Month: November 2023

November 20, 2023

Om Namaha Shivaya
Aaj Ka Suvichaar 🙏🏻🙏🏻

#2101

Saakaari Tann Mein Aaye Aap

Param poojya Guruji,

Saakaari tann mein aaye Aap
Mitaane bhakton ka dukh santaap
Ye jaante huey ki kaunse hain hamaare pichhle janmon ke paap
Shukr hai Aapka ki Aapse hua madhur milaap.

Hum dukh ke sindhu mein doobey huey praani
Aap aaye taarne hamein aur sudhaarne hamaari zindagaani
Hum maya jaal mein phanse agyani
Bakhshte Hain Aap hamaari naadaani.

Aap Hain sarvgyaata
Aap karmaphal ke daata
Aap dwaara diya gaya karmaphal qubool karna hai hamaara farz
Kyunki hum par chadha hua hai apne hee karmon ka karz
Aap Hain Mahadev, Jinhonei dhaaran kiya Guru ka swaroop
Praaniyon ka uddhaar karne hetu Aap apnaate Hain leela anoop.

Kalyuga ka daur hai chhaaya
Koi bhi is se na hai bach paaya
Vigyan mein vikas awashya hai aaya
Saath hee vayumandal mein parivartan hai aaya.

Jaise jaise vayumandal mein badh rahi hai kalyugi halchal
Bhay aur paap ke vaataavaran mein rahein hum nirbhay aur nirmal
Aapki kripa bin kasht nahin sakta hai tal
Aapki daya se hum sakaaraatmakta ka strot banein har pal.

Jaisi bhi ho jaaye hamaari zindagi mein paristhiti
Aapki meharbaani se shant aur sthir rahe mann kee sthiti
Hamaare sir par hai Aapka haath
Aap sada Hain hamaare saath
Toh koi aandhi tufaan nahin roak sakta hamaara kalyaan
Kripa karein Aap ki kendrit rahe Aap par hamaara dhyan.

Hai Aapse vinamr guzaarish
Ki poori ho jaaye hamaari achcha bann jaane kee khwaahish
Apna bhi farz hum nibhaayein
Aur doojon kee bhi madad kar paayein
Har shwaas se Aapka naam lete jaayein
Sada Aapki mahima ka paath sunein aur sunaayein.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Saakaari Tann Mein Aaye Aap (11/20/2023)

November 19, 2023

Om Namaha Shivaya
Aaj Ka Suvichaar 🙏🏻🙏🏻

#2100

Tere Mann Ka Pavitra Shringar

Tere mann mein saagar hai
Anekon vichaar aur anekon vikaar se bharpoor
Guruji kee kripa ke bin
Inke kaaran vash chhaaya klesh nahin ho sakta duur.

Keh de tu, ‘Aye mere mann
Kar tu vichaar saagar ka manthan’
Beshak ho jaaye dil aur dimaag kee ann-bann
Kintu sudhar jaayega tera jeevan.

Agar karna hai aisa manthan
Toh chodna hoga parchintan
Karta chal atma chintan
Shuddh ho jaayega tere antas ka kann kann.

Guruji tere angg sangg rehte Hain har kshan
Unkee mehar se manthan dwaara praapt hoga asal dhan
Koi anuchit khayaal na kar paayega tere mann par aakraman
Karne bhi lagega toh usey bheetar na aane dega tera mann.

Tere mann mein hai nyaayaalay
Sahi galat ka le sakta hai veh nirnay
Jitna sthir hoga mann, mit jaayenge utne hee sanshay
Tere mann ka bal badh jaayega, aur veh ho jaayega nirbhay.

Satsang ke kiley mein hai tere mann ka ghar aur upvan
Vaheen bheetar hotey rahenge tujhe Guruji ke darshan
Nirantar chalta rahega jo tere mann mein Guruji se bakhsha hua simran
Niswaarth sewa se aur bhi chamak jaayega tera mann roopi darpan.

Manthan ko honei de nirantar aur baarambaar
Tabhi mil paayega tujhe Paramaarth ka saar
Duur hota jaayega har anaawashyak vichaar
Manthan dwaara ho jaayega tere mann ka pavitra shringar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tere Mann Ka Pavitra Shringar (11/19/2023)

November 18, 2023

Om Namaha Shivaya
Aaj Ka Suvichaar 🙏🏻🙏🏻

#2099

      Adhyaatmik Safalta Kee Oar

Na dhoondh tu apni khushi idhar udhar
Varna bhatakta hee reh jaayega
Doojon par kahaan chalti hai teri marzi
Kya jaane kaun kab kya keh jaayega?

Ho sakta hai tujh mein ho veh sanyam
Ki tu kisee ka bhi kaha seh paayega
Kintu ye bhi toh ho sakta hai
Ki tu anuchit disha kee oar beh jaayega.

Duniya mein jeete jee
Guruji ke naam ka amrit pee
Antas mein ho rahe yagya mein
Daalta chal tu shraddha bhaav ka ghee.

Ye ek ya do baar kee kriya nahin hai
Balki nirantar karte rehna hoga ye abhyaas
Taaki ho paaye atma saakshaatkaar
Jismein basaa hai Guru Govind ka deedar.

Guruji ne bakhsha hai simran
Ye bakhshish hai divya dhan
Isee se asal khushi paayega tera mann
Aur sampann hoga tera jeevan.

Guruji kee mehar se
Jitna badh paayega tere dwaara kiya simran
Utna badhta jaayega
Tere antas mein Unka chintan
Teri pravritti hoti jaayegi pehle se bhi zyada ruhaani
Antas mein ho rahe yagya kee agni ho jaayegi itnee noorani
Ki uska tej teri kanti ko char chaand lagaayega
Aur tera safar adhyaatmik safalta kee oar agrasar ho jaayega.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Adhyaatmik Safalta Kee Oar (11/18/2023)

November 17, 2023

Om Namaha Shivaya
Aaj Ka Suvichaar 🙏🏻🙏🏻

#2098

Seedha Saadha Sa Nar

Ek thaa seedha saadha sa nar
Jeete jeete uspar hota chala maya ka aisa asar
Ki usee par aashrit hokar veh kar raha thaa jeevan basar
Aur betukey tareeke se raha thaa uska samaa guzar.

Naadaani kee neend mein sota jaa raha thaa
Duniya ke mele mein khota jaa raha thaa
Isliye gumraah hota jaa raha thaa
Aur karmon ke beej bota jaa raha thaa.

Ho raha thaa veh disha heen
Uskee buddhi ho rahi thi ksheen
Phir hui achaanak se sehar
Guruji kee uspar hui mehar.

Guruji ne banaa liya usey apna shishya
Sanvarne lagaa uske bhaagya ka drishya
Tezi se aane lagey uske jeevan mein imtehaan
Kintu Guruji angg sangg rehkar kar rahe thei uska dhyan.

Guruji ke prataap se milee usey prerna
Jaagrit hui aisee uskee chetna
Ki veh Guruji ke dhyan mein hua yoon magan
Jaise uskee lagan ko laagi ho adhyaatmik agan.

Duniyadaari se usne mann ko duur kar liya
Antas ko satat Guru chintan se bhar liya
Sotey jaagte ruhaani vichaaron mein rehta thaa
Bheed mein bhi zyaadaatar chup rehta thaa.

Guruji ne usey disha dikhaayee
Simran bakhsha aur dhyan kee vidhi sikhaayee
Jaise jaise Guru uske paap dhonei lagaa
Uska chitt dhyan mein ekaagra honei lagaa.

Apna har farz usne bakhoobi nibhaaya
Laukik lakshya par bhi pahunch paaya
Kintu uss raaste par bhakti ko nahin ganvaaya
Nirantar Guru naam kee ganga mein nahaaya.

Juda raha uska antas divya tattva se
Waakif ho chuka thaa Guru roopi satya se
Apni akal ko jaan kar tuchh
Usne Guruji par chod diya thaa sab kuch.

Duniya aur duniyadaari abb na rahi uske liye vikarshan
Uske kriyamaan karma honei lagey kumm
Har karma ko karne lagaa veh Guruji ko arpan
Kaaran karta Guruji Hain, maan chuka thaa uska mann.

Uske jeevan mein sudhaar hua
Guruji dwaara uska uddhaar hua
Santushti se apne antim vele ke liye veh tayyaar hua
Guruji kee mehar se veh bhavsaagar ke paar hua.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Seedha Saadha Sa Nar (11/17/2023)

November 16, 2023

Om Namaha Shivaya
Aaj Ka Suvichaar 🙏🏻🙏🏻

#2097

  Unnati Kee Umang

Itnee sundar si bholi si pyaari si soorat
Tyaag tapasya vairagya kee moorat
Jin aankhon mein sheetalta
Unhee mein itnee gehraayee
Jis chehre par itnee vinamrata
Usee par noorani roshni chhaayi.

Jinke aanchal mein jhool kar
Chha jaati hai mann mein khushi kee khumari
Jinke naam kee aushadhi se
Kumm pareshaan karti hai beemari.

Ve Hain Guruji Maharaj Shiv avatari
Jinke sahaare hai Unkee sangat saari
Karmon ka bojh kumm karte Hain Ve baari baari
Unkee sharan sada hoti hai kalyaankaari.

Kyun na swayam bann jaayein Guru prem ka shikhar
Jahaan khatm ho chuka ho parchintan ka safar
Atma chintan mein hai Guru chintan
Guru Chintan mein samaaya hai Unka vandan.

Guruji mein kaayam rakho asthaa
Vahee hai har uljhan se nikalne ke raasta
Shwaas mein yoon Guruji ka naam lo utaar
Ki har shwaas ka jaise hota rahe divya deedar
Unkee mehar se khud ko Unse jod kar
Apna farz nibhaate huey sab kuch Unn par chod kar
Bansuri bajaate chalo bandagi kee
Saarthakta badhaate chalo zindagi kee.

Is bansuri kee madhur dhvani se
Guruji ko rijhaate chalo
Guruji kee paawan mahima ka geet
Atoot shraddha se tum gaate chalo.

Bandagi awashya laayegi rangg
Agar asthaa rahegi har pal sangg
Khatm hoti chalegi mann mein duvidhaaon kee jangg
Atma ke angg angg mein chhaayegi unnati kee umang.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Unnati Kee Umang (11/16/2023)

November 15, 2023

Om Namaha Shivaya
Aaj Ka Suvichaar 🙏🏻🙏🏻

#2096

Jaagi Rahe Simran Kee Pyaas

Jaagi rahe simran kee pyaas
Badhti rahe Guruji ko paane kee aas
Safal ho shwaas lene ka prayaas
Guruji se har pal hai ye ardaas.

Aisee lagg jaaye Guruji mein lagan
Ki antas Unke chintan mein hee rahe magan
Jinke samaksh swayam jhuk jaaye gagan
Mai karti rahoon Unn Guruvar ke charan mein naman.

Guruji kee kripa se mumkin hai ye sabb
Kyunki Ve Guru ke roop mein swayam Hain Rabb
Unse arzi hai ki Ve sikha dein insaaniyat
Unse ardaas hai ki Ve mujhe bakhsh dein ruhaaniyat.

Mai jis daat ke yogya bhi nahin
Guruji toh usey bhi meri jholi mein barsaate Hain
Mushkil samay mein poora jahaan muh moad leta hai
Ek Guruji hee Hain jo madad ke liye aate Hain.

Isee vishwaas se baithi hoon karti hui intazaar
Ki Guruji aayein aur dein mujhe taar
Unkee mehar se Unka naam japti rahoon baar baar
Unse aur Unke simran se badhta jaaye mera pyaar
Mann mandir mein Unke darshan hotey rahein baarambaar
Aur jo bhi ho jaaye, mai rahoon Unkee shukrguzaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jaagi Rahe Simran Kee Pyaas (11/15/2023)

November 14, 2023

Om Namaha Shivaya
Aaj Ka Suvichaar 🙏🏻🙏🏻

#2095

Gaaon Ka Ek Niwaasi

Gaaon ka ek niwaasi thaa
Saadhaaran sa thaa uska jeevan
Na koi mithyaabhimaan na banaavati pann
Aur bahut dayalu thaa uska mann.

Uska mann duvidha mein thaa aur thaa pareshaan
Usey kaheen nazar na aa raha thaa Bhagwaan
Kar chuka thaa bahut puja, paath, aur daan
Phir bhi haalaat kee gambheerta se thaa hairaan.

Mann mein yuddh chal raha thaa
Muddat se kasht nahin tal raha thaa
Na le paa raha thaa veh koi nirnay
Mann mein uth rahe thei anek sanshay.

Chalte chalte pahuncha ek taalaab ke paas
Usee ke kinaare baith gaya hokar udaas
Yakaayak usey hua ehsaas
Ki mehek rahi hai vahaan kee ghaas.

Dekha usne mud kar apne peechhe
Ek yogi baitha thaa aasan bichhaakar neeche
‘Om Namaha Shivay’ ka jaap veh karta thaa jaa raha
Niwaasi ko lagaa ki veh kalyaan ka geet hai gaa raha.

Shant baithkar sunta raha jaap veh niwaasi
Jaap sunkar thodi kumm honei lagi uskee udaasi
Veh bhi japne lagaa ‘Om Namaha Shivay’ pyaar se
Aur yogi kee oar dekhne lagaa aabhaar se.

Jabb yogi kee jaap kriya hui sampann
Tabb niwaasi ke mann ko mehsoos hua halkapan
Veh gaya yogi ke sameep
Usey yogi ke maathe par dikha divyata ka deep.

Jaan gaya, veh maan gaya ki yogi hai bahut mahaan
Kintu usey gyat na hua ki Ve toh Guruji ke roop mein thei Bhagwaan
Ve swayam aaye thei karne niwaasi ka maargdarshan
Taaki shant ho niwaasi ka mann aur sudharne lagey uska jeevan.

Niwaasi ne chhoo liye unn yogi ke kamal charan moond kar apne nayyn
Poochha Unse niwaasi ne ki kaun Hain Ve Jinka Jaap sunkar milta hai yoon chayyn
‘Guruji,’ pyaar se kehne lagey yogi mahaan
Aur phir ek hee pal mein ho gaye vahaan se antardhaan.

Niwaasi kee aankhon mein aaye shukrana ke ashru
Usee kshan se uskee nayi zindagi hui shuru
Usey yogi ke roop mein miley Guruji aur Bhagwaan
Abb toh nishchit ho gaya uske mann aur uske jeevan ka kalyaan.

‘Om Namaha Shivay’ japte japte niwaasi lauta apne ghar
Guruji ne uspar mehar kar bula liya usey Apne dar
Jaap karte karte uskee duvidhaayein honei lagi duur
Antas shuddh hota gaya aur uspar chhaaya Guruji ka noor.

Niwaasi ko Guruji ne bakhsha
Guruji ne sada kee uskee raksha
Jaise Guruji ne niwaasi ko diya taar
Vaise hee Guruji banein hum sabke bakhshanhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Gaaon Ka Ek Niwaasi (11/14/2023)

November 13, 2023

Om Namaha Shivaya
Aaj Ka Suvichaar 🙏🏻🙏🏻

#2094

Dhoop Chhaaon Ka Khel

Khushi ko mai chhaaon maanoon ya dhoop?
Gumm ko maanoon dhoop ka ya phir chhaaon ka roop?
Kyunki dhoop or chhaaon dono hain zaroori
Lekin kabhi kabhi ichcha hoti hai dono mein se ek se badhaani kee duuri
Dono bhaate hain mann ko alag alag samay par
Kintu jo bhaaye nahin, zaroori toh nahin ki vo ho jaaye agochar.

Isee tareh se hain khushi aur gumm
Kabhi ek zyada aur dooja kumm
Kabhi pehla ghat jaaye aur dooja adhik ho jaaye
Aur mann ho asthir toh dono se prabhaavit ho jaaye.

Sukh dukh, khushi aur gumm
Ye toh hotey rahenge zyada aur kumm
Lekin ye antas par na dhaayein sitam
Iske liye bahut zaroori hai swasth mann.

Isliye anivaarya hai badhaana manobal
Taaki khushi gumm mein mano sthiti na jaaye badal
Jitna shant aur sthir hoga mann
Utna hee suljha hua rahega jeevan.

Guruji ne bakhsha hai sangat ko simran
Unkee kripa se hee simran kar paata hai mann
Simran hai raasta pavitrikaran ka
Simran se kumm mehsoos hota hai tanaav jeevan ka.

Prayaas karte karte
Guruji ke naam se mann ko bharte bharte
Kumm sataane lagti hai har tareh kee chhaaon aur dhoop
Mann ko haani pahunchaane ka saamarthya kho dete hain khushi aur gumm
ke badalte roop.

Guruji se hai ye vinamr ardaas
Ki Unke simran mein ramm jaaye har shwaas
Na khushi na gumm na sukh na dukh lagey khaas
Manobal badhaane ka jaari rahe prayaas.

Guruji Hain bhakt vatsal aur karunanidhaan
Ve Apni ichcha se bakhshte Hain simran, dhyan, aur gyan
Unkee is bakhshish mein basaa hai manobal badhaane ka upaay
Bhakt nishtha se Unke charnon mein mann ko jhukaaye, aur pyaare Guruji sada sahaay.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Dhoop Chhaaon Ka Khel (11/13/2023)

November 12, 2023

Om Namaha Shivaya
Aaj Ka Suvichaar 🙏🏻🙏🏻

#2093

Aapke Naam Kee Jyot

Param poojya Guruji,

Apni mehar se Aapne
Jalaayee mere antas mein jyot Apne naam kee
Aapki daya se ummeed jaag gayi
Pahunch paane Aapke dhaam kee.

Kyunki kuch bhi nahin hai Aapke naam se zyada anmol
Jo Aapki mahima sunaaye, sarvashreshth hai har veh bol
Aapka naam hee kar raha hai mera kalyaan
Aur aagey bhi banega uddhaar ka baan.

Aapke naam kee jyot se milee hai jo himmat mere mann ko
Uss himmat se bahut haunsala mila hai jeevan ko
Jabb bhi hoti hoon udaas
Jabb bhi hoti hoon niraash
Aapka naam japp leta hai mera shwaas
Aur badhaata hai mera Aap par vishwaas.

Aapke bakhshe huey is vishwaas ke sahaare
Aapki mehar se pahunch paati hoon Aapke dwaare
Kripa kar bulaate rahiyega Apne darbar mein
Vyarth lagta hai kaheen bhi aur jaana sansaar mein.

Aapke naam kee jyot se ujjwal hui hai meri raah
Ye Aapki hee rehmat hai mere sachche badshah
Kripa keejiyega ki mai kabhi galati se bhi na ho jaaoon gumraah
Aur bakhshiye aisee bhakti mujhe, jismein kabhi kumm na ho mera utsaah.

Jaanti hoon ki ye shareer hai nashwar
Maanti hoon Aap Guru ke roop mein Hain Ishwar
Maanti hoon ki Aapka naam hai akhand, anant, aur amar
Arzi hai Aapse, ki mere bheetar Aapke naam kee jyot jalti rahe nirantar.

Bahut tejasvi hai Aapke naam ke jyot kee jwaala
Aapke alaawa koi nahin hai mera rakhwaala
Mera mann Aapke naam mein hua hai matvaala
Mai Aapki shukraguzaar hoon, ki Aapke naam se hua hai mere bheetar uttam ujaala.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapke Naam Kee Jyot (11/12/2023)

November 11, 2023

Om Namaha Shivaya
Aaj Ka Suvichaar 🙏🏻🙏🏻

#2092

                 Deep Jalaa Kar

Deep jalaa kar pyaar ka
Bitaaoongi har pal intazaar ka
Aayenge, mere Guruji aayenge
Diwali ka deeya jalaayenge.

Deep jalaa kar aadar satkaar ka
Swaagat karoongi Guru sarkar ka
Aayenge, mere Guruji aayenge
Uss swaagat ko qubool farmaayenge.

Deep jalaa kar sachchaayee ka
Gungaan karoongi Unkee vadiyaayee ka
Aayenge, mere Guruji aayenge
Apni guruyaayee dikhaayenge.

Deep jalaakar stavan ka
Geet gaaoongi Guru vandan ka
Aayenge, mere Guruji aayenge
Stavan se Ve prasann ho jaayenge.

Deep jalaa kar kshama ka
Intazaar karoongi maafi maangne ke samaa ka
Aayenge, mere Guruji aayenge
Kshama daan ka dariya bahaayenge.

Deep jalaakar samarpan ka
Prayaas karoongi chintan ka
Aayenge, mere Guruji aayenge
Mujhe bandagi karna sikhaayenge.

Deep jalaa kar arzi ka
Intazaar karoongi Guruji kee marzi ka
Aayenge, mere Guruji aayenge
Apni marzi mujhe sunaayenge.

Deep jalaakar agyaparataa ka
Naman karoongi kaaran karta ka
Aayenge, mere Guruji aayenge
Mere liye Apna hukm sunaayenge.

Deep jalaa kar dhanyawaad ka
Intazaar karoongi Guru prasad ka
Aayenge, mere Guruji aayenge
Guru prasad Ve barsaayenge.

Deep jalaakar vaade ka
Samarthan karoongi apne nek iraade ka
Aayenge, mere Guruji aayenge
Mujhe taar kar paar lagaayenge.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Deep Jalaa Kar (11/11/2023)