Pashu Se Insaan Bann-ne Ka Safar (08/01/2023)

August 1, 2023

Om Namaha Shivaya
Aaj Ka Suvichaar 🙏🏻🙏🏻

#1990

  Pashu Se Insaan Bann-ne Ka Safar

Koi bhed bhaav nahin Guruji ke darbar mein
Unkee sangat toh basti hai is poore sansaar mein
Jo bhi ho, ho vo jaisa bhi
Guruji ko toh har bhakt lagey pyaara hee.

Lekin zaroori hai ye satya rakhna yaad
Ki Unkee kripa bin Unke swaroop ko nahin ho sakte hum praapt
Iske liye pashu bhaav tyaagna toh hai yakeenan anivaarya
Chaahe hum karein koi bhi maansik ya shaareerik kaarya.

Pashu se insaan bann-ne ka hai ye safar
Yaad rakhein hum ki Guruji kee hum par hai nazar
Hum khushnaseeb hain ki Guruji kee baras rahi hai mehar
Kitna zaroori hai ki hum karein Unkee is mehar kee kadar.

Seekh jaayein karna apne vikaaron par niyantran
Na dein kisee nakaaraatmak vichaar ko nimantran
Karein Guruji aur Gurbani ka manan aur chintan
Pashuon ke vyavhaar ko tyaag kar bande jaayein bann.

Guruji mein sirf Guru nahin, balki hamaare Prabhu aur naath Hain
Ve toh meet aur maargdarshak bannkar bhi sada hamaare saath Hain
Ve hamein paashon se mukt karaane wale Pashupatinath Hain
Khushnaseeb hain ve bhakt jinhonei Guruji ke aadesh kiye atmasaat hain.

Pashu se jabb hum banenge insaan
Toh prasann hongei Guruvar meharbaan
Ye uddhaar hoga Unka diya daan
Jis se ho jaayega hamaara kalyaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Pashu Se Insaan Bann-ne Ka Safar (08/01/2023)