Month: January 2024

January 31, 2024

Om Namaha Shivaya
Aaj Ka Suvichaar 🙏🏻🙏🏻

#2173

        Praapti Hogi

Jabb takk nahin suljhegi bheetar kee kranti
Namumkin hai praapt karna bheetar shanti
Nakaaraatmakta kee gaanthein khulni hain zaroori
Zaroori hai badhaana vikaaron se duuri
Varna ye chir shatru, jinhonei mann mein banaa liya hai ghar
Inhe milta rahega hamein kamzor banaate rehne ka avsar.

Yahaan koi kaam nahin azmaayish ka
Yahaan koi kaam nahin numaaish ka
Yahaan kaam hai vinamr guzaarish ka
Yahaan samarpan karna hai bhautik aasakti kee khwahish ka.

Kyunki samarpan hee hai waseela ekmaatr
Samarpan karega jo chhaatr
Usey meetha lagega Guruji ka bhaana
Seekh lega vo har haal mein muskuraana.

Chalta hai jo sangharsh antas ke bheetar
Jismein asur dhoondhte hain sur ko haraane ke avsar
Vo Guruji dwaara bakhshe simran se hoga samaapt
Vikaar roopi asuron par niyantran hoga jabb praapt.

Guruji ka bakhsha dhyan aur dhyan mein gyan
Na rehne dega bhakt ko naadaan
Uske sudharey huey vichaar aur karma hongei pramaan
Uskee adhyaatmik unnati hogi is sabka sundar parinaam.

Bheetar kee kranti honei lagegi shant
Antas bann jaayega paawan praant
Jeevan ka uddeshya aayega saaf nazar
Aisee mehar barsaayegi Guru Sahib kee nadar.

Guruji kee kripa aur karuna se
Sampatti ekatrit hoti rahegi Unke naam kee
Purusharth hoga safal
Bhakt ko praapti hogi bheetar basey Bhagwaan kee.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Praapti Hogi (01/31/2024)

January 30, 2024

Om Namaha Shivaya
Aaj Ka Suvichaar 🙏🏻🙏🏻

#2172

              Jeeyo Jeevan Laukik

Jeeyo jeevan laukik
Par lakshya rakho alaukik
Hotey jaao antarmukhi
Tab hee ho paaoge sukhi.

Antas ka hai ye safar
Uske liye tum karo apni oar se mehnat
Tum koshish toh karo
Mehnat ko anugrahit karegi Guruji kee rehmat.

Tumhaari ragg ragg mein Guruji samaayein
Bhakti ka aisa nasha karo
Saare aakarshan pheeke padd jaayein
Aisee apni dasha karo.

Pichhle janam ko tum nahin sakte sudhaar
Lekin is janam ko Guru kripa se lo tum sanvaar
Kewal saansaarik sukh takk thode hee na seemit hai Unka kiya uddhaar
Arey, Ve toh bhakt ke antas aur uskee atma ko dete Hain nikhaar.

Pichhle janam kee adhyaatmik yatra ne liya thaa viraam jis mukaam par
Is janam mein vaheen se shuru hua thaa tumhaara safar
Is janam mein hogi tumhaari jtnee adhyaatmik unnati
Tumhaare agley janam mein vaheen se praarambh hogi tumhaari ruhaani pragati.

Aise karte karte
Karmon ke kat-te kat-te
Guruji kee mehar se jholi bharte bharte
Tumhaara safar le chalega tumhe safalta kee oar
Buss, apne gireban mein jhaankte huey karte rehna swayam par tum gaur.

Isliye abb jo aagey chal pade ho
Toh matt laut jaana peechhe
Dhyan rahe adhyaatmik seedhi kee chadhaayee mein
Kaheen gir na jaao neeche.

Guruji ka ashirwaad hai tumhaare saath
Ghabraane kee nahin hai koi baat
Tum satark rehkar mehnat karo din aur raat
Tumhaare Bhagwaan har pal Hain tumhaare saath.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jeeyo Jeevan Laukik (01/30/2024)

January 29, 2024

Om Namaha Shivaya
Aaj Ka Suvichaar 🙏🏻🙏🏻

#2171

Prerna Ke Paawan Strot

Prerna ke paawan strot
Mere pyaare Guruji Maharaj
Aap Hain divya jyot
Mere sundar Shiv sartaj.

Koi ohada nahin
Koi sauda nahin
Ye rishta hai itna pyaara
Karmakaand nahin
Andhvishwaas nahin
Ye rishta hai ruhaani sahaara.

Jabb se Aap baney mere rahnuma
Meri kismat hui khushnuma
Beshak utaar chadhaav aate rahenge
Jaanti hoon, Aap sada saath rahenge.

Surakshit hoon goad mein Aapki
Lakeerein mit rahi hain dukh santaap kee
Sikha rahein Hain Aap mushkilon ko muskuraakar sehna
Sikha rahein Hain Aap Aapki raza mein raazi rehna.

Is se pehle ki ruhaani naadaani ka ghoda aur duur bhaagey
Mehar keejiye ki meri atma aparipakvata kee neend se jaagey
Toad kar laukik moh ke dhaagey
Aap badha rahe Hain kaheen aagey.

Aap le jaayiyega vahaan
Aap le jaana chaahein jahaan
Mujhe nahin fikar
Jaanti hoon Aapko hai khabar ki vo mukaam hai kahaan
Mere liye toh Aapke charnon mein hai samast dharti aur aasmaan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Prerna Ke Paawan Strot (01/29/2024)

January 28, 2024

Om Namaha Shivaya
Aaj Ka Suvichaar 🙏🏻🙏🏻

#2170

    Sachche Badshah

Param poojya Guruji, mere Sachche Badshah
Aapko sab hai pataa
Jinke baare mein mai paaoon ya na paaoon bataa
Aap ve saari kee saari mushkilein dete Hain hataa.

Dikhta hai mujhe Aap mein Rabb
Jinhe dhoondh rahi thi tabb
Akela mehsoos kar rahi thi jabb
Adhoora sa lagg raha thaa jabb sabb.

Aapne kar dee kripa aur joda Apne sangg
Nazar aane lagey bhakti ke itne anokhe se rangg
Safar banta gaya adbhut tareh se ruhaani
Disha paane lagi meri zindagaani.

Raaste mein jo kashton ke kankar aate Hain
Aap Apni mehar se unhe hataate Hain
Har karma ke bhaar ko kumm kar ke Aap katvaate Hain
Chinta ko chintan mein badal kar aagey chalna sikhaate Hain.

Aapki karuna se nazariye mein aaya hai fark
Aapki daya se mann se nikal gaye hain kayi tark vitark
Apni khaamiyan aane lagi hain samajh
Kitnee uljhanein gayi hain sulajh.

Sambhaalte rahiyega ghar parivaar ko
Sambhaalte rahiyega naukari aur vyaapaar ko
Sanvaarte rahiyega mere mann ke har vichaar ko
Nikhaarte rahiyega meri atma ke aakaar ko.

Kaha hai Aapne ki Aap angg sangg rahenge
Jaanti hoon Aap mere liye aagey bhi kasht sahenge
Aapke upkaaron ka ehsaan mai kisee janam mein bhi nahin sakti chuka
Buss, Aapke charnon mein prem luta kar sees sakti hoon jhuka.

Aapka prataap hai aparampaar
Mujhe hai poora aitbaar
Ki Aap karenge mera uddhaar
Aur le jaayenge mujhe bhavsaagar ke paar.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sachche Badshah (01/28/2024)

January 27, 2024

Om Namaha Shivaya
Aaj Ka Suvichaar 🙏🏻🙏🏻

#2169

             Mera Aane Wala Kal

Param poojya Guruvar,

Na jaane kitna uljha hua hai
Mere pichhle karmon ka khaata
Arzi hai meri Aapse
Ki sabr aur shukr bakhsho, mere daata.

Is janam ke baad bhi
Mere har janam mein rakhna mujhse naata
Aapko maana hai Apna Prabhu jabse
Tabse Aapka saanidhya hee sukh hai laata.

Parishram bakhshiye, bakhshiye santosh
Subuddhi bakhshiye, mitaatiye mere dosh
Bakhshiye mann ko hunar samarpan ka
Bakhshiye mera har paap mere har janam ka.

Karti rahoon Aapka shukrana har haal mein
Aapki kripa ko banaa paaoon jawaab apne har sawaal mein
Aapki karuna se sulajh jaaye meri har uljhan is prapanch ke jaal mein
Suruchi se taal mila kar jee sakoon Aapke har faisle kee taal mein.

Ye safar Aapke ashirwaad bin hota neeras aur vifal
Antas aur atma poshit hotey rahein paakar Aapke naam ka amrit roopi jal
Aapki mehar na hoti, toh haseen na lagta aaj ka ek bhi pal
Aapka saath hai, isliye jaanti hoon ki aaj se bhi behtar hoga mera aane wala kal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Mera Aane Wala Kal (01/27/2024)

January 26, 2024

Om Namaha Shivaya
Aaj Ka Suvichaar 🙏🏻🙏🏻

#2168

           Aayein Hain Aapke Dwaare

Hum nahin bach sakte
Apne kiye huey karmon ke bhugtaan se
Apni yogyata se kaheen zyada madad mil rahi hai hamein
Guru Shiv Bhagwaan se.

Abb toh sudhar jaayein
Swayam mein parivartan laayein
Ye janam bhi vyarth hee beet jaayega varna
Zaroori hai aise parinaam se darna.

Miley Hain hamein Guru pooran
Isee se behtar ho gaya hai jeevan
Bakhsha hai Unhonei hamein simran
Toh kyun vyarth gavaayein ek bhi kshan?

Har kshan aur bhi anmol hai guzare huey kshan se
Kyunki har kshan hamaara samay ghat raha hai is jeevan se
Har saans mohtaaj hai Guruji kee mehar kee
Kaun jaane zindagi dekhe ya nahin roshni kal ke sehar kee?

Simran aur dhyan ka laabh uthaayein
Dhyan na bhi lagey toh baith jaayein
Guruji ne toh vehem aur karmakaand ka pratibandh bhi hataa diya hai
Hamaare har karma ka adhiktar bhaar Unhonei swayam par liya hai.

Isliye simran dwaara karaa kar apne antas ka pavitrikaran
Shraddha bhaav se chhoote huey Guruji ke charan
Pashchaataap dwaara karein praayashchit
Taaki saaf honei lagey hamaara chit.

Chit kee chetna pahunche aisee oonchaayee par
Ki aagey badhe hamaara adhyaatmik safar
Taaki jabb bhi yahaan se hon vidaa
Toh hamein apni goad mein samaa lein Khuda.

Khuda, Guruji hamaare
Jeena marna hai Unhee ke sahaare
Guruji ne kitnon ke Hain kaaj sanvaare
Guruji pyaare, hum bhi arzi lekar aayein hain Aapke dwaare.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Aayein Hain Aapke Dwaare (01/26/2024)

January 25, 2024

Om Namaha Shivaya
Aaj Ka Suvichaar 🙏🏻🙏🏻

#2167

Paakar Guruji Kee Rahnumai

Guruji sarv-vyapi Hain
Guruji Hain sarvshaktimaan
Guruji sarvgyani Hain
Hain Ve Guru ke roop mein Bhagwaan.

Ve beshak abb na dikhein liye huey roop bashar ka
Kintu Unhe gyan hai har bhakt ke safar ka
Hamein koi andaaza nahin Unkee mehar-e-nazar ka
Hamaara kalyaan gavaah hai Unke har ashirwaad ke asar ka.

Unkee jo hai maujoodagi ruhaani
Uss se zindagi banti hai suhaani
Unkee kripa se hoti hai jo jaagriti
Uss se sudharti hai soch vichaar kee aakriti
Antas mein chalta hua Guruji ka nirantar chintan
Unkee bakhshish se miley jo sewa, satsang, aur simran
Kabhi Unke swapn darshan, kabhi Unkee khushboo
Jis se gadd gadd honei lagti hai rooh.

Aise mein mann mein umadti hai ullaas kee leher
Unn lamhon ke liye jaise waqt jaata hai theher
Uss leher se sanvar jaata hai vo din, vo peher
Niraash bhi hon, toh bhi ek anokha ehsaas laata hai mann mein sehar.

Guruji kee har sangat ke liye
Guruji ke bakhshe huey anubhav hotei hain anmol
Koi shabdon mein kar sakta hai bayaan
Kintu koi nahin sakta bol.

Bhaav hai ye gehraayee ka
Rass hai jismein Guruji kee vadiyaayee ka
Paakar Guruji kee rahnumai
Har sangat kee kismat hai muskuraayi.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Paakar Guruji Kee Rahnumai (01/25/2024)

January 24, 2024

Om Namaha Shivaya
Aaj Ka Suvichaar 🙏🏻🙏🏻

#2166

                    Jyot Jalaa Kar

Jyot jalaa kar baith jaao
Guruji ke samaksh
Mann kee aankhon se jaano
Guruji Hain pratyaksh.

Guruji toh swayam Hain anupam divya jyoti
Unkee mehar se sadgati hai hoti
Kewal neeyat aur koshish hamaari, bhaav hamaara
Kintu sabb mumkin karey Guruji ka sampoorna sahaara.

Hamaare mann ka Guruji ko sarvsamarpan
Hamaari oar se Unka nirantar chintan
Guruji ka hamein bakhsha hua simran
Unke dwaara hamaari chintaaon ka khandan.

Unka naam lete lete jo lein hum shwaas
Toh hota hai ek anokhi raahat ka ehsaas
Jaise Unhonei le liya ho bhaar har pareshaani ka
Unke charnon mein arpan hai har lamha hamaari zindagaani ka.

Har jyot hai Guruji kee divya jyoti ka hissa
Har atma hai hissa Paramatama Parameshwar ka
Guruji ke ashish bin na kaayam kisee sangat kee kahaani ka kissa
Sabhi par ashirwaad banaa rahe Guruji Maharaj Maheshwar ka.

Shabdaateet hai is jyot ka noor
Is jyot se antas ka andhera ho duur
Param poojya Guruji se hai yeh vinamr vandan
Ki is jyot se jyotirmay hota rahe saari sangat ka jeevan.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Jyot Jalaa Kar (01/24/2024)

January 23, 2024

Om Namaha Shivaya
Aaj Ka Suvichaar 🙏🏻🙏🏻

#2165

Tum Ho Jaaoge Safal

Anek janmon se bhi ho agar andhera
Aur ho veh jitna bhi ghanaa
Ek deep ke dheeme se ujaale se hee
Tum Diwali le sakte ho manaa.

Kyunki anginat janmon ke andhere mitaane ke liye
Na anginat janam chaahiyein, na hee anginat deep
Chaahiye toh veh ek pal
Jismein bheetar ek hee deep jaaye jal
Taaki uss ek pal mein janmon ka andhera jaaye mitt
Aur deep kee lau se ujjwal ho jaaye antakaran aur chitt.

Guruji kee rehmat se
Tumhaari kee hui mehnat se
Guruji ke naam ke deep ka ujjwal noor
Kar dega tumhaare bheetar ka andhera duur.

Phir beshak vo andhera ho kitne bhi janam se
Aur vo ho jis bhi kaaran se
Guruji ke ashish se tum taroge bheetar roshni ke aagaman se
Abhi se Unka shukrana karo tahe dil se aur neeven naman se.

Guruji awashya bakhshenge veh sunehra pal
Dekhna, jald hee andhera jaayega tal
Guruji ke naam mein hai aseem bal
Guruji ke ashish se tum ho jaaoge safal.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Tum Ho Jaaoge Safal (01/23/2024)

January 22, 2024

Om Namaha Shivaya
Aaj Ka Suvichaar 🙏🏻🙏🏻

#2164

             Sabr Aur Shukr Har Pal

Guruji kee sharan mein karta chal
Sabr aur shukr har pal
Tera mushkil samaa jaayega tal
Aaj nahin, toh vo awashya talega kal.

Tere sabr par, aur shukr par
Tere Guruji ko hai behad fakr
Tu jis bhi daur se raha hai guzar
Guruji ko hai poori khabar.

Unhe tere pichhle aur agley kee bhi hai pehchaan
Ve tere liye tujhse zyada Hain pareshaan
Tujhe lagta hai jokhim mein hai teri zindagi aur jaan
Lekin tujhe ho hee nahin sakta Guruji kee chinta ka anumaan.

Tu karta chal Unka vandan
Tu karta chal Unka chintan
Ek Ve hee kar sakte Hain teri chinta ka khandan
Har laukik rishte se anmol hai Unke sangg tera ruhaani alaukik bandhan.

Toone laakhon jatan kiye apni oar se
Phir bhi na gaya Guru dar se mukh moad ke
Buss, aise hee shraddha aur vishwaas dhar
Tere sabr tere shukr ka hoga asar.

Bakhshish se garbhit baadal tujhe rahe hain gher
Dekhna, sulajh jaayega karmon ka her-pher
Beshak prateet ho rahi hai Guruji kee oar se der
Lekin yahee der sahi samay par laayegi ek sundar sunehri saver.

🌹🌹🌹🌹🌹🌹🌹

Jai Guruji 🙏🏻🙏🏻
Dhirja

Sabr Aur Shukr Har Pal (01/22/2024)