Month: October 2023

October 21, 2023

Om Namaha Shivaya
Aaj Ka Suvichaar 🙏🏻🙏🏻

#2071

Aapke Kadmon Ke Nishaan Par Chalte Chalte

Pyaare Guruji,

Sunte Hain Aap meri ankahi awaaz
Jaante Hain Aap mere pichhle janmon ke bhi raaz
Mera gaaya geet sweekarte Hain chaahe na aaye mujhe sur aur saaz
Kripa kar kabhi na hona mujh nacheez se naaraaz.

Kyunki Aap hee Hain mere rahnuma ruhaani
Aapke prem bin raasta kho degi meri zindagaani
Mai toh janam janam mein rehna chaahoon Aapki deewani
Aapke kamal charnon ke taley sharan paaye meri kismat kee kahaani.

Kyunki phir meri kismat kee kahaani paripoorna hogi kalyaan se
Meri kahaani ka har kissa juda hoga Aapke naam se
Har kathinaayi, har aaraam milega Aapke diye daan se
Toh koi shikaayat nahin hogi mujhe jahaan se.

Meri har kathinaayi mein basee hogi Aapki daya
Kyunki Aapne karmon ka bhaar awashya kumm hoga kiya
Bakhshish ke dhaage se Aapne mera mal bhara dupatta hai siya
Apni vadiyaayee se sada mujhe meri yogyata se zyaada hai diya.

Har din ehsaas hota jaata hai aur bhi gehra
Ki Aapne jo mujhe sweekaara, to mai hoon kitnee khushnaseeb
Har din tamanna badhti jaati hai
Ki hoti jaaoon Aapse aur bhi kareeb.

Mai toh sada vaari jaaoon Aapki Khudaayee par
Mai pal pal qurbaan hoti rahoon Aapki vadiyaayee par
Rehmat keejiyega aisee ki abb kabhi na chhoote Aapka dar
Aapke kadmon ke nishaan par chalte chalte guzar jaaye mera safar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Kadmon Ke Nishaan Par Chalte Chalte (10/21/2023)

October 20, 2023

Om Namaha Shivaya
Aaj Ka Suvichaar 🙏🏻🙏🏻

#2070

               Karmon Ka Kaafila

Jaise jaise har din ka sooraj dhalta rahega
Karmon ka kaafila aur samay ka silsila chalta rahega
Guruji ke ashirwaad se
Guruji ke kripa prasad se.

Jo hua so hua pichhle janmon mein
Parivartan nahin ho sakta tabb ke karmon mein
Guruji ne hai dekha
Unn karmon se banaa lekha
Ve hee Hain nyaayadheesh
Ve Hain param prataapi Ish.

Hui jo Unkee marzi
Toh lekha badal denge Ve bin kisee arzi
Aisa ho ya nahin, bahut badi tasalli hai magar
Ki Ve Apne oopar lenge unn karmon ka bhaar adhiktar.

Sooraj ke dhalte dhalte
Samay ke chalte chalte
Karmon ko hum sudhaar lein agar
Toh behtar ho jaayega aagey ka safar.

Beshak ho gayi hai der
Phir bhi abhi hai saver
Sudhaar laane ke liye
Uss paar jaane ke liye.

Guruji dekhenge jo neeyat nek
Toh maaf kar denge hamaare paap anek
Unkee nazar mein hai bhakt pratyek
Agochar Hain Ve swayam, kintu sab lete Hain dekh.

Neeyat hogi hamaari nirmal
Toh atma-sudhaar hoga saral
Jabb zamaana dega chunauti
Guruji karenge haunsle mein badhauti
Samay ke silsile se pareshaan na hoga antarmann
Karmon ka kaafila hoga jaise kamal ka suman.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Karmon Ka Kaafila (10/20/2023)

October 19, 2023

Om Namaha Shivaya
Aaj Ka Suvichaar 🙏🏻🙏🏻

#2069

               Tu Sanshay Na Kar

Jyot Guruji ke naam kee
Chitthi Unke paigaam kee
Manzil Unke dhaam kee
Hai vo tere bheetar
Tu sanshay na kar.

Unkee bakhshish se hota hai jo simran
Unkee nadar se judta hai jo mann
Unkee kripa se saaf hota hai jo darpan
Hai vo tere bheetar
Tu sanshay na kar.

Guruji se judi hai teri jo seedhi taar
Tera veh hissa jo pukaarta hai Unhe baar baar
Jahaan dhyan mein hota hai tera Unse deedar
Hai vo tere bheetar
Tu sanshay na kar.

Guruji kee tujhe dee hui prerna
Guruji dwaara daan kee gayi chetna
Guruji kee mamta bhari samvedana
Hai vo tere bheetar
Tu sanshay na kar.

Guruji ka tere liye prem aparampaar
Guruji ke liye tera bhaav bharaa pyaar
Is pavitra bandhan ka saar
Hai vo tere bheetar
Tu sanshay na kar.

Jis oorja se anugrahit ho raha hai tera angg angg
Jis gehraayee mein tujh par chadha hai Guruji ka rangg
Jis oonchaayee par tu ho jayega Guruji mein malang
Hai vo tere bheetar
Tu sanshay na kar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tu Sanshay Na Kar (10/19/2023)

October 18, 2023

Om Namaha Shivaya
Aaj Ka Suvichaar 🙏🏻🙏🏻

#2068

Meri Ruhaani Dastaan

Baahar hai baazaar
Maya banee hai sarkaar
Vichaaron ka hai vyaapaar
Shuddhi laata hai moh rahit pyaar.

Nirvichaar honei ka hai vichaar
Kintu mann mein bharein hain vikaar
Kaise jaaoon uss paar
Jahaan na ho vikaaron ka bhaar.

Guruji, bakhshiye shuddhi
Guruji, bakhshiye subuddhi
Aapki mehar se nikhar jaaye charitra
Aapki rehmat se antas ho jaaye pavitra.

Bakhshiye bhaav mein bholapan
Bakhshiye ravaiye mein neevanpann
Mann ka hota rahe pavitrikaran
Vikaaron par honei lagey niyantran.

Ek oar hoon Aapki mamta kee pyaasi
Dooji oar bann kar rehna chaahoon Aapki daasi
Ya bhikharin ya poojaarin banaa kar rakhiye Apni sharan mein
Jaise bhi rakhiye, buss rakhiye sada Apne charan mein.

Aapki sharan kee suraksha ka sukoon milta rahe
Aapki prerna ke prataap se har paap dhulta rahe
Beshak rahega jahaan mein maya ka saaya
Kintu meri raksha karti rahe Aapki kripa kee chhaaya.

Mujhe toh ho hee nahin sakta kabhi bhi anumaan
Aapki karuna ka, mere karunanidhaan
Mere liye toh Aap hee Hain Guru, Aap hee Hain Bhagwaan
Aapki mehar se hee safal hogi meri ruhaani dastaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Meri Ruhaani Dastaan (10/18/2023)

October 17, 2023

Om Namaha Shivaya
Aaj Ka Suvichaar 🙏🏻🙏🏻

#2067

          Meri Rooh Ko Chhoo Kar

Meri rooh ko chhoo kar
Guruji ke ashish ne meri peeda lee har
Guruji ne charnon mein jo baithaaya
Mera toh jeevan gaya sanvar.

Guruji ne bakhsha simran din aur raat
Toh mann bhi maan-ne lagaa meri baat
Jabb kabhi dikhta nahin koi mujhe apne saath
Toh bhi mehsoos hotey Hain Guruji Jinhonei thaama hota hai mera haath.

Guruji ne bakhsha satsang
Jeevan mein aayi nayi umang
Gehra honei lagaa mujh par Unka rangg
Guruji vahaan bhi hotey Hain angg sangg.

Guruji ne bakhshi hai ye zindagi
Guruji ne bakhshi hai bandagi
Unkee bakhshish bin ghar parivaar nahin
Unkee bakhshish bin mera toh sansaar nahin.

Har bakhshish ke liye Guruji ka shukrana beantt
Guruji ke hain mujh nacheez par upkaar anant
Guruji kee karuna aur mahima hai aparampaar
Har veh jann khushnaseeb hai, jisey Ve bulaate Hain Apne dwaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Meri Rooh Ko Chhoo Kar (10/17/2023)

October 16, 2023

Om Namaha Shivaya
Aaj Ka Suvichaar 🙏🏻🙏🏻

#2066

                    Shubh Mahoorat

Kaheen hai apnapan aur pyaar
Kaheen dhokha miley baar baar
Kaheen behte hain jharne dhan ke
Toh kaheen bahein aansoo kisee nirdhan ke.

Kaheen prakash hai gyan ka
Kaheen andhera agyan ka
Kaheen kaheen sukhi hai poora ghar parivaar
Kaheen chal rahe hain dukh ke teer hazaar.

Zameen bhi vahee
Vahee hai aasmaan
Jinke vajood se
Zinda hai har insaan
Phir bhi apne pichhle karmon ka chalta hai yahaan bhugtaan
Tabhi toh sabki taqdeer nahin hoti hai ek samaan.

Apni sangat ko taarne
Apne bhakton kee taqdeer sanvaarne
Guruji ne maanav roop mein liya janam
Aur aaj takk karte Hain sangat ke kashton ka haran.

Guruji anginat sangat ko bulaate Hain Apne dar par
Aur bhakton ke anekon kasht lekar swayam par
Unke karmon ka adhiktar bhaar lete Hain har
Jis se bhakton kee taqdeer jaati hai sanvar.

Kewal is janam kee hee taqdeer nahin
Balki bhavishya ke janmon kee bhi
Guruji kee kripa ka hota hai aisa shubh asar
Ki susadhya hota hai atma ka aagey ka safar.

Isliye Guruji par hee sab chodne mein hai bhalaayee
Aur saath saath karni hai Guruji ke naam kee kamaayee
Naam kee kamaayee hoti chale zyada se zyada
Karmon ka bhaar hota jaaye kumm se kumm
Toh Guruji kee mehar se sanvar jaayegi taqdeer
Aur asal mainey mein dhanwaan banenge hum.

Aur jo Guruji se Guruji ko maang liya
Toh aur kuch maangne kee hogi hee nahin zaroorat
Phir toh bin maange hee jholi bharegi kalyaan ke daan se
Aur jeevan ka har pal bann jaayega shubh mahoorat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shubh Mahoorat (10/16/2023)

October 15, 2023

Om Namaha Shivaya
Aaj Ka Suvichaar 🙏🏻🙏🏻

#2065

         Ruhaaniyat Ke Raaste Par

Ruhaaniyat ke raaste par
Gehraayee mein doob kar miltee hai oonchaayee
Aur uss oonchaayee par miltee hai jo tanhaayee
Vahaan bajti hai shuddhi kee veh shehnaayee….

Jis se antas ko praapt hota hai anand nirmal
Aur bheetar divya jyot hoti hai ujjwal
Jis se sada ke liye andhkaar jaata hai mit
Aur santosh anubhav karne mein magn rehta hai chitt.

Guruji kee guruyaayee kee vaddi hai vadiyaayee
Unke bhaav poorna simran se mil sakti hai ruhaaniyat kee veh gehraayee
Jismein doob kar praapt hoti hai tarr jaane kee sachchaayee
Aur tarte tarte bhakt paa leta hai veh oonchaayee……

Jahaan neevanpann yoon ho jata hai atmasaat
Ki bhakt Guruji ke charnon mein gira rehta hai din raat
Kyunki usey maalum hai chal jaata
Ki Unhee se hai uska asli naata.

Yahee naata hai jo aur unnati kee oar hai le jaata
Na ki laukik rishton ke bhautikvaad se neeche hai giraata
Guruji ka dikhaaya raasta aasakti se karey duur
Taaki bhakt vikaaron ke vash mein na ho majboor.

Aasakti se kumm hoti hai ruhaani shakti
Aasakti se baadhit hoti hai bhavna aur bhakti
Aasakti banti hai kaaran ashanti aur dukh ka
Aasakti se ruk jaata hai vikaas Gurumukh ka.

Isliye Guruji kee guruyaayee kee gehraayee mein doobne se na darr
Ve tujhe taar kar ruhaaniyat kee oonchaayee kee oar karenge agrasar
Teri atma har bandhan se ho jaayegi azaad
Tu jeevanmukt hokar karega Guruji ka dhanyawaad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ruhaaniyat Ke Raaste Par (10/15/2023)

October 14, 2023

Om Namaha Shivaya
Aaj Ka Suvichaar 🙏🏻🙏🏻

#2064

               Dhundh Aur Dhoop

Gagan mein baadal thei chhaaye
Ik dooje se maano baat kar rahe hon ki kaun pehle paani barsaaye
Sooraj chhipa thaa baadalon ke peechhe
Phir bhi dekh paa raha thaa neeche
Kintu din ke ujaale ke baavajood nahin thi koi dhoop
Maano prakriti ne liya ho dhundh ka roop.

Ye dekha toh mann mein aaya khayaal
Ki aisa hee toh hai maya ka jaal
Prakriti se hee dhundh, prakriti se hee maya
Jiska prabhaav poori srishti par hai chhaaya.

Maya khelti hai khel ajab aur anek
Maya ke aavaran mein lupt ho jaata hai vivek
Na kuch aata hai samajh, balki dimaag jaata hai ulajh
Kuch spasht nahin deta dikhaayee, mann karne lagta hai rusvaayee.

Anivaarya hai dekh paana maya kee dhundh ke uss paar
Varna mumkin nahin hai atma-sudhaar
Guruji kee kripa se hoga uddhaar
Ve hee kar sakte Hain paropkaar.

Unkee mehar se maya kee dhundh hogi duur
Unkee rehmat se chhaayega prakriti par Unka noor
Kyunki Guruji toh Purush Pradhaan ke roop Hain, ismein nahin shak
Aur Prakriti aur Purush sada se Hain ek dooje ke poorak.

Guruji pavitrikaran kar Apni karuna se kar denge maaf
Guruji kee kripa se dikhne lagega sab saaf saaf
Baadalon ka parda hatega
Gagan mein sooraj dikhega.

Maya kee dhundh ke bajaaye hogi
Param gyan kee sunehri dhoop
Guruji ke ashirwaad se nikhar jaayega Bheetar aur baahar ke ruhaani paryaavaran ka roop.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhundh Aur Dhoop (10/14/2023)

October 13, 2023

Om Namaha Shivaya
Aaj Ka Suvichaar 🙏🏻🙏🏻

#2063

Aapki Sharan Mein Hai Mera Jahaan

Param poojya Guruji,

Aapne sweekaara mujhe Apni sharan mein
Toh jeevan ke safar ne liya anokha moad
Aapki anant mehar hai, mere daata
Ki meri rooh khichee gayi Aapki oar.

Abb khokhli lagti hain adhiktar khwaahishein
Jo pehle hoti thiin itnee prabal
Abb jo kashish hai, usey lafzon mein na kar paaoon mai bayaan
Kintu mai jaanti hoon, ki Aapko hai uss kashish ka poorna gyan.

Balki ye kashish bhi hai Aapki kripa ka parinaam
Aur Aapke paas hee hai iskee poorti ka intazaam
Kyunki Aap swayam Hain Shiv tattva ka saar aur vistaar
Aap toh bin mere maange hee denge jo hai mere liye uchit daan.

Mujhe aaye nahin maangne ka sabhya saleeqa
Kya changa hai mere liye, mujhe nahin iskee pehchaan
Shukr hai Aapne jeevan kee doar hai thaami
Varna na jaane kya karti mai agyani anjaan.

Mai toh gin paane ke laayak nahin
Ki Aapke mujh par hain kitne ehsaan
Ye jaanoon aur maanoon mai
Ki Aap Apni daya barsaakar rehte Hain mujh par meharbaan.

Kitnee galatiyan karti hoon mai naadaan
Aur Aap kshama karte Hain Maheshwar mahaan
Himmat jo haarti hoon chalte chalte
Toh sambhaalte bhi Aap hee Hain, komal karunanidhaan.

Mera raasta chaahe yahaan ho ya vahaan
Mai chaloon jahaan hon Aapke kadmon ke nishaan
Kyunki Aap jaanein meri manzil hai kahaan
Mai kewal ye jaanoon ki Aapki sharan mein hai mera jahaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Sharan Mein Hai Mera Jahaan (10/13/2023)

October 12, 2023

Om Namaha Shivaya
Aaj Ka Suvichaar 🙏🏻🙏🏻

#2062

Har Janam Ke Jeevan Mein

Bann kar anaathon ke nath
Ho gaye har akele ke saath
Bin maa ke bhakt ko dein mamta
Bin kaabiliyat wale ko dete Hain kshamta.

Guruji ne liya maanav ka roop shareer dhaaran kar
Bulaane lagey bhakton ko Apne dar par
Taarne ke liye
Unka jeevan sanvaarne ke liye.

Unkee leela koi bhi na paaya hai samajh
Leela samajhne kee koshish mein aasaan hai jaana ulajh
Kyunki Guruji swayam roop Hain Bhagwaan ka
Jinkee leela samajhne ka saamarthya hee nahin insaan ka.

Unke ashirwaad se poornima mein parivartit hui amaavasya
Unkee kripa se gehri ho paaye bhakton kee tapasya
Jinhonei pehle na kiya thaa kabhi, unko bhi simran aur dhyan karaate Hain shuru
Sabhi par Apni bakhshish kee baarish barsaate Hain pyaare pooran Guru.

Is maade samay mein
Is aasann pralay mein
Milee hai Guruji kee sharan kalyaankaari
Is se behtar kismat nahin ho sakti hamaari.

Kabhi nahin ho sakta kaafi
Guruji ka jitna bhi shukrana kiya jaaye
Milee hamein kitne gunaahon kee maafi
Bin hamaare gidagidaaye
Phir shraddha bhaav se kee praarthana toh Awashya sweekaarte Hain Guruvar
Kyunki Ve toh Brahmaand ke Baadshaah ke roop mein
Hain Bholenath Har.

Guruji kee mehar hee hai madad dukh haran mein
Shat shat naman hai har kshan Unke charan mein
Unhee ke divya roop ka aabhaas aur deedar hota rahe simran mein
Miltee rahe Unhee kee sharan har janam ke jeevan mein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Har Janam Ke Jeevan Mein (10/12/2023)