Month: December 2023

December 21, 2023

Om Namaha Shivaya
Aaj Ka Suvichaar 🙏🏻🙏🏻

#2132

        Paawan Bandagi Kee Reet

Ek pal mein vartmaan bann jaata hai ateet
Waqt kee baazi koi insaan nahin sakta jeet
Ye toh shukr hai ki Guruji ko hum se hai preet
Varna besura hee reh jaata zindagi ka geet.

Chaahe safar mushkil ho ya ho mulaayam
Guruji kee kripa se Shivmayi layy rahe kaayam
Usee layy se baney rahenge hum nirbhay
Usee layy se mitenge hamaare sabhi sanshay.

Guruji banaate jaa rahe Hain path
Guruji de rahe Hain hamein sumat
Chalna toh hai hamaara kaam
Lete huey Guruji ka naam.

Shiv Shakti Hain apne bheetar
Guru kripa se Unke bodh ka milta hai hamein avsar
Varna insaan beshak poori zindagi bhatak le idhar udhar
Aksar bin bodh, bin saakshaatkaar ke hee veh jaata hai marr.

Guruji kee meharbaani se sur mila hai zindagi ke geet ko
Utaar chadhaav ke shor se malin na honei dein sureele sangeet ko
Samarpan kar dein har sukh dukh Guruji mein basey Prabhu, Nath, aur meet ko
Bhakti ko prem bhaav aur shraddha se nikhaar kar nibhaayein paawan bandagi kee reet ko.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Paawan Bandagi Kee Reet (12/21/2023)

December 20, 2023

Om Namaha Shivaya
Aaj Ka Suvichaar 🙏🏻🙏🏻

#2131

        Divya Swar

Vo anupam divya swar
Jabb praapt hotey Hain Parameshwar
Vo hai atmasaat Guruji ke naam mein
Vo pahunchaayega tujhe param dham mein.

Guruji Hain Shiv avatari
Unka naam hai kalyaankaari
Duur karey tann, mann, dimag kee beemaari
Karaaye param dham jaane kee tayyaari.

Yeh naam hai aisa anoop amrit
Jis se vikaar aur paap jaate hain mitt
Yeh naam karta hai japne wale ka hitt
Iske japp se paawan hota hai charitra aur chitt.

Kyunki dhul jaata hai antas ka mal
Badh jaata hai manobal
Museebaton ka hota hai hal
Har paristhiti mein bhakt jaata hai sambhal.

Guruji hee bhakt ko sambhaalte Hain
Aur har pal sahaara dete Hain Apne naam ka
Guruji bhakt ka jeevan sanvaarte Hain
Aur raasta dikhaate Hain Apne dham ka.

Guruji kee kripa se khulte hain aise dwaar
Ki Unkee mehar se hota hai atma-saakshaatkaar
Goonjti hai divya swar kee vaani
Aur nikhar jaati hai ye yatra ruhaani.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Divya Swar (12/20/2023)

December 19, 2023

Om Namaha Shivaya
Aaj Ka Suvichaar 🙏🏻🙏🏻

#2130

      Meetha Moad

Kisee aur ko kusoor vaar theheraane se kya faayda
Suna hai ki ye hai karmon ka kaanoon-e-kaayda
Is adalat mein chalti hai sirf Guru kee vakaalat
Isliye, tu Guruji se guzaarish kar ki tu kar paaye Unkee ibadat.

Ibadat mein kewal anand hee nahin milta
Balki ibadat se atma ka asal swaroop hai khilta
Kyunki Guru Govind se badhti hai kareebi
Jo hoti hai bhakt kee khushnaseebi.

Mehak Guruji kee mamta bhari mehar kee
Shuddhi badhaati hai ibadat ke imaan-e-itr kee
Jo duur kar deti hai vyakulta har fikr kee
Aur mitaane lagti hai zaroorat fikr ke zikr kee bhi.

Zikr chalta rehta hai, lekin Guruji ke prati preet ka
Raasta banta jaata hai mann par jeet ka
Kyunki Guruji kee kripa bin
Mann par vijay paana nahin mumkin
Aur ibadat karte karte ek din
Mumkin ho paata hai har namumkin.

Ibadat leti jaayegi tujhe Ishwar kee oar
Isliye Guru Govind kee ibadat karna na chod
Tera ahankar bhi ibadat degi toad
Aur prema bhakti ko degi ek bahut meetha moad.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Meetha Moad (12/19/2023)

December 18, 2023

Om Namaha Shivaya
Aaj Ka Suvichaar 🙏🏻🙏🏻

#2129

      Tu Sees Jhukakar Dhyan Dhar

Tujhe apne haath mein Beshak na mehsoos ho Guruji ka haath
Kintu tu itminaan rakh
Guruji ne tera haath thaama hua hai.

Tujhe beshak na ho raha ho ehsaas
Guruji ke sparsh ka
Kintu tu bharosa rakh
Unka spandan tere roam roam ko taar raha hai.

Tujhe dikh raha hai jo andhkaar
Tu abhi dekh nahin sak raha hai uske paar
Kintu tu himmat na haar
Guruji tere liye jalaa rahe Hain deep kayi hazaar.

Har deep mein divya jyot hai Guruji ke prataap kee
Jiske dwaara samaapti hogi tere dukh aur santaap kee
Tujhe beshak har pal lagg raha hai ek saal kee bhanti
Tu ummeed na kho
Har pal mein tera kalyaan kar rahi hai Guruji kee kanti.

Beshak tujhe mehsoos ho rahi hai ghutan
Beshak bechayyn hai tera mann
Tu saboori se na badhaana duuri
Dekhna, Guruji kee karuna se teri tapasya na rahegi adhoori.

Guruji Maharaj mahasaagar Hain karuna aur kalyaan ke
Ve bakhshanhaar Hain, daata Hain Ve har daan ke
Ve nirankaar Hain, rakshak Hain Ve tere har vardaan ke
Tu sees jhuka kar dhyan dhar charnon mein Guru Sahib meharbaan ke.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tu Sees Jhukakar Dhyan Dhar (12/18/2023)

December 17, 2023

Om Namaha Shivaya
Aaj Ka Suvichaar 🙏🏻🙏🏻

#2128

     Musaafir Albela

Musaafir albela
Chal pada akela
Maana usne ki har vela
Uske liye rahega suhela.

Kyunki vo ho chuka thaa Guruji mein magan
Uske mann mein thi Unke prati aisee lagan
Ki Unhee ka naam leti thi uskee har dhadkan
Koi paristhiti na banti thi uskee bhakti mein adachan.

Ye Guruji Maharaj ka hee toh thaa ashirwaad
Ki veh Unmein leen rehta thaa din raat
Unse keh leta thaa dil kee har baat
Uska akelapann bann gaya thaa ekant kee daat.

Daat, jo Guruji ne musaafir ko dee bahut pyaar se
Jisey Guruji bakhshte rahe swayam Apne deedar se
Usey kya karna thaa kuch lekar sansaar se
Uskee toh seedhi doar bandhi thi Parwardigaar se.

Simran aur dhyan ke uske prayaas ke dauran
Guruji usey pradaan karte gaye adhyaatmik gyan
Bhautik nashwarta se waakif ho gaya veh achchi tareh se
Uska mann vyakul nahin hota thaa kisee bhi vajeh se.

Guruji ke geet gaate huey
Daya aur dharma nibhaate huey
Anaasakti ko apanaate huey
Veh jeeta thaa muskuraate huey.

Guzarta chala samay
Aur jabb aayi pralay
Toh sthir aur shant raha musaafir ka mann
Guruji ke charan dete rahe usey sharan.

Jaise jaise beet-ta gaya samaa
Veh sadhna mein leen hota raha
Guruji ne dee usey Apne saanidhya kee aisee pavitra panah
Ki veh Guruji mein hee gaya samaa.

Guruji se abhinn hua musaafir
Paramatama mein samaayi uskee atma
Kaash aisa anjaam ho har bhakt ka
Jabb ho is maanav jeevan ka khatma.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Musaafir Albela (12/17/2023)

December 16, 2023

Om Namaha Shivaya
Aaj Ka Suvichaar 🙏🏻🙏🏻

#2127

    Tera Har Ghaav Jaayega Bhar

Tera har ghaav jaayega bhar
Tu ghabraa matt, na tu darr
Tujh par Guruji barsaa rahe Hain Apni mehar
Taaki safal ho tera janmon ka ye safar.

Khel hai ye jeevan
Mithya hai ye jeevan
Maya hai ye jeevan
Phir bhi phans jaata hai mann.

Guruji kar rahe Hain tera kalyaan
Aur badhaa rahe Hain tera manobal, o naadaan
Taaki tu is khel mein na ulajh
Aur tu iske asthaayipann ko le samajh.

Ve bakhsh rahe Hain tujhe jo simran
Koshish kar ki usmein leen ho tera mann
Koi bhi pareshaani ya duvidha gherne lagey jis kshan
Toh Guruji mein liv jodne ka kiya kar prayatn.

Beshak na ho ye aasaan
Lekin zaroori hai dena imtehaan
Teri neeyat, soch, koshish, karma dekh rahe Hain Guru meharbaan
Tu bachcha hai Unka, Ve awashya rakhenge tera dhyan.

Guruji ka dhanyawaad karna tu jaata hai bhool aksar
Niraasha mein tu aksar gavaa deta hai Unhe shukrana karne ka avsar
Ve karte Hain teri raksha har baar
Isliye raha kar sada Unka shukrguzaar.

Ye samaa aseem lagg raha hai tujhe jabb ki jeevan ke din hee hain do chaar
Swaabhaavik hai kyunki tu kar raha hai ghaav ke bharne ka intazaar
Tere har ghaav se kaheen gehra hai tere liye Guruji ka pyaar
Uss pyaar par bharosa karte huey ye samay tu le guzaar
Mehendi ke rangg mein pathar par pis jaane ke baad aata hai nikhaar
Guruji tere ghaav bhar kar tere bhaagya ke lekhe ko awashya denge sanvaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tera Har Ghaav Jaayega Bhar (12/16/2023)

December 15, 2023

Om Namaha Shivaya
Aaj Ka Suvichaar 🙏🏻🙏🏻

#2126

Guruji Ke Naam Ka Aasra

Sansaar ka kya kehna
Kisee ne bhi nahin yahaan sada rehna
Har koi yahaan mehmaan hai
Sanatan shashvat toh kewal Shiv Bhagwaan Hai.

Srishti kee rachna, paalan poshan, aur sanhaar
Mahadev hee sambhaalte Hain inka bhaar
Brahmaji aur Vishnuji utpann huey Unhee ke angg se
Saari srishti ke rangg hain Unhee ke rangg se.

Chaurasi lakh yoniyon se oopar utha kar
Mahadev ne mauka diya ki hum insaan ke roop mein lein janam
Agar unnat ho jaayein hamaare karam
Toh is janam mein nibhaa paayenge hum insaaniyat ka dharam.

Guruji Hain Shiv avatari
Aaye karne adhyaatmik unnati hamaari
Hum par karmon ka karz hai itna bhaari
Unkee mehar se awashya ho sakti hai aagey badhne jee tayyaari.

Guruji hamein de rahein Hain prerna
Insaaniyat ke dharam ko nibha paane kee
Achchaayee ke raaste par chalte jaane kee
Purusharth mein safal ho paane kee.

Guruji ka naam hai teerath dham
Kintu hamein karna hoga apna kaam
Taaki baar baar na bann-na pade mehmaan
Varna atma ka aana jaana lagaa rahega yahaan vahaan.

Guruji kee sharan mein hai hamaara tarna
Unhee kee sharan mein hai hamaara jeena marna
Hum bhakton ka toh naseeb hee khil gaya hai
Jabb se Guruji ke naam ka aasra mil gaya hai.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Naam Ka Aasra (12/15/2023)

December 14, 2023

Om Namaha Shivaya
Aaj Ka Suvichaar 🙏🏻🙏🏻

#2125

Ek Nadiya Ke Bahut Paas

Ek nadiya ke bahut paas
Ek gaaon mein karta thaa vaas
Ek niwaas mein ek jann udaas
Jiske bheetar thi Guruji kee praapti kee aas.

Swayam ko maanta thaa Guruji ka das
Prabal rehti thi uske mann mein simran kee pyaas
Din raat karta thaa simran aur dhyan ka abhyaas
Guruji anugrahit karte rahe uska ye paawan prayaas.

Guru praapti kee aas mein das hua itna udaas
Ki veh Guruji se karne lagaa ardaas
Ki ye sansaar usey aata nahin hai raas
Veh kewal chaahe ki veh ho buss Guruji ke paas.

Guruji ne dhyan ke dauran dilaaya das ko ehsaas
Ki jeevan mein purusharth ka mahatva hai bahut khaas
Guruji ne bakhsha das ko purusharth safal karne ke liye ullaas
Aur Unka hukm maankar mitne lagaa das ka traas.

Kartavya nibhaate huey bhi Guruji mein leen rehta thaa das
Badhta gaya uska Guruji par vishwaas
Usey aakarshit na karta thaa bhog vilaas
Guruji mein hee ramaa raha uska har shwaas.

Ho gaya Guruji kee dhun mein befikr aur bindaas
Usey gyat ho gaya jabb aaya uske shareer chodne ka maas
Din aur kshan bhi jaan liya usne, aisa divya hua aabhaas
Aur Guruji ke kamal charnon mein samaa gaya veh das.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Ek Nadiya Ke Bahut Paas (12/14/2023)

December 13, 2023

Om Namaha Shivaya
Aaj Ka Suvichaar 🙏🏻🙏🏻

#2124

Guruji Ke Naam Ke Mahasaagar Mein

Guruji ke naam ke mahasaagar mein
Tum jitne gotey khaaoge
Guruji mein tum utna hee zyaada
Ramm kar khotey jaaoge.

Aisa karte karte tum
Apne bheetar jhaank paaoge
Atma-saakshaatkaar dwaara
Guruji kee kripa ka lekar sahaara.

Guruji ka bakhsha hua simran aur dhyan
Le jaayega tumhaare bheetar tumhe vahaan
Jahaan jhaank kar badal jaayega tumhaara jahaan
Jahaan baahar ke jahaan ka na hoga naam-o-nishaan.

Buss, vahaan hongei Guruji aur tum
Tum ho jaaoge uss jahaan mein gum
Yoon goonjegi Guru milan kee dhun
Ki har baahari ehsaas kee oar tum ho jaaoge sunn.

Guruji kee mehar hogi aparampaar
Hoga tumhe atma-saakshaatkaar
Duur nahin hai veh saal aur veh vaar
Buss, prayaas karna hai baarambaar.

Ek pal bhi na karo vyarth
Is zaroorat ka hai gehra arth
Kyunki isee mein hai tumhaara kalyaan
Jo karenge Guruji karunanidhaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Ke Naam Ke Mahasaagar Mein (12/13/2023)

December 12, 2023

Om Namaha Shivaya
Aaj Ka Suvichaar 🙏🏻🙏🏻

#2123

          Taqdeer Bante Dekhi Hai

Taqdeer bante dekhi hai, Guruji,
Aapke darbar mein
Aapka darbar divya hai, anokha hai, Atulneeya hai is saare sansaar mein.

Mujh par rehmat keejiye ki kabhi kamee na rahe
Aapke prati mere pyaar mein
Aapki khushi sabse zyada ahamiyat rakhe mere liye
Zindagi ke din chaar mein.

Kyunki jagg ko khush karne kee na hai mujh mein kaabiliyat
Na hee aisee hai mujh mein koi chaahat
Gireban mein jhaankoon toh Aap khush aayein nazar
Toh chayyn se kar paaoongi jeevan basar.

Jagg kee mithya, jagg mein raag dvesh
Bhayy aur dosh se duniya ke badalte vesh
Inse badhte huey mere vichaar aur vikaar
Bante rahenge mann kee ashanti aur asthirta ka aadhaar
Inse sanchit hotey rahenge karam
Aur na jaane kitnee baar lena padega janam.

Sabhi ke liye dua nikle mere dil se sada
Aapse bakhshish mil jaaye jabb jabb mujhse ho khataa
Tasalli hai mujhe ki Aapne hai sweekaara
Varna kaise chalta mera jeevan mein guzaara
Khushnaseeb hoon mai ki Aap Hain mera sahaara
Aapke sahaare bin jeena nahin gawara.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Taqdeer Bante Dekhi Hai (12/12/2023)