Month: January 2023

January 11, 2023

Om Namaha Shivaya
Aaj Ka Suvichaar 🙏🏻🙏🏻 # 1788

Thaama Hai Jabb Se Aapne Mera Haath

Pyaare Guruvar,

Thaama hai jabb se Aapne mera haath
Diya hai Aapne jabb se Apna salona saath
Santosh hai ki bann jaayegi har bigdi baat
Jo na baney, toh uskee nahin koi ahamiyat ya aukat.

Kyunki Aap hee jaanein mere liye kya hai sahi
Kya mere lekhe mein hai aur kya nahin
Kya Aap likhna chaahte Hain dobaara
Aapko gyat hai ye saara ka saara.

Mujhe ye sab sochne kee zaroorat nahin hai, Aapka shukr hai
Jo hona hai meri zindagi mein, uskee zabse zyaada Aapko fikr hai
Aapse hee mera raasta, Aapse hee meri manzil
Ye jaan kar beparwaah ho gaya hai mera dil.

Beparwaah sahi, magar kabhi laparwah honei lagoon
Toh kar deejiyega mujhe savdhaan
Ashirwaad deejiye mujhe
Ki har din banti chaloon pehle se behtar insaan.

Zindagi mein har imtehaan kee kasauti par Khari utarne ka karti rahoon nek prayaas
Jeevan mein utaar ho ya chadhaav
Har paristhiti mein Aap par rahe mujhe atoot vishwaas.

Meri galatiyon ko kshama kar
Mujhe unse seekhne kee deejiyega subuddhi
Mann mein heen vichaar na aayein
Kar deejiyega aisee chitt shuddhi.

Bakhshte rahiyega daat sewa aur simran kee
Daan mein deejiye shanti aur sthirta mann kee
Aapse pyaar aur wafaa nibhaati rahoon
Aapki mahima ke geet gaati rahoon.

Sweekriti aur samarpan rahein mere har karma ke do patvaar
Jis bhi haalaat mein rakhein Aap, karti rahoon Aapka shukrana baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Thaama Hai Jabb Se Aapne Mera Haath (01/11/2023)

January 10, 2023

Om Namaha Shivaya
Aaj Ka Suvichaar 🙏🏻🙏🏻 # 1787

        Mehmaan Ho Tum Yahaan

Mehmaan ho tum yahaan
Mehmaan bann kar raho
Jis Prabhu ne tumhe bheja hai yahaan
Unka shukrana kaho.

Anant takk toh rehna nahin yahaan
Kar lo vo jo kaam aaye vahaan
Duniyadari ke farz nibhaao, kintu iske jaal mein na ulajho
Vahaan ke liye tayyaari ka mahatva samjho.

Guruji ne dee hai sharan kee suraksha
Guruji se milee hai tumhe naam kee deeksha
Maangte chalo Unse tarne kee bhiksha
Ve sada karenge tumhaari raksha.

Koi padaarth saath na lekar jaaoge
Apne paraaye bhi sab reh jaayenge yaheen
Karmon aur paapon ka bhaar uthaakar
Chodni padegi ye duniya aur ye zameen.

Mehmaan navaazi ho rahi hai jo yahaan
Toh vo bhi pichhle janmon ke karmon ka hai phal
Aur jo chaahte ho ki yadi agla janam ho toh sukh miley
Toh aaj ke prayaas se sudhaar lo abhi se aane wala kal.

Kal, is janam ka aur agley janmon ka
Taaki jeete jeete mukti kee avastha par pahunch paao
Aur Guruji ko prasann kar Unke ashirwaad se
Ruhaaniyat kee seedhiyan chadhte jaao.

Prayaas karte chalo ki simran hota rahe
Prayaas, ki ahankar khota rahe
Prayaas, ki har karma koi paap dhota rahe
Prayaas, ki har vikaar aur aasakti ka asur sota rahe.

Prayaas, ki Guruji ko maangne ke alaawa na ho koi aur chaahat
Prayaas, ki Guruji ke simran aur dhyan se miltee rahe raahat
Tum apni oar se karte chalo prayaas
Guruji ke charnon mein arpan kar ke har shwaas.

Is tareh se asal ghar takk jaane kee hoti rahegi tayyaari
Aur Guruji kee mehar se kabhi na kabhi toh aayegi vahaan jaane kee baari
Vahaan tumhaari sifaarish na kar sakegi ye duniyadaari
Vahaan kaam aayegi kewal Guru Govind se rishtedaari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mehmaan Ho Tum Yahaan (01/10/2023)

January 9, 2023

Om Namaha Shivaya
Aaj Ka Suvichaar 🙏🏻🙏🏻 # 1786

                 Udta Jaa Raha Hai

Udta jaa raha hai
Waqt ka vihangam
Itnee duur na ud jaane dena usey
Ki pachhtaaye baad mein tera mann.

Waqt ke vajood kee pratishtha ko pehchaan
Vartmaan ke waqt kee mahima ko maan
Ye gaya toh phir laut kar na aayega
Beete huey kal kee bhanti tu isey bhi ganvaayega.

Guruji ne har vehem hataa diya hai
Guruji ne har bhram mita diya hai
Jabb bhi jahaan bhi kar sakey
Tu karta chal Unke naam ka jaap
Guruji MahaShiv Hain
Duur karenge tere santaap.

Guruji Hain kripa dhaar
Aise jod Unse tu seedhi taar
Ki tu baahar ho ya ho ghar par
Tera chitt ho Guruji ke dar par.

Subah ho ya ho shaam
Tu leta chal mann mein Guruji ka naam
Amritvela jaag sakey toh achcha
Varna kabhi bhi kar le simran sachcha.

Dhoop ho ya ho chhaaon
Mann se chhoota chal Guruji ke paaon
Khushi ho ya ho gumm ka pal
Na soch ki tu simran karega kal.

Sewa mein aur satsang mein
Tu rangta chal naam ke rangg mein
Iska asar dikhega tere jeene ke dhangg mein
Tu jeeta chalega Guruji ke naam kee umang mein.

Mayavi hai waqt ka vihangam
Har pal hai udne ko tayyaar
Ye tere kaam aayega
Jo tu Guru se karega shraddha bhara pyaar.

Jitna kamaa sakta hai tu naam ka dhan
Waqt rehte huey le tu kamaa
Kyunki jo waqt ka vihangam udaa
Toh tu reh jaayega haath par haath dharaa.

Waqt ke vihangam kee teevra hai gati
Guruji se vintee kar ki tujhe dein sumati
Uss sumati ka sadupyog tu kar
Naam japte japte tu jaayega tarr.

Jaan tu waqt ke vihangam ka paigaam
Simar le har kshan Guruji ka naam
Waqt ke sangg bhar le adhyatmik udaan
Is mein hai tera kalyaan hee kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Udta Jaa Raha Hai (01/09/2023)

January 8, 2023

Om Namaha Shivaya
Aaj Ka Suvichaar 🙏🏻🙏🏻 # 1785

                      Shubh Avsar

Na lagan lagaa is deh ya duniya se
Is zindagi ko jeene ke liye
Atma shareer ko pehen kar aayi hai yahaan
Apne safar ke dauran shaayad liya usne kuch palon ka viraam.

Yahaan maya ka raaj hai
Aisa hee kal thaa, aisa hee aaj hai
Jabb sabb hai maya, toh kaisa sukh dukh
Maya badal deti hai apni marzi se sabka rukh.

Maya hai Maheshwar kee shakti
Hum Guruji mein basey Shiv kee karein bhakti
Guruji kee leela hai aparampaar
Ve tum mein basee atma ka karna chaahte Hain uddhaar.

Jabb is shareer kee zindagi beet jaayegi saari
Toh atma safar rakhegi jaari
Aayegi kisee aur pehnaave mein basar karne kee baari
Hoti rahegi iskee aagey jaane kee tayyaari.

Jo tum madad karoge atma kee
Toh duuri kumm hogi atma aur Paramatama kee
Kyunki jabb takk veh na pahunchegi Paramatama ke paas
Tabb takk dono ke milan kee rahegi atma ko aas.

Guruji madad kar rahe Hain tumhaari
Lekin swatantra ichcha toh tumhaare haath mein hai
Guruji ka ashirwaad har pal tumhaare saath mein hai
Ve jaante Hain kitna sach ya jhooth tumhaari har soch aur baat mein hai.

Na karo apni chetna kee awaaz ko nazaraandaz
Tumhaare chitt kee grahansheelta hoti chale antargyani, aisa karo tum prayaas
Guruji tumhaare prayaas ko chaar chand lagaayenge
Ve atma ke safar ko aagey badhaayenge.

Guruji ka simran aur dhyan bahut asardaar hai
Yaad rahe, tumhe ye karna baar baar hai
Har vehem ko chod do taaki badhe atmabal
Apne shareer kee nashwarta yaad rakho har pal.

Ichchaaon ko tyaag kar ho jaaoge tum nirbhay
Kyunki ichchaaon se zyada honei lagta hai bhay
Moh na rakho shareer se, na kisee aur se
Varna na bach paaoge yooniyon kee baarambaar daud se.

Farz nibhaate chalo
Bhakti badhaate chalo
Ye hai adhyaatma ka safar
Yahaan har kadam par rakhna nazar.

Yahaan tumhaare vichaar aur karmon ka hoga prabhav
Is safar par na aane dena apni nishtha mein abhaav
Guruji ka shukrana karte rehna har samay
Mann mein na aane dena nakaratmak soch ya sanshay.

Shareer mein rehte huey shareer ka rakhna poora khayaal
Shareer atma ka aavaran hai, aur Guruji ka ashish hai atma aur shareer kee dhaal
Uss atma ka shukrana jisne shareer ko diye praan
Jabb atma chodegi shareer ko toh chali jaayegi jaan.

Gumm na karna kabhi bhi is baat ka
Ki antt hoga jagg ke saath ka
Kyunki atma ashapoorvak hokar badhegi aagey apne safar par
Badhte badhte veh Paramatama mein samaayegi ek shubh avsar par.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shubh Avsar (01/08/2023)

January 7, 2023

Om Namaha Shivaya
Aaj Ka Suvichaar 🙏🏻🙏🏻 # 1784

Punah Milegi Tumhe Avyakt Avastha

Nikaal lo thoda waqt
Avyakt ko jaan-ne ke liye
Avyakt mein hai satya
Swayam ko pehchaan-ne ke liye.

Ek baar mein hoga ye nahin
Na hoga ye ek pal mein
Lekin nishtha se prayaas karte chalo
Toh ho jaayega aane wale kal mein.

Avyakt samay se parey hai
Avyakt hee hai sanatan
Avyakt nahin hota puratan
Avyakt vartmaan ke pehle thaa
Aur avyakt hoga bhavishya mein
Tum na rehna is baat ko lekar kisee sanshay ya bhayy mein.

Hum sab apne janam se pehle
Aur hum sab apni mrityu ke pashchaat
Avyakt avastha mein hongei vileen
Phir kyun karna apne anand ko ksheen?

Tum Maha Dev ke is niyam ko nahin sakte roak
Isliye bilkul bhi na manaao shok
Balki avyakt takk pahunchne kee karte raho tayyaari
Tumhaari apni atma ke prati hai zimmedaari.

Guruji uthaana chaahte Hain tumhe shok, sanshay, aur bhayy se oopar
Na jaane dena apne haathon se ye anmol avsar
Guruji ke ashirwaad se badhaate chalo simran
Simran badhega, dhyan hoga gehra, leen hoga mann
Vishayon aur ichchaaon mein lagan chhoot jaayegi
Aasakti kee doar dheere dheere toot jaayegi.

Shok, sanshay, aur bhayy se tum ho jaaoge azad
Aur jabb bhi praan tann se niklenge iske baad
Toh MahaShiv Guruji karenge aisee vyavastha
Ki punah milegi tumhe avyakt avastha.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Punah Milegi Tumhe Avyakt Avastha (01/07/2023)

January 6, 2023

Om Namaha Shivaya
Aaj Ka Suvichaar 🙏🏻🙏🏻 # 1783

           Kuch Bhi Itefaaq Nahin

Kuch bhi itefaaq nahin hota jeevan mein
Jo lekhe mein hai veh hota hai har kshan mein
Baaki jabb jo vichaar aate hain mann mein
Aur jo karma karte hain hum duniya ke vann mein
Ve likhe jaate hain karmon kee kitaab mein
Aur Guruji karte nahin kabhi galati hisaab mein
Balki Ve komal Hain aur maafi bakhshte Hain jawaab mein
Tabhi toh sajey Hain Ve Bholenath ke khitaab mein.

Guruji kee saari sangat ne suna hai
Aur kitnon ne anubhav se bhi jaana hai
Ki Unkee marzi ho toh Ve lekha likhte Hain dobara
Har paristhiti mein bante Hain Ve sangat ka sahaara.

Pratyek bhakt ke liye jabb waqt hota hai sahi
Tabb hee Guruji usey bulaate Hain Apni sharan mein
Guruji hee nirdhaarit karte Hain veh samay
Is baat mein nahin hai koi sanshay.

Har bhakt ke karmon ke har kisse par Guruji kee nazar hai
Har bhakt kee zindagaani ke har pehlu par Guruji kee nadar hai
Bilkul bhi itefaaq nahin, ho raha hai jo
Apne bheetar par dhyan do, baahari bahaav mein na kho.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kuch Bhi Itefaaq Nahin (01/06/2023)

January 5, 2023

Om Namaha Shivaya
Aaj Ka Suvichaar 🙏🏻🙏🏻 # 1782

 Guruji Ke Charnon Mein Baithe Ho

Guruji ke charnon mein baithe ho
Tum Guruji se pyaar karo
Unka tum deedar karo
Unka kaha sweekar karo.

Guruji ke charnon mein baithe ho
Veh tumhaare liye sabse ooncha sthaan hai
Vaheen har sukh kee khan hai
In charnon mein jhukta aasmaan hai.

Guruji ke charnon mein baithe ho
Ye sewa ka sunehra avsar hai
Ye Shivji ke avatar ka dar hai
Yahaan kaayinaat ka jhukta sir hai.

Guruji ke charnon mein baithe ho
Kshama maang lo gunaahon kee
Jyot jalaao mann kee raahon kee
Paao raksha Guru kee baahon kee.

Guruji ke charnon mein baithe ho
Simran mein tum vyast raho
Guruji ke stavan mein mastt raho
Na ki duniyadari se grast raho.

Guruji ke charnon mein baithe ho
Unkee mahima ka karo gungaan
Unke satsang sunn-ne aur sunaane par do dhyan
Yahaan poore hongei ruhaani armaan.

Guruji ke charnon mein baithe ho
Guruji ka satkar karo
Vehem andhvishwaas se na daro
Ashish ke amrit se jholi bharo

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Charnon Mein Baithe Ho (01/05/2023)

January 4, 2023

Om Namaha Shivaya
Aaj Ka Suvichaar 🙏🏻🙏🏻 # 1781

         Pyaar Ke Shubh Saurabh Se

Guruji kitne pyaare Hain
Hum sab Unkee aankhon ke taare hain
Pyaar se rahein ek dooje ke sangg, kahein Guru Sarkar
Lekin aasakti ko na banaane dein pyaar ko laachaar.

Pyaar pavitrata aur swatantrata hai
Usmein moh na do aane
Moh deta hai janam ahankar ko
Banaa kar sainkdon vyarth bahaane.

Pyaar mein moh ghul jaata hai aksar
Phir jo pyaara hai, ho jaata hai usey khone ka darr
Pyaar karne wale ko bhram hota hai ki uss shakhs par hai uska adhikaar
Aur khone ke bhayy ke saath jaagrit hota hai ahankar.

Ahankar, ki jis se hai mujhe pyaar
Uss par hai mera aisa haq
Ki veh kewal mera rahe
Ye soch duniya par honei lagta hai shak.

Isliye pyaar ko na do moh ka naam
Dono mein hai bahut antar
Pyaar hai nirvikaar
Moh hai ek vikaar.

Pyaar sachchaayee hai
Ismein jhooth aur irshya ka nahin koi kaam
Isliye ispar inke daag lagaakar
Na karo pyaar kee neki ko badnaam.

Pyaar ka rass shuddh saar ka prateek hai
Jhooth kee ashuddhi se isey na karo pradooshit
Pyaar ke paawan aadhaar ko jaano
Isee mein hai hit.

Hit, mera aur tumhaara
Hit, poore sansaar ka
Kyunki sabhi jo karein pyaar ka sammaan
Toh pyaar ke shubh saurabh se mehekega ye jahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Pyaar Ke Shubh Saurabh Se (01/04/2023)

January 3, 2023

Om Namaha Shivaya
Aaj Ka Suvichaar 🙏🏻🙏🏻 # 1780

    Sada Rahein Hum Aapke Sewak

Pyaare Guruji,

Sada rahein hum Aapke sewak
Dhanya hain hum ki Aap Hain hamaare prerak
Jeevan ke raaste toh aksar hotey hain ajeeb
Khushkismati hai hamaari ki Aapke haathon mein hai hamaara naseeb.

Guzarte hain jabb hum raaste ke kisee moad se
Hamein gyat nahin hota ki vahaan bahaar hai ya tufaan
Lekin Aapki drishti aur mahima ke sahaare
Hum himmat juta paate hain jaane kee vahaan.

Aapki mehar se ho raha hota hai jabb hum se simran
Tabb bhi Aap hee prakashit karte Hain antakaran
Zarra zarra hamaara hai Aapka shukrguzaar
Aapne barsaaya hai sada itna aseem pyaar.

Sukh ho toh Aapko bhool na jaayein
Karna aisee kripa, aye paalanhaar
Dukh ho toh shikayat karne par na utar aayein
Dena aisee shuddh matt, aye taaranhaar.

Galati ho jaaye humse jabb jabb
Aapko jo uchit lagey, vahee karna tabb tabb
Kshama karenge toh hogi Aapki badi meharbaani
Pashchaataap aur praayashchitt ka maarg dikhaayenge, toh uddhaarit ho jaayegi zindagaani.

Aapke noor se ujjwal rahe hamaara jeevan
Aapki divya jyot se roshan rahe hamaara antakaran
Aapki anukampa se khila rahe mann mein ho raha simran
Aapke ashirwaad kee daulat se badhta rahe hamaara dhan.

Ye bhi Aapki mamta aur daya ke kaaran hai
Ki haath jod kar sees jhuka kar khade hain hum Aapke darbar mein
Varna kya maalum kin haalaat mein aur kahaan hum hotey
Is kalyugi maya se bhare sansaar mein.

Buss, sada deejiyega Apni daya ka daan
Kar paayein Aapke amrit roopi prem ka paan
Sada rakhein hum Aapki mamta ka maan
Har pal karein hum Aapka aur Aap mein basey Maha Shiv ka sammaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sada Rahein Hum Aapke Sewak (01/03/2023)

January 2, 2023

Om Namaha Shivaya
Aaj Ka Suvichaar 🙏🏻🙏🏻 # 1779

                        Behta Chal

Behta chal Guru chintan kee dhaara mein
Aakar baith Satsang roopi paathshaala mein
Beshak anek khayaal aayein mann mein
Koshish kar kendrit rehne kee Guruji ke simran mein.

Guruji bade kripalu Hain
Guruji bahut dayalu Hain
Samajhte Hain teri chinta saari
Jaante Hain tujhe nahin aati duniyaadaari.

Tu apni oar se kar Unke chintan mein rehne kee tayyaari
Ve halka karenge tera bojh chaahe vo ho kitna bhi bhaari
Guruji kee maujoodagi ko sweekaarta hai tera antakaran
Tu Unhe vaheen paayega bheetar jhaankega tu jis bhi kshan.

Tere bheetar Guruji ke naam kee divya jyot rahi hai jal
Ye shaayad tere pichhle satkarmon ka hai phal
Is jyot se ujjwal rahegi tere japp tapp kee oorja
Besharte teri pooja mein hoga pyaar aur pyaar mein hogi pooja.

Guruji aur apne beech ke pyaar par rakh aitbaar
Unka chintan tujhe le jaayega bhav saagar ke paar
Komal aur nirmal hai, aur aseem hai Guruji ka pyaar
Unke pyaar ke rangg ke saamne pheeka hai
baaki har rangg ka khumaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Behta Chal (01/02/2023)