Jitna karna chahiye Aapka shukrana Utna kiya na jaaye Utne alfaaz na zehen mein aayein Jo is ehsaas ko bayaan kar paayein Oopar se bada chanchal hai mann Ek ke baad dooji koi kaamna ismein aaye.
Sir par chhat dee Aapne Bhookh pyaas ka kiya intazaam Vastra aabhooshan mein kamee nahin Diya hai baaki bhi har aaraam.
Ghar parivaar itna sundar hai sangg Swasth hai shareer ka har angg Na bhi ho swasth toh bahuton se achche hain Phir bhi bhaav aur aastha mein kachche hain.
Mann asthir hai isliye dolta hai Tareh tareh kee baatein bolta hai Shukrana mein bhi chhipi hoti hai koi kaamna Phir karna padta hai niraasha ka saamna.
Aisa nikhaar deejiye hamaare simran aur bhakti ko Ki seekh jaayein mann ko sambhaalne kee yukti ko Uska karein yoon abhyaas Ki mann sthir hokar le santushti ka shwaas.
Kyunki asthir mann shukrana karne se hichkichaaye Bhavishya ka soch ke veh ghabraaye Pichhle karmon se veh sharmaaye Aur vikaaron kee vajeh se kaabu mein na aaye.
Aapki mehar se shant ho bechayyni kee har lehar Mann se keh paayein ki tu na idhar udhar phir, balki reh sthir Mann bann kar rahe Aapki hum par navaazi subuddhi ka das Aur shukrana se poorit rahe hamaara har shwaas.
Jabb se mila maanav ko Paramatama se insaan ka khitaab Tabb se shuru hui zindagi kee kitaab Jismein hai anubhavon aur karmon ka hisaab Jo aksar dete hain doojon ko unke sawaalon ke jawaab.
Zindagi kee kitaab ke panne Sab khali reh jaayein toh achcha nahin Unmein anubhav ka zikr na ho Toh aisa paath toh sachcha nahin.
Kyunki na kuch hoga padhne ke liye Na hoga kuch bhi sunaane ke liye Phir kaise jalenge padhne sunn-ne wale ke mann mein Jigyaasa aur asal gyan ke diye?
Aisa kadaapi zaroori nahin Ki har adhyaay ho suhaana Lekin dekho, tum na dhoondhna Na likhne na padhne ka koi bahaana.
Seekhne ke liye kitna saara gyan hai har oar Aur uss se bhi zyada gyan hai sabke bheetar Har anubhav se milee shiksha aur prerna Banti hai is gyan ke saagar ka seekar.
Har boond ka hai anivaarya yogdaan Jiske dwaara badhta hai ruhaani gyan Kya sahi hai, kya hai anuchit Samajhne lagta hai chet-te huey hamaara chitt.
Guruji ne dikhaaya hai raasta simran ka Jo gyan grahan shakti ko chamkaata hai Mann ko saaf kar uskee dhaaran shakti ko badhaata hai Aur bhakt ko aarohan kee oar le jaata hai.
Kintu hamaara farz hai karna simran ka prayaas Hamaara kartavya hai karna dhyan ka abhyaas Tabhi toh samajh aayenge ruhaani raaz Varna gher lenge hamein bhautik andaaz.
Ruhaani raaz ka saaz banega jo har anubhav ka sangeet Toh kitaab ke panne sunaayenge Guruji kee mahima ke geet Har anubhav mein basaa hoga Unka ashirwaad Sunn-ne aur padhne wale ka roam roam hoga Unke spandan se aabaad.
Har sukhi anubhav par hoga Guruji ka ashish Har kathinaayi ke anubhav ko miltee hai Guruji kee bakhshish Guruji Hain Guru aur MahaShiv roopi Ish Ve Hain Ashutosh, anant aur aneesh.
Karte huey Guruji dwaara anugrahit har anubhav ka aadar Anubhav kee kitaab ko Unke charnon mein rakh kar Agar aakhiri saans le paayein Unke dar par Toh yakeenan dhanya ho jaayega is zindagi ka safar.
Aapke peechhe chalne kee dhun mein Sundar sapne lagi hoon bunn-ne Ye bhi hai Aapki kripa Mere pyaare pyaare Guru pa.
Aapke har kadam ke nishan par Jhukaati chaloon mai apna sir Jahaan Aapke kadam, vaheen meri raah Mere pyaare pyaare Guru pa.
Aapke charnon kee dhool Hai mere liye sabse komal phool Usey maathe par paaoon lagaa Mere pyaare pyaare Guru pa.
Giree hui hoon vikaaron ke kooen mein Phansi hui hoon maya ke dhooen mein Apni meher se deejiye mujhe inse oopar utha Mere pyaare pyaare Guru pa.
Aapke charnon ka amrit Karta hai mera hitt Paan kar paaoon iska sada Mere pyaare pyaare Guru pa.
Aapke sangg rishta hai sabse achcha Hoon mai Aapke aanchal mein pal raha bachcha Aap hee pita, Aap hee meri maa Mere pyaare pyaare Guru pa.
Chal na paaoongi Aapke bina Mumkin na hoga phir jeena Kabhi chodna na Aap meri baah Mere pyaare pyaare Guru pa.
Aapki prerna ke punj mein tarte rahein mere vichaar Aapki bakhshish kee baarish mein bheegta rahe mera ghar sansaar Khushnaseeb hoon Aapke pyaar ko paa Mere pyaare pyaare Guru pa.
Aapki rehmat kee hoon mohtaaj Aapke ashish se hota hai mera har kaaj Naman Aapko shukrana bharaa Mere pyaare pyaare Guru pa.
Kar Guruji ka aadar satkaar Kar le Unkee baani se pyaar Guruji kee mahima hai aparampaar Ve le jaayenge tujhe bhavsaagar ke paar.
Teri jitnee chinta Guruji ko hai Utnee ho nahin sakti kisee aur ko Jabb tu raat mein so jaata hai Guruji chamkaate Hain tere jeevan mein aane wali bhor ko.
Ve rakhte Hain tera poora khayaal Bannkar tere liye suraksha kee dhaal Maango nahin, maano, Ve kehte Hain Tera bhaagya nikhaarte Huey bhi tujhe bachaate rehte Hain.
Tujh par sooraj kee garmi aaye Kintu tu jal na jaaye kaheen Tujh par barsaat kee boondein aayein Lekin tu baadd mein na phans jaaye kaheen.
Tu sukh samriddhi mein jeeye Lekin ahankar ka vish na peeye Jitna sampann ho, tu utna neevan ho jaaye Jitnee kaabiliyat ho teri, kumm se kumm utna toh doojon ke kaam aaye.
Tera hamesha nek iraada ho Chaahe tere paas kumm ho ya phir zyaada ho Tujh par nazar rakhte Huey teri zimmedaari Guruji lete Hain Aur teri yogyata se adhik tujhe taar dete Hain.
Teri swatantra ichcha mein nahin Ve hastakshep karte Kintu teri jholi sada Ve Apne ashish se Hain bharte Punj Hain Ve pyaar ke Mahasaagar Hain dulaar ke Mohtaaj nahin Hain tere diye satkaar ke Sartaj Hain tere jeevan, parivaar, aur saare sansaar ke.
Chod de tu apne haalaat se darna Chod de tu sansaar se ladna Guruji kee mehar se hota rahega tera tarna Unkee kripa se hee hai hai tera jeena marna.
Harte rahenge Guruji tere sankat Bakhshte rahenge tujhe sumat Ve Hain gyan aur daan ka bharpoor bhandaar Tu karta chal Unke charnon mein naman aur namaskaar.
Beshak lagey thodi der Zaroor aayegi saver Tu himmat na haar Reh tu shukrguzaar.
Guruji bade dayalu Hain Guruji bahut kripalu Hain Tujhse zyada fikr hai Unhe teri Tu inkaar na kar, agar Unhe manzoor hai deri.
Is deri mein chhipa hai tera kalyaan Kaise, iska Guruji ko hee hai gyan Tu ismein Unkee raza jaan Aur usmein raazi rehne ke hukm ko le maan.
Guruji ne tujhe is janam se pehle bhi hai bakhsha Arey, tujhe toh gyat hee nahin ki Ve kabb se kar rahe Hain teri raksha Abb takk sambhaala hai tujhe Guruji ne Aagey bhi awashya sambhaalenge Tere kitne kaaj sanvaare Hain Unhonei Aagey bhi awashya sanvaarenge.
Unkee chhatra chhaaya mein hai tu Badi bhaagyawaan hai teri rooh Jinka prem aur ashish tere antas ko har pal leta hai chhoo Ve Hain Guruji, bhakton ke param poojya Shiv avatari Guru.
Chaahat chetna kee Baney vajeh prerna kee Prerna, ki aagey badhein ruhaani path par Bharosa rakhein apni chaahat par.
Guru ka hona anivaarya hai iske liye Taaki Ve jalaayein antas ke bujhe deeye Jo bhi karma bhakt ne hain kiye Guru unka adhiktar bojh uthaayein bhakt ke liye.
Guruji Hain pooran Guru Bhakt ka uddhar karte Hain shuru Lekar swayam par bhaar adhiktar Rehte Huey agam agochar.
Bhakt ko maalum chale ya nahin Jahaan bhakt ho, Guruji hotey Hain vaheen Bhakt ke bheetar kee oorja Hain Guruji Bhakt kee pooja Hain Guruji.
Sweekriti, shukrana, samarpan sikha kar Gurbani ke darpan mein bhakt ko uska mann dikhakar Karte Hain bhakt ko bheetar se saaf Karte Hain uskee galatiyon ko maaf.
Bhog aur yog ka fark bataate Hain bhakt ko dhyan mein Karte Hain badhauti bhakt ke ruhaani gyan mein Anant saamarthya hai Guruji ke naam ke baan mein Ye sashakt sahaayak hai bhakt ke kalyaan mein.
Kaaran karta, kalyaan karta, bakhshanhaar Le jaate Hain bhakt ko bhavsaagar ke paar Tu niraash na ho agar tu reh gaya abb kee baar Tere bin jaane bhi Ve tujhe rahe Hain taar.
Amaavasya ho ya ho chandani raat Kabhi na kabhi toh teri bhi awashya banegi baat Guruji Hain tere bhi saath Tu Unka putr hai, Ve Hain tere nath.
Ahem se bhar gaya tark ka ghaav Jabb usne dekha kitna bhola hai bhakti ka bhaav Bhaav se naaraaz honei lagaa tark Lekin bhaav ko na pada uss se koi fark.
Bhaav ne tark ko bahut samajhaaya Lekin shaayad tark ka waqt nahin thaa aaya Veh ahem ke ghaav ke moh mein bhatka Kintu bhola bhaav apne bahaav mein na atkaa.
Balki baandh kar Guruji ke naam ka sehra Bhaav honei lagaa bholepan mein aur bhi gehra Guruji mein magan, lagaakar Unmein lagan Bhaav behta chalaa duur takk Jahaan pahunch na paaya tark.
Tark hisaab-kitaab mein raha vyast Bhola bhaav pyaar mein hua vyast Bhaav behte behte pahuncha neevenpann kee gehraayee mein Tark mandaraata raha ahem kee oonchaayee mein.
Tark ko thi apne ohade kee fikr Bhola bhaav manaata chala shukr Tark dekhta raha khokhle sawaal jawaab ka darpan Bhole bhaav ne kiya Guru charnon mein poorna samarpan.
Tark peechhe chhoot kar reh gaya Bhaav ne Guruji se apna kehna keh diya Bhaav ko kar ke sweekaar Guruji ne sunn lee uskee pukaar.
Tark ko Guruji kee praapti na ho paayi Bhaav ne paayi Guruji aur Unkee vadiyaayee Guruji prasann Hon bhakton ke bhole bhaav dwaara Bhola bhaav laagey Guruji ko bahut hee pyaara.
🌹🌹🌹🌹🌹🌹🌹
Jai Guruji 🙏🏻🙏🏻 Dhirja
Bhola Bhaav Laagey Guruji Ko Bahut Hee Pyaara (06/13/2023)
Thaa ek raahi bahut pyaara Honhaar, nek, milansaar sa Apna har farz nibhaata thaa Doojon ko bhi vahee sikhaata thaa.
Aaya yug parivartan ka maada samay Spandan mein hee kuch aisa thaa ki uske mann mein uthne lagey sanshay Astt vyast sa honei lagaa uska jeevan Haara sa mehsoos karne lagaa uska mann.
Na jaane ki kya koi paap thaa kisee pichhle janam ka Ya phir kuch aur Lekin avishvasaneeya thi yeh paristhiti Ek ek varsh ke jaise lagne lagi har ek tithi.
Usey mushkil lagne lagaa chalna apni disha mein Isliye mulaakaat honei lagi naseeb kee nisha se Badhti gayin ye mulaakaatein Aane lagin aisee anek raatein.
Veh raahi toh thaa suljha hua Abb veh ho gaya uljha hua Mann hota gaya ashaant Akelepann mein badal gaya uska ekaant.
Jaanta thaa usey kya hai karna Lekin shuru hua asafalta se veh darna Darr zyada hota gaya Veh disha khota gaya Samay ka maano chadh raha thaa uspar karz Chaahte huey bhi na nibha paa raha thaa apna farz.
Thaa veh nek neeyat aur sadaachaari Shaayad thi ye uske tarne kee baari Shukr hai nahin thi usey nashe aadi jaisi koi buree aadat Phir bhi hoti gayi uskee udaas si haalat Atma-vishwaas ko pahunchi thes Swadesh mein mehsoos honei lagaa usey pardesh.
Kis par karey vishwaas Kaise na ho niraash Veh mann hee mann kehta thaa Aur sochta rehta thaa.
Jaanta thaa ki uska shubhchintak hai uska poora ghar parivaar Aur uska unn sabke saath thaa bharpoor pyaar Lekin Guru bin adhoora thaa uska jeevan Tabhi uskee ye dasha thi har kshan.
Guruji ne Apni karuna barsaayee Unkee mamta raahi ko bachaane aayee Apne komal kar se Guruji ne thaam liya uska haath Guruji har kadam par ho liye raahi ke saath.
Raahi ko nahin hui uskee khabar Lekin dobaara se shuru ho gaya ruka hua safar Usey ehsaas hua ki koi shakti hai jo de rahi hai usey prerna Samajh gaya ki kuch toh hua hai jis se dobaara aayi hai usmein chetna.
Apne shwaas par veh dene lagaa dhyan Bheetar ujaala hua aur praapt hua usey gyan Murajhaaya atma-vishwaas khil gaya Khoya atma-sammaan vaapis mil gaya Veh nibhaane lagaa shraddha se apna farz Chukaane lagaa samay ka karz.
Aagey badhta chala raahi manzil kee oar Thaamey huey thi usey Guruji kee kripa kee doar Sahi waqt aaya kuch varsh pashchaat Jabb Guruji kee marzi se usey hua gyat Ki Guruji ne usey sambhaala aur chalaaya Aur aagey badhne ka raasta dikhaaya.
Hua veh bahut shukrguzaar jaankar Guruji kee rehmat Karta raha lagan se veh apne kartavya kee oar mehnat Pahuncha safalta ke shikhar par Bodh hua usey is safar par Ki Guruji kee mahima hai aparampaar Aur bann gaya veh Unke charnon mein sewadaar.
Ye bhi thaa Guruji ka hee ashirwaad Guruji sabke jeevan ko karein Apne ashish se aabaad Guruji Hain kripa dhaari karunanidhaan Jaise is raahi ka hua, vaise sabhi ka ho kalyaan.
Guruji Hain anant Unkee kripa anant Ve bhakton ko dikhaayein panth Jis par chal kar ho unke kashton ka antt.
Guruji ke bhakt Hain anek Juda hai Unse bhakt pratyek Ve sabhi ko rahein Hain dekh Ve jaanein kiskee neeyat hai nek.
Kuch bhi nahin Unse chhipey Unkee agya ho toh koi kaam na rukey Tabhi toh har bhakt jann Unke samaksh jhukey Unke hotey huey kisee bhakt ka dil kyun kabhi dukhey?
Guruji jaanein kaun hai bhog mein Ve jaanein kaun hai yog mein Ve bhakt kee madad karein har roag mein Ve imtehaan lete Hain bhakt ke ruhaani udyog mein.
Sarvgyaani Guruji ne hamein liya hai sweekaar Unkee sharan mein aakar honei lagaa hai hamaara uddhaar Jo Guru hamaare bin boley hee sunn lete Hain hamaari pukaar Aise Shiv avatari Guruvar ke kamal charnon mein saadar namaskaar.
Aaj Ka Suvichaar 