Jitna Karna Chahiye Aapka Shukrana (06/20/2023)

June 20, 2023

Om Namaha Shivaya
Aaj Ka Suvichaar 🙏🏻🙏🏻

#1948

Jitna Karna Chahiye Aapka Shukrana

Pyaare pyaare Guruji,

Jitna karna chahiye Aapka shukrana
Utna kiya na jaaye
Utne alfaaz na zehen mein aayein
Jo is ehsaas ko bayaan kar paayein
Oopar se bada chanchal hai mann
Ek ke baad dooji koi kaamna ismein aaye.

Sir par chhat dee Aapne
Bhookh pyaas ka kiya intazaam
Vastra aabhooshan mein kamee nahin
Diya hai baaki bhi har aaraam.

Ghar parivaar itna sundar hai sangg
Swasth hai shareer ka har angg
Na bhi ho swasth toh bahuton se achche hain
Phir bhi bhaav aur aastha mein kachche hain.

Mann asthir hai isliye dolta hai
Tareh tareh kee baatein bolta hai
Shukrana mein bhi chhipi hoti hai koi kaamna
Phir karna padta hai niraasha ka saamna.

Aisa nikhaar deejiye hamaare simran aur bhakti ko
Ki seekh jaayein mann ko sambhaalne kee yukti ko
Uska karein yoon abhyaas
Ki mann sthir hokar le santushti ka shwaas.

Kyunki asthir mann shukrana karne se hichkichaaye
Bhavishya ka soch ke veh ghabraaye
Pichhle karmon se veh sharmaaye
Aur vikaaron kee vajeh se kaabu mein na aaye.

Aapki mehar se shant ho bechayyni kee har lehar
Mann se keh paayein ki tu na idhar udhar phir, balki reh sthir
Mann bann kar rahe Aapki hum par navaazi subuddhi ka das
Aur shukrana se poorit rahe hamaara har shwaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jitna Karna Chahiye Aapka Shukrana (06/20/2023)