Month: May 2023

May 21, 2023

Om Namaha Shivaya
Aaj Ka Suvichaar 🙏🏻🙏🏻

#1918

          Sabse Bhagyashali Baat

Jis kshan Guruji ne apna liya
Kismat ka dwaar toh usee din khul gaya
Unkee mehar se raah par chalte chalte
Koi na koi paap dhul gaya.

Chalein uspar jo Guruji dikhaate rahein raah
Toh yakeenan banenge kismat ke shehenshah
Pooran Guru kee milee hai jo sharan
Toh khaas tareh se anugrahit hua hai jeevan.

Guruji ne hum sabka lekha hai dekha
Ve chaahein toh badal bhi sakte Hain kismat kee rekha
Lagg sakta hai ismein samay
Ismein nahin hai koi sanshay.

Ya phir ek pal mein ho jaaye
Agar Guruji kee marzi ho jaaye
Aur jo Guruji ko lagey ki lekha bin badle hee hamein hai bhugatna
Toh tabb bhi Unkee maujoodagi aur raza se hogi har ghatna.

Vishwaas ho Guruji par poora
Sweekriti sangg samarpan na rahe adhoora
Aur Guruji se ho beintaha pyaar
Toh sawaal nahin uthenge baar baar.

Tasalli hai ki jo bhi ho raha hai jeevan mein
Usee mein hai hamaara hitt
Guruji ke divya hastakshep se
Pichhle kukarmon ke daag rahe hain mitt.

Jaise jaise mitenge ye daag aur dhulenge paap
Vaise vaise hamein taarte jaayenge Guruji Apne Aap
Ve swayam Hain Brahmand ke Badshah
Unkee har santaan banegi shehenshah
Bhautikvaadi sukh milna toh bahut chhoti si hai baat
Guruji dwaara apnaaya jaana swayam mein hai sabse bhagyashali baat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sabse Bhagyashali Baat (05/21/2023)

May 20, 2023

Om Namaha Shivaya
Aaj Ka Suvichaar 🙏🏻🙏🏻

#1917

Antarmukhi Bann-ne Kee Yatra

Jitne hotey jaaoge tum antarmukhi
Utna hee tum hotey jaaoge sukhi
Baahar kee fikr chhoot-ti jaayegi
Vishayon mein aasakti bhi toot-ti jaayegi
Vyarth kee baatein tumhe chintit na kar paayengi
Divyata mein ramne se ve tumhe vanchit na kar paayengi.

Guruji kee vaddi hai vadiyaayee
Tum dhoondh paaoge apne antas kee gehraayee
Jahaan mehar barsaayegi Guruji kee guruyaayee
Aur vahaan santosh kee sheetalta rahegi chhaayee.

Atma na rahegi prakriti ke adheen
Maya ka prabhaav na kar paayega usey ksheen
Avidya ka honei lagega antt
Milega sukoon anant.

Ho jaaoge tum ekant priya
Ho jaaoge shanti priya
Jaanoge ki chahiye kisee se tumhe nahin kuch
Kyunki tumhaare bheetar hee mil jaayega tumhe sab kuch.

Subuddhi ke deep prajvalit rahenge bheetar tumhaare
Lau ka ujaala badhega pal pal
Baahar kee maya par vijay paakar jitna hotey jaaoge bheetar kee oar
Anant se, anand se yoon judoge ki param sukhdaayee hogi bheetar kee bhor.

Bahut uttam starr hoga adhyaaatmikta ka
Paramatama gavaah hoga is paripakvata ka
Atma yahaan se jaane ke waqt saath le jaayegi antarmukhi shubhta ka sanskaar
Jiske parinaam vash sugam ho jaayega atma ka uddhaar.

Der na karo
Jagg se na daro
Guruji par vishwaas dharo
Antarmukhi bann-ne kee yatra aarambh karo.

Guruji Hain maargdarshak aur madadgaar
Tumhaare sangg hai Unka ashish aur pyaar
Beshak tumhe prayaas karna padey baar baar
Guruji awashya denge tumhe antarmukhi bann-ne ka uphaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Antarmukhi Bann-ne Kee Yatra (05/20/2023)

May 19, 2023

Om Namaha Shivaya
Aaj Ka Suvichaar 🙏🏻🙏🏻 # 1916

                 Shukrana Se….

Shukrana se har din kee karein shuruaat
Aur shukrana karein har raat
Apne Guruji, apne maargdarshak ka
Apne param poojya pyaare path pradarshak ka.

Shukrana ki Unhonei dee hai chhat sir par
Shukrana ki miley hain Unkee kripa se vastr
Bhookhe pait nahin padta sona
Jeevan mein anekon anek sukh suvidhaaon ka hona.

Guruji kee mehar se hee praapt hota hai simran ka har lamha
Unhee kee nadar hai ki pasand aata hai rehna tanha
Kyunki Unkee kripa se tabb bhi ho paata hai Unka chintan
Shukrana Unka ki naseeb hotey hain aise anmol kshan.

Shukrana Guruji ka ki Ve bulaate Hain satsang mein
Shukrana Unka ki Ve rangg rahein Hain hamein Apne rangg mein
Unkee meharbaani se milta hai sewa ka mauka
Unhee ko shukrana jabb miltee hai wafa ya phir hota hai dhokha.

Apni sharan mein lekar karma katvaate Hain Guruji
Mushkilon ke bavajood hansna sikhaate Hain Guruji
Itne bhram, itne vehem mitaate Hain Guruji
Apni bhakti mein vishwaas aur atma-vishwaas jagaate Hain Guruji.

Bakhshte Hain utsah aur hunar
Dete Hain sudharne ke sainkdon avsar
Dete Hain kalyaan ka daan
Bakhshte Hain gyan aur atma-sammaan.

Atma-bodh aur saralta ke liye karte Hain protsaahit
Kalyaan karne hetu karte Hain anushaasit
Anaasakti ka paath padhaate Hain
Purusharth mein aagey badhaate Hain.

Unka diya laad aur pyaar
Unkee rehmatein kayi hazaar
Itne ashirwaad roopi uphaar
Jo dete Hain bhakton ka jeevan sanvaar
Apne charnon mein jageh dekar dete Hain gunaahon kee maafi
Har saans se bhi Unka shukrana karein toh veh nahin hai kaafi.

Guruji ka ashish aseem
Hamaara shukrana padd jaaye hamesha kumm
Unka shukrana karte huey hee jeeyein har ghadi
Unka shukrana karte huey hee todein hum dumm.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shukrana Se…. (05/19/2023)

May 18, 2023

Om Namaha Shivaya
Aaj Ka Suvichaar 🙏🏻🙏🏻 # 1915

         Aapki Bakhshish Se….

Param poojya Guruji Maharaj
Aap Hain murshid, Aap Hain sartaj
Aapse guzaarish kar rahi hoon aaj
Ki Aapki bakhshish se poora ho mera ye kaaj.

Jo sada japte rahein Aapka naam
Jo sada karein Aapki mahima ka gungaan
Bakhsh deejiye aise shwaas
Kuch bhi na samajh paaoon
Toh bhi Aapke hukm par chalti jaaoon
Bakhsh deejiye aisa vishwaas.

Aap dikhaayein jo raasta
Usee raaste se mai rakhoon vaasta
Bakhsh deejiye aisee ekaagrata
Baadhaaon se na ghabraaoon
Chunautiyon se na darr jaaoon
Bakhsh deejiye aisee nirbhayta.

Der bhi lagg rahi ho uddeshya poorti mein toh badhti jaaoon
Manzil kee oonchaayee ho zyada toh bhi chadhti jaaoon
Bakhsh deejiye aisee himmat
Intazaar karne ka ho mujh mein sabr
Har pal karoon Aapka shukr
Bakhsh deejiye aisee inaayat.

Aap jaisa chaahein mai vaisi bann jaaoon
Aapka diya hua har farz nibhaaoon
Bakhsh deejiye aisee prerna
Apni manovritti par rakh paaoon nigraani
Dhyan doon ki kahaan jaa rahi hai zindagaani
Bakhsh deejiye aisee chetna.

Agyan ke andhere mein dhoondh loon swayam ko
Vikaaron ke jaal se azad kar paaoon mann ko
Bakhsh deejiye aisee buddhi
Buraayee se rahoon duur
Achchaayee par chaloon zaroor
Bakhsh deejiye aisee shuddhi.

Jeevan kee kshan bhangurta ko sada rakhoon yaad
Aapke naam simran se har kshan rakh paaoon dil ko aabaad
Bakhsh deejiye aisee daat
Antas mein neevenpann ka ho bhandar
Doojon kee madad karne ke liye rahoon tayyaar
Bakhsh deejiye aisee saugat.

Jahaan Aapki meharbaaniyon ka stavan ho
Jahaan Aapki anugrahit Gurbani ka manan aur shravan ho
Bakhsh deejiye aise satsang
Jiske dwaara niswaarth sewa mein mera bhaav nikhar jaaye
Jismein leen hokar Aapki praapti ho paaye
Bakhsh deejiye aisa bhakti ka rangg.

Jahaan sheetalta aur chhaaon miltee rahe
Jahaan mere pyaar kee kali khiltee rahe
Bakhsh deejiye mujhe Apna veh aanchal
Jabb ruhaaniyat ka noor rahe
Jabb Aapke naam ka suroor rahe
Bakhsh deejiye aise anginat haseen pal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Bakhshish Se…. (05/18/2023)

May 17, 2023

Om Namaha Shivaya
Aaj Ka Suvichaar 🙏🏻🙏🏻 # 1914

Har Darr Se Bekhabar

Guruji ko hai fakr
Tere sabr par
Beshak tu na zikr kar
Unhe hai sab khabar.

Jaante Hain Ve teri haalat
Unka hukm toh maanti hai nirnay kee adaalat
Tu sabr kar
Aur shukr kar.

Ve Hain tere paas
Tu rakh vishwaas
Mitega tera traas
Tarega tera shwaas.

Samay kee tez hai raftaar
Yug parivartan dekh raha hai sansaar
Prakriti par hua hai maanav dwaara kaafi atyachaar
Badal rahe hain logon ke vichaar aur vyavhaar.

Chaashani mein jaate hain parose
Aajkal ke rishte naate
Toot jaate hain bharose
Kyunki wafa se loag hain kataraate.

Lekin Guruji ka sangg
Is rishte ka hai pakka rangg
Sada chaashani sa meetha beshak na laagey
Lekin Guruji kabhi nahin todte is rishte ke dhaagey.

Jitna badhega tera sabr
Utna zyada Ve karenge tujh par fakr
Unke charnon mein jhuka hai tera sir
Buss, ho jaa tu har darr se bekhabar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Har Darr Se Bekhabar (05/17/2023)

May 16, 2023

Om Namaha Shivaya
Aaj Ka Suvichaar 🙏🏻🙏🏻 # 1913

               Har Prayaas Ho Atal

Aap kee sharan milee hai jabb se, Guruji
Itne bhayy duur huey hain tabb se, Guruji
Jo prerna dhoondh rahi thi mai kabb se
Veh paayi mainey Aap mein basey Rabb se.

Mujhe Aap mein miley Hain Khuda
Na soch paaoon apne ko Aapse juda
Bakhshiye aisee ada
Ki Aapka naam japti rahoon sada.

Aap Hain kripa ke sindhu
Aap Hain nath aur bandhu
Aap Hain maalik meharbaan
Aap Hain Guru karunanidhaan.

Raksha keejiye sabke ghar parivaar kee
Raksha keejiye saare sansaar kee
Ye jo maada waqt hai aaya
Ismein kitnon ne kitna kuch hai ganvaaya.

Kewal kusoorvaaron ka nahin, apitu bekusooron ka bhi aahat hua hai jeevan
Is kalyuga ke bhanvar mein hui hai itnee peeda utpann
Aapke hukm se haalaat badal sakte hain isee kshan
Aapki mehar ka mohtaaj hai is jahaan ka har jann.

Aisee sumat deejiye ki sabhi saamanjasya kee oar badhein
Aisee chetna jagaayiye ki sabhi adhyaatmik seedhiyan chadhein
Aisee mohabbat ujaagar keejiye ki koi kisee se na ladey
Aisee ekta bakhshiye ki sabhi chunautiyon ka saamna karne ikatthe hon khade.

Aapki daya se pareeksha ke lamhe hotey hain safal
Aapki leela se daldal mein phansa hua jann bhi padta hai chal
Aapki karuna se sabka kalyaan hoga aaj nahin toh kal
Is atoot vishwaas ke sahaare hamaara har prayaas ho atal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Har Prayaas Ho Atal (05/16/2023)

May 15, 2023

Om Namaha Shivaya
Aaj Ka Suvichaar 🙏🏻🙏🏻 # 1912

                     Baitha Hai Tu….

Baitha hai tu kin khayaalon mein yoon
Maayoosi mein murjhaaya hai tera muh
Tere saamne hai chalne kee raah
Guruji prerit kar rahe Hain tera utsaah.

Unka ruhaani sandesh pehchaan
Unhe is raah par apna meet jaan
Bin sanshay tu Unka hukm maan
Isee mein hai tera kalyaan.

Raah mein pathar jo aayenge
Guru kripa se tere sangg ve bhi tarr jaayenge
Manzil takk pahunchna nahin hai koi khel
Raaste mein hoga kayi paristhitiyon ka mel.

Lete chalna Guruji ka tu naam har kadam par
Guruji dhyan dete rahenge tere har prayatn par
Duniyadari ka rangg na chadhne dena apne mann par
Apnaate rehna tu ruhaani pragati ka har avsar.

Jaagrit rehna, so matt jaana
Sansaari aadambar mein kho matt jaana
Satark prayaas dwaara swayam mein aisa parivartan laana
Jiske zariye mil paaye tujhe atmabodh ka khazaana.

Raah par tu chalta chal
Guruji angg sangg Hain har pal
Waqt jaayega guzar
Mukammal hoga tera safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Baitha Hai Tu…. (05/15/2023)

May 14, 2023

Om Namaha Shivaya
Aaj Ka Suvichaar 🙏🏻🙏🏻 # 1911

            Aadhaar Sanskriti Kee

Maa hai aadhaar sanskriti kee
Maa hai buniyaad sukriti kee
Dhanya hai maa kee mamta
Jo nikhaarti hai aulad kee kshamta.

Saans na ho shuru maa ke bin
Maa ko namaskar har din
Har din ho uss maa ko arpan
Jo karti hai bachche ka saatvik maargdarshan.

Guruji kee maa, Mata ji ko pranaam
Jinke zariye sansaar mein aaye Guruji mahaan
Maha Shiv roopi karunanidhaan
Jo avatarit Huey karne sangat ka kalyaan.

Guruji ke bachpan ke dauran
Mata ne Unka Shiv roop liya jaan
Guruji hua in noorani shishu ka naam
Jinkee bachpan mein ‘Nirmal’ naam se thi pehchaan.

Shivji ke avatar ko diya jinhonei janam
Unn mataji ke charnon mein saadar naman
Aur milee hai jin bhakton ko Guruji kee sharan
Unka sanvarta jaa raha hai janam maran.

Guruji kee guruyaayee mein Apne bhakton ke liye
Jalte hain mamta aur sneh ke deeye
Bhakton ko dekar pita aur mata ka pyaar
Guruji dete Hain unn sabhi ko taar.

Dhanya hain Mataji, jinhonei Guruji ko janam diya
Dhanya hai Guruji kee sangat, jinhe Guruji ne ashish hai diya
Dhanya hai veh vayu, jo bikherti hai Guruji kee khushboo ruhaani
Jo Guruji ke ashirwaad se nikhar jaati hai, dhanya hai har veh zindagaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aadhaar Sanskriti Kee (05/14/2023)

May 13, 2023

Om Namaha Shivaya
Aaj Ka Suvichaar 🙏🏻🙏🏻 # 1910

                    Madhur Milaap

Mere Guruji gunsaagar gunvaan
Mere murshid meharbaan
Bholenath Bhagwaan
Komal karunanidhaan,
Aapka paraakram hai aseem aur mahaan
Chaahte huey bhi na kar paaoon Aapka poorna gungaan
Nahin hai mujh mein veh kaabiliyat
Ki bayaan kar paaoon Aapki har inaayat.

Kalyuga ka hai ye zamaana
Ajab sa ho gaya hai duniya ka fasaana
Maya toh nahin chodegi nachaana
Avidya ke timir ne bhi hai sataana
Aise mein jo mil gaya hai Aapke charnon mein aashiyana
Toh sumat ke liye Aapke sanmukh hai sees jhukaana.

Kyunki baahar veh hai nahin, jo chaahoon mai paana
Aapki mehar se veh paaoon, jo bheetar hai khazaana
Usee ne is adhyaatmik safar mein hai kaam aana
Jiske liye mai Aapki kripa se maanti chaloon Aapka bhaana.

Aapke dar par hai meri saanson ke dera
Mere antas mein karte rahiyega basera
Jabb takk karna ho mujhe janam maran ka phera
Aapki sharan mein ho meri har shaam aur mera har savera.

Aapke ashirwaad se atma ka safar jabb bhi hoga mukammal
Bahut hee haseen hoga veh mubarak pal
Mitt jaayenge anginat janmon ke dukh aur santaap
Advait ka anmol bodh pradaan karega veh madhur milaap.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Madhur Milaap (05/13/2023)

May 12, 2023

Om Namaha Shivaya
Aaj Ka Suvichaar 🙏🏻🙏🏻 # 1909

            Bagiya Aur Baghban

Ye Guruji kee bagiya hai itnee pyaari saakhi
Yahaan har kali Unkee mahima hai sunaati
Har phool mein hai Guruji kee khushboo
Jiske dwaara gadd gadd ho jaati hai rooh.

Guruji ke aanchal ke roop mein
Har taruvar deta hai sheetal chhaaya
Keet patang hon ya hon koi bhi anya praani
Sabhi ne yahaan Guruji ka ashish hai paaya.

Is bagiya mein mandaraati hui har titlee
Guruji ke pyaar mein hui hai kamlee
Har pakshi gaata hai Guruji ke geet
Sab jaanein aur maanein Unhe apna pakka meet.

Guruji swayam Hain yahaan ke baghban
Unhonei kiya hai sabke nirmal anand ka intazaam
Itna paawan hai yahaan ka vaataavaran
Ki samarpan dwaara honei lagta hai har ashuddhi ka haran.

Hawaayein sajde mein sir ko jhukaati huin
Sewa mein Guruji ke spandan ko phaylaati huin
Simran karti huin hain dolti
Guruji kee tareef mein hain bol bolti.

Akash is bagiya ko karta hai naman
Dharti ka sparsh karein is bagiya ke charan
Is sparsh se hoti hai yahaan kee dharti kee shuddhi
Yahaan ka vayumandal protsaahit karta hai subuddhi.

Chand sa sheetal hai ye chaarul chaman
Traas ke har tufaan ka yahaan hota hai daman
Neevan hokar yahaan rakhna kadam
Shraddha se karna baghban ka vandan.

Meharbaan baghban ka shukriya
Jinhonei is bagiya ka anubhav hai diya
Is bagiya aur baghban ko baarambaar pranaam
Jinhonei diya hai naam simran ka daan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bagiya Aur Baghban (05/12/2023)