Month: August 2023

August 31, 2023

Om Namaha Shivaya
Aaj Ka Suvichaar 🙏🏻🙏🏻

#2020

         Nagar Ka Ek Niwaasi Thaa

Nagar ka ek niwaasi thaa
Anya kayi niwaasiyon jaisa
Masroof rehta thaa kaarobaar mein
Vyast rehta thaa ghar parivaar mein.

Thaa safal, thaa honhaar
Nek thei uske vichaar
Phir bhi usey mehsoos honei lagi koi kamee
Ye baat uskee chinta ka kaaran banee.

Padh likh ke veh na seekh paaya vo
Jis vidya kee thee usey ichcha
Phir jaana usne ki vidya miltee hai apne bheetar
Jabb daya karte Hain Guruvar.

Karta rehta thaa pooja paath
Lekin mil nahin rahi thi maano usey rahnumaayee
Suna thaa Guru milte Hain kismat se
Aur Guru kee vaddi hoti hai vadiyaayee.

Kaise milenge Guru, usey na aa raha thaa samajh
Kahaan dhoondhe,kya karey, is duvidha mein raha thaa ulajh
Uske pichhle achche karmon ka mila usey parinaam
Guruji ne aakar liya uska haath thaam.

Utaar chadhaav toh aate rahe
Guruji usey raah dikhaate rahe
Veh Guruji ka simran aur chintan karta rehta Rakh kar mann mein poora vishwaas
Aur Guruji ke ashirwaad se
Uske bheetar vidya ka honei lagaa vaas.

Guruji mein rahnuma paakar sunehri hui uskee raahein
Guruji ne har pal pyaar se thaami uskee baahein
Jabb aaya kuch varsh pashchaat uska antim samaa
Tabb bhi Guruji ne usey Apne charnon mein dee panah.

Guruji ke dikhaaye raaste par veh pada thaa chal
Guruji kee kripa se utar chuka thaa uske mann ka mal
Guruji ke banaaye saanche mein veh poori tareh se gaya thaa dhal
Guruji kee kripa se uska jeena marna ho gaya safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nagar Ka Ek Niwaasi Thaa (08/31/2023)

August 30, 2023

Om Namaha Shivaya
Aaj Ka Suvichaar 🙏🏻🙏🏻

#2019

           Bandagi Ka Bandhan

Guruji ke sangg juda jabb se
Bandagi ka bandhan
Dil aabaad hua yoon tabb se
Maano utsaah se bhara upvan.

Na zaroorat kisee dhaage ya kisee doar kee
Na akeli lagi yaatra kisee sadak ya moad kee
Andhvishwaas aur vehem kee baadha mainey toad dee
Jabb se Guruji se preet mainey joad lee.

Yeh bandhan mere liye hai sarvashreshth vardaan
Is bandhan mein bandh kar milta rahega mujhe ek nayi azaadi ka daan
Guruji kar rahe Hain aur karte rahenge kalyaan
Unhonei is pavitra bandhan mein baandha hai, Ve Hain bahut meharbaan.

Ye bandhan hai raksha ka
Ye bandhan hai deeksha ka
Ye bandhan hai shiksha ka
Ye bandhan hai pareeksha ka.

Is bandhan kee shuddhi ko mera naman
Is bandhan kee nirmalta ko mera pranaam
Yeh bandhan hai sabse paawan aur pyaara
Yeh bandhan hai mera ekmaatra sahaara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bandagi Ka Bandhan (08/30/2023)

August 29, 2023

Om Namaha Shivaya
Aaj Ka Suvichaar 🙏🏻🙏🏻

#2018

     Guruji Ke Kookar

Maalik aur paalatu kookar ke rishte mein
Vishwaas aur samarpan kitna zaroori hai
Kookar ke paas aur koi vikalp bhi kahaan
Maalik ka hukm maan lena uskee majboori hai.

Kyunki kookar toh hai apne maalik par nirbhar
Uske liye aisa ghar hai apne maalik ka dar
Jahaan miltee hai usey suraksha aur sharan
Tabhi toh veh choomta hai maalik ke charan.

Hum bhi toh hain Guruji ke kookar
Guruji par hain hum poori tareh se nirbhar
Guruji na apnaate hamein, toh hum phirte idhar udhar
Bin sahaare hum bhatakte rehte dar dar.

Kookar hain toh wafa nibhaani hogi
Samarpan kee bhavna bhi laani hogi
Raazi rehna hoga jo ho Guruji kee raza
Chaahe aaye ya na aaye maza.

Deen bhaav se kar sakte hain hum ardaas
Hum kookar ke roop mein kinkar
Hamein Guru amrit kee hai pyaas
Hamaare liye hamaare Maalik Hain sabse khaas.

Hamaare Maalik Guruji, deen dayal Hain
Unhe sada hamaara khayaal hai
Na jaane hum kabhi bhi kaise chukaayenge Unke ehsaanon ka karz
Kumm se kumm itna toh kar lein
Ki nibha lein Unkee oar apna farz.

Guruji ko khush rakhein dekar bharpoor pyaar
Unka hukm maanein sir jhukaakar har baar
Shukrguzaar rahein ki Guruji ne khola hai hamaare liye apna dwaar
Guruji aur Unkee rehmat se awashya hoga hamaara uddhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Kookar (08/29/2023)

August 28, 2023

Om Namaha Shivaya
Aaj Ka Suvichaar 🙏🏻🙏🏻

#2017

             Safal Hogi Teri Udaan

Guruji kee shakti se
Tu aaj bhar raha hai udaan
Har pal Guruji tere angg sangg Hain
Kar rahe Hain tera kalyaan.

Udaan mein bilkul na haarna tu himmat
Na chodna tu karna ibadat
Oopar jaate huey bhi mann se jhuke rehna
Guruji karte rahenge tujh par inaayat.

Aasmaan aseem hai lekin tu bilkul matt ghabraana
Kyunki uss se bhi anant aur prataapi hai Guruji ka gharaana
Jahaan ka tu hai bachcha pyaara
Guru kee goad mein khelta dulaara.

Tujhe milee hai Shivroopi Guru ke ashirwaad kee poonji
Yaad rakh, teri manzil hai bhautik gyan praapti se bhi oonchi
Prerit kar rahi hai tujhe divyata kee vadiyaayee
Ki tu chhoo le ruhaaniyat kee oonchaayee
Taaki tujhe praapt ho sthool aur sookshma gyan
Aur divya anugraha se safal ho teri udaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Safal Hogi Teri Udaan (08/28/2023)

August 27, 2023

Om Namaha Shivaya
Aaj Ka Suvichaar 🙏🏻🙏🏻

#2016

   Guruji Kee Tasveer

Guruji kee photo nahin hai mehez ek tasveer
Vo toh hai Guruji ke divya anugraha se paripoorna ruhaani shareer
Uss tasveer mein Guruji nissandeh maujood rehte Hain
Bhakton kee sunte Hain aur bhakton se kehte Hain
Hum beshak Unhe chhoo na sakein tasveer mein
Lekin hamein praapt hota hai Unka sparsh aur ashirwaad
Aur Guruji daalte Hain hum par Apni mehar-e-nazar
Jo karti hai hamein agyan se azad.

Jabb se bhakt ko dekh leti hai Guruji kee tasveer
Tabb se toh badal hee jaati hai bhakt kee taqdeer
Sankat bhi bann jaata hai jeevan sudhaar ka mauka
Jeevan ka raasta bann jaata hai anokha.

Guruji saakshaat baste Hain Apni har tasveer mein
Tabhi toh tasveer le aati hai parivartan taqdeer mein
Na karo tasveer mein Guruji se kewal kashton ka bayaan
Unke samaksh karo Unkee mahima ka gungaan.

Kuch na bhi keh sako toh Unhe dekho prem satkaar se
Ve toh waakif Hain tumhaare har vichaar se
Agar kabhi tum itne pareshaan ho ki kar hee nahin sakte Unse baat
Toh bhi Ve Apni tasveer se tumhe har tareh kee sahaanubhooti kee denge daat.

Ve Guru Govind Hain, aur nath bhi
Ve agochar bhi Hain, aur saakshaat aur saath bhi
Ve daant bhi dete Hain, aur dete Hain mamta aur laad bhi
Ve imtehaan bhi lete Hain, aur dete Hain ashirwaad bhi.

Guruji se seedhi taar jod kar
Apne mann ko baaki sab se moad kar
Apne kar shraddha se jod kar
Unhee par sab kuch chod kar….

Apna pyaar dikhaao
Unhe dil kee har baat bataao
Unhe geet sunaao
Unhee mein kho jaao.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Tasveer (08/27/2023)

August 26, 2023

Om Namaha Shivaya
Aaj Ka Suvichaar 🙏🏻🙏🏻

#2015

       Apne Kadmon Kee Nishaani

Jitna prayatn aur jitna samay
Tum bitaata ho sanvaarne mein apna oopari roop rangg
Agar tum utna hee prayaas aur waqt lagaaoge bheetar ke shringar mein
Toh yakeenan sanvar jaayega jeevan ka dhangg.

Jabb bheetar chaayega ruhaani noor
Toh uskee chamak chehre par bhi chalkegi zaroor
Yeh manzil itnee bhi nahin hai duur
Ki tum is prayaas ko kar do namanzoor.

Balki is prayaas se mitegi Guru Govind se tumhaari duuri
Bheetar ka bal badhega toh badhegi ekaagrata aur saboori
Ahankar ko dene do is bheetari shringar ke liye manzoori
Taaki mann karey tumhaari ji huzoori.

Guruji ke simran aur dhyan se
Prakashit hota rahega tumhaara antakaran
Dhool udti jaayegi
Aur jyotirmay hota jaayega mann ka darpan
Tumhaare nek prayaas se
Har heen bhavna ka hota jaayega khandan
Antakaran ka spandan sugandhit ho jaayega
Jaise nirmal chandan.

Baahari shringar ho na ho, tumhaara chehra hoga noorani
Tumhaare kaheen aur bhi aane se vahaan ka vayumandal ho jaayega ruhaani
Tum mein aaye sakaaraatmak parivartan se sanvar jaayegi doojon kee bhi zindagaani
Tum yahaan se vida honei ke baad bhi jahaan mein chod jaaoge apne kadmon kee nishaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Apne Kadmon Kee Nishaani (08/26/2023)

August 25, 2023

Om Namaha Shivaya
Aaj Ka Suvichaar 🙏🏻🙏🏻

#2014

           Saraaye Hai Ye Jahaan

Saraaye hai ye jahaan
Sabhi musaafir hain yahaan
Kisee kee bhi ek si nahin hai daastaan
Koi lakshyaheen lagey, toh koi dhoondhe aasmaan.

Koi hai dono paristhitiyon ke beech
Kisee ka mann sona, kisee ke mann mein keech
Lekin sabki atma hai ansh Unhee Paramatama ka, jo Hain sabke paalanhaar
Is rishte ko dekhte huey toh poora sansaar hai ek hee parivaar.

Na sansaar hai avinaashi
Na hee hum musaafir hain amar
Kisee ko bhi nahin hai khabar
Ki kabb aur kaise khatm hoga ye safar.

Bahut zaroori hai Guru dwaara maargdarshan
Taaki har yug mein satyugi hee rahe jeevan
Kyunki nahin rukega karmon ka hisaab
Sabhi hain Guru Govind ke samaksh benakaab.

Aaj ya kal har musaafir is musaafir khane se hoga rukhsat
Aakhir kabb takk veh apne pichhle janmon ke karmon ka hisaab lega bhugat
Kaheen na kaheen, kabhi na kabhi hisaab chukta karna hoga zaroori
Varna baar baar ka janam maran bann ke reh jaayega ek kathor majboori.

Hamein milee hai Guruji kee mamta pyaari
Hamein toh tyaag deni chahiye fikr saari
Kintu hamein aksar hoti hai shanka aur ahankar kee beemari
Jis se kalankit ho jaati hai bhakti bhavna hamaari.

Kyun na is janam mein yoon nibhaayein har zimmedari
Ki is janam maran ke silsile se aagey badhne kee karein taiyyaari
Guruji kee mahima hai poorna kalyaankaari
Unke har bhakt ke kalyaan kee awashya aati hai baari.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Saraaye Hai Ye Jahaan (08/25/2023)

August 24, 2023

Om Namaha Shivaya
Aaj Ka Suvichaar 🙏🏻🙏🏻

#2013

        Tu Hoga Bhavsaagar Ke Paar

Jabb takk sunega matvaale swami mann kee
Tabb takk anjaane mein tayyaari kar raha hoga tu apne patan kee
Guru bhakti kee panah le
Aur mann ko das banaa le.

Guruji bakhshte Hain simran
Jiske dwara Ve karaate Hain pavitrikaran
Tere mann ka mal dhulne lagega is abhyaas se
Tera mann tere adheen hoga iske nirantar prayaas se.

Mann na bhi lagey simran mein
Toh bhi koshish karne kee koshish toh kar
Mann idhar udhar kee sochne ke liye majboor bhi karey
Toh tu mann ke aagraha se matt darr.

Dheere dheere vash mein honei lagega tera mann
Aur tera simran hota jaayega gehra
Tu apni neeyat nek rakh aur reh anushaasit
Guruji de rahe Hain teri raksha ke liye pehra.

Simran se Guruji tujhe dhyan kee oar le jaayenge
Jo Unka aur tera naata hai, Ve usey aur bhi ghanishth banaayenge
Shukrana ke saath saath karte rehna tu ardaas
Ki jaisa Ve chaahein, vaise badhta rahe tera ruhaani abhyaas.

Abhyaas karte karte tu ho jaayega dhyan mein nipun
Guruji kee bakhshish se hee milega yeh gunn
Kalyug mein kuch badla hua sa hai spandan
Aasaani se hota hai ekaagrata ka khandan
Lekin Guruji dekhenge teri shraddha, teri neeyat
Isliye tu deta chal buss Unkee raza ko ahemiyat.

Apni khushkismati ke liye tu Guruji ka shukr kar baar baar
Ki Unhonei tujhe dhyan aur gyan bakhsha Hai bulaakar Apne darbar
Tu Guruji ke naam kee naiya mein reh savaar
Unhee ke haath mein rehne de naiya kee patvaar
Jis manzil ke liye Guruji kar rahe Hain tujhe tayyaar
Vahaan pahunchkar tu hoga bhavsaagar ke paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tu Hoga Bhavsaagar Ke Paar (08/24/2023)

August 23, 2023

Om Namaha Shivaya
Aaj Ka Suvichaar 🙏🏻🙏🏻

#2012

                        Suprabhat

Duur kaheen parvat ke peechhe
Maano aasmaan ke neeche
Sooraj dhal gaya
Samay badal gaya.

Akash ka rangg hua gerua
Aayi thi saanjh kee bela
Raahi chalta raha akela
Peechhe chod kar duniya ka mela.

Tann se nahin, balki mann se
Kyunki usne seekha jeevan se
Ki asal safar toh hai bheetar ka
Aur asal manzil ka raasta vaheen se hai.

Gyan kee baatein sunta rehta thaa
Bahut pyaar se Guruji kee mahima gaata aur kehta thaa
Phir bhi uska vikaas ruka rehta thaa
Kyunki mann mein aasakti ka jharna jo behta thaa.

Uss shaam jabb baitha veh simran mein
Apni mrityu ka drishya dikha usey mann mein
Aur yakayak uske kayi pichhle janmon ka chalchitra chal pada
Veh achambhe ke saath uth kar ho gaya khada.

Har janam ke baad thaa maran
Kewal uska nahin, sabhi ka hee
Aisa nahin ki veh thaa is niyam se anjaan
Lekin usey samajh aane lagaa aasakti ka nuksaan.

Mal, maya, aur vikaar hee hain paash
Sochne lagaa, inse chhoot jaaoon kaash
Bheetar aayi Guruji kee awaaz
Unka sanket thaa ki anaasakti hai paash se chhootne ka raaz.

Guruji kee vaani se hua satark
Sawaal nahin uthta thaa ki ho koi tark
Usne nishchay kiya ki veh karega apni oar se prayatn
Har rishte ko farz samajh kar nibhaane ka karega yatna.

Jis shaam ko mila usey Guruji se ye seedha paigaam
Usey lagaa ki ye hai abb uska imtehaan
Guruji ne sunn lee uskee ardaas
Aur badha diya uske simran, dhyan, aur sadhna ka abhyaas.

Dhulta rahi mal uske antakaran ka
Aasakti par honei lagaa niyantran
Ye nahin thaa aasaan
Aakhir thaa veh insaan.

Lekin usey thaa poora yakeen
Ki agar uska manobal kabhi hua ksheen
Toh Guruji uskee madad karenge zaroor
Kyunki Ve bheetar Hain, nahin hai uss se duur.

Usne sabse ummeed rakhni di chod
Usne vyarth ke jhamelon se muh liya moad
Dil tootne se bachaa anginat baar
Bayaan karta raha Guruji ko veh apna aabhaar.

Saanjh se hua savera
Sirf aasmaan mein nahin, balki uske mann mein
Aur jo mann mein hua savera
Toh veh suprabhat laaya uske jeevan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Suprabhat (08/23/2023)

August 22, 2023

Om Namaha Shivaya
Aaj Ka Suvichaar 🙏🏻🙏🏻

#2011

             Tera Aane Wala Kal

Bahut jee chuka tu behoshi kee haalat mein
Abb daal le hosh mein rehne kee aadat
Mann ne bahut bhatak liya idhar udhar
Abb mann se keh de ki veh kar le ibadat.

Ibadat ke liye zaroori hai daasya bhaav mann ka
Varna ibadat duniyavi hee reh jaayegi
Aur jo aisa hua toh
Tujhe shanti kaise mil paayegi?

Guruji se kar ardaas
Ki Ve jaagrit karein teri ruhaani pyaas
Tera daasya bhaav nikhar jaaye
Tu apna har farz nibhaaye….

Shanka se nahin, balki vishwaas se
Duvidha se nahin, balki azad shwaas se
Apne har shwaas ko kar simran se alankrit
Apna har kaarya Guruji ko kar arpit.

Guruji jaante Hain tera kathin ateet
Ve jaante Hain tujh par kya rahi thi beet
Arey, ek Ve hee toh Hain aise meet
Jo agochar hotey huey bhi nibhaate Hain sanatan saath kee reet.

Tujhe diya Unhonei itna pyaar
Diya hai pyaara ghar parivaar
Teri pratidin kee zarooraton ka rakha sada dhyan
Ve chaahte Hain vartmaan aur bhavishya mein tera kalyaan.

Apni goad mein tujhe baithakar
Karma katva rahe Hain Ve tere
Beshak tu pareshaan aur niraash thaa
Unhonei tujhe surakshit rakha hai shaam savere.

Jaisa bhi waqt aaye zindagi mein
Kuch na kuch toh sikhaata hai
Kaun apna hai kaun paraaya
Yeh bhi bhali bhanti samajh aa jaata hai.

Har anubhav se seekhte huey abb tu aagey badhta chal
Guruji ke ashirwaad se badhta rahega tera manobal
Unhee kee mehar se aur kasht aane se bhi pehle jaayenge tal
Teri nek neeyat, mehnat, ibadat se prasann hokar Guruji sanvaarenge tera aane wala kal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tera Aane Wala Kal (08/22/2023)