Month: February 2023

February 28, 2023

Om Namaha Shivaya
Aaj Ka Suvichaar 🙏🏻🙏🏻 # 1836

    Na Jaanoon Vidhi Vandan Kee

Na jaanoon vidhi vandan kee
Na hai pooja kee saamagri
Na aaspaas koi mandir ya koi pandit
Toh bhi chinta nahin.

Vidhi vinamrataa kee
Saamagri samarpan kee
Inke sangg Guruji kee kripa se kar sakoon Unka simran
Guruji se ardaas karoon ki Ve sweekaarein vandan.

Soojhe na ki Unse kya kahoon
Buss, Unhe dekhti rahoon
Kabhi swapn mein, kabhi swaroop mein
Kabhi ek, kabhi kisee dooje roop mein.

Guruji ko shraddha roopi kaliyan aur suman karoon arpan
Unhe paane kee aas mein bahein jo aansoon, unn se karoon Unka tarpan
Unka chintan karte karte hee dekhoon darpan
Unkee chaah mein vyateet karti rahoon jeevan.

Ye saubhagya nahin toh aur kya hai
Balki, ye saubhagya hai param aur anupam
Ki Guruji kee soch aur Unke manan mein beet jaaye har kshan
Aur Unhee ke khayaalon mein magn rahe yeh mann.

Guruji Hain mere Guru, Prabhu, meet, aur nath
Unse vintee hai joad kar dono haath
Ki Ve sada baney rahein mere humraaz
Aur sada sunte rahein meri ankahi awaaz.

Kyunki Unhee ka saath hai sachcha
Unka saath hai sabse achchaa
Ve nath, mai Unka bachcha
Har pal badhti hai Unhe paane kee ichcha.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Na Jaanoon Vidhi Vandan Kee (02/28/2023)

February 27, 2023

Om Namaha Shivaya
Aaj Ka Suvichaar 🙏🏻🙏🏻 # 1835

           Koshish Jaari Hai….. 

Koshish jaari hai…
Paristhitiyon se pareshaan na ho jaane kee
Fikr ke kaaran neend ko na ganvaane kee
Na sochte rehne kee ki kisne kiya kya aur kyun
Na uljhe rehne kee ki kisey kya kahoon ya na kahoon.

Koshish jaari hai…..
Ki ummeed choot-ti jaaye aur aasakti toot-ti jaaye
Logon se, cheezon se, sansaar se
Aur antarmann kee har taar seedhi judti jaaye
Guruji mein samaaye Maha Shiv roopi avatar se.

Koshish jaari hai…
Ki jaisa bhi mehsoos karey mann
Chalta rahe Guruji kee mehar se Unka simran
Ki mann apne vash mein rahe har kshan
Aur Guru kripa se miley dhyan ka dhan.

Koshish jaari hai…
Ki na rahoon anjaan aur naadaan
Ki Guruji mujhse khush hokar dein aisa gyan
Ki agyan ka timir ho khatm
Aur bhar jaayein mere anabhigyata ke zakhm.

Koshish jaari hai….
Ki bhaav poorna hoti jaaye bhakti
Ki sadhna aisee kar paaoon ki miley shakti
Guruji ke ashirwaad se is bhav saagar ko paar karne kee
Apne roam roam mein Unke naam ke amrit ko bharne kee.

Koshish jaari hai…
Ki doojon kee madad kar sakoon
Ki Guruji kee mahima karte kabhi na thakoon
Ki insaaniyat ke imtehaan mein ho jaaoon safal
Ki apne yogdaan se sanvaar paaoon kisee ka aaj aur kal.

Koshish jaari hai…..
Sakaratmak parivartan laane kee
Vyarth ke bandhanon se azaadi paane kee
Fizool baaton ko bhool jaane kee
Zindagi ko sundar afsaana banaane kee.

Koshish jaari hai….
Gustaakhiyon ko pashchaataap se dhonei kee
Achche karmon ke beej bonei kee
Guruji kee bandagi mein khonei kee
Guruji kee goad mein sonei kee.

Har koshish ko milta rahe jo Guruji ka ashish
Har galati ko miltee rahe Guruji kee bakhshish
Guruji kee sharan mein rehte huey har shaam ka sooraj jaaye dhal
Guruji ko dhanyawaad karti rahoon har pal
Unkee raza mein raazi rahoon aaj aur kal
Toh imtehaan mein yakeenan ho jaaoongi safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Koshish Jaari Hai….. (02/27/2023)

February 26, 2023

Om Namaha Shivaya
Aaj Ka Suvichaar 🙏🏻🙏🏻 # 1834

                   Jaag Re Bande

Jaag re bande
Toad de phande
Kaam krodh moh lobh ahankar ke
Aur har burey vichaar ke
Varna inke paash mein bandha rahega
Inkee vajeh se atma-shoshan sahega
Agar aaspaas ekant bhi hoga
Toh bhi tu ashant hee hoga
Kyunki ye karenge tere mann par aakraman
Vyakul rehne lagega tu har kshan.

Ye toh Guruji kee vadiyaayee hai
Jo Unhonei liya hai tujhe Apni sharan mein
Tu beshak gunnsampann bhi na ho
Toh bhi Unhonei jageh dee hai tujhe Apne charan mein.

Guruji jagaa rahe Hain tujhe
Taaki tere atmabodh ka deep na bujhe
Tujhe beshak yeh na soojhe
Lekin Unkee kripa se tera har kaaj suljhe.

Maya ka saaya har oar hai chhaaya
Kabhi nasht nahin ho sakti maya
Jisne bhi gyan hai paaya, veh Guru kripa se hee hai paaya
Guruji ke ashish se sanvar jaayegi tere bheetar aur baahar kee kaaya.

Tere chehre aur mann ke noor par
Hua hai jo paash ke bandhan ka asar
Teri chhavi, teri raunak kumm lagti hai iske kaaran
Aur Guruji ka simran karega is samasya ka bhi nivaaran.

Guruji karaate Hain simran Gurbani ka
Veh ilaaj hai roag, niraasha aur naadaani ka
Aushadhi hai ye itnee kalyaankaari
Ki duur kar sakti hai kayi prakaar kee beemari.

Usey bhoola nahin kehte
Jo subah ka bhoola ghar laut aaye shaam ko
Isliye ghar parivaar aur kartavya nibha
Aur praathamikta de Guruji ke naam ko.

Guruji kee mehar se badhta chalega simran
Badhti chalegi Guruji mein teri lagan
Guruji karenge tujhe pradaan
Dhyan aur param gyan
Phir se suspasht hoga tera khoya hua ruhaani noor
Tu paash ke khatre se hota rahega duur.

Safar hai ye Guruji kee chhatra chhaaya mein
Toh awashya sakaaratmak parivartan hoga tere jeevan kee kaaya mein
Guruji ne thaama hai tera haath
Ye nahin hai koi chhoti baat
Kyunki ye rishta aata hai sarvottam ashirwaad ke saath
Aur hitkaari hoti hai Guruji kee dee hui har daat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jaag Re Bande (02/26/2023)

February 25, 2023

Om Namaha Shivaya
Aaj Ka Suvichaar 🙏🏻🙏🏻 # 1833

Guruji Kee Sharan Mein….

Guruji kee sharan mein shubh hai har din
Koi din shuru hee nahin ho sakta Guruji ke ashish ke bin
Dopehar shaam raat bhi hoti hai Unkee mehar se
Phir Unkee kripa se hee daat miltee hai aglee seher kee.

Guruji kee sangat poori tareh se Guruji par aashrit hai
Guruji ka diya har daan amrit hai
Hukm hai Guruji ka har vachan
Sangat ka farz hai Guruji ka vandan
Sukhdayee hai Guruji ka stavan
Kalyaankaari hai Guruji ka simran.

Apni khushnaseebi ka andaaza lagaana
Hum mein aisa saamarthya nahin
Kyunki ashirwaad hain anant anginat
Jinse kritaarth hai saari sangat.

Isliye saump dee hai jinhe jeevan kee naiya
Har pal karte huey Unn param poojya Guruji ka shukriya
Jee lein ye zindagi
Karte huey Unkee bandagi
Miltee rahe Guruji se bakhshindagi
Toh safal hogi aagey kee bhi zindagi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Sharan Mein…. (02/25/2023)

February 24, 2023

Om Namaha Shivaya
Aaj Ka Suvichaar 🙏🏻🙏🏻 # 1832

         Khul Kar Jee Lo Zindagi

Khul kar jee lo zindagi
Na jaane kabb bulaava aa jaayega
Bache kaam kaaj yaheen reh jaayenge
Jabb jaane ka pal aayega.

Raho khushi ke saath
Zinda rakho utsaah ka jazbaat
Maanav jeevan nahin hai koi chhoti baat
Kyunki karmon ke bhugtaan ka avsar hai praapt.

Vaise bhi, khushi hai sthiti mann kee
Isliye Guruji se maangte raho simran kee bakhshish
Simran se hota rahega antakaran ka pavitrikaran
Dheere dheere sthir hokar sanyam mein rehne lagega mann
Anivaarya hai mann kee swasth sthiti
Chaahe anukool ho ya pratikool ho paristhiti.

Santosh ko banaa lo meet
Lekin apne kartavya se nibhaao preet
Apna jeevan sambhal jaaye, vahee hai kaafi
Idhar udhar kee dakhalandazi mein padne se maang lo maafi.

Hamein Guruji kee sharan milee hai
Maano ya na maano, kismat khilee hai
Agar lagta hai ki bura hai haal
Toh jaan lo ki ho sakta thaa bura is bhi zyaada
Aur kitnon ko hain hum se zyaada gumm
Isliye jitna shukrana kiya jaaye Guruji ka, vo hai kumm.

Vaise bhi, ye rangg manch hai aur hum abhineta
Maya ke chakravyuh mein har koi saans hai leta
Sabhi kirdaar hain, mata pita bhai behen beti aur beta
Jeevan ke chalchitra ke khatm honei par bin praan ke shareer hota hai leta.

Guruji kee dhun mein mastt raho
Farz adaa karne mein vyast raho
Koshish karte raho ki apne aur doojon ke jeevan mein de sako yogdaan
Guruji ashirwaad barsaate rahenge, Ve Hain
sabhi bhakton par meharbaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Khul Kar Jee Lo Zindagi (02/24/2023)

February 23, 2023

Om Namaha Shivaya
Aaj Ka Suvichaar 🙏🏻🙏🏻 # 1831

       Unke Charnon Mein Samarpit

Na mausam sthir thaa, na mann
Shanti nahin thi ek bhi kshan
Apne bhi dhaa rahe thei itne sitam
Ki dard ke aansoo baha rahe thei zakhm
Kaam na kar raha thaa koi marham
Samajh na aa raha thaa kahaan le jaa raha hai jeevan.

Lekin thaa ek ajab sa ehsaas
Jaise koi aisa hai bahut paas
Jisey mere dard se dard hai ho raha
Jisne mujhe dheeraj rakhne ko hai kaha.

Ek oorja kahoon ya spandan
Jiskee anubhooti jaise jaise mujhe gayi chhooti
Mai sambhalti gayi
Meri soch badalti gayi.

Pareshaani dhalti gayi
Ummeed kee jyot jalti gayi
Guruji ke aanchal mein
Meri taqdeer phalti gayi.

Kuch kehne kee zaroorat na padi
Buss, mai rahi vahaan haath jod kar khadi
Koi aur tasalli nahin ho sakti Guruji kee anukampa se badi
Unke sangg doar baandh kar chitt kee patang udi.

Neele aasmaan mein
Madhoshi ke jahaan mein
Mastt hokar Guruji ke khayaalon mein
Mainey ulajhna chod diya sawaalon mein.

Badalte rahe baahari mausam
Lekin sthir aur shant honei lagaa mann
Paraayon kee mehfil hai ye jeevan
Ye samajh aaya toh nazaraandaaz kar diye unke dhaaye sitam.

Pataa hee nahin chala kab zakhm gaye bhar
Har roopi Guruvar ne liye mere dukh har
Unka dhanyawaad karti rahoon, mainey maanga Unse ye var
Ummeed hee nahin, balki vishwaas ho gaya ki jaaoongi Unkee kripa se tarr.

Sada bakhshte rahein Guruji galatiyon ke liye mujh naadaan ko
Guruji mein paa liya hai murshid, meet, naath, aur Bhagwaan ko
Jaan kar, pehchaan kar ek saraaye is jahaan ko
Unke charnon mein samarpit kar doon apne praan ko.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unke Charnon Mein Samarpit (02/23/2023)

February 22, 2023

Om Namaha Shivaya
Aaj Ka Suvichaar 🙏🏻🙏🏻 # 1830

                  Guruji Kee Leela

Beshak maya ho tamopradhaan
Shiv avatari Guruji Hain karunanidhaan
Dete Hain Ve naam ka daan
Vidya aur gyan dene mein Hain meharbaan.

Guruji kee leela adbhut hai
Anokha hai Unka dhangg
Maya Unkee shakti hai aisee
Jiske adbhut hain rangg.

Taarta hai Guruji ka divya pyaar
Kalyaan karte Hain Ve baarambaar
Angg sangg hotey Hain sangat ke
Chaahe aayein ya na aayein nazar
Beshak lagey ki haalaat sudhar nahin rahe
Lekin, Guruji ke prataap ka tabb bhi ho raha hota hai asar.

Adrishya hai Guruji ka kalam
Jis se Ve lekh likhte Hain dobaara
Unke hastakshep ke prabhaav se
Chamak jaata hai kismat ka taara.

Guruji lete Hain bhakton ke karmon ka adhiktar bojh swayam par
Apne praarabdh karmon ke phal ka kuch ansh bhugatna padta hai magar
Isliye poori nahin hoti unn karmon ke phal se bachne kee kaamna
Hamaari atma ka uddhaar ho, isliye Guruji karaate Hain unka saamna.

Kitnee baar humne ye sab hai suna aur kaha
Aur kitnee baar mann mein phir bhi sawaal hai raha
Ki kyun aisa jeevan mein hai hota
Ki koi jaag kar hai vyakul aur koi chayyn kee neend hai sota?

Guruji kee sharan mein kar rahe hain bhakt jis ruhaani safar ko tayy
Usmein Guruji kee kripa se mitne lagta hai aisa sanshay
Guruji kee mehar aur bhakt ke nek bhaav se sthiti aati hai sweekriti aur samarpan kee
Aur jeevan chalta rehta hai chaahe jaisi bhi paristhiti ho jeevan kee.

Der se, saver se, safal honei lagta hai safar
Katt jaati hai karmon kee fasal
Har mushkil jaati hai tal
Ho jaata hai uddhaar asal.

Phir na rehta hai ye tann aur na hee iska saaya
Chalti rehti hai magar Shiv Shakti kee maya
Par brahm kee sunehri dhoop mein samaa jaati hai atma ke sangharsh kee chhaaya
Guruji MahaShiv Hain, Unhonei Apne har bhakt ko hai manzil takk pahunchaaya.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Leela (02/22/2023)

February 21, 2023

Om Namaha Shivaya
Aaj Ka Suvichaar 🙏🏻🙏🏻 # 1829

        Dete Rahiyega Ye Saubhagya

Param poojya Guruji,

Roopvaan Aap Hain
Aap niswaarth Hain
Jis bhi roop mein hon
Aap bheetar aur aaspaas Hain.

Aapki kripa se miley bhakti
Aapki bhakti kar ke praapt hota hai Aapka kripa prasad
Aap, Aap, buss Aap hon antas mein
Toh antas ho sampoornata se aabaad.

Aapse hee miley gyan aur shiksha
Aapse hee miley deeksha
Aapki prerna se bheetar kee poornata ho ujaagar
Aapke ashish ke saagar se bharti rahe jholi aur gaagar.

Aap Guru ke roop mein Hain Bhagwaan
Mai anjaan naadaan insaan
Anginat hain Aapke ehsaan
Dete rahiyega Apni kripa ka daan.

Aapki sharan mein hoon, phir kyun mai daroon
Na jaane kitne janam lekar maroon
Aapki kripa se har janam mein taroon
Sada Aapki agya ka paalan karoon.

Shukrana Aapka ki Aapne mujhe Apne charnon mein diya hai sthaan
Na dekha kabhi pehle aur vishwaas hai ki na bhavishya mein dikhega koi Aap sa meharbaan
Jaan gayi, maan gayi ki Aapse hee hai mera aur mere ghar parivaar ka kalyaan
Dete rahiyega ye saubhagya ki karti rahoon Aapki mahima ka gungaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dete Rahiyega Ye Saubhagya (02/21/2023)

February 20, 2023

Om Namaha Shivaya
Aaj Ka Suvichaar 🙏🏻🙏🏻 # 1828

               Mann Ka Shivaalay

Ye jeevan hai anubhav ka vidyaalay
Karmon ka kaaryaalay, bhaagya ka pustakaalay
Kyun na isey jeeyein
Sajaa kar apne mann ka Shivaalay?

Simran aur dhyan ke dwaara
Judein Guruji se bheetar kee gehraayee mein
Jo bhi ho jaaye, vishwaas rakhein
Guruji kee guruyaayee kee vadiyaayee mein.

Haalaat beshak dete rahein jhatke
Mann idhar udhar na bhatke
Kendrit rahe Guruji par mann har kshan
Toh buss, mann Shivaalay jaaye bann.

Guruji kee chhavi mann mein ho basee
Toh mushkilon ke dauran bhi aa jaayegi hansee
Lekin, agar aasakti duniyadari mein rahi phansee
Toh samjho ki gati vishay vikaar ke daldal mein hai phansee.

Mann ke Shivaalay mein goonje Guruji ke naam kee dhvani mangal
Guruji kee sharan mein arpit hon shraddha ke phool aur phal
Divyata kee pyaari jyot jalti rahe akhand
Guruji ko arpit hon neevenpann se naivedya mann pasand
Ho vahaan vandaneeya Guruji kee mehek ruhaani
Nirmal anand pradaan karein Guru prasad aur Gurbani.

Mann ke Shivaalay mein Guruji ka jo hota rahe deedar
Toh phir ek taraf Unka pyaar aur doosri taraf saara ka saara sansaar
Jahaan Guruji, vahaan lamhe nijee aatmeeya ekaant ke
Jahaan sansaar, vahaan anubhav bhinn bhinn drishtaant ke.

Har anubhav se seekhein, Guruji se hai ye guzaarish
Jaisa Guruji chaahein, vaisa bann jaane kee hai khwaahish
Kewal mann ke Shivaalay mein Guruji ke samaksh ho har numaaish
Vishay kee pyaas mit jaaye aur hamein taar de Guruji kee bhiksha kee baarish.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Ka Shivaalay (02/20/2023)

February 19, 2023

Om Namaha Shivaya
Aaj Ka Suvichaar 🙏🏻🙏🏻 # 1827

                  Moh Kee Nisha

Moh kee nisha mein so rahi thi
Shukr hai Guruji, ki Aapne jagaa diya
Apne hee niklenge paraaye
Aapne is asaliyat se milva diya.

Dil ko jaise sainkdon kaanton ne ek saath chhua
Apni oar se sachchaayee nibhaayee thi, isliye bahut dukh bhi hua
Lekin Aapne samjhaaya ki ye sab hai karmon ka khel aur maya
Aur ismein phanse rehne se toh mera dushman bann jaayega mera apna hee saya.

Aapne dee aisee prerna
Ki mann hee mann kshamaa kiya mainey unhe
Jinhonei mujhe dukh diya
Aapne dee aisee chetna
Ki kshamaa maang lee har uss shakhs se Jisey shaayad kabhi mainey ho dukh diya
Aapne samjhaaya telepathy aur spandan ka mahatva
Aur yaad dilaaya ki har haalaat mein nibhaana hai apna kartavya.

Karma yog, gyan yog, bhakti yog ko dinacharya aur saamaanya jeevan mein
Sammilit karna sikhaaya Aapne
Simran, sewa, satsang aur dhyan ke dwaara
Swayam ko ekaagrachitt karna sikhaaya Aapne.

Bhakti ke paawan path par aane wali har baadhaa ko
Isee tareh se hataate rahiyega, aye taaranhaar
Jo bhi agyan vash bhool ho jaaye mujh nacheez se
Uske liye maaf karte rahiyega, aye bakhshanhaar.

Aapki prati har pal badhta rahe mera pyaar
Shraddha bhaav gehra hota chale toad kar sanshay kee har deewar
Mera har vichaar har karma ho Aapke charnon mein arpan
Aapko samarpan karne ke prayaas mein leen rahe mera antakaran.

Baahar raat ho ya ho din
Saans na chale Aapke simran ke bin
Aapki divyata kee jyot jalti rahe mann mein
Aapki mehar se badhauti ho ruhaani dhan mein.

Moh kee nisha se duur dikhaate rahiye veh disha
Jahaan anaasakti ke sooraj ke tapp se aur nikhar jaaye bhaav bhakti ka
Shukrana ke ehsaas se dil rahe aabaad
Aur bhakti se badh jaaye saamarthya sehenshakti ka.

Aapko shukrana kehte kehte kabhi na thakoon
Aapka shukrana karte huey kabhi na rukoon
Aapki bhakti mein doob kar tarti jaaoon
Sada Aapki mahima ka gungaan karti jaaoon.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Moh Kee Nisha (02/19/2023)