Month: December 2023

December 11, 2023

Om Namaha Shivaya
Aaj Ka Suvichaar 🙏🏻🙏🏻

#2122

           Guruji Kee Mehar-e-Nazar

Guru hee Shiv
Shiv hee Guru
Guru aur Shiv mein nahin koi fark
Is satya mein na jeet paaye koi tark.

Guruji kee mehar-e-nazar ka shikhar
Hamein aa hee nahin sakta nazar
Jabb takk na ho Unkee nadar
Kyunki veh shikhar hai saadhaaran se bilkul hatkar.

Guruji Hain swayam saadagi aur saralta kee moorat
Ati vinamr hai Unke sarvshaktimaan shikhar kee soorat
Tabhi toh hai veh shikhar saadhaaran se hatkar
Jhuk kar choom leta hai har bhakt ko, jo aata hai Guruji ke dar par.

Bhakt jitna neevan hota jaata hai
Veh jitna ahankar khota jaata hai
Mehsoos hoti hai usey Guruji kee utnee hee mehar-e-nazar
Badhti jaati hai uske antas mein Guruji ke kiye har kalyaan kee kadar.

Jaise jaise safar aagey chalta hai chhaatr ka
Pavitrikaran hota jaata hai uske mann roopi paatr ka
Nikhar kar spasht hokar khilta hai bhakt ke bheetar ka Shivmayi roop
Gehra hota jaata hai Guruji aur bhakt ka rishta anoop.

Dheere dheere Guruji kee rehmat se
Guru kripa se bhakt kee mehnat se
Bhakt Guruji ke prati ho jaata hai sarvsamarpit
Shivroopi bhakt aur Guruji ke beech kee har duuri jaati hai mitt.

Aise safar ka mil jaaye jisey mauka
Uske liye hai yeh avsar sundar aur anokha
Jo bhakt jann Guruji kee oar ek kadam badhaayein
Guruji sainkdon kadam chalkar unke kareeb aayein
Jinhe bhi miley Guruji kee suraksha kee sharan
Unka har bhaar sambhaal lete hain Guruji ke charan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Mehar-e-Nazar (12/11/2023)

December 10, 2023

Om Namaha Shivaya
Aaj Ka Suvichaar 🙏🏻🙏🏻

#2121

Chaahe Buri Hoon Ya Hoon Achchi

Param poojya Guruji,

Aapke daras pe
Mai balihaari jaaoon
Aapke taras pe
Mai sees jhukaaoon.

Aapki nazar se
Mai tarti jaaoon
Aapki nadar pe
Shukrana karti jaaoon.

Aapke daya daan se
Ho mera uddhaar
Aapke har vardaan se
Ho jeevan mein sudhaar.

Aapki dee prerna se
Badhe mera utsaah
Aapki dee chetna se
Dikhe mujhe raah.

Aapki rehmat se
Mai karoon mehnat
Aapki inaayat se
Mai karoon ibadat.

Qubool ho sada Aapki marzi
Koi haisiyat na rakhe meri koi marzi
Jabb Aapne thaam lee hai doar
Toh phir kyun jaana kaheen aur?

Mera toh sab kuch yahaan hai
Aapke charnon mein hee mera jahaan hai
Chaahe buri hoon ya hoon achchi
Sada maaniyega mujhe Apni bachchi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Chaahe Buri Hoon Ya Hoon Achchi (12/10/2023)

December 9, 2023

Om Namaha Shivaya
Aaj Ka Suvichaar 🙏🏻🙏🏻

#2120

         Vahee Kshan

Hota hai vahee kshan
Kintu kaheen hoti hai khushi kaheen gumm
Kaheen kisee kee mrityu kaheen navjaat shishu le janam
Har kshan se judte jaayein praaniyon ke karam.

Jabb takk hai srishti, yahee hai niyam
Waqt chalte ye silsila na ho khatm
Kisee ko lagey kismat dhaa rahi hai sitam
Toh khushkismati anubhav karey kaheen aur kisee aur ka mann.

Mann, jo mitr hai jabb usmein ho sanyam
Varna jo baney insaan ka dushman
Kamzor ho toh vikaar karein uspar aakraman
Balshali ho toh usey na prabhavit karey koi bhi aakarshan.

Mann mein hee Ram, mann mein hee Raavan
Mann hee hai bheetar ka darpan
Is mann mein ekatrit ho jaaye jo Guruji ke naam ka dhan
Toh ye mann kisee bhi janam mein na rahe nirdhan.

Sabse paawan hai Guruji ke naam se juda bandhan
Ismein bandh kar nikhar jaata hai Guru Govind ka vandan
Mann mein khushboo phaylaata hai Guru chintan ka charul chandan
Guruji aur Unke naam mein ramm kar saarthak ho jaata hai jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Vahee Kshan (12/09/2023)

December 8, 2023

Om Namaha Shivaya
Aaj Ka Suvichaar 🙏🏻🙏🏻

#2119

                Aapki Ek Nazar Se

Param poojya Guruji Maharaj,

Aapki ek nazar se nazariya jaata hai sudhar
Aapki nadar se bhakt dekhna chod deta hai idhar udhar
Buss, Aap hee Aap nazar aate Hain
Jidhar takk jaati hai bheetar aur baahar nazar.

Vintee hai ki Aap hee rahein vandan mein
Aap hee basey rahein chintan mein
Aap dikhein sada mann ke aur bhautik darpan mein
Aap hee dikhein har phool aur har upvan mein.

Aisee shuddhi bakhsh deejiye mujhe mere antakaran mein
Ki yaad rakh paaoon Aapki divyata hai har jann mein
Aapki kripa aur Aapki bakhshi koshish se yoon jud jaaoon simran mein
Ki dhyan hota jaaye gehra aur samta aa jaaye mann mein.

Aapki daya se samta badhaayegi kshamta
Aur ruhaani seedhiyan aayengi raas
Jis bhi avastha mein, jaise bhi haalaat mein rakhiyega
Apni sharan mein rakhiyega, Aapse hai ye ardaas.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aapki Ek Nazar Se (12/08/2023)

December 7, 2023

Om Namaha Shivaya
Aaj Ka Suvichaar 🙏🏻🙏🏻

#2118

Vaastavik Swaroop Hamaara

Adviteeya hai vaastavik swaroop hamaara
Jiske anubhav ke liye atma-bodh hai zaroori
Jo liya nahin simran aur dhyan ka sahaara
Toh Param Purusharth kee praapti reh jaayegi adhoori.

Aawashyak hai duur hona avidya ka andhkaar
Taaki Brahm ke satya ka bodh ho paaye
Taaki sansaar ke mithyaroop kee pehchaan ho jaaye
Taaki parmaarth ka gyan deepak bheetar prakash phaylaaye.

Guruji Hain Maha Dev ke avatar
Sambhaalte Hain sangat ke ghar parivaar
Sirjanhaar aur paalanhaar Hain Ve, aur Hain Ve taaranhaar
Anginat sangat ka karte aaye Hain Ve uddhaar.

Guruji kee sharan mein bakhshish miley simran kee
Unhee kee mehar se ho paaye dhyan
Kalyaankaari hai Guruji kee kanti
Pradaan karey bhakt ko shaashvat shanti.

Itne dayaavaan Hain hamaare Guru
Adhyaatmik unnati karaate Hain shuru
Na chodni hai ghar grahasthi, buss soch aur karma mein laana hai parivartan
Unke bakhshe simran, sewa, satsang se saaf karna hai mann ka bartan.

Koshish karna toh hai hamaara hee farz
Utaarna hai agar karmon ka karz
Guruji karein har bhakt kee madad aur dein ashirwaad
Taaki bhakt ho har tareh ke paash se azad.

Guruji kee mehar se hoti rahe antas kee shuddhi
Guruji sumat bakhshein taaki badhe subuddhi
Apne dharma ka paalan karna rahe smaran
Guruji kee sharan mein safal ho jaaye janam maran.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Vaastavik Swaroop Hamaara (12/07/2023)

December 6, 2023

Om Namaha Shivaya
Aaj Ka Suvichaar 🙏🏻🙏🏻

#2117

Bhakti Ke Utsaah Kee Jwaala

Sabr rakhta chal
Kasht jaayega tal
Na jaane aaj hoga ya kal
Par tu zaroor hoga safal.

Bilkul na soch ki tu hai anath
Tere pyaare Guruji Hain tere saath
Mat pita ka farz Ve nibhaayein din raat
Ye sach mein hai bahut badi baat.

Chunautiyon se agar lagey darr
Guruji se tu baatein kiya kar
Abhi tera bura waqt hai agar
Tu phir bhi jeete jee na marr.

Koshish kar rakhne kee sakaaratmak vichaardhaara
Arey, Guruji Hain tera sahaara
Bahut dayalu Hain Ve aur Unka dwaara
Unka prataap hai mahaan aur pyaara.

Guruji kee guruyaayee mein basta hai bhakt ka kalyaan
Guruji kee vadiyaayee deti hai bhakt ko karuna ka daan
Baadalon ke peechhe chhipa sooraj dikhega aur phaylaayega apna ujaala
Tu apne bheetar jaagrit rakh bhakti ke utsaah kee jwaala.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Bhakti Ke Utsaah Kee Jwaala (12/06/2023)

December 5, 2023

Om Namaha Shivaya
Aaj Ka Suvichaar 🙏🏻🙏🏻

#2116

             Har Haal Mein Albela

Kisee ne poocha mujhse
Ki kaisa hai mera haal chaal

Meri tabeeyat thi kuch nasaaz
Lekin bataana na chaahti thi ye raaz
Kahe bin bhi gaya na raha
Toh mainey kuch yoon kaha…

‘Ye hai bahut khoobsoorat sawaal
Haal aur chaal dono hain kamaal
Kyunki Guruji Haina, Ve kar ke rakhte Hain nihaal
Kyunki Unka ashirwaad hai bhakton kee dhaal’

Aane bhi lagey kabhi anuchit khayaal
Toh Unke shukrana mein miltee hai taal se taal
Bhaybheet hai Jinse swayam kaal
Ve swayam hee rachte Hain maya ka aakarshak jaal.

Kaam, krodh, lobh, moh, ahankar
Jhooth, hinsa, chori, nasha, vyabhichaar
Irshya, dvesh aur ninda
Bhautikvaad se judi har chinta
In mein se ek ho ya hon anek
Inse prabhavit hai jann pratyek.

Shiv roopi hain hum sabb
Jeevan mein pehle bante hain Shiv se Jeev
Isee safar mein chhipi hoti hai neev
Jiske sahaare bante hain phir jeev se Shiv.

Guruji hee Hain veh neev, veh sahaara
Ye safar mukammal hota hai Jinkee kripa dwaara
Unkee har leela hai anupam anoop
Maya hai Unkee shakti ka hee roop.

Unke ashish aur hamaari nek koshish se
Niyantran mein aa paayenge hamaare vikaar
Ye prayaas jaari rakhna hoga baarambaar
Tabb hee aayega khud mein sudhaar.

Jaise sooraj uday hota aur dhalta rahega
Vaise hee sukh dukh ka khel toh chalta rahega
Kabhi honei lagenge behaal
Kabhi hoga changa haal
Kintu Guruji har pal rahe Hain sambhaal
Isliye jaise jaise guzarenge din, maheene, aur saal
Hum oopar uthte jaayenge sukh dukh se
Guru mukh bante jaayenge mann mukh se.

Nirantar hogi bandagi kee bela
Har lamha haal hoga suhela
Koi bhakt na hoga niraash ya akela
Har bhakt rahega har haal mein albela.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Har Haal Mein Albela (12/05/2023)

December 4, 2023

Om Namaha Shivaya
Aaj Ka Suvichaar 🙏🏻🙏🏻

#2115

        Guruji Kee Kripa Kee Vrishti

Ho rahi hai, ho rahi hai
Guruji kee kripa kee vrishti
Jaise Unkee sangat bheegey nirantar ismein
Vaise hee bheegti rahe saari srishti.

Varsha se upajaao bann jaaye vo, jo bhoomi ho banjar
Vaise hee kalyaan ho har uss praani ka, Guru kripa ho jaaye jis par
Antas ka sookha ho khatm
Maan kar Guruji ka hukm
Kyunki Unke hukm mein bhi kripa basee hai Unkee
Aur Unkee kripa mein hai layy satvagun kee madhur dhun kee.

Unkee kripa se har paristhiti sweekaar kar paayein mujh jaise naadaan
Unkee kripa se hee Unhe samarpan karna ho jaaye aasaan
Unkee kripa kee baarish pahunch jaaye antas ke bheetar takk
Atma bhi bheegti rahe Unkee kripa se athak.

Guruji kee rehmat se sab kar paayein mehnat
Unkee bhakti mein madhosh rehkar miley santosh
Na rahe bheetar aur baahar ka sookha
Koi na rahe bhojan ya padaarthon ke liye bhookha
Pyaas bhi badhe toh simran, sewa, aur satsang kee
Rangoli ho sabke antas mein Guruji ke naam ke rangg kee.

Guruji kee kripa kee hoti rahe vrishti
Padti rahe saari srishti par Unkee divya drishti
Kalyuga mein Guruji aaye bannkar Shiv roopi avatar
Apne sangg kripa kee vrishti laaye Ve taaranhaar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Guruji Kee Kripa Kee Vrishti (12/04/2023)

December 3, 2023

Om Namaha Shivaya
Aaj Ka Suvichaar 🙏🏻🙏🏻

#2114

          Nirmal Anand Kee Saugat

Agar chaahta hai tu ki tu jaaye tarr
Toh ukaad de laddhadpann kee jadd
Apni chetna se tu matt ladd
Vyarth hain dikhaawe, unmein na tu padd.

Kar aur sunn Guru Govind ka gungaan
Karta chal Unke naam amrit ka paan
Koshish toh kar
Zamaane se na darr
Na honei de apni aur durdasha
Chadhne de swayam par Guruji ke naam ka nasha.

Maya toh hai bahut prabal
Vo na chaahe ki kumm ho tere mann ka mal
Kintu tu poora prayatn kar ki tujh par naam ka nasha ho itna gehra
Ki maya vifal honei lagey tujh par jataa paane mein apna pehra.

Ye nasha achcha hai tere antas aur teri atma ke liye
Is nashe se tere bheetar ujjwal hotei rahenge bandagi ke deeye
Guru par poora vishwaas kar, na bann graas kaal ka
Unhe poora gyan hai tere asal haal ka.

Guruji se seedhi taar joad
Anaasakt ho baaki sab chod
Guru naam ke nashe se jaise jaise tu hota chalega pavitra
Vaise vaise sadachaari se sajta jaayega tera charitra.

Guruji lete rahenge tera imtehaan
Guruji karte rahenge tera kalyaan
Guru naam hai amrit kee khan
Iske nirmal nashe se na reh tu anjaan.

Ye hai aisa nasha
Jo sanvaar dega teri manodasha
Tu mehsoos kar paayega
Guru kripa kee barsaat
Usmein bheegte huey paayega tu
Nirmal anand kee saugat.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Nirmal Anand Kee Saugat (12/03/2023)

December 2, 2023

Om Namaha Shivaya
Aaj Ka Suvichaar 🙏🏻🙏🏻

#2113

          Kitne Anokhe Dhangg Se

Param poojya Guruvar,

Kitne anokhe dhangg se Aap
Bhakton ko banaa lete Hain Apna
Hoti hai hakeekat
Kintu kabhi kabhi lagta hai sundar sapna.

Aapke hukm mein toh
Swapn bhi nahin aata bin Aapki izaazat ke
Bhakt swapn avastha mein ho ya phir jaagrit avastha mein
Saare lamhe dhanya hotey hain Aapki inaayat se.

Kyunki Aapke ashishmayi amrit se paap dhulte jaate hain
Beshak kasht aate hain, kintu aagey ke dwaar khulte jaate hain
Aap Apni mehar-e-nazar se jo lete Hain bhakt ko dekh
Bhakt ke toh sudhar aur sanvar jaate hain lekh.

Ye safar kewal is janam ka nahin
Ye safar toh hai janam janam ka
Aap angg sangg Hain isliye jo hai vo hai sahi
Kyunki Aap karvaate Hain hisaab har pichhle karam ka.

Achcha hee toh hai jo halka hota chale ye bhaar
Vaise hee na jaane kitne janmon se kiya hai ye intazaar
Buss, Aap yoon hee angg sangg rehna, Guruvar
Kyunki ye safar na hoga safal bin Aapki nadar.

Subah se shaam hoti rahegi aur raat ke baad hogi prabhaat
Jabb takk saans hai deh mein, pal yoon beetenge bannkar din aur raat
Aap hee Noor-e-ilahi, Aap hee Apne bhakton ke nath
Shukr hai Aapka ki Aap sada rahenge saath.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Kitne Anokhe Dhangg Se (12/02/2023)