nahin
Karte Hain jo bhakt ke liye ho sahi
Hamaari samajh kamzor hai, Guruji Hain sarvshaktimaan
Hum par chalta baahari zor hai, Guruji Hain swatantra Bhagwaan.

Kripalu Hain
Dayalu Hain
Unke nirnay mein hai karuna aur nsaaf
Sazaa kumm karte Hain, karte Hain maaf.

Asal ghar ka raasta dikhaate Hain Guruji
Vahaan pahunchne ka upaay bataate Hain Guruji
Uss raste par chalna sikhaate Hain Guruji
Chunautiyon ke baare mein samjhaate Hain Guruji.

Guruji kee kripa se miley aisee subuddhi
Ki ho jaaye hamaari asal shuddhi
Har tareh kee dushtata chhoot jaaye
Dhyan mein judein, ahankar toot jaaye
Unnat avastha kee oar hon hum agrasar
Taaki agla janam ho is janam se behtar
Hamaari oordhvagati ke liye Guruji toh kar rahe Hain sab kuch
Hamaari koshish aur mehnat shreshth ho, na ki tuchh.

Sansaar mein rahein lekin sansaar ko na rehne dein apne bheetar
Vishayon mein nasha chod dein Guru naam ka amrit peekar
Mann par vijay paakar banein sach mein veer
Guruji kee kripa se sanvar jaayegi gati ke sangg taqdeer.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kabhi Saath Na Chodne Ka Vaada (12/10/2022)

December 9, 2022

Om Namaha Shivaya
Aaj Ka Suvichaar 🙏🏻🙏🏻 # 1755

        Kuch Palon Ka Hai Ye Afsaana

Kuch palon ka hai ye afsaana
Seekh lo rehna khush haal
Tedha ho beshak zamaana
Tum rakho apni seedhi chaal.

Guruji ke naam mein mastt raho
Unke diye kaam mein vyast raho
Chaahe naukari ka kaam ho ya ghar parivaar ka
Sewa ka ho ya phir vyaapaar ka.

Khush rehne ka upaay hai shukrana mein rehna
Kitnon se behtar hai tumhaari sthiti
Haan, aate hain sabke jeevan mein aise lamhe
Jabb bahut kathin hoti hai paristhiti
Lekin sabhi ke saath chal raha hai kuch na kuch
Kyunki kisee ka muqammal nahin hai jahaan
Kal, aaj, aur kal ke har pal mein
Karmon ka khel chal raha hai yahaan aur vahaan.

Din kee shuruaat karo shukrana ke sangg
Aur ardaas Guruji se ki tum vaise hee jeeyo jaise Unhe aaye pasand
Din ke antt mein shukrana aur deni maafi
Aur maangni maafi jiskee oar hui ho tumse koi gustaakhi.

Subah se shaam jabb karo aaraam ya phir koi kaam
Mann kee rasna par nirantar rahe Guruji ka naam
Guruji ko na karo apni maangon ya shikaayaton se pareshaan
Balki shukrguzaar raho taaki tum par prasann hon Guru meharbaan.

Kyunki, ginee chuni hain saansein tumhaari
Aaj ya kal yahaan se jaane kee aa jaayegi baari
Jabb jeevan hee asthaayi hai toh khushi gumm bhi hain sirf mehmaan
Isliye kyun na shukrana ke rangg se ankit karo jeevan kee dastaan?

Isliye, Shukrana kee sthiti mein raho
Shukrana ke bhaav mein baho
Poori koshish karo ki khush raho
Har pal Guruji ko shukrana kaho.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kuch Palon Ka Hai Ye Afsaana (12/09/2022)

December 8, 2022

Om Namaha Shivaya
Aaj Ka Suvichaar 🙏🏻🙏🏻 # 1754

           Kalyuga Ke Bhanvar Mein

Insaan kalyuga ke bhanvar mein dol raha hai
Bin soche bin dekhe mann ka darwaza khol raha hai
Vikaar kar rahe hain ghuss kar aakraman mann par
Insaan adhyaatmik ksheenta kee vajeh se laachaar hai magar.

Jhooth, chori, aur hinsa
Vyabhichaar aur nasha
Inse aur bigad gayi hai dasha
Kumm ho rahi sudhaar kee asha.

Bhakti kumm hai isliye bhayy hai
Shraddha kumm hai isliye sanshay hai
Mann ashant hai isliye bheetar pralay hai
Bhatak raha hai dar dar isliye paraajay hai.

Mausam aur prakriti de rahe hain chetaavni
Ki abb bhi agar insaan ne kee manmaani
Toh baahar bhi pralay nahin hai duur
Iska pramaan dekh kar bhi insaan ho raha hai kroor.

Kayi jann kar rahe hain paakhand
Kayi lagaaye baithey hain samadhi akhand
Kayion ka vyavhaar hai prachandd
Kuch hee ko mil raha hai kukarmon ka dandd.

Pichhle karmon ka chal raha hai hisaab
Is janam ke achche burey karmon par se bhi utarega nakaab
Rabb ke aagey toh sabki kahaani hai khuli kitaab
Chaahe kisee ka ho sabse ooncha khitaab.

Kripa hai Guru Govind kee ki kayi jann
Kar rahe hain simran aur manan
Kayi kar rahe hain bhajan aur kirtan
Bhakti mein leen hai unka mann.

Har dharma ke aise bhakt jann
Kar rahe hain apne Isht ka vandan
Kayi jann ka vash mein hai mann
Ve jagat ke liye dua kar rahe hain har kshan.

Guruji ne Apni sangat ko dee hai prerna
Unka diya mantra japne kee shwaas shwaas mein
Sewa, simran, satsang ka diya hai daan
Aur simran karaate karaate Ve bakhshte Hain dhyan.

Guruji MahaShiv ka swaroop Hain
Anginat devi devta Unmein samaaye Hain
Guruji ne anokhe dhangg se ashirwaad dekar
Bhakton kee kismat ke taare chamkaaye Hain.

Kalyuga mein Guruji ke naam ka daan
Bhakton ke liye hai param vardaan
“Banda bann,” Apne bhakton ko kehte Hain Guruji
Apni har sangat ko har pal dekhte rehte Hain Guruji.

Guruji Hain kalyuga ke bhanvar rokne mein samarth
Ve jaante Hain sabki har achchi aur buri soch aur harkat
Ve sarvgyani Hain, Unse kuch bhi hai chhipa nahin
Jis maade samay kee oar thaa Unka sanket, ye samay hai vahee.

Isliye kalyuga ke bhanvar mein khone ke bajaaye
Agyan aur aalasya kee neend mein sonei ke bajaaye
Simran aur dhyan ka raasta apanaayein
Aur Guruji ka hukm maankar bande bann-ne kee koshish mein lagg jaayein.

Vash mein honei lagg jaaye mann
Toh kitnee museebatein ho jaayengi khatam
Vayyr vikaar ho jaayenge kumm
Mann mein Satyuga ka hoga janam.

Guruji bakhshein sumati
Taaki na ho hamaari durgati
Unke dikhaaye raaste par chal paayein
Satyuga ka aagaman kar paayein.

Sadbhaav aur sakaaraatmakta ho har oar
Satyugi sooraj laaye aisee bhor
Vandan se mann ho jaaye chandan
Shubh ho jaaye bheetar aur baahar ka spandan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kalyuga Ke Bhanvar Mein (12/08/2022)

December 7, 2022

Om Namaha Shivaya
Aaj Ka Suvichaar 🙏🏻🙏🏻 # 1753

                 Guruji Ka Naam

Guruji ka naam hai amrit kee dhaara
Jisne apni har boond se sangat ko hai taara
Guruji ka naam hai veh naiya
Jiske Guruji swayam Hain khivaiya.

Guruji ka naam hai divya oorja
Jis se nikharti hai bhakt kee pooja
Guruji ka naam hai mani sukh kee
Jis se pheeki ho jaati hai peeda dukh kee.

Guruji ka naam hai stambh
Jiske sahaare mitt jaata hai dambh
Guruji ka naam hai motiyon ka veh haar
Jo toad deta hai mann ke saare vikaar.

Guruji ka naam hai chhaaon
Jismein raahat paate hain thakey huey tann mann aur paaon
Guruji ka naam hai aushadhi
Jis se duur hoti hai har vyaadhi.

Guruji ka naam hai ujaala
Bhakton ko raah dikhaane wala
Guruji ka naam hai nirmal noor
Jo karta hai mann ka andhera duur.

Guruji ka naam hai sadhna
Jo sikhaaye bhavsaagar ko laanghna
Guruji ka naam hai divyata
Jis se kann kann mein basne lagti hai pavitrata.

Guruji ka naam hai utsah
Jo deta hai aagey badhne kee chaah
Guruji ka naam hai santosh
Jo mita deta hai laalach ka dosh.

Guruji ka naam hai sweekriti
Jo badhaati hai Guru mein preeti
Guruji ka naam hai prasannata
Jismein basee hai akhandata.

Guruji ka naam hai paawan prem
Jis se uttam nahin koi dein
Guruji ka naam hai veh sarvochch gyan
Jiske kadmon mein jhukta hai vigyaan.

Guruji ka naam hai daan
Anivaarya hai karna is naam ka sammaan
Guruji ka naam hai veh chhavi
Jisey dekh kar sharmaa jaaye ravi.

Guruji ka naam hai Shiv roopi chetna
Jis se miltee hai adhyaatmik unnati kee prerna
Guruji ka naam hai Parabrahm ka naam
Jisey jap kar ho jaata hai sarvkalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ka Naam (12/07/2022)

December 6, 2022

Om Namaha Shivaya
Aaj Ka Suvichaar 🙏🏻🙏🏻 # 1752

             Adhyaatmik Adalat

Adhyaatmik hai vahaan kee adalat
Kewal Guruji kar sakte Hain hamaare paksh mein vakaalat
Unse chhipi nahin hai hamaare tann mann kee haalat
Ve jaante Hain ki saarthak hai ya nahin hamaare imaan kee imaarat.

Nirnay lene wale bhi Guruji hee Hain
Unhe gyat hai humne jo achchi buri harkatein kee hain
Ve chup Hain magar sab kuch dekh rahe Hain
Agochar rehkar Ve likh hamaare lekh rahe Hain.

Har koi paawan hota hai jabb hota hai navshishu bachcha
Bade hotey hotey jhooth se dooshit ho jaata hai veh bachcha sachcha
Akhandata ka khandahar ho jitna
kachcha
Utna hee mushkil hai hona anjaam achcha.

Isliye zaroorat hai ek aisee buniyaad kee
Jis par mohar ho Guruji ke ashirwaad kee
Jis bhi janam mein atma ko ye mil jaayegi
Atma kee bhavishyavaani khil jaayegi.

Kyunki atma kee jo duuri hai Paramatama se
Veh honei lagegi kumm
Nazdeek ho jaayegi atma kee Paramatama se milan kee ghadi
Koi aur ghadi atma ke liye nahin hogi is ghadi se badi.

Isliye beshak is se pehle ho chuke hon hamaari atma ke kayi janam
Abb bhi atma ko manzil takk pahuncha sakte hain hamaare changey karam
Atma pehen kar aayegi jo bhi shareer
Uss shareer ke karam nirdhaarit karte jaayenge aagey kee taqdeer.

Guruji saath Hain, Guruji nath Hain
Ve Hain aur rahenge hamaare madadgaar
Jitne nek hongei hamaare iraade, vichaar, aur karam
Utnee aasaani se hoga hamaari atma ka Paramatama se milan.

Atma kee gati badhaayega har janam mein hota hua sudhaar
Dheere dheere sanvarte jaayenge atma ke sanskaar
Kisee na kisee janam mein atma milan ke liye ho jaayegi tayyaar
Paramatama mein samaane ke liye hogi veh shukrguzaar.

Baaki toh kya, chauraasi lakh yooniyan kar hee rahi hain intazaar
Ki hum girein aur ve hamaari atma par jamaa lein apna adhikaar
Lekin aisa toh hoga hamaari atma ke liye dushvaar
Atma aur Paramatama ke milan ke beech aa jaayegi phir deewar.

Adhyaatmik adalat ka faisla hamaare paksh mein ho
Aise jeene mein hee hai hamaari bhalaayee
Guruji kee vakaalat aur Unka nirnay na honei dega rusvaayee
Guruji kee toh vikhyaat aur vaddi hai vadiyaayee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Adhyaatmik Adalat (11/06/2022)

December 5, 2022

Om Namaha Shivaya
Aaj Ka Suvichaar 🙏🏻🙏🏻 # 1751

           Mangalmay Mukaam 

Kitne musaafir chale jaa rahe hain
Bin disha ke agyan kee nisha mein
Unhe hai safar kee subah ka intazaar
Jiska naseeb hoga changa, veh pahunchega Guru ke dwaar.

Guruji ke ashirwaad se
Roshan hai tera raasta
Tu buss chalta chal uspar
Basaakar apne bheetar aastha.

Koi moad nahin, na hee koi pathar
Jis par Guruji kee nahin hai nazar
Raaste mein na hai koi aisa manzar
Jiskee Unhe nahin hai khabar.

Aisa nahin ki raah mein hongei sirf phool
Kaheen kaheen shaayad chubhenge tujhe shool
Lekin tere sangg hoga Guruji ka sahaara
Aur Unhonei sada hai bhakton ka kaaj sanvaara.

Raah beshak na lagey hamesha suhaani
Lekin agar tera nazariya hua ruhaani
Toh Guruji kee mehar se tera haunsala rahega barkaraar
Aur toot jaayegi baadha kee har deewar.

Ek tu hee nahin hai jisey mushkilon ka saamna hoga karna
Aur tere sangg Guruji Hain, phir kaahe ka darna
Yaheen par karmon ka hisaab ho toh achcha, varna
Na jaane kitne janam lekar jurmaana padega bharna.

Guruji ne akash mein chaand aur sooraj ko sajaaya hai
Guruji ne timatimaate taaron kee chaadar ko tere liye bichhaaya hai
Ye na dikhein, toh bhi gumm na karna
Tu apni oar se mehnat ko kumm na karna.

Teri shraddha, teri neeyat, teri chetna
In sabko milti rahegi Guruji se prerna
Tu har shwaas ko qurbaan kar Unke naam par
Unkee mehar se tu awashya pahunchega mangalmay mukaam par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mangalmay Mukaam (12/05/2022)

December 4, 2022

Om Namaha Shivaya
Aaj Ka Suvichaar 🙏🏻🙏🏻 # 1750

   Aankhein Khuli Hon Ya Hon Bandd

Pyaare Guruji,

Aankhein khuli hon ya hon bandd
Lamhe zyada hon ya ho chandd
Aapki muskaan mandd
Aapki ruhaani sugandh
Hota hai inka anubhav aksar
Jabb se shuru hua ye safar.

Safar, maano ek naye janam se hai juda
Jismein Aapki kripa se mann Aapki oar rahe muda
Vaani aur vichaar shuddh hotei rahein Aapke vandan se
Chitt kabhi na judaa ho Aapke chintan se.

Subuddhi bakhshiye Guruji
Taaki timir mitt jaaye agyan ka
Jaagrookta deejiye Guruji
Taaki mahatva jaanein Aapki kripa ke vardaan ka.

Jaagriti bakhshiye Guruji
Taaki aalasya kee neend se jaagein
Aap hee Hain rakshak hamaare
Aur kaheen phir kyun hum bhaagein?

Charitra mein pavitrata
Vyavhaar mein sabhyata
Sakaaraatmakta se mitrata
Inke sahaare duur ho jaaye adhyaatamik daridrata.

Yaad rakhein ki hum hain Aapki santaan
Tyaag kar abhimaan
Asal dhan ka karein sammaan
Apni chhatra-chhaaya mein rakhiye, komal
karunanidhaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aankhein Khuli Hon Ya Hon Bandd (12/04/2022)

December 3, 2022

Om Namaha Shivaya
Aaj Ka Suvichaar 🙏🏻🙏🏻 # 1749

         Aapke Charnon Mein Hee

Param poojya Guruji,

Aapne japne diya Apna naam
Toh hui mai dhanwaan
Aapne diya ashiyaan
Poora hua ghar ka armaan.

Aapse honei lagi pehchaan
Mitne lagi janmon kee thakaan
Aapko liya apna nath jaan
Sada rahoon Aapki santaan.

Sahi galat se mai anjaan
Aap sumat dekar mitaayein agyan
Aap Hain gyan kee khan
Mai naadaan insaan.

Ye duniya moh maya kee dastaan
Aap saarthakta, Aap Bhagwaan.
Mann par vijay dega yahaan
Aapke naam ka nirmal baan.

Sada bakhshiye Apna simran aur dhyan
Mere Guruvar karunanidhaan
Deejiye Prabhu mere, kripa ka daan
Aapke charnon mein hee hai mera kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Charnon Mein Hee (12/03/2022)

December 2, 2022

Om Namaha Shivaya
Aaj Ka Suvichaar 🙏🏻🙏🏻 # 1748

       Guruji Kee Hai Ye Inaayat

Guruji kee hai ye inaayat
Ki mann mein hai Unhe paane kee chaahat
Guruji ka pyaar hai sabse zaroori zaroorat
Guruji aur Unkee ibadat se ho gayi hai mohabbat.

Guruji ke simran se miltee hai mann ko raahat
Kaan taraste hain sunn-ne ko Guruji ke kadmon kee aahat
Dhyan mein sunaayi deti hai Unke chole kee sarsaraahat
Itnee achchi lagti hai Unhee ke khayaalon mein rehne kee aadat.

Ye bhakti hai ya magn rehne ka nasha
Guruji kee kripa hai jo hai aaj aisee dasha
Kyunki kuch mumkin nahin bin Unkee izaazat
Ve hee har pal har kadam par karte hain hifaazat.

Guruji prerna Hain mere nagme ke saaz ke
Ve gyata Hain mere har raaz ke
Ve uttardaata Hain meri har ardaas ke
Ve maalik Hain mere har shwaas ke.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Hai Ye Inaayat (12/02/2022)