Month: November 2023

November 30, 2023

Om Namaha Shivaya
Aaj Ka Suvichaar 🙏🏻🙏🏻

#2111

   Chand Par Pahunch Gaya Insaan

Chand par pahunch gaya insaan
Chhoo liya insaan ne aasmaan
Kintu agar saath mein chadhta gaya uska abhimaan
Toh phir use kaise milega Bhagwaan?

Aaj kalyuga ke is samay mein
Zyada ho raha hai aisa sanskaar
Insaaniyat bhi jokhim mein hai
Yoon badal raha hai sansaar.

Aisa nahin ki sadgunon ka hua hai khatma
Aisa bhi nahin ki sabhi bhool gaye hain kaun Hain Paramatama
Kintu vaataavaran mein nahin hai pehle wale yugon ka spandan
Aur kitne mool aadhaaron ka hua hai khandan.

Aise mein Guruji ne liya hai hamein thaam
Daya kar hum par diya hai hamein Apna naam
Ve karna chaahte Hain hamaara kalyaan
Is se bada kya ho sakta hai daan?

Chaurasi lakh yoniyon se chaahte Hain Guruji hamein bachaana
Varna phir badh jaayega hamaara is sansaar mein aana jaana
Kewal Parwardigaar hee kar sakte Hain aisa upkaar
Khushkismati hai hamaari ki Unhonei bulaaya hai hamein Apne dwaar.

Kyun bandhe rahein vikaaron kee zanjeer se?
Kyun ghire rahein hum vinaash kee tasveer se?
Kyun rahein bechayyn aur adheer se?
Kyun bheegein niraasha ke neer se?

Chand par toh pahunch gaye
Pahunchein apne bheetar bhi
Guruji ka karein anusaran
Rakhein Unke har hukm ko smaran.

Bhalaa chaahte Hain Ve hamaara
Dikha rahe Hain hamein kalyaan roopi kinaara
Phir bhi jo hum na chaley Unke nakshe kadam par
Toh kaise chalega hamaara guzaara?

Guruji toh madad kar rahe Hain nirantar
Kintu hamaari bhi toh hai zimmedaari
Ki apne prayaas se karein aisee tayyaari
Ki hamaari aagey kee yatra ho jaaye nyaari.

Bahut hua abb laddhadpan
Guruji keh rahe Hain, ‘banda bann’
Sudridh karein hum apna mann
Taaki Guru kripa se sanvar sakey hamaara jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Chand Par Pahunch Gaya Insaan (11/30/2023)

November 29, 2023

Om Namaha Shivaya
Aaj Ka Suvichaar 🙏🏻🙏🏻

#2110

Mann Pyaasa Hai Simran Ka

Sthaayi nahin hai sukh
Na hee sthaayi hai dukh
Paristhiti badalti rehti hai rukh
Toh mann kee sthiti ka alag ho jaata hai mukh.

Sukh mein mann muskuraata hai
Dukh mein mann dhal sa jaata hai
Jabb takk aisa hota rahega
Bhakt taralta se kaise paristhiti sahega?

Mann pyaasa hai simran ka
Simran karey pavitrikaran mann ka
Guruji kee bakhshish hai simran
Guruji ka ashish hai simran.

Simran se akelapann bann jaaye ekant
Simran se mann ho jaata hai shant
Simran se mann ko miltee hai ekaagrata aur sthirta
Mitne lagti hai mann kee ashuddhi aur chanchalta.

Swaabhaavik hai sukh dukh ka aana jaana jeevan mein
Anivaarya hai simran aur chintan ka jaari rehna mann mein
Badhta rahega jo inse manobal
Toh vyakulta aur niraasha ka hoga hal
Mushkil samaa jaayega tal
Sehenshakti laayega aane wala har pal.

Simran kee bakhshish ke liye Guruji ka dhanyawaad
Dhyan na bhi lagey toh bhi Guruji dete Hain ashirwaad
Simran karte karte kumm hoti jaayegi Guruji se duuri
Mehar karein Guruji ki kisee bhakt kee koshish na rahe adhoori.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mann Pyaasa Hai Simran Ka (11/29/2023)

November 28, 2023

Om Namaha Shivaya
Aaj Ka Suvichaar 🙏🏻🙏🏻

#2109

    Guruji Angg-Sangg Hain Har Pal 

Karne lagi mai baat
Pyaare Guruji ke saath
Jo soojha mujhe uss kshan
Unse kehne lagi mai mann hee mann…

Kann kann mein Aapke spandan ka ehsaas
Ho raha hai yoon, jaise Aap Hain mere bahut hee paas
Aapki anupam khushboo
Meri rooh ko rahi hai chhoo
Aapke divya saundarya se
Sharmaa rahi hai hawaa
Aapko bade pyaar se
Antas kee bagiya de rahi hai sada
Aayiye Guruji, kripa kar aayiye
Antas mein viraajmaan ho jaayiye.

Bheetar se aayi awaaz
‘Jaan le abb tu ye raaz
Ki Mai kabb se hoon tere antas mein
Tere mann mein basey shabad ke ras mein.’

‘Mai hee bakhshta hoon tujhe simran
Meri prerna se tu kar paati hai mera chintan
Mai awaaz hoon teri chetna kee
Mai mithaas hoon teri samvedana kee.’

‘Tere pichhle janmon ke saare paap
Tere is janam ke dukh santaap
Mai hee toh hoon harta
Teri jholi Mai hoon bharta.’

‘Mai jaanta hoon kya tere liye hai sahi
Jabb jo uchit hota hai, Mai deta hoon vahee
Mai hoon tere praanon kee oorja
Mai hoon teri bhakti aur teri pooja.’

‘Har karam tu karti chal mujhe arpan
Koshish toh kar ki mujhe kar samarpan
Teri koshish ko Mai sweekaaroonga
Usey Apne ashish se Mai nikhaaroonga.’

‘Mai Shiv hoon, Mai hoon Shakti
Mai bakhshta hoon bhog aur mukti
Mujhse hee hai tera mann, tera kann kann
Mujhse hee milega tujhe asal dhan.’

Mai sunti rahi
Mere ashru kee boond bahi
Hui mai bhaav vibhor
Mujhe bheetar dikhee bhor.

Guruji hee Guruji aane lagey bheetar nazar
Unkee har baat ka honei lagaa asar
Mann hee mann mein dekh kar Unka sundar roop
Mujhe mila sukoon anoop.

Mainey Guruji ko kiya dhanyawaad
Dhanya hui paakar Unka ashirwaad
Mera toh jeevan ho gaya hai safal
Kyunki Guruji angg sangg Hain har pal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Angg-Sangg Hain Har Pal (11/28/2023)

November 27, 2023

Om Namaha Shivaya
Aaj Ka Suvichaar 🙏🏻🙏🏻

#2108

              Shubhta Ka Paigaam

Kartik maas ka din hai aakhiri
Sainkdon shraddhalu jann lagaate hain darbar mein apni haaziri
Hindu ho ya sikh, Shiv bhakt ho ya Vishnuji ke bhakt jann
Sabhi ke liye bahut vishesh hota hai Kartik Poornima ka ye din.

Dharma shastron mein Ved sabse shreshth
Yugon mein Satyug sabse uttam
Saritaaon mein Ganga
Vaise hee Kartik Maas hai maas sarvottam.

Jo shraddha se karein is maas mein deep daan
Mit-ta hai Dev kripa se Unka agyan
Deep daan, dhan daan, bhaav poorna snaan
In sabse mit jaate hain kasht mahaan.

Shiv ji aur Vishnu ji dono ko
Ye maas hai bahut pasand
Unkee kripa se shraddhaalu bhakt janon ke
Dukh santaap ka hota hai antt.

Deepawali ke panch shubh din
Kartik maas poora na ho inke bin
Maa Tulsi kee pooja ka hai vishesh mahatva
Shubh aur shuddh bhaav jaagrit karta hai devatva.

Kartik Poornima hai antim din is maas ka
Hota hai is din par ehsaas bahut kuch khaas ka
Pauranik granth Shivji dwaara is din Tripurasur ke vinaash kee katha sunaata hai
Aur tabhi se yeh din Tripurari Poornima ke naam se bulaaya jaata hai
Devtaaon ke chehre Tripurasur ke vinaash se prasannata se khile
Toh is din Dev Deepawali manaakar Ve aapas mein khushi se miley.

Kartikeya ka janam hua aur Vishnu ji ne liya is din Matsya Avatar
Aur surakshit kiya samast sansaar
Shaligram aur Tulsi Maa kee pooja kee hai is din reet
Bhakt manaate hain utsav aur gaate hain bhakti ke geet.

Guru Nanak Dev ji ka Prakash Purab bhi hai aaj
Jo sanvaarte Hain Apne sabhi bhakton ke kaaj
Kewal sikhon ko nahin, balki poori maanavta ko Unhonei sadachari ka raasta dikhaaya
Apne saade saral jeevan ke maadhyam se swayam mein Devatva darshaaya.

Swayam Nirankar aaye Ve dharti par lekar Guru Nanak ji ka roop
Har shraddhalu bhakt waakif hai ki Unkee leela hai kitnee anoop
‘Kirt karo, Naam japo, Vand chhako’ ye hain Unke kahe siddhant
Inke anusaran par aadhaarit Guru Granth Sahib Ji mein hain anek drishtant.

Guruji Maharaj ke darbar mein bhi
Guru Nanak Dev Ji shraddha se hotey Hain virajmaan
Guruji ke mandir aur satsang mein simran ke dauran
Sunn-ne ko milta hai Gurbani ka ruhaani gaan.

Har shabad ka saar gehra
Har shabad ke spandan se utsaahit hota hai vandan
Guruji kee mehar se ho paaye simran aur dhyan
Jaisa bhi simran Ve bakhshein, usey ashirwaad lein hum maan.

Bahut khushnaseeb hain hum
Ki chaahe jeevan mein ho khushi ya gumm
Guru kripa se bhakt kar paate hain Gurbani ka Shravan
Aur usee par Guru mehar se ho paata hai manan.

Kalyuga mein kirtan ka mahatva hai khaas
Gurbani kirtan se badhta hai Guru kripa ka ehsaas
Protsaahit ho jaata hai simran aur dhyan ka prayaas
Aisee bakhshish miltee rahe, hai Guruji se yeh ardaas.

Guruji sabhi ko taarein
Sabhi ke Ve kaaj sanvaarein
Dil se nikle dua ki saari sangat ka ho kalyaan
Aaj ka din sabhi ke liye laaye shubhta ka paigaam.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Shubhta Ka Paigaam (11/27/2023)

November 26, 2023

Om Namaha Shivaya
Aaj Ka Suvichaar 🙏🏻🙏🏻

#2107

         Koi Kinkar Bann Kar…..

Koi kinkar bann kar
Koi bann kar kookar
Aaye Guruji ke dar par
Jhukaane apna sir.

Koi kisee ke kehne par
Koi anek kasht sehne par
Koi aansoo behne par
Aaye Guruji ke dar.

Kintu Guruji ke bin bulaaye
Koi na Unke dar pahunch paaye
Kiska waqt kab aaye, kewal Guruji hee jaanein
Kaun kis bhaav se aaye, kewal Guruji pehchaanein.

Guruji saari sangat par kripa karein
Sabhi kee jholi Ve kalyaan se bharein
Sabhi ke dukh santaap Ve harein
Sabhi Guruji kee mehar se tarein.

Dayalu aur daani
Vinamra Unkee vaani
Paawan pyaara pyaar
Inaayat ka izhaar
Guruji Parwardigaar
Thaamein naiya kee patvaar.

Naiya, saari sangat ke jeevan kee
Unke jeevan ke har kshan kee
Guruji kee kripadrishti sabhi par hai padi
Ye tasalli hai sabse badi.

Hum toh hain agyani, Guruji gyan ke bhandar
Hum gunahgaar, Guruji bakhshanhaar
Guruji ke saari sangat par hain anginat upkaar
Guruji ko bhaav poorna shukrana baarambaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Koi Kinkar Bann Kar….. (11/26/2023)

November 25, 2023

Om Namaha Shivaya
Aaj Ka Suvichaar 🙏🏻🙏🏻

#2106

      Teri Udaan Na Rahegi Adhoori

Tujhe swayan hee bharni hai apni udaan
Tujhe hee banaani aur mitaani hai apni pehchaan
Pehchaan aur phir tyaag de apna abhimaan
Tere angg-sangg Hain Guruji ke roop mein swayam Bhagwaan.

Aseem akash de raha hai tujhe anivaarya pukaar
Usee pukaar ko sunn-ne aur maan-ne mein hai tera uddhaar
Ye akash baahar ka nahin, hai ye bheetar ka
Ye uddhaar bhi hai tere andar ka.

Atma-bodh hona hai zaroori
Taaki khud se mitey teri duuri
Isliye Guruji se kar ardaas
Ki jaagi rahe tere mann mein simran kee pyaas.

Guruji kee kripa se simran le jaayega tujhe dhyan mein
Dhyan se badhauti hogi tere gyan mein
Dhyan aur gyan teri madad karenge teri udaan mein
Isliye tu sees jhukaata chal Guruji ke sammaan mein.

Iske paawan prayaas se katenge tere karmon ke bandhan
Shuddh hota chalega tere dwaara kiya chintan aur vandan
Halka ho jaayega karmon ka bhaar
Badh jaayenge uttam udaan bharne ke aasaar.

Kalyaankaari hoga tere antas ka pavitrikaran
Tere vikaaron kee aniyantritata ka hoga haran
Mann kee sthiti hogi sthir aur sachchi
Teri udaan hogi achchi.

Ye yakeenan hai yukti
Jis se jeete jee hogi teri mukti
Aye bande, Guruji teri sahaayata kar rahein Hain
Unhonei dhyan mein tujhse prerna daayak shabd kahein Hain
Tu apni oar se kar koshish poori
Guru kripa se teri udaan na rahegi adhoori.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Teri Udaan Na Rahegi Adhoori (11/25/2023)

November 24, 2023

Om Namaha Shivaya
Aaj Ka Suvichaar 🙏🏻🙏🏻

#2105

     Beshak Tera Zakhm Hai Gehra

Beshak tera zakhm hai gehra
Tu na bhool ki uspar bhi Guruji ka hai pehra
Zaroor hoga sabr ka asar
Tu shraddha mein na chod koi kasar
Tera jo aansoo baha bhi nahin
Guruji ko toh uss ansoo kee bhi hai khabar
Tere safar ke har manzar par hai Unkee nazar
Ve tere karma katvaakar tere dukh santaap rahe Hain har.

Gehre zakhm par malta chal marham Guruji ke naam ka
Dekhna, tujhe awashya anubhav honei lagega aaraam ka
Guruji ke chintan ko samay deta chal apni subah aur shaam ka
Tu apne farz nibha aur chod de sochna anjaam ka.

Jabb bhar jaayenge zakhm
Teri har peeda hogi khatm
Tabb bhi Guruji ka naam japna rakhna yaad
Is yaad ke liye abhi se kar Guruji se fariyaad.

Kyunki veh waqt aayega kal ke kisee bhi pal mein
Kyunki Guruji poori shakti lagaa dete Hain bhakt ke kashton ke hal mein
Ve toh pita bhi Hain aur Ve hee Hain mata
Har bhakt ke sangg hai Unka nirmal naata
Apni mamta se seench rahe Hain Ve teri atma
Kyunki Ve swayam hee toh Hain Paramatama
Unka hee ansh hai teri atma
Ve hee karenge tere har dard ka khatma.

Tere zakhm kee gehraayee se kaheen zyada hai Guruji kee aseem vadiyaayee
Tu Unkee vadiyaayee ka karta chal gungaan
Guruji ke naam ke marham kee mahima ko pehchaan
Tere liye kalyaankaari hoga Guruji ka diya har daan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Beshak Tera Zakhm Hai Gehra (11/24/2023)

November 23, 2023

Om Namaha Shivaya
Aaj Ka Suvichaar 🙏🏻🙏🏻

#2104

              Janam Janam Ke Liye

Guruji ke naam kee Ganga mein
Gotey lagaao gehre
Yeh Ganga toh saagar kee bhanti athaah hai
Aur yeh kalyaan takk pahunchne kee raah hai.

Nach uthega tumhaare antas ka roam roam
Jabb antas ke bheetar goonjega ‘Om’
Guruji milenge khojne par tumhaare hee bheetar
Pavitrata aur satya kee gehraayee mein hai Unka divya dar.

Kyunki Guruji hee Shiv Hain
Guruji hee Hain satya
Guruji Hain sundar
Guruji Hain saatatya.

Unke naam kee Ganga ka neer hai sabse nirmal
Neer hee nahin, balki adhyaatmik amrit hai ye jal
Ismein samaaya hai khazana kalyaan ka
Ismein hai dhan Guruji ke naam daan ka.

Saagar roopi Ganga hoti hai khushnaseebon ke bhaagya mein
Ismein gotey lagaakar kho jaao tum Apne aaraadhya mein
Saubhaagya kee seema ko kar jaaoge tum paar
Ho jaayega janam janam ke liye Guruji ka divya deedar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Janam Janam Ke Liye (11/23/2023)

November 22, 2023

Om Namaha Shivaya
Aaj Ka Suvichaar 🙏🏻🙏🏻

#2103

           Ye Guruji Ka Darbar Hai

Ye Guruji ka darbar hai pyaare
Vyaapaar ka koi baazaar nahin
Yahaan milta hai naam aur bakhshish ka daan
Mol tol ka koi auzaar nahin.

Yahaan rangg khilta hai shart-rahit bhakti ka
Yahaan anugraha praapt hota hai Shiv Shakti ka
Yahaan sunaayee deta hai preet kee reet ka geet
Yahaan ke samraat ko bhaata hai bhaav vineet.

Khudaayee sakshat viraajit hoti hai yahaan
Kyunki Guruji swayam hotei Hain virajmaan
Unkee oar judta hai jabb dhyan
Tabhi praapt hota hai ye gyan.

Is darbar mein hoti hai sabki sunvaayee
Is darbar mein praapt hoti hai Guruji kee rahnumaayee
Is darbar mein aisee jyot jalti hai Guruji ke naam kee
Jo antas mein pravesh kar phailaati hai chhavi Shiv dhaam kee.

Jo maango vo mil jaata hai
Kintu na maangne wala aur bhi zyada le jaata hai
Ek ya do pal mein ye ho ya nahin
Kintu aakhirkaar hota hai sab Guruji anusaar sahi.

Ye sab leela hai Satguru kee, aye pyaare
Hamaari saans bhi chalti hai is leela ke hee sahaare
Guruji ka darbar hai Sachkhand ka darbaar
Is darbaar ka kar tu tahey dil se aadar satkaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ye Guruji Ka Darbar Hai (11/22/2023)

November 21, 2023

Om Namaha Shivaya
Aaj Ka Suvichaar 🙏🏻🙏🏻

#2102

Aviral Ganga

Param poojya Guruvar,

Aviral Ganga Aapke ashirwaad kee
Akhand anukampa Aapke prasad kee
Deti hai mujhe protsaahan har roz
Ki mai jaari rakhoon apne bheetar kee khoj.

Aapki mehar se hee toh jaagti hai meri jigyaasa
Aapki daya se samajh aati hai asal gyan kee paribhaasha
Aapki prerna se badhti hai uss gyan ko paane kee abhilaasha
Aapki mamta se niraasha duur hoti hai aur mann ko miltee hai asha.

Aap na thaamte mera haath toh sochna bhi nahin chaahti mai ki kya ho jaata
Jo jo abb takk ho paaya hai mujhse vo sab bilkul na ho paata
Kyunki Aap hee toh Hain kaaran karta
Aap hee Hain sankat ke harta.

Aapko gyat Hain meri zindagi mein aane wale aagey ke imtehaan
Mujhe khabar nahin hai bilkul, mai theheri anjaan
Yoon hee daya karte rahiyega
Yoon hee haunsle ka ghada bharte rahiyega.

Mere bheetar dheeraj ka neeraj khila rahe Aapki rehmaton se
Mere bheetar shraddha ka suman khila rahe Aapki sehmati se
Mere praarabdh bann kar aaye mera bhaagya
Aur Aapki kripa se veh bhaagya banaa saubhaagya
Kyunki Aap Hain mere bhaagya ke baadshaah
Aur Aap Hain mere haathon kee lakeeron ke shehenshah.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aviral Ganga (11/21/2023)