Ye ghar parivaar Ye samast sansaar Ye nahin hai santosh ka aadhaar Aadhaar hai Nirankaar se pyaar.
Laabh ke saath nuksaan bhi hai bhautik sukh ka Ismein adhik bhog vilaas bann sakta hai kaaran dukh ka Aur dukh mein na milega santosh kabhi Aisa toh shaayad jaante hain hum sabhi.
Trishna hoti nahin hai kumm Jo nahin hota hai, usee ke liye rehta hai gumm Yoon aasakti hoti hai ghar parivaar aur sansaar mein Ki bin bodh huey badhauti hoti jaati hai moh aur dooje har vikaar mein.
Bheetar kee khoj hai zaroori Taaki banee rahe antas kee aasakti se duuri Anivaarya hai Guru Govind mein lagan lagaana Beshak chalta rahe paristhitiyon aur logon ka aana jaana.
Chetna jaagrit rahegi toh chetaavani deti rahegi Dhyan kee yukti chitt kee chanchalta kee pareeksha leti rahegi Naam simran aur dridh shraddha se kee bhakti se Milegi pareeksha mein kaamyaabi Aur is kaamyaabi mein hee hai Sukh santosh ke nivaas sthaan kee chaabi.
Is chaabi se jabb khulega is nivaas sthaan ka dwaar Toh paavani hogi vahaan kee bahaar Baras raha hoga Guruji ka laad aur pyaar Sukh santosh kee saugat dekar Guruji denge hamein taar.
Haalaat hamesha nahin hotey ek se Maajre hotey hain anek se Kabhi kabhi lagta hai ki ruk si gayi hai ye zindagi Lekin guzaarish hai Guruji se kabhi na rukey bandagi.
Guruji kee mehar se miltee hai bandagi kee daat Is daat mein samaayee hai sukh kee saugat Guruji ka pyaar, aadar, satkaar Unka simran aur chintan baarambaar.
Sewa mein bitaane ko milein jo pal anmol Guruji kee mahima gaate huey bhakt ke dwaara boley meethe bol Satsang mein baithkar Guruji ka dhyan Unse seedhi taar jod kar Unka prem bhara sammaan.
Paalan Guruji ke hukm ka har kshan Unke shukrana mein ramta hua mann Unse arzi ki Ve bakhshte rahein gunaahon ko Unse vintee ki Ve prakashit karte rahein raahon ko.
Banda bann-ne ka Unke aadesh ko rakhna yaad Aur is agya ke nirvaah kee oar karna poora prayaas Insaaniyat ka dharam nibhaana Guruji ko dil kee baat bataana.
Andhvishwaas aur vehem se duur rehna Bandagi kee buniyaad par susthir rehna Koi daava ya koi maang ya shikaayat nahin Buss, vishwaas ki Unhonei jo socha hai hamaare liye, vahee hai sahi.
Aaj nahin toh kal, rangg laayegi bandagi Jo lagti hai ruki hui, punah praarambh hogi ye zindagi Guruji kee bandagi karne wala har bhakt hai Unkee santaan Guruji kee sharan mein nishchit hai sabhi bhakton ka kalyaan.
Ekant kee gehraayee mein hai Chetna ka sundar gaaon Jahaan Guruji kee mehar se Miltee hai ruhaani chhaaon.
Zaroori hai karna is gaaon mein vaas Taaki atma-chintan mein vyast rahe har shwaas Anubhav hota rahe saanson ke aane jaane ka Ullaas badhta rahe Guru ko paane ka.
Is gehraayee mein doobne se hee tarr paayenge Ye mumkin nahin agar duniyadari ko chodne se darr jaayenge Sthool roop se na bhi chhootey, kintu anivaarya hai anaasakti Ye karna utna saral hoga, jitnee hogi bhakti mein shakti.
Chetna ke sundar gaaon mein Guruji ke paaon kee chhaaon mein Mehsoos hoga aisa anand Ki chitt chaahega ekant anant.
Chhaayega khud par naam ka aisa nasha Ki bhool jaayega ki kabhi thi khud kee durdasha Khud se aur Guruji se hogi chuppi se baat din aur raat Maun reh paane ke hunar kee milegi Guruji se saugat.
Is duniya kee nagri mein rehte huey bhi Antas kendrit hoga rehkar chetna ke gaaon mein Guruji ke ashirwaad se anugrahit rahega jeevan Nutan noor se roshan hoga atma aur tann mann ka kann kann.
Behad hai anant Behad takk pahunchne kee pyaas hai anant Is pyaas ko bujhaane ke liye paar karna hoga hadd ko Jiska upaay gyat hai kewal mere murshid ko.
Mere murshid, mere Guruji pyaare Jo har ichhuk ko le jaayein uss hadd ke paar Jahaan uss anant behad ka ho deedar Jiske liye atma ne liya janam baarambaar.
Kintu iske liye yogyata anivaarya hai Jo Guru kee mehar se hee praapt ho paaye Guruji, mai toh agyani hoon, naadaan hoon Aap kripa kar ke kar deejiye mere uddhaar ka upaay.
Om Namaha Shivaya Shivji Sada Sahaay Guruji, Aap ji sada sada Hain sahaay Aapne har bhoole bhatke ko raasta hai dikhaaya Aapne agyan duur karne ke liye kitnon ko gyan ka prakash hai dikhaaya.
Bakhsh deejiye aisee shraddha aur aisa vishwaas Ki vyarth na ganvaaoon ek bhi shwaas Aap raasta dikhaayein jahaan Mai ekaagrachitt hokar chaloon vahaan Apne safar par dhyan doon, na ki koi aur hai kahaan Taaki Aapki meharbani se swayam ke sudhaar mein bitaaoon saara samaa.
Aankhein bandd karoon toh dikhta hai andhkaar Aap daya kar le jaayein andhkaar ke parde ke paar Jabb agar kabil ho jaaoon Aapki karuna se Toh le jaayiyega prakash ke parde ke paar.
Kehne kee aukat toh nahin meri Phir bhi kar rahi hoon gustaakhi kehne kee Ki jabb kabhi agar mujh mein kshamta ho uss oorja ko sehne kee Tabb Apne aanchal kee suraksha mein Le jaayiyega mujhe shabd ke bhi paar Jahaan uss sundar milan ka muqammal hoga intazaar Jis milan se hadd honei lagegi paar Aur Aapki rehmat se mai dekh paaoongi behad ka anant gulzar.
Param poojya Guruji, raah dikha deejiye Apni kripa se uspar mujhe chalaa deejiye Sumat bakhshiye taaki bhatak na jaaoon Himmat bakhshiye taaki thakk na jaaoon.
Vishwaas deejiye aisa ki kabhi na dagamagaaoon Avinashi dhan bakhshiye jisey mai baant paaoon Buddhi deejiye aisee ki shuddhi kee oar badhti jaaoon Jigyaasa deejiye aisee ki gyan kee seedhi chadhti jaaoon.
Aapki kripa se ahankar aur har vikaar ko duur bhagaaoon Kiya hai unhonei aakraman mann par, Unkee daasi na bann jaaoon Jitna bheetar jaana chaahti hoon, utna jaa nahin paaoon Meri bhakti mein hee kamee hogi, ashish dein ki unn kamiyon ko duur kar paaoon.
Aapki rehmaton ke anubhav sunoon aur sunaaoon Aapki mahima ka gungaan karti jaaoon Har pal Aapke charnon mein mann se aur bhi jhukti jaaoon Aapko paane kee koshish mein apne aap ko khoti jaaoon.
Aapko paane se hee safal hoga mera janam maran Aapki mehar se ye satya mujhe sada rahe smaran Aapke ashirwaad se Aapki sharan mein kar doon poorna samarpan Aapko paakar Aapke charnon mein hee atma kee yatra ho sampann.
Adhyatma kee kaksha mein Sookshma starr par milta hai har vishay ka gyan Veh avinashi gyan baant kar badhta jaata hai Ye hai Adhyaatmik Ganit ka niyam aur parinaam.
Adhyatma mein baantne se ho jaata hai zyada Kyunki jo baanta jaata hai, vo hota hai ruhaani dhan Phir vo chaahe ho yog bal, gyan bal, ruhaani pyaar ya kuch aur Adhyaatmik bhavna ko jaagrit karne par karna hai hamein gaur.
Hai Bhautik Vigyan ke bhi paar Adhyaatmik Vigyan ka bhandar In sab mein Guru ka mahatva hai aparampaar Unkee kripa se Adhyaatmik Vigyan deta hai bhakt ko taar.
Simran, dhyan, ruhaani gyan ka shravan aur manan In sabse ho paata hai Adhyaatamik Bhugol ka adhyayan Jitna bheetar jaakar hum karein antas ka bhraman Apni khaamiyon se utna hee avagat hota hai antarmann.
Bheetar kee khoj aur bhraman se miltee hai raah aagey kee Aisa honei ke liye zaroori hai kadr karni bandagi ke dhaage kee Is dhaage kee rakhni hogi poori izzat Tabhi toh rangg laayegi ibadat.
Kab kiske dwaara sunaaye satsang se Kisee aur bhakt ko apni duvidha ka mil jaaye hal Kab kiske dwaara kiya gaya Adhyaatmik Sangeet ke vishay ka paath Bann jaaye kisee aur bhakt ke liye sadhna kee prerna din aur raat Iska beshak na ho hamein anumaan Lekin ruhaani dhan ko saanjha karne ka hota hai aisa pyaara parinaam.
Guruji ke bachche hain hum, Unkee mehar se phailaayein aadhyaatmikta kee khushboo Is khushboo se numm ho jaaye har rooh Shraddha bhaav se upasthit rahein adhyatma kee kaksha mein Guruji koi kasar nahin chodenge kabhi bhi hamaari raksha mein.
Guruji kee kripa se jabb Unse judta hai antarmann Toh parivartan aarambh ho jaata hai usee kshan Unka saanidhya, Unke saakshaat ya ruhaani darshan Dikhaate Hain apne antas ko ek shaktishali sa darpan.
Hota hai kee hui galatiyon par pashchaataap Mitne lagta hai santaap Guruji dwaara dee gayi jaagriti se Unke dwaara sanvaari hui apne mann kee aakriti se.
Suhela lagta hai simran ka har vela Prateekshit rehti hai besabri se baani kee bela Guruji ke ashish se Unkee dee bakhshish se.
Milta hai sewa ka avsar Milta hai satsang ka dar Guruji kee marzi se Unhe kee hui arzi se.
Jaagta hai bhaav samarpan ka Ilaaj hota hai vyakul mann ka Guruji ke satsang suna kar aur sunn kar Vishwaas kee chaadar baar baar bunn kar.
Badhne lagta hai sabr aur sanyam Pehle se kumm sataane lagta hai vahee gumm Mushkilein hon ya na hon kumm Lekin sehensheelta mein honei lagta hai adhik dumm.
Guruji ke prati shukrana ka gehra hota jaata hai ehsaas Chaahe poori ho ya na ho mann kee aas Guruji dikhaate Hain ye rishta hai itna khaas Is rishte mein meethi lagti hai ruhaani pyaas.
Ye bandhan hai aisa jismein azaadi kee hai khushboo Ye safar hai aisa jismein tarne lagti hai rooh Ye ek vidhi hai jismein mann atma se hota hai rubaru Ye seedhi hai jahaan se yakeenan adhyaatmik chadhaayee hoti hai shuru.
1479 ka thaa varsh, 5 May thi tithi Amritsar ke Baasarke gaaon ke liye thi ye bahut shubh tithi Pita Tej Bhaan Bhalla aur Mata Lachmi ke jyeshth putr ka hua janam Bachpan se hee Unhe pasand thei sewa, sadh sangat ka saath aur bhajan.
Chaubees varsh kee aayu mein vivah hua Unka Mata Mansa Devi ke saath Do putriyan aur do putr huey Unke Jo thei dampatti ke liye saugat.
Guru Amar Das ji ne Haridwaar mein bitaaya kuch samay Vaapasi par kisee ghatna ke kaaran Unke mann mein hua sanshay Duvidha mein thei ki Unkee teerath yaatraayein shaayad na hui hon safal Is soch se Ve vyakul rehne lagey pal pal.
Unhonei shabad baani sunee Guru Angad Dev ji kee beti ke mukh se Is tareh Guru Angad Dev ji kee sharan mein aakar Unkee mulaakaat hui poorna sukh se Guru Amar Das Ji ne Khadur Sahib mein reh kar Guru Angad Dev ji kee sewa karne kee thaan lee Guru Angad Dev ji ne dee Unhe sewa Goindwal Sahib ke nirmaan kee.
Prerna banee Unkee mehnat baaki sangat ke liye Aur jalne lagey har oar sewa aur Guru prem ke deeye Guru Angad Dev ji ne shareer chodne se pehle hee Guru Amar Das ji ko saumpi Guru gaddi kee zimmedaari Lekin Guru Angad Dev ji ke putr ne Krodh aur irshya vash Unhe apni laat maari Mahaan Guru Amar Das Ji nahin kupit Huey uske krodh se Balki Ve vahaan se chale gaye aur pahunche Baasarke gaaon bina pratishodh ke.
Sangat aur Bhai Buddha ji ne dhoondha Guru ji ko ek chhote se ghar mein vahaan Sabne anurodh kiya ki Ve vaapis Goindval chalein Bhakton ke adheen aur niswaarth pyaar ke saagar Guru ne maani sangat kee baat Aur Ve Goindwal laute unn sabke saath.
Samaaj sewa mein na chodi Guru Amar Das Ji ne koi bhi kasar Sikhaaya sangat ko andhvishwaas aur karmakaand ke bina jeevan karna basar Shuru hui thi jo langar kee reet Guru Nanak Dev ji dwaara Guru Amar Das Ji ne usey pratishthit kar sabki samaanta ko mahatva de deenon ko diya sahaara Raja Akbar ne bhi aakar kiya thaa vahaan langar Bahut prabhavit huey Ve aakar langar ke dar par.
Baoli kee kee Unhonei sthaapana Jiske sangg juda hai mukti ka vardaan Manji prathaa ke liye bhi Unhe kiya jaata hai yaad Aur Parda pratha aur Sati pratha ke virudh Unhonei uthaayee awaaz.
Guru Amar Das ji ne rachna kee kayi shabad aur Anand Sahib kee baani kee Jitnee kee jaaye kumm hai mahima Unkee zindagaani kee Param jyot mein Huey vileen Ve odh kar ek safed chaadar Yugon yugon takk sansaar mein hota rahega Unka aadar.
Guruon kee sharan paakar ho jaata hai uddhaar Guruji bhi Gurbani sunvaakar Apni sangat ka jeevan dete Hain sanvaar Shat shat naman Guruon kee guruyaayee ko Dhanya hai sangat mehsoos kar Guruon kee vadiyaayee ko.
Chalta rahega jeena marna Is dauran zaroori hai tarna Isee se mumkin hoga atma ka Paramatama kee oar badhna Ismein hee Guru Govind dwaara hoga avroh ka harna
Avroh, atma ka, yaani ki adhogati Kyunki tarne se hee praapt hogi oordhvagati Iske liye anivarya hai antas kee shuddhi aur sumati Taaki yatra mein talti rahe janmon kee durgati.
Yatra poori honei mein na jaane lagenge kitne janam Apni oar se toh kar sakte hain hum prayatn Shukr hai milee hai Guruji kee sharan Ye saugat rahe hamein har pal smaran.
Parivartan laayein swayam mein Guruji kee prerna se Karmon mein sudhaar ho bheetar jaagne wali chetna se Guruji ke ashish se awashya hoga uddhaar Adhyaatmik seedhiyan chadhte chadhte safar par aayega nikhaar.
Yaad rahe ki girna hai chadhne se aasaan Isliye satark reh kar dene hongei imtehaan Paanch choron ke aakraman se baar baar bachaana hoga swayam ko Mann ka swami bannkar das banaana hoga mann ko.
Chaurasi lakh yoniyan mauka dhoondhegi hamein maanav yoni se giraane ka Isliye simran aur dhyan dwaara nirantar prayaas karna hoga swayam ko bachaane ka Karte rahein Guruji se guzaarish lagaataar Ki Ve hamein girne se bachaa lein har baar.
Guruji ne dekha ki hum koshish karte hain har kshan Toh hamaare nek neeyat vikaas se Guruji hongei prasann Kayi janmon ke safar kee kumm ho sakti hai avadhi Guruji ke banda bann-ne ke aadesh mein hai uskee vidhi.
Sharan milee hai Guruji kee, nissandeh hoga kalyaan Milega is manzil par vo, jo Guruji nishchit karenge mukaam Param poojya Guruji ko koti koti dhanyawaad aur pranaam Unka naam lete lete safar ko milega mangalamay anjaam.
Anubhav gyan hota chalega paripakva Atmasaat hota jaayega param tattva Sadbhaav jaagrit rahega sabke prati Ekaagrata se hogi aisee sumati.
Bheetar divya jyot kee lau se hoga aisa prakash Ki teri ichcha aur Guruji kee kripa se tere vikaaron ka hoga naash Guruji kee mehar se tootenge tere paash Nirmalta se yukt ho tu chod dega hona niraash.
Tu buss nibhaata chal shraddhapoorna bhakti ka kartavya Guruji ekaagrata kee shakti bakhshenge awashya Safal hoga tera chintan Ekaagrata se susajjit hoga tera antakaran Guruji le jaayenge tujhe, thaame tere manobal kee doar Upadrav se duur, shant shakti kee oar.
Aaj Ka Suvichaar 