Month: June 2023

June 10, 2023

Om Namaha Shivaya
Aaj Ka Suvichaar 🙏🏻🙏🏻

#1938

     Sanchit Karmon Kee Ret Mein

Sanchit karmon kee ret mein
Dhanste jaa rahe hain paaon
Chaahein toh bhi mil na paaye
Duur khade taruvar kee chhaaon.

Kyunki paaon jo dhans gaye
Toh ret se nikalna hai kathin
Aagey chalna bhi mushkil ho
Aur badhna hai namumkin chale bin
Na jaane koi madad kee pukaar sunei ya nahin
Chaahe hum pukaarte rahein raat aur din.

Guru ka hee ashirwaad
Hai hamein ret se nikaalne mein saksham
Guru hee kar paaye karmon ka nivaaran
Ve hee ret se azad karein bhakt ke kadam.

Lekar swayam par hamaare adhiktar praarabdh karam
Hamein jagaakar yaad dilaate Hain Ve hamaara dharam
Aur lagg jaayein beshak jitne bhi janam
Guru awashya duur karte Hain hamaara gumm.

Guruji taarte Hain bin kiye koi pravachan
Guruji bakhshte Hain hamein satsang aur simran
Karaakar Gurbani ka shravan aur manan
Ve protsaahit karte Hain hamaara atma-chintan.

Simran aur atma-chintan se hota rahe hamaare antas ka pavitrikaran
Aisee kripa karein Guruji Maharaj
Sanchit karmon kee ret se karein Ve azad
Dekar har pal Apna ashirwaad.

Bhavishya mein ret mein dhansne se bach jaayein hum
Aise ho jaayein hamaare kriyamaan karam
Uss raaste par chalein jahaan le jaayein Guruji ke nakshekadam
Guruji kee mehar se safar mein karmon ka bhaar hota jaaye kumm.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sanchit Karmon Kee Ret Mein (06/10/2023)

June 9, 2023

Om Namaha Shivaya
Aaj Ka Suvichaar 🙏🏻🙏🏻

#1937

     Jabb Se Mainey Odhi Chaadar

Jabb se mainey odhi chaadar
Guruji ke pyaare naam kee
Mai toh sach mein ho gayi
Niwaasi Unke dhaam kee.

Ye mumkin na thaa Unkee kripa ke bin
Chaahe mai yatna karti raat aur din
Ye naam kee chaadar hai Unkee dee saugat
Unka naam hai Unhee kee dee hui daat.

Unhonei agya dee aane kee apne dwaar par
Aur diye Apne aur Apne dhaam ke darshan
Yoon nikharta gaya jeevan ka har kshan
Ki har pal Unka shukrana karti hoon mann hee mann.

Mann mein shukrana
Shukrana ehsaas mein
Shukrana awaaz mein
Shukrana ardaas mein.

Guruji ke simran se chaadar dhulti rahe
Unke charnodak mein meri har khaami ghulti rahe
Chaadar Guru kripa se kavach bhi bann jaaye
Aur har tareh kee anuchit oorja se mujhe bachaaye.

Guruji kee daya se milee hai ye naam kee chaadar
Guruji sumat bakhshein ki mai sada karoon is daan ka aadar
Is chaadar mein hai mere Guruji kee khushboo
Is chaadar ko paakar gadd gadd ho gayi meri rooh.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jabb Se Mainey Odhi Chaadar (06/09/2023)

June 8, 2023

Om Namaha Shivaya
Aaj Ka Suvichaar 🙏🏻🙏🏻

#1936

        Sooraj Kee Kiran Se….

Sooraj kee kiran se zyada kirtimaan
Akash kee aseemta se bhi mahaan
Hain Guruji sarvshaktimaan
Bhakt vatsal karunanidhaan.

Vayu ke astitva se bhi viraat
Jal bhi jodey Unke charnon mein haath
Bann paane ke liye amrit
Jis se ho bhakton ka hitt.

Pheeka padd jaaye agni ka tej
Guruji Hain aise rangrezz
Unkee leela hai adbhut
Karti hai saadhak ko shuddh.

Chaand kee chandani se adhik sheetal
Nutan pankhudi se bhi komal
Hain pyaare Guruji har pal
Taral aur nirmal.

Kisee phool mein veh khushboo na samaaye
Jo param poojya Guruji ke spandan se aaye
Hai Guruji ka pyaar ruhaani
Saari sangat hai Unkee deewani.

Lagaa hee nahin sakte hum andaaza
Ki hum hain kitne bhagyavaan
Guruji ne liya hai hamein sharan mein
Karne hamaara kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sooraj Kee Kiran Se…. (06/08/2023)

June 7, 2023

Om Namaha Shivaya
Aaj Ka Suvichaar 🙏🏻🙏🏻

#1935

   Guruji Se Seedhi Taar Jod Kar

Guruji se seedhi taar jod kar
Apne kar Unke vandan mein jod kar
Jo rishta tum nibhaaoge
Uss se tum nihaal ho jaaoge.

Mushkil samay mein lekar Guruji ka naam
Sab Unpar chod kar subah aur shaam
Jo samarpan tum kar paaoge
Toh mann ko halkapann pahunchaaoge.

Khushhaali mein kar ke Guruji ko yaad
Dekar Unhe dhanyawaad
Jo apna shukrana tum sunaaoge
Toh Unse ashish tum paaoge.

Tanaav mein Guruji ka karoge chintan
Karte huey Unka bakhsha hua simran
Jo tum shukriya karte huey sees jhukaaoge
Toh niyati se bhi zyada ashirwaad paaoge.

Ekant mein ekaagr ho kar
Swayam ko Guruji ke dhyan mein kho kar
Jo anmol anubhav tum paaoge
Uss se tum dhanya ho jaaoge.

Har pal ko jaan kar Guruji kee mehar
Gaate huey Guruji kee mahima har pehar
Jo tum Unka stavan karte jaaoge
Toh Guruji ko tum prasann kar paaoge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Se Seedhi Taar Jod Kar (06/07/2023)

June 6, 2023

Om Namaha Shivaya
Aaj Ka Suvichaar 🙏🏻🙏🏻

#1934

           Taruvar Kee Jadein

Taruvar kee jadein jo seenchi jaayein
Toh ve poore taruvar ko paani pahunchaayein
Taruvar ke har angg kee pyaas bujhaayein
Taaki ve sookhe na rehne paayein.

Jadon ke dwaara taruvar ka poshan karey paani
Sanvar jaaye taruvar kee zindagaani
Ye taruvar de paaye pakshi ko ghar, phal, phool, aur chhaaya
Kitne praaniyon ne pedon se kitna kuch hai paaya.

Patte, phal, phool toh toot kar gir sakte hain
Ya phir todey jaate hain aksar
Shaakhaayein bhi atal rehne ka na karein vaada
Lekin, jadon ka pakka hota hai vaada.

Vaada, ki taruvar ko poshit rakhne ka hai unka nek iraada
Jadein mazboot hon toh nibha paayein apna vaada
Hamaara jeevan bhi toh taruvar ke samaan hai
Kyun na is samroopta ka anusaran karein zyada se zyada?

Jitnee gehri hongei jadein
Unmein hogi utnee sehensheelta aur shakti
Jitnee hongi ve prithvi-tal
Ve rahengi utnee hee sthir har pal.

Jad roopi antas ko seenchein Guruji ke naam se
Taaki jeevan ke taruvar ka poshan ho is naam ke amrit ke paigaam se
Ye amrit jabb is taruvar ke har bhaag kee sinchaayee karega
Tabb taruvar ka har angg Guruji ke naam roopi amrit se tarega.

Jadein hongi ghanishth
Vishwaas hoga prabal
Nikhar jaayega manobal
Upkaari hongei phal.

Manobal badhne ke saath saath mann hota jaayega pavitra
Sudharta jaayega taruvar roopi jeevan ka charitra
Sthirta, sehensheelta, shakti hogi atmasaat
Mushkilon ke tufaan mein bahut madad karegi ye daat.

Jeevan ka taruvar rahega haraa bharaa
Mazboot jadon se veh dridhta se rahega khada
Guruji ke naam ka amrit poore taruvar kee raksha karega
Rog roopi ghaav jo huey tann mann mastishk par, toh ye amrit ghaav bhi bharega.

Amrit kee ruhaani khushboo hogi taruvar ke phool aur phal mein
Amrit kee oorja hogi taruvar kee praan vayu ke spandan mein
Jeevan ke taruvar ke har hisse par
Jeevan mein honei wale har kisse par
Hoga Guruji ka anupam amrit roopi ashirwaad
Apne naam ke anmol amrit ke liye sada Guruji ko dhanyvaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Taruvar Kee Jadein (06/06/2023)

June 5, 2023

Om Namaha Shivaya
Aaj Ka Suvichaar 🙏🏻🙏🏻

#1933

Mann Mein Aa Rahe Hain Kuch Khayaal

Pyaare Guruji,

Mann mein aa rahe hain kuch khayaal
Jo shaayad bayaan kar rahe hain mann ka haal
Samajh na aaye mujhe ki ye soch hai ya chinta ya guzaarish
Aap vaise dekhein inhe, jaisi ho Aapki khwaahish.

Vinamrata ho vaani aur har vichaar mein
Koi shart na ho Aapke sangg pyaar mein
Ummeed ho toh kewal mujhe Aapse
Na ghabraaoon dukh santaap se.

Kewal Aapke sangg karoon dil kee baat
Yaad rakhoon ki Aap sada Hain mere saath
Beshak mai rahoon Aapki yojanaa se agyat
Aapke naman mein jude rahein mere haath.

Aap par vishwaas ka jo vriksh hai mere mann ke aangan mein
Veh hota rahe vishaal
Aapke simran aur dhyan dwaara manobal aisa ho jaaye
Ki har haal mein veh baney ik dhaal.

Kavach hai Aapke naam ka
Meri atma aur mere tann mann par
Jaanti hoon ki koi pratikool paristhiti bhi
Nahin chodegi mujh par koi bura asar.

Har baar kee tareh keejiyega mujh par taras
Dikhe ya nahin, Aapki mehar toh rahi hai baras
Yoon bakhshiye antas kee aankhon ko, ki Ve dekh paayein Aapko bheetar kee gehraayee mein
Yoon bakhshiye bhakti ko, ki veh nikhar jaaye Aapki guruyaayee kee vaddi vadiyaayee mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Mein Aa Rahe Hain Kuch Khayaal (06/05/2023)

June 4, 2023

Om Namaha Shivaya
Aaj Ka Suvichaar 🙏🏻🙏🏻

#1932

   Shukrana Kee Shehnaayee Mein

Pyaare Guruji Maharaj,

Vikaaron mein mann aise jhoola hai
Ki veh apna raasta bhoola hai
Sikha deejiye mann ko samet paane ka hunar
Taaki veh pravesh kar paaye bhakti ke dwaar ke bheetar.

Guruvar pyaare, jabb se Aapne Apne charan mein dee hai mujhe sharan
Tabb se itna badal sa gaya hai jeevan
Ye nahin ki mushkilein huin hai kumm
Lekin antas par asar karne laga hai abb Aapka spandan.

Badal gaya hai nazariya
Badh gaya hai chaav manan aur chintan ka
Jabb jabb Aap mauka dete Hain simran ka
Tabb tabb shodhan ho paata hai mann ka.

Agar mere mann ko hoti hai pareshaani
Toh swayam par hoti hai hairaani
Lagta hai mann kar raha hai bahut naadaani
Usne Aapki rehmat kee kadar na hai jaani.

Aapki karuna se mann ko miley raasta aur disha
Aapki kripa se mann kee khiley dasha
Aapki agya mein rahoon har ghadi
Meri aukat kuch nahin, Aapki rehmat sabse badi.

Zamaana dhaaye beshak jaise bhi sitam
Mai na karoon maade karam
Na bhooloon ki imtehaan hai ye jeevan
Na bhooloon ki asthaayi hai khushi aur gumm.

Bahuton se achche hain haalaat mere, mai rakhoon is satya ko yaad
Vyarth kee maangon se na ganvaaoon apni fariyaad
Aapki rehmat ke ras mein yoon jaaoon mai ramm
Ki shukrana kee shehnaayee mein gum jaaye mera har gumm.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shukrana Kee Shehnaayee Mein (06/04/2023)

June 3, 2023

Om Namaha Shivaya
Aaj Ka Suvichaar 🙏🏻🙏🏻

#1931

                   Paani Re Paani

Paani re paani
Koi na jaane teri poori kahaani
Gazab kee hai teri zindagaani
Teri mahima hai mastaani.

Chaahe tu nadiya mein bahe
Chaahe tu tufaan sahe
Chaahe tu saagar kee leheron mein samaaye
Ya phir oas kee boondon mein muskuraaye….

Teri shanti mein hai kanti
Aur teri kanti mein hai shanti
Kaheen kaheen tera shor
Aur teri chuppi kaheen aur…..

Har paristhiti mein
Tu ho jis bhi sthiti mein
Vaashp (vapor) ho ya ho avastha taral
Barf ho ya ho baarish saral….

Tera astitva hai amar
Vasant ho ya ho patjhad.

Tu hai har praani ke shareer mein
Tu aksar hota hai chitrakaar kee tasveer mein
Tera badalta roop aur rangg karta hai dangg
Tujh par nirbhar hai jo bhi hai tere angg sangg.

Tu de sakta hai jeevan daan
Tera saamarthya hai itna mahaan
Guruji ke ashirwaad se tu bann jaaye amrit
Tujh mein basey uss ashish se sangat ka ho hitt
Teri har boond bann jaaye aur bhi anmol
Kitnon kee kismat ke bandd taale tu de khol.

Guruji ne bakhshi tujhe sewa itnee pyaari hai
Pehle se hee jo teri mahima thi itnee, veh Guruji ne aur bhi sanvaari hai
Guruji ke darbar mein hota hai jo tera aadar satkaar
Ye bhi Guruji kee hee karuna aur kripa hai aparampaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Paani Re Paani (06/03/2023)

June 2, 2023

Om Namaha Shivaya
Aaj Ka Suvichaar 🙏🏻🙏🏻

#1930

                Maya Jabb Ghere

Guru kripa bin maya jabb ghere
Badh jaayein bheetar ke ghor andhere
Is maya ne ghera hai sansaar ko
Lekin ye na jeet paaye Guru aur Parwardigaar ko.

Mahadev kee shakti hai maya
Jisne sabhi ko hai nachaaya
Jo bhi iske vash mein hai aaya
Usko ghaayal kar gaya maya ka saaya.

Guruji Hain Shivji ke avatar aur mayapati
Unkee kripa pradaan karti hai sumati
Maya ke vash mein na aane kee
Atmabal aur manobal badhaane kee.

Guruji ke tareeke adbhut hain
Unke ashirwaad achyut hain
Beshak Ve lete Hain kathin se kathin imtehaan
Kintu uss dauran bhi bhakt ka karte Hain poora dhyan.

Kaal ke baan se ghaayal hain hum sab praani
Kyun na Guruji kee pyaar bhari bhakti se sanvaar lein zindagaani
Maya toh bunti rahegi apna jaal
Hum phanste rahe toh bura ho jaayega haal.

Virlon ko milta hai Guru charnon mein sweekaare jaane ka sukh
Guruji mann mastishk ka poshan karein taaki bhakton ko na ho koi dukh
Na jaane kaunsi saans ho aakhiri
Jeete jee Guruji ke charnon mein lagaa lein haaziri.

Guruji kee hoti rahe mehar
Ghaatak na ho maya ka zehar
Guruji ke naam ke amrit se veh ho jaaye shaktiheen
Guruji toh MahaShiv Hain, sada Apne bhakton ke adheen.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Maya Jabb Ghere (06/02/2023)

June 1, 2023

Om Namaha Shivaya
Aaj Ka Suvichaar 🙏🏻🙏🏻

#1929

   Kadam Kadam Tu Chalta Chal

Kadam kadam tu chalta chal
Kisee na kisee kadam par zaroor milega hal
Har mushkil ka
Har duvidha ka.

Guruji Hain tere sangg
Chhaaye hain bhakti ke rangg
Sudhar rahe hain tere dhangg
Tere mann mein hai umang.

Is umang ko rakhte huey barkaraar
Tu karta chal Guruji se apne pyaar ka izhaar
Aisa safar tu nahin kar raha hai pehli baar
Tujhe yaad nahin, lekin sab yaad rakhte Hain Guru sarkar.

Tere har janam ke har karam ka Guruji ko hai pataa
Tu beshak Unhe na bataa
Teri har duvidha aur mushkil kee hai Unhe khabar
Unkee mehar se hee beet raha hai tera safar.

Rakh tu shraddha aur sabr
Karta chal Unka shukr
Kathin waqt bhi jaayega guzar
Nahin rukta koi pal ya peher.

Unhe hai teri har duvidha kee pehchaan
Ve teri har mushkil ko kar rahe Hain aasaan
Ve teri har samasya ka karenge samaadhaan
Tu jaanta hai ki Ve Hain karunanidhaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kadam Kadam Tu Chalta Chal (06/01/2023)