Month: July 2023

July 21, 2023

Om Namaha Shivaya
Aaj Ka Suvichaar 🙏🏻🙏🏻

#1979

             O Vatika Vandan Kee

O vatika vandan kee
Ye nahin hai sugandh chandan kee
Na hee khushbudaar gulab kee
Balki in sabse bhi lajawaab kee.

O vatika vandan kee
Ye sugandh hai Guruji ke spandan kee
Ismein oorja hai chitt ke manthan kee
Ismein shakti hai karvaane chintan kee.

Is sugandh mein hai Guruji kee leela aabaad
Is sugandh mein basaa hai Unka ashirwaad
O vatika, jo bhi praani aayega tere parisar mein
Ye sugandh usey karegi harshit aur basegi uske mann mandir mein.

Guruji kee inaayat miltee hai ismein
Guruji kee ruhaaniyat khiltee hai ismein
Ye kewal sugandh nahin, ismein toh Guruji kee divyata samaayi hai
O vatika, tu dhanya hai ki tere aanchal mein ye aayi hai.

Guruji tujh par huey Hain meharbaan
Diya hai tujhe is ruhaani sugandh ka daan
Lekin kabhi ye sugandh na bhi aaye, toh tu na hona pareshaan
Kyunki Guruji jisey bhi de dete Hain Apne charnon mein sthaan,
Ve sada karte Hain uspar nadar
Ve sada barsaate Hain uspar Apni mehar.

Is sugandh mein basey anugraha ka jabb jabb ho tujhe ehsaas
Toh vinamr hoti jaana, na karne dena ahankar ko apne bheetar vaas
Vinamrata se tujh par aisa chadhega Guruji ka noor
Ki tu ho jaayegi har anuchit sanskaar se duur.

Tere hriday mein shraddha ke suman khilenge
Jinhe titaliyan aur bhanvare aakar milenge
Teri oar aakarshit hongei matvaale moar
Divya sugandh phailegi tujhmein har oar.

O vatika, apni sakaaraatmak soch ko tu rakhna aabaad
Guruji ke prati sada rakhna shraddha bhaav se saje apne jazbaat
O vatika, na bhoolna karna Guruji ka dhanyawaad
Jinhonei diya hai aur dete rahenge tujhe Apna ashirwaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

O Vatika Vandan Kee (07/21/2023)

July 20, 2023

Om Namaha Shivaya
Aaj Ka Suvichaar 🙏🏻🙏🏻

#1978

                 Raahi Ka Jeevan

Karoon kya
Jaaoon kahaan
Niraasha dikhti hai
Jaaoon jahaan
Baahar maya
Bheetar avidya
Andhera yahaan
Andhera vahaan.

Khud ko aisa baar baar kaha
Jaise jaise raahi thaa chal raha
Yakeenan usne kaafi kuch thaa saha
Dheeraj toota, toh yoon bhaav baha.

Beet chuke thei saal kayi
Ummeed nahin dikh rahi thi nayi
Maatha tek kar dar dar
Thakk gaya thaa maano uska sir.

Chalte chalte lagi usey pyaas
Ek chhoti si jheel thi paas
Vahaan paani peene ke liye baitha aur jhuka
Paani mein apne peechhe kisee ka pratibimb dekh kar ruka.

Uske peechhe ek sadhu khade thei
Dikhne mein raahi se bade thei
Sundar si muskaan aur maathe par tej sunehra
Maano jaise pehna ho ruhaaniyat ka noorani sehra.

Sadhu ne apne kamandalu se raahi ko amrit pilaaya
Raahi ko amrit peekar ek anokha anand aaya
Sadhu ne kaha, hoga sab achcha
Mera aisa kehna hai sachcha.

Raahi ne dekhi sadhu kee aankhon kee gehraayee
Usey sadhu kee baat mein lagi sachchaayee
Raahi ne sadhu ko kiya pranaam
Aur sir jhuka kar poocha unka naam.

Sadhu ne kaha, ‘Mujhe Guruji kehte hain sab.’
‘Mai hoon apni sangat ke liye Rabb.’
Aisa sunn kar raahi ne sir uthaaya
Aur uss pal veh aashcharya se ghabraaya
Kyunki sadhu thaa hee nahin vahaan
Ek kshan pehle veh khada thaa jahaan.

Raahi ko lagaa ki usne sapna dekha
Lekin phir usne mitti mein dekhi amrit kee rekha
Usey ho gaya poora vishwaas
Ki Guruji aaye thei uske paas.

Uska roam roam harshaaya
Usne shukrana ka geet gaaya
Jaan gaya ki veh amrit thaa Guruji ka diya prasad
Maan gaya ki Guruji ne diya usey ashirwaad.

Uske bheetar jali ek ujjwal jyoti
Usey har pareshaani lagne lagi chhoti
Guruji ke ashirwaad se veh gaya tarr
Chod diya usne bhatakna dar dar.

Guruji kee kripa se usey mila achchi sangat ka saath
Abb toh veh Guruji mein magn rehne lagaa din raat
Apna kaam kaaj aur farz nibhaata chala raat din
Kuch bhi na karta thaa Guruji ka naam liye bin.

Raahi ka jeevan hua suhaana
Mila usey Guruji ne naam ka khazaana
Guruji ke darshan se mila usey aajeevan sukh
Agyan anjaan raahi se veh bann gaya Gurumukh.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Raahi Ka Jeevan (07/20/2023)

July 19, 2023

Om Namaha Shivaya
Aaj Ka Suvichaar 🙏🏻🙏🏻

#1977

Guruji Kee Sharan Kabhi Bhi Na Chhootey

Chaahe zindagi teri ho ya meri
Ho badi ya chhoti,banti toot-ti rahegi mushkilon kee dheri
Kya karein, pichhle janmon ke karmon kee herapheri
Laati hai bhavishya mein bhaagya mein andheri.

Lekin koi laabh nahin chinta karne se
Koi faayda nahin niyati se darne se
Haan, chintan awashya aayega kaam
Isliye zaroori hai japna Guru Govind ka naam.

Sabse uttam jo jap lo mann hee mann
Taaki gupt roop mein chale paath aur simran
Lekin na ho sakey, toh kar lo upaanshu ya vaachak japp
Jaisa bhi kar paao jabb jabb.

Guruji toh le jaate Hain har vehem se duur
Taaki kabhi bhi kaheen bhi japp paayein hum Unka naam
Buss, japp par sajaa ho hamaare bhaav ka noor
Aur antas mein basaa ho Guruji ka divya dham.

Guruji ka chintan aur simran
Karta rahega bheetar ka pavitrikaran
Adhiktar mushkilon ka hoga haran
Atyant sukhdaayee hai Guruji kee sharan.

Mushkilon kee dheri ke toot-ne se pehle
Mumkin hai ki aayein kayi tufaan
Jo hain is safar mein hamaari shraddha ke imtehaan
Jinke dwaara Guruji karte hain hamaara kalyaan.

Zaroori hai rakhni swayam par nazar
Shukrana ki Guruji kee hai hum par nadar
Karte huey Unkee mehar aur daya kee kadar
Jaagrit hokar guzaar paayein hum ye safar.

Mushkilon kee dheri beshak baney ya tootey
Dheri ka bhaar hamaara vishwaas na lootey
Guru hamaara kabhi na humse roothey
Guruji kee sharan kabhi bhi na chhootey.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Sharan Kabhi Bhi Na Chhootey (07/19/2023)

July 18, 2023

Om Namaha Shivaya
Aaj Ka Suvichaar 🙏🏻🙏🏻

#1976

                 Mahasaagar

Mahadweepon ke beech mahasaagar
Mahasaagar mein neer kee boondein
Boond boond se banaa jalaashay
Is satya mein na hai koi sanshay.

Guruji ke ashish ka mahasaagar
Unke pyaar ke amrit kee boondon se hai banaa
Unka sneh, Unka dulaar, deta hai
Anginat bhakton ko panaah.

Unke pyaar bhare amrit kee har boond hai anmol
Uska rakhna maan
Kismat waalon ko hoti hai ye naseeb
Hai ye Guruji ka diya daan.

Guruji ke pyaar ke amrit kee har boond se
Tumhaara jeevan hoga sampann
Tumhaara kalyaan isee mein hai
Ki tum Guruji ko karo prasann.

Japo Unka naam shraddha aur pyaar se
Itnee aasakti na badhaao sansaar se
Ki Guru mein basey Prabhu ke chintan ke bajaaye
Honei lagey tumhe sansaar ka chintan
Kyunki yahee aasakti aur chintan banega tumhaare liye bandhan.

Bandhan, jo rokega tumhe
Adhyaatmik raaste par badhne se
Jo tumhe peechhe kheenchega
Ruhaani oonchaayee par chadhne se.

Isliye na bano tum naadaan
Karo amrit kee har boond ka sammaan
Yaad rakhte chalo ki tum ho kitne bhaagyawaan
Guruji kee kripa se hoga tumhaara kalyaan
Na dooboge, na ghabraaoge, na lagega tumhe darr
Amrit kee boondon ke mahasaagar mein tayyr kar jaaoge tum tarr.

Har ichchuk ko hoti hai is amrit kee pyaas
Har bhakt ko hoti hai Guru prem kee aas
Tum khushnaseeb ho, na hona tum udaas
Tumhaara toh amrit ke mahasaagar mein hai vaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mahasaagar (07/18/2023)

July 17, 2023

Om Namaha Shivaya
Aaj Ka Suvichaar 🙏🏻🙏🏻

#1975

Charam Seema Ka Gantavya

Ye safar hai is janam ka
Koi mukaam khushi ka toh koi gumm ka
Kaheen kissa zindagi ka toh kaheen maran ka
Kaheen bhayy vann ka toh kaheen saundarya chaman ka.

Ye safar hai hamaare karam ka
Pichhle janam aur is janam ka
Pichhle janmon ke karmon ka bhugtaan
Aur is janam ke karam kriyamaan.

Praarabdh karam ke phal se bachna hai namumkin
Baaki sanchit karma beshak bhugatne hongei kisee aur din
Ye toh Guruji kee sharan mein hain toh aasaan hua hai safar
Kyunki Ve swayam par le lete Hain hamaare karam adhiktar.

Ye safar hai hamaare dharam ka bhi
Hindu muslim sikh isaai wala nahin
Balki hamaare kartavya nibhaane kee nipunta ka
Aur hamaari neki aur neeyat ke gunn ka.

Kaisa parinaam laata hai hamaara prayaas
Uss se zyada mahatva rakhti hai hamaari shraddha aur neeyat
Kaise abhinay karte hain hum duniya waalon ke samaksh
Uss se zyada mahatva rakhti hai hamaari asal shakhsiyat.

Aur sabse mukhya baat toh ye hai
Ki Guruji jaante Hain saari sachchaayee
Hamaare safar ke har pehlu ka
Kalyaan karti hai Unkee vadiyaayee.

Guruji kee mehar se safal ho sabhi ka safar
Janam, karam, aur dharam- har pehlu par ho Unke ashish ka asar
Guruji kee sharan toh hai charam seema ka gantavya
Kisee aur sahaare ka nahin hai is se adhik mahatva.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Charam Seema Ka Gantavya (07/17/2023)

July 16, 2023

Om Namaha Shivaya
Aaj Ka Suvichaar 🙏🏻🙏🏻

#1974

Guruji Se Juda Hoga Har Jann Jabb Jabb

Anginat jann hain Guruji kee sharan mein
Bahut fark hai sabke janam maran aur karam mein
Sabhi Guruji se judein hain lekin bhinn bhinn hai unke jeene ka tareeka
Guruji kee mehar se hum sabhi seekh jaayein Guruji ka mann pasand saleeqa.

Kuch jann koshish karte karte jaate hain thak
Kuch koshish karte karte jaate hain bhatak
Kuch karte hain shikaayatein athak
Kuch koshish karte rehte hain karte huey Guruji ka shukrana.

Kuch koste hain kismat ko
Kuch chunte hain khidamat ko
Kuch jutaate hain himmat ko
Karte huey Guruji ka shukrana.

Kuch baithte hain haath par haath dhar ke
Kuch dhakke khaate hain dar dar ke
Kuch satsang mein baith jaate hain Gurughar ke
Karte huey Guruji ka shukrana.

Kuch dete hain baahar waalon ko dosh
Kuch ko bheetar jhaank kar aata hai hosh
Kuch jaagte hain apne antas ko khoj
Karte huey Guruji ka shukrana.

Kuch sochna chod dete hain
Kuch nakaaraatmak soch ka sahaara lete hain
Kuch sakaaraatmak soch se kaam karte hain
Karte huey Guruji ka shukrana.

Jaisa Guruji chaahein, vaise bann jaayein hum sabb
Guruji ke agyakaari bachche kehlaayenge hum tabb
Guruji mein hain hamaare Guru, nath, meet, aur Rabb
Yakeenan hua hoga ye ehsaas, Guruji se juda hoga har jann jabb jabb.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Se Juda Hoga Har Jann Jabb Jabb (07/16/2023)

July 15, 2023

Om Namaha Shivaya
Aaj Ka Suvichaar 🙏🏻🙏🏻

#1973

Befikr Sa Thaa Veh Musaafir Mastaana

Befikr sa thaa veh musaafir mastaana
Usey ek sa lagta thaa mela aur viraana
Guruji kee dhun mein jeeta thaa
Guru naam ka amrit peeta thaa.

Musaafir ke mann hee mann mein chalta rehta thaa simran
Antas ke bheetar karta rehta thaa veh Guruji kee divyata ka chintan
Uske bheetar yoon roshan thaa Guruji ka nirmal prataapi noor
Ki usey ek pal ke liye bhi nahin lagta thaa ki Guruji Hain uss se duur.

Guruji ke dikhaaye raaste par chalta thaa veh sada
Guruji ko rijhaati thi uskee yeh ada
Uske vichaaron mein thi shuddhi
Aur bahut unnat thi uskee buddhi.

Kuch maangta nahin thaa Guruji se
Buss karta thaa apna kaam
Kuch bhi karne lagta thaa usey pareshaan
Toh le leta thaa Guruji ka naam.

Na mukti ke liye thaa tarasta
Na swarg kee chaahat mein thaa tadapta
Santusht thaa Guruji kee sharan mein
Khush thaa ki Ve angg sangg Hain har kshan mein.

Uske mann mein thi kaamna
Ki jab bhi ho uska mrityu se saamna
Toh usey lene aayein Guruji swayam
Aur Unkee goad mein ho uska maran.

Uspar ruhaaniyat ka rangg thaa bahut gehra
Sajaa thaa uske sir par sabr aur samarpan ka sehra
Khila hua thaa uska manobal aur atma-vishwaas
Sakaaratmakta se mehekta thaa uska har shwaas.

Veh nahin thaa koi badi hasti
Lekin aisee thi uskee alaukik masti
Ki jahaan se jaata thaa guzar
Vahaan ke logon par hota thaa uske spandan ka asar.

Loag uskee oar hotey thei aakarshit
Kayion ke anandit ho jaate thei chitt
Jabb veh bhakti ke geet sunaate huey ghoomta thaa
Toh har sunn-ne wala magn hokar jhoomta thaa.

Aane jaane waalon kee karta thaa madad veh musaafir
Ek jageh nahin rehta thaa tann lekin mann uska thaa sthir
Bin lobh laalach ke jeeta thaa har din
Na jaagta na sota thaa Guruji ka shukrana kiye bin.

Simran mein baithe baithe ek raat
Honei lagi uskee Guruji se baat
Chala gaya gehre dhyan mein aur lagg gayi uskee samaadhi
Subah nahin hui thi, balki raat bachi thi aadhi.

Guruji swayam aaye uske paas aur usey goad mein liya
Musaafir ne aakhiri saans lee aur atma mein jalaa divya milan ka diya
Bin kisee kasht ke musaafir ne tyaag diya shareer ko
Uskee atma ne shukrana kaha Guruji ko aur apni taqdeer ko.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Befikr Sa Thaa Veh Musaafir Mastaana (07/15/2023)

July 14, 2023

Om Namaha Shivaya
Aaj Ka Suvichaar 🙏🏻🙏🏻

#1972

          Mann Kabhi Na Bhooley

Guruji kahein banda bann
Ye jaane kintu ye maane na ye mann
Lekin mann jabb takk hai manda
Tabb takk kaise baney koi banda?

Guruji, kripa kar Aap karein aisee rehmat
Ki mann mein aaye aisee sumat
Ki veh chod de vyarth kee hath
Aur tyaag de har anisht aadat.

Mann kartavya nibhaane ka dharma rakhey yaad
Chod de aalasya aur pramaad
Seekhey das bankar rehna
Seekhey kasht ko sehna.

Na bhatke, na dagamagaaye
Na galat raaste par jaaye
Shant rehna seekh jaaye
Aapki rehmat se sthirta paaye.

Tyaag de mann apna har vikaar
Basaa le swayam mein sabke prati pyaar
Karey Aapse bhakti ka vinamr izhaar
Toh yakeenan aayegi mann mein ruhaaniyat kee bahaar.

Aapki kripa se miltee rahe bakhshish simran kee
Taaki jaari rahe pavitrikaran kee vidhi mann kee
Sanvarti jaaye dasha aur disha jeevan kee
Badhauti ho antas mein adhyaatmik dhan kee.

Shuddhi se sajte rahein mann ke vichaar
Na karein ve apni ya doojon kee atma par vaar
Mann thaame ekaagrata kee patvaar
Mann se Aapke liye dhanyawaad nikle baar baar.

Safal ho jaaye mann ke uddhaar kee tarkeeb
Mann hota jaaye banda bann-ne ke uddeshya ke kareeb
Nikhar jaaye mann aur atma ka naseeb
Mann na rahe charitra ke dhan mein gareeb.

Mann baney apna aur doojon ka madadgaar
Mann karta rahe bakhshish ke liye Aapse pukaar
Mann mein sada basaa rahe Aapke mandir ka noorani darbar
Mann kabhi bhi na bhooley karna Aapki har kripa ka ikraar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Kabhi Na Bhooley (07/14/2023)

July 13, 2023

Om Namaha Shivaya
Aaj Ka Suvichaar 🙏🏻🙏🏻

#1971

           Ye Intazaar

Guruji, Aap Hain bakhshanhaar
Meetha banaa deejiye ye intazaar
Jismein Aap katvaa rahe Hain karam
Taaki uss dauran na sataaye gumm.

Kya karoon, nimaani hoon, hoon naadaan
Agyani hoon, hoon anjaan
Karte rahiye dheeraj kee aisee bauchaar
Ki saboori se beete ye intazaar
Jismein Aap rahe Hain taar
Taaki sehejta se chalta rahe ghar parivaar.

Aapki mehar hai
Ki Aap kar rahe Hain mann ke bartan ko saaf
Aapki mahaanta ke liye shabd kumm hain
Ki Aap kar dete Hain maaf
Unn sab galatiyon ke liye bhi
Jo humne pichhle janam mein kee
Aapki karuna ka kavach pehne huey beete ye intazaar
Taaki Aap mann ka bartan saaf kar bhar dein usmein Apna anugraha bhara pyaar.

Karaate rahiye aisa simran, aisee dhaarana, aisa dhyan
Dete rahiye aisee subuddhi aur gyan
Jaisa Aap chaahein
Yoon roshan keejiye hamaari raahein
Ki noorani rahe ye intazaar
Aur duur ho bheetar ka andhkaar.

Kabhi na hataayiyega hum par se Apni nadar
Sumat deejiyega taaki hamein sada rahe Aapki guruyaayee kee kadar
Aapki daya se nirmalta aur neevenpann se yoon sajey ye intazaar
Ki dhul jaaye antas kee mayll aur mitt jaaye hamaara ahankar.

Beshak is jeevan mein antt na ho janam maran ka
Guzaarish hai ki har janam mein deejiye sukh Apni sharan ka
Nikhaarte rahiye bhakti
Bakhshiye mukti kee yukti
Taaki atma ka ho Aap Paramatama se deedar
Aur safar ke har pehlu mein milta rahe Aapka pyaar
Apni inaayat se safal keejiye ye intazaar
Apne mein hee samaa leejiyega, param poojya Parwardigaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Intazaar (07/13/2023)

July 12, 2023

Om Namaha Shivaya
Aaj Ka Suvichaar 🙏🏻🙏🏻

#1970

Is Varsh Ka Saawan Maas

Chal raha hai is varsh ka saawan
Is maas ka har din maana jaata hai paawan
Chaar July ko hua ye shuru
Ikattees August ko hoga sampann
Hoti hai Shivji kee pooja archana vishesh
Jis se mitt jaate hain bhakton ke kasht klesh.

Is varsh ke saawan mein hain do maah
Guruji ke ashish se milee hai jo Shiv Shakti kee raah
Uspar shraddha aur prem bhaav se hum chalein
Taaki teenon prakaar ke taap talein.

Saawan mein is varsh jo adhik maas hai aaya
Purushottam maas veh hai kehlaaya
Vishnu ji kee pooja ka hai mahatva is adhik maas mein
Tridev ka hee sahaara hai anand mein aur traas mein.

Guruji Maharaj Hain Shiv avatari
Unkee sharan mein sabko miltee hai baari
Unka ashirwaad paane kee
Unkee mahima gungunaane kee.

Saawan kee pooja ka jo karey vidhi vidhaan
Maanyata hai ki uska hota hai kalyaan
Guruji Hain Maha Shiv mahaan
Ve bhakt ke bhaav se uskee bhakti kee gehraayee jaayein jaan.

Saawan ke maheene mein Shiv Puran padhne sunn-ne se miley khaas ashirwaad
Guruji ka gupt paath, gupt sewa, gupt daan ka vachan hamein rahe yaad
Vaise toh Guruji ko samarpit ho hamaara har shwaas
Lekin phir bhi reeti ke anusaar Saawan ka maas hai khaas.

Sabhi Shiv bhakton ko Saawan maas ke do maah kee shubhkaamnaayein
Guruji Maharaj Apni kripa se sabhi ke jeevan kee naiya paar karaayein
Unkee mehar se tal jaayein sabki balaayein
Aur sabhi Unkee bakhshish kee baarish mein bheeg jaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Is Varsh Ka Saawan Maas (07/12/2023)